Read Nehemías 1

Nehemías1

Na'n Dyos Neemiy ti'ju' ttanam

¹Toju' xjaw kyislew toj tjunaqi'n (20) ab'q'i nkawin Artajerjes, ayine' Neemiy tk'wal Akaliy, atinqintoqe' toju' nintnam Susa²tej tponju' ntzike' Anani kyuk'i'l jte' ichan tzajniqe' toj Juda. Xinqani'ntzuntze' kye ti'j Jerusalen ex kyi'j kykyaqilju' aj Juda e'kyaj anq'in toj qtanam teju' jitz'jtib'il.³Ex tzaj kytzaq'we'n weye': Nche yajtikye' e'kyaj anq'in toj tx'otx' Juda teju' jitz'b'il ex ch'ixb'ilx te'qe'. Atzunte Jerusalen, majx oje kub' xitju' nintapi ti'jile ex majx eb'aju' tjpel tu'n q'aq', chechij.

⁴Tej nb'inteju'ye' tqanil lu, inkub' qeye' oq'el, ex nkyaj b'isun jte' q'ije', nchin mewayine' ex nchin na'n Dyose' twitz Qman Dyos te toj kya'j.⁵Xinma'ne' te: Nman Dyos atiya toj kya'j, aya Dyos nim toklena ex xob'ajilxa, min ntch'exb'e'nju'ya tyola ntzaj ttziya'na kyeju' nche k'u'jlanteya ex njapun tchaq'b'ila kyu'n;⁶chin kub'sale' teya ja'lo tu'n ttzaj tb'i'nju'ya nna'j Dyose' twitza q'ijtl ex qonik'an kyi'ju' aj Israel tmajina. Inel nnik'e' qa ayo'ye' aj Israel matxi' qo b'inchan ile' twitza; ¡Ayo'xpe' junqe' kyuk'i'lju' nwitze'le' matxi' qo b'inchan ile'!⁷Mixyab'a'n matxi' qb'inchaye' twitza; na'mx kyjapunju' tchaq'b'ila ex tkawb'ila qu'ne', tzaj tq'o'na qeye' tu'ne'lju' tmajina Moyses.⁸Na'ntzju'ya tzajni tma'na te Moyses, qama qo b'inchan ile', atitoq tu'n qxi' t-sputi'na toj tkyaqil twitz tx'otx';⁹qatzun matz'anjtzti'j qanmiye' tuk'i'la exqa mache japunju' tchaq'b'ila qu'ne' tu'n qb'inchanteye', maskyepe' matxitoq qopone' tzmax b'ajsb'il twitz tx'otx', qo jawil tiq'i'na ja to'qo'ye' ex qopomel tiq'i'n jumajtla toju' najb'il xjan jaw t-sk'o'na jatu'n tna'njtza'ju' tb'iya.¹⁰Ayo'ye' tmajina ex ttanama, ju' tkola tuk'i'l nimtipumala.¹¹Nchinkub'sa'ne' teya, Nman Dyos, tu'n ttzaj tb'i'nju'ya nna'j Dyose' ex kykub'sb'ilju' tmajina, ju' o'kx kyajb'ilju' tu'n tjaw nima'na kyu'n. Ex kxe'l nkub'sa'ne' teya tu'n wel b'a'ne' tuk'i'lju' nimaqkawb'il, nchije' toj nna'j Dyose'.
Qu'n ayintoqe' q'olte tk'wa' nimaqkawil Artajerjes. Taq' nimaqkawil Artajerjes anb'il tu'n txi' Neemiy Jerusalen

¹Jun q'ij toju' xjaw Nisan, toj tjunaqi'n (20) ab'q'i nkawin nimaqkawil Artajerjes, tej intoq xinq'o'ne' tk'wa' b'in, oktka'yi'n nimaqkawil inxi'x chin b'isune'²ex tzaj tqani'n weye':
—In nka'yine' twitza inxi'x b'isun. ¿Titi' niq'ina? mujqa yab'a, atilo jun ti'xti' myab'a'n, chij.
Tojtzu'n kmoj lu nna'ye' jun ninxob'el,³ex xinma'ne' te nimaqkawil:
—¡Tz'anq'inxwita kukxju' nimaqkawil! ¿Se'ntaq'wi lay chin b'isune', extzun xitjniju' nintnam ja ta'qe' muqb'il kye qtzan nmane' ex b'ajniqe'ju' tjpel tu'n q'aq'? nchije' te.

⁴—¿Titi' b'a'n tu'n nb'inchanteye' teya? chiju' nimaqkawil tzaj tqani'n.
Kub'tzun nq'o'n wib'tze' toj tq'ob' Qman Dyos toj kya'j,⁵xi'tzun ntzaq'we'ntze' te nimaqkawil ikjalu:
—Qa b'a'n toj twitza nimaqkawil, exqa matzaj q'aq'an tk'u'ja wi'je', a kxel nqani'nju'ye' teya tu'n nxitchq'o'na toj Juda toju' nintnam ja mqu'na'qe' qtzan nmane', tu'ntzun tjaw nb'incha'n jumajtle', nchije' te.

⁶Tzajtzun ttzaq'we'n nimaqkawil weye' tuk'i'lu' t-xu'jil q'uqloktoq tk'etz:
—¿Jte'tzunlo q'iju' tb'eya?
¿Jtojtzunlo tz'anjtzti'ja? chij.
Xinma'ne' tajlal xjaw te, ex kub' toj twitz tu'n nxi'ye'.⁷Expe' xinma'ne' te, qa b'a'ntoq toj twitz, tu'n ttzaj ttz'ib'a'n jun u'j kyeju' kawil toj tkub'exq'ij te nin a' Ewprates, tu'n wik'x kytzaqpi'ne' tzmax ajnpone' toj Juda;⁸ex tu'n ttzaj ttz'ib'a'n juntl u'j te Asap, ju' xq'uqil tk'ul nimaqkawil, tu'n ttzaj tq'o'n tze weye' tu'n kyb'inchetl tjpelju' nintnam jata' tja Dyos, ex tjpelu' nintapi ti'ju' nintnam ex tjpelju' ja jatu'n nnajana'ye'. Ex tzaj tq'o'n nimaqkawil tkyaqil weye' qu'n o'ni'nqintoqe' tu'n Qman Dyos nchin k'ulune' te.

⁹Tetzunj npone' kywitzju' kawil toj tkub'exq'ij teju' a' Ewprates, b'ajx nq'o'nju'ye' u'j e'tzaj tq'o'n nimaqkawil kye, expe' e'tzaj tchq'o'n nimaqkawil jun tnej xjal te q'oj ti'j chej wuk'i'le' toj kychaq'b'il nejenel kye xjal te q'oj.¹⁰Ate'toqtzun kab'e' ichan, aju' jun Sanb'alat tb'i aj Oron, atzu'n juntl Tob'iy tb'i, aj Amon nim toklen toju' kawb'il, tzaj kytx'u'jil b'a'nxi'x tej kyb'inte qa matxi'toq pon jun ati tb'is tk'u'j onilkye aj Israel. Aq'untl tu'n tjaw b'inchet Jumajtlu' nintapi

¹¹In pontzune' toj Jerusalen. Tojtzun toxi'n q'ij npomlene',¹²injawe'ye' te qonik'an, k'le'nqe' junjun xjal wu'ne', ex mixti'xte xinma'ne' kye titi' matxi'toq tzaj t-xewsa'n Dyos weye' tu'n nb'inchanteye' ti'j Jerusalen. Mixti' juntl chej xi'wiq'i'ne', o'kxju' iqalweye'.¹³Tojxu' qonik'an lu netze' ttziju' tjpel tnam te b'ya', tu'me'lju' t-xiklil a' wakxkan tb'i ex toju' tjpel te xob'l tz'is, b'aj nka'yi'ne' nintapi ti'j Jerusalen, kub'ni xitj ex b'ajni tz'e'yju' tjpel.¹⁴Xi'tzun nljo'n nb'etze' tu'me'lju' tjpel te t-xiklil a' exju' tpil nimaqkawil; naqtzun a mixti' b'ent tik'xju' ncheje' atzu'.¹⁵Qonik'anxtoq, njaxe' ttziyileju' a', tb'ajlenxi'tzun nka'yi'ne' nintapi, anjtz wi'je', noktze' toju' tjpel tu'me'l b'ya'.

¹⁶Mixtoqti' b'i'n kyu'nju' kawil jamatxi'toq chin tx'anja'ye', ex titi' matxitoq chin tx'anje' b'inchalte. Ex na'mxtoq t-xinma'n tpakb'ale' kye aj Juda, aye' pale, e'nimaq kyoklen, e'kawil ex txqantl xjal atitoq tu'n kyten toju' aq'untl.¹⁷Xinma'ntzuntze' kye:
—B'i'n kye'kyu'n qa ch'uẍxi'x to'qo', qu'n kub'ni xitju' Jerusalen ex b'ajniqe' tz'e'yju' tjpel. Kymujb'am kyib'e' wuk'i'le' ex qb'incha'nktz jumajtlju' nintapi ti'j Jerusalen, tu'ntzun lan qo oktl te xmayb'il, nchije' kye.

¹⁸Tetzunj txi' nchik'b'a'ne' tu'me'l tb'anilxi'x matxitoq tz'onina' Dyos wi'je' kye, exqe' tyolu' nimaqkawil ojetoq tzaj tma'n weye', tzaj kytzaq'we'n:
—¡Qtzyu'kna' tu'n tjaw qb'incha'n jumajtl! chechij.
Ex inxi'xtoq che tzalaj, b'aj kyq'uqb'a'n kyk'u'j kyxolilex.¹⁹Tetzunj kyb'inte Sanb'alat, Tob'iy ex Kyesem aj Arab'ya, e'xmayin qi'je' ex tzaj kyma'n qeye' tuk'i'l ik'jtib'il:
—¿Titi' nkyb'icha'ne'? ¿Ma kyajb'ile' tu'n tjaw kyiq'inkyib'e' ti'ju' nimaqkawil? chechij.

²⁰Xi'tzun ntzaq'we'ne' kye:
—Ate Qman Dyos toj kya'j k'onilqeye'. Tmajin qo'ye', k'okyel qtzyu'ne' tu'n tjaw qb'incha'n jumajtle', aye'tzunkye' myana' aj Israel qe'kye', mixti'kye' kyoklen tu'n kykawine' toju' nintnam lu ex myaye' junkye' ate'qe' toju' tqanil qtaname', nchije' kye. Kub' kyaq'pu'n aq'untl kyxol

