𐴔𐴝𐴌𐴑𐴟𐴏𐴢 13を読んでください。

𐴔𐴝𐴌𐴑𐴟𐴏𐴢13

𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴢 𐴊𐴡𐴥𐴚𐴐𐴡 𐴀𐴡𐴥𐴖𐴝𐴌 𐴀𐴝𐴒𐴟𐴕 𐴈𐴡𐴃𐴝𐴤

¹𐴀𐴞𐴏𐴝𐴤 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴧𐴟 𐴁𐴝𐴀𐴌𐴠 𐴎𐴝𐴦𐴌𐴒𐴡𐴥𐴘 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴞𐴥𐴁𐴝𐴌 𐴀𐴠𐴥𐴎𐴧𐴡𐴕 𐴐𐴝𐴥𐴌𐴞𐴃𐴠 𐴈𐴡𐴀𐴌 𐴊𐴠, ”𐴀𐴟𐴏𐴃𐴝𐴃𐴢, 𐴏𐴡𐴀, 𐴑𐴠𐴀𐴕 𐴐𐴟𐴥𐴕𐴊𐴡𐴌-𐴐𐴟𐴥𐴕𐴊𐴡𐴌 𐴉𐴝𐴃𐴧𐴡𐴥𐴌 𐴀𐴠𐴊𐴧𐴠 𐴑𐴠𐴀𐴕 𐴐𐴟𐴥𐴕𐴊𐴡𐴌-𐴐𐴟𐴥𐴕𐴊𐴡𐴌 𐴁𐴞𐴓𐴧𐴞𐴥𐴚!“

²𐴀𐴞𐴏𐴝𐴤𐴘𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴘 𐴀𐴠 𐴋𐴡𐴣𐴀𐴌-𐴋𐴡𐴣𐴀𐴌 𐴁𐴞𐴓𐴧𐴞𐴥𐴚 𐴀𐴞𐴀𐴕 𐴊𐴠𐴑𐴡𐴥𐴌 𐴊𐴠 𐴕𐴠𐴥؟ 𐴀𐴠𐴍𐴠𐴥 𐴀𐴠𐴒𐴧𐴗𐴝𐴤 𐴉𐴝𐴃𐴧𐴡𐴥𐴌𐴡𐴌 𐴖𐴡𐴌𐴠 𐴀𐴝𐴌 𐴀𐴠𐴒𐴧𐴗𐴝𐴤 𐴉𐴝𐴃𐴧𐴡𐴥𐴌 𐴕𐴡 𐴃𐴝𐴥𐴑𐴞𐴁𐴡, 𐴇𐴞𐴥𐴀𐴕 𐴉𐴡𐴃𐴧𐴞𐴥 𐴀𐴠𐴑𐴒𐴗𐴝𐴥𐴌𐴠 𐴉𐴠𐴥𐴓𐴝𐴘𐴊𐴞𐴘𐴝 𐴎𐴝𐴘𐴁𐴡.“

𐴑𐴞𐴘𐴝𐴔𐴡𐴃𐴡𐴌 𐴀𐴝𐴓𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴢

³𐴀𐴝𐴦𐴌 𐴀𐴞𐴏𐴝𐴤 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴔𐴟𐴀𐴔𐴡𐴌 𐴎𐴝𐴘𐴃𐴟𐴕 𐴉𐴝𐴀𐴌𐴡𐴃𐴢 𐴁𐴡𐴘𐴍𐴝𐴤 𐴀𐴝𐴐𐴧𐴞𐴥𐴓𐴢 𐴊𐴠 𐴀𐴡𐴑𐴃𐴡𐴥𐴃𐴢, 𐴉𐴞𐴃𐴡𐴌, 𐴘𐴝𐴑𐴟𐴁𐴢, 𐴘𐴡𐴇𐴝𐴥𐴕𐴧𐴝 𐴀𐴠𐴊𐴧𐴠 𐴀𐴠𐴕𐴊𐴠𐴌𐴞𐴘𐴝𐴏𐴠 𐴀𐴝𐴙𐴊𐴧𐴡𐴕𐴠 𐴀𐴞𐴥𐴁𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠,⁴”𐴀𐴝𐴣𐴀𐴌𐴝𐴌𐴠 𐴈𐴡𐴀𐴕𐴝, 𐴇𐴞𐴥𐴀𐴕 𐴇𐴡𐴣𐴃𐴧𐴠𐴥 𐴀𐴡𐴥𐴘𐴁𐴡 𐴊𐴠𐴥؟ 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴉𐴟𐴌𐴝 𐴀𐴡𐴥𐴘𐴁𐴝𐴌 𐴀𐴡𐴑𐴃𐴡𐴥 𐴀𐴝𐴙𐴐𐴧𐴠𐴥 𐴊𐴠 𐴇𐴞𐴥𐴘𐴝𐴕𐴡𐴌 𐴀𐴝𐴓𐴝𐴔𐴡𐴃𐴢 𐴑𐴞𐴦 𐴀𐴡𐴥𐴘𐴁𐴡؟“

