1 Peter1
1हम पतरस ही, जेकरा यीशु मसीह उनका प्रेरित करे लागी भेजलन हे। हम ई लिखित चिट्ठी तोरा लिख रहली हे जेकरा परमेश्वर अपन लोग होवे लागी चुन लेलन हे। हम तोरा लिख रहली हे जौन अपन स्वर्गीय सच्चा घराना से दूर अस्थायी रूप से पुन्तुस, गलातिया, कप्पदूकिया, आसिया, आउर बितूनिया प्रान्त में तित्तर-बित्तर होके रह रहलन हे।2परमेश्वर हमर पिता पहिले से जौन तय करल गेल हल ओकरे मुताबिक पवित्रता करके तोरा चुनलन। ऊ अपन पवित्र आत्मा के द्वारा अईसन करलन, आउर तोरा येहिसे अलग करलन जेकरा से तूँ उनकर आज्ञा के मानऽ, जेकरा से यीशु मसीह के लहू तोरा परमेश्वर के साथ वाचा के सदस्य बना देत। हम प्रार्थना करऽ ही कि परमेश्वर तोरा पर अपन दयालु काम के बढ़ोतरी करतन आउर तोरा बड़ी शान्ति प्रदान करतन।3परमेश्वर के स्तुति होवे, जौन हमर प्रभु यीशु मसीह के पिता हथन! काहेकि ऊ हमरा पर बड़ी बड़का कृपा करलन हे, येहिसे ऊ यीशु के मर गेला के बाद उनका दोबारा जिन्दा कर के हमनी के नया जनम के अनुभव करवईलन। परमेश्वर अईसन येहिसे करलन जेकरा से हमनी के ऊ अपन बड़ी दया से जिन्दा आशा मिलल जौन हमनी के कहियो उदास नऽ करतन,4मतलब ऊ अविनाशी आउर निर्मल आउर अमर विरासत में, जे तोरा ला स्वर्ग में रखल हे।5यीशु पर तोर विश्वास के जरिये से परमेश्वर के सामर्थ तोर देख-भाल कर रहलन हे। ऊ तोर देख-भाल येहिसे कर रहलन हे जेकरा से अंतिम घड़ी में जखनी यीशु सभे आदमी के न्याय करे लागी लौट के अईतन तऽ तोर उद्धार परकट होत।6जौन ऊ घड़ी घटना होल हल ओकरा चलते तूँ बड़ी आनन्दित होलऽ हल, भले अखनी थोड़ा समय लागी तरह-तरह के समस्या तोरा दु:खी अईलक हे।7ई सभे समस्या ई बात के साबित करे लागी घटित होल हे कि तूँ सच में यीशु पर भरोसा करऽ हऽ, ऊ विश्वास परमेश्वर लागी ऊ सोना से भी जादे कीमती हे, जेकरा से कोई आदमी के आग में से गुजार के परखला के बाद भी कोई आदमी बर्बाद कर सकल हे। काहेकि तूँ यीशु पर भरोसा करऽ हऽ, येहिसे जखनी यीशु मसीह अईतन आउर खुद के परकट करतन तऽ ऊ घड़ी परमेश्वर तोर बड़ाई करतन, आउर तोर आदर करतन। 8जबकि तूँ उनका देख लऽ भी नऽ हे, तईयो तूँ यीशु से प्रेम करऽ हऽ। जबकि तूँ उनका ई घड़ी नऽ देखवऽ, तूँ उनका पर विश्वास करऽ हऽ आउर ऊ खुशी के साथे आनन्दित होवऽ हऽ जेकरा तूँ बड़ी मुश्किल से महिमा करऽ हऽ।9काहेकि तूँ उनका पर विश्वास करे के नतीजा के अनुभव कर रहलऽ हे: येहिसे परमेश्वर तोहर पापवन के दोष से तोरा आत्मावन के उद्धार कर रहलन हे।10बड़ी समय पहिले भविष्यद्वक्ता लोग बड़ी होशियारी से परमेश्वर से तोर उद्धार करे के बारे में जाँच-परख करलन। परमेश्वर के अनुग्रह से तोर उद्धार करे के बारे में परमेश्वर उनका भविष्यद्वाणी करलन ऊ ओही बोललन।11ऊ सभे ई खोजे के कोशिश कर रहलन हल कि मसीह के आत्मा जौन उनकर भीतर हल ऊ केकरो दने इशारा कर रहल हल। आउर ऊ आत्मा कौन समय तरफ इशारा कर रहल हल। ऊ आत्मा ई सभे बात दने इशारा कर रहल हल जब ऊ ओखनी के समय से पहिले ही बता देलन हल कि मसीह दुःख उठईतन आउर ओकर बाद ऊ महिमामय घटना घटित होत। 12परमेश्वर ई सभे भविष्यद्वक्ता लोग के बता देलन कि ई उनकर फायदा लागी नऽ हल कि ऊ उनका पर ई बात के परकट कर रहलन हल, बाकि ई तोर सेवा लागी हल। जौन लोग तोरा सुसमाचार सुनईलन हल, अब ओखनी पवित्र आत्मा से, जेकरा परमेश्वर उनका अईसन करे के लायक करे लागी स्वर्ग से भेजलन, ई सभे बात के तोरा बता देलन हे। जौन बात ई सभे लोग तोरा बतईलन ओकरा बारे में स्वर्गदूत आउर भी जाने लागी जादे इच्छुक होतन।