Mika7
1Uh! Ang kowh sakowmra uowi dowi bowt kowbow!Ang dow hawm sakkraima mih maru iawng chekhai;ki klekta uih kung kowi kowh krawi ta cham uih mih maru iawng ang na khai.Ang chaah kown mih grep uih lowkchow khowm uowi dowi.Ang sak nauah mih uidut uih paw uowi dowi.2Thurai pra towplawng towsak miuüa kowi pren hownia mata khai bowt,maru iung lowk iachow paw uowi dowi bowt.Nasai maru sak kownkow maru maten talim büah khai,Chamlim chak khe kowh iawng lowkkowlowk talim sak büah khai.3Nachang lup ngak kown mih amatni kowh rut pre pra lainowmma kiak khai.Aluchowuüa hai Tara chet miuüa dow cha büm büah khai.Maru iukuüa dow amatni nau mih sia kük büah khai.Amatni dow akrüp sang chang angak büah bowk khai.4Amatni pungmadawng kowi kowh maru lang iung mih dow chuh mung iawng chekhai;bowkbowk lak-e kowh maru lang prawng miuüa dow chuh singh kowi kowh kawm pe khah mih lak-e lang ngah chekhai.Enni kowh kangchawng mih hai Israeluüa kowh risiuüa phuangta mih ni uang towm khowk;enni kowh ripra ni dow uang towm khai bowt.Enni kowh takrow takraira khin kawmat chowbowt.5Kimping namkhetuüa luk kowi hangkow sakowm diah,auiuauüa luk kowi hangkow owmsak diah;En downgprang kowi tabek reng mih masi pur kowi khowm sangprowk laitek kaneu diah.6Pa kowi chapa napiak pe anang kown,chama dow a-u kowi nakingküaah kown,Iaumow dow anowkaw kowi nakingküaah kown.Maru lowk ia kowh ransu dow kowmatia kimchakuüa naown kown.7Nachenganchepaw ang dow CHAKRAMANG luk kowi naowmsak kown.Ang kowh lawng miia Thurai kowi ang nachawng kown.Ang kowh Thurai dow nasünta ang lai kown.8Anging kowh ransu-uüa low,anging kowh akrat pusara khi hanow hangkow awmrawm büa diah.Anging tim khowk chepaw anging naplan rü iawk kown.Iiu dawng kowi anging uowi chenganchepawCHAKRAMANG mih anging kowh anowi naown kown.9Kawmat dow CHAKRAMANG kowi anging kingküa khai,anging chang angak khai rakowi aia kunmaraura anging kham reng tak.Nachenganchepaw akung kowi dow natawi tangila anging kown,anging luk kowi tara nowm dow aia nachet anging bowt kown.Aia dow anowi kowi napawla anging kown,aia kowh lup iung dow anging nakhi bowt kown.10Nami khin khe dow CHAKRAMANG tangila anging mih ransu-uüa nakhi bowt kown.Nami khi hanow, “Tawng kowi chow enni kowh Thurai?”padow tek anging reng mih rakowi lainowmma narukrai büah kown.Nachenganchepaw anging dow amatni piak mih nakhi bowt kown.Tiama kowi kowh suplawk iawng amatni kowi dow nanünah kown.11Nami khin khe dow aw Jerusalem,en kowh tap mih narüngah kown,en kowh rihi naphia en kown.12Nami khin khe dow Asuria hai Aigupta marow hownia kowh maru ün en tut-e nauang kown.Aigupta hownia Euphrates aw mowr;mami sata hownia akeng mih sata mowr,now mami hungh hownia akeng mih hungh mowr maru nauang kown.13Nachenganchepaw lusa kowi kowh uowi miuüa türchau rakowilusa dow akhaw aklaima nauowi kown.14Aw chakramang, en lang kloah mih,en maru-uüa kowi ruapur thing mih iawng khetah diah.Amatni ria kowi dow singh rüm krawngta uowi chowdiahtawkchedow krawngsi bawnsi uowi dowi mih süng kowi cham uowi büah khai.Alai khe kowh iawng dow Basan hai Gilead süng takra kowi kowhsingh rüm krawngta kowi thingah iawk diah.15Aigupta pren hownia anging uang lawt khe dow en tüng anging kraingra khai;nami iawng awdara uowima mih lup tüng anging diah.16Chenchapuüa akürma chepawen kraingra khi büah hanow pacham rukrai lah.Amatni dow pacham kowpta nawr lah,awda rakowi pacham pumta param büah lah.17Amatni dow rua hai akeng mih kaurawng uaramchak iawngpacham cha bawn büah lah.Amatni kowh akhawtma mih kangchawngra kim hownia dow chür klukluk se uang lawt büah hanowen tut-e, anging kowh CHAKRAMANG Thurai tut-e pauang lah,now pacham kram en büah lah.18En iawng dow kowmatia maru sing uowi reng tak miuüa kowhangak hai aprek lawt pe mih Thurai amiapaw uowi dowi chekhai.En dow kunmaraura achowngma en towah dowi,nami lak-e en kowh achur uowi dowi mih sakraura tüng kown en awmrawm reng chekhai.19En dow nakut plan sana anging iawk kown;en dow anging kowh aprek maten khawk hown en nathuaah kown,anging kowh angak maten sata tui abüpma kowi en nakuakah kown.20Achük alai khe anging pipu-uüa tut-e en dow kham lai khai;nami iawng Abraham hai Jakawb chuprek chaprekuüa luk kowi en nachang pe kown,now en kowh achur uowi dowi mih sakraura en natüng anging reng kown.
The Seed Company