Read 1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢 6

1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢6

𐴒𐴝𐴙𐴌𐴀𐴞𐴔𐴝𐴕𐴊𐴝𐴥𐴌𐴡𐴌 𐴇𐴝𐴣𐴏𐴠 𐴁𐴞𐴏𐴝𐴌 𐴏𐴝𐴘𐴃𐴡𐴥 𐴎𐴝𐴦𐴌 𐴁𐴝𐴦𐴁𐴟𐴃𐴠

¹𐴃𐴟𐴣𐴀𐴝𐴥𐴌𐴝 𐴇𐴡𐴕𐴡𐴤𐴑𐴞𐴘𐴡𐴃𐴧𐴟 𐴇𐴡𐴕𐴡𐴤 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘 𐴓𐴡𐴥𐴘 𐴇𐴡𐴙𐴅𐴧𐴝 𐴃𐴝𐴥𐴑𐴞𐴓𐴠, 𐴇𐴡𐴕 𐴇𐴞𐴥𐴔𐴧𐴡𐴃𐴠 𐴀𐴝𐴓𐴧𐴝𐴌 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴁𐴞𐴏𐴝𐴌 𐴏𐴝𐴘𐴃𐴡𐴥 𐴕𐴡 𐴎𐴝𐴘 𐴁𐴠𐴊𐴞𐴕𐴞 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴏𐴝𐴘𐴃𐴡𐴥 𐴎𐴡𐴦؟²𐴃𐴟𐴣𐴀𐴝𐴥𐴌𐴝 𐴕𐴡 𐴎𐴝𐴕𐴡 𐴕𐴠𐴥, 𐴀𐴝𐴓𐴧𐴝𐴌 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴠 𐴊𐴟𐴕𐴞𐴘𐴝𐴙𐴌 𐴁𐴞𐴏𐴝𐴌 𐴒𐴡𐴌𐴞𐴥𐴁𐴡 𐴊𐴠𐴥؟ 𐴃𐴟𐴣𐴀𐴝𐴥𐴌𐴝 𐴎𐴠𐴃𐴧𐴡𐴥𐴃𐴢 𐴊𐴟𐴕𐴞𐴘𐴝𐴙𐴌 𐴁𐴞𐴏𐴝𐴌 𐴒𐴡𐴌𐴞𐴥𐴁𐴝, 𐴃𐴡𐴥𐴘 𐴃𐴟𐴣𐴀𐴝𐴥𐴌𐴝 𐴐𐴡𐴥𐴣𐴍𐴡-𐴐𐴡𐴥𐴣𐴍𐴡 𐴇𐴡𐴙𐴅𐴧𐴝 𐴀𐴡𐴥𐴑𐴧𐴡𐴓𐴡𐴌 𐴁𐴞𐴏𐴝𐴌 𐴒𐴡𐴌𐴞𐴥𐴁𐴝𐴌 𐴑𐴝𐴦𐴁𐴠𐴓𐴢 𐴕𐴡 𐴕𐴠𐴥؟³𐴃𐴟𐴣𐴀𐴝𐴥𐴌𐴝 𐴕𐴡 𐴎𐴝𐴕𐴡 𐴕𐴠𐴥, 𐴀𐴝𐴣𐴀𐴌𐴝 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴡𐴌 𐴁𐴞𐴏𐴝𐴌 𐴒𐴡𐴙𐴅𐴧𐴟𐴥𐴔 𐴊𐴠𐴥؟ 𐴇𐴠𐴥𐴀𐴕 𐴀𐴡𐴥𐴘𐴓𐴠 𐴀𐴠 𐴊𐴟𐴕𐴞𐴘𐴝𐴙𐴌 𐴒𐴟𐴥𐴕 𐴒𐴡𐴙𐴃𐴧𐴠𐴤 𐴑𐴞𐴦؟⁴𐴇𐴠𐴥𐴃𐴡𐴓𐴧𐴝, 𐴃𐴟𐴣𐴀𐴝𐴥𐴌𐴝𐴃𐴧𐴟 𐴇𐴠𐴥𐴕𐴊𐴞𐴓𐴧𐴝 𐴔𐴝𐴦𐴔𐴠𐴓𐴝 𐴃𐴝𐴥𐴑𐴞𐴓𐴠, 𐴎𐴡𐴔𐴝𐴥𐴃𐴡𐴌 𐴁𐴝𐴀𐴌𐴒𐴗𐴝 𐴔𐴝𐴙𐴕𐴐𐴡𐴥𐴌𐴠 𐴑𐴞𐴘𐴝𐴥 𐴁𐴞𐴏𐴝𐴌𐴇𐴝𐴌 𐴃𐴞𐴥𐴘𐴝𐴒𐴝𐴌𐴡؟