1 Timothy4
1Kaa payehchisiit Ahchaahkw piyekasch wiihtamaacheu taan che ati ispayiyich e maahchich chiishikaayikwaauh. Kata ihtaauch awenich e puuniitwaau e taapweyimaatwaau Jesus. Chika wiyeshimikuuch taan e ishi wawiyesimuweyich machiahchaahkwa ekw che nuushunehamuwaatwaau taan e ishi chiskutamaacheyich.2Ekw maak aniyuu che ishi wawiyesimuwetwaau uchii nitamukw e ishi chiskutamaachetwaau ekut che uhchi papehtaakuhkwaau uyuu machi chiskutamaachewinh. Uchii maak che papaawiyesimuwetwaau chek namui mitun wiyesh chika uhchi iteyihtamihiikuuch taan e ishi machi chiskutamaachetwaau che ishpish ekaa chischeyihtahkwaau taaniyuu eukw taapwewiniyuu kaye taaniyuu eukw wiyeshimuwewiniyuu. Namui mitun katauhchi papaameyihtamuch taan e ishi machi chiskutamaachetwaau.3Chika wii chistahamaacheuch chechii niipuunaanuyich. Kaye chika ihtakuniyuu miichimiyuu e wii chistahamaachetwaau chechii miichinaanuyich. Chishemanituu maak chii ushihtaau uyuu miichimiyuu chechii miichiyich e nanaaskumuyich aniyuu kaa taapwehtamiyich kaye kaa chischeyihtamiyich taapwewiniyuu.4Wesh misiwe miichimiyuu e miichinaanuyich kaa ushihtaat Chishemanituu miywaashiyuu. Namui maak chekwaan chipaa uhchi aatuweyihtenaanuu chechii miichiihkw e iteyihtamukw chechii wiinihiikuyihkw chipimaatisiiwinaahch chiishpin shaash kaa nanaaskumaauhkwe Chishemanituu an kaa ishi utinamaasuyihkw.5Wesh e ihtuutaakanuyich taan aniyuuh kaa itashtaat anite utayimuwinihch chechii ihtinaanuyich kaye maak ayimihchikewiniyuu eukw uyuu e ishi nahiiwehiikut Chishemanituu.6Chiishpin maak uyuu ishi waawiihtamuutwaawenich wiichishaanimaauch chika miyu atushkuwaau Christ Jesus wesh chika miyu nihtaauchihiikuun taan e ishi taapwemakaniyich Chishemanituu utayimuwin kaye an miyu chiskutamaachewin kaa ishi nuushunehaman.7Ekaawii aapachihtaah aniyuu ekaa wiyesh itaapatahkwaau nitawiin tipaachimuwinh e kacheskweyin maak e chiskutamaacheyin mwehch taapwe Chishemanituu utayimuwin chechii itaapaachihtaayin. Uste wii chiskutamaasuh taanite etituu chechii uhchi nanihiiwehiit Chishemanituu.8Ihtakuniyuu kiipaa taan e ishi wiichihiikut awen e sasaaupayihut. Ekw maak an awen suuhk muush kaa wii nanihiiwehaat Chishemanituu eukw uyuu etituu che wiichihiikut anuhchiish utah e pimaatisiit kaye maak anite ishi niishtaamihch.9Taapwemakan uu itwewin, kaye ihtakun chechii taapwehtaakanuuhch.10Eukw maak wehchi suuhk yaapach iteyihtamihiikuyihkw uu taan e itaapatisiihkw aat e aayimuhuyihkw wesh chitaspeyimututawaanuu Chishemanituu kaa pimaatisiit, an kaa nituweyimaat misiwe aweyuu chechii pimaachihuyich kaye kaa pimaachihaat misiwe aniyuu kaa taapweyimikut.11Eukw uyuu chipaa ishi wiishumaawaauch kaye chipaa ishi chiskutamuwaawaauch awenichii kaa taapwehtahkwaau.12Ekaawii chika uhchi aatuwaahiikuuch awenich aniyuu e uschipimaatisiyuut uyuu e itaapatisuut. Mikw ishi pimaatisii anit chechii uhchi chischinuwaapahtahkwaau chipimaatisiiwiniyuu anichii kaa taapwehtahkwaau, taan e itihtaakuniyich chitayimuwiniyuu, kaye taan e ishinaakuhch chipimaatisiiwin kaye taan e ishi saachihiiweyin maak e ishi taapwehtaman kaye taan e ishi payehkaatisiyin.13Che ishpish ekaa takushiniyaan suuhk yaapach muush ayimihtaa Chishemanituu utayimuwin anite e maauchihiituyekw kaye suuhk aahchiista e kacheskweyin kaye e Chiskutamaacheyin.14Muush aapachihtaah an ahchaahkw miiwewin e ishi ayaan chechii atushkuwat Chishemanituu. Wesh eukw uu miiwewin kaa miikuyin chischiwehiichewinihch uhchi, kaa saaminiskwaau e ayimiheshtamaaskwaau anichii kaa niikaanishkaakahkwaau ayimiheukamikuyuu.15Nanaakatuweyihtamihiikw muush chechii ihtuutaman uu kaa ishi aayimuutamaataan ekw maak chechii waapahtahkwaau misiwe awenich taan e ishi wetaach kaschihuyin e atushkuwat Chishemanituu.16Nanaakatuweyihtamihiikw kaye chipimaatisiiwin kaye an e ishi Chiskutamaacheyin. Uu ishi nanaakataweyihtamine eukw che kanuweyimikuyekw kaye che pimaachihiikuyekw, chiya kiipaa kaye maak anichii kaa nituhtaaskwaau.
Canadian Bible Society