Leia 1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢 7

1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢7

𐴁𐴞𐴘𐴝𐴥-𐴐𐴝𐴥𐴊𐴞𐴌 𐴁𐴝𐴦𐴁𐴟𐴃𐴠 𐴐𐴞𐴥𐴑𐴧𐴝

¹𐴘𐴝𐴓𐴝 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴇𐴝𐴣𐴏𐴠 𐴓𐴠𐴙𐴑𐴧𐴡𐴥 𐴊𐴠 𐴇𐴞𐴥𐴀𐴕𐴡𐴌 𐴎𐴟𐴖𐴝𐴁𐴢 𐴊𐴞𐴌: 𐴀𐴡𐴥𐴘, 𐴔𐴡𐴌𐴡𐴃𐴉𐴟𐴀𐴝𐴙𐴕 𐴊𐴠 𐴔𐴝𐴘𐴝𐴉𐴟𐴀𐴝𐴙𐴕 𐴓𐴡𐴘 𐴔𐴞𐴓𐴔𐴞𐴓𐴝𐴁𐴢 𐴕𐴡 𐴒𐴡𐴌𐴡𐴤𐴕 𐴒𐴡𐴔.²𐴔𐴡𐴕𐴃𐴡𐴌 𐴎𐴠𐴕𐴝𐴤𐴑𐴝𐴌𐴞𐴃𐴧𐴟 𐴁𐴝𐴏𐴞 𐴃𐴝𐴥𐴑𐴞 𐴁𐴡𐴓𐴧𐴝, 𐴉𐴡𐴃𐴧𐴞𐴥 𐴔𐴡𐴌𐴡𐴃𐴉𐴟𐴀𐴝𐴙𐴕 𐴊𐴡𐴃𐴧𐴟 𐴕𐴞𐴎𐴡𐴌-𐴕𐴞𐴎𐴡𐴌 𐴁𐴡𐴖𐴢 𐴃𐴝𐴥𐴑𐴡𐴗𐴑, 𐴀𐴝𐴦𐴌 𐴉𐴡𐴃𐴧𐴞𐴥 𐴔𐴝𐴘𐴝𐴉𐴟𐴀𐴝𐴙𐴕 𐴊𐴡𐴃𐴧𐴟 𐴕𐴞𐴎𐴡𐴌-𐴕𐴞𐴎𐴡𐴌 𐴇𐴡𐴥𐴐𐴡𐴔 𐴃𐴝𐴥𐴑𐴡𐴗𐴑.³𐴇𐴡𐴥𐴐𐴡𐴔𐴠 𐴕𐴞𐴎𐴡𐴌 𐴁𐴡𐴖𐴢 𐴖𐴡𐴥𐴌 𐴇𐴡𐴥𐴑 𐴀𐴝𐴊𐴝𐴘 𐴒𐴡𐴌𐴡𐴥𐴗𐴑, 𐴀𐴝𐴦𐴌 𐴇𐴠𐴥𐴕𐴊𐴞𐴓𐴧𐴝, 𐴁𐴡𐴖𐴢 𐴖𐴠𐴥 𐴘𐴡𐴥 𐴕𐴞𐴎𐴡𐴌 𐴇𐴡𐴥𐴐𐴡𐴔𐴡𐴌 𐴇𐴡𐴥𐴑 𐴀𐴝𐴊𐴝𐴘 𐴒𐴡𐴌𐴡𐴥𐴗𐴑.⁴𐴁𐴡𐴖𐴢 𐴖𐴡𐴃𐴧𐴟 𐴕𐴞𐴎𐴡𐴌 𐴒𐴝𐴦𐴌 𐴖𐴡𐴌𐴠 𐴇𐴡𐴕𐴡𐴤 𐴀𐴝𐴊𐴞𐴥𐴑𐴝𐴌 𐴕𐴝𐴥𐴘, 𐴔𐴡𐴕𐴃𐴡𐴌 𐴇𐴡𐴥𐴐𐴡𐴔𐴡𐴃𐴧𐴟 𐴁𐴠 𐴀𐴝𐴏𐴠𐴤; 𐴀𐴝𐴦𐴌 𐴇𐴠𐴥𐴕𐴊𐴞𐴓𐴧𐴝, 𐴇𐴡𐴥𐴐𐴡𐴔𐴡𐴃𐴧𐴟 𐴘𐴡𐴥 𐴕𐴞𐴎𐴡𐴌 𐴒𐴝𐴦𐴌 𐴖𐴡𐴌𐴠 𐴇𐴡𐴕𐴡𐴤 𐴀𐴝𐴊𐴞𐴥𐴑𐴝𐴌 𐴕𐴝𐴥𐴘, 𐴔𐴡𐴕𐴃𐴡𐴌 𐴁𐴡𐴖𐴢 𐴖𐴡𐴥𐴃𐴧𐴟 𐴁𐴠 𐴀𐴝𐴏𐴠𐴤.⁵𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴀𐴞𐴕𐴑𐴝𐴌 𐴒𐴡𐴌𐴞𐴥 𐴕𐴡 𐴊𐴞𐴥𐴘𐴡, 𐴔𐴡𐴕𐴃𐴡𐴌 𐴊𐴟𐴖𐴝 𐴒𐴡𐴌𐴞𐴥 𐴁𐴡𐴓𐴧𐴝 𐴊𐴟𐴕𐴞𐴥 𐴎𐴡𐴕𐴠 𐴌𐴝𐴎𐴞𐴌𐴡𐴁𐴧𐴡𐴃𐴢 𐴀𐴡𐴥𐴘𐴧𐴡𐴌𐴠 𐴑𐴠𐴏𐴧𐴟𐴥 𐴀𐴡𐴑𐴃𐴡𐴥 𐴓𐴧𐴝 𐴉𐴝𐴌𐴞𐴁𐴝𐴥. 𐴁𐴝𐴦𐴊𐴠 𐴀𐴝𐴁𐴝𐴌 𐴀𐴝𐴒𐴡𐴌 𐴋𐴡𐴥𐴙𐴓𐴧𐴝 𐴀𐴡𐴥𐴘𐴎𐴝𐴘𐴡𐴒𐴡𐴘, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝𐴌𐴠 𐴃𐴟𐴣𐴀𐴝𐴥𐴌𐴝𐴌 𐴕𐴞𐴎𐴡𐴌𐴠𐴥 𐴏𐴡𐴥𐴣𐴓𐴞 𐴌𐴝𐴑𐴝𐴤𐴌 𐴈𐴡𐴔𐴞 𐴓𐴡𐴘𐴧𐴡𐴌𐴠 𐴐𐴡𐴥𐴘𐴃𐴝𐴕𐴠 𐴀𐴠𐴕𐴃𐴝𐴥𐴕𐴡𐴃𐴢 𐴕𐴡 𐴉𐴠𐴥𐴓𐴝.⁶𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴀𐴞𐴀𐴕 𐴇𐴡𐴥𐴑𐴟𐴔 𐴒𐴡𐴌𐴞𐴥𐴌 𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴠𐴎𐴝𐴎𐴡𐴃𐴢 𐴊𐴞𐴌 𐴊𐴠.⁷𐴀𐴝𐴣𐴀𐴌 𐴀𐴝𐴎𐴧𐴟 𐴀𐴡𐴥𐴙𐴓𐴊𐴠, 𐴉𐴡𐴃𐴧𐴞𐴥 𐴔𐴡𐴌𐴡𐴃𐴉𐴟𐴀𐴝𐴙𐴕 𐴀𐴝𐴣𐴀𐴌 𐴋𐴡𐴥𐴙𐴓𐴧𐴝 𐴀𐴡𐴥𐴑. 𐴔𐴡𐴕𐴃𐴡𐴌 𐴉𐴡𐴃𐴧𐴞𐴥 𐴎𐴡𐴕𐴡𐴃𐴧𐴟 𐴀𐴝𐴓𐴧𐴝𐴌 𐴊𐴞𐴦𐴘𐴝 𐴕𐴞𐴘𐴝𐴔𐴡𐴃𐴢 𐴀𐴝𐴏𐴠𐴤, 𐴀𐴠𐴎𐴧𐴡𐴕𐴡𐴃𐴧𐴟 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, 𐴀𐴝𐴦𐴌 𐴀𐴝𐴌 𐴀𐴠𐴎𐴧𐴡𐴕𐴡𐴃𐴧𐴟 𐴀𐴝𐴌𐴀𐴠𐴑 𐴋𐴡𐴙𐴓𐴧𐴝 𐴀𐴝𐴏𐴠𐴤.