¹A Elyasib' kynejel pale kyuk'i'lju' pale, eb'inchanteju' tjpel tnam, rit tb'i. Okkyq'o'n ptzo'n tzuyb'ilte ex okkyq'o'n tjpel, ex jaw kyb'incha'ntlu' nintapi tzajx tk'etzju' ja nimin twe' Syen tb'i ex ponx tk'etzju' ja nimin twe' Ananel tb'i.²Atzu'n jun tnejtl nintapi jaw kyb'incha'ntlu' xjal aj Jeriko, ex jun tnejtl jaw tb'incha'ntl Sakur, tk'wal Inb'ri.³Aye'tzu'n tyajajil Senaa jaw kyb'incha'ntlu' tjpel, kyiẍ tb'i, okkyq'o'n ptzo'n tzuyb'ilte ex eb'jo'k kyq'o'nju' tjpel kyuk'i'lxi' jpub'lte ex t-xq'e'l.⁴Atzu'n jun tnejtl nintapi oktkuwsa'n Meremot, tk'wal Uriy ex tchman Kos; atzun jun tnejtl nintapi a Mesulam, tk'wal B'erekyiy ex tchman Mesesab'el jaw b'inchante; atzun jun tnejtl nintapi jaw tb'incha'ntl Sadok, tk'wal B'aana.⁵Atzu'n jun tnejtl aye' eb'aj b'inchanteju' aye' aj Tekoa, maskye min kyaju' kyxjal nimaq kyoklen tu'n kyonin kyi'ju' nejenel ti'ju' aq'untl.⁶Aye' Joyada, tk'wal Pasea, ex mesulam, tk'wal B'esodiy, eb'inchanteju' tjpel Jesana tb'i. Okkyq'o'n ptzo'n tzuyb'ilte ex b'jo'k kyq'o'n tjpel kyuk'i'lxi' jupb'ilkye ex t-xq'e'l.⁷Atzu'n jun tnejtl nintapi b'aj kyb'incha'n Melatiyas aj Kab'aon ex Jadon aj Meronot, exqe' xjal aj Kab'aon ex aj Mispa, ju' najb'il ate'qe' tjaq' tkawb'ilju' kawil toj tkub'exq'ij te nin a' Ewprates.⁸Atzu'n jun tnejtl nintapi b'aj tb'incha'n Usyel, tk'wal Arayiy, aq'unal ti'j saqpwaq; atzun jun tnejtl b'aj tb'incha'n Ananiy, aq'unal ti'j k'ok'sb'il; kykab'il eb'aj b'inchanteju' nintapi ti'j Jerusalen tzmax tk'etzu' tapi nim twitz.⁹Atzu'n jun tnejtl b'aj tb'incha'n Repayiy, tk'wal Ur, alkalt te nik'jan ttx'otx' Jerusalen.¹⁰Atzu'n jun tnejtl tapi b'aj tb'incha'n Jedayiy, tk'wal Arumap, qu'n tpentoqu' tja ta'ya', atzun jun tnejtl b'aj tb'incha'n Atus, tk'wal Asab'niy.¹¹Aye'tzu'n Malkyiy, tk'wal Arim, ex Asub', tk'wal Paat-moab', b'aj kyb'incha'n jun tnejtl tapi exju' ja nimin twe' Orni tb'i.¹²Atzu'n jun tnejtl b'aj kyb'incha'n Salum, tk'wal Aloes, ju' alkalt te nik'jantl ttx'otx' te Jerusalen, kyuk'i'lju' tmyal.¹³Atzu'n Anun kyuk'i'lju' xjal najlqe' toj Sanoa b'aj kyb'incha'n tjpel b'ya' tb'i; b'aj kyb'incha'ntl ex b'jo'k kyq'o'n tjpel kyuk'i'lxi' jupb'ilte ex t-xq'e'l, ex jawkyb'incha'ntl junaq jun ky'jaj tk'i' nik'jan (21.53) tqanu' nintapi, tzmax tk'etzju' tjpel xob'l tz'is tb'i.¹⁴Atzu'n Malkyiy, tk'wal Rekab', kawil toju' tx'otx' B'et-akyerem, b'inchantetlju' tjpel xob'l tz'is tb'i, b'jo'k tq'o'n tjpel kyuk'i'lxi' jupb'ilte ex t-xq'e'l.¹⁵Atzu'n Salum, tk'wal Kolose, kawil toju' tx'otx' Mispa, b'inchantetlju' tjpel, t-xiklil a' tb'i: b'aj tb'incha'ntl ex jawx tq'o'n twi', ex b'jo'k tq'o'n tjpel kyuk'i'lxi' jupb'ilte ex t-xq'e'l, ex b'aj tb'incha'ntlju' nintapi tzajx jata' k'ub'l a', Siloe tb'i, tk'etzu' tawal nimaqkawil, pon tzmax ja ta'qe' peta'n nche ku'tz toju' Ninttanam Dab'i.¹⁶Atzu'n Neemiy, tk'wal Asb'uk, kawil toj nik'janju' ttx'otx' B'et-sur, jaw b'inchante jun tnejtl nintapi tu'n tpon tzmax kywitzju' muqb'il te Dab'i, tu'n tpon tzmax tk'etzu' tkb'el a' ex tzmax tk'etz kyja xjal te q'oj.

¹⁷Atzu'n jun tnejtl tapi b'aj kyb'incha'n aj Leb'i: a Reum, tk'wal B'ani; atzu'n jun tnejtl b'aj tb'incha'n Asab'iy, kawil toj nik'janju' ttx'otx' Kyeyla, tb'incha toj tb'iju' jankawina'.¹⁸Atzun jun tnejtl tapi jaw kyb'incha'n tuk'i'l: aye' B'ab'ay, tk'wal Enadad, ju' kawil toju' nik'jantl ttx'otx' Kyeyla;¹⁹atzu'n Eser, tk'wal Joswe, kawil toj Mispa, b'aj b'inchante jun tnejtl tu'me'lju' ja k'ub'lkye aq'unb'il te q'oj, ttx'u'k tb'i.²⁰Atzu'n B'aruk tk'wal Sab'ay, b'aj b'inchante jun tnejtl, txi'x toj ttx'u'k ponx ttziju' tja Elyasib', kynejel pale;²¹atzu'n Meremot tk'wal Uriy ex tchman Kos, jaw b'inchante jun tnejtl, tzajx ttzi tja Elyasib' ex ponx japomna' b'aju' ja.

²²Atzun jun tnejtl tapi b'aj kyb'incha'n pale najlqe' toju' b'ya' Jordan.²³Aye'tzu'n B'enjamin ex Asub' eb'aj b'inchante jun tnejtl tapi tpenju' kyja. Atzu'n Asariy, tk'wal Maaseyiy ex tchman Ananiy, jaw b'inchante tk'etzju' tja.²⁴Atzun jun tnejtl b'aj tb'incha'n B'inuy, tk'wal Enadad, tzajx tk'etz tja Asariy, ponx ttx'u'k.²⁵Atzu'n Palal, tk'wal Usay, b'aj b'inchante jun tnejtl tapi tk'etzju' ttx'u'k ex tpenju' ja nimin twe', nimxi'xtl twe' kyetwitzju' tja nimaqkawil, ju' ati tpen tja xq'uqil. Atzun jun tnejtl b'aj tb'incha'n Pedayiy, tk'wal Paros,²⁶pon tzmax twitzju' tjpel, a' tb'i, tu'me'l tjawetzq'ij, ex tk'etzu' ja nimxi'x twe'. (Aye'toqu' nche ajb'en toj tja Dyos najliqe' toj Opel).²⁷Aye'tzu'n aj Tekoa eb'aj b'inchante jun tnejtl tapi, tzajx twitzju' ja nimxi'x twe' kyetwitzju' tapi ex ponx tk'etzju' nintapi Opel tb'i.²⁸Aye'tzu'n pale eb'aj b'inchante jun tnejtl nintapi, teyile junjun b'aj tb'incha'n tpenju' tja, tzajx twitzju' tjpel chej tb'i.²⁹Atzu'n Sadok tk'wal Imer, jawb'inchanteju' nintapi tpenju' tja; atzun jun tnejtl jawtb'incha'n Semayiy, tk'wal Sekaniy, ju' toktoq xq'uqil ttziju' tjpel te tjawetzq'ij.³⁰Atzun jun tnejtl b'aj kyb'incha'n Ananiy, tk'wal Selemiy, ex Anun, twaqaqi'n tk'wal Salap; atzun jun tnejtl b'aj tb'incha'n Mesulam, tk'wal B'erekyiy, tpenxju' tja.³¹Atzun jun tnejtl nintapi b'aj tb'incha'n Malkyiy, aq'unal ti'j saqpwaq, pon tzmax tk'etz kyja nche ajb'en toj tja Dyos, ex tk'etz kyja xk'aẍlel, twitzju' tjpel xq'uqb'il tb'i, ponx tk'etzju' ja te xq'uqb'il ttx'u'k.³²Aye'tzu'n aq'unal ti'j saqpwaq kyuk'i'lju' xk'aẍlel eb'aj b'inchante jun tnejtl tapi tzajx tk'etzju' ja te xq'uqb'il toj ttx'u'k ex pon kanun tk'etzju' tjpel, rit tb'i. Kyxmayb'il ajq'oj

¹Tej tb'inte Sanb'alat qa intoq jaw qb'incha'ntlju'ye' nintapi ti'jileju' nintnam, tzaj tq'oj, aq'witzuntz tuk'i'l ttx'u'jil xmayil kyi'ju' aj Juda²xitma'n kyeju' tuk'i'l ex kyeju' xjal te q'oj toj Samarya: ¿Titi' kyximu' ajwe'yaj aj Juda? ¿Ma ktzunlo kxe'lq'o'ntl anb'il kye tu'n kyq'ontl chojb'il toj kywitz? ¿Mujqa kjapumel b'aju' kyaq'un toj jun q'ijx toj kywitz? ¿Mujqa nkyxima'n qa che b'entelju' ab'j b'ajniqe' tz'e'y toju' txqan twab'e'n q'aq' ch'uqu'j te tb'anil ab'j kyu'n? chij.

³Atitoqtzun Tob'iy aj Amon tk'etz, ex axjunte q'mante: Naqpena' jun saqb'in jaku' tzaj tx'uyinte nintapi njaw kyb'incha'n qama jax tib'aj, chij. Tna'j Dyos Neemiy

⁴In na'ntzun Dyose' ikjalu: Nman Dyos: b'intza nxi'x che xmayin xjal qi'je'. B'inchama tu'n tokmiltz'uju' taq'wix nkyma'n qi'je' kyib'ajx, ex tu'n tkub'kyij kyu'n kyajq'oj ex tu'n kyxi' iq'i'n toj yajb'il toju' jni'tl tx'otx'.⁵Lalun kub' tnajsa'na kyil, ex lalun tzik'tna'lju kyil tu'na, qu'n matxi' che yolin myab'a'n kyi'ju' nche jaw b'inchantetlju' nintapi, nchije' toj nna'j Dyose'. Xob'tzb'il kyu'n ajq'oj

⁶Xi'tzun qljo'ne' tu'n tjaw b'inchetju' nintapi, matxi'toq jawlq'e toj nik'jan. Intoq che aq'unankye' xjal tuk'i'l tzalajb'il.⁷Atzu'n tej kyb'inte Sanb'alat, Tob'iy, aj Arab'ya, aj Amon exqe' aj Asdod, qa ljo'ntoq t-xi'lq'e tu'n tb'aj b'inchetlu' nintapi ti'jile Jerusalen, exqa matxi'toq tzyet kyjpetu' b'o's b'e, tzaj kytx'u'jil b'a'nxi'x.⁸Kykyaqiltzun junx b'aj kyb'incha'n jun nuk'jtib'il tu'n kyok tzaqpaj q'ojil ti'j Jerusalen tu'n tb'aj kyxitu'n.⁹Ona'ntzun Dyostze', ex e'kub' qq'o'ne' xq'uqil te q'ijtl ex qonik'an te klol qeye'.¹⁰Kymatzunju' xjal aj Juda: Mache kub' siktiju' iqal tu'n tpaj nimxi'x txqan ttx'anqa'n ab'j, ex lay b'ent tu'n tb'aj qb'incha'ntle' nintapi lu, chechij.

¹¹Chechiloju' qajq'oje qa laytoq qb'iye' tpakb'alil exqa laytoq che qile' ajkyoktz b'yolqeye' ex tu'n tkyaj tzaqpaju' aq'untl.¹²Tetzunj ljo'ntoq kyulu' aj Juda najliqe' nqayin kyk'etz q'malte qeye' qatoq che okyel tzaqpaju' xjal lu q'ojil qi'je' toj tkyaqil plaj,¹³nchaq'e' tu'n kykub' tenju' xjal teyile junjun jatu'n kyxq'uqin ti'jxi'ju' nintapi ex toju' jachaq kub'ni lq'e ex ja ta'chaq b'o's b'e, tuk'i'l kyk'uẍtx'e'nb'il, e' kych'ut ex kysmaj.¹⁴Tetzunj wlonteye' qa intoq che xob', nkub' weye' ex xinma'ne' kyeju' nimaqxjal, kyeju' kawil ex kye txqantl xjal teju' tnam: Lalun che xob'e' kye, kyna'ntze' qa nim te Qman Dyos tipumal ex xob'ajilx, ex che kuwan qeye' tu'n kykletju' txqantl kywnaqile', e'kyk'wale' ex kmyale', e' kxu'jile' ex kyjaye', nchije' kye.

¹⁵Tetzunj kyb'inteju' qajq'oje qa nk'u'ntltoq qib'e' ex matxitoq kub' t-xitu'n Qman Dyosju' nk'u'ntl ti'j kyu'n, qkyaqilxe' anjqi'je' tk'etzju' nintapi, teyile junjun xi' toju' taq'un.¹⁶Tzajxtzuntz teju' kmoj lu, nik'janju' nxjale' nche aq'unan toju' aq'untl, atzu'n nik'jantl b'incha'n kyib' iq'i'n kyq'ojb'il, kych'ut, kykolb'il, kysmaj ex kolb'ilkyi'j. Kyaq'kyib'ju' nejenel tu'n kyonin kyi'ju' xjal aj Juda¹⁷ju' intoq jaw kyb'incha'ntlju' nintapi. Xikyljo'nju' iqal tu'n kyiqan iqtz, nche aq'unan tuk'i'l jun kyq'ob' ex tzyu'n kyq'ojb'il tu'n juntl kyq'ob'.¹⁸Kykyaqilju' inche aq'unan tu'n tjaw b'inchetlu' tapi majx k'lo'mile kyk'uẍtx'e'nb'il kyk'u'j, ex atiju' q'ajtzalte chun ntx'u'ke',¹⁹qu'n ojetoq txinma'ne' kyeju' nimaqxjal ex kyeju' kawil ex, kyeju' txqantl xjal teju' tnam: nimaqxi'xju' aq'untl ex nimaqkyqan, ex aq'pu'mile qib' ti'ju' nintapi, najchaqchaq kyxol junjun.²⁰Qu'mtzun, kyb'u'yim kyib'e' qk'etze' ja matxa' kyb'ine' chun, k'onilte Qman Dyos quk'i'l toju' q'oj, nchije' kye.

