Josua23
1Aria aret kowi kowh ransu-uüa hown Israeluüa tasen rim mih akrama uang na khai bowt. Nami takra kowi Josua dow uang lawngtang mih nowm khowk chekhai.2Akat khe Josua mih Israel lawngtang aluchowuüa, krungchak kowi kowh aluchowuüa, tara chet miuüa hai maru iukuüa maten kowi hawah khai. Now aia tek pe mih, “Ang dow lainowmma lawngtang khai bowt.3Mami pren kowi hawt iawng uowi miuüa kowi tawng chow CHAKRAMANG enni kowh Thurai changah mih enni khi bowk khowk chekhai. CHAKRAMANG enni kowh Thurai mih enni vüi dowk tasen khai.4Jawrdan aw hownia satkup pra kowh Mediteranean sata mowr ang powngta khowk mih pren hai kawmat kowh powngah dowi tak mih pren ün paw ang retla enni khowk chekhai.5Ta lat mih chenchap maten kowi paw CHAKRAMANG enni kowh Thurai ngengche mih pren hownia nahenta enni kown taih. Amatni kowi dow enni pur hownia CHAKRAMANG naprütta kown, now aia kowh laikham iawng amatni kowh pren nape powng enni kown.6“Naiawng rakowi Mosi rirow bowih kowi kowh arui uowi mih maten kaneuma chünah büa diah. Nami rirow hownia mapaw hang cham süt büa diah.7Enni tut-e kowh ta uowi mih akeng chenchapuüa hown hang taklawp taiua büa diah. Amatni kowh thuraiuüa ming khowm padow hang rük büah, now naiawngün thuraiuüa ming hown sawi paw hang kham büah. Naiawngün thuraiuüa pur kowi mih hang cham tabawk büah, now chup paw hang cham chup büa diah.8Kawmat mowr dow CHAKRAMANG enni kowh Thurai kaah sakowm iawng enni uowi khai. Nami iawng kawmat paw uowiah büah reng diah.9“Aiuk aiukma mih hai akürma kangowh mih chenchapuüa kowi enni pur hownia CHAKRAMANG prütta enni khai. Ani mowr kowi miapaw nowng sen enni dowi chekhai.10Enni kowh maru lowk ia sang 1,000 ia ransu kowi ia krawi khai. Tawngplawng kowchow panow CHAKRAMANG enni kowh Thurai dow aia kowh laikham iawng enni vüi dowk tasen khai.11Naiawng rakowi CHAKRAMANG enni kowh Thurai kowi nasakrauah kown mih lawnguan kowi kaneuma towsak büa diah.12“Tawkchedow CHAKRAMANG kowi nuata hanow maiawngün chenchap hownia kowh ta plai miuüa hown che enni tawi tabawng khai, amatni hown che enni tachawng talang khai, now amatni hown che taklawp taiua khai hanow13maiawngün chenchapuüa kowi enni pur hownia CHAKRAMANG enni kowh Thurai naprütta kown nadowi bowt pami sak kowi towah büa diah. Naprütta lak dow amatni kowi mih enni vüi powk iawng hai leng chak ia iawng aia nachangah kown. Amatni dow müa hown tep enni khe kowh iawng hai mikpüi uowi khe kowh iawng natowk enni ngare kown. Achur kowi dow mami pren klangiungma mih hownia enni nachum kown.14“Ang dow nalüa kowng kown chowbowt. Mami laiklow klangiungma enni tuk chekhai: Nachang enni aiung kown pahai CHAKRAMANG enni kowh Thurai kham enni mih maten lowkchow paw chang enni dowi mih uowi dowi bowt. Aia kowh laikham maten dow uang tachih bowk khowk; lowkchow paw tachih dowi mih uowi dowk chekhai.15Nachenganchepaw CHAKRAMANG enni kowh Thurai pe chün enni mih sangbowk laitawm che enni chün dowi, akeng thuraiuüa kowi che enni cham chup hai amatni pur kowi che cham tabawk khai hanow maiawng CHAKRAMANG nachang enni kown: Aia nachang enni aiung kownkow aia takhamta mih maten aia chang enni iawng dow aia nachang enni angak kown mih aia takhamta mih iawng aia nachang enni kown. Enni luk kowi CHAKRAMANG kowh kunmaraura nalün pluplup kown, now aia pe enni mih pren klangiungma mih hownia alenma enni napiak kown,” pakhai.
The Seed Company