⁸𐴔𐴡𐴕𐴃𐴡𐴌 𐴀𐴝𐴁𐴞𐴘𐴝𐴥𐴃𐴝 𐴀𐴡𐴥𐴑𐴧𐴡𐴓𐴡𐴌𐴠 𐴀𐴠𐴊𐴧𐴠 𐴌𐴝𐴌𐴞 𐴀𐴡𐴥𐴑𐴧𐴡𐴓𐴡𐴌𐴠 𐴀𐴝𐴀𐴛 𐴘𐴝𐴀𐴕 𐴈𐴡𐴀𐴙𐴌, 𐴃𐴟𐴣𐴀𐴝𐴥𐴌𐴝 𐴘𐴡𐴥 𐴀𐴝𐴣𐴀𐴌 𐴋𐴡𐴥𐴙𐴓𐴧𐴝 𐴀𐴝𐴁𐴞𐴘𐴝𐴥𐴃𐴝 𐴃𐴝𐴥𐴑𐴞𐴓𐴠 𐴒𐴡𐴔 𐴀𐴡𐴥𐴘𐴁𐴡.⁹𐴔𐴡𐴕𐴃𐴡𐴌 𐴎𐴡𐴊𐴞 𐴕𐴞𐴎𐴡𐴌𐴠𐴥 𐴏𐴡𐴥𐴣𐴓𐴞 𐴌𐴝𐴑𐴞𐴥 𐴕𐴡 𐴉𐴝𐴌𐴡, 𐴃𐴡𐴥𐴀𐴘𐴓𐴠 𐴁𐴞𐴘𐴝𐴥 𐴒𐴡𐴌𐴞𐴥𐴉𐴠𐴓𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴎𐴧𐴟𐴘𐴠 𐴎𐴡𐴓𐴞𐴉𐴟𐴌𐴞 𐴎𐴝𐴌 𐴃𐴟𐴥𐴖𐴝𐴌𐴡 𐴁𐴠𐴀𐴃𐴡𐴌 𐴀𐴡𐴥𐴙𐴓𐴊𐴠 𐴁𐴞𐴘𐴝𐴥 𐴒𐴡𐴌𐴞𐴥𐴉𐴠𐴓𐴡𐴕.

¹⁰𐴔𐴡𐴕𐴃𐴡𐴌 𐴁𐴞𐴘𐴝𐴥𐴃𐴝 𐴒𐴟𐴥𐴕𐴡𐴌𐴠 𐴀𐴝𐴀𐴛 𐴇𐴡𐴥𐴑𐴟𐴔 𐴊𐴞𐴌, 𐴇𐴝𐴥𐴓𐴠𐴑𐴠 𐴀𐴝𐴀𐴛 𐴊𐴞𐴌 𐴊𐴠 𐴕𐴡 𐴁𐴡𐴥𐴓𐴑𐴠 𐴔𐴝𐴓𐴞𐴑𐴠 𐴊𐴠𐴌 𐴊𐴠, 𐴑𐴞 𐴈𐴡𐴘𐴓𐴠𐴥, 𐴁𐴡𐴖𐴢 𐴕𐴞𐴎𐴡𐴌 𐴇𐴡𐴥𐴐𐴡𐴔𐴡𐴃𐴧𐴟 𐴀𐴝𐴓𐴡𐴑 𐴀𐴡𐴥𐴘 𐴕𐴡 𐴎𐴡𐴒𐴧𐴡𐴥𐴘.¹¹𐴔𐴡𐴕𐴃𐴡𐴌 𐴎𐴡𐴊𐴞 𐴀𐴝𐴓𐴡𐴑 𐴀𐴡𐴥𐴘𐴎𐴝𐴒𐴡𐴘, 𐴃𐴡𐴥𐴀𐴘𐴓𐴠 𐴇𐴞𐴥𐴁𐴝𐴃𐴧𐴟 𐴀𐴝𐴁𐴞𐴘𐴝𐴥𐴃𐴝 𐴃𐴝𐴥𐴑𐴞𐴎𐴝𐴒𐴡𐴘 𐴉𐴡𐴌𐴞𐴁𐴡𐴥, 𐴀𐴝𐴌𐴕𐴡𐴥𐴘𐴓𐴠 𐴕𐴞𐴎𐴡𐴌 𐴇𐴡𐴥𐴐𐴡𐴔 𐴓𐴡𐴥𐴘 𐴀𐴝𐴁𐴝𐴌 𐴁𐴡𐴕𐴞𐴎𐴝𐴒𐴡𐴥𐴘 𐴉𐴡𐴌𐴞𐴁𐴡𐴥, 𐴀𐴝𐴦𐴌 𐴇𐴡𐴥𐴐𐴡𐴔𐴡𐴃𐴧𐴟 𐴘𐴡𐴥 𐴕𐴞𐴎𐴡𐴌 𐴁𐴡𐴖𐴢 𐴖𐴡𐴥𐴌𐴠 𐴕𐴡 𐴏𐴝𐴥𐴌𐴝 𐴉𐴡𐴌𐴞𐴁𐴡𐴥.

