Ezekiel10
1Nami kung kowi mukmang kowi dow cherupuüa luk kowi kowh tabe mih prakowi ang tang mü khai, now nami tabe mih luk kowi dow asung khakma mih hua hown kowh thawpah mih mang chowm rah powm iawng ang khi lowk.2Now adipükchow mih la hown kowh thawpah mih tawnguat khupma mih maru kowi CHAKRAMANG tek pe mih, “Cherupuüa dak kowi kowh taui lutlut mih lawngkua khawk pungmadawng kowi en mih kowkowi diah. Now cherupuüa dawnglang hownia pre rut pre pra mairing kowchawmah hanow Jerusalem marow luk kowi uetah diah,” pape khai. Nahanow adipükchow mih la hown kowh thawpah mih tawnguat khupma mih maru dow ang khi khe nakowi dow kowkup khai.3Cherupuüa dow Thurai chup kim mrawkphak prakowi iowng khai, now nami maru kowkup mih khin khe alak kowi kowh viadawng dow uangnim hown atekma chekhai.4Nami khin khe CHAKRAMANG kraingra dow cherupuüa luk hownia awr tatowng hanow Thurai chup kimplawt kowi kowkowi khai. Nami khin khe Thurai chup kim dow uangnim hown tek khai, now CHAKRAMANG kraingra nowi dow viadawng kowi atekma chekhai.5Now cherupuüa kowh lap tün dow prang kowi kowh viadawng hownia khowm padow taah khai. Nami tün dow lang kri lang kraing mih CHAKRAMANG tek lai mih tün iawng chekhai.6Adipükchow mih la hown kowh thawpah mih tawnguat khupma mih maru kowi CHAKRAMANG tek pe mih, “Cherupuüa dawnglang kowi kowkowi diah, now lawngkua khawk takra hownia kowpaw mairing diah,” pakhai. Nami khin khe nami maru dow lawngkua khawk pungmadawng kowi kowkup khai, now lawngkua khawk ria kowi kowiowng khai.7Cherupuüa lap krüa kowi dow lusa maru kowh iawng rut uowi bowk chekhai. Now cherupuüa pungmadawng kowi lowk ia mih dow maih prakowi haiiaw rut khai, now maih dow pawah sangrum hanow adipükchow mih la hown kowh thawpah mih tawnguat khupma mih maru rut kowi dow ap pe khai. Nami maih pawla hanow nami maru dow nami hownia uang lawt khai.9Nami kung kowi dow ang tang mü hanow cherupuüa ria towng lawngkua khawk uowi lowk chi mih ang khi khai. Lawngkua khawk maten dow asung khakma mih hua iawng anowi tawk pluplup chekhai.10Nami lawngkua khawk tali klüng mih dow apowmsang chekhai; akhawk lak kowi akhawk kutplan uowi lowk chi mih powm iawng chekhai.11Cherupuüa dow mang mih khin khe amatni nau prakowi atengma lün büah khai. Amatni lün mih khin khe akeng prakowi taplang büah dowi chekhai. Cherupuüa kowh lumowr dang prakowi naiawngün lawngkua khawk paw tawi lün khai; lün mih khin khe tawng prakowi paw taplang kla dowi chekhai.12Amatni kowh lawngkua khawk tali klüng mih kowi, buk kowi, kumlawng kowi, rut kowi hai alap kowi ün mik atekma chekhai.13Now amia iawng mih chünchü nami lawngkua khawk kowi, “Taui lutlut mih lawngkua khawk,” padow atünma hawah mih dow ang ta khai.14Cherupuüa maten kowh dow lumowr uowi tali klüng chi chekhai: Cherup lumowr lowk chi, lusa maru lumowr lowk chi, krangsi lumowr lowk chi, now uamu lumowr lowk chi chekhai.15Now nami cherupuüa dow aluk prakowi awr tatowng khai. Nami cherupuüa dow Kebar aw pang kowi kowh ang khi-ah mih kaurawng uaramchak hawmh chekhai.16Cherupuüa che mang now amatni ria kowi kowh lawngkua khawk paw tawi lün khai. Krawng hownia awr tatowng kownkow cherupuüa che rowng lap now lawngkua khawk paw amatni ria kowi tawi lün khai.17Kaurawng uaramchak hawmh kowh lümla dow nami lawngkua khawk lak kowi uowi mih chekhai. Naiawng rakowi cherupuüa che tanai now lawngkua khawk paw tawi tanai khai, now cherupuüa che tatowng now lawngkua khawk paw tawi tatowng khai.18Nami kung kowi CHAKRAMANG kraingra dow Thurai chup kim kimplawt hownia powt hanow cherupuüa luk kowi kowuowi khai.19Now ang khi khe dow nami cherupuüa mih rowng lap hanow krawng hownia aluk prakowi awr tatowng khai, now lawngkua khawk paw amatni hown tawi tatowng khai. Amatni dow Thurai chup kim satlawt pra kowh tapplawt kowi kowtanai khai, now Israel kowh Thurai kraingra dow nami cherupuüa luk kowi tawi uowi khai.20Nami cherupuüa dow Kebar aw pang kowi kowh ang khi-ah mih kaurawng uaramchak hawmh chekhai. Amatni kowi dow Israel kowh Thurai dak kowi ang khi-ah khai. Now amatni dow cherupuüa chekhai pami ang tuk khai bowt.21Amatni bowkbowk kowh dow lumowr uowi tali klüng chi, now alap paw uowi tali klüng chi chekhai. Amatni kowh lap krüa kowi dow lusa maru kowh rut iawng arut uowi bowk chekhai.22Amatni kowh lumowr powm dow Kebar aw pang kowi kowh ang khi-ah mih powm iawng chekhai. Amatni bowkbowk dow pur prakowi atengma mang büah reng chekhai.
The Seed Company