Läs Ester 1

Ester1

Mixti' niman B'asti te nimaqkawil Aswer

¹Aju' nimaqkawil Aswer toj Persya intoq kawin kyib'aj qaqnaq wuq (127) tnej tx'otx', tzajx jata' tx'otx' Indya, ponx jat'a Etyopiy,²ex atoqtzu' ta' tq'uqb'il tkawb'il toju' ttxuylaltnam Susa.

³Tojtzu'n toxi'n ab'q'i nkawin, kub' tq'o'n nimaqkawil Aswer jun ninq'ij te jun ninb'il kye kykyaqilju' nche kawin tuk'i'l ex onil ti'ju' kawb'il, kye kynejel t-xjal aj Persya ex aj Medo te q'oj, kye kawil ex kye nejenel kyib'aju' tnej tx'otx',⁴tu'n tyek'u'nte kye qa nim tq'inumal ex toklenju' tkawb'il ex tu'n txi' tyek'u'n tipumal nimxi'x toklen. Qaq xjaw tenju' ninq'ij lu,⁵tetzunj tb'aju' ninq'ij lu, kub' tq'o'n nimaqkawil juntl ninq'ij te wuq q'ij, twi' pe'n ja ta'qe' b'ech twitzu' tja kawb'il. Kykyaqilju' najlqe'toq toju' nintnam Susa, e'nimaq kyoklen ex mixti' kyoklen, eb'aj txko'n.⁶Wiq'o'ntl toqju' twipe'n tu'n tb'nail xb'alun saq ex ẍkul, tzyu'nqe' kyu'n taq'e'l q'in kyaq teqe'mix kyoj kẍkyin saqpwaqqe' k'lo'nqe'k kyi'j tqan ja saq ab'jqe'. Ex matxi'toq che kub' q'o'n nimaq q'uqb'il q'anpwaq ex saqpwaq, ex b'incha'ntoq twitz tx'otx' kyu'n tb'anil ab'j, tb'anil xlik ex saq ab'j.⁷Intoq sipanjtzju' k'wab'j kyoj kykb'el q'anpwaq, teyile junjun chukchaqqe', ex nimtoq b'in ati, kse'nxju' nkub' tq'o'n jun nimaqkawil.⁸Atzunte nimaqkawil ojetoq tchaq' kyeju' kynejelu' nche ajb'en toju' tja te kawb'il, tu'n mix-a'lo' jun tu'n tokchq'et tu'n tk'wan, qu'n teyile junjunju' txko'nqe' b'a'n tu'n tk'wante jni'ju' tajb'il.⁹Ex ikxte B'asti t-xu'jilu' nimaqkawil Aswer, kub' tq'o'n jun ninwan kye kyxu'jilju' txko'nqe' toj tja nimaqkawil Aswer.

¹⁰Tojtzu'n twuqi'n q'ij ninq'ij, inxi'xtoq tzalaju' nimaqkawil tu'n b'in, e'xi'tzun tchq'o'n Mewman, B'ista, Arb'on, B'ijta, Ab'akta, Setar ex Karkas, wuq ichan q'uqlixi'x tk'u'j kyi'j,¹¹tu'n tpon kyiq'i'n B'asti t-xu'jil nimaqkawil twitz, b'incha'ntib' tuk'i'lju' tkoron toj twi', tu'n kyjaw lab'tiju' tnam xjal exqe' nimaqxjal ajtokkyka'yi'n tb'anilxi'xju' t-xu'jil, qu'n tb'anilxi'xtoq.¹²Atzunte' t-xu'jil min taj tu'n tb'inchante tchaq'b'il nimaqkawil xitma'n kyeju' ichan q'uqlixi'x tk'u'j kyi'j tu'n txikyma'n te. Tzajtzun tq'oju' nimaqkawil b'a'nxi'x. Tuk'i'l ttx'u'jil,¹³xit-xjelu'n kyeju' kanlixi'x kawb'il kywitz, qu'n axtoq nb'inchetju' qa ati jun ti'xti' nb'aj ti'ju' nimaqkawil, nxitqani'n kyeju' ojtzqi'lxi'x kawb'il ex oklenj.¹⁴Kyxoltzun ja'lu, aye' nche ponxi'xju' tk'etz nimaqkawil aye' Karsena, Setar, Admata, Tarsis, Meres, Marsena ex Memukan, wuq xjal nimaq kyoklen toj Persya ex Medya, aye'toq jun kyxolju' xjal ate'kx toju' nimaq oklenj toju' tja nimaqkawil toju' kawb'il te nintnam.¹⁵Xi't-xjelu'n nimaqkawil kye:
—Kse'nxu' ntma'n toj kawb'il, ¿titi' knb'incha'ye' ti'ju' nxu'jile' B'asti tu'nju' min xitb'i'nju' xnchaq'e' te, ju' xinma'ne' kye nsanjele'? chij.

¹⁶Kywitzku'tzu'n junjunju' q'eltwitz kawb'il, xittzaq'we'n Memukan te nimaqkawil:
—Nimaqkawil, myana' naqxteku'ya soka' tb'incha'nte B'asti, ju' t-xu'jila, ikxkye kykyaqilju' ati kyoklen toju' kawb'il ex kye kykyaqilju' ichan kyoju' tnej tx'otx' ttzyunqe' tu'na.¹⁷Kna' kb'ajel kyb'i'n kykyaqil qyaju' xtb'incha t-xu'jila, axtzun kxe'l kykno'nju', lay che b'intl kye kychmil, qu'n alo kkyma'ju': Tchaq' nimaqkawil Aswer ttxokli B'asti ju' t-xu'jil, ex min taj tu'n txi', chechilo.¹⁸Ajtzulo kyb'inte kyxu'jilju' nche kawin tuk'i'la nimaqkawil toj Persya ex Medya, aju' xtb'incha t-xu'jila, oklo b'ajel kywulje'n kyuk'i'lju' kychmil tojxju' kmoj ja'lo, ktzajeltzun ik'b'iltz ex q'oj kyxol.¹⁹Qu'mtzun, qa b'a'n toj twitza nimaqkawil, tu'n texq'met jun tchaq'b'il nimaqkawil, ex tu'n tkyaj tz'ib'et kyxolju' kykawb'il aj Persya ex aj Medya, tu'n mikub'a naj, ikjalu: Mixti'tl tu'n tokx B'asti t-xu'jil nimaqkawil twitzju' nimaqkawil. Atzu'n toklen te t-xu'jil nimaqkawil tu'n txiq'et te juntl qya b'a'n xjalxi'x kyetwitz.²⁰Ati tu'n tex chik'b'etju' tchaq'b'il nimaqkawil lu toj tkyaqilju' tx'otx' ja nkawina'ya, che nimaltzun qyatz kykyaqil kye kychmil, alkyexku' kyoklen toj tnam, chi Memukan.