¹²𐴀𐴝𐴦𐴌 𐴁𐴝𐴊𐴁𐴝𐴑𐴞 𐴒𐴟𐴥𐴕𐴡𐴌𐴠 𐴔𐴝𐴓𐴞𐴑𐴠 𐴕𐴡, 𐴁𐴡𐴥𐴓𐴑𐴠 𐴀𐴝𐴀𐴛 𐴈𐴡𐴀𐴙𐴌, 𐴇𐴡𐴕𐴡𐴤 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴡𐴃𐴧𐴟 𐴎𐴡𐴊𐴞 𐴒𐴝𐴙𐴌𐴀𐴞𐴔𐴝𐴕𐴊𐴝𐴥𐴌 𐴁𐴡𐴖𐴢 𐴃𐴝𐴥𐴑𐴠, 𐴀𐴝𐴦𐴌 𐴇𐴞𐴥𐴁𐴝 𐴃𐴝𐴌 𐴓𐴡𐴘 𐴎𐴞𐴕𐴊𐴞𐴒𐴞 𐴒𐴡𐴙𐴃𐴧𐴡𐴥 𐴌𐴝𐴎𐴞 𐴀𐴡𐴥, 𐴃𐴡𐴥𐴀𐴘𐴓𐴠 𐴃𐴠𐴦 𐴇𐴞𐴥𐴁𐴝𐴌𐴠 𐴕𐴡 𐴏𐴝𐴥𐴌𐴡𐴗𐴑.¹³𐴇𐴠𐴥𐴕𐴊𐴞𐴓𐴧𐴝, 𐴇𐴡𐴕𐴡𐴤 𐴀𐴞𐴔𐴝𐴕𐴊𐴝𐴥𐴌 𐴔𐴝𐴘𐴝𐴉𐴟𐴖𐴝𐴃𐴧𐴟 𐴎𐴡𐴊𐴞 𐴒𐴝𐴙𐴌𐴀𐴞𐴔𐴝𐴕𐴊𐴝𐴥𐴌 𐴇𐴡𐴥𐴐𐴡𐴔 𐴃𐴝𐴥𐴑𐴠, 𐴀𐴝𐴦𐴌 𐴃𐴠𐴦 𐴇𐴞𐴥𐴁𐴝 𐴓𐴧𐴡𐴥𐴘 𐴎𐴞𐴕𐴊𐴞𐴒𐴞 𐴒𐴡𐴙𐴃𐴧𐴡𐴥 𐴌𐴝𐴎𐴞 𐴀𐴡𐴥, 𐴃𐴡𐴥𐴀𐴘𐴓𐴠 𐴇𐴞𐴥𐴁𐴝𐴘𐴠 𐴕𐴞𐴎𐴡𐴌 𐴇𐴡𐴥𐴐𐴡𐴔𐴡𐴌𐴠 𐴕𐴡 𐴏𐴝𐴥𐴌𐴡𐴗𐴑.¹⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴒𐴝𐴙𐴌𐴀𐴞𐴔𐴝𐴕𐴊𐴝𐴥𐴌 𐴇𐴡𐴥𐴐𐴡𐴔 𐴁𐴡𐴖𐴢 𐴖𐴡𐴥𐴌 𐴎𐴡𐴌𐴞𐴘𐴝 𐴂𐴝𐴑-𐴏𐴝𐴥𐴉𐴢 𐴀𐴡𐴥𐴘𐴎𐴝𐴒𐴡𐴘, 𐴀𐴝𐴦𐴌 𐴒𐴝𐴙𐴌𐴀𐴞𐴔𐴝𐴕𐴊𐴝𐴥𐴌 𐴁𐴡𐴖𐴢 𐴀𐴞𐴔𐴝𐴕𐴊𐴝𐴥𐴌 𐴇𐴡𐴥𐴐𐴡𐴔𐴡𐴌 𐴎𐴡𐴌𐴞𐴘𐴝 𐴂𐴝𐴑-𐴏𐴝𐴥𐴉𐴢 𐴀𐴡𐴥𐴘𐴎𐴝𐴒𐴡𐴘; 𐴀𐴝𐴌𐴕𐴡𐴥𐴘𐴓𐴠 𐴃𐴡 𐴃𐴟𐴣𐴀𐴝𐴥𐴌𐴝𐴌 𐴉𐴟𐴀𐴝𐴙𐴕 𐴕𐴝𐴉𐴝𐴑 𐴀𐴡𐴥𐴘𐴃𐴡, 𐴔𐴡𐴕𐴃𐴡𐴌 𐴘𐴝𐴓𐴝 𐴀𐴞𐴥𐴃𐴝𐴌𐴝 𐴂𐴝𐴑.

¹⁵𐴔𐴡𐴕𐴃𐴡𐴌 𐴒𐴝𐴙𐴌𐴀𐴞𐴔𐴝𐴕𐴊𐴝𐴥𐴌𐴒𐴗𐴝𐴥 𐴎𐴡𐴊𐴞 𐴀𐴝𐴓𐴡𐴑 𐴀𐴡𐴥𐴘𐴎𐴝𐴘𐴃𐴡𐴘 𐴏𐴝𐴀, 𐴃𐴡𐴥𐴀𐴘𐴓𐴠 𐴀𐴡𐴥𐴘𐴎𐴡𐴒𐴧𐴡𐴘. 𐴇𐴠𐴥𐴕𐴊𐴞𐴓𐴧𐴝 𐴇𐴝𐴥𐴓𐴡𐴃𐴡𐴃𐴢 𐴇𐴡𐴕𐴡𐴤 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘 𐴘𐴝𐴥 𐴁𐴡𐴥𐴙𐴕 𐴁𐴞𐴘𐴝𐴥-𐴐𐴝𐴥𐴊𐴞𐴌 𐴁𐴝𐴕𐴡𐴌 𐴃𐴡𐴓𐴠 𐴕𐴝𐴥𐴘. 𐴀𐴝𐴓𐴧𐴝𐴘𐴠 𐴃𐴡 𐴀𐴝𐴣𐴀𐴌𐴝𐴌𐴠 𐴐𐴝𐴥𐴕𐴃𐴞𐴌 𐴎𐴞𐴕𐴊𐴞𐴒𐴞 𐴈𐴝𐴍𐴝𐴘 𐴁𐴡𐴓𐴧𐴝 𐴀𐴠𐴥𐴕𐴝 𐴋𐴝𐴙𐴑𐴧𐴠𐴥.¹⁶𐴀𐴡𐴥 𐴁𐴡𐴖𐴢, 𐴃𐴟𐴘 𐴑𐴠𐴀𐴕𐴒𐴡𐴌𐴞 𐴎𐴝𐴕𐴡𐴏𐴢, 𐴃𐴡𐴌 𐴇𐴡𐴥𐴐𐴡𐴔𐴡𐴌𐴠 𐴕𐴠𐴅𐴝𐴃𐴢 𐴉𐴝 𐴁𐴝𐴘 𐴕𐴡 𐴉𐴝𐴌𐴞𐴁𐴞𐴥 𐴊𐴠؟ 𐴀𐴡𐴥 𐴇𐴡𐴥𐴐𐴡𐴔, 𐴃𐴟𐴘 𐴑𐴠𐴀𐴕𐴒𐴡𐴌𐴞 𐴎𐴝𐴕𐴡𐴏𐴢, 𐴃𐴡𐴌 𐴁𐴡𐴖𐴢 𐴖𐴡𐴥𐴌𐴠 𐴕𐴠𐴅𐴝𐴃𐴢 𐴉𐴝 𐴁𐴝𐴘 𐴕𐴡 𐴉𐴝𐴌𐴞𐴁𐴞𐴥 𐴊𐴠؟

