Matthew12
1ऊ घड़ी सब्त के दिन यीशु खेतवन से होके जा रहलन हल, पर उनकर चेलवन भूखे हलन, आउर ओखनी खाय ला बाल के तोड़े लगलन।2बाकि ई देख के, फरीसियन यीशु से कहलन, “देखऽ! तोर चेलवन ऊ काम कर रहलन हे जेकरा सब्त के दिन करे ला सही नऽ हे।”3बाकि यीशु ओखनी के जबाब देलन, “का तूँ पवित्रशास्त्र में नऽ पढ़लऽ हे कि दाऊद का करलन हल जखनी ऊ भूखल हलन, आउर जे लोग उनका साथ हलन। 4कईसे ऊ परमेश्वर के मन्दिर में गेलन आउर चढ़ावा के रोटियन खईलन, जेकरा खाना उनका ला सही नऽ हल। आउर नऽ ही ओखनी ला जे उनकर साथी लोग हलन, खाली याजकवन के छोड़ के?5चाहे का तूँ मूसा के व्यवस्था में नऽ पढ़लऽ ओईसहीं, तूँ ई भी जरुर पढ़लऽ, सब्त के दिन, मन्दिर के याजक सब्त के दिन के अपवित्र करऽ हथन, तईयो निर्दोष रहऽ हथन? 6हम तोरा कहऽ ही कि जे मन्दिर से भी बड़ी बड़ा हे ऊ ईहाँ हे।7बाकि जदि तूँ एकर मतलब जानऽ हल कि हम बलिदान नऽ बाकि दया चाहऽ ही। तऽ तूँ निर्दोष के दोषी नऽ ठहरईतऽ हल। 8काहेकि आदमी के बेटा सब्त के दिन के भी प्रभु हथन।”9आउर ऊहाँ आगे बढ़ के, यीशु उनकर आराधनालय में गेलन।10आउर देखऽ, ऊहाँ एगो सुखल हाथ वाला आदमी हल, आउर ओखनी यीशु से ई कह के सवाल पूछलन, “का सब्त के दिन चंगा करे ला सही हे?” जेकरा से कि ओखनी उनका पर दोष लगा सकतन।11बाकि यीशु उनका उत्तर देलन, “तोहनी में से अईसन कौन आदमी हथन, जेकर एक्केगो गो भेड़ रहे, आउर ऊ जदि सब्त के दिन कुईयाँ में गिर जाय, तऽ ऊ ओकरा बाहरसी नऽ निकास लेतन?12बाकि एगो आदमी भेड़ से केतना जादे बेसकीमती हे? येहिसे सब्त के दिन भलाई करे ला सही हे।”13तब यीशु ऊ आदमी से कहलन, “अपन हाथ बढ़ावऽ।” आउर ऊ अपन सूखल हाथ, बढ़ईलन आउर ओकरा दोसरका जईसन ही निमन कर देलन।14बाकि बाहर गेला के बाद, फरीसियन यीशु के खिलाफ में साजिश करलन कि ओखनी उनका कईसे मार सकलन हे?15बाकि यीशु, ई जानला के बाद ऊहाँ से चल गेलन। आउर बड़ी सा लोग उनकर पीछे हो लेलन, आउर ऊ ओखनी सभे के चंगा करलन,16आउर यीशु ओखनी के आज्ञा देलन कि ओखनी ओकरा प्रकट नऽ करतन।17ताकि जे यशायाह भविष्यद्वक्ता के माध्यम से कहल गेल हल, ऊ पूरा होवे, ऊ कहऽ हथन,18“देखऽ ई हमर सेवक हे, जेकरा हम चुनली हे, ई हमर प्यारा हे, जेकरा से हमर प्राण खुश हे। हम अपन आत्मा ओकरा में समायेम, आउर ऊ अन्यजातियन के न्याय के समाचार देतन। 19ऊ नऽ तऽ झगड़ा करतन, आउर नऽ आवाज में रोतन; आउर नऽ ही बाजार में कोई उनकर आवाज सुनतन।20ऊ कुचलल गेल सरकण्डा के नऽ तोड़तन, आउर ऊ टिमटिमईते बत्ती के नऽ बुतईतन, जब तक कि ऊ न्याय के विजय के तरफ ले जईतन।21आउर अन्यजातियन उनकर नाम पर उम्मीद रखतन।”22फिन एगो दुष्टात्मा पकड़ल आदमी के उनका भीर लेवल गेल, ऊ आंधर आउर गूंगा हल, आउर ऊ उनका चंगा कर देलन, जेकरा से कि ऊ गूंगा बोले आउर आंधर देखे लगल।23आउर एकरा पर सभे लोग अचरज हो गेलन आउर कहे लगलन, ई का दाऊद के वंशज नऽ हथन?24बाकि फरीसियन ई सुन के कहलन, “ई तऽ, दुष्टात्मा के सरदार बालजबूल के मदत के बिना प्रेतात्मावन के नऽ निकासऽ हे।”25बाकि ओखनी के विचार के जान के यीशु ओखनी से कहलन “अपन विरोध में बँटके सभे सभे राज उजड़ जा हे, आउर अपन विरोध में बँटके सभे शहर आउर घर खड़ा नऽ रहऽ हे।26आउर जदि शैतान ही शैतान के निकासत, तऽ ऊ खुद के विरोध में बँट गेल हे। तऽ ओकर राज कईसे खड़ा रहत?27आउर जदि हम बालजबूल के मदत से दुष्टात्मा के निकासऽ ही, तऽ तोर चेलवन केकर मदत से निकासऽ हथन? येही कारण ऊ तोहनी के न्याय करतन।