1 Peter3
1ओईसहीं, हे मेहरारू लोग! तूँ जौन विश्वासिनी हऽ, अपन-अपन पति के अधीन रहऽ। अईसहीं करऽ जेकरा से तूँ अईसन पति के उनका से बेगर कुछ कहला विश्वासी बने लागी राजी कर लऽ जौन मसीह के सुसमाचार पर विश्वास नऽ करऽ हथन।2ऊ सभे मसीह पर विश्वास येहिसे करतन काहेकि ऊ सभे तोरा पवित्रता से बर्ताव करते आउर उनका प्रति आदरपूर्वक बर्ताव करते देखऽ हथन।3अनोखा माथा-चोटी के गूँथ के चाहे सोना के गहना चाहे बढ़ियाँ कपड़ा पेहेन के अपन देह के बाहरसी हिस्सा के सुन्दर मत बनावऽ।4एकर बदले, अपन छिपल मन के ई तरह से सुन्दर बनावऽ कि कहियो मुरझा नऽ सकत। हमर मतलब हे, नम्र आउर शान्ति से भरल आत्मा में अविनाशी सोच-विचार अपनावऽ। ई एगो अईसन बात हे जेकरा परमेश्वर बड़ी इज्जत करऽ हथन।5अईसन येहिसे करऽ काहेकि ई ऊ तरीका हे जेकरा से बड़ी समय पहिले पवित्र जिनगी जिये वाली मेहरारू खुद के सुन्दर बनईलन। ओखनी परमेश्वर पर उम्मीद करलन आउर अपन पति के अधीन हो गेलन।6उदाहरण लागी, सारा अपन पति अब्राहम के आज्ञा के पालन करलन आउर उनका अपन मालिक कहलन। जदि तूँ अच्छा करम करऽ हऽ आउर तोरा कोई भी अनहोना घटना के होवे के डर नऽ होत तऽ परमेश्वर तोरा अपन बेटी समझतन।7ओईसहीं, हे पति लोग! तूँ जौन विश्वासी हऽ, अपन-अपन मेहरारू के साथे सही समझ के साथ जिनगी बितावऽ। उनका जौरे ओईसहीं बर्ताव करऽ जईसन तूँ कोई अईसन आदमी के साथे बर्ताव करवऽ जौन तोर बराबरी में कमजोर हे। उनका इज्जत अईसन लोग के रूप में करऽ जौन तोरा साथे परमेश्वर के अनुग्रहकारी तोहफा, मतलब कि अनन्त जिनगी भी प्राप्त करवऽ। अईसहीं करिहऽ जेकरा से कोई भी बात तोरा प्रार्थना करे से नऽ रोके।8अपन चिट्ठी ई हिस्सा के खतम करे लागी, हम तोहनी सभे से कहऽ ही, कि अपन बीच में एक जईसन सोच-विचार रखऽ। एक-दोसरा के प्रति दयाभाव रखऽ। साथी विश्वासियन के रूप में एक दोसरा से प्रेम रखऽ। एक दोसरा के प्रति करुणा के साथ बर्ताव करऽ। नम्र बनऽ।9जब लोग तोरा साथे बुराई करतन चाहे तोर अपमान करतन, तऽ ओखनी के साथे ओईसहीं मत करिहऽ। एकर बदले, उनका आशीष दिहऽ। काहेकि परमेश्वर तोरा येही करे लागी चुनलन हे जेकरा से तोरा ऊ आशीष देतन।10हम जानऽ ही कि ई येहिगुने सच हे काहेकि, जईसन कि दाऊद लिखलन हल, “ऊ सभे लोग लागी जौन सचमुच में अच्छा जिनगी से प्रेम रखे ला चाहऽ हथन, उनका गन्दा बात नऽ बोले के चाही आउर नऽ छल के बात बोले के चाही।11एकर अलावे ओखनी सभे बुराई करे से इंकार करतन, आउर भलाई करतन। उनका दोसरा लोग के साथे शान्तिपूर्ण रिश्ता बनावे लागी पूरा-मन से कोशिश करे के चाही।12ओखनी के ई बात के जरुर करे के चाही, काहेकि प्रभु धर्मी लोग पर नजर रखऽ हथन। ऊ धर्मी लोग के प्रार्थना के सुनऽ हथन आउर जबाब दे हथन, बाकि ऊ बुराई करे वाला लोग के खिलाफ रहऽ हथन।” 