²¹B'a'n ela' t-xim Memukan toj twitzju' nimaqkawil ex toj kywitzju' q'eltwitz kawb'il, ex xitb'incha'n nimaqkawil ikju'.²²Xittz'ib'a'n u'j kyoj kykyaqilju' tx'otx' ja nkawina', tz'ib'a'n toj kyol ex tz'ib'b'entexi'x chaq kyol junjun tnej xjal kyoj junjun tnej tx'otx' tjaq' tipumal tkawb'il, xitq'o'n chaq'b'il kyoj tu'n tten kykawb'ilju' chmilb'aj toj kyja, ex tu'n kyyolin ti'ju' b'a'n toj kywitz. Sk'o'njtzu' Ster te t-xu'jil nimaqkawil

¹Yajxi'tzuntel, tkub'lenxi' tk'u'ju' nimaqkawil Aswer, ulu' B'asti toj tk'u'j, jni'xu' tb'incha, exu' chaq'b'il matxi'toq b'je'x q'met ti'j.²Xi'tzun kyma'nju' nche kawin tuk'i'l toju' tkawb'il te:
—In nojqelan tu'n kyjyet txin na'mx txi' tzyu'nkyi'j kyu'n ichan ex tb'anilqe' teya nimaqkawil.³Nimaqkawil, q'onqe'ka xjal kyojile kykyaqilju' tnej tx'otx' ja nkawina'ya, ex oqxeninxa kye tu'n kytzaj kyiq'i'n toju' tja kawb'il kye qya ati toj nintnam Susa, ex tu'n kyxi' tka'yi'n Ekay, ju' ichan q'uqlixi'x tk'u'ja nimaqkawil ti'j ex xq'uqil kyi'ju' qya. Ex tu'n kyb'jo'k tq'o'n Ekay toj jun b'inchab'l tu'n kyjb'e'l tb'anil txinqe',⁴atzunju' txin ma'xi'x kub' toj twitza nimaqkawil, atzun tu'n tokq'etju' toj toklen te t-xu'jila te t-xel B'asti, chechij te nimaqkawil.
B'a'n ela'ju' nab'l lu toj twitzju' nimaqkawil, ex b'inchet iku'.

⁵Najlitoq jun aj Juda toju' nintnam Susa, Mardokyey tb'i, tk'wal Jayir, kyyajajil Simi ex Kyis, kyxolju' tnej tyajajil B'enjamin.⁶Atoq jun Kyis kyxolju' txqan eb'je'x tiq'i'n nimaqkawil Nab'ukodonosor aj B'ab'ilon toj Jerusalen junx tuk'i'l Jekoniy, nimaqkawil toj Juda.⁷Atitoq jun tmyal ttzik mo titz'in tman Mardokyey, kyej meb'a kyu'n tma'n ex ttxu, oktq'o'n naku'j tmyal tej kykyimju' tman. Adasa tb'i mujqa Ster, majxtoq tb'nailxi'xju' txin lu.⁸Tetzunj tb'je'x tqanilju' chaq'b'il tu'n nimaqkawil ex nim txqan txin eb'aj b'u'yi'n toju' tja nimaqkawb'il toju' nintnam Susa ex e'kyaj q'o'n te Ekay xq'uqilkye qya tu'n kyxitka'yi'n, atitoqu' Ster kyxol.⁹B'a'nxi'x e'la'ju' txin lu tojtwiz Ekay ex kyexi'x tilwi tu'n, qu'mtzun okq'o'n tu'n Ekay toj b'inchb'il tu'n tel tb'anilxi'x ka'yin ex tb'anil wab'ju' twa xitq'o'n; eb'jo'ktq'o'n wuq txin tb'anil ajb'elqe' toju' tja nimaqkawb'il te ajb'el te, xitq'o'ntzuntz kyuk'i'lxi' wuq txin lu kyoju' tb'anil ja toj tja nimaqkawb'il kye qya.

¹⁰Mixti'xte Ster xitma'n alkyeqe' toj kyja ex tyajil, qu'n ojetoq txitma'n Mardokyey te tu'n lalun txitma'n.¹¹Intoqtzun b'et Mardokyey atl junjun q'ij tpenju' tja kawb'il kye qya, tu'ntoq tb'inte qa b'a'n ta' Ster, ex se'ntoq tilwi.

¹²Kykyaqilxju' txin eb'aj b'u'yi'n, eb'jo'k jun ab'q'i toj b'inchb'il tu'n kyel tb'anilqe'. Intoq b'aj sunju' kyxmilal toj taseytil mir toju' tnejel qaq xjaw, atzu'n toju' qaq xjawtl tu'n k'ok'sb'il ex krema najb'en kyu'n qya. Tetzunj tb'aju' b'inchb'il kye, teyile junjunju' txin lu intoq che okx toj junjunali'n yek'ulkyib' te nimaqkawil Aswer,¹³intoq xiq'o'n anb'il teyile junjun tu'n t-xitiq'i'n alkyexku' tajb'il toju' ja kye qya tu'n tpon tiq'i'n ajtokx toju' tja nimaqkawb'il.¹⁴Intoq xi' toju' tja nimaqkawb'il te qoniky'an, ajtzun qsqix te juntl q'ij intoq xi' toj juntl ja kye qya, ju' ati toj tq'ob' Saaskas, ichan q'uqlixi'x tk'u'ju' nimaqkawil ti'j ex xq'uqilkye tqya nimaqkawil; tb'ajlenxi'tzun ja'lu mixti'tl npontl twitzju' nimaqkawil, naq o'kx qama kub' toj twitzu' nimaqkawil exqa matma tu'n ttzaj txko'n jumajtl.

¹⁵Tetzu'n tponju' q'ij tu'n txi' Ster, tmyal Ab'yayil ttzik mo titz'in tman Mardokyey, yek'ultib' teju' nimaqkawil, naq o'kxte xitiq'i'nju' b'ajx tma'n Ekay te, ju' ichan q'uqlixi'x tk'u'ju' nimaqkawil ti'j ex xq'uqilkye qya. Tu'ntzun ja'lu b'a'n ela' Ster toj kywitz kykyaqilju' eka'yinte.¹⁶Pon iq'i'n Ster twitzju' nimaqkawil Aswer toju' tja te kawb'il, toju' tlajonji'n xjaw, axju' Teb'et, toj twuqi'n ab'q'i nkawin.¹⁷Tetzujn tok tka'yi'n nimaqkawil Aswer, Oklaqj ti'ju' Ster, kub'xi'x toj twitz kyekyitzu' txqantl txin eb'jik' twitz, iktzu'n tkanb'aju' tk'u'jlalil nimaqkawil Aswer, xtalinjtzxi'xju' Ster tu'n kyekywitzu' txqantl txin e'ten tuk'i'l, jaxtq'o'n tkoron t-xu'jil nimaqkawil toj twi' ex oktq'o'n toklen te t-xu'jil nimaqkawil te t-xel B'asti.¹⁸Kub'tzun tq'o'n jun ninwantz te ninb'ilte Ster, eb'aj tzaj ttxko'n kykyaqilju' nche kawin tuk'i'l exqe' nche onin toju' tkawb'i'l, kub' tq'o'n jun q'ij ojb'il kyoju' tnej tx'otx' tjaq' tkawb'il ex b'aj t-sipa'n txqan oyaj, kse'nxu' nkub' tq'o'n jun nimaqkawil. Eltnik' Mardokyey ti'j kyxim jun k'loj xjal tu'n tkub' kyb'yo'n nimaqkawil

