1करिन्थ7

1तियीं गोठीइ बाप्तिमेहें जे तुमू लेख्यी, ओं हाजो होय के माटी बोईंहीं आथ ने लागाड़ुहूं जोवे.2पोन सिनालाआ बिकेवाअहीं आखा माट्योअ लाडी जोवे, आन आखी बोईंइं जिवज्योअ माटी रोअहूं जोवे.3माटी तियाआ लाडीइ हक्क पुरो कोअहूं जोवे; तेहेंज कोइत लाडी बी सोताआ माट्योअ हक्क पुरो कोअहूं जोवे.4लाडीही तियीइ डिलोपोअ आधिकार नाहां, पोन तियाआ माट्योहो आधिकार होय; तेहेंज कोइत माट्‍योहो बी तियाआ डिलोपोअ आधिकार नाहां, पोन लाडीही आधिकार होय.5तुमू एकमेका रोत आलाग मा रोहा; पोन निस्ती थोड़ीक वेल जाआं तुमा तुमाआं समजदारी वाअहीं प्रार्थनाअ काजे वेल जोड़ुहूं जोवे कोत अलग रोवा, आन तिहीं रोत फाशेए आरीज रोवा; तुमाआं समजदारी ने मिकीइलोअ वोजेसे सैतान तुमुहूं पारजाणाम टाकुहूं जोवे.
6पोन आंय जों कोहो तों परवानगी कोत कोहो, आदेश कोत नाहां कोतू.7माआं इश्शा ए होय के जेहलुहू आंय होय, तेहेंज कोइत आखे माहें रोअहूं जोवे; पोन हारेकोहो देवोप रोत अलग अलग वरदान जोड़्योहो; कोडाहा काअली जातीइ, आन कोडाहा कोड्ली जातीइ.
8पोन जियींइं वेहवाल नाहां ओवो, तियीं जुवान्यीइं आन रोंडोअ बायहींइं बाप्तिमेहें आंय कोहो के, तुमू माआं होस रोहा ताहां तुमाआं हाजो होय.9पोन जियाहा सोताआ मोन ताबाम ने मिकाअतोय, ताहां वेहवाल कोइत लेअहूं जोवे; काहाके वेहवाल कोइलोअ ओं आब्जाड़ा कोअते फिरतेहे तिया रोत हाजो होय.10जियांआं वेहवाल ओत गोयोहो, तियांहां आंय नाहां, पोन प्रभु आदेश आपेहे के, बोईं सोताआ माट्योहो ने सोड़ुहूं जोवे.11आन जर सोड़ीत जाती बी रोयी, ताहां बिहीरो वेहवाल ने कोअहूं जोवे; नेत तियीइ माट्योअरी फाशीइ आवती रोअहूं जोवे, आन माटी सोताआ बोईंहीं ने सोड़ुहूं जोवे.
12बिहीराहा प्रभु नाहां पोन आंयज कोहो, जर एखा पायहोअ बोईं विश्वास ने कोअतीय आन तियाअरी रोअलोअ राजी ओय, ताहां तो तियीही ने सोड़ुहूं जोवे.13जियी बायीइ माटी विश्वास ने कोअतुय, आन तो तियीइरी रोअलाआ इश्शा कोअतुय; ताहां ते बोईं तियीइ माट्योहो ने सोड़ुहूं जोवे.14काहाके एहेलुहू माटी जो विश्वास ने कोअतुय, तो लाडी वाअहीं देवोअ माअहोंअ भाग बोणेहे; आन एहेली बोईं जे विश्वास ने कोअतीय, ताहां तियीइ माट्यो वाअहीं ते सोकी बोणेहे; नेत तुमाआं बालबासे एठे रोते, पोन तें ओमे सोके होय.15जो कोडो विश्वास नाहां कोअतो, जर तो अलग ओवतो ओय, ताहां अलग ओवुहूं द्या, एहेली गोठीमेहें कोडोज पाही, नेत बोअह्हीं बांदाअलो कायनाहां. देवे तुमुहूं होकेहे रोय तेहें हाद्येहे.16काहाके ए बाय, ताआ वोजेसे ताआ माटी वासात जाय एहलोहो ताहूं नाहां लागतो के? आन दादा, ताआ वोजेसे ताआ बोईं वासात जाय एहलोहो ताहूं नाहां लागतो के?
17जेहें कोइत प्रभु हारेक जोओंहों दान वाटीत आप्योहो, आन जेहें कोइत प्रभु हारेक जोअहों हाद्योहो, तेहें कोइत तों सालुहूं जोवे, ओ आदेश आंय आखी मंडड़ीहीज आपोहो.18जियाहा खतना ओवलोज हाद्यो, तों विण खतनाआं ने बोणो जाअहूं जोवे. जियाहा विण खतना कोआलोज हाद्यो, तों खतना कोओ ने जाअहूं जोवे.19खतना ओवलो बी किज कामोअ नाहां, आन विण खतनावालो बी किज कामोअ नाहां; पोन देवोअ आदेश मानीइलो ओंज कामोअ होय.20हर एक जोओं जियी दशामेहें हादाअयोय तियीज दशामेहें रोअहूं जोवे.21ताहूं गुलाम ओतू तेहेंज देवे हाद्‍युय ताहां, फिकर मा कोअही; पोन जर तु सुटका कोइत सेकतुय, ताहां तेहेंज कोइत कोशित कोअ.22काहाके जों गुलामीम ओतो तेहेंज प्रभुमेहें हादाअयोहो तों प्रभुउ सुटलो माहुंउं होय; तेहलोज जों सुटलो ओतो तेहेंज हादाअयोहो, तों ख्रिस्ताआ गुलाम होय.23देवे तुमुहूं किंमत आपित वेसाते लेदेहे, तिहीं वाअहीं तुमू माअहोंअ गुलाम मा बोणहा.24पाव्हीइला, जो जियी दशामेहें हादाअयोहो तों तियीज दशामेहें देवोअ संगतीम रोअहूं जोवे.
