Alidihatiña20
Haransehan Ísüraelina lun habeichuniña Gibeana
1Ábati hóundaragun sun Ísüraelina lúmagiñe Dángiñe, darí Bérüsewa luma Galaadü ligibugiñe Wabureme uburugu Misüpá.2Ñéinñanu sun hábutigu hani Ísüraelina türibu, hama gádürü-san súdaragu Ísüraelina ha éibugarügütiña.3Aba haganbun lánigu Benhamín luagu hóundaragun híbiri hani Ísüraelina türibu uburugu Misüpá. Ábati hálügüdüni Ísüraelina lewita ligía ida liña lan tafarún lúmari.4Lariñaga houn:—Aba nachülürün tau nubúali uburugu Gibeá, le hani lani Benhamín türibu lun násügürüni áriebu ñein.5Gama lumoun áriebumeme ligía, aba hegeyedagunu fiu lílana uburugu ligía muna to ñein lubéi weredera áluga yebe háfaraguniwa, ítara liñati aba háguragunu nubúali, aba tounwen.6Ábati nanügüni túgubu, aba napiisihani, aba nóunahani lidoun sun fulasu lun gefén lan sun Ísüraeli luagu katei le.7Huguyati kei Ísüraelina, huguya lun harihin kaba lan hadüga libügürü katei le.8Aba hararamun sun hagía kei ábanrügü wügüri, aba hariñagun:
—Magiribudúnbei ni aban wádangiñe lúbiñoun.9Le lunbei wadügüni, wabuduha kátañaba lan ageindagua hama lílana Gibeá.10Aban hádangiñe kada diisi wügüriña hádangiñe sun türibugu lun libihin éigini houn súdaragu; ha híbiri, ábame houdin afayeiragüdaña lílana Gibeá luagu wuribani le hadügübei.11Aba hóundaragun sun Ísüraelina kei ábanrügü wügüri lun hageindagun hama lílana uburugu Gibeá.12Aba hóunahan ariñaga houn lánigu Benhamín lidan sun hageira:
—Kame san hadügei hánigu wuribani le?13Derege humaña hagübüri gürigia ha adügübalin katei le woun ñein Gibeá, lun wáfaraguniña, harumagüda wamaamugei Ísüraeli lídangiñe wuribani le.
Gama lumoun madügüntiña lánigu Benhamín gasu hau Ísüraelina ha hábirigu,14lubaragiñe lira, aba hóundaragun sun lánigu Benhamín ha lídanbaña ámuñegueinarügü uburugu Gibeá, lun houdin ageindagua hama ha híbiri Ísüraelina.15Wein-sisi-míluñanu súdaragu ha lánigu Benhamín aranserutiña lun wuribu, bóugudin hawéi sedü-san wügüriña anúadahoutiña hádangiñe lílana Gibeá.16Hadan sun wügüriña ha, ñéinñanu sedü-san báünatiña, ha gǘhünebaña tau chilinchádi, gayaraati hachüürün dübü luagun aban ídiburi, machararaditiña.17Ánhañati Ísüraelina, óundaratiña gádürü-san-milu wügüriña wuriburuguna ha awuribuhañahaña.
Wuribu luma lani Benhamín türibu
18Aba houdin Ísüraelina Beteli, aba hálügüdüni Wabureme ñein kaba lan türibu ageindagua hama lánigu Benhamín furumiñe. Aba lariñagun Wabureme houn luagu Hudaaba lan furumiñe.19Ábati saragia hamá Ísüraelina, aba houdin eredera ligibugiñe Gibeá.20Aba hawanserun hawagun lánigu Benhamín, aba hararamun ligibugiñe Gibeá aranseñu lun wuribu.21Gama lumoun aba háfuridun lánigu Benhamín uburugugiñe, aba háfarun wein-bián-milu hádangiñe Ísüraelina lidan weyu ligía.22Ligía hóudinbei Ísüraelina Beteli, ayahuaha ligibugiñe Wabureme darí laguñeedun, aba hálügüdüni anhein lunti lubéi hageindagunya hama hábirigu ha lánigu Benhamín. Kei lariñagun Wabureme houn lun hageindagun, aba hárügüdün gurasu, ábaya hageindagun hama lánigu Benhamín larugan lememe ñein lubéi hageindagua aban weyu lubaragiñe.25Gama lumoun ábaya háfuridun lánigu Benhamín uburugugiñe, ábaya háfarun disiwídü-milu súdaragu Ísüraelina.26Ábayati houdin sun súdaragu Ísüraelina Beteli ayahuaha ligibugiñe Wabureme. Aba hásügürüni sun weyu ligía méiginga, aba hadagaragüdün le gudawarügüti luma le lánina arandaruni lun Wabureme.27Lidan dan ligía Beteliñoun bágüsi to lánina lidaradun Wabungiute, Finesi le liráü Eleasárü libari Aarón ligía fádiribei. Aba hálügüdüni Ísüraelina Wabureme, hariñaga lun:—Lunti san wageindagunya hama wábirigu ha lánigu Benhamín, odi ígira wamaña houngua?