¹⁹Kyojtzu'n q'ij intoq che pon q'i'nju' txin toju' junjtl kyja qya, q'uqlitoq Mardokyey ttziju' tja nimaqkawb'il.²⁰B'ajxtoq txa'tma'n Ster alkyetoq tnamil ex alkyeqe'toq twitze'l, kse'nxu' ojetoq txitma'n Mardokyey te, intoq tb'incha'nju' b'ajxni tma'n Mardokyey te, kse'nx atitoq tk'etz.²¹Tej q'uqlitoq Mardokyey ttziju' tja nimaqkawb'il, xitb'i'n intoq che yolin B'iwtan tuk'i'l Teres, kab'e' tmajin kawb'il kyxolju' xq'uqil ttziju' tja nimaqkawb'il. Inxi'xtoq che tx'u'jin, intoq kyxima'n tu'n tkub' kyb'yo'n nimaqkawil Aswer.²²Tetzunj tb'inte Mardokyey kyximju' xjal lu, xitma'n te Ster t-xu'jil nimaqkawil, ex xitma'n Ster te nimaqkawil aju' xitma'n Mardokyey te.²³Jyonjtztzun tqaniltz, tetzunj tel yal qa ax, jawjtz'o'n kyqulju' kab'e' tmajin kawb'il lu. Tchaq'tzun nimakawil tu'n tkub' tz'ib'a'nju' b'aj lu twitzku' toju' tu'jil tqanil nkyaj tz'ib'a'n ti'ju' tnam. Jun b'ajkye Mardokyey tuk'i'l Aman

¹Yajxi'tzuntel, oktq'o'n nimaqkawil Aswer toklen Aman, tk'wal Amedata, tyajajil Akak, te kynejel kawil toju' nintnam.²Kykyaqilju' intoq che ajb'en toju' tja nimaqkawb'il, intoq che kub' meje ex tziplqe' ajtik'u' Aman mujqa kse'n ate'qe' twitz, qu'n iky ojetoq tchaq' nimaqkawilju'; atzunte Mardokyey min xitb'i'nju' chaq'b'il lu.

³Xi'tzun kyxjelu'nju' nche kawin tuk'i'lu' nimaqkawil te Mardokyey titiqu'n min ntb'incha'nju' tchaq'b'il nimaqkawil.⁴Ex tkyaqil q'ij ax nxi' kyxjelu'nju' te, atzunte minti' nche'x tb'i'n. Exi'tzuntz q'malte te Aman, tu'n kyka'yinte qa axtoq tyol Mardokyeyju' kxe'l tma'n, qu'n ojetoq txitma'n kye qa layxtoq t-xitb'i'n chaq'b'il lu qu'n aj Juda toq.⁵Tetzunj tka'yinte Aman mixtoqti' nkub' meje Mardokyey ex mixtoqti' nkub' tzipe ajtik'u' Aman, tzajtzun ttx'ujiltz;⁶ojetoqna' txiq'ma'n te alkye tyajajil Mardokyey, kub' t-xima'n qa mya o'kxte kb'el tz'e'yset twitz, oktentzuntz ximalte jun tu'me'l se'n tu'n kykub' tb'ajsa'n kykyaqilju' aj Juda najlqe'toq toj tkyaqilu' ja nkawina' nimaqkawil Aswer. Chaq'b'il tu'n kykub'yet aj Juda

⁷Toj tnejel xjaw te ab'q'i, aju' xjaw Nisan, toj tkab'lajoji'n (12) ab'q'i nkawin nimaqkawil Aswer, xise'n tu'me'l twitzku' Aman tu'n tel yal ex tu'n tkyejb'ent ti'j alkye q'ij ex alkye xjaw tu'n tb'inchetju' t-xim, eltzuntz qa toj oxlajoj (13) tajlal tkab'lajoji'n (12) xjaw, toju' xjaw Adar.⁸Xi'tzun tma'n Aman te nimaqkawil Aswer:
—Ati jun tnam kyxol kykyaqilju' tnam ate' kyoj kykyaqilju' tx'ot'x tzyunqe' tu'na nimaqkawil, inanq'in pa'ntib' kyi'ju' txqantl; ate' tkawb'il junxi'l kyekywitzu' txqantl tnam, ex min nche tb'i'ncha'ju' tchaq'b'ila. Myab'a'nte' teya nimaqkawil qa kukx kyanq'in tnamju' lu toju' tkawb'ila.⁹Qu'mtzun, qa b'a'n toj twitza nimaqkawil, q'omixa tqanil jun chaq'b'il ja ntma'na' tu'n kykub' b'yet kykyaqil, kxe'l nq'o'nwe' wajxaqlajk'al oxnaq kyintal (7,260) saqpwaq kyeju' nche kawin tuk'i'la tu'n tokx toju' tk'uwem nimaqkawb'il, chi Aman.

¹⁰Eltzun tiq'i'n nimaqkawil t-xmilq'ob' ex xitq'o'n te Aman, kyajq'oj aj Juda,¹¹xitma'n te:
—B'a'n tu'n tkyaju' saqpwaq teya. Ex b'inchamju'ya b'a'n toj twitza ti'ju' tnam lu, chi nimaqkawil te.

¹²E'txokliju' ttz'ib'al nimaqkawil toj oxlajoj (13) tajlal tnejel xjaw te ab'q'i, xikytz'ib'a'n tchaq'b'il Aman kyeju' kawil kyoj tnej tx'otx' ex kyeju' tzyul kawb'il toj junjun nimaqtnam. B'ajkub' tz'ib'a'n chaq'b'il lu toj kyyol tnam ex toju' tz'ib'b'ente junjun yol toj junjun tnej tx'otx', sqitu'n kyi'j tu'n nimaqkawil Aswer ex tok t-sey nimaqkawil kyi'j;¹³b'ajx sma'ntzuntz kyoj smab'l u'j kye kykyaqil tnej tx'otx' toju' tkawb'il. Intoq tma'n kyoj tu'n kykub' b'yetju' aj Juda toj jun q'ijx, ku'xun mo tijwnaq, k'wal mo qya, ex tu'n tkub' kytzyu'nju' ati kye. A q'iju' q'ma'n aju' oxlajoj (13) tajlal tkab'lajoji'n (12) xjaw, mujqa xjaw Adar.¹⁴B'je'x txoli'n tilb'ilalju' chaq'b'il lu te jun kawb'il ex b'ajx q'o'n tu'n kyb'inte xjal kyoju' tnej tx'otx' ex tnam, tu'ntzun b'incha'ntl kyten ajtponju' q'ij lu.¹⁵Lwiyxi'x b'je'x sipa'nju' u'j kse'nxu' tchaq' nimaqkawil, ex b'je'x q'o'n tqanilju' kawb'il lu toju' nintnam Susa. Akxtoqtzun nche kub' qe nimaqkawil tuk'i'l Aman tx'ojtel, nimtoq txqan lab'te'n ex xob'el nb'aj toju' tnam Susa. Tzaj kyb'is aj Juda tu'nju' chaq'b'il