28बाकि जदि हम परमेश्वर के आत्मा के द्वारा दुष्टात्मा के निकासऽ ही, तऽ फिन परमेश्वर के राज तोरा भीर पहुँच गेल हे।29चाहे कोई कईसे ई लायक होत कि तागतवर आदमी के घर में घूँस जाय आउर ओकर सामान चुरा लेवे, जदि पहिले ऊ तागतवर आदमी के बाँध नऽ लेत? आउर ऊ ओकर घर के लूट लेत।30जे आदमी हमरा साथे नऽ ऊ हमर खिलाफ में हे, आउर जे आदमी हमरा साथे नऽ बटोर हे, ऊ छिंटऽ हे।31एही कारण हम तोरा से कहऽ ही, कि आदमी के सभे पाप आउर निन्दा मांफ करल जायेत, बाकि पवित्र आत्मा ई निन्दा मांफ नऽ करल जायेत।32आउर जे कोई आदमी के बेटा के खिलाफ में एगो बात बोलतन, ओकरा मांफ कर देवल जायेत। बाकि जे कोई पवित्र आत्मा के खिलाफ में कुछ कहतन, ओकरा नऽ तऽ ई युग में आउर नऽ ही भविष्य में मांफ करल जायेत।33चाहे तऽ पेड़ के अच्छा आउर ओकर फल के अच्छा कहऽ, चाहे पेड़ के बुरा आउर ओकर फल के बुरा कहऽ, काहेकि पेड़ के ओकर फल से पछानलन जा हे।34हे साँप के बच्चवन! बुरा होके तूँ अच्छा बात बोले के लायक कईसे हो सकल हे? काहेकि मन में भरल बात के ही निकास के मुँह से बोलऽ हऽ।35अच्छा आदमी अपन अच्छा खजाना से अच्छा बात ही निकासऽ हे।36बाकि हम तोरा से कहऽ ही कि सभे लापरवाह से बोलल बात जे आदमी बोलतन, ओकरा ऊ न्याय के दिन में ओकर लेखा देतन।37काहेकि तोरे बात से तूँ धर्मी ठहरावल जईवऽ, आउर तोरे शब्द के द्वारा तूँ दोषी ठहरावल जईवऽ।”38तब कुछ शास्त्री आउर फरीसियन उनका जबाब दे के कहलन, “हे गुरु, हम तोरा से एगो चिन्ह देखे ला चाहऽ ही।”39बाकि जबाब दे के ऊ ओखनी से कहलन, “ई युग के बुरा आउर विश्वासघाती लोग चिन्ह खोजऽ हथन, बाकि योना भविष्यद्वक्ता के छोड़ के उनका कोई आउर चिन्ह नऽ देवल जायेत।40काहेकि जईसे योना तीन दिन आउर तीन रात तक एगो बड़का मछली के पेट में रहलन, ओईसहीं आदमी के बेटा भी तीन दिन आउर तीन रात ला, धरती के हृदय में रहतन।41नीनवे शहर के लोग के लोग न्याय के बखत ई पीढ़ी के साथ खड़ा रहतन आउर एकरा दोषी ठहरईतन। काहेकि ओखनी योना के प्रचार से पछतावा करलन, आउर देखऽ, ईहाँ योना से भी बड़गो हे। 42दक्खिन के रानी न्याय के समय ई पीढ़ी के साथ उठतन आउर एकरा दोषी ठहरईतन, काहेकि ऊ सुलैमान के ज्ञान के सुने ला धरती के छोर से आयेल हल, आउर देखऽ ईहाँ सुलैमान से भी बड़गो कोई हे। 43जब कोई अशुद्ध आत्मा आदमी में से निकल जा हे, तऽ ऊ सूखल जगह में विश्राम खोजे ला भटकऽ हे, आउर ओकरा नऽ पावऽ हे।44फिन ऊ कहऽ हे, 'हम अपन घर लौट जायेम, जेकरा में से निकसली हे।'45तब ऊ जा हे आउर अपना साथे अपना से जादे सातगो दोसर दुष्टात्मावन के ले आवऽ हे, आउर प्रवेश कर के, ओखनी ऊहाँ वास करे लगऽ हे। आउर ऊ आदमी के हालत पहिले से भी बुरा हो जा हे।”46जखनी यीशु भीड़ से बतियाहीं रहलन हल, देखऽ, उनकर माय आउर उनकर भाई बाहरसी खड़ा होके उनका से बात करे के कोशिश कर रहल हे।47अखनी कोई उनका से कहलन, “देखऽ, तोर माता आउर तोर भाई बाहरसी खड़ा हथन, आउर तोरा से बात करे ला चाहऽ हथन।”48बाकि जबाब दे के यीशु ऊ कहे वाला से कहलन, “कौन हे हमर माय आउर कौन हे हमर भाई?”49आउर अपन चेलवन तरफ हाथ बढ़ा के ऊ कहलन, “देखऽ हमर माय आउर हमर भईवन!50काहेकि जौन कोई हमर स्वर्गीय पिता परमेश्वर के इच्छा के मुताबिक काम करऽ हे, ओही हमर भाई, आउर बहिन, आउर माय हे।”
Bridge Connectivity Solutions Pvt. Ltd.