⁵𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴖𐴝𐴤𐴃𐴢 𐴊𐴡𐴙𐴅𐴧𐴠 𐴊𐴠, ”𐴏𐴝𐴘𐴧𐴡𐴥, 𐴇𐴡𐴕𐴡𐴤𐴑𐴞𐴘𐴠 𐴎𐴠𐴕 𐴃𐴟𐴣𐴀𐴝𐴥𐴌𐴝𐴌𐴠 𐴒𐴡𐴓𐴧𐴡𐴃𐴡𐴃𐴢 𐴕𐴡 𐴓𐴡𐴘𐴎𐴝.⁶𐴁𐴡𐴀𐴗𐴃𐴢 𐴎𐴡𐴕𐴠 𐴀𐴝𐴣𐴀𐴌 𐴕𐴝𐴔𐴠 𐴀𐴝𐴀𐴘𐴢 𐴈𐴡𐴘𐴁𐴡𐴤 𐴊𐴠, ’𐴀𐴝𐴀𐴛 𐴀𐴞𐴥𐴁𐴝,‘ 𐴀𐴞𐴥𐴃𐴝𐴌𐴝 𐴁𐴡𐴀𐴗𐴃𐴢 𐴎𐴡𐴕𐴡𐴌𐴠 𐴒𐴡𐴓𐴧𐴡𐴃𐴡𐴃𐴢 𐴓𐴡𐴘𐴎𐴝𐴘𐴁𐴡𐴥𐴘.⁷𐴎𐴠𐴣𐴃𐴧𐴠𐴥 𐴃𐴟𐴣𐴀𐴝𐴥𐴌𐴝 𐴓𐴝𐴌𐴝𐴥𐴙𐴌 𐴀𐴝𐴁𐴝𐴏𐴢 𐴀𐴠𐴊𐴧𐴠 𐴓𐴝𐴌𐴝𐴥𐴙𐴌 𐴈𐴡𐴥𐴁𐴡𐴌𐴝-𐴈𐴡𐴥𐴁𐴡𐴌𐴞 𐴀𐴡𐴥𐴑𐴧𐴡𐴓𐴢 𐴉𐴟𐴥𐴕𐴞𐴁𐴝, 𐴕𐴡 𐴋𐴡𐴦𐴌𐴝𐴘𐴧𐴡𐴥; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴀𐴕 𐴀𐴡𐴥𐴖𐴝𐴌 𐴎𐴡𐴌𐴟𐴌, 𐴔𐴡𐴕𐴃𐴡𐴌 𐴇𐴞𐴥𐴘𐴝𐴓𐴝 𐴘𐴡𐴥 𐴀𐴝𐴇𐴠𐴥𐴌𐴡𐴃𐴢 𐴀𐴡𐴥𐴘𐴁𐴡 𐴊𐴠 𐴕𐴡.⁸𐴀𐴠𐴑 𐴑𐴡𐴗𐴔𐴠 𐴀𐴝𐴌𐴀𐴠𐴑 𐴑𐴡𐴗𐴔𐴡𐴌 𐴀𐴟𐴓𐴋𐴝 𐴀𐴠𐴊𐴧𐴠 𐴀𐴠𐴑 𐴌𐴝𐴙𐴅𐴧𐴡𐴘𐴠 𐴀𐴝𐴌𐴀𐴠𐴑 𐴌𐴝𐴙𐴅𐴧𐴡𐴌 𐴀𐴟𐴓𐴋𐴝 𐴃𐴞𐴥𐴘𐴝𐴘𐴁𐴡; 𐴎𐴝𐴒𐴝-𐴎𐴝𐴒𐴝 𐴁𐴟𐴥𐴏𐴝𐴓𐴢 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴌𐴝𐴄𐴢 𐴀𐴡𐴥𐴑𐴧𐴡𐴓𐴢 𐴀𐴡𐴥𐴘𐴁𐴡. 𐴔𐴡𐴕𐴃𐴡𐴌 𐴇𐴞𐴥𐴀𐴕 𐴀𐴡𐴥𐴙𐴓𐴊𐴠 𐴏𐴞𐴌𐴞𐴥𐴉𐴢, 𐴉𐴟𐴖𐴝 𐴇𐴝𐴥𐴓𐴝𐴏𐴢 𐴀𐴡𐴥𐴘𐴁𐴝𐴌 𐴐𐴟𐴥𐴌𐴟𐴌 𐴊𐴟𐴑 𐴀𐴡𐴥𐴑𐴧𐴡𐴓𐴡𐴌 𐴋𐴡𐴥𐴙𐴓𐴧𐴝.

