1 Peter2
1काहेकि ई बात सच हे येहिसे, कोई भी रीति से दोसरा के साथे बुरा व्यवहार मत करऽ चाहे उनका धोखा मत दिहऽ। ढोंगी मत बनऽ, आउर दोसरा से जलन मत करऽ। कोई के बारे में कपट से भरल बुरा बात मत बोलऽ2जौन तरह से नया जनमल लईका भरपूरी से अपन माय के शुद्ध दूध के ललसा करऽ हे, ओईसहीं परमेश्वर के सच्चा वचन के सीखे लागी मजबूती से ललसा करे के चाही, जेकरा से उनका से सीख के तूँ आत्मिक रूप से सिद्ध हो जा। ऊ घड़ी तक तोरा अईसन जरुर करे के चाही जखनी ई पापी संसार से परमेश्वर तोरा पूरा रीति से उद्धार करतन।3तोरा अईसन येहिसे करे के चाही काहेकि तूँ तऽ एकर अनुभव भी करलऽ हे कि प्रभु तोरा प्रति बड़ी जादे दयालु होके काम करऽ हथन। 4तूँ प्रभु यीशु भीर आ गेलऽ हे। ऊ अईसन पत्थर के जईसन हे जौन कोई भवन के हिस्सा तऽ हे, बाकि ऊ जिन्दा हे। जबकि लोग उनका ठुकरा देलक, परमेश्वर ओकरा चुनलन आउर ओकरा बड़ी जादे महत्व देलन। 5आउर तूँ भी अईसन पत्थर के जईसन हऽ जे जिन्दा हे। जईसे आदमी पत्थर से मकान के बनावऽ हे, ओईसहीं परमेश्वर भी तोरा एगो अईसन मकान के रूप में एक साथे जोर रहलन हे जेकरा में उनकर आत्मा वास करऽ हे। साथही ऊ तोरा ऊ सभे याजक पद के पवित्र समाज जईसन बना रहलन हे जिनका ऊ यीशु मसीह के जरिये ऊ सभे आत्मिक बलिदान के काम के करे लागी शुद्ध करलन हे जेकरा से परमेश्वर खुश होवऽ हथन।6जौन परमेश्वर कहलन हल आउर यशायाह पवित्रशास्त्र में जौन लिखलन ऊ हमरा पर प्रकट करऽ हे कि ई सच हे: “गौर करिहऽ! हम सिय्योन में कोई अईसन आदमी के रख रहली हे जौन मकान के सभे से खास पत्थर के जईसन हे। हम ओकरा चुनली हे। ऊ बड़ी बेसकीमती हे। आउर जौन कोई उनका पर विश्वास करतन, ऊ पक्का कहियो लज्जित नऽ होतन।” 7येही चलते, तूँ जौन यीशु मसीह पर विश्वास करऽ हऽ परमेश्वर तोरा आदर करतन। जबकि, जौन उनका पर अविश्वाश करऽ हे ऊ सभे अईसन राजमिस्त्रियन के जईसन हे जेकर बारे में भजन में कोई लिखलन हे: “जौन पत्थर के राजमिस्त्रियन ठुकरा देलक, ओही मकान के सभे से खास पत्थर बन गेल।” 8यशायाह पवित्रशास्त्र में ई भी लिखलन हे कि मसीह अईसन होतन मतलब कि “एगो अईसन पत्थर के जईसन जिनका से लोग ठोकर खा हे, आउर एगो अईसन चट्टान के जईसन जौन लोग के निराश करऽ हे।” जौन तरह से लोग चट्टान पर चढ़े से घायल हो जा हे, ओईसहीं लोग येहिसे निराश हो जा हथन काहेकि ऊ सभे परमेश्वर के समाचार के अनादर करऽ हे; ई ओही हे जौन परमेश्वर तय करलन हे कि उनका साथे होत। 9ओकर उल्टा, तूँ विश्वासी लोग अईसन लोग हऽ जेकरा से परमेश्वर अपना ला चुन लेलन हे। तूँ ऊ याजकवन के समाज के जईसन हऽ आउर पवित्र लोग हऽ, जौन परमेश्वर के आराधना करऽ हथन, आउर उनका साथे राज करऽ हथन। तोहनी अईसन समाज हऽ जेकरा परमेश्वर अपना ला अलग कर लेलन हे, तोहनी अईसन लोग हऽ जौन परमेश्वर के हऽ, जेकरा से तूँ ऊ सभे बड़ाई के काम के प्रचार कर सकऽ जौन ऊ करलन हे। जहिया तूँ पापी हलऽ आउर परमेश्वर के बारे में अनजान हलऽ, तखनी ऊ तोरा, तोर पुरनका जिनगी से बाहरे निकास के शुद्ध करलन, आउर ऊ तोरा अपना बारे में अनोखा सच्चा बात समझईलन। 10जौन होशे लिखलन ऊ तोरा बारे में सच हे जे पहिले “प्रजा नऽ” होवऽ हलन, बाकि अखनी “परमेश्वर के प्रजा” हऽ। कोई समय में “परमेश्वर तोरा साथे दयालु होके बर्ताव नऽ करलन हल” बाकि अखनी “ऊ तोरा साथे दया से भर के बर्ताव करलन हे।” 11हे साथी विश्वासियन जेकरा हम प्रेम करऽ ही, तोहनी ऊ सभे परदेशियन के जईसन हऽ जेकर सच्चा घर स्वर्ग में हे। येहिसे हम तोरा ऊ सभे सांसारिक काम के नऽ करे के निवेदन करऽ ही जेकरा तोर पापी मानवीय स्वभाव जे आत्मा से युद्ध करे ला चाहऽ हे। ऊ सभे इच्छा तोरा बर्बाद कर देत। 