Isai64
1Owh, mukuang mih ak-ah lang hanow en uang dowm panühungma mawngma en pur kowi nachür diah.2Maih dow singh kau kowi nowng kam chekhai,now tui kowi paw aden klawk burlur nowng chang chekhai.Nami powm iawng uang dowm hanow ransu-uüa tut-e uang tatüng diah,nahanow chenchapuüa mih kram kowh en pur kowi nachür kown towbowt.3Alai kowh anging sakowmah dowi mih kramra lup en chang khe,now alai kowh ringkawra uowima mih awdara lup en chang khe en uang dowmah khai.Nami khin khe hungma mawngma mih en pur kowi chür nukluk khai.4En iawng mih Thurai lawnguan achük alai hownia miapaw ta dowi tak,now khi paw miapaw khi dowi tak chekhai.Aia luk kowi neplawng nesak miuüa kowi khowngah mih Thurai lawnguan kowi miapaw ta dowi tak,now khi paw miapaw khi dowi tak chekhai.5En dow en naukrang iawng chang lup khe piaw miuüa kowi en khowngah reng;tuakla en se en tiama kowi mang miuüa kowi en uang khowngah reng chekhai.Nachenganchepaw anging dow chang angak khai,now naiawng angak hown akrama anging uowi khai.Naiawng rakowi anging luk kowi lainowmma en kunmarau khai.Naiawng now tawng iawng chow anging naka lawngra kown?6Anging dow asür alawkma mih maru iawng anging uowi bowk khai,now anging kowh lup iung maten dow alawima mih uan iawng chowtaih chowng khai.Anging mih pram keu iawng keu bowk khowk,now anging kowh angak mih li iawng cham rownla anging khai bowt.7Nachenganchepaw en ming kowi miapaw anging haw dowi,now en tut-e miapaw anging uang lü uang leng dowi chekhai.Tawngplawng kowchow panow en cham dangta anging khai bowt,now anging kowh angak rakowi en pe piak anging khai bowt.8Nachenganchepaw aw CHAKRAMANG, en chowtaih anging kowh pa.Anging dow bawn chekhai, now en dow athawp miia chekhai.Anging dow en rut hown kowh en thawpah mih maru kangowh chekhai.9Aw CHAKRAMANG, naiawng khowt pat hang kunmarau diah;anging kowh angak mih chowngchowng saksakma sak kowi hangkow towah diah,now sakrauma hown anging prakowi uang dang iawk diah.Tawngplawng kowchow panow anging dow en kowh maru kangowh chowtaih.10En kowh marow chimsaima mih maten dow süngrüp süngkangma iawng chowng bowk khowk;Zaiawn marow khowm padow naiawng tawi own khai bowt,now Jerusalem marow mih akhaw aklaima towbowt.11Anging kowh pipu-uüa rowsila en mih kim,chimsaima hai klangiungma mih anging kowh Thurai chup kim kam khai bowt,now anging nauah mih uanh maten paw piak bowk khowk chekhai.12Aw CHAKRAMANG, naiawng chepaw en nachowm phülü kown tak bow?Naiawng ririmma uowi phülü se en narip anging reng tak kown bow?
The Seed Company