1करिन्थ6
1जेहेलाम तुमामेहें एकदा विश्वासीइरी भान्गड़ ओय, ताहां ते भान्गड़ मिटाड़ीलाअ कोअते, बिगर विश्वासी न्यायाधिशोअ सामने लेत जाअलोअ हिम्मत काहा कोअतेहे.2देवोअ माअहें दुन्याआं न्यायनिवाड़ु कोअनारे होय, ओं तुमुहूं नाहां मुंदू के? आपू जर दुन्याआं न्यायनिवाड़ु कोअनारा होय, ताहां एहेलिही हानी गोठीइ न्यायनिवाड़ु कोइलोअ लायक कायनाहां के?3आपू देवदुतोंअ न्यायनिवाड़ु कोअनारा होय, ओं तुमुहूं मुंदू होय ना? ताहां दुन्यादारीइ गोठीइ न्यायनिवाड़ु काहा नाहां कोइत सेकता?4जर तुमुहूं दुन्यादारीइ गोठी डेवीइली ओय, ताहां मंडड़ीमेहें जियांआं कीज किंमत कायनाहां, एहेला माअहुंहूं न्यायनिवाड़ु कोए तेहें काहा बोहाड़ताहा?5आंय तुमुहूं लाज आवेतेहें काजे एहें कोहो, विश्वासी पायहोंमेहें न्यायनिवाड़ु कोए एहेलुहू तुमामेहें एक जोओं बी कायनाहां के?6पोन एक विश्वासी बिहीरा विश्वासी पोअ केस कोऊ कोर्ठाम जाहे, तो बी बिगर विश्वासी माअहोंअ सामने!7पोन तुमा एकमेका मेहेंज कोर्ठाआ केस नेहें ओवतीही, यामेहें नुकसान तुमाआंज होय. तेताआ वोतीइ तुमू अन्याय काहा नाहां वेठता, आन सोताआ नुकसान काहा नाहां सहन कोअता?8पोन तुमू तोम अन्याय कोअताहा आन नुकसान कोअताहा, आन तों बी पाव्हीइलाआं!9केहें तुमुहूं नाहां मुंदू के अन्यायी माअहें देवोअ राजोअ वारिस ने ओवे? ठोगाअहा मा; कोडे बी गारताड़े, मुर्तीपुजा कोअनारे, सिनालें, बिगड़ीइल्या सिनाल माटी आन माट्योअरी माटीज राखाअनारा,10बांड, लालसी, पिदाड़, रोवा कोअनारे, नेत लुटमार कोअनारे यांहां देवोअ राज्याआ वारिस हक्क ने जोड़े.11तुमामेर्येए केतेहे एहेलेज ओते, पोन तुमू प्रभु ईसु ख्रिस्ताआ नावसे आन आमाआं देवोअ आत्मा वाअहीं तुवाअयेहे आन सोके ओवेहे आन धर्मी ठऱ्येहे.12एखु कोय, “आखी गोठी माआं काजे ठिकुज होय,” पोन ते आखी गोठी लाभोअ कायनाहां; आखी गोठी माआं काजे नियमोअ पुरमाणे ते होय, पोन आंय काअलीज गोठीइ गुलाम नाहां बोणनारु.13एखु कोय, “रोटू पोटाआ काजे, आन पोटू रोटाआ काजे होय.” ओं खोरो होय, पोन देव यां बेनुहूं आरवी देय. डिल सिनालो कोइलो कोअते नाहां, पोन प्रभुउ सेवा कोइलो काजे होय; आन प्रभु डिलोअ गरज पुरी कोअहे.14देवे तियाआ सेक्ती वाअहीं प्रभुहू मोल्याम रोत जिवाड़्यू, आन तो आमुहूं बी जिवाड़े.15केहें तुमुहूं नाहां मुंदू के तुमाआं डिल ख्रिस्ताआ डिलोअ भाग होय? ताहां केहें आंय ख्रिस्ताआ डिलोअ भाग लेत कोइत रांडीइ डिल बोणावो के? बिलकुल नाहां!16केहें तुमुहूं नाहां मुंदू के जों कोडो रांडीइरी हेंगात कोअहे, तों तियीइरी एक मोन ओत जाहे? काहाके लेख्योहो, “तें बेनू एक डिल ओवे.”17आन जो प्रभुउ संगतीम रोहे, तो तियाअरी आत्मामेहें एक ओत जाहे.18सिनालो कोइलो रोत वासाइत रोवा. जे बिहीरा पाप माहुंउं कोअहे ते डिलोअ बारथेए होय, पोन सिनालो कोअनारु सोताआ डिलोअ विरुद्धामेहें पाप कोअहे.19केहें तुमुहूं नाहां मुंदू के तुमाआं डिल तुमामेहें रोनारा पवित्र आत्माआं मंदिर होये, आन तों देवोअहीं रोत तुमुहूं जोड़्योहो? आन तुमू सोताआ काजे कायनाहां, पोन देवोअ काजे होये.20काहाके तिये तुमुहूं किंमत आपित कोइत वेसाते लेदेहे, तियाहा काजे तुमू सोताआ डिलो वाअहीं देवोअ महिमा कोआ.
The Word for the World International