Read 𐴔𐴝𐴌𐴑𐴟𐴏𐴢 12

𐴔𐴝𐴌𐴑𐴟𐴏𐴢12

𐴀𐴝𐴚𐴒𐴟𐴌-𐴁𐴝𐴌𐴞𐴎𐴝 𐴀𐴠𐴊𐴧𐴠 𐴐𐴝𐴐𐴝𐴤 𐴀𐴡𐴥𐴑𐴧𐴡𐴓𐴡𐴌 𐴔𐴠𐴀𐴏𐴝𐴓𐴢

¹𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴔𐴠𐴀𐴏𐴝𐴓𐴢 𐴀𐴡𐴥𐴑𐴧𐴡𐴓𐴢 𐴊𐴞𐴥 𐴈𐴡𐴃𐴝𐴤 𐴈𐴡𐴖𐴝𐴤𐴃𐴢 𐴊𐴡𐴙𐴅𐴧𐴠, ”𐴀𐴠𐴎𐴧𐴡𐴕 𐴔𐴝𐴙𐴕𐴐𐴠𐴥 𐴀𐴠𐴑𐴧𐴝𐴥𐴕 𐴀𐴝𐴚𐴒𐴟𐴌-𐴁𐴝𐴌𐴞𐴎𐴝 𐴓𐴝𐴒𐴝𐴘𐴧𐴠𐴥. 𐴘𐴡𐴥𐴒𐴧𐴗𐴝𐴘𐴠 𐴇𐴞𐴥𐴘𐴝𐴕𐴡𐴌 𐴏𐴝𐴘𐴌𐴡𐴥 𐴋𐴝𐴥𐴑𐴡𐴃𐴧𐴟 𐴒𐴞𐴥𐴌𐴝 𐴊𐴞𐴥𐴘𐴠, 𐴀𐴝𐴚𐴒𐴟𐴌𐴡𐴌 𐴌𐴡𐴐𐴢 𐴕𐴠𐴦𐴓𐴝𐴘 𐴁𐴡𐴓𐴧𐴝 𐴀𐴠𐴒𐴧𐴗𐴝𐴤 𐴒𐴝𐴣𐴌𐴝𐴥 𐴑𐴟𐴙𐴅𐴧𐴠𐴥, 𐴀𐴠𐴊𐴧𐴠 𐴀𐴠𐴑𐴧𐴝𐴥𐴕 𐴄𐴡𐴚𐴑𐴞 𐴁𐴝𐴙𐴕𐴊𐴠𐴤. 𐴁𐴝𐴦𐴊𐴠 𐴁𐴝𐴌𐴞𐴎𐴝 𐴒𐴝𐴥𐴕 𐴐𐴝𐴐𐴝𐴤 𐴀𐴡𐴥𐴑𐴧𐴡𐴓𐴡𐴌𐴠 𐴄𐴠𐴥𐴑𐴝 𐴊𐴞𐴥 𐴀𐴡𐴙𐴕𐴧𐴡 𐴔𐴟𐴓𐴧𐴟𐴑𐴡𐴃𐴢 𐴒𐴞𐴦𐴘𐴡𐴥𐴘.²𐴀𐴝𐴦𐴌 𐴀𐴝𐴚𐴒𐴟𐴌𐴡𐴌 𐴀𐴝𐴙𐴕𐴊𐴝 𐴀𐴝𐴙𐴐𐴧𐴠𐴥 𐴌𐴝𐴥𐴌, 𐴘𐴡𐴥𐴒𐴧𐴗𐴝𐴘𐴠 𐴀𐴠𐴒𐴧𐴗𐴝𐴤 𐴒𐴡𐴗𐴀𐴌𐴡𐴌𐴠 𐴐𐴝𐴐𐴝𐴤 𐴒𐴟𐴥𐴕𐴡𐴌 𐴇𐴝𐴣𐴏𐴠 𐴊𐴞𐴉𐴠𐴍𐴝𐴥𐴘𐴧𐴠, 𐴐𐴝𐴐𐴝𐴤 𐴀𐴞𐴥𐴃𐴝𐴌𐴝𐴃𐴧𐴟 𐴁𐴝𐴌𐴞𐴎𐴝𐴌 𐴒𐴟𐴓𐴝𐴌 𐴁𐴝𐴥𐴑 𐴉𐴝𐴘 𐴁𐴡𐴓𐴧𐴝.³𐴓𐴠𐴑𐴞𐴕 𐴀𐴞𐴥𐴃𐴝𐴌𐴝 𐴃𐴝𐴌𐴠𐴥 𐴊𐴡𐴥𐴌𐴞, 𐴔𐴝𐴌𐴝-𐴊𐴡𐴥𐴌𐴝 𐴒𐴡𐴌𐴞𐴥 𐴇𐴝𐴥𐴓𐴞 𐴀𐴝𐴥𐴃𐴠 𐴊𐴟𐴣𐴌𐴝𐴘𐴊𐴞𐴘𐴠𐴥.⁴𐴘𐴡𐴥𐴒𐴧𐴗𐴝𐴘𐴠 𐴀𐴝𐴁𐴝𐴌 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴀𐴝𐴌 𐴀𐴠𐴒𐴧𐴗𐴝𐴤 𐴒𐴡𐴗𐴀𐴌 𐴊𐴞𐴉𐴠𐴍𐴝𐴥𐴘𐴧𐴠, 𐴀𐴞𐴥𐴃𐴝𐴌𐴝 𐴃𐴝𐴌𐴠𐴥 𐴔𐴝𐴃𐴝𐴥 𐴏𐴝𐴥𐴘 𐴔𐴝𐴌𐴞 𐴁𐴞𐴐𐴞𐴤 𐴁𐴠𐴀𐴞𐴎𐴧𐴡𐴃𐴞 𐴒𐴡𐴙𐴅𐴧𐴠𐴥.⁵𐴘𐴡𐴥𐴒𐴧𐴗𐴝𐴘𐴠 𐴀𐴝𐴌𐴡𐴤 𐴀𐴠𐴥𐴒𐴧𐴗𐴝 𐴊𐴞𐴉𐴠𐴍𐴝𐴥𐴘𐴧𐴠; 𐴀𐴞𐴥𐴃𐴝𐴌𐴝 𐴃𐴝𐴌𐴠𐴥 𐴎𐴝𐴕𐴠 𐴔𐴝𐴌𐴞𐴉𐴠𐴥𐴓𐴝𐴘𐴧𐴠. 𐴇𐴠𐴥𐴕𐴊𐴞𐴓𐴧𐴝, 𐴀𐴞𐴥𐴃𐴝𐴌𐴝 𐴀𐴝𐴌𐴡𐴤 𐴁𐴡𐴗𐴀𐴃𐴧𐴗𐴝𐴌𐴠 𐴒𐴡𐴙𐴅𐴧𐴠𐴥, 𐴇𐴡𐴊𐴟𐴥𐴕𐴡𐴌𐴠 𐴔𐴝𐴌𐴝-𐴊𐴡𐴥𐴌𐴝 𐴒𐴡𐴙𐴅𐴧𐴠𐴥, 𐴇𐴡𐴊𐴟𐴥𐴕𐴡𐴌𐴠 𐴎𐴝𐴕𐴠 𐴔𐴝𐴌𐴞𐴉𐴠𐴥𐴓𐴝𐴘𐴧𐴠.

