Read 𐴔𐴝𐴌𐴑𐴟𐴏𐴢 11

𐴔𐴝𐴌𐴑𐴟𐴏𐴢11

𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴀𐴞𐴏𐴝𐴤 𐴁𐴝𐴀𐴣𐴐𐴧𐴝𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴒𐴡𐴥𐴙𐴓𐴧𐴠

¹𐴎𐴠𐴣𐴃𐴧𐴠𐴥 𐴀𐴞𐴥𐴃𐴝𐴌𐴝 𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴋𐴝𐴥𐴑𐴠 𐴎𐴝𐴘𐴃𐴟𐴕 𐴉𐴝𐴀𐴌𐴡𐴃𐴢 𐴀𐴝𐴏𐴠𐴤 𐴊𐴠 𐴁𐴠𐴃𐴉𐴠𐴥𐴒𐴞 𐴀𐴠𐴊𐴧𐴠 𐴁𐴠𐴃𐴝𐴥𐴕𐴞𐴘𐴝 𐴉𐴝𐴌𐴝𐴃𐴢 𐴉𐴡𐴀𐴣𐴙𐴐𐴧𐴠, 𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴊𐴟𐴘 𐴎𐴡𐴕 𐴐𐴝𐴥𐴌𐴞𐴃𐴡𐴌𐴠 𐴊𐴞𐴉𐴠𐴍𐴝𐴥𐴘𐴧𐴠,²𐴀𐴞𐴥𐴃𐴝𐴌𐴝𐴌𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀𐴘𐴢, ”𐴃𐴟𐴣𐴀𐴝𐴥𐴌𐴝 𐴔𐴟𐴀𐴔𐴡𐴌 𐴉𐴝𐴌𐴝 𐴒𐴝𐴥𐴕𐴡𐴃𐴢 𐴎𐴡𐴦, 𐴇𐴠𐴥𐴍𐴠 𐴒𐴡𐴥𐴓𐴞 𐴔𐴡𐴃𐴧𐴡𐴌 𐴀𐴠𐴒𐴧𐴗𐴝𐴤 𐴒𐴝𐴊𐴝𐴤𐴌 𐴏𐴡𐴥𐴀 𐴁𐴝𐴙𐴕𐴊𐴝𐴤 𐴓𐴡𐴦𐴃𐴢 𐴉𐴝𐴘𐴁𐴝, 𐴎𐴞𐴁𐴝𐴤𐴌 𐴖𐴡𐴌𐴠 𐴀𐴝𐴙𐴅𐴧𐴡𐴤 𐴇𐴡𐴕𐴡𐴤𐴑𐴞𐴘𐴠 𐴕𐴡𐴥 𐴏𐴡𐴌𐴠𐴤. 𐴘𐴞𐴥𐴁𐴝𐴌𐴠 𐴑𐴟𐴥𐴓𐴞 𐴀𐴠𐴍𐴠𐴥 𐴀𐴝𐴕𐴡𐴤𐴒𐴡𐴘.³𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴀𐴠𐴀𐴕 𐴈𐴡𐴀, ’𐴃𐴟𐴣𐴀𐴝𐴥𐴌𐴝 𐴘𐴝𐴀𐴕 𐴑𐴞𐴘𐴡𐴥𐴓𐴧𐴝 𐴒𐴡𐴌𐴡𐴤𐴌؟‘ 𐴈𐴡𐴘𐴁𐴝𐴤 𐴊𐴠, ’𐴔𐴝𐴓𐴞𐴑𐴡𐴃𐴧𐴟 𐴘𐴞𐴁𐴝𐴤𐴌𐴠 𐴓𐴝𐴒𐴠𐴌.‘ 𐴃𐴡𐴥𐴘 𐴘𐴡𐴥𐴒𐴧𐴗𐴝𐴘𐴠 𐴘𐴞𐴥𐴁𐴝𐴌𐴠 𐴀𐴠𐴥𐴇𐴡𐴕 𐴀𐴠𐴍𐴠𐴥 𐴊𐴞𐴉𐴠𐴍𐴝𐴥𐴘𐴊𐴞𐴁𐴡.“