⁹”𐴓𐴠𐴑𐴞𐴕 𐴃𐴟𐴣𐴀𐴝𐴥𐴌𐴝 𐴀𐴟𐴥𐴣𐴐𐴞𐴘𐴝𐴌 𐴃𐴝𐴥𐴙𐴑𐴧𐴡; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴙𐴕𐴐𐴠𐴥 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴊𐴝𐴓𐴡𐴃𐴡𐴃𐴢 𐴒𐴡𐴏𐴝𐴥𐴘𐴊𐴞𐴁𐴡, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝𐴌𐴠 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴢 𐴁𐴠𐴃𐴢 𐴔𐴝𐴌𐴝 𐴎𐴝𐴘𐴁𐴡. 𐴀𐴝𐴣𐴀𐴌 𐴓𐴧𐴝 𐴁𐴡𐴥𐴓𐴞 𐴃𐴟𐴣𐴀𐴝𐴥𐴌𐴝𐴌𐴠 𐴇𐴝𐴥𐴑𐴞𐴔 𐴀𐴠𐴊𐴧𐴠 𐴁𐴝𐴀𐴣𐴐𐴧𐴝 𐴀𐴡𐴥𐴑𐴧𐴡𐴓𐴡𐴌 𐴔𐴟𐴀𐴕𐴃𐴟 𐴇𐴝𐴥𐴎𐴞𐴌 𐴒𐴡𐴌𐴝𐴥 𐴎𐴝𐴘𐴁𐴡, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴀𐴝𐴣𐴀𐴌 𐴒𐴡𐴁𐴝𐴤 𐴊𐴞𐴥 𐴉𐴝𐴌𐴡.¹⁰𐴀𐴝𐴒𐴠 𐴃𐴝𐴔𐴝𐴥𐴔 𐴑𐴡𐴗𐴔 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴀𐴝𐴓𐴧𐴝𐴌 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥 𐴎𐴝𐴌 𐴎𐴡𐴌𐴟𐴌.¹¹𐴎𐴠𐴣𐴃𐴧𐴠𐴥 𐴔𐴝𐴙𐴕𐴐𐴠𐴥 𐴃𐴟𐴣𐴀𐴝𐴥𐴌𐴝𐴌𐴠 𐴊𐴡𐴥𐴌𐴞 𐴁𐴞𐴏𐴝𐴌𐴡𐴃𐴢 𐴃𐴟𐴓𐴞𐴤𐴁𐴡, 𐴇𐴠𐴥𐴣𐴃𐴧𐴠 𐴑𐴞𐴦 𐴈𐴡𐴘𐴁𐴝𐴤 𐴀𐴝𐴒𐴠 𐴓𐴡𐴥𐴃𐴞 𐴏𐴞𐴕𐴃𐴝 𐴕𐴡 𐴒𐴡𐴙𐴅𐴧𐴡𐴥, 𐴁𐴡𐴥𐴓𐴑𐴠 𐴇𐴠𐴥 𐴀𐴡𐴑𐴃𐴡𐴥𐴃𐴢 𐴃𐴟𐴣𐴀𐴝𐴥𐴌𐴝𐴌𐴠 𐴎𐴞𐴀𐴕 𐴊𐴞𐴦𐴘𐴝 𐴎𐴝𐴘𐴁𐴡 𐴇𐴞𐴥𐴀𐴕 𐴈𐴡𐴘𐴧𐴡𐴥; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴈𐴡𐴀𐴘𐴧𐴝 𐴃𐴡 𐴃𐴟𐴣𐴀𐴝𐴥𐴌𐴝 𐴕𐴡, 𐴁𐴡𐴥𐴓𐴑𐴠 𐴂𐴝𐴑-𐴌𐴟𐴀 𐴀𐴠𐴥𐴕𐴝.

¹²”𐴁𐴝𐴥𐴘𐴧𐴠 𐴁𐴝𐴥𐴘𐴡𐴌𐴠 𐴀𐴝𐴦𐴌 𐴁𐴝𐴉𐴠 𐴉𐴟𐴖𐴝𐴌𐴠 𐴔𐴝𐴌𐴞𐴉𐴠𐴥𐴓𐴝𐴘 𐴁𐴡𐴓𐴧𐴝 𐴊𐴡𐴥𐴌𐴞𐴊𐴞𐴁𐴡. 𐴉𐴟𐴀𐴝𐴙𐴕 𐴊𐴠 𐴕𐴞𐴎𐴡𐴌 𐴁𐴝𐴉𐴔𐴝𐴦𐴌 𐴇𐴠𐴥𐴓𐴝𐴉𐴢 𐴃𐴞𐴥𐴘𐴝𐴘 𐴀𐴞𐴥𐴃𐴝𐴌𐴝𐴌𐴠 𐴔𐴝𐴌𐴞𐴉𐴠𐴥𐴓𐴝 𐴁𐴝𐴥𐴘𐴁𐴡.¹³𐴀𐴝𐴣𐴀𐴌 𐴕𐴝𐴔𐴡𐴓𐴧𐴝 𐴁𐴡𐴥𐴓𐴞 𐴃𐴟𐴣𐴀𐴝𐴥𐴌𐴝𐴌𐴠 𐴁𐴠𐴒𐴧𐴟𐴥𐴕𐴠 𐴕𐴝𐴉𐴡𐴥𐴌𐴡𐴃𐴢 𐴒𐴡𐴌𐴞𐴥𐴁𐴡; 𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴀𐴝𐴇𐴠𐴥𐴌𐴞 𐴉𐴡𐴙𐴅𐴧𐴡𐴕𐴃𐴡 𐴁𐴡𐴌𐴊𐴝𐴐𐴢 𐴒𐴡𐴌𐴞𐴥𐴁𐴡, 𐴘𐴡𐴥𐴒𐴧𐴗𐴝𐴘𐴠 𐴕𐴠𐴅𐴝𐴃𐴢 𐴉𐴝𐴘𐴁𐴡.