¹Tetzunj tb'inte Mardokyey tkyaqilu' matxi'toq b'aj, kub' tlaqu'n ti'j te yek'b'il k'ixk'oj, eb'jo'ktq'o'n ti'j te b'is, jaxtq'o'n tza'j toj twi' ex oktentzuntz ojqelal toju' nintnam, intoq ẍch'in njaw toj twi' b'isb'ajilx.²Iktzun pona'ju' tzmax ttziju' tja nimaqkawb'il, mixtoqti' tu'n tokx jun xjal tok ti'j ikyju'.³Ex ikx b'ajiju' kyojile junjun tnej tx'otx' jatoq npona' sma'nju' chaq'b'il exu' tkawb'il nimaqkawil, nim oq'el b'aj kyxolju' aj Juda, ex kyek'uju' b'is tu'n mewayi'n ex oq'e'n qu'n majx exch'yon toj kyk'u'j, ex b'a'npun eb'aj kub'kẍe tib'aj tza'j ex b'jo'k kyq'o'n kyi'j te b'is. Yolin Ster.

⁴Aye'tzu'n txin ntoq che ajb'en te Ster t-xu'jil nimaqkawil exqe' xq'uqil teku', xikyma'nju' intoq b'aji te. Tzajtzun tb'isju' t-xu'jil nimaqkawil tu'n tpaj ex xit-sma'n ti'j Mardokyey tu'n tel tiq'i'nju' ti'j te b'is, atzunte Mardokyey mixti'x tk'am.⁵Tzajtzun Ster ttxoku' Atak, ju' kynejel xq'uqil ti'j tja nimaqkawil, ex xitchq'o'n ka'yilte Mardokyey tu'n txi' tqani'n te titi'toqu' nb'aj ex tiqu'n ntb'incha'n tkyaqil ja'lu.⁶Xi'tzu'n Atak yolil tuk'i'l Mardokyey, ju' atitoq janche tena' nim xjal toju' nintnam, ttzi tja nimaqkawb'il,⁷oktzun ten Mardokyey tx'olb'alteju' intoq b'aji, ex jni'ju' saqpwaq matxi'toq txi ttziya'n Aman tu'n tkub' tq'o'n toju' tk'uwen nimaqkawb'il naqx tu'n kykub' b'yo'n aj Juda.⁸Ex xitq'o'n jun u'j tilb'ilalju' chaq'b'il etz toju' nintnam Susa tu'n kyb'ajkub' b'yo'n aj Juda najlqe' kyoj kykyaqilju' tnej tx'otx', tu'n txitq'o'n Atak te Ster tu'n tb'inte tkyaqilju' nb'aji. Ex xitoqxena'n te Ster tu'n tyolinku' tuk'i'l nimaqkawil ex tu'n t-xitkub'sa'n te tu'n tkolon ti'ju' ttanam.

⁹Tej tanjtzti'j Atak, b'ajx tma'nju' b'aj tzaj tma'n Mardokyey te, te Ster.¹⁰Etztzun tchq'o'n Ster jumajtlju' Atak q'malteju' tzaq'web'l te Mardokyey ikjalu:¹¹Kykyaqilju' ajb'el te nimaqkawil, exqe' xjal najlqe' kyoju' tnej tx'ot'x tjaq'u' tkawb'il, b'i'n kyu'n qa ati jun kawb'il ja ntma'na' tu'n kykub' b'yet kykyaqilju' ichan mujqa qya qama che okx tojxi' tpe'nju' ja te kawb'il ka'yilteju' nimaqkawil exqa mya txko'n tu'n, naq o'kx qamatzaj tnuqpi'n nimaqkawil tb'ar q'anpwaq ti'ju' xjal lu te techlal qa maq'aq'an tk'u'jlalil, laytzun kub' b'yo'ntz. Tu'ntzun tpaju' ayin june' toju' lu ja'lo, matxi' b'aj junaq lajoj q'ij min nchin txknojtze' tu'n nimaqkawil, chi Ster.

¹²Tetzunj tk'monte Mardokyey ttzaq'web'lu' Ster te Atak,¹³xit-sma'ntlju' yol lu te: Lalun tz'okqe tk'u'ja, qa o'kxa aj Juda kyjel anq'ina tu'nju' tokxa toj tja nimaqkawb'il.¹⁴Qa min sel ttziya ja'lo, tzulte' kolb'ilkye aj Juda toj jun plajtel, atzunta kkyimela kyuk'i'lxi' toj tja tmana. ¡Yajtzunqa a xpona'ju'ya te t-xu'jilu' nimaqkawil tu'n tonina qi'j toju' myab'a'n xi' ttzaj lu!, chi Mardokyey.

¹⁵Tzajtzun t-sma'n Ster tzaq'web'l lu te Mardokyey:¹⁶Kutxi'ya ex b'uyinqe'ju'ya aj Juda najlqe' Susa, tu'n kymewayin ex tu'n kyna'n Dyos wi'je'. Lalun che wan ex che k'wan oxe' q'ij ex oxe' qonik'an. Ex ikx qb'incha'qe' tzalu kyuk'i'lju' txin nche ajb'en weye', tb'ajlenxi'tzun ja'lu, chin xe'le' tk'etzu' nimaqkawil, b'a'ntzun qa mya' toj tu'me'l twitz kawb'il. Qatzun machin kub'b'yo'ne', chin kub'xtzun b'yo'ntze', chi Ster.¹⁷Xi'tzun Mardokyey ex tb'incha tkyaqilju' b'ajx tma'n Ster te. Okxu' Ster twitz nimaqkawil

¹Tb'ajlenxi'tzun oxe' q'ij, oktq'o'n Ster t-xb'alun tex nimaqkawb'il, okxtzuntz tojxi' tpe'nju' nin ja te kawb'il, kub' we' twitzju' ja jatoq q'uqlokxa' nimaqkawil toj tkawb'il, ju' tkub' twitzu' tjpel ja.²Tetzunj tetz ka'yi'n nimaqkawil ti'j Ster ju' t-xu'jil twi' pe'n, jaw tzalaj ti'j ex etztnuqpi'n tb'ar q'anpwaq tzyu'ntoq tu'n te. Okxtzun lq'e Ster ex okttzyu'n twi'ju' tb'ar nimaqkawil,³xi'tzun tqani'n nimaqkawil te:
—¿Titi' tajb'ila Ster, nxu'jil? Kxe'l nq'o'nwe' teya titi' matqaniya, ¡Kpena' kxe'l nq'o'we' teya qa matqaniya nik'janju' tx'otx' nkawi'ne'! chij.
Xi'tzun ttzaq'we'n Ster te:

⁴—Qa b'a'n toj twitza nimaqkawil, nchin kub'sane' teya tu'n txi'ya toj jun ninwan matxi' kub' nb'incha'ne' te ninb'ilteya, ex tu'n tpon tiq'ina Aman, chij.
Tchaq'tzun nimaqkawil:

⁵—Kyjyome' Aman, tu'n qxi'ye' toju' txokb'il tu'n nxu'jile' Ster, chij.
Xi'tzun nimaqkawil tuk'i'l Aman toju' ninwan matxi'toq kub' tb'incha'n t-xu'jil.⁶Tojtzu'n ninwan lu, xitma'n nimaqkawil te Ster.
—¡Qanintza aju' tajb'ila, kxe'l nq'o'nwe', maskye matzaj tqani'na nik'janju' tx'otx' ati tjaq' nkawb'ile'! chij.

