Mikeasi6
Laguseragüdüni Wabureme Ísüraeli
1Guentoti aganba huméi lariñagun Aburemei: «Saraba bageindagua luma burí áraabu, aganbaléi wübü bumalali!»2Aganba humá, wübü burí luma burí lebu ubóu le derebugubei: Laguseragüdübaña Wabureme lumutuniña, ladügüba aban ageindaguni luma Ísüraeli.3Lariñahare Wabureme: «Óunaba humana numutuniña, Ka san nadügübei hun?4Sagá numutün Ehiptugiñe lídangiñe amudirawaguni; óunaha numuti Moisesi, Aarón tuma María lun hadundehanün.5Numutuniña, haritagua humá luagu bugaha le labusenrubei Balakü, le lurúeite Moabü ladügün hun, luma ida liña lan lóunabuni Balaamü, le liráü Beoru. Haritagua humá luagu dan le hásügürünbei Sitimügiñe lun Gilügálin, subudi humaamugei richagua lan Wabureme».Le lagurabubei Wabureme lúmagiñe wügüri
6Kaba au nidin áhuduragua lun Bungiu le íñubei? Hauba funa san bágasu wügüriña ha ábanti irumu hau lun níchuguniña lun kei adagaragüdüni gudawarügüti?7Lagundaaruba funa san Wabureme ánhana adagaragüda milu mudún o diisi-milu budéin garaba lun? O anhein lan funa níchiga niráü le íbugañaü lun keisi lafayeiruaha nifigoun?8Arufuda laali Bungiu le buídubei bun, luma ka lan lamuriahabei búmagiñe: Lun badügün irichaü, lun gudemehabu ban luma lun manaagun ban bungua ligibugiñe Bungiu.Uganu luáguti íweru luma iyeeni
9Lagúahaña Wabureme houn lílana uburugu, ani lunti laganbún lau inebesei: «Aganba humá gürigia hama eweridihatiña uburugu:10Hábiñe gürigia ha wuribabaña, anihein burí irisini le habihin mama lidan lubudubu luma burí amisuraagülei híweruti, le mínsiñebei nun.11Ida luba feruduna nániña gürigia ha ayusurubaña balansu múaranti?12Sun rísitiña ha lídanbaña uburugu le, rútiña lidere dan; yéetiña sun lílana uburugu le.13Ligía nabeichadibu lubéi; nagünrinchaguaadibu ladüga bifigoun.14Béigiba, gama lumoun makimuledunbadibu, basufuriramémeba ilamaü; géiginbadibu gama lumoun mesefubadibu ni kata lídangiñe, íbini ánhabu esefura lídangiñe, nadügüba lun lagünrinchaguni wuribu.15Bábunaguba, gama lumoun malubahanbadibu; báhürühaba oliwu, gama lumoun meseriwínbei garaba bun; baribichaguba beibei, gama lumoun mátunbadibu diwéin.16Ladüga falá baali lugumadin Omurí luma hagaburi tílana luban Aabü, óuseraadibu kei hagía. Ligía nadügüba lubéi lun lébuna ban iyereehabúni luma bula houn sun ha aganóubaña bidan, lábürühaba habusigari numutuniña buagun».Bible Society of Honduras