13ई सभे बात के नतीजा से, अपन मन के काम करे लागी तईयार करऽ। होशियार रहऽ। आउर पूरा तरह से विश्वास करऽ कि जखनी यीशु मसीह अईतन आउर खुद के प्रकट करतन तखनी अनुग्रह से पूरा आशा के साथे परमेश्वर तोरा उद्धार करतन।14काहेकि तूँ परमेश्वर के आज्ञा के पालन ओही तरह से करऽ हऽ जौन तरह से लईकन के अपन बाबूजी के आज्ञा के पालन करे चाही, खुद पर पापी इच्छा के हावी होवे ला इजाजत मत दिहऽ जईसन तूँ पहिले करऽ हलऽ जखनी तूँ परमेश्वर के सच्चाई नऽ जानऽ हलऽ।15बजाय एकर, जईसन परमेश्वर पवित्र हथन, जौन तोरा अपन लोग होवे लागी चुनलन हे, येहिसे जखनी तूँ कुछो करिहऽ तऽ पवित्र रीति से करिहऽ।16पवित्र बनऽ, काहेकि मूसा पवित्रशास्त्र में लिखलन हे कि परमेश्वर कहलन, “काहेकि हम पवित्र ही, येहिसे तोहूँ पवित्र बनऽ।” 17ऊ परमेश्वर ही हथन जौन ऊ सभे बात के न्यायी कर हथन जौन हरेक आदमी करऽ हे, आउर ऊ बिना पक्षपात कईले फईसला करऽ हथन। येहिसे तूँ उनका 'पिता' कह के पुकारऽ हऽ, येहिसे जब तूँ अपन सच्चा स्वर्गीय घर से दूर अस्थायी रूप से जिनगी बिता रहलऽ हे तऽ ओही रीति से बर्ताव करऽ जेकरा से प्रकट होवे कि तूँ उनकर भय मानऽ हऽ। 18ओही रीति से बर्ताव येहिसे करऽ काहेकि तूँ जानऽ हऽ कि मूर्खता से बर्ताव करे के चलते परमेश्वर तोरा छुटकारा देवे लागी दाम चुका देलन हे, जईसन बर्ताव करे के तोर वंशज तोरा शिक्षा बेकार देलन हल। परमेश्वर तोरा चाँदी चाहे सोना जईसन चीज से आजाद करे लागी दाम नऽ चुकईलन जौन हमेशा बनल नऽ रहत। 19बजाय एकर, क्रूस पर मसीह के बेसकीमती लहू के द्वारा तोरा आजाद करे लागी परमेश्वर दाम चुकईलन हे। ऊ मौत ऊ पूरा रीति से बेदाग आउर निर्दोष मेम्ना के मौत के जईसन हल जेकरा यहूदी याजक बलि चढ़ईलन हल। 20परमेश्वर ई काम करे लागी दुनियाँ के रचना करे से पहिले ही उनका चुन लेलन हल। बाकि ई अंतिम घड़ी के दौरान ई अखनी होल, कि परमेश्वर उनका तोरा पर परकट करलन।21जौन मसीह करलन ओकरे चलते तूँ परमेश्वर पर विश्वास रखऽ हऽ। ओही मसीह के मर गेला के बाद फिनो से जिन्दा करलन आउर ई परकट करलन कि ऊ केतना महिमा हथन। जेकर नतीजा, तूँ परमेश्वर पर विश्वास करऽ हऽ आउर उनका से बड़का-बड़का काम करे के आशा करऽ हऽ22काहेकि तूँ दोसरा विश्वासियन से सच्चा प्रेम करे लागी यीशु के सच्चा शिक्षा के पालन कर के खुद के शुद्ध करलऽ हे, येहिसे एक-दोसरा से ईमानदारी से आउर खुशी से भर के मन प्रेम करऽ।23अईसन येहिसे करऽ काहेकि परमेश्वर तोरा नया जनम के अनुभव करवईलन हे। तूँ ई नया जनम के अनुभव कोई अईसन चीज से नऽ पईलऽ हे जौन नाश हो जायेत। बदले एकर, तूँ एकर अनुभव कोई अविनाशी चीज के द्वारा पईलऽ हे जौन नाश नऽ होत: मतलब कि यीशु के बारे में ऊ सन्देश जौन जीवित परमेश्वर दने से आयेल हे आउर सच में हमेशा तक बनल रहऽ हे।24हम जानऽ ही कि ई सही हे, काहेकि जईसन यशायाह भविष्यद्वक्ता लिखलन हे, “सभे लोग घास के जईसन हे, आउर सभे बात जौन लोग के बारे में बड़ाई करलन हे ऊ घास के फूल के जईसन हे। जौन तरह से घास सूख जा हे आउर फूल मुरझा जा हे, ओईसहीं लोग मर जा हे आउर उनकर बारे में जौन बड़ाई के बात हे ऊ थोड़ा समय ही रहऽ हे,25बाकि प्रभु के वचन युगयुग तक बनल रहत।” ई सुसमाचार जौन अनन्तकाल तक बनल रहत मसीह के सुसमाचार हे जौन हम तोरा सुनईली हल।
Bridge Connectivity Solutions Pvt. Ltd.