²¹Ikytzu'n, nqo aq'unanxi'ye', njawu'l q'ij ex nex q'ij qu'ne' toju' aq'untl. Nik'janju' xjal majx tzyu'nile kych'ut.²²Expe' xinma'ntle' kyeju' xjal, toju' tq'ijlalil lu qa kykyaqilx kyuk'i'lxi'ju' onil, ati tu'n kykyajten qonik'an tojxi' Jerusalen, tu'ntzun kyxq'uqin qi'je' te qonik'an ex tu'n kyaq'unan te q'ijtl.²³Expe' mixti'x inel qiq'i'ne' qi'je', ayine', exqe' nwitze'le' exqe' onil, exqe' xq'uqil nche b'et wuk'i'le', teyile junjun tzyu'nile tch'ut. Q'oj kyxolx aj Juda

¹Tzaj jun yol kyu'nju' tnam ex kyu'n kyxu'jil toju' tq'ijlalil lu kyi'jxju' kywnaqil aj Juda,²junjun kyma qa b'a'npun kyk'wal ex kymyal ex intoq ojqelan tu'n kyxi' jyol triy tu'n lalun che kyim tu'n we'yaj;³junjuntl kyma qa tu'n tpaju' mixti' kywa ojetoq kyej kyq'o'n tu'jil kytx'otx', e' kyawb'il ex kyja tu'n tpaj kych'ex,⁴junjuntl kyma qa matxi'toq kyej kyq'o'n kytx'otx' ex kyawb'il ti'j pwaq ch'ex tu'n tchjetju' chojb'il te nimaqkawil. Expe' intoq kyma'ntl:⁵Ikxse'nqe' qwnaqile' ikyqo'xtzun qe'ye', junx qyajile' kyuk'i'l; junqe'xju' qk'wale' kyuk'i'l kyk'wal. Tu'npetzunju', ati tu'n kyxi' qk'a'yi'ne' qk'wale' ex qmyale' te lq'o'n majin. Expe' matxi' che'x junjun qmyale' te lq'o'n majin, ex mixti'x juntl tu'me'l tu'n qb'inchanteye' tu'n tmyet, qu'n junxi'tl tajawju' qtx'otx'e' ex qawb'ile', chechij.

⁶Tetzunj nb'inteye' kyol te yajte'n, tzaj ntx'u'jile' tu'n tpaj.⁷Tb'ajlenxi'tzun nxima'ne' b'a'nxi'x, eb'aj ntzak'u'ne' nimaqxjal exqe' nche kawin tu'n tpaju' nkub' kyq'o'n jun iqtz lu kyib'aju' kywnaqil. Ex ok jun b'uyjtib'il kye kykyaqil xjal wu'ne' tu'n tnk'etti'j ja'lu,⁸xi'tzun nma'ntze' kye: Matxi' tz'okqe' tilil qu'n ex matxi' che kolpetu' qxjalil aj Juda qu'ne' kyeju' nimaqtnam min nche niman te Dyos ja xa'na' k'a'yi'nqe'; ¿tzun ja'lu ma matxi' che'x kyk'ayi'n jumajtle' tu'n qxi'tle' kolpilkye?, nchije' kye.
Mixti'xte tzaj kyma'n, qu'n mixti'x b'ent ttzaq'wet kyu'n.⁹Xi'tzun nma'ntle' kye: Myab'a'nte' nkyb'incha'ne'. Ma'wtlo txikyxob'le'n ch'i'ne' twitz Qman Dyos, tu'n miche xmayina'ju' qajq'oj qi'j, ju' min nche niman te Dyos.¹⁰Ex ikxqe' kyuk'i'lu' nwitze'le' exqe' onilweye', matxi' txi'xi' qq'o'nqe' pwaq ex triy ch'ex kye; qu'mtzun ¡Kb'el qnajsa'nte' kyk'as lu!¹¹Ex kxe'l nkub'sa'ne' kyeye' tu'n t-xikyanjsa'n ti'ju'ye' kytx'otx', e' kyawb'il, e'tqan ky-olib'o ex kyja ja'loxi'x, ex tu'n kychjonteju' kyk'a's ati kyeye', qa pwaq, twitz awal k'ok'e'kywitz, b'in mujqa aseyt, nchije' kye.¹²Tzajtzun kytzaq'we'n: K'anjel qanjsa'nqe' ti'j tkyaqil ja'lu, ex lay txi' qqani'ntle' kye. Qb'incha'qe' tkyaqil kse'nxju' matxi' tmaya, chechij.
E'tzajtzun ntxko'ne' pale, ex kywitzku' xinma'ne' kye tu'n kytziyante twitz Dyos tu'n tjapun kyu'n aju' matxi'toq kyma.¹³Expe' elnchto'ne' ti'j nxb'alune' ex nmaye': Ikywittzun b'je'la' tchto'n Dyos ti'jxi'ju' kyja ex ti'ju' ati kye, kykyaqilju' min xjapunju' yol lu kyu'n, tu'n tb'je'l iq'i'nju' ati kye ja'lo, nchije'. Ikxwitju', chechi kykyaqilju' txqan tnam xjal tzaj kytzaq'we'n, ex jawkyajwali'n Qman Dyos. Xtalb'il tb'incha Neemiy
Japunju' yol kyu'n xjal kse'nxju' kyma,¹⁴ex toju' kab'lajoj (12) ab'q'i, tzajx toju' q'ij te tjunaqi'n (20) ab'q'i tej woktq'o'ne' nimaqkawil Artajerjes te kawil toju' tnej tx'otx' Juda tzmax tpon toju' tjunaq kab'lajoji'n (32) ab'q'i toklen te nimaqkawil, mixti' ajb'en twi' wab' weye' ex kyeju' onilweye', kse'nxju' ati woklene' ti'j te jun kawil.¹⁵Aye'tzunkye' kawil eb'aj ten nejtl nwitze', ma'xi'x che b'jo'kten yajulteju' tnam, qu'n atl junjun q'ij intoq kyqani'n kab'naq (40) saqpwaq te twi' kywa ex kyk'wa' b'in. Expe' intoq che yajunju' kymajin kyi'ju' tnam. Ayintzunwe' min xnb'inchaye' ikju', te jun ninb'il twitz Qman Dyos.

¹⁶Ex juntl, japunwe' waq'un tu'n tjaw tb'inchetlju' nintapi ti'ju' nintnam, ex min xnloq'we' ntx'otx'. Exqe'tzu'n nmajine', kykyaqilx e'aq'unan ti'ju' aq'untl.¹⁷Intoqpe' che kub' qe wuqnaq lajoj (150) xjal wal ti'ju' nmese', e'aj Juda toju' tnam, exqe' nimaq kyoklen toju' kawb'il, kyuk'i'lxi' nche tzaj kyoju' nimaqtnam nqaku' xb'etzalqeye'.¹⁸Atzunju' ntoq kub' b'inchet te wab'j wu'nxe' atl junjun q'ij: jun wakx, waqaq tb'anil rit, ex txqan ek'; ex atitoq txqan b'in atl lajojchaq' q'ij. Tu'npetzu'n ayintoqe' kawil, min xinqani'nwe' twi' nwaye', qu'n nimxi'xtoqu' iqtz tib'aju' tnam lu.¹⁹¡Ka'yintza tkyaqilju' matxi' nb'inchaye' teju' tnam lu Nman Dyos! Jawkyiq'i'nkyib' xjal ti'j Neemiy

¹Tetzunj kyb'inte Sanb'alat, Tob'iy, Kyesem aj Arab'ya exqe' txqantl qajq'oje qamatxi'toq jaw nb'incha'n jumajtle' nintapi ex mixti'tl jun xopa'j kyejten (Maskyepe' na'mxtoq kyokq'etju' tjpel jatu'n kyoka'),²tzaj kysma'n Sanb'alat ex Kyesem jun tqanil weye' tu'n qb'uyinte qib'e' kyuk'i'l toj junju' najb'il toju' b'ya' Ono. Atoqtzun kyajb'ilju' tu'n nb'o'lje' kyu'n.³Exi'tzun nchq'o'ne' nsanjelale' q'malte kye qa nchin aq'unane' ti'j jun aq'untl nim toklen, ex lay b'ent tu'n nxiye', qu'n kjel tenpuju' aq'untl qama kyej nq'o'ne' tu'n qxi'ye' b'ilkye.⁴Kyajmaj tzaj kysma'n axtqanilju', ayintzunwe' axtzaq'web'lju' xinq'o'ne' kye.

⁵Tzajtzun tchq'o'n Sanb'alat jun tmajin, q'olte axtqanilju' weye' toj tjwe'yi'n maj, toj jun u'j jqo'n,⁶intoq tma'n: inkyyoli'n xjal kyxol, ikyx intma'n Kyesem, qa nkynk'u'ne' ti'j kyuk'i'lju' aj Juda tu'n tjaw kyiq'inkyib'e' ti'ju' nimaqkawil, qu'mtzun njaw kyb'incha'n jumajtle' nintapi. A nq'manjtzu' toju' yol nb'et qa aya k'okyel te kynimaqkawil,⁷ex matxi' che oktq'o'na t-sanjelal Dyos tu'n tokq'o'na kyu'n te nimaqkawil toj Jerusalen ex tu'n kymante qa atitl nimaqkawil toj Juda. Jaku' ponju' yol lu toj twi' nimaqkawil Artajerjes, qu'mtzun kuttzaja ex qo yolilku' tib'aj, chiju' tzaj kytz'ib'a'n.

⁸Xi'tzun nsma'ne' tzaq'web'lte, xinma'ne' te qa mya axju' nq'umli lu, qu'n axte njaw ximante.⁹Qu'n ate'ktoq xob'tzalqeye', kyajb'iltoq tu'n qkub'numje' ex tu'n laluntoq japun b'aju' aq'untl qu'ne'; ayintzunwe' oktililxi'xtl wu'ne'.¹⁰Yajxitzuntl nxi'ye' tja Semayiy, tk'wal Delayiy ex tchman Meetab'el, ju' matxi'toq tz'okx tjpu'ntib' toju' tja, ex tzaj tma'n weye': Qb'u'yimqib' toju' tja Dyos, toju' ja xjan, ex che qjpumitzju' tjpel, qu'n inkyxima'n tu'n kyul b'yolteya toju' qonik'an ja'lo, chij.¹¹Ayintzunwe' xintzaq'we'ne' te: Minti' nche oqkye' ichan kse'n ayine' ex minti' nche okx toju' tja Dyos tu'n tkletju' kychib'jil. Ayinwe', lay chin okxe', nchije' te.¹²Expe' elnnik'e' ti'j qa myaju' Dyos yolin toj ttzi, intoq tma'n tkyaqil ja'lu wi'je' qu'n ojetoq tk'am pwaq kye Sanb'alat ex Tob'iy.¹³Chjonjtz te tu'n tokten xob'tzal weye', tu'ntzun nb'inchan ile' twitz Dyos. Iktzu'n tu'n kyolintzuntz taq'wix wi'je' ex tu'n tel nch'ixawe' kyu'n.¹⁴¡Nman Dyos: na'nku'ya matxi' kyb'incha Sanb'alat ex Tob'iy! ¡Ex lalun tzik' kyna'lu' Noadiy, ju' sanjelal, tu'na, exqe' txqantl sanjelal eb'jo'kten xob'tzal weye'!¹⁵Japun b'aju' nintapi toju' q'ij junaqjo' (25) tajlalju' xjaw Elul, b'aj kab'naq kab'lajoj (52) q'ij ti'ju' aq'untl.¹⁶Tetzunj kyb'i'nteju' qajq'oje, tzajtzun nim xob'eltz kyi'j kykyaqilju' xjal ate' kyoju' nimaqtnam ate' qi'jileye' ex majxkub' naju' kyninb'ilkyib', qu'n kane toj kywitz qa tu'n tonb'il Qman Dyos b'enta'ju' aq'untl lu.