⁶”𐴘𐴝𐴓𐴝 𐴘𐴡𐴥𐴒𐴧𐴗𐴝𐴃𐴧𐴟 𐴏𐴞𐴌𐴞𐴥𐴉𐴢 𐴀𐴝𐴌 𐴀𐴠𐴎𐴧𐴡𐴕 𐴊𐴞𐴉𐴠𐴍𐴝𐴥𐴘𐴁𐴝𐴌 𐴀𐴝𐴏𐴠𐴤 𐴊𐴠, 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴘𐴡𐴥𐴒𐴧𐴗𐴝𐴌 𐴀𐴝𐴊𐴡𐴙𐴅𐴧𐴝 𐴉𐴟𐴖𐴝. 𐴀𐴝𐴇𐴠𐴥𐴌𐴞𐴃𐴢 𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴌𐴒𐴝𐴤 𐴕𐴞𐴎𐴠 𐴀𐴠𐴀𐴕 𐴈𐴡𐴀𐴘𐴢 𐴉𐴟𐴖𐴝 𐴖𐴝𐴌𐴠 𐴊𐴞𐴉𐴠𐴍𐴝𐴥𐴘𐴧𐴠, ’𐴀𐴞𐴥𐴃𐴝𐴌𐴝 𐴀𐴝𐴣𐴀𐴌 𐴉𐴟𐴖𐴝𐴌𐴠 𐴀𐴞𐴎𐴧𐴡𐴃𐴢 𐴒𐴡𐴌𐴞𐴥𐴁𐴡.‘

⁷”𐴓𐴠𐴑𐴞𐴕 𐴐𐴝𐴐𐴝𐴤 𐴒𐴟𐴥𐴕𐴠 𐴀𐴝𐴉𐴡𐴤𐴏𐴡𐴃𐴢 𐴈𐴡𐴀𐴌 𐴊𐴠, ’𐴀𐴞𐴃𐴠 𐴃𐴡 𐴔𐴞𐴌𐴝𐴏𐴊𐴝𐴥𐴌; 𐴀𐴝𐴘𐴧𐴡𐴤 𐴀𐴞𐴃𐴝𐴌𐴠𐴤 𐴔𐴝𐴌𐴞𐴉𐴠𐴥𐴓𐴝𐴘, 𐴁𐴝𐴦𐴊𐴠 𐴔𐴞𐴌𐴝𐴏𐴢 𐴀𐴝𐴣𐴀𐴌𐴝𐴌 𐴀𐴡𐴥𐴘𐴎𐴝𐴘𐴁𐴡𐴘.‘⁸𐴃𐴡𐴥𐴘 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴊𐴡𐴥𐴌𐴞 𐴔𐴝𐴌𐴞𐴉𐴠𐴥𐴓𐴝𐴘𐴧𐴠, 𐴀𐴝𐴦𐴌 𐴁𐴝𐴌𐴞𐴎𐴝𐴌 𐴁𐴝𐴀𐴌𐴠 𐴉𐴠𐴥𐴓𐴝𐴘𐴊𐴞𐴘𐴠.

⁹”𐴁𐴝𐴌𐴞𐴎𐴝𐴌 𐴒𐴞𐴌𐴡𐴥𐴏𐴠 𐴀𐴞𐴥𐴃𐴝𐴌𐴝𐴌𐴠 𐴑𐴞𐴦 𐴒𐴡𐴌𐴞𐴥𐴁𐴡 𐴉𐴝𐴥𐴣𐴓𐴧𐴝𐴌؟ 𐴘𐴡𐴥𐴒𐴧𐴗𐴝𐴘𐴠 𐴀𐴝𐴀𐴘𐴢 𐴇𐴠𐴥 𐴐𐴝𐴐𐴝𐴤 𐴒𐴟𐴥𐴕𐴡𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴁𐴡, 𐴀𐴝𐴦𐴌 𐴁𐴝𐴌𐴞𐴎𐴝 𐴒𐴝𐴥𐴕 𐴀𐴡𐴙𐴕𐴧𐴡 𐴑𐴞𐴘𐴡𐴥𐴌𐴠 𐴊𐴞𐴦𐴉𐴠𐴥𐴓𐴝𐴘𐴁𐴡.¹⁰𐴃𐴟𐴣𐴀𐴝𐴥𐴌𐴝 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴘𐴝𐴀𐴕 𐴀𐴟𐴥𐴊𐴧𐴗𐴝 𐴕𐴡𐴥 𐴉𐴡𐴌𐴡𐴥 𐴕𐴞𐴥𐴑𐴞,’𐴎𐴠 𐴉𐴝𐴃𐴧𐴡𐴥𐴌 𐴔𐴞𐴏𐴃𐴞𐴥𐴌𐴞𐴘𐴠 𐴀𐴞𐴕𐴑𐴝𐴌 𐴒𐴡𐴌𐴞𐴥𐴉𐴠𐴓𐴝𐴘𐴧𐴠,𐴘𐴞𐴥𐴁𐴝 𐴐𐴞𐴥𐴓𐴢 𐴁𐴠𐴒𐴧𐴟𐴥𐴕𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴎𐴡𐴌𐴟𐴌𐴞 𐴖𐴝 𐴀𐴡𐴥𐴘𐴒𐴞𐴘𐴡𐴘.¹¹𐴇𐴞𐴥𐴘𐴝𐴕 𐴔𐴝𐴁𐴟𐴊𐴡𐴌 𐴃𐴡𐴌𐴉𐴡𐴥𐴃𐴧𐴟 𐴀𐴡𐴥𐴘𐴀𐴝𐴙𐴐𐴧𐴠,𐴀𐴝𐴦𐴌 𐴇𐴞𐴥𐴘𐴝𐴕 𐴀𐴝𐴣𐴀𐴌𐴝𐴌 𐴏𐴟𐴑𐴡𐴃𐴢 𐴃𐴝𐴦𐴅𐴟𐴙𐴂𐴧𐴝‘ ؟“

