Josua22
1Nami kung kowi dow Josua mih Reuben krungchak maten, Gad krungchak maten, now Manase krungchakuüa dawnglang mih kowi hawah khai.2Now aia tek pe mih, “CHAKRAMANG kowh nar Mosi pe enni mih ana maten enni chün khai. Nami klen kowi ang laiklow maten paw enni chün khai.3Enni kowh tainau-uüa kowi enni tawi uowila mih akrama khowk; kawmat pat paw enni powtta dowi tak chekhai. Naiawng hai CHAKRAMANG enni kowh Thurai pe enni mih ana maten kaneuma enni chünah khai.4CHAKRAMANG enni kowh Thurai mih aia takhamta iawng enni kowh tainau-uüa kowi tasenra hownia pe tanaiah khai bowt. Naiawng rakowi khaleng dow CHAKRAMANG kowh nar Mosi pela enni mih Jawrdan aw satlawt pra kowh süng kowi plan büah towbowt.5Tawkchedow CHAKRAMANG kowh nar Mosi pela enni mih ana hai ari aiang mih kaneuma chünah büa diah: CHAKRAMANG enni kowh Thurai kowi sakrauah büa diah, aia tiama maten kowi mangah büa diah, aia kowh ana pek maten chünah büa diah, aia kaah sakowm iawng uowi büa diah, now enni kowh sak maiow hai saktuak maiow hown aia kowh lup changah büa diah,” pakhai.6Mosi mih Manase krungchak dawnglang miuüa kowi dow Basan pren peah khai. Now ta lat dawnglang miuüa kowi dow Jawrdan aw satkup pra kowh süng Josua peah khai. Jawrdan aw satlawt pra kowh süng kowi plan miuüa kowi Josua tek pe mih, “Enni kowh dow dawngthawnguan ahuma chekhai. Enni kowh dow tawncher hawmh ün, kuh ün, tai ün, kri ün, lawngha hai tawnguat ün ahuma chekhai. Naiawngün pawla now kawmat dow kim prakowi mang büa diah. Enni kowh ransu-uüa hownia kowh rupah mih naiawngün dawngthawnguan dow enni kowh tainau-uüa hown taretah büa diah,” pakhai. Nami kung kowi dow Josua mih amatni kowi peah prasi hanow pe mangah khai. Nahanow amatni dow amatni kowh kim kowi plan mang khai bowt.9Naiawng hown Reuben krungchak maten, Gad krungchak maten, now Manase krungchakuüa dawnglang dow Kanan pren kowi kowh Silo marow kowi Israeluüa hown taprai khai bowt. Now amatni dow Gilead süng prakowi plan mang büah khai bowt. Nami süng dow Mosi tut-e kowh CHAKRAMANG ana pek iawng amatni kaah mih chekhai.10Reuben krungchak maten, Gad krungchak maten, now Manase krungchakuüa dawnglang dow Gelilawt marow kowi kowtowm büah khai. Nami marow dow Kanan pren sünghi kowi kowh Jawrdan aw re-e chekhai. Now nakowi dow amatni mih phuchuara aiukma thawp büah lowk khai.11Kanan pren sünghi kowi kowh Gelilawt marow kowi Jawrdan aw re-e Reuben hai Gad krungchakuüa maten, now Manase krungchak dawnglang miuüa thawp phuchuara mih satang dow akeng mih Israeluüa ta khai.12Nami satang ta hanow akeng mih Israeluüa dow nakowsen kowbüah kownkow Silo marow kowi takua talawm büah khai.13Amatni dow Gilead süng kowi kowh uowi mih Reuben hai Gad krungchakuüa maten, now Manase krungchak dawnglang miuüa tut-e uamow Eleazar kowh chapa Finehas kowi kowchinah khai.14Amatni dow pakrung e lowk ia chi aluchow hamüt ia kowi Finehas kung krawi chin pe khai. Nami aluchowuüa dow Israel chen kowi kowh krungchak aluchow chekhai.15Amatni dow Gilead süng kowi kowh uowi mih Reuben krungchak maten, Gad krungchak maten, now Manase krungchak dawnglang miuüa tut-e kowkowiah now tek pe mih,16“CHAKRAMANG kowh maru maten tek mih, ‘Tawngplawng kowchow Israeluüa kowh Thurai kowi naiawng enni tuk kingküaah khai? Tawngplawng kowchow ani aia tiama hownia enni tuk powt khai? Tawngplawng kowchow nakingküala aia kownkow kowmatia vüi enni tuk thawp phuchuara khai?17Peur hungh kowi kowh a-i changta mih angak e lai tak chekhai bow? Peur hungh kowi a-i changta angak mih rakowi CHAKRAMANG maru-uüa luk kowi makowng hawi uang ting khai. Kawmat pat paw nami angak ripra dow a-i ka reng tak chekhai.18Nachenganchepaw CHAKRAMANG tiama hownia kawmat plan powt kown enni nau iawk mih bow? Ani CHAKRAMANG kowi che enni kingküa khai hanow tharau khe aia mih a-i Israeluüa maten luk kowi aia kowh kunmaraura nauang tüng kown.19Enni kaah mih pren che sürlawkma chekhai hanow CHAKRAMANG kowh taklowp taklangra te uowi mih anging pren kowi uang büah bowt. Tawkchedow CHAKRAMANG a-i kowh Thurai phuchuara klen kowi kowmatia vüi hangkow thawp phuchuara büa diah. Naiawng che enni chang hanow CHAKRAMANG hai anging kowi enni