1 Timothy2
1Maauch maak niishtam e ishi pukuseyimuyaan eukw uu muush nanaahkuu chechii ishi ayimiheshtamuwekuch misiwe awenichii. Che nitutamaayekw chechii miyaakanuutwaau taan e ishi nituweyihtahkwaau kaye maak muush chechii nanaaskumekw Chishemanituu wiyawaau uhchi.2Eyuu maak anichii kaa chisheuchimaautwaau ekw maak anichii kaa niikaaneyihtaakusitwaau chipaa ayimiheshtamuwaawaauch. Uu maak nanaahkuu e ishi ayimiheshtamuwekuch awenichii ekut che uhchi ihtakuhch chiyaameyihtamuwin eyuu maak ekut che uhchi ihtakuhch e miyu wiicheutunaanuuhch kuiskutaatisiiwinihch kaye ekut che uhchi ihtakuhch e chisteyimitunaanuuch.3Eukw uyuu e ishi miyunahk kaye neheyihtamihiikut Chishemanituu chipimaachihiiweminuu,4an kaa nituweyimaat misiwe aweyuu chechii pimaachihuyich kaye chechii chischeyihtamiyich taapwewiniyuu.5Wesh peyakushuu Chishemanituu kaye peyakushuu an awen e naatamaachet chechii nachishkaatutwaau Chishemanituu ekw maak iinuu eukuu naapeu Jesus Christ.6Eukw maak uu naapeu kaa pachishteyihtamihiikut upimaatisiiwin chechii uhchi wiihkuchihaat misiwe aweyuu umachihtwaawaniihch uhchi. Ekut maak kaa utihchipayihch anit che miyupayihch Chishemanituu chechii nuukuhtaat taanit chechii uhchi pimaachihaat misiwe aweyuu.7Wesh taapwe nichii wiyaapamikuun chechii waawiihtamaan miywaachimuwin kaye apastal chechii itaapatisiyaan kaye maak chechii chiskutamuukwaau aniyuu taapwewiniyuu chipaa ishi taapwehtamuch anichii ekaa Jewa kaa itiskaanesitwaau. Namui maak nitamukw nititwen uu kaa itweyaan.8Nipukuseyimaauch misiwe naapeuch taanite e ati ihtaawaakwenich iskutak e ayimihaatwaau chechii uhpipayihtaatwaau utihchiiwaau mitun tekash e pachishteyimisutwaau Chishemanituu e ihtaayich. Mekwaach maak e ayimihaatwaau namui chipaa uhchi chichishkaakuuch chishuwaasuwiniyuu kaye namui chipaa uhchi ishinaakuniyuu achiyuu e chii chishuwaasiistuwaatwaau aweyuu.9Nipukuseyimaauch kaye iskweuch yaakwaau chechii itaaspisutwaau. Namui chipaa uhchi mista wawetuwehamaauch kaye namui e mista shuuliyaaunaakuniyikwaau chekwaayuu chipaa uhchi kachichishkamuch.10Uste aniyuu e kuiskupimaatisiitwaau ekw maak e miyutuutamuwaatwaau aweyuu chipaa chiihkaanaakuhiikuuch wesh ekun e ishi nituweyihtaakusitwaau iskweuch, anichii kaa itwetwaau e chischeyimaatwaau Chishemanituu.11Wesh iskweu nituweyihtaakusuu yaakwaau chechii nanituhtahk anit chechii uhchi chiskutamasut kaye misiwe chechii ishi nanihiihtahk taan kaa ishi pehtahk.12Namui nipachishtinaauch iskweuch chechii chiskutamuwaatwaau naapeu maak chechii uchimaaututawaatwaau. Ninitaweyimaauch teyakuch chechii nanitutahkwaau.13Wesh Adam niishtam chii ushihaakanuu ekw maak yaakw Eve kaa ushihaakanuut.14Kaye maak namui Adam niishtam uhchi wiyeshimaakanuu. An iskweu eukw kaa wiyeshimaakanuut kaye kaa ati machituutahk ekaa uhchi nanihiihtuwaat Chishemanituu.15Yaapach maak kata pimaachihaakanuu iskweu aniyuu uhchi e waapamaausut tepiyaahch tekash ishi nanaakataweyimisute taapwehtamuwinihch kaye saachihiiwewinihch ekw maak payehchi pimaatisiiwinihch chechii ishi pimuhtet.
Canadian Bible Society