𐴔𐴝𐴓𐴞𐴑𐴡𐴌 𐴋𐴝𐴑𐴝 𐴔𐴡𐴎𐴞𐴕 𐴎𐴞𐴕𐴊𐴞𐴒𐴞 𐴈𐴝𐴍𐴡

¹⁷𐴔𐴝𐴓𐴞𐴑𐴠 𐴎𐴝𐴌𐴠𐴥 𐴎𐴠 𐴇𐴝𐴥𐴓𐴡𐴃𐴡𐴃𐴢 𐴌𐴝𐴙𐴑𐴧𐴠𐴥 𐴀𐴠𐴊𐴧𐴠 𐴎𐴝𐴌𐴠𐴥 𐴎𐴞𐴘𐴝𐴥𐴕𐴡𐴓𐴧𐴝 𐴋𐴝𐴙𐴑𐴧𐴠𐴥, 𐴉𐴡𐴃𐴧𐴞𐴥𐴑𐴞𐴘𐴠 𐴇𐴠𐴥 𐴔𐴡𐴎𐴞𐴕 𐴎𐴞𐴕𐴊𐴞𐴒𐴞 𐴈𐴝𐴍𐴡. 𐴃𐴝𐴔𐴝𐴥𐴔 𐴎𐴡𐴔𐴝𐴥𐴃𐴢 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴀𐴝𐴀𐴛 𐴊𐴞 𐴊𐴠 𐴇𐴡𐴥𐴑𐴟𐴔 𐴀𐴡𐴥𐴙𐴓𐴊𐴠 𐴇𐴞𐴥𐴘𐴝𐴕.¹⁸𐴎𐴡𐴊𐴞 𐴀𐴝𐴥𐴎𐴡𐴔𐴞 𐴒𐴡𐴙𐴅𐴧𐴝𐴥 𐴇𐴡𐴕𐴡𐴤 𐴔𐴝𐴕𐴟𐴥𐴙𐴐𐴡𐴌𐴠 𐴋𐴝𐴈𐴝 𐴒𐴞𐴘𐴠𐴥 𐴊𐴠 𐴀𐴡𐴥𐴘𐴓𐴠, 𐴀𐴞𐴥𐴃𐴠 𐴁𐴠-𐴀𐴝𐴥𐴎𐴡𐴔𐴞 𐴒𐴡𐴙𐴅𐴧𐴝𐴥 𐴀𐴡𐴥𐴘𐴁𐴝𐴌 𐴑𐴟𐴐𐴞𐴥𐴐𐴢 𐴕𐴡 𐴒𐴡𐴌𐴡𐴥𐴗𐴑. 𐴎𐴡𐴊𐴞 𐴁𐴠-𐴀𐴝𐴥𐴎𐴡𐴔𐴞 𐴒𐴡𐴙𐴅𐴧𐴝𐴥 𐴇𐴡𐴕𐴡𐴤 𐴔𐴝𐴕𐴟𐴥𐴙𐴐𐴡𐴌𐴠 𐴋𐴝𐴈𐴝 𐴒𐴞𐴘𐴠𐴥 𐴊𐴠 𐴀𐴡𐴥𐴘𐴓𐴠, 𐴀𐴞𐴥𐴃𐴠 𐴀𐴝𐴥𐴎𐴡𐴔𐴞 𐴕𐴡 𐴒𐴡𐴌𐴡𐴥𐴗𐴑.¹⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴥𐴎𐴡𐴔𐴞 𐴒𐴡𐴌𐴝𐴥 𐴘𐴡𐴥 𐴑𐴠𐴏𐴧𐴟𐴥 𐴕𐴡, 𐴀𐴝𐴥𐴎𐴡𐴔𐴞 𐴕𐴡 𐴒𐴡𐴌𐴝𐴥 𐴘𐴡𐴥 𐴑𐴠𐴏𐴧𐴟𐴥 𐴕𐴡, 𐴔𐴡𐴕𐴃𐴡𐴌 𐴀𐴝𐴏𐴡𐴥𐴓𐴢 𐴈𐴡𐴃𐴝𐴤 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌 𐴇𐴡𐴥𐴑𐴟𐴔 𐴀𐴡𐴥𐴑𐴧𐴡𐴓𐴢 𐴀𐴝𐴔𐴡𐴥𐴓𐴢 𐴒𐴡𐴌𐴡𐴤𐴕.²⁰𐴀𐴝𐴓𐴧𐴝𐴘𐴠 𐴎𐴝𐴌𐴠𐴥 𐴎𐴠 𐴇𐴝𐴥𐴓𐴡𐴃𐴡𐴃𐴢 𐴃𐴝𐴥𐴑𐴞𐴃𐴠 𐴋𐴝𐴙𐴑𐴧𐴠𐴥, 𐴀𐴞𐴥𐴃𐴠 𐴇𐴠𐴥 𐴇𐴝𐴥𐴓𐴡𐴃𐴡𐴃𐴢 𐴃𐴝𐴥𐴑𐴡.