¹²𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴊𐴡𐴥𐴌𐴞𐴉𐴠𐴓𐴝𐴘 𐴁𐴡𐴓𐴧𐴝 𐴑𐴟𐴐𐴞𐴥𐴐𐴢 𐴒𐴡𐴙𐴅𐴧𐴞𐴥𐴓𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴁𐴟𐴎𐴞𐴥𐴒𐴞𐴘𐴡𐴘 𐴊𐴠 𐴑𐴞 𐴀𐴞𐴏𐴝𐴤𐴘𐴠 𐴇𐴠𐴥 𐴔𐴠𐴀𐴏𐴝𐴓𐴢 𐴓𐴝𐴕 𐴀𐴞𐴥𐴃𐴝𐴌𐴝𐴌 𐴇𐴠𐴥𐴓𐴝𐴉𐴢 𐴈𐴡𐴘𐴧𐴠𐴥 𐴊𐴠. 𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴔𐴝𐴙𐴕𐴐𐴡𐴥𐴌 𐴋𐴡𐴦𐴌𐴠 𐴀𐴞𐴥𐴁𐴝𐴌𐴠 𐴀𐴠𐴌𐴞 𐴒𐴞𐴀𐴓𐴒𐴡𐴘.

𐴌𐴡𐴔𐴞 𐴁𐴝𐴀𐴣𐴐𐴧𐴝𐴌𐴠 𐴇𐴝𐴥𐴎𐴝𐴕𐴝 𐴊𐴞𐴦𐴘𐴝

¹³𐴉𐴡𐴌𐴠 𐴀𐴞𐴥𐴃𐴝𐴌𐴝 𐴇𐴡𐴊𐴟𐴥𐴕 𐴉𐴠𐴥𐴌𐴡𐴐𐴞 𐴀𐴠𐴊𐴧𐴠 𐴈𐴠𐴥𐴌𐴟𐴊𐴞𐴀𐴡𐴥𐴓𐴡𐴌𐴠 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴊𐴞𐴉𐴠𐴍𐴝𐴥𐴘𐴧𐴠, 𐴎𐴠𐴀𐴕𐴠 𐴃𐴝𐴌𐴝𐴥 𐴀𐴞𐴥𐴁𐴝𐴌𐴠 𐴀𐴞𐴥𐴁𐴝𐴌 𐴈𐴡𐴃𐴝𐴤 𐴓𐴡𐴘 𐴈𐴡𐴓𐴡𐴃𐴢 𐴉𐴠𐴥𐴓𐴝𐴘 𐴉𐴝𐴌𐴠.¹⁴𐴃𐴝𐴌𐴝𐴥 𐴀𐴝𐴀𐴘𐴢 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴟𐴏𐴃𐴝𐴃𐴢, 𐴀𐴝𐴣𐴀𐴌𐴝 𐴎𐴝𐴕𐴞 𐴊𐴠, 𐴃𐴟𐴀𐴛 𐴏𐴡𐴥𐴘𐴧𐴞 𐴈𐴡𐴀. 𐴃𐴟𐴀𐴛 𐴔𐴝𐴙𐴕𐴐𐴠𐴥 𐴑𐴞𐴦 𐴈𐴡𐴀𐴌 𐴉𐴡𐴌𐴁𐴝 𐴕𐴡 𐴒𐴡𐴌𐴡𐴤, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴀𐴛 𐴃𐴡 𐴇𐴡𐴕𐴡𐴤𐴑𐴞𐴘𐴡𐴌𐴠 𐴉𐴡𐴌𐴡𐴥𐴑 𐴒𐴡𐴌𐴡𐴤 𐴊𐴠 𐴕𐴝𐴥𐴘, 𐴁𐴡𐴥𐴓𐴑𐴠 𐴏𐴡𐴥𐴘𐴧𐴞𐴒𐴡𐴌𐴞 𐴀𐴝𐴓𐴧𐴝𐴌 𐴌𐴝𐴏𐴃𐴝𐴌 𐴃𐴝𐴦𐴓𐴞𐴔 𐴊𐴡. 𐴀𐴝𐴣𐴀𐴌𐴝𐴌𐴠 𐴈𐴡𐴀𐴏𐴝𐴘, 𐴌𐴡𐴔𐴞 𐴁𐴝𐴀𐴣𐴐𐴧𐴝 𐴌𐴠 𐴇𐴝𐴥𐴎𐴝𐴕𐴝 𐴊𐴡𐴦𐴕 𐴎𐴝𐴘𐴠𐴏𐴢 𐴀𐴝𐴏𐴠𐴤 𐴕𐴠 𐴕𐴝𐴥𐴘؟¹⁵𐴀𐴝𐴣𐴀𐴌𐴝 𐴊𐴞𐴦𐴃𐴝𐴔 𐴕𐴠 𐴕𐴝𐴥𐴑𐴞 𐴕𐴡 𐴊𐴞𐴦𐴃𐴝𐴔؟“
𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴃𐴝𐴌𐴝𐴥𐴌 𐴔𐴟𐴕𐴝𐴉𐴠𐴥𐴑𐴞𐴌𐴠 𐴎𐴝𐴕𐴞 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴀𐴠𐴕𐴃𐴝𐴥𐴕 𐴒𐴡𐴌𐴡𐴤𐴌 𐴑𐴞𐴘𐴝𐴥؟ 𐴏𐴝𐴘 𐴁𐴡𐴓𐴧𐴝 𐴀𐴝𐴣𐴀𐴌 𐴇𐴝𐴣𐴏𐴠 𐴀𐴠𐴑𐴧𐴝𐴥𐴕 𐴊𐴞𐴕𐴝𐴥𐴌 𐴀𐴝𐴕𐴡𐴤.“¹⁶𐴃𐴡𐴥𐴘 𐴃𐴝𐴌𐴝𐴥 𐴀𐴝𐴙𐴕𐴧𐴠𐴤. 𐴀𐴞𐴥𐴁𐴝𐴘𐴠 𐴃𐴝𐴌𐴝𐴥𐴌𐴠 𐴈𐴡𐴀𐴌 𐴊𐴠, ”𐴘𐴝𐴀𐴕 𐴇𐴝𐴌 𐴏𐴡𐴥𐴁𐴞 𐴀𐴠𐴊𐴧𐴠 𐴇𐴝𐴌 𐴕𐴝𐴔؟“
𐴃𐴝𐴌𐴝𐴥 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴌𐴡𐴔𐴞 𐴁𐴝𐴀𐴣𐴐𐴧𐴝𐴌.“