⁴𐴀𐴞𐴥𐴃𐴝𐴌𐴝 𐴌𐴡𐴖𐴝𐴕𐴝 𐴓𐴡𐴘𐴧𐴠𐴥, 𐴀𐴝𐴦𐴌 𐴒𐴝𐴊𐴝𐴤𐴌 𐴏𐴡𐴥𐴀 𐴖𐴝𐴌𐴠 𐴁𐴝𐴀𐴌𐴑𐴟𐴓𐴠 𐴌𐴝𐴏𐴃𐴝𐴌 𐴖𐴡𐴌𐴠 𐴒𐴡𐴥𐴌𐴡𐴌 𐴊𐴡𐴌𐴡𐴎𐴝𐴃𐴢 𐴁𐴝𐴙𐴕𐴊𐴝𐴤 𐴓𐴡𐴦𐴃𐴢 𐴉𐴝𐴘𐴧𐴠𐴥; 𐴀𐴞𐴥𐴃𐴝𐴌𐴝 𐴘𐴞𐴥𐴁𐴝𐴌𐴠 𐴑𐴟𐴥𐴓𐴞𐴉𐴠𐴓𐴝𐴘𐴧𐴠.⁵𐴔𐴡𐴕𐴃𐴡𐴌 𐴇𐴠𐴥𐴍𐴠 𐴃𐴞𐴥𐴘𐴝𐴘 𐴀𐴝𐴐𐴧𐴞𐴥𐴓𐴢 𐴊𐴠 𐴃𐴝𐴌𐴝𐴥𐴃𐴧𐴟 𐴇𐴡𐴊𐴟𐴥𐴕𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴘𐴧𐴠𐴥 𐴊𐴠, ”𐴃𐴟𐴣𐴀𐴝𐴥𐴌𐴝 𐴑𐴞𐴦 𐴒𐴡𐴌𐴡𐴤𐴌 𐴊𐴠, 𐴒𐴝𐴊𐴝𐴤𐴌 𐴏𐴡𐴥𐴀 𐴖𐴝𐴌𐴠 𐴑𐴟𐴥𐴓𐴡𐴌 𐴊𐴠 𐴕𐴞𐴥𐴑𐴞؟“⁶𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴠𐴕𐴊𐴞𐴓𐴧𐴝 𐴈𐴡𐴘𐴃𐴡𐴤 𐴈𐴡𐴀𐴙𐴓𐴢, 𐴀𐴞𐴥𐴃𐴝𐴌𐴝 𐴃𐴝𐴌𐴝𐴥𐴌𐴠 𐴇𐴠𐴥𐴕𐴊𐴞𐴓𐴧𐴝 𐴈𐴡𐴘𐴧𐴠𐴥, 𐴃𐴡𐴥𐴘 𐴃𐴝𐴌𐴝𐴥 𐴀𐴞𐴥𐴃𐴝𐴌𐴝𐴌𐴠 𐴀𐴠𐴎𐴝𐴎𐴡𐴃𐴢 𐴊𐴞𐴘𐴠𐴥.⁷𐴀𐴞𐴥𐴃𐴝𐴌𐴝 𐴒𐴝𐴊𐴝𐴤𐴌 𐴏𐴡𐴥𐴀 𐴖𐴝𐴌𐴠 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴀𐴝𐴙𐴕𐴧𐴠𐴤, 𐴀𐴝𐴦𐴌 𐴘𐴞𐴥𐴁𐴝𐴌 𐴖𐴡𐴌𐴠 𐴕𐴞𐴎𐴡𐴌 𐴇𐴡𐴦𐴌 𐴀𐴡𐴥𐴑𐴧𐴡𐴓𐴢 𐴁𐴞𐴐𐴝𐴥𐴘𐴊𐴞𐴘𐴠, 𐴀𐴝𐴦𐴌 𐴀𐴞𐴏𐴝𐴤 𐴘𐴞𐴥𐴁𐴝𐴌 𐴖𐴡𐴌𐴠 𐴁𐴡𐴙𐴐𐴧𐴠𐴥.⁸𐴁𐴞𐴐𐴞𐴤 𐴔𐴝𐴙𐴕𐴐𐴠𐴥 𐴕𐴞𐴎𐴡𐴌 𐴇𐴡𐴦𐴌 𐴀𐴡𐴥𐴑𐴧𐴡𐴓𐴢 𐴌𐴝𐴏𐴃𐴝𐴌 𐴖𐴡𐴌𐴠 𐴁𐴞𐴐𐴝𐴥𐴘𐴊𐴞𐴘𐴠, 𐴀𐴝𐴌𐴒𐴟𐴥𐴕𐴠 𐴁𐴝𐴌𐴞𐴎𐴝𐴃𐴧𐴟 𐴉𐴝𐴃𐴝𐴌 𐴋𐴝𐴒𐴧𐴗𐴝 𐴀𐴡𐴥𐴑𐴧𐴡𐴓𐴢 𐴈𐴝𐴍𐴞 𐴁𐴞𐴐𐴝𐴥𐴘𐴊𐴞𐴘𐴠.⁹𐴎𐴠𐴃𐴝𐴌𐴝𐴤 𐴀𐴝𐴒𐴠-𐴀𐴝𐴒𐴠 𐴀𐴠𐴊𐴧𐴠 𐴉𐴞𐴏𐴠𐴤-𐴉𐴞𐴏𐴠𐴤 𐴎𐴝𐴦𐴃𐴢 𐴀𐴝𐴐𐴧𐴞𐴥𐴓𐴢, 𐴀𐴞𐴥𐴃𐴝𐴌𐴝 𐴒𐴟𐴎𐴡𐴌𐴞-𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠,”𐴇𐴡𐴥𐴏𐴝𐴕𐴝!”𐴔𐴟𐴁𐴝𐴌𐴠𐴑 𐴀𐴟𐴁𐴝𐴤 𐴎𐴞𐴁𐴝𐴤 𐴔𐴝𐴁𐴟𐴊𐴡𐴌 𐴕𐴝𐴔𐴠 𐴀𐴝𐴘𐴧𐴠𐴤𐴌.

