Revelation12
1फिन आसमान में कुछ बड़ी खास चिन्ह देखाई देलक। ई एगो औरत हल जे सूरज के अपन कपड़ा के रूप में पेहेनले हलन। ऊ चाँद पर खड़ा हलन। उनकर माथा पर बारहगो तरेगन से बनल एगो मुकुट हल।2ऊ लईकन के जनम देवे वाली हल। ऊ दरद से चिल्ला रहलन हल काहेकि बच्चा के जनम देवे ला उनका लागी बड़ी मुश्किल हल।3फिन आसमान में एगो आउर खास चिन्ह देखाई देलक। ई एगो बड़ी बड़कागो लाल अजगर हल। ओकर सातगो माथा आउर दसगो सींग हल। ओकर हर माथा पर एगो राजमुकुट हल। 4अजगर के पूँछ आसमान से एक तिहाई तरेगन के खींच के धरती पर फेंक देलक। अजगर ऊ औरत के सामने खड़ा हो गेलन जे लईकन के जनम देवे वाला हल जेकरा से ऊ ओकर बच्चा के जनम देतहीं खा जाय।5फिन ऊ औरत एगो बेटा के जनम देलक। ई बेटा सभे जातियन पर पूरा अधिकार के साथे राजदण्ड लेले शासन करे लागी ठहरावल गेल हल। परमेश्वर ई लईका के सुरक्षा लागी छीन लेलन आउर ओकरा स्वर्ग में अपन सिंहासन पर बईठईलन।6बाकि ऊ औरत एगो सुनसान इलाका में भाग गेल, जेज्जा परमेश्वर उनका लागी एगो जगह तईयार करलन हल जेज्जा लोग बारह सौ साठ दिन तक उनकर देख भाल करतन।7फिन स्वर्ग में लड़ाई छिड़ गेल। मीकाएल आउर उनकर स्वर्गदूतवन अजगर से लड़ाई करलन। अजगर आउर उनकर स्वर्गदूत मीकाएल आउर उनकर स्वर्गदूतवन से लड़ाई करलक। 8बाकि अजगर लड़ाई हार गेलक आउर परमेश्वर अजगर आउर ओकर दूतवन के ओकर बाद स्वर्ग में रहे के अनुमति नऽ देलन।9एकर बजाय, परमेश्वर ऊ विशाल अजगर के स्वर्ग से बाहरे फेंक देलन। ऊ अजगर ओही दुष्टात्मा हे जे बड़ी पहिले साँप के रूप में प्रकट होल हल। ओकर नाम इबलीस आउर शैतान हे। ऊ दुनियाँ में रहे वालन सभे लोगवन के धोखा दे हे। परमेश्वर ओकरा आउर ओकर सभे स्वर्गदूतवन के धरती पर फेंक देलन। 10फिन हम स्वर्ग में कोई के ऊँचा आवाज में चिल्लईते सुनलन, “अखनी हमनी के परमेश्वर अपन सामर्थ से अपन लोगवन के उद्धार देलन हे, आउर ऊ सभे लोगवन पर अधिकार से शासन करऽ हथन! अब उनकर मसीह शासन करे लगलन हे! अईसन येहिसे हे काहेकि परमेश्वर हमर साथी विश्वासियन पर दोष लगावे वाला के स्वर्ग से बाहरसी निकास देलन हे। ऊ लगातार परमेश्वर भीर आवऽ हलन आउर विश्वासियन पर गलत काम करे के दोष लगावऽ हलन। 11बाकि हमर भाई-बहिन उनका पर विजय प्राप्त करलन, काहेकि मेम्ना उनका लागी अपन लहू बहईलन आउर प्राण के प्रिय नऽ जानलन आउर ऊ उनकर बारे में दोसर लोगवन के सच गवाही बतईलन। ऊ खाली जिन्दा रहे ला नऽ चाहऽ हलन। ऊ उनकर बारे में सच्चाई बतावे लागी जदि जरुरत पड़त तऽ मरे ला भी तईयार हलन।12येहिसे तूँ सभे स्वर्ग में निवास करे वालन आनन्दित होवऽ! बाकि तूँ लोगवन पर जे जमीन पर रहऽ हथन आउर समुद्र पर चलऽ हथन, भयानक बात घटत, काहेकि शैतान अखनी तोहनी के बीच में हे। ऊ बड़ी गोस्सा में हे, काहेकि ऊ जानऽ हे कि परमेश्वर द्वारा न्याय करे आउर ओकरा दण्ड देवे से पहिले उनका भीर बड़ी कम समय बचल हे।”13जखनी अजगर के एहसास होल कि परमेश्वर ओकरा धरती पर फेंक देलन हे, तऽ ऊ ऊ औरत पर हमला करे के कोशिश करलन जे एगो बेटा के जनम देलन हल।14बाकि परमेश्वर औरत के बड़ी बड़का उकाब के जईसन दूगो पंख देलन। ई पंखवन के मदत से ऊ एगो उजाड़ प्रदेश में उड़ सकऽ हल। परमेश्वर उनका लागी ऊहाँ एगो सुरक्षित जगह तईयार करलन हल। ऊ जगह पर परमेश्वर साढ़े तीन साल ला उनकर देख भाल करलन। साँप मतलब अजगर ऊहाँ तक नऽ पहुँच सकल।15तऽ साँप अपन मुँह से ऊ औरत पर नदी के जईसन पानी के धारा बहईलक, आउर उनका पानी में बहा ले जाय के कोशिश करलक।16बाकि धरती औरत के मदत करलक, आउर जमीन एगो बड़कागो गबड़ा बना देलक, आउर जे नदी के पानी अजगर अपन मुँह से उण्डेलल हल, ऊ गबड़ा में चल गेल।17तऽ अजगर औरत पर बड़ी गोस्सा होल, आउर ओकर बाकि लईकवन से लड़े लागी चल गेल। ऊ ऊ लोग हथन जे परमेश्वर के आज्ञावन के मानऽ हथन आउर यीशु के बारे में सच गवाही बोलऽ हथन।18तऽ अजगर सागर के किनारे खड़ा हल।
Bridge Connectivity Solutions Pvt. Ltd.