¹⁷𐴃𐴡𐴥𐴘 𐴀𐴞𐴏𐴝𐴤𐴘𐴠 𐴃𐴝𐴌𐴝𐴥𐴌𐴠 𐴈𐴡𐴀𐴌 𐴊𐴠, ”𐴎𐴞𐴀𐴕 𐴁𐴝𐴀𐴣𐴐𐴧𐴝𐴌 𐴇𐴞𐴥𐴀𐴕 𐴁𐴝𐴀𐴣𐴐𐴧𐴝𐴌𐴠 𐴊𐴞𐴦𐴘𐴡, 𐴀𐴝𐴦𐴌 𐴎𐴞𐴀𐴕 𐴀𐴝𐴓𐴧𐴝𐴌 𐴇𐴞𐴥𐴀𐴕 𐴀𐴝𐴓𐴧𐴝𐴌𐴠 𐴊𐴞𐴦𐴘𐴡.“
𐴇𐴞𐴥𐴘𐴝𐴕𐴠 𐴃𐴝𐴌𐴝𐴥 𐴀𐴠𐴁𐴧𐴠 𐴃𐴝𐴦𐴅𐴟𐴂𐴢 𐴀𐴡𐴥𐴘𐴒𐴞𐴘𐴡𐴘.

𐴇𐴝𐴥𐴣𐴐𐴡𐴌𐴡𐴌 𐴁𐴝𐴦𐴁𐴟𐴃𐴠 𐴏𐴟𐴥𐴖𐴝𐴓𐴢

¹⁸𐴁𐴝𐴦𐴊𐴠 𐴏𐴝𐴊𐴟𐴑𐴝𐴥𐴘 𐴀𐴡𐴥𐴑𐴧𐴡𐴓𐴢 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴀𐴝𐴙𐴐𐴧𐴠𐴥, 𐴏𐴝𐴊𐴟𐴑𐴝𐴥𐴘 𐴀𐴡𐴥𐴑𐴧𐴡𐴓𐴠 𐴇𐴝𐴥𐴣𐴐𐴡𐴌 𐴕𐴝𐴥𐴘 𐴈𐴡𐴀, 𐴀𐴞𐴥𐴃𐴝𐴌𐴝 𐴀𐴝𐴀𐴘𐴢 𐴀𐴞𐴥𐴁𐴝𐴌𐴠 𐴀𐴠𐴑𐴧𐴝𐴥𐴕 𐴏𐴟𐴥𐴖𐴝𐴓𐴢 𐴒𐴡𐴙𐴅𐴧𐴠𐴥 𐴊𐴠,¹⁹”𐴀𐴟𐴏𐴃𐴝𐴃𐴢, 𐴔𐴟𐴀𐴏𐴝𐴘𐴠 𐴀𐴝𐴣𐴀𐴌𐴝𐴓𐴧𐴝 𐴓𐴠𐴙𐴑𐴧𐴠𐴥 𐴊𐴠, 𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴡𐴌 𐴁𐴝𐴥𐴘 𐴉𐴟𐴀𐴝𐴙𐴕 𐴏𐴝𐴥𐴌𐴝 𐴔𐴡𐴌𐴞𐴎𐴝𐴒𐴡𐴥𐴘 𐴀𐴝𐴦𐴌 𐴀𐴞𐴥𐴃𐴝𐴌 𐴁𐴡𐴖𐴢 𐴃𐴝𐴥𐴘𐴎𐴝𐴒𐴡𐴘, 𐴃𐴡𐴥𐴀𐴘𐴓𐴠 𐴀𐴞𐴥𐴃𐴝𐴌 𐴇𐴠𐴥 𐴁𐴝𐴥𐴘𐴡𐴃𐴧𐴟 𐴁𐴡𐴖𐴢 𐴇𐴞𐴥𐴁𐴝𐴌𐴠 𐴁𐴞𐴘𐴝𐴥 𐴒𐴡𐴌𐴞𐴥𐴉𐴠𐴓𐴝𐴘 𐴕𐴞𐴎𐴡𐴌 𐴁𐴝𐴥𐴘𐴡𐴓𐴧𐴝 𐴕𐴡𐴏𐴡𐴥𐴓𐴢 𐴉𐴡𐴘𐴊𐴝 𐴒𐴡𐴌𐴝𐴥 𐴉𐴡𐴌𐴞𐴁𐴡𐴥.²⁰𐴊𐴡𐴥𐴌𐴡, 𐴇𐴝𐴥𐴣𐴃𐴢 𐴎𐴡𐴕 𐴁𐴝𐴥𐴘 𐴀𐴝𐴐𐴧𐴞𐴥𐴓𐴢. 𐴉𐴡𐴀𐴘𐴓𐴝 𐴖𐴝𐴘𐴠 𐴁𐴡𐴖𐴢 𐴓𐴡𐴦𐴘𐴢, 𐴉𐴟𐴀𐴝𐴙𐴕 𐴏𐴝𐴥𐴌𐴝 𐴔𐴡𐴌𐴞𐴒𐴞𐴘𐴡𐴥𐴘.²¹𐴁𐴝𐴦𐴊𐴠 𐴇𐴞𐴥𐴁𐴝𐴌𐴠 𐴊𐴟𐴏𐴝𐴥𐴌𐴝 𐴖𐴝𐴘𐴠 𐴁𐴞𐴘𐴝𐴥 𐴒𐴡𐴙𐴅𐴧𐴠𐴥, 𐴀𐴝𐴦𐴌 𐴀𐴞𐴥𐴃𐴠 𐴘𐴡𐴥 𐴉𐴟𐴀𐴝𐴙𐴕 𐴏𐴝𐴥𐴌𐴝 𐴔𐴡𐴌𐴞𐴒𐴞𐴘𐴡𐴥𐴘; 𐴃𐴞𐴏𐴝𐴥𐴌𐴝 𐴖𐴝𐴌 𐴇𐴝𐴥𐴓𐴡𐴃𐴢 𐴀𐴡𐴥 𐴇𐴠𐴥𐴕𐴊𐴞𐴓𐴧𐴝 𐴀𐴡𐴥𐴘𐴧𐴠.²²𐴇𐴠𐴥𐴕𐴊𐴞𐴓𐴧𐴝, 𐴇𐴝𐴥𐴣𐴃𐴡 𐴁𐴝𐴥𐴘𐴧𐴠 𐴇𐴞𐴥𐴁𐴝𐴌𐴠 𐴁𐴞𐴘𐴝𐴥 𐴒𐴡𐴌𐴞𐴥 𐴉𐴟𐴀𐴝𐴙𐴕 𐴏𐴝𐴥𐴌𐴝 𐴔𐴡𐴌𐴞𐴒𐴞𐴘𐴡𐴥𐴘. 𐴀𐴝𐴇𐴠𐴥𐴌𐴞𐴃𐴢, 𐴔𐴝𐴘𐴝𐴉𐴟𐴖𐴝 𐴖𐴝 𐴘𐴡𐴥 𐴔𐴡𐴌𐴞𐴒𐴞𐴘𐴡𐴥𐴘.²³𐴇𐴠𐴥 𐴀𐴞𐴥𐴏𐴝𐴉𐴠, 𐴇𐴝𐴥𐴣𐴐𐴡𐴌𐴡𐴌 𐴇𐴝𐴓𐴠 𐴇𐴞𐴥𐴁𐴝 𐴇𐴝𐴌 𐴁𐴡𐴖𐴢 𐴀𐴡𐴥𐴘𐴁𐴡؟ 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴁𐴝𐴌𐴠 𐴃𐴡 𐴇𐴝𐴥𐴣𐴃𐴡 𐴎𐴡𐴕𐴠 𐴕𐴞𐴎𐴡𐴌 𐴁𐴡𐴖𐴢 𐴁𐴝𐴕𐴝𐴀𐴙𐴓𐴢.“