¹⁰”𐴔𐴟𐴁𐴝𐴌𐴠𐴑 𐴀𐴝𐴣𐴀𐴌𐴝𐴌 𐴁𐴝𐴉𐴢 𐴊𐴝𐴖𐴟𐴊𐴡𐴌 𐴌𐴝𐴙𐴅𐴧𐴡 𐴎𐴞𐴘𐴝𐴥𐴕 𐴀𐴝𐴘𐴧𐴠𐴤𐴌.”𐴀𐴠𐴁𐴧𐴠 𐴖𐴡𐴌𐴠 𐴀𐴝𐴏𐴔𐴝𐴕𐴡𐴃𐴢 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴀𐴡𐴥𐴑!“

¹¹𐴀𐴞𐴏𐴝𐴤 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴒𐴡𐴥𐴓𐴞 𐴁𐴝𐴦𐴊𐴠, 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴀𐴟𐴍𐴝𐴥𐴕𐴡𐴃𐴢 𐴒𐴞𐴦𐴘𐴠𐴥; 𐴀𐴝𐴦𐴌 𐴏𐴝𐴘𐴌𐴡𐴥𐴔𐴞𐴑𐴧𐴝 𐴁𐴠𐴒𐴧𐴟𐴥𐴕 𐴏𐴝𐴀𐴘𐴧𐴡𐴌𐴠, 𐴇𐴝𐴥𐴣𐴎𐴞𐴕𐴧𐴝 𐴀𐴡𐴥𐴘𐴒𐴞𐴘𐴡𐴘 𐴊𐴠 𐴀𐴞𐴥𐴏𐴝𐴉𐴠 𐴁𐴝𐴌𐴡𐴥 𐴎𐴡𐴕 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴉𐴟𐴥𐴖𐴝𐴣𐴃𐴞 𐴓𐴡𐴦𐴘𐴢 𐴁𐴠𐴃𐴝𐴥𐴕𐴞𐴘𐴝𐴃𐴢 𐴒𐴞𐴦𐴘𐴠𐴥𐴒𐴡𐴘.