⁵𐴀𐴝𐴀𐴛 𐴀𐴞𐴀𐴕 𐴃𐴟𐴣𐴀𐴝𐴥𐴌𐴝𐴌𐴠 𐴐𐴡𐴥𐴌𐴡𐴔 𐴊𐴞𐴥 𐴁𐴡𐴓𐴧𐴝 𐴈𐴡𐴀𐴙𐴌 𐴊𐴠. 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴀𐴠𐴕𐴊𐴞𐴓𐴧𐴝 𐴇𐴡𐴕𐴡𐴤 𐴒𐴞𐴘𐴝𐴕𐴞 𐴔𐴝𐴕𐴟𐴥𐴙𐴐𐴢 𐴕𐴝𐴥𐴘 𐴕𐴞𐴥𐴑𐴞, 𐴎𐴠𐴦𐴕𐴞𐴑𐴞 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴧𐴝𐴙𐴕 𐴊𐴡𐴌 𐴔𐴝𐴦𐴔𐴠𐴓𐴝𐴌 𐴁𐴞𐴏𐴝𐴌 𐴒𐴡𐴌𐴞𐴥𐴁𐴝𐴌 𐴑𐴝𐴦𐴁𐴠𐴓؟⁶𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴃𐴡 𐴀𐴠𐴑 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴡𐴌 𐴀𐴟𐴓𐴋𐴝 𐴀𐴝𐴌𐴀𐴠𐴑 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴧𐴠 𐴁𐴞𐴏𐴝𐴌𐴡𐴃𐴢 𐴎𐴡𐴦, 𐴀𐴝𐴦𐴌 𐴇𐴞𐴥𐴘𐴝𐴕 𐴀𐴡𐴥 𐴒𐴝𐴙𐴌𐴀𐴞𐴔𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴡𐴌 𐴔𐴟𐴀𐴕𐴃𐴟!

⁷𐴀𐴝𐴏𐴡𐴥𐴓𐴠 𐴃𐴟𐴣𐴀𐴝𐴥𐴌𐴝 𐴀𐴠𐴎𐴧𐴡𐴕𐴡𐴌 𐴀𐴟𐴓𐴋𐴝 𐴀𐴠𐴎𐴧𐴡𐴕𐴠 𐴔𐴡𐴦𐴊𐴧𐴞𐴔𐴝 𐴒𐴡𐴌𐴡𐴤 𐴊𐴠 𐴇𐴞𐴥𐴘𐴝𐴕𐴠 𐴊𐴝𐴈𐴝𐴤 𐴊𐴠, 𐴃𐴟𐴣𐴀𐴝𐴥𐴌𐴝 𐴀𐴠𐴁𐴧𐴠𐴌𐴠 𐴇𐴡𐴥𐴣𐴍𐴞 𐴒𐴞𐴥𐴘𐴡𐴒𐴡𐴘. 𐴘𐴝𐴥𐴌 𐴃𐴟𐴥𐴖𐴝𐴌𐴡 𐴕𐴝𐴀𐴞𐴕𐴏𐴝𐴥𐴉𐴞 𐴑𐴞𐴘𐴝𐴥 𐴁𐴡𐴌𐴊𐴝𐴐𐴢 𐴕𐴡 𐴒𐴡𐴌𐴡𐴤؟ 𐴕𐴞𐴎𐴡𐴌𐴠𐴥 𐴁𐴠𐴘𐴔𐴝𐴕𐴞 𐴒𐴡𐴙𐴃𐴧𐴡𐴥 𐴑𐴞𐴘𐴝𐴥 𐴕𐴡 𐴊𐴡؟⁸𐴇𐴝𐴥𐴓𐴠𐴑𐴠 𐴃𐴟𐴣𐴀𐴝𐴥𐴌𐴝 𐴕𐴞𐴎𐴠 𐴘𐴡𐴥 𐴃𐴡 𐴕𐴝𐴀𐴞𐴕𐴏𐴝𐴥𐴉𐴞 𐴒𐴡𐴌𐴡𐴤, 𐴀𐴝𐴦𐴌 𐴁𐴠𐴘𐴔𐴝𐴕𐴞 𐴒𐴡𐴌𐴡𐴤, 𐴇𐴠𐴥𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴊𐴡𐴌𐴠 𐴀𐴟𐴥𐴊𐴧𐴗𐴝 𐴒𐴡𐴌𐴡𐴤.

