Alidihatiña21
Würiña lun hámarigume lílana lani Benhamín türibu
1Fiñuhaña meha Ísüraelina Misüpá luagu mígirunbaña lan lun hamarieidun harahüñü luma ni aban hádangiñe lánigu Benhamín.2Gama lumoun aba hóundaragun Beteli, ligibugiñe Wabureme ayahuaha darí laguñeedun, hariñaga:3—Wabureme, Lubungiute Ísüraeli ka uagu lasusereda katei le woun? Ida lubagia lemegeirun aban hádangiñe lani Ísüraeli türibu guentó?4Larugan aba hásaarun Ísüraelina binaafingiua, aba hadügün aban latarü, aba hadagaragüdün le gudawarügüti luma le lánina arandaruni lun Wabureme.5Ábati hálügüdahan hámagua, hariñaga:—Ka wádangiñe wagía le yaabei mídinbei lidan adamuridaguni Misüpá?
Ladüga fiñuhaña buga lun háfaraguniña ha mídintiña lidan adamuridaguni ligía.6Hírutiñati Ísüraelina, luagu katei le asuseredubei houn lánigu Benhamín ha hábirigu, hariñagati:
—Gidawa aban hádangiñe lani Ísüraeli türibu lidan weyu le uguñebei.7Kábati wadüga lun wibihin würiña houn sun lánigu Benhamín ha erederubaña wínwanñu? Wagía fiñuhadiwa lidan liri Wabureme luagu mígirunbadiwa lan lun hamarieidun warahüñü hama.8Anihein san aban Ísüraelina ya, le mídinti lidan adamuridaguni Misüpá?
Ábati haritagun luagu ua lan ni aban hádangiñe ha Habesibaña le lani Galaadü ñǘdünti lidan adamuridaguni,9ladüga dan le laguahóunbei iri, úati ni aban lídangiñeti fulasu ligía óunabuti.10Ábati hóunahan sun lílana fulasu duusu-milu hádangiñe habuidun-agei súdaragu lun háfaraguniña lílana Habesi, hau sun irahüñü hama würiña ha gámarihaña.12Hadan ha aganóubaña Habesi, dariwatiña gádürü-san würiña nibureintiña ha mámarigiña, aba hanügüniña tidoun kianpu-agei to Siloboun, Kanán.13Ábati hóunahan sun lílana fulasu áluahaña lánigu Benhamín ha luágubaña wübü Rimón, aba hamisurahaniña lun harandarun hama.14Aba hagiribudun lánigu Benhamín, aba híchuguniña Ísüraelina würiña ha hanügübaña Habesigiñe houn. Gama lumoun lóuguatiña würiña hagía houn súngubei.15Gudemetiñati lánigu Benhamín houn Ísüraelina, luagu lígirun Wabureme aban ubaraü málouga hadan lani Ísüraeli türibu.16Hariñagati lábutigu fulasu:
—Ida lubati wadarirun würiña houn híbiri, áfarawaguagu würiña ha lánigu Benhamín?17Gasu ñeinmeme lan Benhamín lidan lubara hadan wani türibu, hau ha erederubaña wínwanñu, memegeirun láamuga ni aban hádangiñe lani Ísüraeli türibu.18Gama lumoun wagía siñati wíchuguniña warahüñü houn lun hamarieidun hama, lugundun fiñuhadiwa wagía Ísüraelina luagu míchugun wabaña lan warahüñü houn lánigu Benhamín.19Gama lumoun anihein aban lufedun Wabureme sagü irumu Siló, le luéigiñebei nórute libiti Beteli, luéigiñe labouchagüle weyu libiti üma le ñǘdünbei Beteligiñe lun luagun Sikemü, luéigiñe suru libiti Leboná.20Ábati hóunahan ábutigu Ísüraelina ariñaga houn lánigu Benhamín:
—Heiba, ábame haramudagun labadinagua lídibu burí beibei yarafa lun Siló,21ábameti aranseñu humá. Danme háfuridun würiña irahüñü ha Silona abinaheina, ábame háfuridun le ñéingiñe lubéi haramudagua, híweruhame aban würi kada aban, ábame hanügüniña hageiroun.22Ánhaña ñübuin hagübürigu o hábirigu würiña irahüñü hagía wamoun, wariñagame houn: “Amuriahatiwa huma lun hadügün fulesei woun lun feruduna humaniña, lugundun lásiñarun wadarirun würiña houn sun hagía lidan wawuribuhan hama Habesina. Kei giñeti mama lubéi huguya íchugubaliña houn, madüraagun humuti háfiñurun”.23Aba hánharun lánigu Benhamín lun le ariñawagúbei houn, ábati líweruhan kada aban hádangiñe aban würi irahü hádangiñe ha abinahabaña, aba lanügünu. Lárigiñe aba hagiribudun hageiroun, ábaya hábunaguni uburugu, aba haganóun ñein.24Ha giñe híbiri Ísüraelina, aba hagiribudun kada aban lageiroun lidoun lani türibu, luma lidoun lani külán.25Lidan dan ligía úagili meha urúei Ísüraeli, kada gürigia adügei le labusenrun.
Bible Society of Honduras