Isai63
1Edawm pren kowi kowh Bawzra marow hownia aringma mih tawnguat khupma uang lawt mih mia chow?Tawnguat klangiungma mih khupma hai kür uowima uang haimang mih mia chow?CHAKRAMANG klang ang mih, “Nami ang chowbowt.Ang dow achinawmma tek lai reng,now kür akraingma mih hown krawi lawng reng,” pakhai.2Tawngplawng kowchow en kowh tawnguat aringma?Tawng rakowi chow grep uih küa müa kowi kowh küa grep uih mih maru kowh tawnguat iawng?3Aia tek ang mih, “Chenchapuüa kowi grep uih küa iawng ang thuaah kowh chowbowt;miapaw uang tawi khowng ang dowi.Ang kunmarau lai kowh amatni kowi khawk hown ang thuaah khai.Nakhowk khe amatni kowh vi cheu kowh ang buk kowi uang kak khai,now ang kowh tawnguat kowi talük nak khai.4Kawmat dow ang maru-uüa kowi nalawngah kown mih khin uang ting khai bowt,now ang ransu-uüa kowi naripah kown mih khin ang khowm bowkta mih paw uang ting khai bowt.5Ang maru-uüa kowi nakhowngah kown mih maru ang krawi tang mü che mia kowi paw ang khi dowi.Miapaw khowng ang mih maru uowi dowi rakowi lainowmma ang awda khai.Naiawng rakowi ang matia kür hown ang maru-uüa kowi ang lawngah khai.Nami lawngra lup ang nowng chang mih dow ang kowh kunmaraura pe ang süngürra kowh chekhai.6Ang kunmarau lai kowh chenchapuüa kowi khawk hown ang thuaah khai.Ang kunmarau rakowi amatni kowi dow pua mih iawng ang changah khai,now amatni kowh vi dow krawng kowi ang pe hawkah khai,” pakhai.7CHAKRAMANG kowh achur uowi dowi mih sakraura lawnguan ang natek kown,now aia changah mih lup maten rakowi aia kowi ang nakiowah kown.Aia kowh sanara hai aia kowh achur uowi dowi mih sakraura hu lai rakowiaia dow Israel chenchap vüi iungra lup ahuma chang pe khai.Naiawng rakowi aia kowi dow ang nakiowah kown.8Aia tek mih, “Amatni dow ang kowh maru chekhai.Amatni dow kaah sakowmma mih chauüa nachowng kown,” pakhai.Naiawng rakowi aia mih amatni kowh lawng miia chowng pe khai.9Amatni kham ngare towng aia paw tawi kham ngare khai,now aia kowh kramamu mih amatni kowi lawngah khai.Aia kowh sakraura hai sanara hown amatni kowi dow aia lawngah khai.Aia dow alai hownia amatni kowh pipu-uüa kowi mingkhetah khai.10Nachenganchepaw amatni dow aia kowi kingküaah hanow Lümlasai kowi towkah kawm khai.Naiawng rakowi aia dow taplan hanow chowng amatni kowh ransu khai,now aiamat ngengche mih amatni kowi uang senah khai.11Nakhowk khe dow aia maru-uüa mih achük alai kowh laiklow ka tuak khai.Amatni dow Mosi hai aia maru-uüa lawnguan kowi ka tuak khai.Amatni tek mih, “Aia maru-uüa hai amatni kowh aluchowuüa kowi sata dawnglang iawng Thurai uang pawla khai,now amatni pungmadawng kowi natawi uowi kownkow aia kowh Lümlasai mih amatni kowi aia peah khai.Nami Thurai tawng kowi chow?12Aia dow aia kowh nowng changra kür natüngah kownkow Mosi kowi khowngah khai.Chowngchowng saksakma aia kowh ming iung nang iung nauowila kownkow aia mih sata tui kowi pe taakah khai.13Now sata tui dawnglang iawng amatni kowi aia pawla khai.Nami Thurai tawng kowi chow?Naiawng Thurai khowngah rakowi amatni dow süngrüp süngkangma kowi kowh tatheu dowi mih kawrnga iawng chekhai.14Amatni kowi dow lawngrawi kowi kowh tanaila klip mih tawncher hawmh iawng CHAKRAMANG kowh lümla pe tanaiah khai.CHAKRAMANG mih aia kowh ming kri kraingma mih natowah kownkow amatni kowi naiawng kruitownah mih chekhai,” pakhai.15Aw CHAKRAMANG, mukuang pren hownia,en kowh chimsaima mih hai kri kraingma mih uowi rah hownia uang iu mü diah.En kowh süngürra hai en kowh kürra tawng kowi chow?En kowh süngürra hai en kowh sanara tawng kowi chow?16Aw CHAKRAMANG, en dow anging kowh pa chekhai.Abraham tuk anging dowi chepaw,now Jakawb kham anging chauüa dowi chepaw en dow anging kowh pa chekhai.En dow chowngchowng saksakma lawng miia chekhai;nami dow en kowh ming chekhai.17Aw CHAKRAMANG, en kowh tiama towla hanow tawngplawng kowchow en cham pe mang anging panglang khai?Ringkawma hown nakram en dowi kownkow tawng rakowi chow anging kowh sak akhawtma en chang anging khai?Anging dow en kowh naruüa chekhai;anging dow en kowh maru chekhai.Naiawng rakowi anging tut-e uang plan diah.18En kowh chimsaima mih arah dow nawngchow vüi kowi en lang kloah mih maru-uüa rut kowi uowi chowdiah.Nachenganchepaw kawmat dow nami arah mih khawk hown anging kowh ransu-uüa thuaah khai.19Kawmat dow katpaw en kruitownah dowi mih maru-uüa iawng,en kowh maru-uüa pahai katpaw hawah dowi miuüa iawng anging phaw khai bowt.
The Seed Company