Read 1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢 8

1-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢8

𐴔𐴟𐴃𐴧𐴞𐴌 𐴇𐴝𐴣𐴏𐴠 𐴑𐴟𐴌𐴁𐴝𐴕𐴞 𐴊𐴞𐴘𐴝 𐴈𐴝𐴥𐴕𐴝

¹𐴘𐴝𐴓𐴝 𐴔𐴟𐴃𐴧𐴞𐴌 𐴇𐴝𐴣𐴏𐴠 𐴑𐴟𐴌𐴁𐴝𐴕𐴞 𐴊𐴞𐴘𐴝 𐴈𐴝𐴥𐴕𐴝 𐴀𐴡𐴥𐴑𐴧𐴡𐴓𐴡𐴌 𐴁𐴝𐴦𐴁𐴟𐴃𐴠 𐴈𐴡𐴘𐴃𐴡𐴤 𐴏𐴝𐴘𐴓𐴠𐴥: 𐴀𐴝𐴣𐴀𐴌𐴝 𐴃𐴡 𐴎𐴝𐴕𐴞, 𐴀𐴡𐴥𐴘, 𐴀𐴝𐴣𐴀𐴌𐴝 𐴁𐴠𐴒𐴧𐴟𐴥𐴕𐴡𐴃𐴧𐴟 𐴎𐴝𐴕𐴑𐴝𐴌𐴞 𐴀𐴝𐴏𐴠𐴤. 𐴎𐴝𐴕𐴑𐴝𐴌𐴞𐴘𐴠 𐴃𐴡 𐴉𐴡𐴇𐴡𐴥𐴌𐴝𐴘 𐴁𐴝𐴌𐴠𐴥, 𐴔𐴡𐴕𐴃𐴡𐴌 𐴔𐴟𐴇𐴝𐴥𐴁𐴧𐴡𐴃𐴠 𐴃𐴡𐴌𐴑𐴞 𐴀𐴝𐴕𐴠𐴤.²𐴎𐴠𐴦𐴕𐴞𐴑𐴞 𐴕𐴞𐴎𐴡𐴃𐴧𐴟 𐴑𐴠𐴏𐴧𐴟𐴥𐴌 𐴎𐴝𐴕𐴑𐴝𐴌𐴞 𐴀𐴝𐴏𐴠𐴤 𐴁𐴡𐴥𐴓𐴞 𐴄𐴝𐴥𐴀𐴌𐴠, 𐴀𐴞𐴥𐴃𐴝𐴃𐴧𐴟 𐴀𐴝𐴙𐴅𐴧𐴡𐴤 𐴀𐴡𐴊𐴧𐴟𐴥𐴌 𐴎𐴝𐴕𐴑𐴝𐴌𐴞 𐴕𐴝𐴥𐴘 𐴎𐴠𐴊𐴧𐴟𐴥𐴌 𐴀𐴞𐴥𐴃𐴝𐴃𐴧𐴟 𐴃𐴝𐴥𐴑𐴝 𐴉𐴡𐴙𐴃𐴧𐴡.³𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴀𐴝𐴓𐴧𐴝𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥, 𐴀𐴞𐴥𐴃𐴝𐴌𐴠 𐴃𐴡 𐴀𐴞𐴥𐴁𐴝𐴘𐴠 𐴏𐴞𐴕𐴠𐴥.