²¹𐴃𐴟𐴣𐴀𐴝𐴥𐴣𐴌𐴠 𐴒𐴟𐴓𐴝𐴔𐴞 𐴇𐴝𐴥𐴓𐴡𐴃𐴡𐴃𐴢 𐴃𐴝𐴥𐴑𐴞𐴃𐴠 𐴋𐴝𐴈𐴝 𐴒𐴞𐴘𐴠𐴥 𐴊𐴠 𐴕𐴠𐴥؟ 𐴉𐴠𐴌𐴠𐴐𐴝𐴕 𐴕𐴡 𐴀𐴡𐴥𐴘𐴧𐴡. 𐴔𐴡𐴕𐴃𐴡𐴌 𐴎𐴡𐴊𐴞 𐴃𐴟𐴣𐴀𐴝𐴥𐴣𐴃𐴧𐴟 𐴀𐴝𐴎𐴝𐴊𐴢 𐴀𐴡𐴥𐴘 𐴉𐴝𐴌𐴞𐴁𐴝𐴥𐴌 𐴔𐴡𐴦𐴗𐴑𐴝 𐴃𐴝𐴥𐴑𐴠, 𐴃𐴡𐴥𐴀𐴘𐴓𐴠 𐴇𐴞𐴥𐴘𐴝𐴕 𐴀𐴠𐴏𐴃𐴠𐴔𐴝𐴓𐴢 𐴒𐴡𐴌𐴡𐴤.²²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴓𐴞𐴑𐴠 𐴎𐴝𐴌𐴠𐴥 𐴒𐴟𐴓𐴝𐴔𐴞 𐴇𐴝𐴥𐴓𐴡𐴃𐴡𐴃𐴢 𐴃𐴝𐴥𐴑𐴞𐴃𐴠 𐴋𐴝𐴙𐴑𐴧𐴠𐴥, 𐴀𐴞𐴥𐴃𐴠 𐴔𐴝𐴓𐴞𐴑𐴡𐴌 𐴀𐴝𐴎𐴝𐴊𐴢 𐴒𐴡𐴙𐴅𐴧𐴝𐴥 𐴔𐴝𐴕𐴟𐴥𐴙𐴐𐴢. 𐴇𐴠𐴥𐴕𐴊𐴞𐴓𐴧𐴝, 𐴎𐴝𐴌𐴠𐴥 𐴀𐴝𐴎𐴝𐴊𐴞 𐴇𐴝𐴥𐴓𐴡𐴃𐴡𐴃𐴢 𐴃𐴝𐴥𐴑𐴞𐴃𐴠 𐴋𐴝𐴙𐴑𐴧𐴠𐴥, 𐴀𐴞𐴥𐴃𐴠 𐴔𐴡𐴀𐴏𐴞𐴤𐴌 𐴒𐴟𐴓𐴝𐴔.²³𐴃𐴟𐴣𐴀𐴝𐴥𐴌𐴝𐴌𐴠 𐴊𐴝𐴔 𐴊𐴞𐴦 𐴑𐴞𐴕𐴝 𐴒𐴞𐴘𐴠𐴥, 𐴇𐴠𐴥𐴃𐴡𐴓𐴧𐴝 𐴀𐴞𐴕𐴏𐴝𐴥𐴕𐴡𐴌 𐴒𐴟𐴓𐴝𐴔 𐴕𐴡 𐴁𐴡𐴕𐴞𐴘𐴡𐴥.²⁴𐴁𐴝𐴥𐴘𐴧𐴝𐴙𐴕, 𐴎𐴝𐴌𐴠𐴥 𐴎𐴠 𐴇𐴝𐴥𐴓𐴡𐴃𐴡𐴃𐴢 𐴃𐴝𐴥𐴑𐴞𐴃𐴠 𐴋𐴝𐴈𐴝 𐴒𐴞𐴘𐴠𐴥, 𐴀𐴞𐴥𐴃𐴠 𐴇𐴠𐴥 𐴇𐴝𐴥𐴓𐴡𐴃𐴡𐴃𐴢 𐴃𐴝𐴥𐴑𐴞 𐴀𐴝𐴓𐴧𐴝 𐴓𐴧𐴡𐴘 𐴃𐴝𐴦𐴓𐴟𐴑𐴝𐴃𐴢 𐴎𐴝𐴌𐴞 𐴌𐴝𐴑𐴡𐴥.

𐴀𐴝𐴁𐴞𐴘𐴝𐴥𐴃𐴝 𐴀𐴠𐴊𐴧𐴠 𐴌𐴝𐴌𐴞 𐴀𐴡𐴥𐴑𐴧𐴡𐴓𐴢

²⁵𐴘𐴝𐴓𐴝 𐴀𐴝𐴁𐴞𐴘𐴝𐴥𐴃𐴝 𐴀𐴡𐴥𐴑𐴧𐴡𐴓𐴡𐴌 𐴁𐴝𐴦𐴁𐴟𐴃𐴠 𐴈𐴡𐴘𐴃𐴡𐴤 𐴏𐴝𐴘𐴓𐴠𐴥: 𐴀𐴝𐴀𐴛 𐴀𐴞𐴥𐴃𐴝𐴌𐴝𐴓𐴧𐴝 𐴔𐴝𐴓𐴞𐴑𐴡𐴌 𐴃𐴡𐴌𐴉𐴡𐴥𐴃𐴧𐴟 𐴇𐴡𐴕𐴡𐴤 𐴇𐴡𐴥𐴑𐴟𐴔 𐴕𐴡𐴥 𐴉𐴝𐴘, 𐴓𐴠𐴑𐴞𐴕 𐴔𐴝𐴓𐴞𐴑𐴡𐴌 𐴌𐴝𐴇𐴝𐴥𐴔𐴡𐴃𐴠 𐴀𐴝𐴀𐴛 𐴁𐴡𐴥𐴌𐴝𐴐𐴝𐴌 𐴓𐴝𐴦𐴘𐴠𐴑 𐴀𐴡𐴥𐴘𐴧𐴞 𐴀𐴞𐴥𐴏𐴝𐴉𐴠 𐴀𐴝𐴣𐴀𐴌 𐴌𐴝𐴘 𐴊𐴞𐴌.²⁶𐴘𐴝𐴓𐴝 𐴏𐴡𐴓𐴠𐴌 𐴊𐴠 𐴔𐴡𐴏𐴞𐴁𐴡𐴃𐴢 𐴀𐴡𐴥𐴑𐴧𐴡𐴓𐴡𐴌 𐴀𐴟𐴎𐴟 𐴑𐴞𐴥𐴘𐴝𐴓𐴢 𐴒𐴡𐴌𐴞𐴥 𐴏𐴝𐴘𐴓𐴠𐴥, 𐴀𐴝𐴣𐴀𐴌 𐴁𐴝𐴥𐴉𐴝 𐴔𐴡𐴎𐴞𐴕، 𐴎𐴠𐴦 𐴎𐴠𐴕𐴊𐴞𐴓𐴧𐴝 𐴀𐴝𐴏𐴠𐴤 𐴇𐴠𐴥𐴕𐴊𐴞𐴓𐴧𐴝 𐴃𐴝𐴥𐴑𐴞𐴓𐴠 𐴒𐴡𐴔 𐴀𐴡𐴥𐴘𐴁𐴡.²⁷𐴃𐴟𐴣𐴀𐴝𐴥𐴣𐴃𐴧𐴟 𐴁𐴡𐴖𐴢 𐴀𐴝𐴏𐴠𐴤 𐴕𐴞𐴑𐴞؟ 𐴃𐴝𐴥𐴑𐴞𐴓𐴠 𐴇𐴞𐴥𐴁𐴝𐴃𐴧𐴟 𐴏𐴞𐴥𐴌𐴝 𐴀𐴡𐴥𐴘𐴎𐴝𐴘𐴃𐴡𐴘 𐴎𐴟𐴦 𐴕𐴡 𐴃𐴟𐴖𐴝𐴘𐴧𐴡𐴥. 𐴃𐴟𐴣𐴀𐴝𐴥𐴣𐴃𐴧𐴟 𐴁𐴡𐴖𐴢 𐴕𐴝𐴥𐴘 𐴕𐴞𐴑𐴞؟ 𐴕𐴡 𐴃𐴝𐴥𐴑𐴞𐴓𐴠 𐴁𐴡𐴖𐴢 𐴕𐴡 𐴃𐴟𐴖𐴝𐴘𐴧𐴡𐴥.²⁸𐴔𐴡𐴕𐴃𐴡𐴌 𐴎𐴡𐴊𐴞 𐴁𐴞𐴘𐴝𐴥 𐴒𐴡𐴌𐴞𐴥𐴉𐴠𐴓𐴡, 𐴃𐴟𐴀𐴛 𐴒𐴟𐴕𐴝𐴤 𐴒𐴡𐴌𐴡𐴤𐴌 𐴊𐴠 𐴇𐴠𐴥𐴀𐴕 𐴕𐴡; 𐴀𐴝𐴦𐴌 𐴎𐴡𐴊𐴞 𐴇𐴡𐴕𐴡𐴤 𐴀𐴝𐴁𐴞𐴘𐴝𐴥𐴃𐴝 𐴔𐴝𐴘𐴝𐴉𐴟𐴖𐴝𐴘𐴠 𐴁𐴞𐴘𐴝𐴥 𐴒𐴡𐴌𐴞𐴥𐴉𐴠𐴓𐴠, 𐴇𐴞𐴥𐴁𐴝𐴘𐴠 𐴘𐴡𐴥 𐴒𐴟𐴕𐴝𐴤 𐴒𐴡𐴌𐴠𐴥𐴌 𐴊𐴠 𐴇𐴠𐴥𐴀𐴕 𐴕𐴡. 𐴔𐴡𐴕𐴃𐴡𐴌 𐴀𐴝𐴀𐴛 𐴏𐴝𐴀𐴙𐴌 𐴊𐴠 𐴃𐴟𐴣𐴀𐴝𐴥𐴌𐴝𐴌𐴠 𐴔𐴡𐴏𐴞𐴁𐴡𐴃𐴢 𐴀𐴡𐴥𐴑𐴧𐴡𐴓𐴡𐴃𐴧𐴟 𐴁𐴝𐴏𐴝𐴘 𐴁𐴡𐴓𐴧𐴝, 𐴎𐴞𐴀𐴕 𐴇𐴠𐴥𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴡𐴃𐴧𐴟 𐴀𐴠 𐴎𐴞𐴕𐴊𐴞𐴒𐴞𐴃𐴢 𐴃𐴝𐴥𐴑𐴞𐴁𐴡.

