Ezekiel11
1Nami kung kowi CHAKRAMANG lümla dow krowngla ang now Thurai chup kim satlawt pra kowh tapplawt re-e kowpawla ang khai. Nami tapplawt re-e dow kachakuüa uowi pirmi laitanga ia mih ang khi khai. Nami pirmi laitanga ia pungmadawng kowi dow Azzur chapa Jazania hai Benaia chapa Pelatia iüah paw tawi uowi khai; Jazania hai Pelatia iüah dow Israeluüa kowh aluchow chekhai.2Now CHAKRAMANG tek ang mih, “Aw maru chapa, Jerusalem marow kowi chang lup ngak kownkow kamrüt mih hai maru kowi pe prengia ngak miuüa dow nami maru-uüa chowbowt.3Amatni dow, ‘Mami Jerusalem marow dow puh iawng chekhai, now a-i dow puh lak kowi kowh chaknga uowi mih iawng athaulangma chekhai. Kim chang khin iung mih kawmat chowbowt’ pakhai.4Naiawng rakowi aw maru chapa, naiawngün maru-uüa kowi kingküala mih laiklow kowtek pe dit,” pakhai.5Nami kung kowi dow CHAKRAMANG lümla mih ang tut-e uang uowi khai, now maiawng dow pe tek ang khai, “CHAKRAMANG tek mih, ‘Aw Israeluüa, tawng chow enni tek mih ang tuk. Tawngplawng kowchow panow enni sakdawng kowi kowh tuak maten ang tuk chekhai.6Mami marow kowi kowh maru kawmma kowi enni saiah khai, now tiama ün maru uak atekma enni changah khai,’ pakhai.7“Naiawng rakowi CHAKRAMANG Thurai tek mih, ‘Mami marow dow puh iawng chekhai nowm. Nachenganchepaw marow kowi kowh enni saiah mih maru-uüa dow puh lak kowi kowh uowi mih chaknga iawng chekhai. Naiawng rakowi mami puh hownia ang khowngta enni kown.8Enni lang kramah mih tasenra dow ang nauang pawla enni kown. Ang CHAKRAMANG Thurai, mami laiklow ang tek khowk.9Marow hownia ang naprütta enni now prenlang maru-uüa rut kowi ang nacham ap enni kown, now ang nape enni ripra kown.10Tasenra kowi saidawng hown enni nakowng kown, Israel pren paprenma kowi dow rihi mowr pat bowkbowk kowi ang narip enni kown. Nami khin khe dow ang chowtaih CHAKRAMANG pami enni natuk bowt kown.11Mami marow mih enni vüi puh iawng natakhula enni kown nadowi, now enni paw puh lak kowi kowh chaknga iawng thaulangma naown kown nadowi. Israel pren paprenma kowi dow rihi mowt pat bowkbowk kowi ang narip enni kown.12Nami khin khe dow ang chowtaih CHAKRAMANG pami enni natuk bowt kown. Tawngplawng kowchow panow ang kowh rirow hai ang kowh ari aiang enni chün dowi chekhai. Nami lak-e enni riaret kowi kowh akeng chenchapuüa rirow iawng dow enni tawi mang khai,’” pakhai.13Naiawng ang tek lai reng tak khe Benaia chapa Pelatia dow kowng khai. Nami khin khe tabawkah krawm now kar se, “Uh, CHAKRAMANG Thurai, ta lat mih Israeluüa maten kowi en saita bowk kown chekhai bow?” padow atünma ang tek khai.14Nami khin khe CHAKRAMANG laiklow dow ang tut-e uang ting khai. CHAKRAMANG tek ang mih,15“Aw maru chapa, en, en tainau-uüa hai akeng pren kowi kowh cham takhang mih Israeluüa lawnguan kowi Jerusalem kowi kowh ta uowi miuüa tek mih, ‘Cham takhang miuüa dow CHAKRAMANG kowi nachup kown mih pren hownia lainowmma la khai bowt. Naiawng rakowi amatni kowh pren CHAKRAMANG pe a-i mih chowbowt,’ pakhai.16“Naiawng rakowi ang CHAKRAMANG Thurai tek en mih lai maten dow cham takhang mih en maru-uüa kowi tek pe diah: ‘Akeng chenchapuüa tut-e cham saah enni mih hai pren towng kowi cham uet enni mih dow ang chekhai. Nachenganchepaw enni cham uowi rah towng kowi ia chupla ang kownkow ang matia natawi uowila enni reng kown.17Akeng chenchapuüa pungmadawng hownia ang nakua nalawmah enni kown; enni cham uowi rah pren maten hownia ang nauang plan pawla enni iawk kown, now Israel pren mih dow enni kowi ang naplan pe enni iawk kown,’ pape diah.18Amatni dow nakowi nakowplan hanow asürlawkma mih arup aren hai suiiai kaniaima mih arup maten asaima nahenta büah kown.19Amatni kowi sak sar hai lümla sar ang napeah kown. Amatni kowh chün lai dowi mih hua iawng akhawtma mih sak dow chün lai mih nga iawng anümchow ang nachang pe kown.20Nahanow ang kowh rirow iawng namang büah bowt kown, now ang kowh ari aiang paw kaneuma nachün büah bowt kown. Amatni dow ang maru nachowng büah kown, now ang dow amatni kowh Thurai nachowng bowt kown.21Nachenganchepaw asürlawkma mih arup aren hai suiiai kaniaima mih arup prakowi saktuak uowi reng tak miuüa kowi dow ang naripah kown, amatni kowh lup sung dow ang napeah kown. Ang CHAKRAMANG Thurai mami laiklow ang tek khowk,” pakhai.22CHAKRAMANG ki tek lai kung kowi dow cherupuüa mih rowng lap khai. Amatni ria kowi dow lawngkua khawk ün tawi uowi reng chekhai. Now Israeluüa kowh Thurai kraingra paw amatni luk kowi tawi uowi reng chekhai.23CHAKRAMANG kraingra dow marow hownia tatowng hanow marow satlawt pra kowh hungh luk kowi kowtanai khai.24Nami kung kowi dow Thurai Lümla mih krowngla ang khai, now mukmang kowi dow Babulawn pren kowi kowh cham takhang miuüa tut-e kowplan pawla ang khai. Nami kung kowi dow ang khi-ah mih mukmang dow chur khai.25Now mukmang kowi kowh CHAKRAMANG tüng ang mih maten cham takhang miuüa tut-e ang tek pe khai.
The Seed Company