⁴𐴇𐴠𐴥𐴃𐴡𐴓𐴧𐴝 𐴔𐴟𐴃𐴧𐴞𐴌 𐴇𐴝𐴣𐴏𐴠 𐴑𐴟𐴌𐴁𐴝𐴕𐴞 𐴊𐴞𐴘𐴝 𐴈𐴝𐴥𐴕𐴝 𐴀𐴡𐴥𐴑𐴧𐴡𐴓𐴢 𐴇𐴝𐴥𐴀𐴌 𐴁𐴝𐴦𐴁𐴟𐴃𐴠 𐴈𐴡𐴘𐴃𐴡𐴤 𐴏𐴝𐴘𐴓𐴠𐴥: 𐴀𐴝𐴣𐴀𐴌𐴝 𐴎𐴝𐴕𐴞, 𐴔𐴟𐴃𐴧𐴞 𐴃𐴡 𐴊𐴟𐴕𐴞𐴘𐴝𐴙𐴃𐴢 𐴔𐴝𐴎𐴠𐴥 𐴀𐴝𐴏𐴡𐴥𐴓𐴠 𐴑𐴠𐴏𐴧𐴟𐴥 𐴕𐴡, 𐴀𐴝𐴦𐴌 𐴀𐴝𐴓𐴧𐴝 𐴀𐴠𐴑𐴒𐴗𐴝𐴥 𐴁𐴝𐴊𐴠 𐴀𐴝𐴌 𐴕𐴝𐴥𐴘.⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴡𐴊𐴞 𐴊𐴠𐴁𐴡𐴃𐴝 𐴈𐴡𐴀 𐴊𐴠 𐴇𐴞𐴥𐴀𐴕 𐴀𐴝𐴏𐴔𐴝𐴕𐴡𐴃𐴢 𐴘𐴝𐴥 𐴊𐴟𐴕𐴞𐴘𐴝𐴙𐴃𐴢 𐴃𐴝𐴥𐴑𐴞𐴓𐴠 𐴘𐴡, 𐴁𐴠𐴐𐴡𐴥𐴑 𐴊𐴠𐴁𐴡𐴃𐴝 𐴈𐴡𐴀 𐴊𐴠 𐴘𐴡𐴥 𐴁𐴞𐴐𐴞𐴤 𐴀𐴝𐴏𐴠𐴤, 𐴑𐴟𐴥𐴊𐴝 𐴈𐴡𐴀 𐴊𐴠 𐴘𐴡𐴥 𐴁𐴞𐴐𐴞𐴤 𐴀𐴝𐴏𐴠𐴤;⁶𐴔𐴡𐴕𐴃𐴡𐴌 𐴀𐴝𐴣𐴀𐴌𐴝𐴃𐴧𐴟 𐴀𐴝𐴓𐴧𐴝 𐴀𐴝𐴏𐴠𐴤 𐴊𐴠 𐴏𐴞𐴌𐴞𐴥𐴉𐴢 𐴀𐴠𐴑𐴒𐴗𐴝𐴥, 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴁𐴝𐴉𐴢, 𐴎𐴞𐴁𐴝𐴤𐴌 𐴃𐴡𐴌𐴉𐴡𐴥𐴃𐴧𐴟 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴉𐴡𐴘𐴊𐴝 𐴀𐴡𐴥𐴘𐴧𐴠 𐴀𐴝𐴦𐴌 𐴎𐴞𐴁𐴝𐴤 𐴓𐴧𐴝 𐴀𐴝𐴣𐴀𐴌𐴝 𐴎𐴞𐴕𐴊𐴞𐴒𐴞 𐴈𐴝𐴍𐴝𐴙𐴌. 𐴀𐴝𐴦𐴌 𐴔𐴝𐴓𐴞𐴑 𐴀𐴝𐴏𐴠𐴤 𐴊𐴠 𐴘𐴡𐴥 𐴀𐴠𐴑𐴒𐴗𐴝𐴥, 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴀𐴞𐴏𐴝𐴤 𐴔𐴡𐴀𐴏𐴞𐴤, 𐴎𐴞𐴁𐴝𐴤𐴌 𐴊𐴟𐴖𐴝𐴌𐴝 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴉𐴡𐴘𐴊𐴝 𐴀𐴡𐴥𐴘𐴧𐴠 𐴀𐴝𐴦𐴌 𐴎𐴞𐴁𐴝𐴤𐴌 𐴊𐴟𐴖𐴝𐴌𐴝 𐴀𐴝𐴣𐴀𐴌𐴝 𐴁𐴝𐴏𐴞 𐴀𐴝𐴏𐴞𐴤.