²⁴𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴀𐴠𐴃𐴡𐴓𐴧𐴝𐴤 𐴀𐴠𐴥𐴕𐴝 𐴒𐴡𐴓𐴧𐴡𐴃𐴡𐴃𐴢 𐴀𐴝𐴏𐴡𐴤 𐴊𐴠! 𐴃𐴟𐴣𐴀𐴝𐴥𐴌𐴝 𐴃𐴡 𐴕𐴡 𐴀𐴝𐴓𐴧𐴝𐴌 𐴂𐴝𐴑-𐴑𐴝𐴓𐴝𐴔 𐴎𐴝𐴕𐴡, 𐴀𐴝𐴦𐴌 𐴕𐴡 𐴀𐴝𐴓𐴧𐴝𐴌 𐴑𐴟𐴊𐴟𐴌𐴟𐴃𐴢 𐴎𐴝𐴕𐴡.²⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴣𐴃𐴧𐴠𐴥 𐴀𐴞𐴥𐴃𐴝𐴌𐴝 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴘𐴁𐴡, 𐴇𐴠𐴥𐴣𐴃𐴧𐴠 𐴀𐴞𐴥𐴃𐴝𐴌𐴝 𐴕𐴡 𐴁𐴞𐴘𐴝𐴥 𐴒𐴡𐴌𐴞𐴥𐴁𐴡 𐴀𐴝𐴦𐴌 𐴕𐴡 𐴀𐴞𐴥𐴃𐴝𐴌𐴝𐴌𐴠 𐴁𐴞𐴘𐴝𐴥 𐴊𐴞𐴘𐴝 𐴎𐴝𐴘𐴁𐴡, 𐴁𐴡𐴥𐴓𐴑𐴠 𐴀𐴞𐴥𐴃𐴝𐴌𐴝 𐴀𐴝𐴏𐴔𐴝𐴕𐴡𐴌 𐴉𐴞𐴥𐴌𐴞𐴏𐴃𐴝𐴌 𐴋𐴡𐴥𐴙𐴓𐴧𐴝 𐴁𐴠 𐴀𐴡𐴥𐴘𐴁𐴡.²⁶𐴔𐴡𐴌𐴝 𐴀𐴡𐴥𐴑𐴧𐴡𐴓𐴢 𐴎𐴞𐴕𐴊𐴝 𐴀𐴡𐴥𐴖𐴝𐴌 𐴁𐴝𐴦𐴁𐴟𐴃𐴠 𐴈𐴡𐴘𐴃𐴡𐴤 𐴏𐴝𐴘𐴓𐴠𐴥, 𐴃𐴟𐴣𐴀𐴝𐴥𐴌𐴝 𐴑𐴞𐴥 𐴔𐴟𐴀𐴏𐴝𐴌 𐴑𐴞𐴃𐴝𐴁𐴡𐴃𐴢 𐴎𐴠𐴍𐴠𐴥 𐴕𐴞𐴑𐴞 𐴎𐴡𐴓𐴠𐴌 𐴊𐴠 𐴎𐴝𐴥𐴋𐴧𐴗𐴝𐴌 𐴎𐴞𐴑𐴞𐴥𐴌 𐴀𐴝𐴏𐴠𐴤 𐴇𐴠𐴥𐴍𐴠 𐴕𐴡𐴥 𐴉𐴡𐴌𐴡𐴥, 𐴀𐴝𐴓𐴧𐴝𐴘𐴠 𐴔𐴟𐴀𐴏𐴝𐴌𐴠 𐴀𐴠𐴕𐴊𐴞𐴓𐴧𐴝 𐴈𐴡𐴘𐴧𐴠𐴥 𐴊𐴠, ’𐴀𐴝𐴀𐴛 𐴀𐴡𐴥𐴘𐴓𐴝𐴔 𐴊𐴠 𐴀𐴞𐴁𐴌𐴝𐴇𐴞𐴥𐴔𐴡𐴌 𐴀𐴝𐴓𐴧𐴝, 𐴀𐴞𐴏𐴝𐴈𐴝𐴥𐴑𐴡𐴌 𐴀𐴝𐴓𐴧𐴝, 𐴀𐴠𐴊𐴧𐴠 𐴘𐴝𐴑𐴟𐴁𐴡𐴌 𐴀𐴝𐴓𐴧𐴝؟‘ ²⁷𐴀𐴝𐴓𐴧𐴝 𐴃𐴡 𐴔𐴡𐴌𐴝 𐴀𐴡𐴥𐴑𐴧𐴡𐴓𐴡𐴌 𐴀𐴝𐴓𐴧𐴝 𐴕𐴡, 𐴁𐴡𐴥𐴓𐴑𐴠 𐴎𐴞𐴕𐴊𐴝 𐴀𐴡𐴥𐴑𐴧𐴡𐴓𐴡𐴌 𐴀𐴠𐴥𐴕𐴝. 𐴃𐴟𐴣𐴀𐴝𐴥𐴌𐴝𐴃𐴧𐴟 𐴋𐴡𐴣𐴀𐴌 𐴒𐴡𐴓𐴧𐴡𐴃𐴢 𐴀𐴡𐴥𐴘𐴧𐴠.“