⁷Xi'tzun ttzaq'we'n Ster te:
—Naq okx tb'is nk'u'ju'ye' ex a nqani'ne' teya:⁸Qa nchin tk'u'jla'na exqa matzaj tq'o'nju'ya tb'is nk'u'je' exu' kxe'l nqani'ne', kuttzaja najchij, tuk'i'l Aman, toj juntl ninwan kub'ni nb'incha'ne' te ninb'ilteya. Atzuntzu' kxe'la' nmanju'ye' tajb'ila tu'n txi' nqani'ne' teya, chij. B'aj tb'incha'n Aman jun tze tu'n tjaw jtz'et tqul Mardokyey

⁹Oje tzalaj Aman tej tetz toju' ninwan; atzu'n tej t-xitka'yi'n Mardokyey atitoq ttziju' nin tja kawb'il, miẍtoqti'x njawe' ex mixti' niman te tej txi' tka'yi'n tik', tzajwal ti'tk'u'j ti'j.¹⁰Mixtzunti' tyek'u toju' kmoj lu qa intoq tx'a'lti'j tk'u'j; atzu'n tej tpon tja eb'aj tzaj ttxko'n tamiw ex Seres, ju' t-xu'jil,¹¹Jawtzun tnima'tib'tz ti'ju' txqan tq'inumal, kyi'jqe' txqan tk'wal ate'toq, ex se'n tu'me'l jawa' nima'n tu'n nimaqkawil kyxolju' nche kawin tuk'i'l exqe' ajb'el te, tej tokq'o'n toj jun oklenj nimxi'x kyekywitz.¹²Ex xitma'ntl:
—Expe', oqinkxe' ẍinx txko'ne' tu'n Ster t-xu'jil nimaqkawil toju' ninwan xkub' tb'incha'n teju' nimaqkawil ja'lo; ex machin ttxok jumajtle' toju' ninwan kb'eltq'o'n najchi'j teju' nimaqkawil.¹³Naqtzun aju' mixti'x tab'en tkyaqil ja'lu weye' tu'n tpaju' kukx txi' nka'yi'ne' ma' aj Juda Mardokyey q'uqli ttziju' tja nimaqkawb'il, chi Aman.

¹⁴Xi'tzun kyma'n t-xu'jil ex kykyaqilju' tamiw te:
—Q'onx b'incha'ya jun jitz'b'il te junaq kab'e' (22) metr twe', ex qaninxa najchi'j prim teju' nimaqkawil tu'n tjaw jtz'o'n Mardokyey ti'j. Kxe'l tzuntza toj tzalajb'il tuk'i'lu' nimaqkawil toju' ninwan, chechij te.
Kub'ju' nab'l lu toj twitz Aman, ex xitq'a' b'incha'ju' jitzb'il te b'iyb'il. Kanb'an Mardokyey

¹Ax qoniky'an ja'lu, mixtoqti'x noktwatlju' nimaqkawil, qu'mtzun tchaq' tu'n tpon qi'nju' u'j jatz'ib'anaqe' tqanil nim kyoklen toju' nintnam, tu'n tjaw ẍch'i'n twitz.²Tojtzu'n u'j lu elyal kyu'n kse'n tu'me'l kleta' nimaqkawil Aswer tu'n Mardokyey kyeju' B'iwtan ex Teres, kynejel xq'uqil ttzij tja nimaqkawb'il, ju' xima'ntltoq kyu'n tu'n tkub' kyb'yo'n.³Xjeluntzun nimaqkawil:
—¿Titi'tzun jun aq'b'il chjonte ex ninb'ilte Mardokyey oje tk'am tu'nju' tb'incha lu? chij.
—Mixti'x —chechiju' nche kawin tuk'i'l.

⁴Tojtzu'n kmoj lu okx Aman twi' tpen tja nimaqkawil, qanilte te tu'n tjawjtz'et tqul Mardokyey ti'ju' b'iyb'il matxi'toq t-xitq'a' b'incha'.
—¿Alkye ati twipe'n? —Chiju' nimaqkawil xitqani'n.

⁵—A Aman —chechiju' nche kawin tuk'i'l.
—¡Kyiq'inktze'! —chiju' nimaqkawil tchaq'.

⁶Okxtzun Aman, ex xitqani'n nimaqkawil te:
—¿Titi' kb'inchetel teju' ichan wajb'ile' tu'n tjaw nimet ayine' nimaqkawil? chij.
Kub' t-xima'n Aman: ¿Alkyetzu'n kjawil tnima'n nimaqkwil qa myayine'? chij tib'xtib'.⁷Xittzaq'we'ntzuntz:
—Ati tu'n ttzaj iq'ette' ichan lu t-xb'alun ku'j axju' najb'en teya nimaqkawil, ex jun tchej aju' njawa ti'j, ex tu'n tjax jun tkoron nimaqkawil toj twi'.⁹Che kxe'lq'etju' xb'alun ku'j exu' chej te junju' nimxi'x toklen toju' kawb'il, tu'n toktq'o'n t-xb'alunju' ichan tajb'ila nimaqkawil tu'n tjaw tnima'na, ex tu'n t-xitiq'i'n b'etel ti'j chej toju' jate'qe' nim xjal toju' nintnam, nejli twitz njawxi' t-ẍch'i'n: ¡Iky nb'incheta' kjalu teju' ichan tajb'ilu' nimaqkawil tu'n tjaw tnima'n! chiku', chi Aman te nimaqkawil.

¹⁰Xi'tzun tma'n nimaqkawil te Aman:
—Lwiyx natzuna, q'intza xb'alun ku'j exu' chej, kse'nxju' xtmaya, axtzun b'inchamju'ya tuk'i'l Mardokyey aj Juda, ju' q'uqlok ttziju' nin ja te kawb'il. Mixti' jun ti'xti' laywit tb'inchaya kse'nxju' xtmaya, chi nimaqkawil te.

¹¹Tzajtzun tiq'i'n Aman ju' xb'alun ku'j exju' chej, ex oktq'o'n ti'j Mardokyey, xitiq'i'ntzuntz ti'j chej ja ta'qe' nim xjal toju' nintnam, nejli twitz ex intoq t-ẍch'i'n: ¡Ikytzun nb'inchetju' teju' ichan tajb'ilu' nimaqkawil tu'n tjaw tnima'n! chij.