Lariñaga Wabureme houn:
—Hageindagua, ladüga haruga, nagañeiragüdübadün.29Ábati haramudagun fiu súdaragu Ísüraelina geyegu lau Gibeá,30sun añangüra lan híbiri luagu lǘrüwan weyu ligía ligibugiñoun Gibeá aranseñu lun wuribu kei le furumiñeti luma libiaman wéiyaasu.31Ábaya háfuridun lánigu Benhamín uburugugiñe, aba hadisedun luéi uburugu lun hábürühan hawagun Ísüraelina. Áfaratiña hawara darandi Ísüraelina luagu lémeri Beteli luma Gibeá, luma burí áraabu,32ábati haritagun luagu héibaaguña lan Ísüraelina hawéi kei furumiñe luma libiaman wéiyaasu. Gama lumoun le hadisedunbei Ísüraelina luéi uburugu, lun hóudiba lan háganiñu hárigi darí luagun burí üma.33Sódini aba háfuridun Ísüraelina le ñéingiñe habéi, aba haranserun lun wuribu uburugu Baali-tamarü; ha buga aramudagubaña geyegu lau Gibeá, aba háfuridun le ñéingiñe lubéi haramudagua,34aba hábürühan luagun uburugu. Díisiñanu-milu hádangiñe habuidun-agei wuriburuguna Ísüraelina ha ábürühabaña luagun Gibeá. Dereti wuribu ligía, ibidiñeti yebe houn lánigu Benhamín luagu heferidiruba lan.35Aba lagañeiragüdüniña Wabureme Ísüraelina, aba háfarun Ísüraelina wein-seingü-milu-san súdaragu hádangiñe lánigu Benhamín weyu ligía.36Ábati harihin lánigu Benhamín luagu féridi hamá lan wuribu.
Hararamunbalin Ísüraelina háhabu lidan hawuribun hama lánigu Benhamín, ladüga hemenigin hawagu wügüriña ha aramudagubaña lun hábürühan hawagun lílana Gibeá.37Aba hábürühan wügüriña hagía hawagun lílana Gibeá sódini, aba háfaraguniña sun ha ñéinbaña tau eféin.38Ha buga aramudagubaña lun hábürühan luagun uburugu, aranse hamaali buga hama híbiri Ísüraelina lun danme lan ragǘ hamaali uburugu ábame lan hawisaruniña lau gumuleli.39Lun danme lan buga harihini Ísüraelina ha bóugudibaña luéi uburugu gumuleli, lun hagararaagun lun hageindagun hama lánigu Benhamín.
Aba háfarun lánigu Benhamín hawara darandi Ísüraelina, ábati haritagun luagu ítara luba lan kei le furumiñeti wuribu.40Gama lumoun dan lagumeserun gumuleli iñuragua, aba hadigiragun lánigu Benhamín hárigoun, ábati harihin liñurun gumuleli luma watu gemeti uburugugiñe.41Ábati hábürühan Ísüraelina hawagun, aba hanufudedagun lánigu Benhamín dan harihini günringuaü le ñǘbuinbei hawagun.42Aba héibaagun hawéi Ísüraelina luéigiñe lémeri fulasu mageirawati, gama lumoun siñati hesefurun, ladüga ábaha háfuridun ha uburugubaña habaroun, aba háfaraguniña.43Aba herederun Ísüraelina geyegu hau lánigu Benhamín, aba héibaahaniña aba háfaraguniña lúmagiñe Menuágiñe darí lumoun oubaü le ñéingiñe lubéi laboucha weyu libiti Gibeá.44Ítara liña hóunwegun disiwídü-milu súdaragu hádangiñe lánigu Benhamín.45Ha híbiri, aba hagararaagun, aba hanurahan lidoun fulasu mageirawati, luagun luwübüri Rimón, gama lumoun hilaguatiña seingü-milu hádangiñe luagu üma aba hóudinmeme Ísüraelina hárigi, aba háfarun bián-milu wügüriña hádangiñe.46Hadan sun ha óunwegubaña lidan weyu ligía, wein-seingü-míluñanu hádangiñe habuidun-agei hasudaranigu lánigu Benhamín.47Gama lumoun giributiña sisi-san lánigu Benhamín, aba hanurahan lidoun fulasu mageirawati, aba herederun gádürü hati luagu luwübüri Rimón.48Aba hábürühan Ísüraelina hawagun híbiri lánigu Benhamín, aba háfaraguniña sun wügüriña ha lílana uburugu tau gusiñu, áfaragueina animaalugu luma sun le hadarirun habarua, gudá haméi uburugu.
Bible Society of Honduras