⁷𐴔𐴡𐴕𐴃𐴡𐴌 𐴇𐴝𐴥𐴀𐴌 𐴔𐴝𐴕𐴟𐴥𐴙𐴐𐴡𐴃𐴧𐴟 𐴇𐴠𐴥 𐴎𐴝𐴕𐴑𐴝𐴌𐴞 𐴒𐴝𐴥𐴕 𐴕𐴝𐴥𐴘. 𐴇𐴡𐴊𐴟𐴥𐴕𐴡𐴃𐴧𐴟 𐴀𐴝𐴙𐴅𐴧𐴡𐴤 𐴔𐴟𐴃𐴧𐴞 𐴉𐴟𐴣𐴎𐴝𐴌 𐴀𐴝𐴊𐴡𐴃𐴢 𐴃𐴝𐴥𐴘𐴒𐴞𐴘𐴡𐴘 𐴀𐴞𐴥𐴏𐴝𐴉𐴠 𐴀𐴞𐴥𐴃𐴝𐴌𐴝 𐴔𐴟𐴃𐴧𐴞𐴌 𐴇𐴝𐴣𐴏𐴠 𐴑𐴟𐴌𐴁𐴝𐴕𐴞 𐴊𐴞𐴘𐴝 𐴈𐴝𐴥𐴕𐴝 𐴀𐴡𐴥𐴑𐴧𐴡𐴓𐴢 𐴈𐴝𐴥𐴀, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌 𐴇𐴠𐴥𐴓𐴡𐴔 𐴑𐴡𐴔𐴎𐴟𐴌𐴞𐴘𐴠 𐴕𐴝𐴉𐴝𐴑 𐴀𐴡𐴥𐴘𐴎𐴝𐴒𐴡𐴘.⁸𐴈𐴝𐴥𐴕𐴝𐴘𐴠 𐴀𐴝𐴣𐴀𐴌𐴝𐴌𐴠 𐴀𐴝𐴓𐴧𐴝𐴌 𐴋𐴝𐴥𐴑𐴠 𐴕𐴡 𐴒𐴡𐴌𐴠𐴥; 𐴀𐴝𐴣𐴀𐴌𐴝 𐴇𐴞𐴥𐴀𐴕 𐴕𐴝 𐴈𐴝𐴥𐴘𐴓𐴠 𐴘𐴡 𐴇𐴡𐴕𐴡𐴤 𐴓𐴟𐴏𐴧𐴝𐴥𐴕 𐴕𐴝𐴥𐴘, 𐴀𐴝𐴦𐴌 𐴈𐴝𐴥𐴘𐴓𐴠 𐴘𐴡 𐴀𐴝𐴣𐴀𐴌𐴝𐴌 𐴇𐴡𐴕𐴡𐴤 𐴉𐴝𐴥𐴘𐴊𐴝 𐴕𐴝𐴥𐴘.