¹²Tetzunj tb'aju' b'ete'n lu, anjtlti'j Mardokyey ttziju' tja nimaqkawb'il, atzunte Aman ojqel txi' tja, intoq b'isun ex mqo'n twitz.¹³Xitma'ntzuntz te t-xu'jil ex kye tamiw tkyaqilju' matxitoq b'aj, xikyma'ntzuntz te:
—Qa aj Juda Mardokyey, ju' xi'teltiq'i'n toklena, layx kub'ti'j tu'na, ape'ta kb'el tejumajx tu'n, chechij te.

¹⁴Na'mxtoqpe' kyb'aj yolin, tej kyponju' nche ajb'en te nimaqkawil q'elte Aman tu'n txi' lwiyxi'x toju' ninwan matxi'toq b'ent tu'n Ster. B'antti'j tu'n tkub'yo'n Aman

¹Exi' nimaqkawil tuk'i'l Aman toju' ninwan,²ikx toju' tkab' q'ij lu xitma'n nimaqkawil te Ster tej ntoq che wan toju' ninwan:
—¡Qanitza aju' tajb'ila, kpena' xe'l nq'o'nwe' nik'janju' nkawi'ne' teya qama tzaj tqani'na! chij.

³Xittzaq'we'n Ster:
—Qa nchin tk'u'jla'na nimaqkawil, exqa makub' toj twitza, naq o'kxwe' tb'is nk'u'j ex a nqani'ne' teya tu'n tklonteju'ya nchwinqlale' ex kychwinqlalju' ntaname';⁴qu'n oje qo'xk'ayi'ne' kyuk'i'lju' ntaname' tu'n qkub' b'yo'ne' jumajx. Naqwit naqxqo k'ayinjtze' te majen, mixti'wtlo nchin yajunwe' teya, qu'n laywitlo tb'inchaxi'xu' ajq'oj nim xitb'il teya nimaqkawil, chi Ster.

⁵Xi'tzun tqani'n Aswer te:
—¿Alkyetzun ex jata'ju' ximalte lu? chij.

⁶—¡Ate qajq'oju'ye' Aman lu b'inchal myab'a'n!— chi Ster xittzaq'we'n.
Tetzunj t-xitb'i'n Aman ja'lu, majx b'ajub'chaj tu'n xob'il kywitzu' nimaqkawil exu' t-xu'jil.⁷Jawe' Aswer tu'n tq'oj ex etz toju' ja jate'ya'toq toju' ninwan, extzuntz toju' b'ech twitz tja nimaqkawb'il. Tetzunj teltnik' Aman qa matxi'toq kub't-xima'n nimaqkawil tu'n tkub' tb'yo'n, kyejten tuja kub'sal twitzu' Ster t-xu'jil nimaqkawil tu'n tklonteju' tchwinqlal.⁸Tetzunj tanjtzti'ju' nimaqkawil toju' b'ech ex okx tuja jata' ninwan, xitka'yi'n matxitoq txit-xontib' Aman tib'aju' b'unin ninq'a'jtz jatxalcha'toq Ster, jaw tzaqpajtzuntz:
—¿Ma ex tajb'ila tu'n tkub'tyaju'na nxu'jile' nwitzku'ye' ex tojku' njaye'? chij.
Naqtzun nb'aj tma'n nimaqkawil ja'lu, ch'intqan okjpu'n twitz Aman kyu'n jte' xq'uqil teku' nimaqkawil. Atzun jun kyxol, Arb'on tb'i, tma:
—Atitlna'te' jun jitz'b'il te b'iyb'il tja Aman, te junaq kab'e' (22) metrlo twe', xitq'a' b'incha' te b'iyb'ilte Mardokyey, aj ichan tzaj q'mante jun tb'anil tqanil teya nimaqkawil, chij.
—¡Kyjtz'onjx natzune' ti'jx! —chi nimaqkawil tchaq'.

¹⁰Ikytzu'n jawxjtz'o'n Aman ti'xju' b'iyb'il jawtb'incha'n te Mardokyey. Tu'ntzu'n ja'lu e'la' ttx'u'jilu' nimaqkawil. Chaq'b'il tu'n kyxtalinjtz aj Juda

¹Axtzun q'iju' lu, xitoyi'n nimaqkawil Aswer tja Aman, kyajq'oj aj Juda, te Ster ju' t-xu'jil, ex pon Mardokyey tk'etzju' nimaqkawil, qu'n matxi'toq txitma'n Ster te qa kyitz'inkyib'u' tman tuk'i'lju' tman Mardokyey.²Atzunte nimaqkawil eltiq'i'n t-xmilq'ob' ju' matxi'toq tz'el tiq'i'ntl te Aman, ex xitq'o'n te Mardokyey. Ex oktq'o'n Ster Mardokyey ka'yil ex nk'ulkye kykyaqailju' ti'xti' tetoq Aman.³Ex yolin jumajtlu' Ster tuk'i'lu' nimaqkawil, majxkub' meje t-xe tqan intoq oq', xitkub'sa'n tu'n tkub' tnajsa'nju' chaq'b'il myab'a'n tu'n Aman ex tu'n mijapuna' tb'is tk'u'j kyi'ju' aj Juda.⁴Tzaj tnuqpi'n nimaqkawil tb'ar q'anpwaq ti'ju' Ster. Jawtzun we' Ster, ex kub' we' twitzju' nimaqkawil⁵xitma'n te:
—Qa b'a'n toj twitza nimaqkawil exqa tu'me'lju' nkub'sb'ile', qa nchin tk'u'jla'na nimaqkawil exqa nlaqja wi'je', tz'ib'a'nku'ya jun chaq'b'il ja ntma'na' tu'n kykub'najsetju' u'j eb'ax ttz'ib'a'n Aman tu'ky'lju' chaq'b'il tu'n kykub'yetju' aj Juda toj kykyaqilju' tnej tx'otx' nche tkawi'na.⁶Qu'n ¿se'n taq'wi tu'n tik'xju' yajb'il wu'ne' tzul ti'j ntaname', ex ajkykub'yo'n toj njaye'? chi Ster.

⁷Tzajtzun ttzaq'we'n nimaqkawil Aswer te Ster ex te Mardokyey, aj Juda:
—Matxi' txinq'o'ne' tja Aman te Ster, atzunte Aman matxi' jaw jtz'et ti'ju' b'iyb'il tu'n tpaju' okmiltz'uj b'yolkye aj Juda.⁸Ja'lo kxe'l nq'o'ne' anb'il kyeye' tu'n tkub' kytz'ib'a'ne' juntl u'j, tojx nb'iye', aju' b'a'n toj kywitze' tu'n kyxtalet aj Juda. ¡Ex kyq'onke' nseye' kyi'ju' u'j lu! chi nimaqkawil.
(Qu'n lay b'ent tkub' naj jun u'j toj tb'i nimaqkawil ex tok t-sey ti'j.)