¹⁷Nim u'j b'et kyxol Tob'iy kyuk'i'lju' xjal nimaq kyoklen toj Juda toju' tq'ijlalil lu.¹⁸Qu'n nim xjal mujlitoq kytzi tuk'i'l Tob'iy, tu'n tpaju' jiyb'aj te Sekaniy, tk'wal Ara, ex tu'nju' ojetoq mje Joanan, ju' tk'wal, tuk'i'lu' tmyal Mesulam, tk'wal B'erekyiy.¹⁹Inxi'xtoq kyma'n xjal nwitze' qa majx b'a'nju' Tob'iy, exju' in nma'ne' intoq b'ajx kyma'n te. Atzunte Tob'iy, intoq che tzaj t-sma'n u'j weye' tu'n nxob'e'. Eb'jo'k tq'o'n Neemiy q'eltwitz aq'untl

¹Tej tb'aj b'inchet jumajtlu' nintapi ex eb'aj b'inchetju' tjpel, eb'jo'k q'et xq'uqil ttzi tjpel, e'aj b'itzal ex aj Leb'i.²Aye' e'oknq'o'nju'ye' nuk'ul kyib'aju' xjal toj Jerusalen, a Anani, witz'ine', ex Ananiy, ju' chaq'ul kye xjal q'ojil kyoj nimaqtnam, jun ichan q'uqli tk'ujlalil ex nxob'xi'x te Dyos kwitz txqan xjal.³Xinma'ne' kye qa mixti' tu'n kyjqet tjpelju' nintnam Jerusalen, ajxi' tjaw q'ij, ex ati tu'n kyjpet ex tu'n kyxtanet b'a'nxi'x ate'ku'ju' xq'uqil jachaq tu'n kyxq'uqina'. Ex eb'jo'k nq'o'ne' xq'uqil kyxolxu' xjal najliqe' toj Jerusalen, tu'n kyxq'uqin junjun jachaq tu'n kyxq'uqina', ex junjuntl tu'n kyxq'uqin twitzilexu' kyja.⁴Nimtoqu' nintnam ex najchaq pomna' ttxa'n, aye'tzu'n xjal naq jte'xtoq najliqe' toj qu'n na'mxtoq kyjaw b'inchetlu' ja toj. Aye' anjtzkyi'j kyxolju' exniqe'toq iq'i'n (Esd 2.1-70)

⁵Kub'tzun tq'o'n Dyos toj nnab'le' tu'n kyb'aj b'u'yitju' xjal nimaq kyoklen, exqe' ati kyoklen toj kawb'il exqe' tnam, tu'n tku'x tz'ib'etju' kyib' te jayi'nchaq, ex knetju' u'j wu'ne' ja tz'ib'a'na'qe' eb'ju'l nejtl, teyile junjun k'loj toj kyjakyib'. A tz'ib'a'nju' toj ikjalu:

⁶Aye' aj Israel ja'lu itz'jniqe' toj Juda eb'ajx tiq'i'n nimaqkawil Nab'ukodonosor toj B'ab'ilon, ex anjtzkyi'j yajxi'tl toj Jerusalen ex toj junjuntl najb'il toj Juda, teyile junjun tojilex ttanam, aye' nejenelju' kye aye' Sorob'ab'el, Joswe, Neemiy, Asariy, Raamiy, Naamani, Mardokyey, B'ilsan, Misperet, B'iwb'ay, Newum ex B'aana:⁸Jo'k'al wajxaqnaq kab'lajoj (2,172) tyajajil Paros;⁹atzun wajxalajnaq kab'lajoj (372) tyajajil Sepatiy;¹⁰atzun junk'al kab'lajnaq kab'lajoj (652) tyajajil Ara;¹¹atzun wuqk'al wajxaqlajoj (2,818) tyajajil Paat-moab', tzajni kyyajil kyi'j Joswe ex Joab';¹²atzun oxk'al kab'naq kyajlajoj (1,254) tyajajil Elam;¹³atzun kab'k'al kab'naqjo' (845) tyajajil Satu;¹⁴atzun junk'al wajxaqlajnaq (760) tyajajil Sakay;¹⁵atzun junk'al kab'lajnaq wajxaq (648) tyajajil B'inuy;¹⁶atzun junk'al junlajnaq wajxaq (628) tyajajil B'eb'ay;¹⁷atzun jo'k'al qaqlajnaq kab'e' (2,322) tyajajil Askad;¹⁸atzun junk'al oxlajnaq qaq (666) tyajajil Adonikam;¹⁹atzun jo'k'al oxnaq wuq (2,067) tyajajil B'ikb'ay;²⁰atzun junk'al kab'lajnaq o'lajoj (655) tyajajil Adin;²¹atzun kyajnaq wajxaqlajoj (98) tyajajil Ater, tzajni kyyajil ti'j Esekyiy;²²atzun qaqlajnaq wajxaq (328) tyajajil Asum;²³atzun qaqlajnaq kyaje' (324) tyajajil B'esay;²⁴atzun jo'naq kab'lajoj (112) tyajajil Arip;²⁵atzun kyajnaq o'lajoj (95) tyajajil Kab'aon;²⁶atzun b'eljojnaq wajxaq (188) ichan aj B'elen ex aj Netopa;²⁷atzun qaqnaq wajxaq (128) aj Anatot;²⁸atzun kab'naq kab'e' (42) aj B'et-asmab'et;²⁹atzun junk'al wuqlajnaq oxe' (743) aj Kyiryat-jearim, aj Kyepira ex aj B'eerot;³⁰atzun junk'al junlajnaq jun (621) aj Rama ex aj Keb'a;³¹atzun qaqnaq kab'e' (122) aj Mikmas;³²atzun qaqnaq oxe' (123) aj B'etel ex aj Ay;³³atzun kab'naq kab'lajoj (52) aj Neb'o.³⁴Oxk'al kab'naq kyajlajoj (1,254) tyajajilu' juntl Elam;³⁵atzun qaqlajnaq (320) tyajajil Arim;³⁶atzun wuqlajnaq jwe' (345) aj Jeriko;³⁷atzun junk'al qaqlajnaq jun (721) aj Lod, aj Adid ex aj Ono;³⁸atzun b'eljojk'al qaqlajnaq lajoj (3,930) aj Senaa.³⁹Kab'k'al wajxaqnaq oxlajoj (973) pale tyajajil Jedayiy, kyxol tyajajil Joswe;⁴⁰atzun kab'k'al kab'lajnaq kab'lajoj (1,052) tyajajil Imer;⁴¹atzun oxk'al kab'naq wuq (1,247) tyajajil Pasur;⁴²atzun kab'k'al lajnaq wuqlajoj (1,017) tyajajil Arim.

⁴³Oxnaq kyajlajoj (74) aj Leb'i kyyajajil Joswe ex Kadmyel, ex tyajajil Odab'iy.

⁴⁴Wuqnaq wajxaq (148) aj b'itzal tyajajil Asap.

⁴⁵Atzun qaqnaq wajxaqlajoj (138) xq'uqil ttzija, kyyajajil Salum, Ater, Talmon, Akub', Atita ex Sob'ay.⁴⁶Aye' ajb'elju' toj tja Dyos kyyajajil Siya, Asupa, Tab'aot,⁴⁷Kyeros, Syaa, Padon,⁴⁸Leb'ana, Akab'a, Salmay,⁴⁹Anan, Kidel, Kaar,⁵⁰Reayiy, Resin, Nekoda,⁵¹Kasam, Usa, Pasea,⁵²B'esay, Meunim, Nepusim,⁵³B'akb'uk, Akupa, Arur,⁵⁴B'aslut, Meyda, Arsa,⁵⁵B'arkos, Sisara, Tema,⁵⁶Nesiya ex Atipa.

⁵⁷Aye'tzu'n kyyajajil ajb'el te Salomon aye' kyyajajil Sotay, Soperet, Peruda,⁵⁸Jaala, Darkon, Kidel,⁵⁹Sepatiy, Atil, Pokyeret-aseb'ayim ex Amon.⁶⁰B'elajnaq kab'lajoj (392) kyb'aju' ajb'el toj tja Dyos kyuk'i'lxi' ajb'el te Salomon tu'n kykyaqil.

⁶¹Aye'tzu'n e'tzaj kyoju' tnam Tel-mela, Tel-arsa, Kyerub', Adon ex Imer, ju' min b'ent kyek'unte qa aj Israel kyyajil mujqa naq witze'ljxi'qe', aye' ja'lu:⁶²kyyajajilu' Delayiy, Tob'iy, Nekoda, junk'al kab'lajnaq kab'e' (642) kyb'aj.⁶³Aye'tzu'n kywitze'lju' pale: kyyajajil Ob'ayiy, Kos ex B'arsilay, mje tuk'i'l jun tmyal B'arsilay aj Kalaad, ex axu' tb'i oktq'o'n te tb'i.⁶⁴E'jyon kyb'iju' xjal lu toju' u'j jatz'ib'ana' qe'ju' toj kyjakyib' kyuk'i'l, mixnati' knet kyu'n atzu', eb'je'l iq'i'n kyxolu' pale.⁶⁵Expe' tchaq'ju' kawil tu'n lalun txi kywanju' wab'j xjansa'n, tzmaxi'j ajtmante jun pale telenxi' tnik' tu'nel Urim ex Tumin.

⁶⁶Jo'mutx' jo'k'al wajxaqlajnaq (42,360) kyb'aju' tnam tu'n kykyaqil,⁶⁷expe' min eb'jo'kju' ichan ex qya lq'o'n kymajin toj tajlal, wajxaqlajk'al qaqnaq wuqlajoj (7,337) kyb'aj. Ex atitoq kab'lajnaq jwe' (245) aj b'itzal ichan ex qya kyxol.⁶⁸Expe' ate'toq junk'al qaqlajnaq qaqlajoj (736) kyb'a'nchej, kab'lajnaq jwe' (245) mul,⁶⁹junk'al junaq o'lajoj (435) kamey ex qaqlajk'al qaqlajnaq (6,720) b'ur.

⁷⁰Ate' junjun nejenel kye junjun ja xjal kyaq' oyaj te o'nb'il teju' aq'untl; xitq'o'n kawil masch'i'n wuqlajoj lib'r tk'i' nik'jan q'anpwaq toju' k'ub'l pwaq, atzun kab'naqlajoj (50) nimaqlaq ex junk'al qaqnaq lajoj (530) kyxb'alun pale ku'j.⁷¹Aye'tzu'n nejenel kye junjun ja xjal xikyq'o'n oxe' kyintal tk'i' kab'naq kab'lajoj lib'r (3.52) q'anpwaq ex junaq qaq kyintal tk'i' oxnaq kab'e' lib'r (26.62) saqpwaq toju' k'ub'l pwaq teju' aq'untl;⁷²Aye'tzu'n jte'tl xjal toju' tnam xikyq'o'n oxe' kyintal tk'i' kab'naq kab'lajoj lib'r (3.52) q'anpwaq, junaq kyaje' kyintal tk'i' junaq lib'r (24.20) saqpwaq, ex oxnaq wuq (67) kyxb'alun pale ku'j.

⁷³Eb'ajkub' najanju' pale, aj Leb'i, xq'uqil ttzija, aj b'itzal, e'xjal toju' tnam, ajb'el toj tja Dyos ex kykyaqil aj Israel, tojilex kynajb'il. Jaw ẍch'i'n tkawb'il Dyos kywitz xjal
Tojtzu'n twuqi'n xjaw, matxitoq che kub'najan aj Israel tojile kynajb'il.

¹B'ajtzun kyb'u'yi'n kyib' kykyaqilju' tnam ja nkychmo'na' kyib' xjal twitzju' tjpel a' tb'i, ex xikyma'n te Esdras xnaq'tzal tu'n ttzaj tiq'i'n tu'jil tkawb'il Moyses, ojetoq tzaj tq'o'n Qman Dyos kye aj Israel.²Toj tnejel q'ij te twuqi'n xjaw, tzaj tiq'i'n pale Esdras tu'jil kawb'il kywitzju' b'u'yi'ntoqkyib', e'ichan ex qya ex kykyaqilju' intoq che ximantl;³ex jawt-ẍch'i'n kywitz kykyaqil jamajx ate' xjal tpenju' tjpel a' tb'i, tzyet-x te prim ex tzmax te wanq'ij.
Tkyaqilju' tnam intoq kub' kyb'in tej tjaw ẍch'i'n tu'jil tkawb'il Dyos.⁴Wa'ltoqju' xnaq'tzal Esdras tib'aj jun t-xwe'lb'il tze b'incha'n tu'n tajb'en te. Ex wa'lqe'toqju' Matatiy, Sema, Anyiy, Uriy, Ilkyiy ex Maaseyiy, toj tb'a'nq'ob'. Ex wa'lqe'toq Pedayiy, Misael, Malkyiy, Asum, Asb'adana, Sakariy ex Mesulam, toj tnayaj.⁵Jawtzun tjqo'n Esdras u'j kywitz kykyaqilju' tnam, qu'n q'ancha'lxi'xtoq jawl kye kykyaqil; tetzunj tjaw tjqo'nju' u'j, kykyaqilu' xjal eb'ajkub' we'.⁶Jawtzun tajwali'n Esdras Qman Dyos nimtipumal, ex tkyaqilju' tnam jaw kyq'o'n kyq'ob' jawtl ex xikytzaq'we'n: Ikxwitju', Ikxwitju', chechij. E'kub' joqetzuntz majx ku'pun kyplaj twitz tx'otx', ex ek'ulun te Qman Dyos.

