2 Krónikasi10
Lafanreinrawaguniwa arúeihani Ísüraeli
1Aba lidin Roboamü Sikemün, ladüga ñǘdünha lan buga sun Ísüraelina ñeinhin lun híchuguni keisi urúei.2Gama lumoun kei lasubudiruni Heroboamü, le liráü Nabatü, le bugaha ñǘdünbei Ehiptun anuraheina luéi urúei Salomón, aba lagiribudun Ehiptugiñe.3Dan le hóunahanbei ougei, aba lidin Heroboamü hau sun Ísüraelina adimureha luma Roboamü, hariñaga lun:4—Dereti meha lóuseruniwa búguchi; guentó huáliguagüdabawa, gidabei ihürügu le meha líchugubei wawagu wawéi, ábame weseriwidun bun.5Lariñaga Roboamü houn:—Hagiribudame arihana ǘrüwa weyu lárigiñe le.
Aba houdin,6ábati ladimurehan urúei hama wéiyaaña mutu ha meha eseriwidubaña lun Salomón le lúguchi dan meha le wínwangili, lariñaga houn:
—Ka hariñagubei nun ida luba lan nóunabuniña gürigia ha?7Hariñaga wéiyaaña mutu hagía lun:
—Ánhaña bóusera gürigia ha buidu, áfaagua buguyame bagundaaragüdüniña, óunababañame lau dimurei buiti, heseriwiduba bun súnwandan.8Gama lumoun madügünti Roboamü gasu lau heweridiruni wéiyaaña mutu, aba lidin hamoun nibureinhaña ha agüriarubaña úara luma ani seriwi hagía lun,9aba lariñagun houn:
—Ida liña habusenrun nóunabuniña gürigia ha?10Hariñaga lun:
—Gürigia ha amuriahabaña buma lun bawalidaguagüdüni lidere anügüni le meha líchugubei búguchi hawagu, ariñagabá houn: “Anhein meha deré lubéi núguchi deretimatina,11anhein buga ru lubéi lidere dan hun, níchigatimaba; anhein buga lau lubéi gueru labeichaün, lauba abeihagülei le gawaguti gürabu luagu lígirugu nabeichaün”.12Luagu lǘrüwan weyu, ábaya lidin Heroboamü hau sun lílana fulasu lumoun urúei kei buga lariñaguni lun.13Gama lumoun aba lóunabuniña urúei Roboamü lau dimurei dereti, madügünti gasu lau le hariñagubei wéiyaaña mutu lun,14aba lariñaguni lememe hariñagubei nibureinhaña lun houn:
—Luagu anhein lan hürü lubéi meha hanügün luma lúguchi, hǘrütimabei lan hanügün luma, anhein lan lau lubéi meha gueru labeichaña lúguchi, lauba lan abeihagülei le gawaguti gürabu luagu lígirugu labeichaña.15Madügünti lubeiti urúei gasu hau lílana fulasu, lugundun aranse laali buga Wabungiute lun ítara luba lan, lun lagunfulirun le füramase lubéi Wabungiute lun Heroboamü le liráü Nabatü lídangiñe profeta Aíasi le Silona.16Dan harihinbalin sun lílana Ísüraeli luagu madügün lan urúei gasu hau, aba hariñagun lun:
«Mánitiwa ni kata hama liduheñu Dawidi! Mafanreinhanbadiwa ni murusun alagan luma liráü Hesé! Ísüraelina, kada gürigia hábiñoun! Góunigi laña Dawidi lumutuniña guánarügü!»
Aba hóudinguouga sun Ísüraelina hábiñoun.17Ánhañati Ísüraelina ha aganóubaña lidan burí luburugute Hudá, rédeimemeti Roboamü harúeiteme.18Dan lóunahanbalin Roboamü Adorámü, le arihubei lau wadagimanu fósuarügüti, aba hachamuragun Ísüraelina dübü luagun, aba lounwen. Ábati ládinun urúei Roboamü furese tidoun likarün, aba lanurahan Herusaléun.19Ítara liña bugaha hiñuragun Ísüraelina houngua hawagun liduheñu Dawidi dagá lumoun dan le.
Bible Society of Honduras