⁹𐴃𐴟𐴣𐴀𐴝𐴥𐴌𐴝 𐴕𐴡 𐴎𐴝𐴕𐴡 𐴕𐴠𐴥, 𐴑𐴟𐴈𐴝𐴔-𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴠 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴔𐴞𐴌𐴝𐴏𐴢 𐴕𐴡 𐴉𐴝𐴘𐴁𐴡 𐴊𐴠𐴥؟ 𐴕𐴞𐴎𐴡𐴌𐴠𐴥 𐴉𐴝𐴥𐴑𐴞 𐴕𐴡 𐴊𐴞𐴘𐴡; 𐴁𐴡𐴊𐴔𐴝𐴐𐴢, 𐴔𐴟𐴃𐴧𐴞-𐴉𐴟𐴣𐴎𐴡𐴘𐴝, 𐴎𐴠𐴕𐴝𐴤𐴑𐴟𐴌, 𐴔𐴡𐴌𐴡𐴃𐴠-𐴔𐴡𐴌𐴡𐴃𐴠 𐴎𐴠𐴕𐴝𐴤-𐴒𐴡𐴌𐴡𐴤𐴘𐴝,¹⁰𐴏𐴟𐴌, 𐴓𐴝𐴓𐴡𐴥𐴏𐴁𐴡𐴕, 𐴕𐴞𐴐𐴝𐴥𐴑𐴟𐴌, 𐴁𐴡𐴊𐴕𐴝𐴔-𐴒𐴡𐴌𐴡𐴤𐴘𐴝, 𐴄𐴞𐴛𐴝𐴔𐴝𐴌𐴟, 𐴀𐴞𐴥𐴃𐴝𐴌𐴝 𐴇𐴡𐴕𐴡𐴤𐴑𐴞𐴘𐴠 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴔𐴞𐴌𐴝𐴏𐴢 𐴕𐴡 𐴉𐴝𐴘𐴁𐴡.¹¹𐴃𐴟𐴣𐴀𐴝𐴥𐴌𐴝 𐴇𐴡𐴊𐴟𐴥𐴕 𐴀𐴡𐴥 𐴇𐴠𐴥𐴕𐴊𐴞𐴓𐴧𐴝 𐴀𐴝𐴐𐴧𐴞𐴥𐴓𐴝, 𐴔𐴡𐴕𐴃𐴡𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴕𐴝𐴔𐴠 𐴀𐴠𐴊𐴧𐴠 𐴀𐴝𐴣𐴀𐴌𐴝𐴌 𐴀𐴝𐴓𐴧𐴝𐴌 𐴌𐴟𐴀𐴌 𐴊𐴟𐴖𐴝𐴌𐴝 𐴃𐴟𐴣𐴀𐴝𐴥𐴌𐴝𐴌𐴠 𐴊𐴟𐴥𐴘𐴉𐴠𐴓𐴝 𐴒𐴞𐴥𐴘𐴠, 𐴂𐴝𐴑-𐴏𐴝𐴥𐴉𐴢 𐴒𐴡𐴌𐴝𐴥 𐴒𐴞𐴥𐴘𐴠, 𐴀𐴠𐴊𐴧𐴠 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴑𐴡𐴁𐴟𐴓𐴢 𐴒𐴡𐴌𐴝𐴥 𐴒𐴞𐴥𐴘𐴠.