𐴋𐴟𐴣𐴙𐴌-𐴒𐴝𐴏𐴡𐴌𐴠 𐴁𐴡𐴊𐴧𐴟𐴖𐴝

¹²𐴃𐴝𐴌𐴉𐴡𐴌 𐴊𐴞𐴕، 𐴎𐴠𐴣𐴃𐴧𐴠𐴥 𐴀𐴞𐴥𐴃𐴝𐴌𐴝 𐴁𐴠𐴃𐴝𐴥𐴕𐴞𐴘𐴝𐴃𐴧𐴟 𐴁𐴝𐴐𐴝𐴥 𐴓𐴡𐴥𐴘𐴧𐴠, 𐴀𐴞𐴏𐴝𐴤𐴃𐴧𐴟 𐴁𐴟𐴥𐴑 𐴓𐴝𐴙𐴒𐴧𐴠𐴥.¹³𐴀𐴞𐴥𐴁𐴝𐴘𐴠 𐴊𐴟𐴌𐴡𐴃𐴧𐴟 𐴃𐴝𐴥𐴘 𐴉𐴝𐴃𐴝 𐴉𐴟𐴌𐴝𐴘𐴧𐴝 𐴀𐴠𐴒𐴧𐴗𐴝𐴤 𐴋𐴟𐴣𐴙𐴌-𐴒𐴝𐴏𐴢 𐴊𐴠𐴑𐴞𐴥, 𐴘𐴞𐴥𐴁𐴝𐴃𐴢 𐴒𐴟𐴓𐴝 𐴀𐴝𐴏𐴠𐴤 𐴕𐴠𐴥 𐴏𐴝𐴘𐴃𐴡𐴥 𐴒𐴞𐴦𐴘𐴠𐴥; 𐴔𐴡𐴕𐴃𐴡𐴌 𐴀𐴞𐴥𐴁𐴝 𐴒𐴝𐴏𐴢 𐴏𐴗𐴝𐴥𐴌 𐴀𐴞𐴥𐴣𐴘𐴡𐴃𐴢 𐴀𐴝𐴙𐴐𐴧𐴠𐴥 𐴌𐴝𐴥𐴌, 𐴉𐴝𐴃𐴝 𐴁𐴝𐴊𐴠 𐴀𐴝𐴌 𐴑𐴠𐴏𐴧𐴟𐴥 𐴓𐴡𐴦𐴃𐴢 𐴕𐴡𐴥 𐴉𐴝𐴦, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥𐴣𐴃𐴧𐴠 𐴋𐴟𐴣𐴙𐴌 𐴒𐴟𐴓𐴝 𐴊𐴡𐴥𐴌𐴞𐴁𐴝𐴌 𐴔𐴡𐴀𐴏𐴟𐴔 𐴕𐴡.¹⁴𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴁𐴝𐴘𐴠 𐴒𐴝𐴏𐴢 𐴏𐴗𐴝𐴥𐴌𐴠 𐴈𐴡𐴀𐴌 𐴊𐴠, ”𐴀𐴝𐴌 𐴇𐴡𐴕𐴡𐴤𐴊𐴞𐴕 𐴃𐴡𐴌𐴃𐴧𐴟 𐴇𐴡𐴕𐴡𐴤𐴑𐴞𐴘𐴠 𐴒𐴟𐴓𐴝 𐴇𐴝𐴥𐴘 𐴕𐴡 𐴉𐴝𐴌𐴡𐴗𐴑.“𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕𐴠 𐴈𐴡𐴃𐴝𐴤 𐴇𐴞𐴥𐴘𐴝𐴕 𐴉𐴟𐴥𐴙𐴕𐴧𐴞𐴓𐴢.

