Naún1
Ligañi Wabureme lun Níniwe
1Anihán uganu luáguti Níniwe le larufudubei Wabureme lun Naún le Elikósuna lidan aban uénedü.2Magundanti Wabureme hau amu búngiugu, adügati wuribani houn ha awügürihóutiña lun, hanarime ligía ligañi hama láganiñu.3Gaguraasunti Wabureme lau sun lira gabafuti, ani mígirun lubéi le gadurunbei mabeichúnga.Éibugati Wabureme ligibuagu luriban dan, ani dúeri kaliki le liñurahabei lugudi.4Ébecha lumuti barana, aba lamabeidagüdüni. Mábeigüda lumuti sun duna éibaaguati. Saüti burí lisagadin Basán luma wübü Karümélu, saüti giñe burí lufulurin Líwanu.5Adadagarati burí áraabu ligibugiñe Wabureme; rǘrüguati burí wübü liñúarü. Ánhinhati múa dan le larihini; sun ubóu hau sun ha lídanbaña.6Kábati gayara lerederun rara ligibugiñe ligañi Wabureme? Kaba gayara lawanduni ligañi? Ítara liña ligañi kei watu gemeti, fánreinguati burí dübü wéinamuti ligibugiñe lidan bián murusun.7Buiti Wabureme; aramudaguagülei ligía lidan lidaani idiheri, góunigi lumutiña ha afiñebaña luagu.8Gama lumoun günringua lumutiña ha awügürihóutiña lun ítara kei lanügüni lere duna sun le ladarirun lubarua; ítara luba giñe lárügüdüniña luburiga láganiñu.9Ka wuribati hasaminarubei hadügün lun Wabureme? Lagünrinchagubadün sunsuinagubei! Úati ni aban gayaraati lawügürihóun lun bián wéiyaasu!10Ladüga háguduba sunsuinagubei kei hiiyu le gürawaguati, kei sagadi sáühali.11Níniwe, bídangiñe láfurida le aritagubei ladügün wuribati lun Wabureme. Aban eweridihati wuribati.12Ligía lariñagunbei Wabureme houn lumutuniña: «Lau sun here hamá Asiriana ani gibe hagía, hagünrinchawaguba ani hagumuchaguba. Súfurigüda náadibu, gama lumoun masufuriragüdündigia náadibu.13Nagünrinchagubei anügüni le buágubei tumuguanéime güringüri le aubei bagürawagua».14Ariñagati Wabureme bibügürü, buguya lurúeite Níniwe: «Madügawagunbadibu lun laritawagún luagun biri, nagünrinchagubaña guáriuagu hama burí iyawaü ha tídanbaña litenpulun bubungiute, ani ñeinba nábunabu ladüga mebegitibu ni kata».15Ariha humá! Anitén le anügübei uganu libügürü darangilaü, éibugeina ligibuagu wübü! Efeduhabéi bufedun, Hudá; gúnfulibei le füramase bubéi. Madügündigiaaña wuribatiña ni kata bau; günrinwaguaaña sunsuinagubei.
Bible Society of Honduras