⁷Aye' aj Leb'i Joswe, B'ani, Sereb'iy, Jamin, Akub', Sab'tay, Odiy, Maaseyiy, Kyelit, Asariy, Josab'ad, Anan ex Pelayiy inche'x chik'b'a'nteju' tkawb'il Dyos kye tnam. Tej wa'lqe'toqju' xjal ja ta'qe',⁸kuwtoq njaw kyẍch'i'n tu'jil kawb'il, ex ntoq jaw kypju'n tu'n tkyaj chik'exi'xu' ntma'n.⁹Ex tkyaqilju' tnam intoq che o'q' tej kyb'inteju' ntma'n tkawb'il Dyos, ikxju' kawil Neemiy ex xnaq'tzal ju' pale Esdras, exqe' aj Leb'i nche'x chik'b'ante tkawb'il Dyos kye tnam, xikyma'n kye kykyaqil tu'n lalun che b'isun ex tu'n lalun che oq', qu'n aju' q'ij lu tu'n tajb'en te Qman Dyos.¹⁰Xipetma'ntl Esdras kye: kukyxi'ye' ex che wanqe'ye' ti'ju' tb'anilxi'x, che k'wanqe' b'ine' chi' ex che kytxkonqe'xju'ye' mixti' kywa b'incha'n, qu'n xjansa'nte' q'ij lu te Qman Dyos. Lalun che b'isune', qu'n a qkuwalju' tzalajb'il te Qman Dyos.

¹¹Ikyqe'xju' aj Leb'i intoq che'x kymyo'n xjal, xikyma'n tu'n kyqjen ex tu'n lalun che oq'tl, qu'n te Qman Dyosju' q'ij lu.¹²Kykyaqiltzunju' xjal eb'ajx wal ex k'wal, ex tu'n txikyq'o'n kywaju' mixti' kywa ex tu'n tkub' kyik'sa'nju' ninq'ij, qu'n matxi'toq tz'el kynik' ti'ju' xixnaq'tza'n kye. Ik'saj Kyq'ij pach tq'ob' tze

¹³Te juntl q'ij, b'aj kyb'u'yi'n kyib' kykyaqilju' nejenel kye junjun ja xjal, exqe' pale exqe' aj Leb'i, tuk'i'l Esdras xnaq'tzal tu'n kyxnaq'tzantekyib' ti'ju' tkawb'il Dyos,¹⁴ex b'je'l kyu'n tz'ib'a'n qa ojetoq tchaq' Qman Dyos toj ttzi Moyses, qa atitoq tu'n kynajan aj Israel kyoj pach tq'ob' tze toju' tq'ijlalilu' ninq'ij toju' twuqi'n xjaw.¹⁵Extzun tqaniltz kyoj kykyaqilju' nimaqtnam ex toj Jerusalen, tu'n kyexju' xjal jyolte tq'ob' tze olib'o tuk'i'lxi' t-xaq kyoj k'ul, ex tq'ob' ktxab', tut ex alkyexku' juntl tze pujin tu'n kyb'inchetju' pach, kse'nxju' tz'ib'a'n toju' tkawb'il Dyos.¹⁶Eb'je'xtzu'n xjal jyolte ex anjtzkyi'j iq'i'n tq'ob' tze kyu'n tuk'i'lxi' t-xaq tu'n tjaw kyb'incha'n kypach tq'ob' tzeyile, kyib'aj ja ex kywi' pe'n, ex tpenju' tja Dyos, ex ja nchi tena' nim xjal ttziju' nintjpel a' tb'i ex ttziju' nintjpel Eprayin tb'i.¹⁷Kykyaqilu' tnam xjal b'je'xniqe'toq q'i'n ex eb'ju'l jumajtl, kyb'incha kypach tq'ob' tze ex eb'jo'kxten toj, qu'n b'ajxtoq b'inchet ja'lu ttzajlenx toj tq'ijlalil Joswe, tk'wal Num, tzmax toju' tq'ijlalil lu. Ex ojexi'x che tzalaj.¹⁸Kub'kyik'sa'n wuq q'iju' ninq'ij; tzyet-x tnejel q'ij tzmax te b'ajsb'il, intoq jawt-ẍch'i'n Esdras tu'jil tkawb'il Dyos tkyaqil q'ij; tojtzun twajxaqi'n q'ij ok jun b'uyjtib'il nim toklen, kse'nxju' nb'inchet tnejel. B'jatztpa'n Esdras kyil aj Israel

¹B'aj kyb'u'yi'n kyib'u' aj Israel toj junaq kyaje' (24) tajlalxju' xjaw tu'n kymewayin; b'jo'k kyq'o'n kyxb'alun te b'is ex jax kyq'o'n tx'otx' toj kywi',²eltzun kypa'n kyib' kyi'ju' najchaq xjal, e'kub' we' ex okkyq'o'n kyil kyi'j ex kyilju' ojtxi' kychman.³Tetzunj wa'lqe'toq jaxu' te'qe', oxe' or jaw ẍch'i'nju' tkawb'il Qman Dyos kywitz kykyaqil, ex oxe' ortl b'jawtz kypa'n kyil ex ek'ulun te Qman Dyos.⁴Yajxi'tzuntl eb'jaxu' aj Leb'i Joswe, B'inuy, Kadmyel, Seb'aniy, B'inuy, Sereb'iy, B'ani ex Kyenani, twi' xwe'l ex ena'n Dyos tuk'i'l tq'ojq'ojel kywi' kuw;⁵kymatzun aj Leb'i Joswe, Kadmyel, B'inuy, Asab'niy, Sereb'iy, Odiy, Seb'aniy ex Petaiy, kjalu: Che we'ktze', kyajwalinktze' Qman Dyos tejumajx ex kukxju'. ¡Ajwalinjtzxwitju' tb'i nim toklen ex tb'anilxi'x tuk'i'l ky'i'wb'il ex b'itz! chechij.

⁶E'na'ntzun Dyosu' tnam kjalu: Ateju'ya Dyos Manb'aj ex mix-a'lo' juntl. Aya b'inchante kya'j ex tzmax tib'ajxi' kya'j, ex kykyaqilju' che'w; aya b'inchante tx'otx' ex tkyaqilju' ati twitz, exqe' ninnjab' ex kykyaqilju' ati kyoj. Aya nq'onte kychwinqlal kykyaqilju' ti'xti'. Qu'mtzun nche k'ulunju' che'w twitz kya'j teya.

⁷Taye, aya Dyos jaw sk'onte Ab'ram; etztiq'i'na toj Ur, ninkytanam aj Kaldey, ex oktq'o'na tb'i Ab'raam.⁸Tka'yiya qa jun ichan q'uqlitoq tk'u'j ti'ja, tb'inchaya jun nak'b'il tuk'i'l, ex kyej b'entti'j jun tyola tuk'i'l qatoq ktzajel tq'o'na kytx'otx' aj Kanaan, itit, amorey, aj Perisya, jeb'usey ex aj Jerjesey, kyeju' tyajajil; ¡ex matxi' japun tyola, qu'n kukxu' njapunta tyol!⁹Tka'yiya qa intoq che yajtiju' ojtxi' qchmane' toj Ejipt, ex tb'iju'ya kyoq'el tk'etzju' ninnjab' tok tb'i kyaq.¹⁰Tb'inchaya nimaq b'a'nq'ob'aj te lab'te'nqe' ti'j paraon, kyi'j kykyaqilju' tmajin ex kyi'j kykyaqilju' xjal toju' ttx'otx', qu'n tilju'ya myab'a'n intoq kyb'incha' kyi'ju' aj Israel. Ex tkanb'aya jun tyolinjtza b'a'n tzmax ja'lo.¹¹Kub' taq'pu'nju'ya ninnjab' toj kab'e' kywitz, ex eb'jik'x toj nky'ajchaqju' ninnjab' tib'aj tx'otx' tzqij; aye'tzu'n kyajq'oj eku'x tmulq'i'na tzmax t-xexi', kse'n jun ab'j toj a' nim t-xe.¹²Ex eb'ajx t-ẍaqlu'na te q'ijtl tjaq' jun tnej muj, atzu'n te qonik'an tjaq' jun tnej q'aq', tu'n tk'ant toju' kyb'e ljo'ntoq kyu'n.

¹³Yajxi'tzuntl kb'u'la twi' witz Sinayi, ex tzaj yolina kyuk'i'l tzmax toj kya'j; e'tzaj tq'o'na chaq'b'il tnik'alkyi'j kye, xnaq'tzb'il axqe'xi'x, e'kawb'il ex chaq'b'il tb'anilqe'.¹⁴Ex xit-xnaq'tza'na kye tu'n kyxjansanteju' q'ij te ojlab'l, ex e'tzaj tq'o'na chaq'b'il, e'axxi'x xnaq'tzb'il kye toj ttzi tmajina Moyses.¹⁵Expe' tzaj tq'o'na wab'j te toj kya'j kye tu'n tq'jen we'yaj kyi'j ex a' toj pik tu'n tq'jen k'waj kyi'j. Xitma'ntzuntza kye tu'n kyokx toju' tx'otx' tziya'ntltoq tu'n ttzaj tq'o'na kye.¹⁶Aye'tzunkye exqe' ojtxi' qyajilb'ene' jaw kynima'n kyib' ex kub' kypi'sa'n kyib', ex mixti'x exi kyb'i'n tchaq'b'ila.¹⁷Mixti'x xikyb'i'n ex min e'tzaj kyna'nju' b'a'nq'ob'aj te lab'te'n tb'inchaya te kolb'ilkye. Kub' kych'uẍsa'nkyib' ex okkyq'o'n jun nejenel kye tu'n tanj jumajtlkyi'j toju' yajb'ilkye toj Ejipt. Atzunta Dyos inkub' tnajsa'na il, che'w tk'u'ja ex ntzaj laqj tk'u'ja, min ntzajnaj ttx'u'jila ex nim tk'u'jlalila, mixti' e'kyaj tq'o'na.¹⁸Expe' tej tkub' kyb'incha'n jun qpoj tman wakx k'uxb'il, ex kyma qa a dyosu' etzq'inkye toj Ejipt, ex kyb'incha txqan il nimxi'x,¹⁹atzunta, tu'nju' nim tq'aq'b'il tk'u'ja, min e'kyajtq'o'na toj chq'ajlaj. Mixti' eltpa'n tib'ju' tnej muj kyi'j, ẍaqlulkye toju' kyb'e te q'ijtl, exju' tnej q'aq' te qonik'an q'olte spik'un toj kyb'e tu'n t-xikyljo'n.²⁰Expe' tzaj tq'o'na t-xewa b'a'n xnaq'tzalkye; tz'aqli kywa mana ntoq tzaj t-sma'na kye, ex tzaj tq'o'na a' kye tu'n tq'jenju' k'waj kyi'j.²¹Kab'naq (40) ab'q'i tzaj tq'o'na kywa toj chq'ajlaj, ex mixti' jun ti'xti' mixwitti' kye: ex min ekub'aju' kyxb'alun ex min ximal kyqan tu'n kyb'etb'en.

²²E'kub' tq'o'na kawb'il ex nimaqtnam toj kyq'ob', ex b'ajx tpa'na tx'otx' toj tneji'n kye, kub'tzun kytzyu'n Esb'on, ttanamju' nimaqkawil Seon ex B'asan, ttanam nimaqkawil Ok.²³Tb'inchaya tu'n kychmet txqan kyk'wal kse'n kyajlalju' che'w twitz kya'j, ex eb'ajxtiq'i'na tu'n kytzyunte kytx'otx' toju' tx'otx' ojetoq ttziyaya tu'n ttzaj tq'o'na kye ojtxi' qyajilb'ene'.²⁴Eb'jo'kxtzuntz toj ex kub'ti'ju' kytx'otx' aj Kanaan kyu'n; eb'aj kub' tme'ssa'na najli qe'toq toju' tx'otx' lu kywitz, eb'aj kub' tq'o'na kynimaqkawil exqe' xjal toju' tnej tx'otx' lu toj kyq'ob' tu'n kyb'inchante kye aju' kyajb'il.²⁵Eb'jo'k te kyajawju' nintnam tok nimaqtapi kyi'j ex txqan tb'anil tx'otx', ex txqan ja nojniqe' kyu'n ti'xti' tb'anilqe', e'xoch ex tqan awal ub'a, e'tqan olib'o, ex nim txqantl tqan lob'j; inxi'xtoq che wan b'a'nxi'x ex b'je'tz kywitz, b'aj kynik'b'e'n txqan t-xtalb'ila.