12अन्यजाति जौन परमेश्वर के नऽ जानऽ हे, उनकर बीच में बढ़ियाँ व्यवहार येहिसे करिहऽ जेकरा से, जौन काम के तूँ कर रहलऽ हे, आउर जेकरा ऊ कपटी, बुरा कहऽ हथन ऊ देखतन कि सच में तूँ बढ़ियाँ काम कर रहलऽ हे, आउर जब परमेश्वर सभे के इंसाफ करे लागी अईतन तखनी ऊ सभे उनकर आदर करतन। 13प्रभु यीशु के आदर करे लागी, ऊ हरेक आदमी के आज्ञा के पालन करऽ, जेकरा भीर लोगवन पर राज करे के अधिकार हे। एकरा में राजा भी शामिल हथन, काहेकि उनका भीर सभे से बढ़ियाँ से बढ़ियाँ मानवीय अधिकार हे।14एकरा में शासक भी शामिल हथन, काहेकि राजा ऊ सभे गलत काम करे वालन के दंड देवे के आउर बढ़ियाँ काम करे वाला के सराहे लागी भेजलन हे।15जौन लोगवन पर राज करऽ हथन उनकर आज्ञा के पालन करिहऽ, काहेकि परमेश्वर येही चाहऽ हथन: ऊ चाहऽ हथन कि तूँ अच्छा काम करऽ जेकरा से मूरख लोग के, जे परमेश्वर के नऽ जानऽ हे अज्ञानता वश ई कहे से रोक दिहऽ कि तूँ बुरा काम करलऽ हे।16जौन लोगवन पर राज करऽ हथन उनकर आज्ञा के मानल करिहऽ ऊ सभे लोग के जईसन जे अपन इच्छा से अईसन करे लागी आजाद हे, बाकि गलत काम के छिपावे लागी आजाद लोग के रूप में अपन पद के इस्तेमाल करे के कोशिश मत करिहऽ। बजाय एकर, अईसन लोग के रूप में आज्ञा के पालन करिहऽ जईसन परमेश्वर के सेवक सेवा करे वाला के करे के चाही।17सभे के प्रति श्रद्धा भाव रहिहऽ। अपन सभे साथी विश्वासियन से प्रेम रखिहऽ। परमेश्वर के डर मानिहऽ। राजा के प्रति आदरभाव रखिहऽ।18हे घर के दास लोग! तूँ जौन विश्वासी हऽ, पूरा भक्तिभाव से अपन मालिक के अधीन रहिहऽ। अईसन नऽ कि खाली ओही सभे मालिक के साथे करिहऽ जौन तोरा प्रति बड़ी भला बर्ताव करऽ हथन, बलुक ओकरा साथे भी जौन तोरा प्रति अन्याय से बर्ताव करऽ हथन।19काहेकि जदि कोई परमेश्वर के प्रति सचेत होके अन्याय से दु:ख उठावऽ हे, तऽ ओकरा पर अनुग्रह होवऽ हे।20अपन मालिक के अधीन रहिहऽ, काहेकि ऊ घड़ी जदि तूँ सह ले हऽ जब तोरा कोई येहिगुने पीटऽ हे कि तूँ पाप करलऽ हे तऽ पक्का तौर से तोरा ला कोई इज्जत नऽ हे। जबकि, ई कुछ अईसन हे जेकरा पर परमेश्वर अनुग्रह करऽ हथन: जदि तूँ दुःख उठइते भर में सह ले हऽ, भलहीं तूँ ऊ करलऽ हे जौन भलाई हे।21एकरा पर परमेश्वर येहिसे कृपा करऽ हथन काहेकि ऊ तोरा भलाई कर के दुःख उठावे लागी बोलईलन हे। ऊ तोरा एकरा ला येहिसे बोलईलन हे काहेकि तोरा ला एगो उदाहरण बने लागी मसीह तोरा चलते दुःख उठईलन जेकरा से जौन ऊ करलन, तूँ ओकर पीछा करऽ।22“मसीह कहियो पाप नऽ करलन। आउर ऊ लोग के धोखा देवे लागी कहियो कोई के कुछो नऽ कहलन।”23जखनी लोग उनका बेईज्जती अईलक, तऽ उल्टे यीशु मसीह ओखनी के बेईज्जती नऽ करलन। जखनी ऊ दुःख उठईलन, तऽ ऊ जौन ऊ उनका दुःख देलक ओकरा कहियो धमकी नऽ देलन। बदले एकर, ऊ परमेश्वर पर, जौन हमेशा सच्चा न्यायी हथन, भरोसा करलन, ई साबित करे लागी कि ऊ निर्दोष हलन। 24मसीह खुद अपन देह में हमनी के पाप लागी सजा भुगतलन, जखनी ऊ क्रूस पर ऊ मकसद लागी मरलन कि हमनी सही रीति से धार्मिकता में जिनगी बितायेम, काहेकि हम अब पाप के काबू में नऽ ही। परमेश्वर तोरा येहिसे चंगा करलन काहेकि लोग मसीह के घायल करलन हल। 25परमेश्वर तोरा येहिसे चंगा करलन काहेकि तूँ भुलायेल भेड़ के जईसन परमेश्वर से अलग हो गेल हल, बाकि अब परमेश्वर तोरा यीशु भीर वापस लेके अईलन हे, जौन तोर चिंता करऽ हथन आउर तोर प्राण रखवाली अईसन करऽ हथन जईसे कोई चरवाहा अपन भेड़वन के फिकिर करऽ हे।
Bridge Connectivity Solutions Pvt. Ltd.