Meng Lai69
Mami dow David kowh meng chekhai. Mami meng dow “Kra pau” meng owi iawng natekah kown.
1Aw CHAKRAMANG, uang lawng ang diah,tui kowi tamir mih iawng ang uowi khai bowt.2Neng abüpma mih kowi ang tamir khai bowt,nakowi dow ang ka iowngra dowi bowt chekhai.Abüpma mih tui dawng kowi ang uang towm khai bowt;tui lawt khe kowh tui dow ang luk iawng uang hawr khai bowt.3Ang haw en lai bowt kowh ang kow uak khai bowt,ang kowh kraw paw kang khai bowt.Ang kowh Thurai nauang lawng ang kown mih kowi ang hawt tang mü mih,ang kowh mik paw apuarunma towbowt.4Aiawnglowma sui ang miuüa dow ang kowh samiang lak-e lang hu chekhai,piak ang kown nau miuüa dow akürma kangowh chekhai.Amatni dow aiawnglowma ang lawnguan kowi tek dai lai khai,amatni dow ang cham kuah dowi mih uanh paw pe iaw ang khai.5Aw Thurai, ang dow bualama pami en aiawng tuk chekhai,ang kowh angak dow en tut-e ia tapet dowi chekhai.6Aw lang kri lang kraing mih CHAKRAMANG, cham en reng miuüa dow ang rakowi hang pacham ka rukrai lah.Aw Israeluüa kowh Thurai, tuk en kown sakkrai miuüa dow ang rakowi hang pacham ka rukrai büah lah.7Tawngplawng kowchow panow tangila en rakowi ang kham rukrai khai,rukrai rakowi ang ka lumowr towk rah dowi bowt.8Ang tainau-uüa tut-e khowm padow ang chowng maru lang khai bowt,ang kowh machakuüa khowm changla ang prenlang maru khai bowt.9En kowh kim kowi lainowmma ang sakrau khai.Naiawng rakowi ang kowh sak dow kam iawmlawm khaiEn kowi kowh pe en mih rukrai ang luk kowi uang kla khai.10Kar hai hawm khang hown akawmma ang uowi khai;nami khin khe maru kawmuüa dow prawngren ang khai.11Uowila uiting uangtak mih natüngla kownkowang khup sala uan khe maru khare ang khai.12Marow tapplawt kowi kowh chowm miuüa pat prawngren ang khai,pua miuüa khowm padow changla ang amatni kowh meng lai khai.13Aw CHAKRAMANG, en tut-e ang uang lü uang leng khai,en khowm bowkta mih khin kowi uang klang ang reng diah.Aw Thurai, en kowh achur uowi dowi mih sakraura hai kaah sakowm mih rah hown uang lawng ang diah,ang awr lü awr leng mih hawt sünta ang hanow uang lawng ang diah.14Suplawk dawng kowi tadup mih hownia uang lawng ang diah,nami suplawk dawng kowi hauang pe tadupta ang hüah diah.Ang kowh ransu-uüa rut hownia uang lawng ang diah,hawr klunglung mih tui hownia uang lawng ang diah.15Tui lawt khe kowh tui mih ang luk kowi hauang pe hawrah diah,abüpma mih tui dawng kowi hauang pe tamir ang diah.Kowngra kuam kowi hauang pe tadup ang diah.16Aw CHAKRAMANG, en kowh achur uowi dowi mih sakraura iung hown uang klang ang diah,en kowh achur uowi dowi mih saksing sanara hown ang prakowi uang dang diah.17En kowh nar hownia en kowh lumowr mih hangkow cham dangta khai diah;ang kla phih khai bowt! Alenma uang khowng ang diah!18Ang tut-e uang now uang lawng ang diah,ang kowh ransu-uüa hownia uang lawng ang diah.19Mün khowt chow maru sui ang hai pe ang rukrai mih en tuk towbowt;En dow ang kowh ransu-uüa maten kowi tuk bowk chekhai.20Maru sui ang lai bowt rakowi ang kowh sak piak khai bowt.Naiawng rakowi ang arau uowi prang towbowt.Ang krat mih khin khe maru saksing sana ang kown mih chowdiah ang nau.Nachenganchepaw ang nauah iawng ang ka dowi chekhai.Nape ang sakkhawtra kown mih maru ang nau chowdiah.Tawkchedow mia kowi paw ang ka dowi chekhai.21Amatni dow ang kowh chakkham kowi the ang ket khai,now ang tui sakkrai khe amatni dow pe kham ang tui sur khai.22Amatni kowh chakkham pawi dow amatni vüi tasowk müa leng pacham chowng lah,“Thaulangma anging uowi,” pahai amatni tatuak mih dow amatni takhuowk müa pacham chowng lah.23Amatni nakhila dowi kownkow amatni kowh mik pacham du lah,now amatni kowh kelang dow pacham uak lah.24Amatni luk kowi dow en kowh kunmaraura uang pe klaah diah,en kowh maih iawng lün pluplup mih kunmaraura dow amatni luk kowi uang pe tingah diah.25Amatni kowh uowi rah dow akhaw aklaima pauowi lah,amatni kowh tangbung kowi amiapaw hang pauowi lah.26Amatni dow en ripah mih maru kowi changah nowng khai;en peah arau miuüa kowi amatni dow changla talawp müa khai.27Amatni kowi dow pe changah angak ngamlam diah;amatni dow en kowh lawngra hang pacham tawi ka lah.28Amatni kowh ming dow Masing Bowih hownia phiawkta pe diah;Thurai kowi ringkaw miuüa ming tang bowih kowi amatni kowh ming dow hang pacham tawi uowi lah.29Ang dow tuak krat hai arau dawng kowi ang uowi khai;Aw Thurai, krüng ang diah, now lawng ang diah.30Meng hown Thurai kowi ang narowsiah kown,awmrawmma hown aia kowi ang nakiowriah kown;31chiala, anang hai akeh uowi mih chiala phuchua lak-e,ang kowh rowsira CHAKRAMANG nalang sak-ih kown.32Ang kowh lawngra khi hanow khamsum khamdawma miuüa dow naawmrawm kown,now Thurai kowi krawi cham reng miuüa dow naka süngürra kown.33CHAKRAMANG dow akhawr hown uowi miuüa kowh laiklow hawt sünta pe reng;nar kowi cham takhang mih aia maru-uüa kowi aia dow asowmchow müah dowi chekhai.34Mukuang hai lusa dow CHAKRAMANG kowi pacham kiowah lah,sata hai sata kowi kowh uowi mih maten aia kowi pacham rowsiah lah.35Tawngplawng kowchow panow Thurai dow Zaiawn kowi nalawngah kown,aia dow Judauüa kowh marow naplan thawpah iawk kown.Nakhowk khe dow aia maru-uüa mih nakowi nauowi iawk kown,now nami marow dow aia maru-uüa naka powng iawk kown.36Nami alow dow aia kowh nar krungchakuüa chowtaih naka kown,nakowi dow aia kowi kowh sakrau miuüa nauowi kown.The Seed Company