𐴅𐴞𐴏𐴞𐴥𐴔 𐴓𐴡𐴥𐴘 𐴀𐴝𐴓𐴧𐴝𐴌 𐴑𐴟𐴊𐴟𐴌𐴟𐴃𐴢 𐴎𐴝𐴇𐴠𐴥𐴌 𐴒𐴡𐴌𐴡𐴤

¹²𐴇𐴡𐴕𐴡𐴤𐴑𐴞𐴘𐴠 𐴀𐴠𐴕𐴊𐴞𐴓𐴧𐴝 𐴈𐴡𐴘𐴁𐴝𐴤 𐴊𐴠 𐴃𐴝𐴥𐴑𐴞𐴃𐴡 𐴉𐴝𐴌𐴠, ”𐴀𐴝𐴣𐴀𐴌 𐴓𐴧𐴝 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴎𐴝𐴘𐴠𐴏𐴢,“ 𐴄𐴞𐴥𐴑 𐴈𐴡𐴃𐴝𐴤, 𐴔𐴡𐴕𐴃𐴡𐴌 𐴇𐴝𐴥𐴀𐴌 𐴑𐴠𐴏𐴧𐴟𐴥𐴘𐴠 𐴔𐴝𐴕𐴟𐴥𐴙𐴐𐴡𐴌𐴠 𐴉𐴝𐴥𐴘𐴊𐴝 𐴕𐴡 𐴒𐴡𐴌𐴠𐴥. 𐴀𐴝𐴀𐴛 𐴘𐴡𐴥 𐴈𐴡𐴀𐴘𐴢 𐴉𐴝𐴙𐴅𐴧𐴟𐴔, ”𐴀𐴝𐴣𐴀𐴌 𐴓𐴧𐴝 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴎𐴝𐴘𐴠𐴏𐴢,“ 𐴔𐴡𐴕𐴃𐴡𐴌 𐴀𐴝𐴀𐴛 𐴇𐴡𐴕𐴡𐴤 𐴑𐴠𐴏𐴧𐴟𐴥𐴌𐴠 𐴀𐴝𐴣𐴀𐴌 𐴖𐴡𐴌𐴠 𐴇𐴡𐴥𐴑𐴟𐴔𐴡𐴃𐴢 𐴒𐴡𐴙𐴃𐴧𐴡𐴥 𐴕𐴡 𐴊𐴞𐴘𐴟𐴔.¹³𐴇𐴡𐴕𐴡𐴤𐴑𐴞𐴘𐴠 𐴀𐴠𐴕𐴊𐴞𐴓𐴧𐴝 𐴘𐴡𐴥 𐴈𐴡𐴘𐴁𐴝𐴤 𐴊𐴠 𐴃𐴝𐴥𐴑𐴞𐴃𐴡 𐴉𐴝𐴌𐴠, ”𐴈𐴝𐴥𐴕𐴝 𐴉𐴠𐴄𐴢 𐴀𐴡𐴓𐴧𐴝, 𐴀𐴝𐴦𐴌 𐴉𐴠𐴄𐴢 𐴈𐴝𐴥𐴕𐴝𐴓𐴧𐴝,“ 𐴄𐴞𐴥𐴑 𐴈𐴡𐴃𐴝𐴤, 𐴔𐴡𐴕𐴃𐴡𐴌 𐴀𐴝𐴓𐴧𐴝𐴘𐴠 𐴃𐴡 𐴊𐴟𐴕𐴞𐴥𐴘𐴝𐴕 𐴊𐴡𐴥𐴚𐴐𐴡 𐴒𐴡𐴌𐴞𐴥𐴉𐴠𐴓𐴝𐴘𐴁𐴡. 𐴔𐴡𐴕𐴡𐴃𐴢 𐴌𐴝𐴙𐴑𐴧𐴡𐴥, 𐴅𐴞𐴏𐴞𐴥𐴔 𐴎𐴠𐴕𐴝𐴤 𐴓𐴧𐴝 𐴕𐴡 𐴁𐴡𐴥𐴓𐴑𐴠 𐴔𐴝𐴓𐴞𐴑 𐴀𐴡𐴓𐴧𐴝, 𐴀𐴝𐴦𐴌 𐴔𐴝𐴓𐴞𐴑 𐴀𐴡𐴥𐴙𐴓𐴊𐴠 𐴅𐴞𐴏𐴞𐴥𐴔 𐴀𐴡𐴓𐴧𐴝.