⁹Ch'i'ntqan e'tzaj txko'n ttz'ib'al nimaqkawil. Tojtoq junaq oxe' (23) tajlal toxi'n xjaw, aju' xjaw Sib'an, ex tkyaqilju' tchaq' Mardokyey b'ajx tz'ib'a'n kye aj Juda, kye kawil kyojile junjun tnej tx'otx' ex kyeju' txqantl tzyul kawb'il kyyoju' qaqnaq wuq (127) tnej tx'otx' tzajx jat'a Indya pomnix jata' Etyopiy, tojilex kyol ex kyojxu' tu'me'l nche tz'ib'eta'chaq kyol xjal teyile junjun tnej tx'otx'. Ex ikx xitz'ib'a'n kye aj Juda tojx kyyol ex tojxu' tu'me'l tz'ib'b'ente kyyol.

¹⁰B'ajkub' sqitu'n kyi'ju' u'j toj tb'i nimaqkawil Aswer, kykub'lenxi'tzun q'o'n t-sey nimaqkawil kyi'j, eb'ajx sma'n kyi'ju' sipal u'j, aye' nche chejin kyi'j chej ojqel che b'et kyxolju' tchej nimaqkawil.

¹¹Tchaq'u' nimaqkawil kyoju' u'j lu kye aj Juda, kyoj alkyexku' nimaqtnam janajla'qe', tu'n kyb'uyinte kyib' tu'n kyklonte kyib', ex tu'n kykub' kyb'yo'n ex majx tu'n kykub' kyb'ajsa'nju' xjal kyuk'i'lxi' kyxu'jil ex kyk'wal, qa iq'i'n kyb'iyb'il te alkyexku' tnomil ma alkyexku' tnej tx'otx' tu'n kyok tzaqpaj kyi'j, ex tu'n kykub' kytzyu'nju' ati kye kyajq'oj.¹²Tkyaqil ja'lu tu'ntoq tb'inchet naq toj jun q'ijx kyoj kykyaqilju' tnej tx'otx' nche tkawi'n nimaqkawil Aswer; a q'iju' q'ma'ntl ti'j aju' toj oxlajoj (13) tajlal tkab'lajoji'n (12) xjaw, mujqa aju' xjaw Adar.¹³Atitoq tu'n tex tqanil jun tilb'ilalju' chaq'b'il lu te jun kawb'il, ex tu'n tex yek'et kyojile tnam ex kyojile tnej tx'otx', tu'ntzun tb'aj kyb'incha'n kyib'ju' aj Juda toju' q'ij lu tu'n tokt-xel kyu'n kye kyajq'oj.¹⁴Ojqel kyb'ajxju' sipal u'j toj tchaq'b'ilu' nimaqkawil, kyi'j chej kyxolju' tchej, ex b'je'x q'o'n tqanilju' chaq'b'il lu toju' nintnam Susa.

¹⁵Etz mardokyey toju' tja kawb'il, toktoq jun t-xb'alun nimaqkawil ku'j ti'j, ẍkul ex saq ka'yin, tokxtoq jun tb'anil q'anpwaq koron toj twi' ex tok jun t-xb'alun sed ex kyaq smo'n tk'i' cha'x. Ojexi'x che ẍch'in kykyaqil aj Susa tu'n kytzalajb'il,¹⁶ex tkyaqil ok te spik'un, tzalajb'il ex jun ninb'il kye aj Juda.¹⁷Ojexi'x eb'aj tzalaju' aj Juda kyoj kykyaqilju' tnej tx'otx', e'nimaqtnam ex najb'il jachaq npona' toqu' tchaq'b'il nimaqkawil, ex kub' kytzalajsa'n kyu'n nimaqwan ex ninq'ij. Expe' nim xjal toju' tx'otx' okkyq'o'n kyib' te aj Juda, qu'n matxi'toq tz'ok txqan kyxob'elu' aj Juda kye. E'kanb'an aj Juda

¹Tojtoq oxlajoj (13) tajlal tkab'lajoji'n (12) xjaw, ju' xjaw Adar, tu'n tjapunju' tchaq'b'il nimaqkwil, ex a q'iju' ntoq che ayonju' kyajq'oj tu'n kykub' kyb'yo'n aj Juda; wichiqa aye'tlkye kub'kyi'j kyu'n aj Juda.²B'aj kyb'u'yi'n kyib' aj Juda kyoju' nimaqtnam jachaq najla'qe' kyoj kykyaqilju' tnej tx'ot'x in tkawi'n nimaqkawil Aswer, tu'n kyok tzaqpaj kyi'ju' kyajb'iltoq tu'n kykub' b'yonkye. Mix-a'lo'xte jun we' kywitz, qu'n nimtoq xob'il matxi'toq tz'ok kyoju' tnam kyu'n.³Kykyaqilju' tzyul kawb'il kyoju' tnej tx'otx', e'kawil kyoju' tnej tx'otx', exqe' nimaq kyoklen toju' kawb'il, intoq che onin kyuk'i'lju' aj Juda tu'n kyxob'e'l te Mardokyey,⁴qu'n jun nimaqxjal toq toju' tja nimaqkawb'il ex matxi'toq b'injtz tqanil ti'j kyoj kykyaqilju' tnej tx'otx', ex atl junjun q'ij xi'toq ttenxi'xtl tipumal.⁵Tu'n k'uẍtx'e'nb'il eb'aja' kyb'yo'n aj Juda kyajq'oj; majx e'kub' kyb'ajsa'n kykyaqil ex kyb'incha kyi'j aju' kyajb'il.⁶Junk'al jo'naq (500) ichan e'kub' kyb'yo'n o'kx toju' nintnam Susa;⁷ex e'kub' kyb'yo'n Parsandata, Dalpon, Aspata,⁸Porata, Adaliy, Aridat,⁹Parmasta, Arisay, Ariday ex Vaysata,¹⁰aye' lajoj tk'wal Aman, ju' ajq'oj kyi'ju' aj Juda; ex min b'ajx kyeku'n ti'xti' kye.

¹¹Textzu'n q'ij lu, tej tb'inte nimaqkawil jte'ju' matxitoq che kyim toju' nintnam Susa,¹²xitma'n te Ster ju' t-xu'jil;
—Matxi' che b'aj junk'al jo'naq (500) ichan exqe' lajoj tk'wal Aman kyu'n aj Juda toju' nintnam Susa. ¿Mitzunlo yatlte' kyoju' txqantl tnej tx'otx' nche nkawi'ne'? ¡Q'mantza weye' titi'tl tajb'ila, kxe'l nq'o'nwe'! chi nimaqkawil.

¹³Xi'tzun ttzaq'we'n Ster:
—Qa b'a'n toj twitza nimaqkawil, tu'n txiq'et anb'il kye aj Juda toj Susa tu'n kyb'inchante jumajtl najchi'j axju' matxi' kyb'incha kse'nxju' chaq'b'il, ex tu'n kyjaw yob'et kyxmilalju' lajoj tk'wal Aman, chij.