𐴀𐴠𐴁𐴧𐴠 𐴋𐴡𐴣𐴀𐴌 𐴇𐴡𐴥𐴑𐴟𐴔

²⁸𐴀𐴠𐴑𐴎𐴡𐴕 𐴀𐴝𐴓𐴠𐴔 𐴀𐴝𐴀𐴘𐴢 𐴀𐴞𐴥𐴃𐴝𐴌𐴝 𐴁𐴝𐴌𐴝𐴤𐴁𐴝𐴌𐴞 𐴊𐴠𐴥𐴌 𐴊𐴠 𐴉𐴟𐴥𐴙𐴕𐴧𐴠, 𐴀𐴝𐴦𐴌 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴄𐴞𐴥𐴑 𐴎𐴟𐴖𐴝𐴁𐴢 𐴊𐴞𐴘𐴠𐴥 𐴊𐴠 𐴎𐴝𐴕𐴞 𐴀𐴞𐴥𐴁𐴝𐴌𐴠 𐴏𐴟𐴥𐴖𐴝𐴓𐴢 𐴒𐴡𐴌𐴠𐴥𐴌 𐴊𐴠, ”𐴁𐴠𐴒𐴧𐴟𐴥𐴕𐴡𐴌 𐴃𐴟𐴥𐴖𐴝𐴌𐴡 𐴇𐴡𐴥𐴑𐴟𐴔 𐴇𐴡𐴕 𐴕𐴝𐴥𐴕 𐴋𐴡𐴣𐴀𐴌؟“

²⁹𐴀𐴞𐴏𐴝𐴤𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴠𐴁𐴧𐴠 𐴋𐴡𐴣𐴀𐴌 𐴒𐴝𐴥𐴕 𐴀𐴡𐴥𐴙𐴓𐴊𐴠, ’𐴉𐴟𐴥𐴕𐴡, 𐴀𐴡𐴥 𐴀𐴞𐴏𐴌𐴝𐴥𐴙𐴓𐴢! 𐴔𐴝𐴁𐴟𐴊𐴢 𐴀𐴝𐴣𐴀𐴌𐴝𐴌 𐴀𐴝𐴓𐴧𐴝 𐴀𐴡𐴥𐴙𐴓𐴊𐴠 𐴀𐴠𐴑𐴒𐴗𐴝𐴥 𐴔𐴝𐴁𐴟𐴊𐴢.³⁰𐴔𐴝𐴁𐴟𐴊𐴢 𐴃𐴟𐴣𐴀𐴝𐴥𐴌𐴝𐴌 𐴀𐴝𐴓𐴧𐴝𐴌𐴠 𐴕𐴞𐴎𐴡𐴌 𐴉𐴟𐴌𐴝 𐴊𐴞𐴓𐴠, 𐴉𐴟𐴌𐴝 𐴎𐴝𐴕𐴠, 𐴉𐴟𐴌𐴝 𐴊𐴠𐴔𐴝𐴑𐴠, 𐴀𐴠𐴊𐴧𐴠 𐴉𐴟𐴌𐴝 𐴁𐴡𐴓𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴞𐴥𐴁𐴝.‘ ³¹𐴊𐴟𐴘 𐴕𐴡𐴔𐴁𐴡𐴥𐴌𐴡𐴌 𐴒𐴝𐴥𐴕 𐴀𐴡𐴥𐴙𐴓𐴊𐴠, ’𐴕𐴞𐴎𐴡𐴌 𐴀𐴝𐴃𐴠𐴇𐴝𐴣𐴏𐴡𐴥𐴌 𐴔𐴝𐴙𐴕𐴐𐴡𐴥𐴌𐴠 𐴕𐴞𐴎𐴡𐴌 𐴋𐴡𐴥𐴙𐴓𐴧𐴝 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴞𐴥𐴁𐴝.‘ 𐴇𐴠𐴥 𐴊𐴟𐴕𐴞𐴥𐴘𐴝𐴕𐴡𐴌 𐴃𐴟𐴥𐴖𐴝𐴌𐴡 𐴀𐴝𐴌 𐴋𐴡𐴣𐴀𐴌 𐴇𐴡𐴥𐴑𐴟𐴔 𐴕𐴝𐴥𐴘.“

³²𐴀𐴝𐴓𐴠𐴔𐴧𐴗𐴝𐴘𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴐𐴝𐴁𐴝𐴥𐴐𐴢, 𐴀𐴟𐴏𐴃𐴝𐴃𐴢! 𐴃𐴟𐴀𐴛 𐴏𐴡𐴥𐴘𐴧𐴞 𐴈𐴡𐴘𐴧𐴡𐴥, 𐴀𐴝𐴓𐴧𐴝 𐴀𐴠𐴑𐴒𐴗𐴝𐴥 𐴁𐴠 𐴀𐴝𐴏𐴠𐴤, 𐴀𐴞𐴥𐴁𐴝 𐴁𐴝𐴊𐴠 𐴀𐴝𐴌 𐴇𐴡𐴕𐴡𐴤𐴑𐴞𐴘𐴠 𐴕𐴝𐴥𐴘.³³𐴀𐴞𐴥𐴁𐴝𐴌𐴠 𐴉𐴟𐴌𐴝 𐴊𐴞𐴓𐴠, 𐴉𐴟𐴌𐴝 𐴁𐴟𐴊𐴧𐴞𐴥𐴘𐴠, 𐴉𐴟𐴌𐴝 𐴁𐴡𐴓𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴙𐴃𐴧𐴡𐴥, 𐴀𐴝𐴦𐴌 𐴕𐴞𐴎𐴡𐴌 𐴀𐴝𐴃𐴠𐴇𐴝𐴣𐴏𐴡𐴥𐴌 𐴔𐴝𐴙𐴕𐴐𐴡𐴥𐴌𐴠 𐴕𐴞𐴎𐴡𐴌 𐴋𐴡𐴥𐴙𐴓𐴧𐴝 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴙𐴃𐴧𐴡𐴥. 𐴇𐴡𐴥𐴑𐴟𐴔 𐴇𐴠𐴥 𐴊𐴟𐴕𐴞𐴥𐴘𐴝𐴕, 𐴉𐴟𐴌𐴝 𐴑𐴟𐴌𐴁𐴝𐴕𐴞 𐴀𐴠𐴊𐴧𐴠 𐴀𐴡𐴙𐴕𐴧𐴡 𐴑𐴟𐴌𐴁𐴝𐴕𐴞 𐴁𐴠𐴒𐴧𐴟𐴥𐴕𐴡𐴌 𐴃𐴟𐴥𐴖𐴝𐴌𐴡 𐴎𐴡𐴌𐴟𐴌𐴞.“