¹⁴𐴀𐴝𐴓𐴧𐴝𐴘𐴠 𐴃𐴡 𐴕𐴞𐴎𐴡𐴌 𐴑𐴟𐴊𐴟𐴌𐴟𐴃𐴠 𐴔𐴝𐴓𐴞𐴑𐴡𐴌𐴠 𐴎𐴞𐴕𐴊𐴝 𐴒𐴡𐴙𐴅𐴧𐴠𐴥, 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴇𐴠𐴥 𐴑𐴟𐴊𐴟𐴌𐴟𐴃𐴠 𐴀𐴝𐴣𐴀𐴌𐴝𐴌𐴠 𐴘𐴡𐴥 𐴎𐴞𐴕𐴊𐴝 𐴒𐴡𐴌𐴞𐴥𐴁𐴡.¹⁵𐴃𐴟𐴣𐴀𐴝𐴥𐴌𐴝 𐴕𐴡 𐴎𐴝𐴕𐴡 𐴕𐴠𐴥, 𐴃𐴟𐴣𐴀𐴝𐴥𐴌𐴝𐴌 𐴅𐴞𐴏𐴞𐴥𐴔 𐴀𐴡𐴥𐴙𐴓𐴊𐴠 𐴔𐴡𐴀𐴏𐴞𐴤𐴌 𐴅𐴞𐴏𐴞𐴥𐴔𐴡𐴌 𐴇𐴞𐴥𐴏𐴧𐴝 𐴀𐴡𐴥𐴑𐴧𐴡𐴓𐴢 𐴊𐴠𐴥؟ 𐴃𐴡𐴥𐴘 𐴀𐴝𐴀𐴛 𐴑𐴞𐴥 𐴔𐴡𐴀𐴏𐴞𐴤𐴌 𐴅𐴞𐴏𐴞𐴥𐴔𐴡𐴌 𐴇𐴞𐴥𐴏𐴧𐴝 𐴓𐴡𐴘𐴉𐴠𐴥𐴓𐴝𐴘 𐴇𐴞𐴥𐴀𐴕𐴡𐴌𐴠 𐴇𐴡𐴕𐴡𐴤 𐴔𐴝𐴒𐴞𐴌 𐴅𐴞𐴏𐴞𐴥𐴔𐴡𐴌 𐴇𐴞𐴥𐴏𐴧𐴝 𐴁𐴝𐴕𐴝𐴘𐴧𐴟𐴥𐴔؟ 𐴁𐴞𐴓𐴑𐴟𐴥𐴓𐴢 𐴕𐴡.¹⁶𐴀𐴝𐴦𐴌 𐴕𐴝𐴥𐴑𐴞 𐴃𐴟𐴣𐴀𐴝𐴥𐴌𐴝 𐴘𐴝𐴀𐴕 𐴕𐴡 𐴎𐴝𐴕𐴡, 𐴑𐴞 𐴈𐴡𐴘𐴓𐴠𐴥, 𐴎𐴠𐴦𐴕𐴞𐴑𐴞 𐴇𐴡𐴕𐴡𐴤 𐴔𐴝𐴒𐴞 𐴓𐴧𐴡𐴘 𐴔𐴞𐴓𐴔𐴞𐴓𐴝𐴁𐴢 𐴒𐴡𐴌𐴠𐴥 𐴀𐴞𐴥𐴃𐴝𐴌 𐴅𐴞𐴏𐴞𐴥𐴔 𐴇𐴞𐴥𐴁𐴝 𐴓𐴧𐴡𐴥𐴘 𐴀𐴠𐴑 𐴒𐴝𐴦 𐴀𐴡𐴥𐴘𐴎𐴝𐴒𐴡𐴘 𐴊𐴠𐴥؟ 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ”𐴀𐴞𐴥𐴃𐴝𐴌𐴝 𐴊𐴟𐴕𐴞𐴥 𐴎𐴡𐴕 𐴀𐴠𐴑 𐴅𐴞𐴏𐴞𐴥𐴔 𐴀𐴡𐴥𐴘𐴎𐴝𐴘𐴁𐴡𐴘.“ ¹⁷𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴔𐴝𐴓𐴞𐴑 𐴓𐴡𐴘 𐴀𐴠𐴑 𐴀𐴡𐴥, 𐴀𐴞𐴥𐴃𐴠 𐴀𐴞𐴥𐴁𐴝 𐴓𐴧𐴡𐴥𐴘 𐴀𐴠𐴑 𐴌𐴟𐴀 𐴀𐴡𐴥𐴘𐴎𐴝𐴒𐴡𐴘.

