Habakuk1
1Mami dow risi Habakuk tut-e mukmang kowi Thurai uang tek pe mih laiklow chekhai.2Habakuk tek mih,“Aw CHAKRAMANG, mün khowt tak chow ang nalü khowng kown?Mün khowt tak chow klang ang dowi kowi en nauowi kown?Nowng chang powng chang rakowi mün khowt tak chow en tut-e ang nauang kar kown?Lawng anging dowi kowi mün khowt tak chow en nauowi kown?3Tawngplawng kowchow en pe khi ang angak khai?Tawngplawng kowchow nowng changra en kham rengreng tak?Ang pur kowi piakra hai nowng changra kangowh towbowt,ang pur kowi taranra hai takhüm tabawp kangowh towbowt.4Pren kowi kowh ari aiang miapaw chün dowi bowt,tara nowm pami hing uowi dowi bowt chekhai.Maru iunguüa lak-e maru ngakuüa kür lang uowi khai bowt;naiawng rakowi tara nowm phaw dowi bowt chekhai,” pakhai.5CHAKRAMANG klang ang mih, “Akeng chenchapuüa kowi mü büa diah;nahanow lainowmma enni naawda kown.Tawngplawng kowchow panow enni chowng kowi ang nachang pachap kown.Nami dow ang tek enni chepaw enni naowm kown nadowi.6Sünta, Babulawn prenchakuüa kowi ang kamrütah thüm khowk;amatni dow angakma hai bawrima mih chenchap chekhai,now akeng pren krawi powng kownkow palusama kowi krawi kowi büah reng chekhai.7Amatni kowi dow maru khi-ah now lainowmma maru kramah reng;amatni dow amatni kowh ari aiang ün amatni thawpah mih chekhai,now amatni dow mia low kowi paw uowi kown nau dowi chekhai.8Amatni kowh kawrnga hawmh dow pri rengchow lak-e iowm lang len khai;amatni dow iak pra kowh sui rang mih lak-e kramra lang uowi chekhai.Amatni kowh kawrnga kowi kowh chowm miuüa dow alakma hownia alenma uang iowm reng;krawi piak maru kownkow amatni dow uamu iawng alenma uang reng chekhai.9Amatni dow nakrawi chang nowng kownkow uang krawi uang reng;amatni dow lowra iawng chepaw nataing dowi kown mih tatuak khai,now sema iawng maru iun akawmma kowi khümla reng chekhai.10Amatni dow manguüa kowi prawng renah büa khai,now kruitown miuüa kowi paw khareah büa reng khai.Amatni dow kangchawngra kimkrowng akhawtma mih ün khi hanow ren lawt khai;amatni dow napünla tap kownkow plu bawn büah khai,now kangchawngra kimkrowng ün krawi powngta büah khai.11Nami kung kowi amatni dow li iawng linlanma powt reng;naiawngün maru-uüa dow angakma mih maru-uüa chekhai.Tawngplawng kowchow panow amatni kowh kürra dow amatni nüla thurai büah khai rakowi sum büah khai,” pape khai.12Habakuk plan tek pe mih, “Aw CHAKRAMANG, ang kowh Thurai,en dow ang kowh chimsaima mih Thurai chekhai,en dow chowngchowng saksakma uowi mih Thurai chekhai.Naiawng rakowi asaima pat anging napiak kown nadowi.Aw CHAKRAMANG, narip anging kownkow Babulawnuüa kowi en tawngah khai,aw tatung tanimra hungh, nahawi anging kownkow Babulawnuüa kowi en tawngah khai.13En dow chinawmma rakowi angak kowi nowng mü dowi;chang ngak mih kowi dow en ripah reng chekhai.Naiawng e tawngplawng kowchow kuanlama miuüa kowi aiungma en müah rereng?Tawngplawng kowchow maru iunguüa kowi maru ngakuüa krawi piakah khe ririmma en uowi rereng?14Tawngplawng kowchow en maru-uüa kowi sata kowi kowh dam iawng en changah khai?Tawngplawng kowchow kam mih hai sowr mih chap kowh kruitown mih uowi dowi iawng en tuk towah khai?15Babulawnuüa dow kuak kuai khe kowh iawng maru-uüa kowi küngah khai,now pat lawk khe kowh iawng amatni kowi dow arasang uang kuala khai.Naiawng krawi chang mih hownia Babulawnuüa dow piaw hai awmrawm reng chekhai.16Naiawng rakowi amatni dow amatni kowh lawk vüi tawncher hown chang phuchua khai,now krawi khuila maru reng mih lawk vüi nam iungma mih maikhük towk pe büah reng chekhai.Tawngplawng kowchow panow amatni dow naiawngün lawk hown marat reng chekhai,now chak iung kham iung paw ka cha ka kham büah reng chekhai.17Chowngchowng saksakma naiawng amatni kowi en natowah rengreng kown bow?saksing sana dowi kowi chenchapuüa kowi amatni kowi en pe krawi piakah reng kown bow?” pakhai.
The Seed Company