𐴋𐴡𐴣𐴀𐴌 𐴔𐴡𐴏𐴞𐴁𐴡𐴃𐴢

¹⁴”𐴃𐴟𐴣𐴀𐴝𐴥𐴌𐴝 𐴇𐴠𐴥 𐴁𐴞𐴐𐴞𐴤 𐴇𐴡𐴥𐴃𐴝𐴌𐴝 𐴅𐴞𐴕𐴞𐴥𐴐𐴢 𐴎𐴞𐴘𐴝𐴥𐴕𐴠 𐴕𐴝𐴉𐴝𐴑 𐴒𐴡𐴌𐴠𐴥 𐴇𐴞𐴥𐴘𐴝𐴕𐴡𐴌𐴠 𐴕𐴡 𐴃𐴝𐴥𐴑𐴡𐴕 𐴀𐴝𐴐𐴧𐴞𐴥𐴓𐴢 𐴊𐴠 𐴎𐴝𐴒𐴝𐴃𐴢 𐴎𐴠𐴣𐴃𐴧𐴠𐴥 𐴃𐴞𐴥𐴘𐴝𐴘𐴧𐴝 𐴊𐴠𐴑𐴞𐴥𐴁𐴝—𐴉𐴡𐴌𐴡𐴥𐴘𐴝𐴘𐴠 𐴁𐴟𐴎𐴡𐴥—𐴇𐴠𐴥𐴣𐴃𐴧𐴠 𐴎𐴠𐴃𐴝𐴌𐴝𐴤 𐴘𐴡𐴇𐴟𐴥𐴊𐴞𐴘𐴝𐴃𐴢 𐴃𐴝𐴥𐴑𐴞𐴁𐴝 𐴀𐴞𐴥𐴃𐴝𐴌𐴝𐴃𐴧𐴟 𐴉𐴝𐴀𐴌𐴡𐴃𐴢 𐴊𐴝𐴥𐴘𐴎𐴝𐴒𐴡𐴘 𐴉𐴡𐴌𐴞𐴁𐴡𐴥.¹⁵𐴎𐴠𐴦𐴕𐴞𐴑𐴞 𐴒𐴡𐴥𐴌𐴡𐴌 𐴏𐴝𐴥𐴊𐴡𐴌 𐴖𐴡𐴌𐴠 𐴀𐴝𐴏𐴠𐴤, 𐴀𐴞𐴥𐴃𐴝𐴃𐴧𐴟 𐴓𐴝𐴔𐴝𐴃𐴢 𐴕𐴡 𐴓𐴝𐴔𐴝 𐴉𐴡𐴌𐴞𐴁𐴡𐴥, 𐴕𐴞𐴎𐴡𐴌 𐴒𐴡𐴥𐴃𐴧𐴟 𐴑𐴠𐴏𐴧𐴟𐴥 𐴓𐴡𐴦𐴘𐴢 𐴁𐴡𐴓𐴧𐴝 𐴁𐴟𐴥𐴃𐴡𐴌𐴠 𐴕𐴡 𐴎𐴝𐴦 𐴉𐴡𐴌𐴞𐴁𐴡𐴥.¹⁶𐴎𐴠𐴦𐴕𐴞𐴑𐴞 𐴑𐴠𐴥𐴃𐴞𐴃𐴢 𐴀𐴝𐴏𐴠𐴤, 𐴀𐴞𐴥𐴃𐴝𐴃𐴧𐴟 𐴕𐴞𐴎𐴡𐴌 𐴏𐴝𐴊𐴧𐴡𐴌 𐴓𐴡𐴦𐴘𐴢 𐴁𐴡𐴓𐴧𐴝 𐴖𐴝𐴦𐴉𐴠𐴏𐴢 𐴕𐴟 𐴀𐴝𐴀 𐴉𐴡𐴌𐴞𐴁𐴡𐴥.¹⁷𐴔𐴡𐴕𐴃𐴡𐴌 𐴇𐴠𐴥 𐴊𐴞𐴕 𐴀𐴡𐴥𐴑𐴧𐴡𐴓𐴡𐴃𐴢 𐴇𐴝𐴥𐴔𐴞𐴓𐴢 𐴔𐴝𐴘𐴝𐴉𐴟𐴀𐴝𐴙𐴕 𐴊𐴡𐴌 𐴓𐴧𐴝 𐴀𐴠𐴊𐴧𐴠 𐴊𐴟𐴊𐴡𐴌 𐴔𐴝𐴦 𐴀𐴡𐴥𐴑𐴧𐴡𐴓𐴡𐴓𐴧𐴝 𐴁𐴞𐴐𐴞𐴤 𐴀𐴝𐴉𐴏𐴟𐴥𐴏𐴡𐴌 𐴇𐴝𐴥𐴓𐴡𐴃𐴢 𐴀𐴡𐴥𐴘𐴁𐴡.¹⁸𐴊𐴟𐴖𐴝 𐴒𐴡𐴌𐴡𐴤, 𐴎𐴠𐴀𐴕𐴠 𐴇𐴞𐴥𐴀𐴕 𐴐𐴞𐴥𐴃𐴑𐴝𐴓𐴠 𐴕𐴡.¹⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴊𐴞𐴕 𐴇𐴞𐴥𐴀𐴕 𐴀𐴠𐴀𐴕 𐴔𐴡𐴏𐴞𐴁𐴡𐴃𐴡𐴌 𐴊𐴞𐴕 𐴀𐴡𐴥𐴘𐴁𐴡, 𐴎𐴠𐴕𐴊𐴞𐴓𐴧𐴝 𐴀𐴝𐴓𐴧𐴝𐴘𐴠 𐴊𐴟𐴕𐴞𐴘𐴝𐴘 𐴉𐴡𐴘𐴊𐴝 𐴒𐴡𐴙𐴅𐴧𐴠𐴥 𐴊𐴠 𐴇𐴠𐴥𐴣𐴃𐴧𐴠 𐴓𐴡𐴥𐴃𐴞 𐴀𐴝𐴙𐴅𐴧𐴡𐴤 𐴀𐴡𐴥𐴘𐴧𐴠 𐴊𐴠 𐴕𐴝𐴥𐴘, 𐴀𐴝𐴦𐴌 𐴀𐴝𐴁𐴝𐴌 𐴕𐴡 𐴘𐴡𐴥 𐴀𐴡𐴥𐴘𐴁𐴡.