𐴀𐴞𐴏𐴝𐴤𐴘𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴢 𐴂𐴝𐴑-𐴏𐴝𐴥𐴉𐴢 𐴒𐴡𐴙𐴅𐴧𐴠𐴥

¹⁵𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴉𐴡𐴀𐴣𐴙𐴐𐴧𐴠. 𐴀𐴞𐴏𐴝𐴤 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴀𐴟𐴍𐴝𐴥𐴕𐴡𐴃𐴢 𐴒𐴡𐴥𐴓𐴞, 𐴎𐴠𐴃𐴝𐴌𐴝𐴤 𐴇𐴠𐴥𐴍𐴠 𐴁𐴠𐴏𐴝 𐴑𐴞𐴕𐴝 𐴒𐴡𐴌𐴠𐴥𐴌 𐴀𐴞𐴥𐴃𐴝𐴌𐴝𐴌𐴠 𐴓𐴡𐴌𐴝𐴘𐴊𐴞𐴘𐴝𐴃𐴢 𐴊𐴡𐴙𐴅𐴧𐴠, 𐴀𐴝𐴦𐴌 𐴁𐴝𐴄𐴧𐴝 𐴁𐴝𐴥𐴚𐴒𐴡𐴘𐴝𐴌 𐴄𐴠𐴁𐴞𐴥𐴓𐴢 𐴀𐴠𐴊𐴧𐴠 𐴈𐴡𐴘𐴃𐴡𐴌 𐴁𐴠𐴏𐴡𐴘𐴝𐴌 𐴁𐴡𐴘𐴍𐴡𐴥𐴕𐴞 𐴀𐴡𐴥𐴑𐴧𐴡𐴓𐴢 𐴕𐴝𐴃𐴋𐴞𐴘𐴝𐴒𐴝𐴌𐴝𐴘 𐴊𐴞𐴘𐴠𐴥.¹⁶𐴀𐴞𐴥𐴁𐴝𐴘𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴀𐴟𐴍𐴝𐴥𐴕 𐴁𐴝𐴥𐴘 𐴇𐴡𐴕𐴡𐴤𐴑𐴞𐴘𐴡𐴌𐴠 𐴔𐴝𐴓𐴏𐴝𐴥𐴔𐴝𐴕 𐴓𐴡𐴘𐴎𐴝𐴘𐴃𐴡𐴥 𐴕𐴡𐴥 𐴊𐴠.¹⁷𐴀𐴞𐴥𐴁𐴝𐴘𐴠 𐴃𐴝𐴦𐴓𐴞𐴔𐴡𐴃𐴢 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴂𐴝𐴑-𐴑𐴝𐴓𐴝𐴔𐴡𐴃𐴢 𐴑𐴞 𐴘𐴝𐴀𐴕 𐴕𐴝𐴥𐴘, ’𐴀𐴝𐴣𐴀𐴌 𐴒𐴡𐴥𐴌𐴡𐴌𐴠 𐴃𐴝𐴔𐴝𐴥𐴔 𐴑𐴡𐴗𐴔 𐴀𐴡𐴥𐴑𐴧𐴡𐴓𐴡𐴓𐴧𐴝 𐴔𐴟𐴕𐴝𐴎𐴝𐴃𐴡𐴌 𐴒𐴡𐴥𐴌 𐴈𐴡𐴖𐴝𐴤 𐴎𐴝𐴘𐴁𐴡‘ ؟ 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴃𐴡 𐴇𐴞𐴥𐴘𐴝𐴕𐴡𐴌𐴠 𐴋𐴝𐴈𐴝𐴣𐴙𐴄𐴡𐴌 𐴀𐴝𐴋𐴧𐴝-𐴈𐴝𐴥𐴕𐴝 𐴁𐴝𐴕𐴝𐴘𐴉𐴠𐴥𐴓𐴝𐴘𐴧𐴡.“

¹⁸𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴠 𐴇𐴞𐴥𐴘𐴝𐴕 𐴉𐴟𐴥𐴕𐴞 𐴀𐴞𐴥𐴁𐴝𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴁𐴝𐴌 𐴔𐴡𐴑𐴝 𐴃𐴟𐴖𐴝𐴃𐴢 𐴀𐴝𐴐𐴧𐴞𐴥𐴓𐴢. 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴋𐴡𐴦𐴌𐴝𐴘𐴃𐴡𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕 𐴀𐴞𐴥𐴁𐴝𐴌 𐴃𐴝𐴦𐴓𐴞𐴔𐴠 𐴀𐴝𐴔𐴧𐴟𐴥𐴑 𐴀𐴡𐴥𐴘𐴎𐴝𐴘𐴃𐴡𐴘.

¹⁹𐴀𐴝𐴦𐴌 𐴎𐴠𐴣𐴃𐴧𐴠𐴥 𐴇𐴝𐴥𐴣𐴎𐴞𐴕𐴧𐴝 𐴀𐴡𐴥𐴘𐴧𐴠, 𐴀𐴞𐴏𐴝𐴤 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕 𐴐𐴡𐴥𐴀𐴌𐴡𐴌 𐴁𐴝𐴀𐴌𐴠 𐴒𐴞𐴦𐴘𐴠𐴥𐴒𐴡𐴘.