²⁶Aye'tzunkye min eb'in teya, jawkyiq'i'nkyib' ti'ja ex el kyik'o'n tkawb'ila. Expe' eb'aj kub' kyb'yo'nju' t-sanjelala, eb'ajx q'mante kyekywitz tnam qa ati kyil ex tu'ntoq tanjtzkyi'j tuk'i'la, ex nim ttx'u'jila okkyq'o'n.²⁷Qu'mtzun exa' tq'o'na toj kyq'ob'ju' kyajq'oj, eb'ajkub' yajunkye. Yajxi'tzuntl, tej intoq che oq', e'qanin o'nb'il teya, atzunta, tu'nju' inxi'x q'aq'an tk'u'ja, e'tzaj tb'i'na tzmax toj kya'j, e'tzaj tq'o'na xjal klol kye toj kyq'ob'ju' nche yajunkye.

²⁸Aye'tzuntlkye, naqa xten ch'i'n nak'b'il kye, nche aq'witl b'inchal il twitza; qu'mtzun e'kyajtq'o'na tu'n kykub'tz'aq toj kyq'ob' kyajq'oj, ju' eb'jo'kten yajlalkye. Intoqtzun che qanintl o'nb'iltz teya, atzunta, inxi'x q'aq'an tk'u'ja, nche tzaj tb'i'na tzmax toj kya'j, b'a'npun maj e'ttzaqpiya.²⁹Intoq tzaj tq'o'na kynab'l tu'n kyjapuntlju' tkawb'ila kyu'n; aye'tzunkye atixi'x kynab'l toj kywitz ex min e'xikyb'i'n tchaq'b'ila; intoq che ik' kyib'aju' tchaq'b'ila, ju' ntq'o'n kychwinqalalju' nche'x b'inchante; jawkyiq'i'nkyib' ti'ja, min xikyb'i'n ex min xikynima'n.³⁰B'a'npun ab'q'i min ntzajnaj ttx'u'jila kyi'j ex b'ajx toqxena'na kye tu'nelju' t-xewa ex toj kytziju' t-sanjelala; extzun mixti'x xikyb'i'n, qu'mtzun exitq'o'na tjaq' kykawb'ilju' nimaqtnam twitz tx'otx'.³¹Tu'ntzu'n nim tlaqb'il tk'u'ja, min e'kub' tb'ajsa'na ex minti' e'kyaj tq'o'na; qu'n aya Dyos che'w tk'u'j ex nq'aq'an tk'u'ja nimxi'x.

³²Qu'mtzun, aya Dyos Manb'aj qib'aje', nimxi'x toklena, nimtipumala ex xob'ajilxa, kukx tjapun tyolju'ya kyejni b'entti'j ex nim tk'ujlalila, myanaqwit ch'i'nte' txqan yajb'il matxi' tzajxi' kyi'ju' qnimaqkawile', e'qnejele', e'pale ex t-sanjelala, ex kyi'ju' ojtxi' qyajilb'ene', ex tkyaqilju' tnam, ttzajlenx toj kyq'ijlalilju' nimaqkawil aj Asirya tzmax ja'lo.³³Ex myata ati tpaj tu'n tkyaqilju' matxi' tzik' qi'je'; qu'n matxi' japunta tu'n, ayo' qeju'ye' matxi' qo b'inchan ile' twitza.³⁴Exqepe' qnimaqkawile', e'qnejenele', e'pale, exqe'ju' ojtxi' qyajilb'ene', mixti'x japunju' tkawb'ila kyu'n ex mixti'x exi kyb'i'n tchaq'b'ila exqe' eb'ajx toqxena'na kye.³⁵Ape' kyb'inchaju', maskyepe' nim txqan q'inumal ex jun nim tb'anil tx'otx' tzaj tq'o'na kye, mixti'x ek'ulun teya ex mixti'x kyej kytzaqpi'nju' kyb'inchb'aj myab'a'n toju' kykawb'il.

³⁶Qo tka'yintztzuna ja'lo, lq'o'n majinqo'ye tojxju' tx'otx' tzaj tq'o'na kyeju' ojtxi' qyajilb'ene' tu'nwtlo kywan ti'ju' tb'anil ex tawalju' tx'otx' njaw.³⁷Kyekye' nimaqkawil nxa' txqan tawalju' tx'otx' njaw, e'kub' tq'o'na qib'aje' tu'n tpaj qile'. Tjaq'ju' kyajb'il ta'qo'ye' kyuk'i'lxi' qalu'ne'. Qu'mtzun inxi'x qob'isune', chechij te Dyos. Kyej b'entti'j tyolu' tnam tu'n tjapun kawb'il tu'n

³⁸Tu'n tkyaqil ja'lu, qq'a'qib'e' ti'ju' qyole' kjel tz'ib'et, atzunju' u'j k'okyel seyaret kb'el kysqitu'n qnejenele' ti'j, e'aj Leb'i ex e'pale.

¹Ayo'qo'ju'ye' lu makub' qq'o'n qb'iye' ti'ju' u'j:
Ayine' Neemiy tk'wal Akaliy, kawil qintoqe'.
Exqe' Sedekyiy,²Serayiy, Asariy, Jeremiy,³Pasur, Amariy, Malkyiy,⁴Atus, Seb'aniy, Maluk,⁵Arim, Meremot, Ab'diy,⁶Danyel, Wineton, B'aruk,⁷Mesulam, Ab'iy, Mijamin,⁸Maasiy, B'ilkay ex Semayiy. Paleqe' ja'lu.

⁹Aye'tzu'n aj Leb'i:
aye' Joswe tk'wal Asaniy, B'inuy, tyajajil Enadad, ex Kadmyel;¹⁰exqe' titz'in mo ttzik, aye' Seb'aniy, Odiy, Kyelit, Pelayiy, Anan,¹¹Mikayiy, Reob', Asab'iy,¹²Sakur, Sereb'iy, Seb'aniy,¹³Odiy, B'ani ex B'eninu.

¹⁴Aye'tzu'n nejenel te tnam:
Aye' Paros, Paat-moab', Elam, Satu, B'ani,¹⁵B'inuy, Askad, B'eb'ay,¹⁶Adoniy, B'ikb'ay, Adin,¹⁷Ater, Esekyiy, Asur,¹⁸Odiy, Asum, B'esay,¹⁹Arip, Anatot, Neb'ay,²⁰Makpiy, Mesulam, Esir,²¹Mesesab'el, Sadok, Jaduwa,²²Pelatiy, Anan, Anayiy,²³Osey, Ananiy, Asub',²⁴Aloes, Pila, Sob'ek,²⁵Reum, Asab'na, Maaseyiy,²⁶Ayiy, Anan, Anan,²⁷Maluk, Arim ex B'aana. Txqantl ti'xti' tu'n tb'inchanteju' tnam twitz Dyos

²⁸Aye'tzu'n txqantl xjal, aye' pale, e'aj Leb'i, e'xq'uqil ttzija, eb'itzal, e'ajb'el toj tja Dyos, ex kykyaqilju' matxi'toq tz'el kypa'n kyib' kyi'ju' xjal toju' tnej tx'otx' tu'n kyb'inchante tkawb'il Dyos, junx kyuk'i'l kyxu'jil ex kykyaqilu' kyk'wal ex kymyal intoq che ximantl,²⁹kymujb'a kyib' kyuk'i'lju' kywitze'l ex kyuk'i'lju' nejenel kye, ex kyma twitz Dyos tu'n kyxi'lpe ti'ju' tkawb'il Dyos ojetoq tma toj ttzi Moyses tmajin, ex tu'n kyjapun b'a'nxi'x kyu'n tkyaqilju' tchaq'b'il, tnuk'b'il ex e'tkawb'il Qman Dyos.³⁰Qu'mtzun kyma: lay che'x qq'o'nqe' qmyal tu'n kymje kyuk'i'lju' xjal toju' tx'otx' lu, ex lay qaje' tu'n kymjeju' kymyal kyuk'i'lju' qk'wale'.³¹Ex ajkyulu' xjal najlqe' toju' tx'otx' k'ayilteju' kyk'a'ẍ ex tkyaqilju' twitz kyawal toju' q'ij te ojlab'l, lay qo loq'one' kye, b'a'ntzun toju' q'ij te ojlab'l mujqa alkyexku' juntl ninq'ij; ex ikx lay qo awane' toj twuqi'n ab'q'i ex che b'elqnajsa'ne' k'as.³²Ex ikx mab'entti'j qu'ne' tu'n qq'onteye' jun tal saqpwaq tkyaqil ab'q'i tu'n kychjetu' ajb'eb'l toju' tja Qman Dyos:³³Tu'n tkub'ju' wab'j twitz Dyos, e'oyaj twitz awal k'ok'e'kywitz inche kub' tkyaqil q'ij, e'oyaj te k'ok'sb'il tkyaqil q'ij, e'chojb'il te q'ij te ojlab'l ex te ak'a'j xjaw, ex kyeju' junjuntl ninq'ij; ex tkyaqilju' oyaj, e'chojb'il tu'n tk'met najsb'il kyil aj Israel, ex tkyaqilju' k'u'lb'il toj tja Qman Dyos.

³⁴Exqepe' pale, e'aj Leb'i ex kykyaqilju' tnam, kse'nx kyajlalju' junjun ja, xiqse'ne' tu'n tel yal alkye tu'n txi' iq'inteju' si k'ajb'el atl junjun ab'q'i toju' tja Qman Dyos toju' tq'ijlalil q'ma'ntl, tu'n ttz'e'yset tib'aju' q'olb'eb'l te Qman Dyos, kse'nxju' tz'ib'a'n toju' kawb'il.³⁵Ex makyej qna'ne' tu'n t-xiqiq'i'ne' tnejel twitz qawale' ex tnejel kywitz lob'j toj tja Qman Dyos atl junjun ab'q'i,³⁶ex ikx tu'n kyxi' qi'q'i'ne' tnejel qk'wale' e'tnejel tal qwakyixe' ex tnejel tal qrite' toju' tja Qman Dyos, kywitzju' pale nche ajb'en toju' tja Dyos, kse'nxju' tz'ib'a'n toju' kawb'il.³⁷Ex makyej qna'ne' tu'n kyxi' qiq'i'ne' tnejel arin, tnejel kywitz tkyaqilu' qtzeye', tnejel qb'ine' ex tnejel qaseyte', kyoju' k'ub'l toj tja Qman Dyos, tu'n tajb'en te o'nb'il kyeju' pale, ex tu'n kyxiqiq'i'ne' tlajoji'n tnej ti'ju' twitz qawale' kye aj Leb'i, qu'n aye' nche k'monte tlajoji'n teju' njaw toju' qkojb'ile'.

³⁸Ajtzun kyxi' aj Leb'i iq'ilteju' tlajoji'n, kxe'l jun pale tyajajil Aaron kyuk'i'l. Aye'tzu'n aj Leb'i kxe'l kyiq'i'n jun tlajoji'n toju' k'ub'l toj tja Dyos ti'ju' tlajoji'n nxikyiq'i'n,³⁹Qu'n aye' aj Israel exqe' aj Leb'i nche'x iq'inteju' o'nb'il triy, b'in ex aseyt kyoju' k'ub'l jata'qe'ju' ajb'eb'l xjanqe', ex ja ta'qe' pale ate' toj ajb'eb'l, e'xq'uqil ttzija exqe' aj b'itzal. Ex maqtziyaye' tu'n mikyaja' qtzaqpi'ne' tja Qman Dyos. Aye' che najal toj Jerusalen