²⁰”𐴎𐴡𐴊𐴞 𐴔𐴝𐴁𐴟𐴊𐴠 𐴇𐴠𐴥 𐴊𐴞𐴕 𐴀𐴡𐴥𐴑𐴧𐴡𐴓𐴢 𐴈𐴡𐴔𐴝𐴘 𐴕𐴡 𐴊𐴞𐴃𐴡, 𐴃𐴡𐴥𐴀𐴘𐴓𐴠 𐴇𐴡𐴕𐴡𐴤𐴑𐴞𐴘𐴠 𐴕𐴡 𐴁𐴝𐴏𐴞𐴃𐴡𐴥; 𐴔𐴡𐴕𐴃𐴡𐴌 𐴀𐴞𐴥𐴁𐴝𐴌 𐴁𐴝𐴏𐴞𐴥𐴓𐴡𐴘𐴧𐴝 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴓𐴧𐴝 𐴁𐴡𐴓𐴞 𐴀𐴞𐴥𐴁𐴝𐴘𐴠 𐴊𐴞𐴕 𐴇𐴞𐴥𐴀𐴕 𐴈𐴡𐴔𐴝𐴘𐴊𐴞𐴘𐴠𐴥.²¹𐴇𐴠𐴥𐴣𐴃𐴧𐴠 𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴀𐴠𐴀𐴕 𐴈𐴡𐴀, ’𐴏𐴡𐴀, 𐴔𐴡𐴀𐴏𐴞𐴤 𐴀𐴠𐴍𐴠𐴥 𐴀𐴝𐴏𐴠𐴤!‘ 𐴘𐴝𐴥𐴃𐴡 ’𐴏𐴡𐴀, 𐴀𐴞𐴥𐴁𐴝 𐴀𐴟𐴍𐴠𐴤 𐴀𐴝𐴏𐴠𐴤!‘ 𐴇𐴞𐴥𐴘𐴝𐴕 𐴀𐴠𐴑𐴞𐴕 𐴕𐴡 𐴒𐴡𐴙𐴅𐴧𐴡𐴥.²²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴞𐴏𐴝𐴥 𐴔𐴡𐴀𐴏𐴞𐴤 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴔𐴞𐴏𐴝𐴥 𐴕𐴡𐴁𐴞 𐴀𐴡𐴥𐴑𐴧𐴡𐴓𐴢 𐴀𐴟𐴍𐴞𐴤𐴁𐴡, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴑𐴠𐴌𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴃𐴝𐴦𐴅𐴟𐴙𐴂𐴧𐴝 𐴇𐴝𐴌𐴇𐴝𐴥𐴕𐴝 𐴀𐴡𐴥𐴑𐴧𐴡𐴓𐴢 𐴊𐴝𐴈𐴝𐴤𐴘𐴁𐴡, 𐴔𐴝𐴙𐴕𐴐𐴡𐴥𐴌𐴠 𐴒𐴡𐴓𐴧𐴡𐴃𐴡𐴃𐴢 𐴓𐴡𐴘𐴎𐴝𐴘 𐴁𐴡𐴓𐴧𐴝, 𐴉𐴝𐴌𐴞𐴓𐴠𐴥 𐴀𐴝𐴓𐴧𐴝𐴌 𐴁𐴝𐴏𐴞𐴥𐴓𐴡𐴘𐴧𐴝 𐴁𐴡𐴕𐴊𐴝𐴌𐴠 𐴀𐴟𐴥𐴊𐴧𐴗𐴝.²³𐴓𐴠𐴑𐴞𐴕 𐴃𐴟𐴣𐴀𐴝𐴥𐴌𐴝 𐴀𐴟𐴥𐴣𐴐𐴞𐴘𐴝𐴌 𐴃𐴝𐴥𐴙𐴑𐴧𐴡; 𐴀𐴝𐴀𐴛 𐴃𐴡 𐴃𐴟𐴣𐴀𐴝𐴥𐴌𐴝𐴌𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴀𐴝𐴒𐴠 𐴓𐴡𐴥𐴃𐴞 𐴈𐴡𐴀𐴘𐴊𐴞𐴘𐴞.

𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴌 𐴀𐴝𐴀

²⁴”𐴔𐴡𐴕𐴃𐴡𐴌 𐴊𐴞𐴕 𐴇𐴞𐴥𐴀𐴕 𐴀𐴡𐴃𐴢, 𐴇𐴠𐴥 𐴔𐴡𐴏𐴞𐴁𐴡𐴃𐴢 𐴁𐴝𐴦𐴊𐴠,𐴁𐴠𐴙𐴓𐴢 𐴀𐴝𐴕𐴊𐴝𐴤𐴌 𐴀𐴡𐴥𐴘𐴎𐴝𐴘𐴁𐴡𐴘,𐴀𐴝𐴦𐴌 𐴏𐴝𐴕𐴠 𐴉𐴡𐴀𐴌 𐴕𐴡 𐴊𐴞𐴁𐴡;²⁵𐴀𐴝𐴏𐴔𐴝𐴕𐴡𐴃𐴧𐴟 𐴃𐴝𐴌𐴝 𐴀𐴡𐴥𐴑𐴧𐴡𐴓𐴢 𐴉𐴡𐴌𐴞𐴎𐴝𐴘𐴁𐴡𐴥𐴘,𐴀𐴝𐴦𐴌 𐴀𐴝𐴏𐴔𐴝𐴕𐴞 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴢 𐴃𐴡𐴥𐴃𐴧𐴡𐴌𐴝𐴘𐴁𐴡.

²⁶”𐴇𐴠𐴥𐴣𐴃𐴧𐴠 𐴀𐴞𐴥𐴃𐴝𐴌𐴝 𐴊𐴠𐴑𐴞𐴥𐴁𐴡 𐴊𐴠, 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴋𐴡𐴣𐴀𐴌 𐴑𐴟𐴊𐴟𐴌𐴟𐴃𐴢 𐴀𐴠𐴊𐴧𐴠 𐴔𐴡𐴈𐴞𐴥𐴔𐴝𐴌 𐴏𐴝𐴥𐴀𐴣𐴃𐴠 𐴔𐴞𐴘𐴟𐴥𐴓𐴝𐴌 𐴁𐴟𐴥𐴃𐴡𐴌𐴠 𐴒𐴡𐴥𐴌𐴞 𐴀𐴝𐴘𐴧𐴠𐴤𐴌.²⁷𐴀𐴝𐴦𐴌 𐴀𐴞𐴥𐴁𐴝𐴘𐴠 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴡𐴌𐴠 𐴊𐴟𐴕𐴞𐴘𐴝𐴙𐴌 𐴀𐴠𐴑 𐴔𐴝𐴃𐴝𐴥𐴃𐴧𐴟 𐴀𐴝𐴌𐴀𐴠𐴑 𐴔𐴝𐴃𐴝𐴥 𐴉𐴡𐴙𐴅𐴧𐴡𐴕𐴃𐴡 𐴊𐴞𐴉𐴠𐴍𐴝𐴥𐴘, 𐴏𐴝𐴘𐴌𐴡𐴥𐴔𐴞𐴑𐴧𐴝𐴃𐴧𐴟 𐴕𐴞𐴎𐴡𐴌 𐴁𐴝𐴏𐴞𐴥𐴓𐴡𐴘𐴧𐴝 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴌𐴠 𐴀𐴠𐴑𐴧𐴝𐴥𐴕𐴡𐴃𐴢 𐴎𐴡𐴔𐴝 𐴒𐴡𐴌𐴞𐴥𐴁𐴡.

