Áfuriduni14
Hánhiñuraguni Ísüraelina Barana Funati
1Lariñaga Bungiu lun Moisesi:2—Ariñagabá houn Ísüraelina lun hegeyedun, lun hemeraagun ligibugiñe fulasu le gíribei Pi-airotu, labadinagua Migüdólu luma barana, ligibugiñe Baali-sefón. Lun híchugunu hakianpun ligibugiñe fulasu le lubadubei barana.3Ábame lariñagun urúei lúnguarügü: «Ibidiñeti houn Ísüraelina haliñounba lan houdin». Hayuridaguña lidan fulasu mageirawati.4Nadügüba lun tedererun lanigi urúei, lun léibaahanün, ábameti narufuduni nubafu luagu hau sun lisudaranigu, ábame hasubudiruni Ehiptuna luagu au lan Aburemeibei.Aba hadügüni Ísüraelina ítara.5Danbei lariñawagún lun urúei luagu ñǘdünha lan Ísüraelina, aba lasansiragun laritagun urúei hau sun lánigu habügürü Ísüraelina, aba hariñagun: «Ida liña san wígirunbei lun houdin Ísüraelina, lun lásurun hawadigimaridun woun?»6Aba líchugun urúei dimurei lun taranserún likarün to lánina wuribu, aba lanügüniña lisudaranigu lúmagua.7Barüti sisi-san tídangiñe tubuidun-agei karü, bóugudin tuéi sun karü to Ehiptuboun to ñein lubéi aban ábuti tidan kada aban.8Deregüda lumutu Bungiu lanigi urúei lun lídiba lan hárigi Ísüraelina, lau sun lau lan ubafu wéiriti háfurida Ehiptugiñe.9Aba háfuridun Ehiptuna hau sun hasudaranigu tau burí karü hama gabayu, aba hárügüdüniña laru barana, lubadu Pi-airotu, ligibugiñe Baali-Sefón le ñein lubéi hemeraagua.10Dan le harihinbei Ísüraelina layarafaduña lan urúei houn hau sun Ehiptuna, aba hanufudedagun, aba hamuriahan luma Bungiu lun líderaguniña.11Hariñaga lun Moisesi:
—Kame basagarawa Ehiptugiñe lun wóunwegun ya lidan fulasu mageirawati, kamá hamuga úati umúahaü Ehiptu? Kame badügei le woun?12Anihán méhaga le wariñagubei bun Ehiptu: “Ígirabawa lun wawadigimaridun houn Ehiptuna: Himei wamuti hadamun wamá sügǘ lau wóunwegun lidan fulasu mageirawati!”13Lariñaga Moisesi houn:
—Manufudeda humá, deregüdagua humá, harihaali le lunbei ladügüni Bungiu uguñe lun lasalbarunün, ladüga marihindigia humaaña Ehiptuna ha harihubaña uguñe.14Madiheri humá, lageindaguba Bungiu huéigiñe.15Ábati lariñagun Bungiu lun Moisesi:
—Ka uagu bamuriaha lun níderagunibu? Ariñagabá houn Ísüraelina lun hawanserun habaruaguóun!16Buguya, iñurabéi bubadun, iñura búhabu, lun lafanreinragun barana lidan biama, lun hánhiñuraguni Ísüraelina éibugeina.17Nedereragüdüboun hanigi Ehiptuna lun hasigirunün, ábameti narufuduni nubafu luagu urúei hau sun lisudaranigu, likarün hama ligabayun.18Danme arufuda naali nubafu luagu urúei, likarün hama ligabayun, hasubudirubei Ehiptuna luagu au lan Aburemeibei.19Lidan oura ligía, aba lasansiruni lani Bungiu ánheli luma dúeri le habá habaañahabei Ísüraelina habara, aba houdin hanagangiñoun.20Ábati lerederun dúeri habadinagua Ehiptuna hama Ísüraelina; búrigagüdati hau Ehiptuna, gama lumoun harugoungadagüdati houn Ísüraelina. Ligía lásiñarunbei hárügüdüniña Ehiptuna Ísüraelina lidan sun áriebu.21Aba liñuruni Moisesi lúhabu luagun barana, aba lóunahan Bungiu aban garabali héreti luéigiñe oubaü le ñéingiñe lubéi laboucha weyu, aba láfurun sun áriebu, aba lafanreinraguni barana lidan biama. Ítara liña ladügüni Bungiu barana múame mábeiti;22ani luéigiñe múa mábeiti hánhiñuraguei Ísüraelina, labadinaguagiñe bián baríeiru lauti duna, aban luéigiñe hóunwenren aban luéigiñe habaünan.23Aba hebelurun sun ligabayun urúei tuma sun likarün hárigi darí lamidan barana;24gama lumoun luagun larugadun, aba larihin Bungiu hawagun Ehiptuna lídangiñe watu gemeti luma dúeri, aba lachagaraguagüdüniña;25aba lagünrinchaguni tubalabala hakarün, aba hámaru lan hawanserun. Ábati hariñagun Ehiptuna.
—Éibaagua wamá hawéi Ísüraelina, ladüga lageindaguña Bungiu wama haweigiñe.26Lariñaga Bungiu lun Moisesi:
—Iñurabéi búhabu luagun barana lun ladunragun lárigoun darugua láamuga hau Ehiptuna tau sun hakarün hama hagabayun.27Aba liñuruni Moisesi lúhabu luagun barana, larugan binaafin ábaya ladouragun barana lárigoun. Dan le háluahanbei Ehiptuna háfuridun, siñá, aba lañaradaguagüdüniña Bungiu baranaha.28Dan ladouragunbei barana lárigoun aba tabuluchun sun karü hau sun gabayu hau sun Ehiptuna ha ebelurubaña hárigi Ísüraelina, meredeti ni aban lisudaran urúei wínwanñu.29Ánhañati Ísüraelina hiñugua hamuti barana lídangiñe múa mábeiti, labadinaguagiñe bián baríeiru lauti duna, aba luéigiñe hóunwenren aban luéigiñe habaünan.30Lidan weyu ligía, aba lasalbaruniña Bungiu Ísüraelina hawéi Ehiptuna, aba harihiniña Ísüraelina Ehiptuna hilaguaaña laru barana.31Dan harihinbalin Ísüraelina óunwenbu lubafu Bungiu le larufudubei hawagu Ehiptuna, aba habuluchagun ligibugiñe Bungiu, aba hemenigidun luagu luma luagu Moisesi.
Bible Society of Honduras