³⁴𐴀𐴞𐴏𐴝𐴤𐴘𐴠 𐴎𐴠𐴃𐴧𐴡𐴥𐴃𐴢 𐴘𐴡𐴥𐴒𐴧𐴗𐴝𐴘𐴠 𐴁𐴟𐴊𐴧𐴞𐴥𐴌 𐴏𐴝𐴥𐴀𐴣𐴃𐴠 𐴎𐴟𐴖𐴝𐴁𐴢 𐴊𐴞𐴘𐴠𐴥 𐴊𐴠 𐴊𐴠𐴙𐴑𐴧𐴠𐴥, 𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴃𐴧𐴟 𐴊𐴟𐴌𐴠𐴥 𐴕𐴡.“𐴇𐴠𐴥𐴣𐴃𐴧𐴠 𐴓𐴡𐴥𐴃𐴞 𐴇𐴡𐴕𐴡𐴤𐴑𐴞𐴘𐴡𐴃𐴧𐴟 𐴀𐴞𐴥𐴁𐴝𐴌𐴠 𐴀𐴝𐴌 𐴏𐴟𐴥𐴖𐴝𐴓𐴢 𐴒𐴡𐴙𐴃𐴧𐴡𐴥 𐴇𐴞𐴥𐴔𐴧𐴡𐴃𐴠 𐴕𐴡𐴥 𐴊𐴠.

𐴔𐴡𐴀𐴏𐴞𐴤𐴌 𐴁𐴝𐴦𐴁𐴟𐴃𐴠 𐴏𐴟𐴥𐴖𐴝𐴓𐴢

³⁵𐴀𐴞𐴏𐴝𐴤𐴘𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴃𐴝𐴦𐴓𐴞𐴔 𐴊𐴠𐴌 𐴊𐴠 𐴀𐴡𐴑𐴃𐴡𐴥𐴃𐴢 𐴈𐴡𐴀𐴌 𐴊𐴠, ”𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴠 𐴑𐴠𐴀𐴕𐴒𐴡𐴌𐴞 𐴈𐴡𐴀 𐴊𐴠 𐴔𐴡𐴀𐴏𐴞𐴤 𐴊𐴝𐴖𐴟𐴊𐴡𐴌 𐴉𐴟𐴖𐴝؟³⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴊𐴝𐴖𐴟𐴊𐴢 𐴕𐴞𐴎𐴠 𐴃𐴡 𐴂𐴝𐴑-𐴌𐴟𐴀𐴌 𐴇𐴠𐴥𐴊𐴝𐴘𐴧𐴡𐴃𐴠 𐴀𐴠𐴕𐴊𐴞𐴓𐴧𐴝 𐴈𐴡𐴘𐴧𐴠𐴥,’𐴔𐴝𐴁𐴟𐴊𐴠 𐴀𐴝𐴣𐴀𐴌 𐴔𐴝𐴓𐴞𐴑𐴡𐴌𐴠 𐴈𐴡𐴀𐴌 𐴊𐴠,”𐴀𐴝𐴣𐴀𐴌 𐴊𐴠𐴕 𐴋𐴝𐴥𐴑𐴡𐴃𐴧𐴟 𐴁𐴡𐴘𐴧𐴡𐴥,𐴎𐴠𐴃𐴡𐴥𐴑𐴧𐴝𐴓𐴢 𐴉𐴡𐴙𐴅𐴧𐴡𐴕𐴃𐴡 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌 𐴊𐴟𐴐𐴧𐴡𐴕 𐴀𐴡𐴥𐴑𐴧𐴡𐴓𐴢 𐴀𐴡𐴌𐴠𐴃𐴟𐴣𐴀𐴝𐴥𐴣𐴌 𐴉𐴡𐴦𐴌 𐴃𐴡𐴓𐴠 𐴒𐴡𐴌𐴞𐴥 𐴕𐴡𐴥 𐴉𐴠𐴓𐴝𐴘.“ ‘

³⁷𐴊𐴝𐴖𐴟𐴊𐴢 𐴕𐴞𐴎𐴠 𐴃𐴡 𐴀𐴞𐴥𐴁𐴝𐴌𐴠 ’𐴔𐴝𐴓𐴞𐴑‘ 𐴋𐴝𐴙𐴑𐴧𐴠𐴥, 𐴃𐴡𐴥𐴀𐴘𐴓𐴠 𐴀𐴞𐴥𐴁𐴝 𐴇𐴡𐴕 𐴁𐴡𐴃𐴠 𐴊𐴝𐴖𐴟𐴊𐴡𐴌 𐴉𐴟𐴖𐴝 𐴊𐴠؟“𐴁𐴠𐴐𐴝𐴤𐴁𐴞𐴐𐴞𐴤 𐴔𐴝𐴙𐴕𐴐𐴠𐴥 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴀𐴞𐴥𐴁𐴝𐴌 𐴁𐴡𐴘𐴧𐴝𐴕 𐴉𐴟𐴥𐴕𐴝𐴃𐴢 𐴀𐴝𐴐𐴧𐴞𐴥𐴓𐴢.

𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴟𐴥𐴣𐴐𐴞𐴘𐴝𐴌 𐴃𐴝𐴥𐴑𐴞𐴁𐴝𐴌 𐴕𐴡𐴏𐴞𐴥𐴘𐴡𐴃𐴢

