Mikeasi7
Lagadeiragun Ísüraeli
1Fugiabu au! Ítara niña kei le áluahabei ígiraguti lárigiñe alubahani, gama lumoun madariti beibei ni igu to hamuga labusenruboun leigin.2Úaaña wügüriña ubouagu ha gúnfulitiña luma Bungiu, súngubei agurabañu hañalin dan lun hadügüni katei lau anarimeni; sétitiña sádara habaruagua.3Máisturugu hagía lidan ladügǘn wuribati; aluguraguatiña lánigu urúei hama aguseragüdütiña houngua luagu fáyeiti; ha gabafubaña, adüga hamuti le habusenrun, gadei hamuti uburugu.4Le buítimabei hadan, ítara liña kei hiiyu; le harumatimabei, ítara liña kei aban búbugati. Gama lumoun anitebei weyu lun haguserun, weyu le buga uágubei lariñaga óunigiruti bun. Ábameti larúeihan bulíeiguaü haganagua.5Mafiñerabá luagu lererun amu gürigia, mafiñerabá luagu ni aban umadaü; góunigibei íbini le badimurehabei tuma búmari.6Ladüga óusera hamutiña isaanigu agübürigu lau mebereseni, añaruduahóutiña isaanigu würiña houn háguchugu, ídiñu houn ágürü, liduheñu guánarügü kada gürigia láganiñubaña.7Anhein au, nagurabahaba lúmagiñe Wabureme, níchugubei nemenigin luagu Bungiu le nesefuragüle, ladüga laganbubadina.Lagañeirun Ísüraeli le tímatimaati
8Néchani nágani, magundaarabá lau nilamiserun, ladüga íbini heigua nan, násaaruba; íbini legeyedagun luburiga nau, Aburemei nilanpunbei.9Afigouhaadina ligibugiñe Bungiu, ligía nawandubei lubéi ligañi, gama lumoun larihuba lau nikesin ábame líchuguni niricha nun. Lanügübadina Bungiu lidoun larugounga, larufudubei lagañeirun nun.10Tarihubei giñe nágani, ábame tabuinchun lau busiganu. Tariñaga meha nun: «Hagéi Aburemei le Bubungiute?» Gama lumoun guentó, narihuboun adügürawagúa kei gubegubeti múarugu.Lararamunya Herusalén
11Herusalén, aniteeli weyu lunya lararamawagüdün bubarieirun, luma lun laweiridúntima bumúan.12Aniteeli weyu lun hayabin bumoun lídangiñe sun fulasu; lúmagiñe Asiria darí Ehiptu; lúmagiñe duna Nilu darí Éufüratesi, lúmagiñe aban barana lumoun ábanya, luma lúmagiñe aban wübü lumoun ábanya.13Lerederuba múa fulasume mageirawati hadüga lílana, ladüga hariban.Afurieiduni luagu hawanserun lumutuniña Wabureme
14Góunigibaña bumutuniña, Wabureme, góunigibaña bilügüniña mudún, ha hábuguabaña dabíararugu, geyegu múa arandarati hau! Barübaña kei lidan meha dan le sügühalibei lidoun sagadi-agei Basán luma Galaadü.15Arihagüdabaña katei garíawaseti, kei lidan dan le basagarunbaliña Ehiptugiñe.16Ariha haméi giñe híbiri néchanigu, barǘ hamaamuga busiganu lau sun lueirin habafu! Redei hamá kei mariñagaditiña, rédeime kei maganbaditiña!17Héheluhabei kaliki kei hewe luma kei híbiri animaalugu ha aduruuharügübaña múarugu! Furí hama adadagareina lídangiñe hamasa, ñübuin hamá bumoun Aburemei buin lau anufudei!Feruduna lániña Wabungiute lumutuniña
18Úati amu Bungiu kei buguya, ladüga feruduna bumuti wuribani, bulíei bumuti hariban fiuraü hádangiñe bumutuniña ha. Arufuda bumuti bínsiñehabu woun, meredetibu lau igañi lun sun dan.19Gudemehabuyabá woun, bunabei wariban, chübei wafigoun lidoun lilulin-agei barana.20Ítaramemeba lau gúnfuli luma ínsiñehabuni le uágubei meha bariñaga houn wagüchagu Abüraámü luma Hakobu!Bible Society of Honduras