¹E'kub' najanju' ati kyoklen toju' kawb'il toj Jerusalen, aye'tzu'n txqantl xjal te nintnam xikyse'n tu'n tel yal jun kyxol lajoj jatu'n txi' najal toj Jerusalen, ju' xjan nintnam, aye'tzu'n b'eljoj chaqtl tu'n kykyajten kyoju' txqantl tnam.²Aye'tzu'n tnam xjal xikyqani'n b'a'n kyib'aju' kyaq'kyib' tu'nkyk'u'j tu'n kynajan toj Jerusalen.³E'kub' najanju' aj Israel, e'pale, e'aj Leb'i, e'ajb'el toj tja Dyos, exqe' kyyajajilju' e'ajb'en te Salomon, kyoju' nimaqtnam toj Juda, teyile junjun tojilex ttanam ex ttx'otx'. Aye'tzu'n nejenel nimaq kyoklen eb'ju'l jumajtl, e'kub' najan toj Jerusalen, atiju' kyb'i tz'ib'a'n.⁴Junjun kyyajajil Juda ex B'enjamin e'kub' najan toj Jerusalen, kyxolu' tyajajil Juda, aye': Atayiy, tk'wal Osiy, ju' tk'wal Sakariy, ju' tk'wal Amariy, ju' tk'wal Sepatiy, ju' tk'wal Maalalel, tyajajil Pares;⁵ex Maaseyiy, tk'wal B'aruk, ju' tk'wal Kolose, ju' tk'wal Asayiy, ju' tk'wal Adiy, ju' tk'wal Joyarib', ju' tk'wal Sakariy, ju' tk'wal Siloni.⁶Junk'al oxnaq wajxaq (468) kyb'aju' tyajajil Pares te kykyaqilju' e'kyajten najal toj Jerusalen, kykyaqilxu' ichan lu b'a'nqe' te q'ojil.⁷Atzu'n kyxolju' tyajajil B'enjamin, aye': Salu, tk'wal Mesulam, tk'wal Joed, tk'wal Pedayiy, tk'wal Kola'yiy, tk'wal Maaseyiy, tk'wal Ityel, tk'wal Isayiy;⁸Exqe' Kab'ay ex Salay ju' titz'in mo ttzik. Kab'k'al qaqnaq wajxaq (928) kyb'aj te kykyaqil.⁹Atoq Joel, tk'wal Sikri, nejenel kye; atzun Juda, tk'wal Senuwa, tkab' nejenel teju' nintnam.¹⁰Atzu'n kyxolju' pale aye': Jedayiy tk'wal Joyarib', Jakyin,¹¹ex Serayiy, tk'wal Ilkyiy, ju' tk'wal Mesulam, ju' tk'wal Sadok, ju' tk'wal Merayot, ju' tk'wal Aytub', nejenel nim toklen toj tja Dyos.¹²Exqe' tuk'i'l, ju' ntoq che aq'unan toju' ajb'eb'l toj tja Dyos, kab'k'al junaq kab'e' (822) kyb'aj; ex Adayiy tk'wal Jeroam, ju' tk'wal Pelaliy, ju' tk'wal Amasi, ju' tk'wal Sakariy, ju' tk'wal Pasur, ju' tk'wal Malkyiy.¹³Kab'lajnaq kab'e' (242) kyb'aju' kywitze'l, nejenelqe' te junjun ja xjal; ex Amasay, tk'wal Asarel, ju' tk'wal Asay, ju' tk'wal Mesilemot, ju' tk'wal Imer.¹⁴Qaqnaq wajxaq (128) kyb'aju' kywitze'l, ichan b'a'nqe' te q'oj, ex a Sab'dyel, tk'wal Kyedolim, nejenel kye.¹⁵Atzu'n kyxol aj Leb'i: aye' Semayiy tk'wal Asub', ju' tk'wal Asrikam, ju' tk'wal Asab'iy, ju' tk'wal B'inuy;¹⁶exqe' Sab'tay ex Josab'ad, kyxolju' nejenel kye aj Leb'i, toj kyq'ob'toq ta'ju' aq'untl ti'jxi' tja Dyos;¹⁷ex Mataniy tk'wal Mikayiy, ju' tk'wal Sab'di, ju' tk'wal Asap, nejeneltoq kyeju' k'loj b'itzal intoq che b'itzanteju' b'itz te aq'b'il chjonte ajtpon kmoj te na'j Dyos; ex B'akb'ukyiy, ju' tkab' toju' kyja, ex Ab'da, tk'wal Samuwa, ju' tk'wal Kalal, ju' tk'wal Jedutun.¹⁸Kyajlajnaq kyaje' (284) kyajlalu' aj Leb'i e'kyajten toju' nintnam xjan.

¹⁹Aye'tzu'n xq'uqil ttzija: aye' Akub', Talmon exqe' kywitze'l, wajxaqnaq kab'lajoj (172) kyb'aj intoq che xq'uqin kytzi tja Dyos.

²⁰Aye'tzu'n txqantl aj Israel kykyaqil, ex txqantl pale ex aj Leb'i, eb'ajkub' najan kyoju' txqantl tnam te Juda, teyile junjun tojx tx'otx';²¹maskyepe' e'kub' najanju' ajb'el toj tja Dyos toj Opel, aye' kynejenelu' Sya ex Kyispa.

²²Atoq Usi nejenel kye aj Leb'i toj Jerusalen, ju' tk'wal B'ani, ju' tk'wal Asab'iy, ju' tk'wal Mataniy, ju' tk'wal Mikayiy, tyajajil Asap, aye'ju' intoq che kub'nej b'itzalkyeju' b'itz toju' ajb'eb'l toj tja Dyos,²³qu'n ojetoq tchaq' nimaqkawil ti'ju' tu'n kyb'inchante b'itzal atl junjun q'ij.

²⁴Atoq nokxju' twitz nimaqkawil tu'n tnk'et alkyexku' ti'xti' nb'aj kyxol xjal, a Petayiy, tk'wal Mesesab'el, ju' tyajajil Sera, tk'wal Juda. Txqantl jae'najana' aj Israel ti'jxi' Jerusalen

²⁵Junjun kyxolju' tnej tyajajil Juda e'kub' najan kyoju' tnam Kyiryat-arb'a, Dib'on, Jekab'seel,²⁶Joswe, Molada, B'et-pelet,²⁷Asar-swal, B'eerseb'a,²⁸Siklaj, Mekona,²⁹En-rimon, Sora, Jarmut,³⁰Sanoa, Adulam, Lakyis ex Aseka, kyuk'i'lxi' kykojb'il ex kynajb'il. Eb'ajkub' najan tzajx B'eerseb'a ponx tzmax toju' b'ya' Inom.³¹Aye'tzu'n kyxolu' tnej tyajajil B'enjamin eb'ajkub' najan kyoju' tnam Kyeb'a, Mikmas, Ayiy, B'etel, kyuk'i'lxi' kykojb'il;³²ex kyoj Anatot, Nob', Ananiy,³³Asor, Rama, Witaym,³⁴Adid, Seb'oyim, Neb'alat,³⁵Lod, Ono, ex toju' b'ya' kyeju' kno'n tb'inchanjtz junjun ti'xti' kyu'n.³⁶Expe' xiq'o'n kytx'otx' junjun aj Leb'i toj kytx'otx' tyajajil Juda ex toj kytx'otx' tyajajil B'enjamin. Aye' pale exqe' aj Leb'i

¹Aye'tzun pale ja'lu exqe' aj Leb'i anjtzkyi'j tuk'i'l Sorob'ab'el, tk'wal Salatyel, ex tuk'i'l Joswe:
Aye' pale: Serayiy, Jeremiy, Esdras,²Amariy, Maluk, Atus,³Sekaniy, Rewum, Meremot,⁴Ido, Wineton, Ab'iy,⁵Mijamin, Maadiy, B'ilka,⁶Semayiy, Joyarib', Jedayiy,⁷Salu, Amok, Ilkyiy ex Jedayiy. Aye'toqtzun kynejel paleju' kyuk'i'lju' kywitze'l toj tq'ijlalil Joswe.

⁸Aye'tzu'n aj Leb'i: aye' Joswe, B'inuy, Kadmyel, Sereb'iy, Juda ex Mataniy, ju' tojtoq tq'ob' kyuk'i'lju' tuk'i'l ta'qe' b'itz te ajwalb'il;⁹ex B'akb'ukyiy, ex Uni, kyuk'i'l qe'x, ate'toq kywitz tu'n kyb'inchanteju' kyaq'un.

¹⁰Ate Joswe tman Joakyim, atzun Joakyim tman Elyasib', atzun Elyasib' tman Joyada,¹¹atzun Joyada tman Joanan, atzun Joanan tman Jaduwa.¹²Aye'toq paleju' nejenel kye junjun ja toju' tq'ijlalil Joakyim:
Nejenel Toj tja pale a Merayiy kye toj tja Serayiy atzun Ananiy kye toj tja Jeremiy atzun Mesulam kye toj tja Esdras atzun Joanan kye toj tja Amariy atzun Jonatan kye toj tja Meliku atzun Jse kye toj tja Sebaniy atzun Adna kye toj tja Arim atzun Elkay kye toj tja Merayot atzun Sakariy kye toj tja Ido atzun Mesulam kye toj tja Kineton atzun Sikri kye toj tja Ab'iy atzun Piltay kye toj tja Moadiy atzun Samuwa kye toj tja B'ilka atzun Jonatan kye toj tja Semayiy atzun Matenay kye toj tja Joyarib' atzun Usi kye toj tja Jedayiy atzun Kalay kye toj tja Salay atzun Eb'er kye toj tja Amok atzun Asab'iy kye toj tja Ilkyiy atzun Natanael kye toj tja Jedayiy

²²Atzu'n toj kyq'ijlalil Elyasib', Joyada, Joanan ex Jaduwa, ex tzmax tej tkawin Dariy aj Persya, aye' aj Leb'i exqe' pale b'aj ku'x tz'ib'a'n kyb'i te nejenel kye junjun ja xjal.²³Aye'tzu'n aj Leb'i, nejenel kye junjun ja xjal eku'x tz'ib'a'n toju' tu'jil tqanil tzmax toj tq'ijlalil Joanan, tchman Elyasib'.²⁴Aye' nejenel kye aj Leb'i ja'lu: Asab'iy, Sereb'iy, Joswe, B'inuy ex Kadmyel, exqe' kyuk'i'l ate'toq kywitz tu'n kyajwalin ex tu'n kyq'on chjonte te Qman Dyos toju' kmoj te tajb'eb'l, kse'nxju' ojetoq tchaq' Dab'i ajb'el te Dyos.²⁵Aye'tzu'n xq'uqil intoq che xq'uqin ttzija aye': Mataniy, B'akb'ukyiy, Ab'diy, Mesulam, Talmon Ex Akub'.²⁶Aye' ja'lu eb'aj anq'in toj tq'ijlalil Joakyim, tk'wal Joswe ex tchman Josadak; ex toj tq'ijlalil Neemiy ju' kawil ex toj tq'ijlalil Esdras ju' pale ex xnaq'tzal. Xjansetju' nintapi

²⁷Tej tpon tq'ijlalil tu'n t-xjansetju' nintapi ti'jile Jerusalen, eb'ajx joyb'aju' aj Leb'i kyoj kykyaqilju' najb'il janajla'qe'toq, ex eb'aj tzaj iq'i'n toj Jerusalen tu'n tkub' kyik'sa'nju' xjansb'ilte nintapi tuk'i'l tzalajb'il, tu'n kyajwalinte Qman Dyos kyu'n b'itz kyuk'i'l chnab' txijtxij, tzintzin ex arpa.²⁸Aye'tzu'n aj Leb'iju' b'itzal, eb'aj tzaj kyoju' najb'il ti'jile Jerusalen, kyoju' najb'il toj Netopa,²⁹toju' tzb'oj ja te Kyilkal ex kyoju' kojb'il Kyeb'a ex Asmab'et; qu'n matxitoq che b'jaw kyb'incha'n b'itzal kojb'il ti'jile Jerusalen.³⁰B'ajtzun kyẍtilsa'n kyib'ju' pale exqe' aj Leb'i; ex eb'aj kyẍtilsa'n nintnam exqe' tjpel, exju' nintapi kse'nx tchaq'b'il Dyos.³¹Yajxi'tzuntl nb'inchaye' tu'n kyjaxju' tzyul kawb'il toj Juda tib'aju' nintapi, ex kub' nnuk'u'ne' kab'e' tnej b'itzal b'a'punchaq kyb'aj. Intoq che b'etju' tnejel tnej tib'aju' nintapi toj tb'a'nq'ob'kya'j, tu'me'lju' ttzi tnam xob'l tz'is tb'i.³²Lepchixtoqtzu'n Osayiy kyi'jxi'ju' tnej b'itzal kyuk'i'l nik'janju' tzyul kawb'il te Juda,³³kyuk'i'l Asariy, Esdras, Mesulam,³⁴Juda, B'enjamin, Semayiy ex Jeremiy.³⁵Aye'tzu'n pale nche q'ajtzan chun: aye' Sakariy tk'wal Jonatan, aye' ojtxi' tchmanju' Semayiy, Mataniy, Mikayiy, Sakur ex Asap;³⁶kyi'jxi'pe'tlju' kywitze'l Semayiy, Asarel, Milalay, Kyilalay, Maay, Natanael, Juda ex Anani, aye' intoq che q'ajtzankyeju' tchinab' Dab'i, ju' ajb'el te Dyos. Nejlitoq Esdras ju' xnaq'tzal kywitz.³⁷Ex tej kypon tib'aju' ttzi tnam t-xiklil a' tb'i, xikyljo'n kyb'e tib'aju' tapi nimin twe', eb'jax toju' peta'n njapun toju' Ninttanam Dab'i, tib'aju' tja Dab'i te kawb'il ex tzmax tib'aju' ttzi tnam tjpel A tb'i, ati toj tjawetzq'ij.