𐴉𐴟𐴥𐴖𐴝𐴘𐴧𐴝 𐴋𐴟𐴣𐴙𐴌-𐴒𐴝𐴏𐴡𐴃𐴧𐴟 𐴏𐴠𐴥𐴁𐴡𐴑

²⁰𐴁𐴞𐴀𐴕𐴧𐴝 𐴀𐴞𐴥𐴃𐴝𐴌𐴝 𐴈𐴠𐴥𐴕𐴃𐴟 𐴎𐴝𐴦𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴋𐴟𐴣𐴙𐴌-𐴒𐴝𐴏𐴢 𐴏𐴗𐴝𐴥 𐴐𐴞𐴥𐴛𐴡𐴌𐴡𐴃𐴧𐴟 𐴓𐴡𐴥𐴃𐴞 𐴉𐴟𐴥𐴖𐴝𐴘𐴒𐴞𐴘𐴡𐴘 𐴊𐴠 𐴊𐴠𐴙𐴑𐴧𐴠𐴥.²¹𐴉𐴞𐴃𐴡𐴌𐴡𐴃𐴧𐴟 𐴔𐴡𐴕𐴡𐴃𐴢 𐴀𐴟𐴍𐴞𐴤 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴌𐴝𐴁𐴧𐴞𐴥, 𐴏𐴡𐴀, 𐴃𐴟𐴀𐴛 𐴁𐴡𐴊𐴧𐴟𐴖𐴝 𐴊𐴞𐴀𐴓𐴝 𐴊𐴠 𐴋𐴟𐴣𐴙𐴌-𐴒𐴝𐴏𐴢 𐴏𐴗𐴝𐴥 𐴉𐴟𐴥𐴖𐴝𐴘𐴒𐴞𐴘𐴡𐴘.“

²²𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴓𐴧𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴌𐴝𐴑𐴡𐴥.²³𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴎𐴠𐴦 𐴑𐴞𐴘𐴠𐴥 𐴀𐴠 𐴉𐴝𐴀𐴌𐴒𐴗𐴝𐴥𐴌𐴠 𐴀𐴠𐴀𐴕 𐴈𐴡𐴀, ’𐴀𐴟𐴍𐴞𐴤 𐴊𐴡𐴙𐴅𐴧𐴝𐴃𐴢 𐴉𐴡𐴌𐴒𐴡𐴥𐴘,‘ 𐴀𐴝𐴦𐴌 𐴕𐴞𐴎𐴡𐴌 𐴊𐴞𐴓𐴡𐴃𐴢 𐴇𐴡𐴕𐴡𐴤 𐴐𐴡𐴥𐴑 𐴕𐴡 𐴌𐴝𐴑𐴠𐴥 𐴁𐴡𐴥𐴓𐴑𐴠 𐴎𐴞𐴘𐴝𐴥𐴕 𐴈𐴡𐴘𐴧𐴠𐴥 𐴇𐴞𐴥𐴘𐴝𐴕 𐴀𐴡𐴥𐴘𐴁𐴡 𐴊𐴠 𐴁𐴞𐴐𐴧𐴝𐴥𐴐𐴢 𐴒𐴡𐴌𐴠𐴥, 𐴃𐴡𐴥𐴀𐴘𐴓𐴠 𐴘𐴡𐴥𐴒𐴧𐴗𐴝𐴓𐴧𐴝 𐴇𐴞𐴥𐴘𐴝𐴕 𐴀𐴡𐴥𐴘𐴁𐴡.²⁴𐴇𐴠𐴥𐴃𐴡𐴓𐴧𐴝, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴃𐴟𐴣𐴀𐴝𐴥𐴌𐴝 𐴊𐴟𐴖𐴝𐴃𐴢 𐴔𐴝𐴎𐴠𐴥 𐴎𐴞𐴀𐴕 𐴔𐴝𐴒𐴡, 𐴇𐴞𐴥𐴀𐴕 𐴉𐴝𐴘𐴉𐴠𐴓𐴝𐴘𐴧𐴡 𐴁𐴡𐴥𐴓𐴞 𐴁𐴞𐴐𐴧𐴝𐴥𐴐𐴢 𐴒𐴡𐴙𐴅𐴧𐴡𐴥, 𐴃𐴡𐴥𐴘 𐴃𐴟𐴣𐴀𐴝𐴥𐴌𐴝𐴌𐴠 𐴇𐴞𐴥𐴀𐴕 𐴊𐴞𐴦𐴘𐴝 𐴎𐴝𐴘𐴁𐴡.²⁵𐴎𐴠𐴣𐴃𐴧𐴠𐴥 𐴃𐴟𐴣𐴀𐴝𐴥𐴌𐴝 𐴃𐴞𐴥𐴘𐴝𐴘 𐴊𐴟𐴖𐴝 𐴒𐴡𐴌𐴡𐴤, 𐴇𐴠𐴥𐴣𐴃𐴧𐴠 𐴇𐴡𐴕𐴡𐴤𐴑𐴞𐴘𐴡𐴌 𐴀𐴟𐴓𐴋𐴝 𐴑𐴠𐴏𐴧𐴟𐴥 𐴃𐴝𐴥𐴑𐴞𐴓𐴠 𐴘𐴡𐴥𐴒𐴧𐴗𐴝𐴌𐴠 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴡, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝𐴌 𐴀𐴝𐴏𐴔𐴝𐴕𐴞 𐴁𐴝𐴉𐴠 𐴘𐴡𐴥 𐴃𐴟𐴣𐴀𐴝𐴥𐴌𐴝𐴌𐴠 𐴃𐴟𐴣𐴀𐴝𐴥𐴌𐴝𐴌 𐴈𐴡𐴏𐴟𐴥𐴌𐴞 𐴔𐴝𐴉𐴢 𐴒𐴡𐴌𐴞𐴥 𐴊𐴠.²⁶𐴔𐴡𐴕𐴃𐴡𐴌 𐴎𐴡𐴊𐴞 𐴔𐴝𐴉𐴢 𐴕𐴡 𐴒𐴡𐴌𐴡𐴤, 𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝𐴌 𐴀𐴝𐴏𐴔𐴝𐴕𐴞 𐴁𐴝𐴉𐴠 𐴘𐴡𐴥 𐴃𐴟𐴣𐴀𐴝𐴥𐴌𐴝𐴌 𐴈𐴡𐴏𐴟𐴥𐴌𐴞 𐴔𐴝𐴉𐴢 𐴕𐴡 𐴒𐴡𐴌𐴞𐴥𐴁𐴡.“

