2 Krónikasi11
1Dan lachülürünbei Roboamü Herusaléun, aba lóundarun san-gádürü-wein-milu súdara ha anuadirútiña hádangiñe haduheñu lánigu Hudá luma hádangiñe lani Benhamín türibu, lun lageindagun luma Ísüraeli, lun lárügüdüni larúeihan lárigoun.2Gama lumoun aba ladimurehan Wabungiute lun Semaíasi le luwügürin, lariñaga lun:3«Ariñagabá lun Roboamü le lurúeite Hudá, le liráü Salomón, luma houn sun Ísüraelina ha lílana Hudá, luma Benhamín,4luagu nariñahare lan, lun mageindagun hamá hama hábirigu. Lun lan hagiribudun hábiñoun, lugundun ítara liña lan naranseruni».
Dan haganbunbalin le lariñagubei Wabungiute houn, aba mídinhaña lan ageindagua luma Heroboamü.
Dan haganbunbalin le lariñagubei Wabungiute houn, aba mídinhaña lan ageindagua luma Heroboamü.
Lawanserun Roboamü
5Aba laranseragun Roboamü lungua Herusalén, bunagua ligía burí uburugu derebuguti Hudá.6Héregüdalei Belén, Etamü, Tekóa,7Betü-suru, Sokó, Adulámü,8Gatü, Maresá, Sifu,9Adoraímü, Lákisi, Aseká,10Sorá, Ayalón luma Ebürón, uburugu burí derebuguti lani Hudá luma Benhamín.11Ruti lanwoun liderebugu uburugu burí ligía, aba líchugun gumadangu ñein luma éigini, garaba tuma diwéin.12Ru ligía burí idaüdinaü tuma eféin lidoun kada uburugu, aba léredagüdüni buidu. Aba lubeiti lerederun Hudá luma Benhamín lábugiñe laríaahan Roboamü.13Aba hayabin fádirigu hama Lewitagu lídangiñe sun fulasu lun hóundarun lumoun,14kei gasu lan bugaha hígiruni Lewitagu hamúan le ñein habéi halügüniña mudún luma líbiri hamegen lun houdin Herusaléun luma lidoun burí amu fulasu le lani Hudá, lugundun redei laaña meha Heroboamü hama ha íderagubalin luéi hafadirihan lun Wabureme.15Ru laaña bugaha Heroboamü fádirigu ha labusenrubaña tun burí hatenpulun gibe tubungiutegu luma lun kultu houn máfianu luma tun hayawa bágasu wügüriña ha ladügübaña.16Hati busenbaña hafalaruni Wabungiute le Lubungiute Ísüraeli lau sun hanarün, aba giñe hafalaruni hani fádirigu hama Lewitagu hénpulu, aba houdin Herusalén lun hadagaragüdün lun Wabungiute le Habungiute hagüchagu.17Ítara liña héredagüdüni larúeihan Hudá lau lúmagiñe hamá Roboamü le liráü Salomón luagu ǘrüwa irumu, lugundun ǘrüwarügüñein irumu lau afalarei lani Dawidi luma lani Salomón hénpulu.18Aba lamarieidun Roboamü tuma Maalatü to liráü Herimótu le liráü Dawidi luma tuma Abiaili to liráü Eliabü, to libari Hesé.19Ǘrüwañanu lirahüñü Roboamü tau Maalatü: Heusu, Semaríasi, luma Saamü.20Lárigiñe aba lamarieidun tuma Maaká to liráü Abüsalón, aba hagaraüdüniña Abiamü, Atái, Sisá luma Selomitü.21Disiwídüñanu bugaha lúmarigu Roboamü, ǘrüwa-wein-diisi lubúaligu, gama lumoun hínsiñetimatu Maaká lun hádangiñe súngubei. Wein-wídüñanu lirahüñü wügüriña hama ǘrüwa-wein-diisi würiña.22Aba líchuguni Roboamü Abiamü le tiráü Maaká hábutime líbirigu lugundun busenti bugaha lun ladügübei lan urúeime.23Fánreingua lumutiña híbiri lirahüñü lidan sun lumúan Hudá luma Benhamín luma lidan burí uburugu baríeiruati, ru ligía saragu éigini houn ibiha ligía úmarigu houn.Bible Society of Honduras