³⁸Aye'tzu'n tkab' tnej b'itzal xi' e'xa' toj tnayaj. Lepchqinxe' kyi'ju' tnej b'itzal tib'aju' nintapi kyuk'i'lju' nik'jantl xjal, tzajx tk'etzu' ja nimin twe' chuj tb'i, tzmax tk'etzju' tapi nim twitz,³⁹o'ik'e' ja ta'qe' ttzi tnam Eprayin tb'i, ttzi tnam Jesana tb'i, ttzi tnam kyiẍ tb'i, ex jata' ja Ananel nimin twe' exju' ja Syen nimin twe', tzmax ttzi tnam rit tb'i; ex o'we'ye' ttzi tnam te xq'uqb'il.⁴⁰E'kub' tentzu'n kab'e' tnej b'itzaltz toju' kykub'el toj tja Dyos; ex ikxwe', kyuk'i'l nik'janju' kawil lepchqe'toq wi'je'.

⁴¹Aye' paleju' ja'lu nche q'ajtzan chun: Elyakyim, Maaseyiy, Minyamin, Mikayiy, Elyoenay, Sakariy, Ananiy,⁴²Maaseyiy, Semayiy, Eleasar, Usi, Joanan, Malkyiy, Elam ex Eser. Aye'tzu'n b'itzal, nk'u'nqe' tu'n Israyiy, eb'itzan junx toj tneji'n.

⁴³E'kub' q'o'n nim chojb'il toju' q'ij lu, ex eb'aj tzalaju' xjal nim qu'n e'tzalajsanjtz b'a'nxi'x tu'n Dyos. E'qya exqe' k'wal eb'aj tzalaj, ex q'ojq'oj toqju' tzalajb'il najchaq b'aj toj Jerusalen. Kywa pale ex aj Leb'i

⁴⁴Eb'jo'k q'et junjun xjal toju' tq'ijlalil lu tu'n txi' kyka'yi'nju' k'uwenj, oyaj, tnejel kywitz awal exqe' tlajoji'n tnej nche elkypa'n xjal, jatu'n tk'u'yeta'ju' nb'ajtzaj kyoj kojb'il kye junjun nimaqtnam tu'n tajb'en kye pale ex kye aj Leb'i kse'nxu' ntma'n kawb'il; qu'n intoq che tzalaju' aj Juda kyuk'i'lju' pale ex aj Leb'i ate'toq toj ajb'eb'l.⁴⁵Aye' kyuk'i'lju' b'itzal e'xq'uqil ttzija, intoq che b'inchanteju' k'u'lb'il te Dyos exju' ẍtilsab'l twitz Dyos, kse'nxju' ojetoq b'aj tnk'u'n Dab'i ex Salomon ju' tk'wal.⁴⁶Qu'n ate'toq nejenel kye aj b'itzal, b'itz te ajwalb'il ex aq'b'il chjonte te Dyos ojtxi' toj kyq'ijlalil Dab'i ex Asap.

⁴⁷Qu'mtzun kykyaqil aj Israel ex tkyaqil q'ij intoq xikyq'o'nju' ati tajb'en kye aj b'itzal ex kye xq'uqil ttzija, toj kyq'ijlalil Sorob'ab'el ex Neemiy; ex intoq xikyq'o'nju' kye aj Leb'i aju' ati kyoklen ti'j, ex ikxkye aj Leb'i elkypa'n ch'i'n ti'ju' kyk'am ex xikyq'o'n kye tyajajil Aaron. Ch'exb'eb'l tu'n Neemiy

¹Jaw ẍch'etju' tuj Moyses kywitz kykyaqil xjal toju' tq'ijlalil lu, ex knet toju' u'j lu qa mixti'xtoq tu'n kyten aj Amon ex aj Moab' kyxolju' ttanam Dyos.²Qu'n min eb'je'tz k'molkye aj Israel tuk'i'l wab'j ex k'wab'j, xi'pe' kychjo'n B'alaam tu'n ttxkonte taq'wix kyib'aj, Atzunte Qman Dyos tmiltz'uju' qanb'en lu te jun ky'i'wb'il.³Tetzunj kyb'inteju' ntma'n kawb'il, eb'je'l kypa'n kykyaqilju' matxitoq b'ajx kysmo'nkyib' kyuk'i'lju' najchaq xjal kyi'ju' aj Israel.

⁴Ma'toqtzun tzik'xi' b'a'npun ab'q'i, atoqu' pale Elyasib' tok ka'yilkyeju' k'ub'l toj tja Qman Dyos. Kyetoqna' kyten Elyasib' tuk'i'l Tob'iy,⁵ojetoq txitq'o'n jun ja nimin te Tob'iy tu'n tnajan toj, jatoq nche k'uyeta' oyaj tnejel, ex sturak, e'aq'unb'il exju' tlajoji'n tnej ti'ju' triy, ti'ju' b'in ex aseyt ju' chq'o'n tu'n txiq'et kye aj Leb'i, eb'itzal ex kye xq'uqil ttzija, tib'ajxi'tlju' o'nb'il kye pale.⁶Mix-a'lo'qin toqwe' toj Jerusalen tej tb'aj tkyaqil ja'lu, qu'n anjwi'je' tk'etzju' nimaqkawil Artajerjes toj B'ab'ilon toj tjunaq kab'lajoji'n (32) ab'q'i nkawin; expe' xinqani'ne' anb'il teju' nimaqkawil tb'ajlenxi' jte' q'ij,⁷anjtztzun wi'jtze' toj Jerusalen. Atzuntzu' ela' nnik'e' ti'ju' taq'wix tb'incha Elyasib' naq tu'n tb'inchante b'a'n te Tob'iy, xitq'o'n jun tja tpen tja Dyos.⁸Majx tzaj ntx'u'jile' tu'n tpaj ja'lu, eb'je'xtzun nq'o'ne' tkyaqilju' tiq'in Tob'iy ti'jxi' ja.⁹Nchaq'tzuntze' tu'n tb'aj ẍtilset kse'nx tchaq'b'il Dyos, ex tu'n kyb'jo'kx q'o'n jumajtlu' ajb'eb'l toj tja Dyos jaxju' ta'qe'toq tnejel, e'oyaj ex sturak.

¹⁰Ex nb'iye' qa na'mxtoq txiq'o'n kywa aj Leb'i, ex ojetoq che b'ajx oqu' aj Leb'i ex eb'itzal b'inchal k'u'lb'il, teyile junjun toj kytx'otx'.¹¹Eb'ajtzun ntzak'u'ne' kawil tu'n tpaju' min nxi'kyka'yi'n tja Dyos. Yajxi'tzuntl eb'aj nb'u'yi'ne' aj Leb'i exqe' b'itzal, ex eb'ajkub' nq'o'ne' toju' kyaq'un,¹²kykyaqiltzu'n aj Juda b'aj tzaj kyiq'i'n tlajoji'n tnej ti'ju' kytriy, eb'in ex aseyt, kyoju' k'ub'l.¹³Eb'jo'ktzun nq'o'ne' pale Selemiy, ex Sadok ju' tz'ib'al, ex Pedayiy jun aj Leb'i, ka'yilkyeju' k'ub'l; ex oknq'o'ne' Anan tk'wal Sakur ex tchman Mataniy onilte, qu'n b'a'nqe' q'uqli kyk'u'jlalil. Aye'tzun sipalte oyaju' kyxolju' kyuk'i'l.¹⁴¡Taye: ka'yintzju'ya matxi' nb'inchaye' lu; ex na'nku'ju'ya b'a'n xnb'inchaye' ti'ju' tjaya ex ti'ju' k'u'lb'il teya Nman Dyos!

¹⁵Wile' toj Juda kyoju' q'ij lu, ate' junjun intoq che pch'un ta'l ub'a te b'in toju' q'ij te ojlab'l, intoq che iqan triy, intoq che iqan b'in, ktxij twitz ub'a, iw ex tkyaqil iqtz kyi'j chej b'ur, ex intoq pon kyiq'i'n toj Jerusalen toj q'ij te ojlab'l. Eb'aj ntzak'u'ntzuntze' tu'n tpaju' inche k'ayin toju' q'ij lu.¹⁶Expe' ate' junjun aj Tiro najlqe'toq atzu', intoq pon kyiq'i'n kyiẍ ex tkyaqil chukchaq k'aẍjel, ex intoq che kyk'a'yi'n kye aj Juda toju' q'ij te ojlab'l toj Jerusalen.¹⁷Eb'ajtzun ntzak'u'ne' nejenel te Juda, xinma'ne' kye:
—¿Ti'tzu'n nkyb'incha'ne' tu'nju' nkub' kytxa'ju'ne' q'ij te ojlab'l?¹⁸Ana' kyb'incha ojtxi' qchmanju', qu'mtzun tzaj tq'o'n Qman Dyos txqan yajb'il qib'aj ex tib'aju' nintnam lu. ¿Ma kyajb'iltzune' tu'n tokkyq'o'nxi'xtle' ttx'u'jil Dyos ti'ju' tnam Israel tu'n tpaju' nkub' kytxa'ju'nju'ye' q'ij te ojlab'l? nchije' kye.

¹⁹Nchaq'tzuntze' tu'n kyjpetju' ttzi nintnam Jerusalen aj ch'inxtoq toku' q'ij te ojlab'l, ex mixti' tu'n kyjqet tzmaxi'j ajtik'ju' q'ij. Expe' e'oknq'o'ne' junjun ajb'el weye' xq'uqil tu'ntzun lalun tz'okx iq'i'n jun iqtz toju' q'ij te ojlab'l.²⁰B'a'npun maj e'kyajtenju' xk'aẍlel exqe' k'ayil chukchaq k'aẍjel nb'aj qonik'an kyu'n ti'jxi' Jerusalen,²¹njawtzun wulje' kyuk'i'l ex eb'aj ntzak'u'ne' tu'n tpaju' nb'aj qonik'an kyu'n nche kyejten twitzu' nintapi, ex xinma'ne' kye qatoq makyb'incha junmajtl oktoq che kyex nq'o'ne'. Atxi'xtzunj mixti'tl eb'ju'l toju' q'ij te ojlab'l.²²Yajxi'tzuntl nchaq'e' kye aj Leb'i tu'n kyẍtilsante kyib' ex tu'n kyxi' xq'uqilkyeju' ttzi tnam tu'ntzun lalun che txa'junjtz toju' q'ij te ojlab'l. ¡Nman Dyos: ex chin tna'ku'ya tu'n ja'lu, ex q'aq'antz tk'u'ja wi'je' kse'nxju' t-xtalb'ila!

²³Ex wile' toju' tq'ijlalil lu qa ate' junjun aj Juda matxi'toq che b'ajmje kyuk'i'lju' qya aj Asdod, aj Amon ex aj Moab';²⁴ex nik'janqe' kyk'wal intoq che yolin toj kyol aj Asdod ex toj kyol junjuntl nimaqtnam, mixtzunti' nb'ent kyolin toj kyol aj Juda.²⁵Njaw wulje' kyuk'i'l ex tzaj ntxko'ne' taq'wix kyib'aj. Eb'jo'k nb'yo'ne' junjunkye ex jaw ntzuqi'ne' tzmal kywi', ex e'oknchq'o'ne' tu'n kymante jun kyol twitz Dyos tu'n lalun kyajtl tu'n kymjeju' kymyal ex kyk'wal kyuk'i'lu' te junxi'tl tnam, ex tu'n lalun che kyk'amju' qya te junxi'tl tnam te kyxu'jil kyk'wal mujqa te kyxu'jilku'. Ex xinma'ntle' kye:²⁶¡Ana' ilju' tb'incha Salomon, nimaqkawil toj Israel! Mixpetzunti' juntl nimaqkawil ten kyoju' txqantl nimaqtnam kse'nte, extzun k'u'jlanjtz tu'n Dyos ex oktq'o'n te nimaqkawil tib'aj tkyaqilu' Israel, aye'tlju' qya te junxi'tl tx'otx' e'xiq'inte toj il.²⁷Qu'mtzun, lay tzik'x tna'l qama che b'inchan ile' nimxi'x twitz Qman Dyos, qama che mjeye' kyuk'i'lu' qya te junxi'tl tnamqe'.

²⁸Ati junju' tk'wal Joyada, ju' tk'wal kynejel pale Elyasib', tjitl Sanb'alat toqpe', ju' aj Oron, ex nxla'ja'ne' tu'n lalun tentl nk'itze'.²⁹¡Taye: na'nqe'tzju'ya matxi' b'aj kytz'ilsa'nju' kyoklen te pale exju' yol kyajni b'entti'ju' kyoklen pale ex aj Leb'i!

³⁰Ikytzu'n eb'aj nẍtilsa'ne' te tkyaqilju' te junxi'tl tnam ex eb'aj nnk'u'nju'ye' kyajb'eb'l pale ex aj Leb'i toj k'loji'n, teyile junjun toju' taq'un;³¹tu'n tulu' si toju' tq'ijlalil q'ma'ntl, ex tu'n kyul kyiq'i'nju' tnejel kywitz awal. ¡Taye, chin tna'tza tu'n t-xtalb'ila!

Bible Society in Guatemala

https://app.library.bible/content/aea9d9099feb3a24