𐴀𐴞𐴏𐴝𐴤𐴌 𐴀𐴝𐴊𐴞𐴥𐴑𐴝𐴌𐴡𐴌 𐴁𐴝𐴦𐴁𐴟𐴃𐴠 𐴏𐴟𐴥𐴖𐴝𐴓𐴢

²⁷𐴀𐴞𐴥𐴃𐴝𐴌𐴝 𐴀𐴝𐴁𐴝𐴌 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴀𐴝𐴙𐴐𐴧𐴠𐴥. 𐴀𐴞𐴏𐴝𐴤 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴒𐴟𐴥𐴌𐴝𐴉𐴞𐴥𐴌𐴝 𐴒𐴡𐴌𐴠𐴥𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴢, 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴢, 𐴀𐴠𐴊𐴧𐴠 𐴔𐴟𐴌𐴟𐴁𐴧𐴞 𐴀𐴡𐴥𐴑𐴧𐴡𐴓𐴢 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴀𐴝𐴙𐴐𐴧𐴠𐴥,²⁸𐴀𐴝𐴦𐴌 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴈𐴝𐴔 𐴀𐴞𐴀𐴕 𐴑𐴞𐴦 𐴀𐴝𐴊𐴞𐴥𐴑𐴝𐴌𐴠 𐴒𐴡𐴌𐴡𐴤𐴌؟ 𐴀𐴞𐴀𐴕 𐴒𐴡𐴌𐴞𐴥 𐴁𐴡𐴓𐴧𐴝 𐴃𐴟𐴣𐴀𐴝𐴥𐴣𐴌𐴠 𐴀𐴠 𐴀𐴝𐴊𐴞𐴥𐴑𐴝𐴌 𐴇𐴡𐴕𐴠 𐴊𐴞𐴦𐴘𐴠𐴥؟“