³⁸𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴃𐴝𐴦𐴓𐴞𐴔𐴡𐴃𐴢 𐴈𐴡𐴀𐴌 𐴊𐴠, ”𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴟𐴥𐴣𐴐𐴞𐴘𐴝𐴌 𐴃𐴝𐴥𐴙𐴑𐴧𐴡, 𐴎𐴠𐴃𐴝𐴌𐴝𐴤 𐴓𐴝𐴔𐴁𐴝-𐴓𐴝𐴔𐴁𐴝 𐴑𐴟𐴌𐴟𐴃𐴝 𐴉𐴞𐴣𐴊𐴞𐴥 𐴒𐴟𐴥𐴌𐴝𐴉𐴞𐴥𐴌𐴝 𐴒𐴡𐴙𐴃𐴧𐴡𐴥 𐴏𐴝𐴀, 𐴀𐴝𐴦𐴌 𐴁𐴝𐴎𐴝𐴌𐴠-𐴁𐴝𐴎𐴝𐴌𐴠 𐴏𐴡𐴥𐴓𐴝𐴔 𐴉𐴝𐴘𐴃𐴡,³⁹𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝 𐴀𐴡𐴥𐴑𐴧𐴡𐴓𐴡𐴃𐴢 𐴀𐴟𐴣𐴏𐴡𐴓𐴢 𐴃𐴡𐴑𐴧𐴝𐴌 𐴇𐴝𐴊𐴞𐴌𐴝𐴤𐴃𐴢 𐴁𐴡𐴘𐴃𐴡𐴥 𐴀𐴠𐴊𐴧𐴠 𐴔𐴠𐴓𐴝-𐴐𐴡𐴥𐴁𐴝 𐴀𐴡𐴥𐴑𐴧𐴡𐴓𐴡𐴃𐴢 𐴁𐴝𐴌𐴞𐴥𐴑 𐴎𐴝𐴒𐴝𐴃𐴢 𐴁𐴡𐴘𐴃𐴡𐴥 𐴉𐴡𐴏𐴡𐴥𐴕 𐴒𐴡𐴌𐴠𐴥.⁴⁰𐴀𐴠𐴑 𐴔𐴞𐴑𐴧𐴝𐴥𐴃𐴧𐴟 𐴀𐴞𐴥𐴃𐴝𐴌𐴝 𐴌𐴝𐴌𐴞 𐴀𐴡𐴥𐴑𐴧𐴡𐴓𐴡𐴌 𐴒𐴡𐴥𐴌 𐴀𐴡𐴥𐴑𐴧𐴡𐴓𐴢 𐴓𐴟𐴄𐴢 𐴒𐴡𐴌𐴞𐴥𐴉𐴠𐴓𐴠, 𐴀𐴝𐴌𐴀𐴠𐴑 𐴔𐴞𐴑𐴧𐴝𐴥𐴃𐴧𐴟 𐴔𐴝𐴙𐴕𐴐𐴡𐴥𐴌𐴠 𐴊𐴝𐴈𐴝𐴤𐴘 𐴁𐴡𐴓𐴧𐴝 𐴓𐴝𐴔𐴁𐴝-𐴓𐴝𐴔𐴁𐴝 𐴊𐴟𐴖𐴝 𐴒𐴡𐴌𐴠𐴥. 𐴔𐴝𐴕𐴟𐴥𐴙𐴐𐴢 𐴇𐴞𐴥𐴀𐴕𐴠 𐴏𐴝𐴥𐴣𐴎𐴝 𐴁𐴞𐴐𐴞𐴤 𐴋𐴡𐴣𐴀𐴌 𐴉𐴝𐴘𐴁𐴡.“

𐴀𐴠𐴑𐴒𐴗𐴝𐴥 𐴌𐴝𐴌𐴞𐴌 𐴏𐴡𐴥𐴃𐴑𐴝

⁴¹𐴁𐴝𐴦𐴊𐴠 𐴀𐴞𐴏𐴝𐴤 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴊𐴝𐴕-𐴁𐴝𐴐𐴧𐴟𐴤𐴌 𐴔𐴟𐴀𐴕𐴃𐴟 𐴁𐴡𐴙𐴐𐴧𐴠𐴥, 𐴀𐴝𐴦𐴌 𐴊𐴝𐴕-𐴁𐴝𐴐𐴧𐴟𐴤𐴃𐴢 𐴔𐴝𐴙𐴕𐴐𐴠𐴥 𐴄𐴞𐴛𐴝-𐴉𐴡𐴘𐴐𐴝𐴤 𐴇𐴡𐴕𐴊𐴞𐴓𐴧𐴝 𐴊𐴠𐴦𐴌 𐴏𐴝𐴀𐴘𐴢 𐴃𐴝𐴥𐴙𐴑𐴧𐴠. 𐴁𐴡𐴀𐴗𐴃𐴢 𐴃𐴟𐴖𐴝𐴚𐴒𐴡𐴌 𐴀𐴡𐴥𐴑𐴧𐴡𐴓𐴠 𐴁𐴞𐴐𐴞𐴤-𐴁𐴞𐴐𐴞𐴤 𐴊𐴞𐴦𐴘𐴝𐴃𐴢 𐴀𐴝𐴐𐴧𐴞𐴥𐴓𐴢.⁴²𐴀𐴠𐴒𐴧𐴗𐴝𐴤 𐴒𐴡𐴌𐴞𐴉𐴢 𐴌𐴝𐴌𐴞 𐴀𐴝𐴀𐴘𐴢 𐴊𐴟𐴘𐴧𐴝𐴥𐴕 𐴐𐴡𐴥𐴣𐴍𐴡 𐴉𐴡𐴘𐴐𐴝𐴤 𐴊𐴞𐴦𐴘𐴠𐴥, 𐴘𐴝𐴥𐴕𐴞 𐴇𐴡𐴀𐴠𐴑 𐴉𐴞𐴘𐴝𐴤.

⁴³𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴔𐴝𐴃𐴝𐴘 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴎𐴠𐴊𐴟𐴥𐴕𐴠 𐴊𐴝𐴕-𐴁𐴝𐴐𐴧𐴟𐴤𐴃𐴢 𐴏𐴡𐴥𐴃𐴑𐴝 𐴊𐴞𐴦𐴘𐴠𐴥 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌 𐴃𐴟𐴥𐴖𐴝𐴌𐴡 𐴀𐴠 𐴒𐴡𐴌𐴞𐴉𐴢 𐴌𐴝𐴌𐴞 𐴖𐴝𐴘𐴠 𐴁𐴞𐴐𐴞𐴤 𐴊𐴞𐴦𐴘𐴠𐴥;⁴⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴡𐴙𐴕𐴧𐴡 𐴁𐴠𐴒𐴧𐴟𐴥𐴕𐴠 𐴀𐴞𐴥𐴃𐴝𐴌𐴝𐴌 𐴀𐴝𐴄𐴝𐴓𐴞𐴑𐴧𐴝 𐴊𐴡𐴥𐴕𐴡𐴃𐴧𐴟 𐴊𐴞𐴦𐴘𐴠𐴥 𐴊𐴠, 𐴔𐴡𐴕𐴃𐴡𐴌 𐴀𐴞𐴁𐴝𐴤𐴘𐴠 𐴃𐴡 𐴕𐴞𐴎𐴡𐴌 𐴒𐴡𐴌𐴞𐴉𐴢 𐴇𐴝𐴥𐴓𐴡𐴃𐴡𐴃𐴢 𐴁𐴝𐴏𐴞 𐴃𐴝𐴥𐴑𐴞 𐴁𐴡𐴓𐴧𐴝 𐴎𐴞𐴀𐴕 𐴀𐴝𐴐𐴧𐴞𐴥𐴓𐴢 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴊𐴞𐴦𐴉𐴠𐴥𐴓𐴝𐴘𐴧𐴠.“

The Word for the World International

https://app.library.bible/content/87faca8b51c22590