²⁹𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴀𐴝𐴀𐴛 𐴈𐴡𐴘𐴃𐴝𐴥𐴔 𐴏𐴝𐴀𐴙𐴌 𐴊𐴠 𐴑𐴞 𐴈𐴡𐴘𐴓𐴠𐴥, 𐴀𐴡𐴑𐴃𐴡𐴥 𐴀𐴠𐴁𐴧𐴠 𐴈𐴡𐴔; 𐴇𐴠𐴥𐴃𐴡𐴓𐴧𐴝 𐴎𐴠𐴃𐴝𐴌𐴝𐴤𐴃𐴧𐴟 𐴁𐴡𐴖𐴢 𐴀𐴝𐴏𐴠𐴤, 𐴀𐴞𐴥𐴃𐴝𐴌𐴝𐴃𐴧𐴟 𐴘𐴝𐴓𐴝 𐴓𐴡𐴥𐴃𐴞 𐴀𐴠𐴀𐴕𐴒𐴡𐴌𐴞 𐴏𐴡𐴓𐴝𐴌 𐴎𐴡𐴌𐴟𐴌 𐴎𐴠𐴀𐴕 𐴕𐴞𐴥𐴑𐴞 𐴀𐴞𐴥𐴃𐴝𐴌𐴝𐴃𐴧𐴟 𐴁𐴡𐴖𐴢 𐴕𐴝𐴥𐴘;³⁰𐴎𐴠𐴃𐴝𐴌𐴝𐴤 𐴈𐴝𐴣𐴊𐴝𐴈𐴝𐴍𐴞 𐴒𐴡𐴌𐴠𐴥𐴌 𐴀𐴞𐴥𐴃𐴝𐴌𐴝 𐴀𐴠𐴀𐴕 𐴀𐴡𐴥𐴑 𐴎𐴠𐴀𐴕 𐴕𐴞𐴥𐴑𐴞 𐴀𐴞𐴥𐴃𐴝𐴌𐴝 𐴈𐴝𐴣𐴊𐴝𐴈𐴝𐴍𐴞 𐴕𐴡 𐴒𐴡𐴌𐴠𐴥𐴌; 𐴎𐴠𐴃𐴝𐴌𐴝𐴤 𐴑𐴟𐴥𐴐𐴞 𐴒𐴡𐴌𐴠𐴥𐴌 𐴀𐴞𐴥𐴃𐴝𐴌𐴝 𐴀𐴠𐴀𐴕 𐴀𐴡𐴥𐴑 𐴎𐴠𐴀𐴕 𐴕𐴞𐴥𐴑𐴞 𐴀𐴞𐴥𐴃𐴝𐴌𐴝 𐴑𐴟𐴥𐴐𐴞 𐴕𐴡 𐴒𐴡𐴌𐴠𐴥𐴌; 𐴎𐴠𐴃𐴝𐴌𐴝𐴤 𐴑𐴠𐴏𐴧𐴟𐴥 𐴑𐴞𐴕𐴠𐴌 𐴀𐴞𐴥𐴃𐴝𐴌𐴝 𐴀𐴠𐴀𐴕 𐴀𐴡𐴥𐴑 𐴎𐴠𐴀𐴕 𐴕𐴞𐴥𐴑𐴞 𐴀𐴞𐴥𐴃𐴝𐴌𐴝𐴃𐴧𐴟 𐴑𐴠𐴏𐴧𐴟𐴥 𐴕𐴝𐴥𐴘;³¹𐴎𐴠𐴃𐴝𐴌𐴝𐴤 𐴊𐴟𐴕𐴞𐴘𐴝𐴘𐴁𐴞 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴢 𐴀𐴠𐴏𐴃𐴠𐴔𐴝𐴓𐴢 𐴒𐴡𐴌𐴠𐴥𐴌, 𐴀𐴞𐴥𐴃𐴝𐴌𐴝 𐴀𐴠𐴀𐴕 𐴀𐴡𐴥𐴑 𐴎𐴠𐴀𐴕 𐴕𐴞𐴥𐴑𐴞 𐴀𐴞𐴥𐴃𐴝𐴌𐴝 𐴇𐴞𐴥𐴀𐴕 𐴓𐴡𐴥𐴘 𐴁𐴞𐴌𐴝𐴕𐴝 𐴕𐴝𐴥𐴘. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴠 𐴊𐴟𐴕𐴞𐴘𐴝𐴙𐴌 𐴏𐴟𐴥𐴌𐴡𐴃𐴢 𐴃𐴡 𐴁𐴡𐴊𐴡𐴓𐴞𐴎𐴝𐴌𐴒𐴡𐴥𐴘.