¹⁴Tchaq'u' nimaqkawil tu'n tb'inchet ikju'. B'je'x q'o'n tqanilju' chaq'b'il lu toj Susa, ex eb'jaw yob'a'n kyxmilalu' lajoj tk'wal Aman.

¹⁵B'aj kyb'uyi'n jumajtl kyib'ju' aj Juda najlqe' toj Susa toj kyajlajoj tajlal xjaw Adar, ex e'kub' kyb'yo'n o'lajnaqtl (300) ichan na'tz; ex min xikyeku'nju' ati kye.¹⁶Ex b'aj kyb'u'yi'n kyib'ju' aj Juda najlqe'toq kyoju' txqantl tnej tx'otx', toj oxlajoj (13) tajlalxju' xjaw, tu'n kyklonte kyib' ex tu'n kyb'aju' kyajq'oj kyu'n; eb'aj b'eljojmutx' wuqk'al lajnaq (75,000) xjal kyu'n, ex min xikyeku'n ati kye. Tojtzun q'ij kyajlajoj tajlalju' xjaw e'ojlan ex kub'kyik'sa'n tuk'i'l tzalajb'il ex ninwan.

¹⁸Aye'tzu'n aj Juda toj Susa, b'ajna' kyb'u'yi'n kyib' toj oxlajoj (13) ex kyajlajoj (14) tajlalu' xjaw, e'ojlan toj o'lajoj tajlal xjaw, ex kub'kyik'sa'n kyuk'i'l nimaqwan ex tzalajb'il.¹⁹Aye'tzu'n aj Juda najlqe' kyoju' tnam ex kojb'il mixti' tapi kyi'j, kub'kyik'sa'n q'ij kyajlajoj tajlalju' xjaw Adar tuk'i'l tzalajb'il ex ninq'ij, ex eb'aj oyin kyxolilex. Ninq'ij Purim tb'i

²⁰B'ajkub' ttz'ib'a'n Mardokyey tkyaqilju' b'aj lu, ex b'ajx t-sma'n u'j kye aj Juda najlqe' kyoju' tnej tx'otx' nche tkawi'n nimaqkawil Aswer, e'nqaku' ta'qe' ex najchaq ta'qe',²¹tuk'i'lju' chaq'b'il tu'n tkub' kyik'sa'n q'ij kyajlajoj ex o'lajoj tajlalju' xjaw Adar atl junjun ab'q'i,²²tu'nju' aye' q'iju' tej kyb'aju' ajq'oj kyu'n, ex ax jawju' kych'exb'etju' b'is ex oq'el toj k'ixk'oj te tzalajb'il ex ninq'ij kye. Ati tu'n kykub' ik'setju' q'ij lu kyuk'i'l nimaqwan ex tzalajb'il, ex tu'n kyq'on oyaj jun te juntl ex tu'n txikyq'o'n kykotzju' prow.²³Majx kyej tenju' lu kyu'n aj Juda tu'n kyb'inchante ex tu'nju' b'ajx ttz'ib'a'n Mardokyey kye.²⁴Qu'n ojetoq kub' t-xima'n Aman, ju' kyajq'oj, tu'n kymankun kykyaqil aj Juda tu'n, ok toj sqach tu'n tkyaj jun q'ij tu'n kykub' tb'yo'n kykyaqilx,²⁵tetzu'nj tpon Ster twitzu' nimaqkawil, tchaq' nimaqkawil toj u'j qa tkyaqilju' myab'a'n matxi'toq kub' t-xima'n Aman tu'n tb'inchante kyi'ju' aj Juda tu'n tkub' tz'aq tib'ajx. Ikytzu'n e'jaw Jtz'o'n Aman kyuk'i'lu' tk'wal ti'ju' jitz'b'i'l te b'iyb'il jawtb'incha'n.²⁶Qu'mtzun ok kyb'iju' q'ij lu te Purim, qu'n a tnab'lju' b'a'npun pur.
Qu'mtzun, kse'nxju' tuj Mardokyey kye exu' matxi'toq kyil ex e'ik'a',²⁷kyej kyq'o'n aj Juda ja'lu tu'n kyb'inchante kukxju' ex kye kyyajajil, ex kye kykyaqilju' makyaq'kyib' toju' kyokslab'l aj Juda: ilti'j tu'n tkub' kyik'sa'n kab'e' q'ij lu atl junjun ab'q'i toju' tajlal xjaw q'ma'ntl, kse'nju' chik'b'ab'l matxi'toq b'ajx q'ma'n kye;²⁸ex tu'n kytzaj na'nju' q'ij lu ex tu'n kykub' ik'sa'n kyu'nile junjun wiq kyyajajil, kyu'n junjun k'loj kywitze'l kyib', tojile junjun tnej tx'otx' ex junjun nimaqtnam, tu'n lalun kub' naju' nab'ab'lte kyxol aj Juda ex kyxolju' kyyajajil.²⁹Kub' kytz'ib'a'n Ster tmyal Ab'yayil ex Mardokyey aj Juda, juntl u'j tuk'i'l oklenj ti'ju' tq'ij purim, tu'n tkuwsetxi'xju' tnejel,³⁰ex b'ajx kysma'n kye kykyaqilju' aj Juda kyoju' qaqnaq wuq (127) tnej tx'ot'x nche tkawi'n nimaqkawil Aswer, kyuk'i'l yol te b'a'nwnaqil ex ax,³¹tuk'i'lju' chaq'b'il tu'n tik'setju' tq'ij purim toju' tajlal xjaw q'ma'ntl, kse'nxju' ojetoq kychaq' Mardokyey exu' Ster t-xu'jil nimaqkawil kye ex kyeju' kyyajajil. Ex ok kytz'aqtza'n junjuntlju' nuk'b'il kyi'ju' mewayi'n ex oq'el.³²Ex aju' tchaq'b'il Ster kuwsan kyeju' nuk'b'il tu'n kyoklpe ti'j ajtkub' ik'setju' tq'ij Purim. Tkyaqil ja'lu ku'x tz'ib'a'n toj jun u'j. B'a'n tqanil ti'j Mardokyey Ex b'ajsb'il

¹Kub' tq'o'n nimaqkawil Aswer tu'n kyq'onte xjal jun chojb'il, kyoju' tx'otx' ex kyoju' swejtx'otx' toj a'.²Tkyaqilju' tb'incha tuk'i'l toklen ex tipumal, exju' tqanil chik'lixi'x ti'ju' jun nim toklen Mardokyey oktq'o'n, tz'ib'anqe' toju' u'j janche ku'xa' tz'ib'a'na' tkyaqilju' nb'aj toju' kykawb'il Medya ex Persya³Ate Mardokyey aj Juda toktoq toju' tnejel oklenj ti'jxi' nimaqkawil; ok te jun nimaqxjal kyxolu' aj Juda, b'a'ntoq tilwi' kyu'nju' twnaqil, qu'n tjoyju' b'a'n teju' ttanam ex oktq'on tilil tu'n kytenju' tyajajil b'a'n.

Bible Society in Guatemala

https://app.library.bible/content/aea9d9099feb3a24