13जदि तूँ भलाई के काम करे लागी उत्सुक हऽ तऽ एकर कोई सम्भावना नऽ हे कि कोई तोरा नुकसान पहुँचईतन।14जबकि, भले जदि तोरा धरम के चलते दुःख उठावे पड़त काहेकि तूँ जौन करलऽ हे ऊ सही हल, परमेश्वर तोरा आशीष देतन। “ऊ सभे बात से मत डरऽ चाहे बेदम मत होवऽ जेकरा से दोसरा लोग डरऽ हथन।”15बदले एकर, अपन-अपन मन में ई मान लऽ कि प्रभु मसीह पवित्र हथन। हर बखत जबाब देवे ला तईयार रहऽ जे कोई भी एकर बारे में बतावे ला तोरा से कहतन कि एतना मजबूती से तूँ का आशा लगा रहलऽ हे जौन परमेश्वर तोरा ला पूरा करतन।16बाकि एकदम नम्रता से भर के आउर आदरपूर्वक आउर कोई बुरा काम नऽ कर के ओकरा विवेक से जबाब दिहऽ, जेकरा से परमेश्वर ऊ लोग के शर्मिन्दा करतन जौन ऊ सभे बढ़ियाँ काम के बेकार समझ हथन जिनका तूँ मसीह के साथे रहे वाला लोग के रूप में करऽ हऽ। परमेश्वर ओकरा शर्मिन्दा करतन ऊ बात के बारे में जेकरा ऊ सभे तोर खिलाफ में छल कपट से बोल रहलन हे।17ई बात के येहिसे करऽ काहेकि जदि परमेश्वर चाहऽ हथन कि तूँ दुःख उठावऽ, तऽ तूँ ओही करलऽ जे भलाई हे, काहेकि ई तोरा ला दुःख उठावल ओकर से अच्छा हे, कि तूँ येहिसे दुःख उठावऽ कि तूँ ऊ करलऽ जे बुरा हे।18ई येहिसे सच हे काहेकि मसीह भी दुःख उठईलन। दोसरा लोग के पाप लागी एक समय ओहू दुःख उठईलन। ऊ एगो धर्मी आदमी होके अधर्मी लोग के फायदा लागी मरलन। तोरा परमेश्वर के साथे रहे के लायक बनावे लागी ऊ मरलन। जबकि लोग उनका मार देलन, परमेश्वर के आत्मा उनका फिन से जिन्दा कर देलन।19ओही आत्मा ओखनी भीर जा के सभे दुष्टात्मा पर परमेश्वर के विजय के घोषणा करे के लायक बनईलन जेकरा परमेश्वर कैदी बना के रखले हलन। 20ऊ सभे दुष्टात्मा बड़ी समय पहिले, नूह के जीवनकाल में परमेश्वर के आज्ञा उल्लंघन करलन हल। जौन घड़ी नूह एगो बड़का नाव बना रहलन हल, तहिया परमेश्वर ई देखे लागी धीरज धर के इंतजार करलन कि का आदमी बुराई करे से रुकतन। ऊ नाव में खाली थोड़ा लोग बचावल गेलन खास कर के, परमेश्वर जलप्रलय के पानी से खाली आठ प्राणी सुरक्षित निकासल गेल।21ऊ पानी एगो चिन्ह हे जौन बपतिस्मा के प्रतिनिधित्व करऽ हे जेकरा से आजकल तोर उद्धार होवऽ हे। ई बपतिस्मा तोर देह के मैल के नऽ धोवऽ हे। एकर बदले, ई शुद्ध विवेक के देखावऽ हे कि हमनी परमेश्वर से बढ़ियाँ पावे लागी कह रहली हे कि ऊ हमर पाप के मांफ कर देलन हे। ई बपतिस्मा परमेश्वर के यीशु मसीह के पुनरुत्थान के द्वारा तोर उद्धार करऽ हथन।22परमेश्वर द्वारा सभे दुष्ट आउर स्वर्गदूतवन के साथे अधिकारियन आउर सामर्थी ओकरा वश में करलऽ के बाद, मसीह स्वर्ग में चल गेलन, जहाँ ऊ परमेश्वर के साथे सभे से ऊँचा आदर के स्थान पर विराजमान हथन।
Bridge Connectivity Solutions Pvt. Ltd.