𐴋𐴟𐴣𐴙𐴌-𐴒𐴝𐴏𐴡𐴃𐴧𐴟 𐴔𐴠𐴀𐴏𐴝𐴓𐴢

²⁸”𐴋𐴟𐴣𐴙𐴌-𐴒𐴝𐴏𐴡𐴃𐴧𐴟 𐴔𐴠𐴀𐴏𐴝𐴓𐴢 𐴓𐴡𐴦: 𐴎𐴠𐴣𐴃𐴧𐴠𐴥 𐴋𐴟𐴣𐴙𐴌-𐴒𐴝𐴏𐴡𐴌 𐴋𐴠𐴥𐴀𐴘𐴓𐴝 𐴇𐴡𐴥𐴌𐴡𐴃𐴢 𐴀𐴡𐴥𐴘 𐴉𐴝𐴃𐴝 𐴕𐴠𐴦𐴓𐴠, 𐴃𐴟𐴣𐴀𐴝𐴥𐴌𐴝 𐴎𐴝𐴕𐴞𐴎𐴡𐴒𐴡𐴥𐴘 𐴊𐴠, 𐴇𐴡𐴥𐴌𐴝𐴕 𐴋𐴝𐴥𐴑𐴠.²⁹𐴇𐴠𐴥𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝 𐴘𐴡𐴥, 𐴎𐴠𐴣𐴃𐴧𐴠𐴥 𐴀𐴞𐴀𐴕 𐴀𐴡𐴥𐴌 𐴊𐴠 𐴊𐴠𐴑𐴞𐴥𐴁𐴝, 𐴇𐴠𐴥𐴣𐴃𐴧𐴠 𐴁𐴟𐴎𐴞𐴥𐴁𐴝 𐴊𐴠, 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴋𐴝𐴥𐴑𐴠, 𐴀𐴠𐴁𐴧𐴠 𐴊𐴡𐴌𐴡𐴎𐴝𐴃𐴢.³⁰𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴀𐴞𐴀𐴕 𐴁𐴠𐴒𐴧𐴟𐴥𐴕 𐴉𐴟𐴌𐴝 𐴕𐴡𐴥 𐴀𐴡𐴥𐴘𐴧𐴡 𐴉𐴡𐴙𐴅𐴧𐴡𐴕𐴃𐴡 𐴀𐴠 𐴕𐴡𐴏𐴡𐴥𐴓𐴢 𐴁𐴞𐴓𐴑𐴟𐴥𐴓𐴢 𐴕𐴡 𐴉𐴟𐴥𐴌𐴝𐴘𐴁𐴡.³¹𐴀𐴝𐴏𐴔𐴝𐴕 𐴎𐴡𐴁𐴞𐴕 𐴃𐴡 𐴎𐴝𐴌𐴞 𐴕𐴡 𐴃𐴝𐴥𐴑𐴞𐴁𐴡, 𐴔𐴡𐴕𐴃𐴡𐴌 𐴀𐴝𐴣𐴀𐴌 𐴈𐴡𐴃𐴝𐴤 𐴇𐴝𐴥𐴔𐴞𐴐𐴝 𐴎𐴝𐴌𐴞 𐴃𐴝𐴥𐴑𐴞𐴁𐴡.