¹⁸𐴎𐴠𐴕𐴝𐴤𐴑𐴝𐴌𐴞𐴃𐴧𐴟 𐴊𐴝𐴥𐴘𐴎𐴡𐴒𐴡𐴘. 𐴔𐴝𐴕𐴟𐴥𐴙𐴐𐴠 𐴀𐴝𐴌 𐴁𐴝𐴊𐴁𐴝𐴑𐴞 𐴎𐴠 𐴒𐴟𐴕𐴝𐴤 𐴀𐴡𐴥𐴑𐴧𐴡𐴓𐴢 𐴒𐴡𐴌𐴠𐴥 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴅𐴞𐴏𐴞𐴥𐴔𐴡𐴌 𐴁𐴝𐴀𐴌𐴠 𐴒𐴡𐴌𐴠𐴥 𐴊𐴠, 𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴎𐴠𐴕𐴝𐴤 𐴒𐴡𐴌𐴠𐴥 𐴀𐴞𐴥𐴃𐴠 𐴕𐴞𐴎𐴡𐴌 𐴅𐴞𐴏𐴞𐴥𐴔𐴡𐴌 𐴀𐴟𐴓𐴋𐴝 𐴒𐴟𐴕𐴝𐴤 𐴒𐴡𐴌𐴠𐴥 𐴊𐴠.¹⁹𐴃𐴟𐴣𐴀𐴝𐴥𐴌𐴝 𐴕𐴡 𐴎𐴝𐴕𐴡 𐴕𐴠𐴥, 𐴃𐴟𐴣𐴀𐴝𐴥𐴌𐴝𐴌 𐴅𐴞𐴏𐴞𐴥𐴔 𐴂𐴝𐴑-𐴌𐴟𐴀 𐴃𐴝𐴥𐴑𐴞𐴁𐴝𐴌 𐴒𐴡𐴥𐴌 𐴊𐴠, 𐴎𐴞𐴁𐴝𐴤 𐴃𐴟𐴣𐴀𐴝𐴥𐴌𐴝𐴌 𐴑𐴡𐴓𐴧𐴡𐴥𐴉𐴡𐴃𐴢 𐴀𐴝𐴏𐴠𐴤, 𐴎𐴞𐴁𐴝𐴤𐴌𐴠 𐴃𐴟𐴣𐴀𐴝𐴥𐴌𐴝 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴉𐴝𐴘𐴧𐴡𐴥؟ 𐴃𐴟𐴣𐴀𐴝𐴥𐴌𐴝 𐴃𐴟𐴣𐴀𐴝𐴥𐴌𐴝𐴌 𐴕𐴞𐴎𐴡𐴌 𐴕𐴡,²⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴌𐴠 𐴊𐴝𐴔 𐴊𐴞𐴦 𐴑𐴞𐴕𐴝 𐴒𐴞𐴘𐴠𐴥, 𐴇𐴠𐴥𐴃𐴡𐴓𐴧𐴝 𐴕𐴞𐴎𐴡𐴌 𐴅𐴞𐴏𐴞𐴥𐴔 𐴓𐴡𐴥𐴘 𐴀𐴝𐴓𐴧𐴝𐴌 𐴔𐴡𐴈𐴞𐴥𐴔𐴝 𐴎𐴝𐴇𐴠𐴥𐴌 𐴒𐴡𐴌𐴡𐴤.

The Word for the World International

https://app.library.bible/content/87faca8b51c22590