2 Krónikasi12
Lárügüdüni Sisakü Hudá
1Dan le lederebugudunbei larúeihan Roboamü, sandigua ligía lungua lau erei, aba lígiruni lagunfuliruni lilurudun Wabungiute, ítara liña giñe hadüga sun Ísüraelina.2Gama lumoun kei múaragun lubéi héibugun luma Wabungiute, lidan liseingün lirumudiri larúeihan Roboamü, aba lidin Sisakü le lurúeite Ehiptu ageindagua hama lílana Herusalén.3Tau milu-bián-san karü lánina wuribu, ǘrüwa-wein-milu súdara ha agalufehatiña gabayu, hama saragu gürigia ñǘbuintiña luma Ehiptugiñe: Líwiana, Sukienna hama Etiopíana.4Ragǘ lumuti uburugu burí baríeiruati le lani Hudá, aba lachülürün darí Herusalén.5Ábati lidin profeta Semaíasi lumoun Roboamü luma hamoun ábutigu ha Hudaabaña, ha buga óundaragubaña Herusalén lau liabin Sisakü, aba lariñagun houn:—Lariñahare Wabungiute luagu ígira humaali lan, ligía lan lébubei lígirunün lúhaburugu Sisakü guentó.6Aba hánharun ábutigu luma urúei lun hadurun, aba hariñagun:
—Richati Wabungiute!7Dan larihinbei Wabungiute luagu asakürihaaña lan, aba lariñagun lun Semaíasi:
—Ladüga hasakürihan, magünrinchagun nubaña, séfurügü nubaña madise, mayusu nubéi Sisakü lun nábürügüdüni nigañi luagun Herusalén;8gama lumoun herederuba lábugiñe lubafu, ábame harihini luagu amu lan leseriwidúniwa nun luéi leseriwidúniwa houn lurúeitegu amu burí fulasu.9Aba lábürühan Sisakü le lurúeite Ehiptu luagun Herusalén, aba lanügüni sun lirisin le tídanbei litenpulun Wabungiute luma le tídanbei lani urúei palasiu. Barǘ lumuti giñe burí idaüdinaü lauti golu le ladügübei Salomón.10Aba ladügün urúei Roboamü idaüdinaü lauti buronse leweñegua, aba lígiruni lábugiñe haríaahan úfisigu hani óunigirutiña tubenari lani urúei palasiu.11Ságüha lidin urúei litenpulunrugu Wabungiute, houdin giñeha óunigirutiña barüina idaüdinaü ligía. Hagiribudun, híchuguni lárigoun.12Ladüga lubeiti lasakürihan Roboamü, aba lagalumadun ligañi Wabungiute lun, magünrinchagun lumuti Hudá sunsuinagubei. Ani lau sun lira rédeiti katei buiti Hudá.13Aba laganwoundun lubafu urúei Roboamü Herusalén, aba lasigirun arúeiha. Bián-wein-aban irumu lau dan le lagumeserunbei arúeiha, arúeihati disedü irumu Herusalén, uburugu le lanúadirubei Wabungiute hádangiñe sun lani Ísüraeli türibu lun lúbanme. Naamá bugaha tíribei lúguchu Roboamü, Amonna.14Mabuidunti bugaha lóuserun Roboamü, lugundun máluahan lumuti Wabungiute tau sun lanigi.15Anihein asusereduti luáguti Roboamü, lúmagiñe furumiñeti lumoun lagumuhóun bürüwañu tidan liliburun asusereduti to lani profeta Semaíasi luma tidan lani profeta Idó, tidan garudia to ñein lubéi labürüdǘwa hiri iduheñu.16Meredeti bugaha hawuribuhan Roboamü luma Heroboamü hámagua.17Dan lóunwenbei Roboamü, aba labunún luburuguterugu Dawidi. Aba larúeihan Abiamü le liráü leweñegua.
Bible Society of Honduras