𐴇𐴡𐴕𐴡𐴤𐴑𐴞𐴘𐴠 𐴕𐴡 𐴎𐴝𐴕𐴠 𐴊𐴠 𐴊𐴞𐴕 𐴀𐴠𐴊𐴧𐴠 𐴀𐴡𐴑𐴃𐴡𐴥

³²”𐴓𐴠𐴑𐴞𐴕 𐴇𐴠𐴥 𐴊𐴞𐴕 𐴘𐴝𐴥𐴃𐴡 𐴀𐴡𐴑𐴃𐴡𐴥 𐴀𐴝𐴘𐴁𐴝𐴤𐴌 𐴁𐴝𐴦𐴁𐴟𐴃𐴠 𐴇𐴡𐴕𐴡𐴤𐴑𐴞𐴘𐴠 𐴕𐴡 𐴎𐴝𐴕𐴠, 𐴀𐴝𐴏𐴔𐴝𐴕𐴡𐴌 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴠 𐴘𐴡𐴥 𐴕𐴡 𐴎𐴝𐴕𐴠, 𐴀𐴝𐴦𐴌 𐴉𐴟𐴖𐴝𐴘𐴠 𐴘𐴡𐴥 𐴕𐴡 𐴎𐴝𐴕𐴠, 𐴏𐴞𐴌𐴞𐴥𐴉𐴢 𐴁𐴝𐴉𐴠 𐴁𐴠 𐴎𐴝𐴕𐴠.³³𐴇𐴡𐴥𐴁𐴡𐴌𐴡𐴊𐴧𐴝𐴌, 𐴏𐴠𐴃𐴡𐴕 𐴃𐴝𐴥𐴑𐴡 𐴀𐴠𐴊𐴧𐴠 𐴊𐴟𐴖𐴝 𐴒𐴡𐴌𐴡𐴤; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴕𐴡 𐴎𐴝𐴕𐴡 𐴇𐴠𐴥 𐴀𐴡𐴑𐴃𐴡𐴥 𐴇𐴡𐴣𐴃𐴧𐴠𐴥 𐴀𐴝𐴘𐴁𐴡𐴤.³⁴𐴇𐴠𐴥 𐴀𐴡𐴑𐴃𐴡𐴥 𐴘𐴞𐴥𐴁𐴝 𐴀𐴠𐴎𐴧𐴡𐴕 𐴊𐴟𐴌𐴠𐴥 𐴏𐴡𐴉𐴡𐴥𐴌𐴡𐴃𐴢 𐴎𐴝𐴦𐴌 𐴊𐴠 𐴔𐴝𐴕𐴟𐴥𐴙𐴐𐴡𐴌 𐴋𐴡𐴥𐴙𐴓𐴧𐴝, 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴒𐴡𐴥𐴌 𐴀𐴠𐴌𐴞 𐴎𐴝𐴘𐴃𐴠 𐴒𐴡𐴗𐴀𐴌 𐴀𐴡𐴥𐴑𐴧𐴡𐴓𐴡𐴌 𐴀𐴝𐴥𐴃𐴡𐴃𐴢 𐴎𐴞𐴔𐴧𐴝 𐴀𐴡𐴥𐴑𐴧𐴡𐴓𐴢 𐴊𐴞𐴦 𐴒𐴞𐴦𐴘𐴠𐴥, 𐴘𐴝𐴥𐴕𐴞 𐴎𐴝𐴌-𐴎𐴝𐴌 𐴈𐴝𐴔 𐴃𐴝𐴌𐴠𐴥-𐴃𐴝𐴌𐴠𐴥 𐴊𐴞𐴦𐴘𐴠𐴥, 𐴀𐴝𐴦𐴌 𐴊𐴟𐴖𐴝𐴌 𐴏𐴡𐴦𐴛𐴊𐴝𐴌𐴡𐴌𐴠 𐴘𐴡𐴥 𐴏𐴠𐴃𐴡𐴕 𐴃𐴝𐴥𐴑𐴞𐴃𐴡 𐴇𐴡𐴥𐴑𐴟𐴔 𐴊𐴞𐴥𐴘𐴠.

³⁵”𐴇𐴠𐴥𐴃𐴡𐴓𐴧𐴝 𐴈𐴡𐴀𐴙𐴌, 𐴏𐴠𐴃𐴡𐴕 𐴃𐴝𐴥𐴑𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴕𐴡 𐴎𐴝𐴕𐴡, 𐴒𐴡𐴥𐴌𐴡𐴌 𐴒𐴞𐴌𐴡𐴥𐴏𐴢 𐴇𐴡𐴃𐴟𐴥𐴕𐴡𐴃𐴢 𐴀𐴝𐴘𐴁𐴡𐴤—𐴑𐴞 𐴇𐴝𐴥𐴣𐴎𐴞𐴕𐴧𐴝, 𐴑𐴞 𐴀𐴝𐴊𐴝𐴤 𐴌𐴝𐴙𐴃𐴧𐴝, 𐴑𐴞 𐴉𐴟𐴀𐴝𐴥𐴣𐴙𐴃𐴧𐴝, 𐴀𐴝𐴦𐴌 𐴕𐴝𐴥𐴑𐴞 𐴁𐴞𐴀𐴕𐴧𐴝.³⁶𐴀𐴝𐴌𐴕𐴡𐴥𐴘𐴓𐴠 𐴘𐴡𐴥𐴒𐴧𐴗𐴝 𐴀𐴝𐴏𐴞𐴔𐴁𐴞𐴃𐴢 𐴀𐴝𐴘𐴓𐴠𐴤 𐴃𐴟𐴣𐴀𐴝𐴥𐴌𐴝𐴌𐴠 𐴒𐴟𐴥𐴔𐴡𐴃𐴢 𐴓𐴡𐴦𐴃𐴢 𐴉𐴝𐴘𐴁𐴡.³⁷𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴎𐴞𐴘𐴝𐴥𐴕 𐴈𐴡𐴀𐴙𐴌, 𐴇𐴞𐴥𐴘𐴝𐴕 𐴁𐴠𐴒𐴧𐴟𐴥𐴕𐴡𐴌𐴠 𐴈𐴡𐴀𐴙𐴌 𐴊𐴠, ’𐴏𐴠𐴃𐴡𐴕 𐴃𐴝𐴥𐴑𐴡!‘ “

The Word for the World International

https://app.library.bible/content/87faca8b51c22590