Nahum3
1Krawi sai maru reng mih Ninevi marow luk kowi piakra nauang ting kown mih dow kramra uowi lai kowbow!Tawngplawng kowchow panow Ninevi dow limma dawma mih marow chekhai.Nami marow kowi dow krawi limmaah mih hai kür hown krawi rupah mih uanh atekma chekhai;nakowi dow maru sak sai mih katpaw taing dowi chekhai.2Nakowi dow ransu-uüa krawi bawp maru mih klow hai kawrnga kari khawk tün ta khai;nakowi dow kawrnga chet klow hai kawrnga kari lün klow paw ta khai.3Kawrnga kowi kowh chowm miuüa dow krawi sai maru khai,saidawng hai reh dow tawkla plup khai bowt.Ka arau miuüa hai uak tachun mih sam mü madiah,kowng mih hu lai bowt kowh uak kowi maru tatheu prang towbowt.4Naiawng Ninevi marow phaw mih dow chawkkrawma iawng mih lup chang rakowi chekhai,aia dow maru na-irah kownkow tawngkeng maiaklese khai.Aia dow aia kowh maiaklese hown chenchapuüa kowi kuanah khai,now aia kowh maiaklese powingia hown maru-uüa kowi towah nar khai.5Lang kri lang kraing mih CHAKRAMANG tek mih, “Aw Ninevi, ang mih en kowh ransu chekhai;en kowh uanklai mih ngawng mowr ang nalowtta en kown.En kowh tengiow tengklaira dow chenchapuüa kowi ang natüng pe kown,now en kowh rukraira dow pren towng kowi ang natüng pe kown.6En luk kowi dow ang nakuak en mawngchawng kuaisek kown,en kowi dow suiiai kaniaima ang namü en kown,now maru prawngren müa ang nachangla en kown.7Nakhowk khe dow en kowi mih miapaw namü en kown nanau kown nadowi bowt.Maru natek en kown mih, ‘Ninevi marow piak tüng khowk.Mia iawng mih chow aia vüi nakar nanguk kown?Nadep narua en kown mih maru tawng kowi chow ang nacham ka en kown?’ napa kown,” pakhai.8Aw Ninevi, Thebes marow lak-e en lang iung khai bow?Thebes marow dow Nail aw ria kowi kowh uowi mih chekhai.Nami marow kowi dow tui umta lut khai;naiawngün tui dow aia kowh taka müa tap iawng chekhai.9Ethiawpia pren hai Aigupta pren dow aia kowi khowngah reng,aia kowh auiua dow Put pren hai Libia pren chekhai.10Nachenganchepaw Thebes marowchakuüa kowi dow khümla now akeng prenchakuüa pawla khai,now aia kowh ngeuüa hawmh kowi dow tiakrum kowi ransu-uüa saiah khai.Ransu-uüa dow maru iukuüa kowi nachangla nar kownkow taretah khai,now amatni kowi dow lawngha leng hown tawmla now ransu-uüa pawla khai.11Aw Ninevi, en paw pua mih iawng natim bawilawi kown,ransu-uüa hownia naplaila kownkow en nacham tapet kown.12En kowh akhawtma mih kangchawngra kim dow uidut uih min khe kowh uidut singh iawng naown kown;nami dow kowhowng uidut singh khe kowh ahowng miuüa nawr kowi uidut uih dowh mih iawng naown kown.13En kowh siphaiuüa maten dow masiuüa hawmh iawng kür uowi dowi chekhai,en pren kowi kowh tapplawt maten dow ransu-uüa pur kowi auowma kangowh khowk.Naiawngün tapplawt klia dow maih kamta bowk khowk chekhai.14Ransu-uüa uang rum en khe kowh vüi towngta tui mowk diah,en kowh kangchawngra kimkrowng akhawtma changah diah.Nek suplawk hanow thawp ipbawn diah,se hai thundi ün lawkah hanow ipbawn hown thawp tap diah.15Nachenganchepaw maih mih nakamta en kown,now saidawng mih nasowita en kown.Krawi piak kheti mih plawng hawm iawng asaima ransu-uüa napiak en kown.Naiawng rakowi tuiselengkeng nammow hai plawng hawmh iawng enni prung chepaw enni naplai kown nadowi.16En kowh kun chang mih maru iun dow kuang kowi kowh krek lak-e hu en pe prungah khai.Nachenganchepaw kawmat dow chala uanh bowk now powt mih plawng hawmh iawng amatni powtta en khai.17Plawng hawmh dow chungrau khin khe tap kowi mownla rim khai.Nachenganchepaw sat uang lawt khowk now tawng pra ngai chow cham iow mih tukah dowi chekhai.En kowh kangchawng miuüa dow plawng hawmh iawng chekhai,now en kowh maru iukuüa paw plawng hawmh iawng chekhai.18Aw Asuria mang, en kowh aluchowuüa dow müi thüm chekhai,en kowh maru iukuüa dow mawkla phu chekhai.En kowh maru-uüa dow hungh towng mawng towng cham tauet plawt khai,amatni kowi nakrawi kuaah lawmah kown mih miapaw uowi dowi chekhai.19En kowh arau dow tawng iawng mih chap hown paw ia iung dowi bowt tak.Tawngplawng kowchow panow en kowh ma dow lainowmma hu khai bowt.En kowh nowng chang powng changra hownia dow miapaw plai dowi chekhai.Naiawng rakowi en piak mih satang ta miuüa maten dow awmrawm kowh phek rut khai.
The Seed Company