Meng Lai68
Mami dow David kowh meng chekhai.
1Aw Thurai, awr rü hanow en ransu-uüa kowi setta plawt diah,kingküa en miuüa maten kowi en pur hownia prütta diah.2Amatni kowi dow maikhük iawng cham pe rownah diah,maru ngakuüa dow maih hown iawn maih chawr iawng en pur kowi pacham tapiak lah.3Nachenganchepaw achinawmma miuüa dow pacham awmrawm lah;amatni dow Thurai pur kowi pacham piaw lah,now apiaw apama hown pacham awmrawm büah lah.4Thurai vüi kowi tek meng büa diah,aia ming kowi tek rowsi meng büa diah.Aia dow uangnim dawng hownia kawrnga kari hown uang tarü khowk.Naiawng rakowi aia vüi kamrüt pe tiama büa diah.Aia ming dow CHAKRAMANG chekhai,aia pur kowi piaw büa diah.5Thurai dow chimsaima mih uowi rah kowi uowi mih chekhai;aia dow saratchowuüa kowi mih pa iawng mingkhetah reng,now mamaimowuüa kowi paw mingkhetah reng chekhai.6Thurai dow kimchak uowi dowi mih maru kowi peah kimchak reng,aia dow nar kowi takhang miuüa kowi lawngah hanow peah iungra reng.Tawkche aia kowi kowh kingküaah miuüa kowi dow aia ripah reng chekhai,amatni kowi dow kangkhawngma panow adenma mih süng kowi aia towah reng chekhai.7Aw Thurai, en kowh maru-uüa pur kowi en rik mang khe,süngrüp süngkangma iawng en maru-uüa kowi en pawla khai. [Sela]8Nakhowk khe lusa mih chür nukluk khai,now mukuang hownia uangchak uang khai.Naiawng phaw mih dow Sinai hungh kowi kowh Thurai pur kowi chekhai,en matia pur kowi, Israeluüa kowh Thurai pur kowi chekhai.9Aw Thurai, uang achakma en uang iu pe anging khai,kangkhawngma mih en kowh pren kowi asima en changah khai.10Nami pren kowi dow en kowh maru-uüa changla uowi rah khai,en kowh iungra hown ngarai miuüa kowi lakke mih sia en peah reng chekhai.11CHAKRAMANG dow maru kawmuüa kowi peah ana reng;nahanow nami satang dow masiuüa akawmma krawi phuang reng.12Naiawngün masiuüa hawmh krawi tek mih,“A-i kowh ransu siphaiuüa hai manguüa powt bowk khowk,” pakhai.Now kim kowi uowi mih masiuüa hawmh dow ransu-uüa ta towla mih uanh ta taret büah khai.13Ruapur tung taum lut mih dawnglang kowi uowi miuüa khowm padow kuh hai tai uanh tawi ka khai;amatni khowm padow tai hown thawp pe alap hanow kuh hown sow pe apawi mih uatur tawi ka khai.14Pren hownia manguüa kowi lang kri lang kraing mih Thurai setta plawt khe,Zalmawn hungh kowi nangkhe uang kla khai.15Basan hungh dow Thurai kowh hungh chekhai;nami hungh dow akroma chekhai,now nakowi dow chut uowi ahuma chekhai.16Aw Basan hungh, tawngplawng kowchow Zaiawn hungh kowi mik ngak hown en tuk müah khai?Zaiawn hungh dow chowngchowng saksakma aia nauowiah kownkow Thurai lang kloah mih chekhai.17Thurai dow kawrnga kari athawng aiawng hown uang tarü khowk,aia dow Sinai hungh hownia aia kowh chimsaima mih arah kowi uang tarü khowk.18Aia dow hungh alowngma mih kowi kowpün khai,aia dow nar kowi cham takhang miuüa kowi kruila khai.Aia dow maru-uüa hownia hawt paw awmrawm sung khai,aia kowi kingküaah miuüa hownia paw hawt paw awmrawm sung khai.CHAKRAMANG Thurai