1 Timothy3
1Eukw uu taapwe tiyaapwemakahch itwewin, awen e iteyihtamahiikuukwe chechii niikaanishkuwaat umaamuuayimihaauh naashch miywaashiyuu uyuu aapatisuwiniyuu kaa ishi wiyeyihtamihiikut chechii ihtuutahk.2An maak awen kaa niikaanishkuwaat umaamuuayimihaauh nitaweyihtaakusuu ekaa chechii ihtakuniyich chekwaayuu chechii ishi ataameyihtaakusit, kaye yaaitei chechii peyakuhaat wiichiskweu naapuukwe. Nitaweyihtaakusuu eyuu pehkaach chechii ishi pimaatisiit, kaye chechii miyu nanaakataweyihtamihiikut taan e ishi pimaatisiit, kaye yaakwaau chipaa ishi wiipayihtaau chekwaayuu taan e ishi ihtuutahk. An awen kaa miyeyihtahk maaniteuh e piihtakahaat ekun chipaa iteyihtaakusuu. Chipaa kaschihuu kaye e chiskutamaachet.3Ekw maak namui kaa wiihchipet awen chipaa uhchi iteyihtaakusuu. Namui kaye chipaa uhchi wausaameyihtaakusuu aat ekaa waa naniheyihtamihiikuuch chekwaayuu, chipaa chiyaameyihtaakusuu. Namui kaye chipaa uhchi wehchipayuu chechii machipayihkahtawaat aweyuu, kaye namui chipaa uhchi iteyihtamihiikuu chechii weyuuch ayaat shuuliyaayuu.4Nitaweyihtaakusuu kaye uu awen chechii miyu nanaakataweyihtahk anit e peyakuteusiit kaye chipaa ihtuutaweu utawaashiim chechii nanihiihtaakut e chisteyimikut.5Wesh awen ekaa chechii miyu nanaakatuweyihtamihiikuukwe anit e peyakuteusiit taanite chechii uhchi miyu nanaakatuweyimaat aniyuu Chishemanituu utiiniimiyuuh.6Kaye maak namui awen anuhchiish e chii pimaachihut chipaa uhchi niikaanishkuweu Chishemanituu utiinimiyuuh wesh chikaa chii ishinaakusuu naashch chihchiwe chechii iteyimisut, chika chii pahchishin maak chechii ishi nishuuwanaachimaakanuut mwehch machimanituuh che ishi nishuuwanaachimaakanuyich.7Kaye maak an awen uyuu kaa itaapatisit chipaa miyu tipaatutamiyuu upimaatisiiwin aniyuuh aweyuu ekaa kaa pimaachihuyich. Wesh miyu tipaachimaakanuute namui kata chii ihtuutaakuu machimanituuh chechii nakwaatikut.8Kaye maak anichii kaa wiichihiiwetwaau taan e ishi naanaakachihtaakanuyich ayimiheukamikuyuu chipaa taapweucheyihtaakusuuch kaye muush kuiskw chipaa itihtaakuniyuu utayimuwinawaau. Namui chipaa uhchi wiihchipeuch kaye namui chipaa uhchi saachihtaauch shuuliyaayuu.9Suuhk chipaa wii mamechiminamuch taan e ishi taapwemakaniyich aniyuu e ishi taapwehtamukw aniyuu kiipaa kaa ishi chischeyihtamhiikuuhkw. Chipaa cheshtinaateyimisuuch kuiskw e ishi pimaatisiitwaau.10Ekush maak niishtam chika wii naanituu kachescheyimaakanuuch uchii taan nihaau e iteyihtaakusitwaau ekw maak nuukuniyiche e kuiskutaatisiitwaau ekw che miyaakanuutwaau chechii wiichihiiwetwaau e naanaakachihtaakanuyich ayimiheukamikuyuu.11Wiichiskwewaauh chipaa taapweucheyihtaakusiyuu kaye namui chipaa uhchi nitamukw itaachimeuch aweyuu kaye pehkaach chipaa ishi pimaatisiyuuch kaye maak yaakwaau chipaa ihtuutamuch misiwe chekwaayuu.12Kaye maak an kaa wiichihiiwet ayimiheukamikuhch chipaa peyakuheu wiichiskweu naapuukwe kaye yaaitei chipaa miyu nihtaauchineu utawaashiim kaye chipaa miyu nanaakataweyihtamihiikuu anit aniyuu e peyakuteusiit.13Wesh taapwe miyu nanaakatuweyihtahkwaawenich aniyuuh utaapatisuwinawaauh ekut yaakwaau che uhchi iteyimikutwaau aweyuu kaye ekut etituu che uhchi wehchipayiyich suuhk e aayimuutahkwaau taan e ishi taapweyimaatwaau Jesus Christ.14Uu maak mekwaach e masinahamaataan Timothy, nipukuseyihten wiipach chechii takushiniyaan chechii waapamitakuch.15Ekaa maak wiipach takushiniyaane, uu kaa masinahamaatakuch eukw uu che wiichihiikuyekw chechii chischeyihtamekw taan chipaa iteyihtaakusinaanuu anite e ishi peyakuteusiihkw Chishemanituu e ihtaat. Wesh uu e ishi peyakuteusiihkw eukw uyuu utayimiheukamikw an kaa pimaatisiit Chishemanituu kaye ekut wehchi yaaichikaapuyihkw kaye eukuu wehchi yaaiteyihtaakusiihkw taapwewinihch ishi.16Nuwach kiipaa chisteyihtaakun an taan e ishi miskaateyihtaakuch chitaapwehtamuwinuu. Chishemanituu wiyaasuwinihch e chii ishi nuukuhiisut. Chii cheshtinaateyihtaakuhiikuu Kaa payehchisiyich Ahchaahkwa taapwe Chishemanituu e chii pechi itishahukut. Chii waapamikuu enchil. Chii aayimuumaakanuu e kacheskwaanuyich anite nanaahkuu e itiskaanesinaanuyich. Chii taapweyimikuu aweyuuh utah aschiihch. Ekw maak kihchikiishikuhch kaa ishi uhpiskaat chechii chisteyihtaakuhaakanuut.
Canadian Bible Society