kingküa mih chekhai.20Napiakta kownkow Thurai khowm bowkta mih uanh Zera kowh chapa Akan pawta rakowi a-i bowkbowk luk kowi CHAKRAMANG kunmarau mih enni tuk dowi bow? Aia kowh angak rakowi aia malowkchow kowng dowi mih enni tuk dowi bow?’ pakhai,” pape khai.21Nami laiklow ta hanow Reuben krungchak maten, Gad krungchak maten, now Manase krungchak dawnglang miuüa dow akeng mih Israel krungchak aluchowuüa kowi klangah mih,22“CHAKRAMANG lang kri lang kraing mih Thurai! CHAKRAMANG lang kri lang kraing mih Thurai! Aia dow tuk chekhai, now Israeluüa paw pacham tawi tuk lah. Mami che CHAKRAMANG kowi kingküala mih hai chün lai dowi mih lup chekhai hanow ani mih kowngta anging taih.23Mami phuchuara dow tikah mih uanap, kawmdi uanap hai taking tasangra uanap anging changla kownkow nadowi, now CHAKRAMANG kowi anging powtta kownkow paw nadowi chekhai. Na khai hanow CHAKRAMANG matia pacham pe anging ripra lah.24“Mami phuchuara anging thawp mih dow pur prakowi enni kowh krungchakuüa mih anging kowh krungchakuüa kowi maiawng natek pe pami anging kram rakowi chekhai. Nakhe amatni dow maiawng natek chepaw naia, ‘CHAKRAMANG Israeluüa kowh Thurai hown tawng chow enni tatawng?25Aw Reuben krungchakuüa hai Gad krungchakuüa, a-i takra kowi CHAKRAMANG tow a-i mih pren sünghi dow Jawrdan aw chekhai. CHAKRAMANG luk kowi tawng alow paw enni kowh uowi dowi chekhai,’ napa büah kown. Naiawng hai enni kowh krungchakuüa dow CHAKRAMANG kowi ringkawma hown nakramah kown mih saktuak anging kowh krungchakuüa kowi napiakta pe chepaw naia.26“Naiawng rakowi anging tatek mih, ‘Chu, a-i thawp phuchuara lowk lah. Nachenganchepaw nami phuchuara dow tikah mih uanap hai akeng mih tawncher uanap a-i nachangla kown nadowi,’ pakhai.27Tikah mih uanap, akeng mih tawncher uanap hai taking tasangra uanap hown CHAKRAMANG kowi nachupiia kown mih anging kowh paw alow uowi pami pacham tukla pakowh enni hai anging, now a-i kung kowi kowh uang ta uowi kown mih a-i kowh krungchakuüa vüi mami dow saksi chekhai. Nahanow pur prakowi enni kowh krungchakuüa mih anging kowh krungchakuüa kowi, ‘Enni dow CHAKRAMANG kowh maru nadowi,’ pami enni naia tek pe kown nadowi bowt.28“Anging kowi chepaw, anging kowh krungchakuüa kowi chepaw, ‘Enni dow Israel chen nadowi,’ pahai amatni che tek anging khai hanow amatni kowi maiawng anging natek pe kown, ‘CHAKRAMANG kowh phuchuara iawng thawpah mih mami phuchuara pra mü büa diah. Nami phuchuara dow tikah mih uanap hai akeng mih uanap chang müa kowi kowh a-i pipu-uüa thawpah mih nadowi chekhai. Nami dow anging paw enni iawng CHAKRAMANG kowh maru pami saksi chekhai,’ napape kown.29“Tikah mih uanap, kawmdi uanap hai akeng mih tawncher uanap nachangla kownkow CHAKRAMANG a-i kowh Thurai kowh taklowp taklangra te pur kowi kowh uowi mih phuchuara klen kowi akeng mih phuchuara anging lang thawp mih nadowi chekhai. Akeng phuchuara thawpra hownia CHAKRAMANG kowi nakingküala kown mih hai aia tiama hownia napowtla kown mih saktuak dow anging tut-e hang pacham uowi lah,” pabüah khai.30Uamow Finehas hai Israel lawngtang aluchowuüa dow Reuben hai Gad krungchakuüa maten, now Manase krungchak dawnglang miuüa tekah iawng sak-ih khai.31Now uamow Eleazar kowh chapa Finehas tek pe kowbüah mih, “A-i pungmadawng kowi CHAKRAMANG tawi uowila a-i reng pami ani dow anging tuk khowk. Tawngplawng kowchow panow enni thawp phuchuara mih dow enni kingküa CHAKRAMANG mih nadowi chekhai. CHAKRAMANG rut hownia Israeluüa kowi enni lawngah mih chekhai,” pakhai.32Nami kung kowi dow uamow Eleazar kowh chapa Finehas hai Israel lawngtang aluchowuüa mih nami hownia Kanan pren kowi uang plan büah khai. Now amatni dow Israeluüa kowi naiawngün laiklow maten uang lawp pe khai.33Nami laiklow tata now akeng mih Israeluüa mih lainowmma awmrawm khai, now amatni dow Thurai kowi kiow büah khai. Amatni dow Reuben krungchakuüa hai Gad krungchakuüa uowiah mih pren napiakta kown mih tek büah dowi bowt chekhai.34Reuben krungchak hai Gad krungchakuüa tek mih, “Mami phuchuara dow CHAKRAMANG chowtaih Thurai pami a-i bowkbowk vüi saksi chekhai,” pakhai. Naiawng rakowi nami phuchuara ming dow “Saksi” pahai chap pe khai.
The Seed Company