Nahum1
1Mami dow Ninevi marow lawnguan kowi kowh Thurai laiklow chekhai. Mami bowih kowi arui uowi mih dow Elkaws kuachak risi Nahum khi mukmang mih lawnguan chekhai.2CHAKRAMANG dow khowrbown dawma mih Thurai chekhai,aia dow chang ngak miuüa kowi sat pe klai reng.Aia kowi kowh kingküa miuüa kowi aia dow ripah reng,aia kowh ransu-uüa kowi aia dow sat pe klai reng.3CHAKRAMANG dow kunmarau naklak dowi;tawkche aia dow lowra nowng chang mih chekhai,now maru ngakuüa kowi dow ripah dowi matchang aia lawtah dowi chekhai.Aia kowh nowng changra natüng kownkow aia dow liku hai uangchak uang pe uangah reng,now uangnim dow aia khawkpha kowi kowh dinchow iawng chekhai.4Aw tui nakang kownkow aia peah ana hanow aw tui dow kang reng,sata tui kowi paw nakang kownkow aia peah ana hanow kang reng chekhai.Basan süng hai Karmel hungh kowi kowh pram asingma mih paw aia pe keuah reng,now Lebanawn hungh kowi kowh pau maten paw aia pe ngawiah reng chekhai.5Aia pur kowi dow aiuk aiukma mih hungh paw chür reng,achah achachow mih hungh ün paw chawr reng chekhai.Aia pur kowi dow lusa hai alak kowi kowh uowi mih maten chür reng chekhai.6Aia kunmarau now aia pur kowi dow miapaw nowng uowi dowi chekhai,kramra uowima mih aia kowh kunmaraura dow miapaw nowng kham dowi.Aia kowh kunmaraura dow maih iawng lün pluplup chekhai,aia pur kowi dow aiuk aiukma mih hua khowm tadila iawm khai.7CHAKRAMANG dow aiungma,aia dow akrat pusa khin khe akhawtma mih kangchawngra kim chekhai.Aia tut-e tatung tanim miuüa kowi aia dow mingkhetah reng chekhai.8Nachenganchepaw aia kowh ransu-uüa kowi dow aia napiakta kown;amatni kowi dow tuikling mangma hown asaima aia napiakta kown.Aia kowh ransu-uüa kowi dow makownguüa uowi rah kowi aia nasaah kown.9Aw Ninevi maru-uüa, tawngplawng kowchow CHAKRAMANG kowi enni tuk kingküa khai?Aia dow akatchow sang napiakta enni bowk kown.10Enni dow chuh mung kowi kowh tatawm iawng natatawm kown,arak pua iawng enni nauowi kown,now chathang kam iawng alenma enni napiak kown.11Enni pungmadawng hownia maru uang lawt lowk ia khowk,aia dow CHAKRAMANG kowi nakingküala kownkow krawi pe prengia ngak khai.12CHAKRAMANG tek mih, “Aw Judauüa,Asuriauüa dow akürma hai maru iun akawmma chekhai.Nachenganchepaw amatni kowi dow ang nasaita bowk kown.Ang towk enni kawmkrat nowm chekhai.Nachenganchepaw kawmat hownia dow ang natowk enni kawmkrat kown nadowi bowt.13Kawmat dow enni pangkawt kowi kowh kowbüah bat enni mih namuai ang nauowtta enni bowt kown,now kowbüah tawmla enni mih leng ang naraita enni bowt kown,” pakhai.14Aw Asuria mang, en lawnguan kowi CHAKRAMANG tek mih,“En kowh ming natown en kownkow en krungchak hownia miapaw nauowi kown nadowi;en kowh thuraiuüa kim kowi kowh arup aren uowi mih maten ang napiakta en kown.En dow maru ngak chekhai rakowi ang kamrütta en tadupra hüah khowk,” pakhai.15Pai iow sam mü madiah, hungh luk kowi satang iung phowng mih uang khowk,aia dow taking tasangra laiklow uang pawla khowk.Judauüa low, enni kowh pawi sun büa diah,now enni takhamta mih iawng chang büa diah.Maru ngakuüa mih nauang sen en kown nadowi bowt;amatni kowi dow asaima napiakta bowt kown.
The Seed Company