²⁹𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴘𐴡𐴥 𐴃𐴟𐴣𐴀𐴝𐴥𐴌𐴝𐴃𐴧𐴟 𐴀𐴠𐴑𐴧𐴝𐴥𐴕 𐴏𐴟𐴥𐴖𐴝𐴓𐴢 𐴉𐴟𐴏𐴝𐴥𐴌 𐴒𐴡𐴌𐴞𐴥𐴘𐴟𐴔, 𐴀𐴝𐴣𐴀𐴌𐴠𐴥 𐴎𐴟𐴖𐴝𐴁𐴢 𐴊𐴞𐴘𐴡, 𐴁𐴝𐴦𐴊𐴠 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴘𐴧𐴟𐴥𐴔 𐴀𐴝𐴀𐴛 𐴀𐴞𐴀𐴕 𐴑𐴞𐴦 𐴀𐴝𐴊𐴞𐴥𐴑𐴝𐴌𐴠 𐴒𐴡𐴌𐴞𐴥𐴌 𐴊𐴠.³⁰𐴀𐴝𐴣𐴀𐴌𐴠𐴥 𐴎𐴟𐴖𐴝𐴁𐴢 𐴊𐴡 𐴏𐴝𐴥𐴘, 𐴘𐴝𐴇𐴝𐴥𐴘𐴝𐴘𐴠 𐴁𐴝𐴥𐴂𐴄𐴞𐴏𐴔𐴝 𐴊𐴞𐴥𐴁𐴝𐴌 𐴀𐴝𐴊𐴞𐴥𐴑𐴝𐴌 𐴉𐴝𐴀𐴙𐴓𐴢 𐴊𐴠 𐴀𐴝𐴏𐴔𐴝𐴕𐴡𐴃𐴧𐴟 𐴕𐴠𐴥 𐴕𐴝𐴥𐴑𐴞 𐴀𐴞𐴕𐴏𐴝𐴥𐴕 𐴀𐴡𐴃𐴧𐴟؟“

³¹𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴀𐴝𐴉𐴡𐴤𐴏𐴡𐴃𐴢 𐴁𐴞𐴘𐴝𐴏𐴝𐴕𐴝 𐴒𐴡𐴌𐴠𐴥𐴌 𐴊𐴠, ”𐴎𐴡𐴊𐴞 𐴀𐴝𐴣𐴀𐴌𐴝 𐴈𐴡𐴀𐴘𐴢, ’𐴀𐴝𐴏𐴔𐴝𐴕 𐴀𐴡𐴃𐴧𐴟,‘ 𐴀𐴞𐴥𐴁𐴝𐴘𐴠 𐴈𐴡𐴘𐴁𐴡𐴤 𐴊𐴠, ’𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝 𐴀𐴞𐴥𐴁𐴝𐴌𐴠 𐴁𐴞𐴐𐴧𐴝𐴥𐴐𐴢 𐴑𐴞𐴘𐴝𐴥 𐴕𐴡𐴥 𐴒𐴡𐴌𐴡𐴤؟‘³²𐴔𐴡𐴕𐴃𐴡𐴌 𐴎𐴡𐴊𐴞 𐴈𐴡𐴀𐴘𐴢, ’𐴀𐴞𐴕𐴏𐴝𐴥𐴕 𐴀𐴡𐴃𐴧𐴟‘ 𐴃𐴡𐴥𐴀𐴘𐴓𐴠؟“ 𐴀𐴞𐴥𐴃𐴝𐴌𐴝 𐴔𐴝𐴙𐴕𐴐𐴡𐴥𐴌𐴠 𐴋𐴡𐴦𐴌𐴝𐴘𐴃𐴡𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴠𐴒𐴧𐴟𐴥𐴕𐴠 𐴘𐴝𐴇𐴝𐴥𐴘𐴝 𐴕𐴡𐴁𐴞 𐴊𐴠 𐴔𐴝𐴙𐴕𐴃𐴡.

³³𐴇𐴠𐴥𐴃𐴡𐴓𐴧𐴝 𐴀𐴞𐴥𐴃𐴝𐴌𐴝 𐴀𐴞𐴏𐴝𐴤𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝 𐴕𐴡 𐴎𐴝𐴕𐴞.“
𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴡𐴥𐴀𐴘𐴓𐴠 𐴀𐴝𐴀𐴛 𐴘𐴡𐴥 𐴃𐴟𐴣𐴀𐴝𐴥𐴌𐴝𐴌𐴠 𐴕𐴡 𐴈𐴡𐴘𐴧𐴟𐴥𐴔 𐴀𐴝𐴀𐴛 𐴀𐴞𐴀𐴕 𐴑𐴞𐴦 𐴀𐴝𐴊𐴞𐴥𐴑𐴝𐴌𐴠 𐴒𐴡𐴌𐴞𐴥𐴌.“

The Word for the World International

https://app.library.bible/content/87faca8b51c22590