³²𐴀𐴝𐴀𐴛 𐴏𐴝𐴀𐴘𐴢 𐴊𐴠, 𐴃𐴟𐴣𐴀𐴝𐴥𐴌𐴝 𐴏𐴞𐴕𐴃𐴝𐴁𐴝𐴥𐴉𐴝𐴕𐴞 𐴏𐴝𐴥𐴌𐴝 𐴃𐴝𐴥𐴑𐴡. 𐴀𐴝𐴁𐴞𐴘𐴝𐴥𐴃𐴝 𐴔𐴝𐴕𐴟𐴥𐴙𐴐𐴠 𐴔𐴝𐴓𐴞𐴑𐴡𐴌 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴡𐴌 𐴁𐴝𐴦𐴁𐴟𐴃𐴠 𐴁𐴠 𐴁𐴝𐴥𐴉𐴠, 𐴑𐴞 𐴈𐴡𐴘𐴓𐴠𐴥, 𐴕𐴞𐴎𐴠 𐴔𐴝𐴓𐴞𐴑𐴡𐴌𐴠 𐴑𐴠𐴀𐴕𐴒𐴡𐴌𐴞 𐴑𐴟𐴥𐴐𐴞 𐴒𐴡𐴌𐴞𐴥 𐴉𐴝𐴌𐴞𐴁𐴡𐴥.³³𐴔𐴡𐴕𐴃𐴡𐴌 𐴁𐴞𐴘𐴝𐴥𐴃𐴝 𐴔𐴝𐴕𐴟𐴥𐴙𐴐𐴠 𐴊𐴟𐴕𐴞𐴘𐴝𐴘𐴁𐴞 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴡𐴌 𐴁𐴝𐴦𐴁𐴟𐴃𐴠 𐴁𐴠 𐴁𐴝𐴥𐴉𐴠, 𐴑𐴞 𐴈𐴡𐴘𐴓𐴠𐴥, 𐴕𐴞𐴎𐴡𐴌 𐴁𐴡𐴖𐴢 𐴖𐴡𐴥𐴌𐴠 𐴑𐴠𐴀𐴕𐴒𐴡𐴌𐴞 𐴑𐴟𐴥𐴐𐴞 𐴒𐴡𐴌𐴞𐴥 𐴉𐴝𐴌𐴞𐴁𐴡𐴥;³⁴𐴀𐴞𐴥𐴃𐴝𐴌 𐴔𐴡𐴕 𐴊𐴟𐴘𐴈𐴝𐴍𐴝𐴃𐴢 𐴉𐴡𐴌𐴠. 𐴎𐴠 𐴔𐴝𐴘𐴝𐴉𐴟𐴖𐴝 𐴀𐴝𐴁𐴞𐴘𐴝𐴥𐴃𐴝 𐴘𐴝𐴥 𐴑𐴟𐴖𐴝𐴥𐴌𐴞, 𐴇𐴞𐴥𐴁𐴝𐴘𐴠 𐴔𐴝𐴓𐴞𐴑𐴡𐴌 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴡𐴌 𐴁𐴝𐴦𐴁𐴟𐴃𐴠 𐴁𐴠 𐴁𐴝𐴥𐴉𐴠, 𐴎𐴠𐴀𐴕𐴠 𐴇𐴞𐴥𐴁𐴝 𐴅𐴞𐴏𐴞𐴥𐴔𐴡𐴃𐴢 𐴀𐴠𐴊𐴧𐴠 𐴌𐴟𐴀𐴃𐴢 𐴂𐴝𐴑 𐴀𐴡𐴥𐴘 𐴉𐴝𐴌𐴠. 𐴔𐴡𐴕𐴃𐴡𐴌 𐴁𐴞𐴘𐴝𐴥𐴃𐴝 𐴔𐴝𐴘𐴝𐴉𐴟𐴖𐴝𐴘𐴠 𐴊𐴟𐴕𐴞𐴘𐴝𐴘𐴁𐴞 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴡𐴌 𐴁𐴝𐴦𐴁𐴟𐴃𐴠 𐴁𐴠 𐴁𐴝𐴥𐴉𐴠, 𐴑𐴞 𐴈𐴡𐴘𐴓𐴠𐴥, 𐴕𐴞𐴎𐴡𐴌 𐴇𐴡𐴥𐴐𐴡𐴔𐴡𐴌𐴠 𐴑𐴠𐴀𐴕𐴒𐴡𐴌𐴞 𐴑𐴟𐴥𐴐𐴞 𐴒𐴡𐴌𐴞𐴥 𐴉𐴝𐴌𐴞𐴁𐴡𐴥.³⁵𐴀𐴝𐴀𐴛 𐴇𐴞𐴥𐴀𐴕 𐴃𐴟𐴣𐴀𐴝𐴥𐴌𐴝𐴌 𐴉𐴝𐴥𐴘𐴊𐴝𐴓𐴧𐴝 𐴈𐴡𐴀𐴙𐴌 𐴊𐴠; 𐴃𐴟𐴣𐴀𐴝𐴥𐴌𐴝𐴌𐴠 𐴏𐴞𐴉𐴡𐴃𐴢 𐴌𐴝𐴑𐴞𐴥 𐴁𐴡𐴓𐴧𐴝 𐴈𐴡𐴀𐴙𐴌 𐴊𐴠 𐴕𐴡, 𐴁𐴡𐴥𐴓𐴑𐴠 𐴃𐴟𐴣𐴀𐴝𐴥𐴌𐴝 𐴎𐴠𐴕 𐴎𐴞𐴘𐴝𐴥𐴕 𐴏𐴡𐴥𐴘𐴧𐴞 𐴇𐴞𐴥𐴘𐴝𐴕 𐴒𐴡𐴌𐴡𐴤, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴀𐴠𐴑 𐴊𐴞𐴥𐴘𐴝𐴕𐴠 𐴔𐴝𐴓𐴞𐴑𐴡𐴌 𐴇𐴠𐴥𐴊𐴔𐴡𐴃𐴢 𐴒𐴡𐴌𐴡𐴤.