25कुवांरीइं कोअते प्रभुउ कोड्लू नोवू आदेश कायनाहां; पोन इमानदार रोअलो काजे जेहलीही दया देवे मापोअ कोअयीही, तिहींज वाअहीं आंय माआं मोनो वाअहीं कोहो.
26माहूं एहेलोहो लागेहे के, आज काल तारासोअ दिहोअ वाखरी, माहुंउं जेहलोहो होय तेहलोज रोअहूं जोवे.27जर ताआ लाडी ओय, ताहां तियी रोत आंगे रोअहूं मा होदही. जर तु सोड़लू ओत गोयुय, ताहां लाडी होदू मा जाही.28पोन जर तुमे वेहवाल कोअयो, तों बी गुनू कायनाहां; जर कुवांरी वेहवाल कोअयो, ताहां तो गुनू कायनाहां; पोन एहेलाहां दुन्यामेहें दुख भोगीइलो आवेहे, आन आंय तियांहां इंहींम रोत वासाड़ुहूं होदोहो.
29पोन आंय कि कोहो, वेल थोड़ी होय, तियाहा काजे जियांआं लाडी होय ते बिगर लाडीवालाआ होसर्‍याआ जिवुहूं जोवे;30आन जें रोड़तेहे तें ने रोड़त्ले जेहें रोअहूं जोवे; आन खुसीम रोनारे ने खुसीम रोत्ले जेहें रोअहूं जोवे; आन वेसातो लेनारे एहेलेहे जोवे के तियांपोअ किज कायनाहां.31जें यी दुन्याअरी वेवारो कोअतेहे तें दुन्यादारीइ फाट ने लागुहूं जोवे; काहाके यी दुन्याआ रिती आन वेवारो सेलाअतो जाहे.
32पोन तुमू सिंताम ने रोअहूं जोवे एहेलिही माआं इश्शा होय. जियाआ वेहेवाल नाहां ओवो, तों प्रभुहू खुस कोइलोअ धुंदीम रोहे.33पोन जियाअ वेहवाल ओत गोयोहो, तों माहुंउं दुन्यादारीइ सिंताम रोहे के सोताआ लाडीही केहें कोइत खुस मिकीत सेके.34वेहेवालोवाली आन कुवांरीम बी फरक होय: कुवांरी देवोअ गोठीइ सिंताम रोहे के डिल आन आत्मामेहें सोको रोत सेके; पोन जे वेहेवालोवाली होय ते दुन्यादारीइ गोठीमेहें सिंता कोअतीही के सोताआ माट्योहो केहें कोइत खुस मिकीत सेकाय.
35ए गोठ आंय तुमाआंज हाजाआ काजे कोहो, तुमुहूं बंधनम पाड़ीइलोअ काजे नाहां, पोन एताआ काजे के तुमू एक मोन ओत कोइत देवोअ सेवामेहें लागीत रोअहूं जोवे.
36जर एखाहा एहलोहो लागतोय के तियाआ पोर्‍यीइ हक्क बुउसोहो, तियीइ वय सेकेहे, आन गरज बी होय एहेलोह लागतोय, ताहां जेहलीही इश्शा ओय तेहेंज कोअहूं जोवे, यामेहें गुनू कायनाहां. तियीइ वेहवाल कोई देअहूं जोवे.37पोन जिये वेहवाल ने कोइलोअ बाप्तिम ठरवित लेदोहो, आन तियाहा दाबाव बी कायनाहां, पोन मोनोअ इश्शा ताबाम ओय आन तियाआ कुवांरी पोर्‍यीइ वेहवाल ने कोइलोअ इश्शा ओय, ताहां तो हाजू कोअहे.38तियाहा काजे जो पोर्‍यीइ वेहवाल कोअहे तो हाजू कोअहे; पोन जो वेहवाल नाहां कोइत आपतू तो जाअखो हाजो कोअहे.
39वेहवाल ओवली बायीइ माटी जाअहूं जाआं जिवतु होय, ताअहूं जाआं ते नियमोमेहें बांदाअली होय, पोन तियीइ माट्योअ मोयात ओत जाय, ताहां फक्त प्रभुमेहें विश्वासी ओय आन जिया विश्वासीइरी तियीइ इश्शा ओय तियाअरी ते वेहवाल कोइत सेकेहे.40पोन जर ते बिगर वेहेवालोअ रोयी, ताहां माआं विसारोमेहें ते जाअखी आशिर्वादीत ओवे, आन माहूं लागेहे के मामेहें बी देवोअ आत्मा होय.

The Word for the World International

https://app.library.bible/content/6cbf4027f9a13b9c