dow nakowi nauowi reng kown.19CHAKRAMANG kowi kiow büa diah,aia dow ni towng a-i kowh kurdik kur a-i reng chekhai.Now aia dow a-i kowh lawng miia Thurai chekhai. [Sela]20A-i kowh Thurai dow lawng miia Thurai chekhai,CHAKRAMANG Thurai dow kowngra hownia towkala a-i reng chekhai.21Tawkche aia dow aia kowh ransu-uüa kowi nadita pe lu naknak kown,chang lup ngak miuüa maten kowi aia dow nadita pe lu naknak kown.22CHAKRAMANG tek mih, “Ransu-uüa kowi Basan pren hownia ang nauang pawla kown,sata thing kowi cham uowi chepaw nami hownia amatni kowi ang nauang pawla kown.23Naiawng ang nachangah kown mih dow en kowh ransu-uüa vi hown en naia saula khawk kownkow chekhai,now en kowh kui hawmh mih nau mowr naka biala vi kownkow chekhai,” pakhai.24Aw Thurai, en kowh awngra dow maru maten khi bowk chekhai,aia kowh chimsaima mih arah pra ang kowh mang Thurai mang mih dow maru khi chekhai.25Rik mang miuüa dow meng sarauüa chekhai,amatni kung kowi kowh krawi mang miuüa dow tünteu chang miuüa chekhai;nami takra kowi krawi mang miuüa dow sawkchow tep mih masiuüa hawmh chekhai.26Thurai maru-uüa kowh takua kri kowi Thurai kowi rowsiah diah;enni Israel krungchakuüa low, CHAKRAMANG kowi rowsi büa diah.27Rik mang mih dow bowkbowk lak-e kowh sawi mih Benjamin krungchak chekhai.Nami kung kowi krawi mang mih dow Juda krungchak aluchowuüa chekhai;amatni rut kowi dow mang raitua uowi chekhai,now amatni kowh dow thumchak aiukma chekhai.Nami kung kowi krawi mang mih dow Zebulun krungchak aluchowuüa chekhai,now nami kung kowi krawi mang mih dow Naptali krungchak aluchowuüa chekhai.28Aw Thurai, en kowh kürra uang tüng diah,alai kowh en tangila anging khe kowh iawng en kowh kür uang tüng anging iawk diah.29En kowh chup kim dow Jerusalem marow kowi chekhai,nakowi en tut-e manguüa nauang pawla en awmrawm sung kown.30Amatni hai amatni uang pawla mih tai di tai sek ün dow thuata pe nak diah.Uaklung taw kowi kowh tapet mih kaurawng uaramchak kowi en nangah iawngAigupta chenchapuüa kowi dow nangah diah.Now chia iia kowi akürma mih chiala nowngah iawngakürma mih chenchapuüa kowi nowngah diah.Tasen dawma mih chenchapuüa maten kowi dow piakah reng diah.31Mang kowh ria mang miuüa dow Aigupta pren hownia nauang kown,Ethiawpiauüa dow nalü khowng kownkow Thurai tut-e alenma naiaw rut kown.32Aw lusa kowi kowh pren maten, Thurai vüi kowi tek meng büa diah,enni bowkbowk CHAKRAMANG vüi kowi tek rowsi meng büa diah. [Sela]33Aia dow alai kowh aia thawpah mih mukuang kowi kawrnga kari hown krawi mang khai,sünta büa diah, aia dow atün atünma tek lai khowk.34Thurai dow akürma chekhai pami krawi phuang büa diah,aia kowh kraingra dow Israeluüa luk kowi uowi reng chekhai,now aia kowh kür dow mukuang kowi atekma uowi reng chekhai.35Aw Thurai, en kowh chimsaima mih arah dow ringkawma hown kramra uowima chekhai,Israeluüa kowh Thurai dow aia maru-uüa kowi nowng changra hai kürra peah reng chekhai.Thurai dow akiow pacham uowi reng lah.The Seed Company