³⁶𐴔𐴡𐴕𐴃𐴡𐴌 𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴀𐴠𐴀𐴕 𐴄𐴝𐴥𐴀𐴌𐴠, 𐴀𐴞𐴥𐴃𐴠 𐴀𐴞𐴥𐴃𐴝𐴌 𐴎𐴟𐴌𐴝𐴒𐴝𐴃𐴝𐴤 𐴒𐴡𐴙𐴅𐴧𐴝𐴥 𐴔𐴝𐴘𐴝𐴉𐴟𐴖𐴝𐴌𐴠 𐴁𐴞𐴘𐴝𐴥 𐴒𐴡𐴌𐴞𐴥 𐴕𐴡 𐴉𐴠𐴓𐴠𐴌 𐴊𐴠 𐴇𐴞𐴥𐴘𐴝𐴕 𐴒𐴡𐴔 𐴕𐴡 𐴀𐴡𐴥𐴌, 𐴀𐴝𐴦𐴌 𐴎𐴡𐴊𐴞 𐴀𐴞𐴥𐴃𐴝𐴃𐴧𐴟 𐴁𐴞𐴘𐴝𐴥𐴌 𐴉𐴟𐴌𐴝𐴕𐴞 𐴁𐴞𐴐𐴞𐴤 𐴀𐴡𐴥𐴘 𐴇𐴞𐴥𐴁𐴝𐴌𐴠 𐴁𐴞𐴘𐴝𐴥 𐴒𐴡𐴌𐴞𐴥𐴉𐴠𐴓𐴝𐴌 𐴎𐴡𐴌𐴟𐴌 𐴊𐴠 𐴁𐴝𐴥𐴉𐴠, 𐴃𐴡𐴥𐴀𐴘𐴓𐴠 𐴀𐴞𐴥𐴃𐴠 𐴕𐴞𐴎𐴡𐴌 𐴀𐴠𐴌𐴝𐴊𐴝 𐴉𐴟𐴌𐴝 𐴒𐴡𐴌𐴡𐴥𐴗𐴑, 𐴇𐴞𐴥𐴘𐴝𐴕 𐴒𐴟𐴕𐴝𐴤 𐴕𐴡; 𐴀𐴞𐴥𐴃𐴝𐴌𐴝 𐴁𐴞𐴘𐴝𐴥 𐴒𐴡𐴌𐴞𐴥𐴉𐴠𐴓𐴡𐴗𐴑.³⁷𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴑𐴟𐴖𐴝𐴥𐴌𐴞 𐴔𐴝𐴘𐴝𐴉𐴟𐴖𐴝𐴌𐴠 𐴀𐴠𐴃𐴧𐴝𐴌 𐴁𐴞𐴘𐴝𐴥 𐴕𐴡 𐴒𐴡𐴌𐴞𐴥 𐴁𐴡𐴓𐴧𐴝 𐴕𐴞𐴎𐴡𐴌 𐴊𐴞𐴓𐴠-𐴊𐴞𐴓𐴠 𐴔𐴡𐴎𐴁𐴟𐴃𐴢 𐴉𐴝𐴥𐴘𐴏𐴠𐴓𐴝 𐴒𐴡𐴌𐴞𐴥𐴉𐴠𐴓𐴝𐴘𐴧𐴠 𐴀𐴝𐴦𐴌 𐴇𐴡𐴕𐴡𐴤 𐴔𐴡𐴅𐴁𐴟𐴌𐴞 𐴕𐴝𐴥𐴘, 𐴁𐴡𐴥𐴓𐴑𐴠 𐴕𐴞𐴎𐴡𐴌 𐴔𐴡𐴕𐴐𐴝𐴥𐴌𐴠 𐴉𐴟𐴌𐴝𐴉𐴟𐴌𐴞 𐴏𐴡𐴥𐴣𐴓𐴞 𐴉𐴝𐴌𐴠, 𐴀𐴞𐴥𐴃𐴠 𐴘𐴡𐴥 𐴒𐴡𐴔 𐴒𐴡𐴌𐴠𐴥.³⁸𐴇𐴠𐴥𐴃𐴡𐴓𐴧𐴝, 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴎𐴟𐴌𐴝𐴒𐴝𐴃𐴝𐴤 𐴒𐴡𐴙𐴅𐴧𐴝𐴥 𐴔𐴝𐴘𐴝𐴉𐴟𐴖𐴝𐴌𐴠 𐴁𐴞𐴘𐴝𐴥 𐴒𐴡𐴌𐴞𐴥𐴉𐴠𐴓𐴠 𐴀𐴞𐴥𐴃𐴠 𐴒𐴡𐴔 𐴒𐴡𐴌𐴠𐴥, 𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴁𐴞𐴘𐴝𐴥 𐴒𐴡𐴌𐴞𐴥 𐴕𐴡 𐴉𐴠𐴓𐴠 𐴀𐴞𐴥𐴃𐴠 𐴀𐴝𐴌𐴡𐴤 𐴒𐴡𐴔 𐴒𐴡𐴌𐴠𐴥.

³⁹𐴇𐴡𐴥𐴐𐴡𐴔 𐴎𐴠𐴃𐴡𐴥𐴊𐴞𐴕 𐴎𐴞𐴕𐴊𐴝 𐴀𐴝𐴏𐴠𐴤, 𐴁𐴡𐴖𐴢 𐴇𐴡𐴥𐴐𐴡𐴔 𐴓𐴡𐴥𐴘 𐴇𐴠𐴥𐴃𐴡𐴊𐴞𐴕 𐴁𐴠 𐴁𐴝𐴙𐴕𐴊𐴝𐴤 𐴃𐴝𐴥𐴑𐴠; 𐴔𐴡𐴕𐴃𐴡𐴌 𐴎𐴡𐴊𐴞 𐴇𐴡𐴥𐴐𐴡𐴔 𐴔𐴡𐴌𐴞𐴎𐴝𐴒𐴡𐴥𐴘, 𐴇𐴞𐴥𐴁𐴝𐴃𐴧𐴟 𐴎𐴝𐴌𐴠𐴥 𐴔𐴡𐴕𐴠𐴈𐴡𐴀 𐴃𐴝𐴌𐴠𐴥 𐴁𐴞𐴘𐴝𐴥 𐴒𐴡𐴌𐴞𐴥𐴁𐴝𐴌 𐴀𐴝𐴎𐴝𐴊𐴞 𐴀𐴝𐴏𐴠𐴤, 𐴓𐴠𐴑𐴞𐴕 𐴔𐴝𐴕𐴟𐴥𐴙𐴐𐴧𐴗𐴝 𐴔𐴝𐴓𐴞𐴑𐴡𐴌 𐴃𐴡𐴌𐴞𐴑𐴝𐴌 𐴀𐴡𐴥𐴖𐴝 𐴉𐴡𐴌𐴞𐴁𐴡𐴥.⁴⁰𐴀𐴝𐴣𐴀𐴌 𐴌𐴝𐴘 𐴔𐴡𐴎𐴞𐴕، 𐴇𐴞𐴥𐴁𐴝 𐴎𐴡𐴊𐴞 𐴇𐴠𐴥𐴊𐴧𐴟𐴌𐴡𐴃𐴢 𐴃𐴝𐴥𐴘𐴎𐴝𐴒𐴡𐴘, 𐴇𐴞𐴥𐴁𐴝 𐴀𐴝𐴌𐴡𐴤 𐴑𐴟𐴥𐴐𐴞𐴃𐴢 𐴃𐴝𐴥𐴑𐴞𐴁𐴡. 𐴀𐴝𐴀𐴛 𐴄𐴝𐴥𐴀𐴌𐴞𐴌 𐴊𐴠, 𐴀𐴝𐴀𐴛 𐴇𐴞𐴥𐴀𐴕 𐴀𐴝𐴓𐴧𐴝𐴌 𐴌𐴟𐴀𐴌 𐴇𐴠𐴥𐴊𐴝𐴘𐴧𐴡𐴃𐴠 𐴈𐴡𐴀𐴙𐴌.

The Word for the World International

https://app.library.bible/content/87faca8b51c22590