⁹𐴃𐴡𐴀 𐴀𐴟𐴥𐴣𐴐𐴞𐴘𐴝𐴌, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝𐴌 𐴀𐴠 𐴀𐴝𐴎𐴝𐴊𐴞𐴘𐴠 𐴇𐴠𐴥𐴓𐴡𐴔 𐴑𐴡𐴔𐴎𐴟𐴌 𐴀𐴡𐴓𐴝 𐴀𐴡𐴥𐴑𐴧𐴡𐴓𐴡𐴌𐴠 𐴒𐴟𐴕𐴝𐴤𐴃𐴢 𐴕𐴡 𐴉𐴡𐴌𐴝𐴁𐴝.¹⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴡𐴊𐴞 𐴇𐴡𐴕𐴡𐴤 𐴇𐴠𐴥𐴓𐴡𐴔 𐴑𐴡𐴔𐴎𐴟𐴌 𐴀𐴡𐴓𐴝 𐴔𐴝𐴕𐴟𐴥𐴙𐴐𐴠 𐴃𐴟𐴀𐴛 𐴎𐴝𐴕𐴑𐴝𐴌𐴞 𐴀𐴡𐴓𐴝 𐴔𐴝𐴕𐴟𐴥𐴙𐴐𐴡𐴌𐴠 𐴔𐴟𐴃𐴧𐴞𐴌 𐴔𐴡𐴕𐴊𐴞𐴌𐴡𐴃𐴢 𐴈𐴝𐴥𐴕𐴝 𐴈𐴡𐴥𐴀𐴌 𐴊𐴠 𐴊𐴠𐴑𐴠𐴥, 𐴃𐴡𐴥𐴀𐴘𐴓𐴠 𐴘𐴡𐴥𐴒𐴧𐴗𐴝𐴘𐴠 𐴘𐴡𐴥 𐴑𐴞𐴥 𐴔𐴟𐴃𐴧𐴞𐴌 𐴇𐴝𐴣𐴏𐴠 𐴑𐴟𐴌𐴁𐴝𐴕𐴞 𐴊𐴞𐴘𐴝 𐴈𐴝𐴥𐴕𐴝 𐴀𐴡𐴥𐴑𐴧𐴡𐴓𐴢 𐴈𐴝𐴥𐴘𐴃𐴡 𐴇𐴞𐴥𐴔𐴧𐴡𐴃𐴢 𐴕𐴡 𐴉𐴝𐴘𐴁𐴡 𐴕𐴠𐴥؟¹¹𐴃𐴡𐴥𐴘 𐴇𐴠𐴥 𐴑𐴡𐴔𐴎𐴟𐴌 𐴁𐴝𐴥𐴘 𐴎𐴝𐴌 𐴓𐴧𐴝 𐴔𐴡𐴀𐴏𐴞𐴤 𐴔𐴡𐴙𐴅𐴧𐴞𐴥𐴓𐴢, 𐴃𐴟𐴣𐴀𐴝𐴥𐴣𐴌 𐴎𐴝𐴕𐴑𐴝𐴌𐴞𐴌 𐴎𐴡𐴌𐴞𐴘𐴝 𐴘𐴡𐴥𐴒𐴧𐴗𐴝 𐴊𐴡𐴥𐴚𐴐𐴡 𐴀𐴡𐴥𐴘 𐴕𐴡 𐴎𐴝𐴘𐴁𐴡𐴥𐴘 𐴕𐴠𐴥؟¹²𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴎𐴠𐴣𐴃𐴧𐴠𐴥 𐴃𐴟𐴣𐴀𐴝𐴥𐴌𐴝 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴊𐴡𐴌 𐴀𐴟𐴓𐴋𐴝 𐴒𐴟𐴕𐴝𐴤 𐴒𐴡𐴌𐴞𐴥 𐴀𐴞𐴥𐴃𐴝𐴌𐴝𐴌 𐴑𐴡𐴔𐴎𐴟𐴌 𐴇𐴠𐴥𐴓𐴡𐴔𐴡𐴃𐴢 𐴎𐴡𐴈𐴡𐴥𐴔 𐴒𐴡𐴌𐴡𐴤, 𐴇𐴠𐴥𐴣𐴃𐴧𐴠 𐴃𐴟𐴣𐴀𐴝𐴥𐴌𐴝 𐴔𐴡𐴀𐴏𐴞𐴤𐴌 𐴀𐴟𐴓𐴋𐴝 𐴒𐴟𐴕𐴝𐴤 𐴒𐴡𐴌𐴡𐴤𐴌 𐴊𐴠.¹³𐴇𐴠𐴥𐴃𐴡𐴓𐴧𐴝, 𐴎𐴡𐴊𐴞 𐴈𐴝𐴥𐴕𐴝𐴘𐴠 𐴀𐴝𐴣𐴀𐴌 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴡𐴌𐴠 𐴒𐴟𐴕𐴝𐴤𐴃𐴢 𐴉𐴡𐴌𐴝𐴁𐴝, 𐴃𐴡𐴥𐴀𐴘𐴓𐴠 𐴀𐴝𐴀𐴛 𐴀𐴝𐴌 𐴇𐴡𐴕𐴡𐴤𐴊𐴞𐴕 𐴒𐴟𐴏𐴧𐴡 𐴕𐴝 𐴈𐴝𐴥𐴘𐴧𐴟𐴔, 𐴎𐴠𐴀𐴕𐴠 𐴀𐴝𐴣𐴀𐴌 𐴎𐴡𐴌𐴞𐴘𐴝 𐴘𐴡𐴥𐴒𐴧𐴗𐴝 𐴒𐴟𐴕𐴝𐴤𐴃𐴢 𐴕𐴡 𐴉𐴡𐴌𐴠.

The Word for the World International

https://app.library.bible/content/87faca8b51c22590