Ezekiel12
1Nami kung kowi CHAKRAMANG laiklow dow ang tut-e uang ting khai.2CHAKRAMANG tek ang mih, “Aw maru chapa, kingküa ang reng mih Israel chenchap dawng kowi en tawi uowi khai. Israeluüa kowh dow namüla kown mih mik uowi chepaw khi büah dowi chekhai, now nasüntala kown mih param uowi chepaw ta büah dowi chekhai. Tawngplawng kowchow panow amatni dow kingküa ang reng mih chenchap chekhai.3“Naiawng rakowi aw maru chapa, pren lakma kowi cham prütta kown khe kowh iawng en kowh uanh mih thupah ne diah, now ni-e khe amatni pur kowi khi en iawng cham tarü diah. En uowi rah hownia akeng kowi cham kowi diah. Nami khi hanow amatni dow kingküa mih chenchap chekhai lowmow pami natuk büah ün tarawng.4En thupta hüah mih uanh dow ni-e amatni khi khe uang lawtla diah. Now iak pra khe dow alakma kowi cham takhang kown khe kowh iawng amatni pur kowi cham tarü diah.5Amatni pur kowi dow kimbang mih ukah hanow nami kimbang kua hownia dow en kowh uanthup mih uang lawtla diah.6En kowh uanthup dow amatni khi en iawng en pangkawt kowi tangla diah, now uar-e khe naiawngün dow marow uat kowi lawtla diah. Now en matia pren kowi kowh krawng khila dowi kownkow en kowh mik mih pumla diah. Naiawng ang pe chang en mih dow Israel chenchapuüa vüi amatra chekhai,” pakhai.7Naiawng rakowi CHAKRAMANG tek ang iawng ang chang khai bowt. Pren lakma kowi cham takhang kown khe kowh iawng ang kowh uanthup mih ni-e khe ang uang lawtla khai. Nahanow sat kup khe dow rut hown kimbang mih ang ukah khai. Now pangkawt kowi ang tangla uanthup hanow uar-e khe ang cham tarü khai. Naiawng ang chang mih maten dow maru mü ang mowklowk khe chekhai.8Now auai rau CHAKRAMANG laiklow dow ang tut-e uang ting khai. Aia tek ang mih,9“Aw maru chapa, tawng chow en chang mih kingküa ang reng mih Israel chenchapuüa lünta en dowi bow?10Amatni kowi dow maiawng tek pe diah, ‘CHAKRAMANG tek mami amatra dow Jerusalem kowi kowh mang Zedekia hai Israel pren kowi kowh maru-uüa maten vüi pe,’ pape diah.11Now maiawng tek pe diah, ‘Ang dow enni vüi amatra chekhai. Ang changah mih iawng enni luk kowi nauang phaw kown. Enni mih pren lakma kowi nacham takhang nowm kown chekhai,’ pape diah.12“Amatni kowh mang khowm padow uar-e khe aia kowh uanthup pangkawt kowi tangla hanow aia vüi ukah mih kimbang kua hownia nalawt kown. Aia dow pren kowi kowh krawng khila dowi kownkow napumla mik kown.13Tawkchedow aia vüi ang nachak pe leng kown, now aia dow ang kowh leng kowi natasowk kown. Aia kowi dow Kaldaiuüa pren Babulawn kowi ang napawla kown, now nakowi dow aia nakowng kown. Tawkchedow tawngpaw khila kown nadowi.14Aia riaret kowi uowi mih maten, aia kowh lup chang mih hai aia kowh siphaiuüa maten kowi pren tali nui kowi ang nacham uetah kown. Amatni kowi dow parla saidawng se ang nakrawiah kown.15Amatni kowi dow chen towng chap towng hai pren towng kowi ang nacham uetah kown. Nami khin khe dow ang chowtaih CHAKRAMANG pami natuk büah bowt kown.16Tawkchedow amatni cham uowi rah towng kowi amatni kowh chowm krang uowi krang suiiai kaniaima mih nataphuangla büah kownkow tasenra, khown hai makowng hawi hownia ang nape plaiah ne kown. Nahanow ang chowtaih CHAKRAMANG pami natuk büah bowt kown,” pakhai.17Nami kung kowi CHAKRAMANG laiklow dow ang tut-e uang ting khai. Aia tek mih,18“Aw maru chapa, en cha en kham khe kram hown chür se chür se chaah khamah diah.19Pren kowi kowh maru-uüa kowi maiawng tek pe diah: Mami dow Israel pren kowi hai Jerusalem marow kowi kowh maru-uüa lawnguan CHAKRAMANG tek mih chekhai. CHAKRAMANG tek mih, ‘Amatni dow tawmpa kram hown nacha chakkham kown, now amawlawma hown nakham tui büah kown. Tawngplawng kowchow panow nakowi kowh uowi miuüa tachang nowng rakowi amatni kowh pren dow ransu-uüa mih tengiow tengklaima nata towla pe hüah kown.20Maru kawm atekma mih marow maten dow natapiak kown, now pren mih paw akhaw aklaima naown kown. Nami khin khe dow ang chowtaih CHAKRAMANG pami natuk büah bowt kown,’ pape diah,” pakhai.21Nami kung kowi CHAKRAMANG laiklow dow ang tut-e uang ting khai. Aia tek ang mih,22“Aw maru chapa, Israel pren kowi maiawng mih lai kiang uowi khai, ‘Ni taih kowi chowtlowt, mukmang laiklow dow katpaw uang tachi dowi,’ pakhai.23Naiawng rakowi maiawng hai amatni kowi kowtek pe diah, CHAKRAMANG Thurai tek mih, ‘Enni kiangah mih laiklow dow ang nataingta enni bowt kown, now Israel pren kowi naiawng mih laiklow dow miapaw natek kown nadowi bowt,’ pape diah. Now nami takcha kowi maiawng kowtek pe diah, ‘Khin mih uang ting khai bowt, now mukmang maten paw kawmat dow nauang tachi bowt kown,’ pape diah.24Israel maru-uüa pungmadawng kowi dow dai lai mukmang nauowi kown nadowi bowt, now pur prakowi kowh lawnguan kowi nape awmrawmah kownkow dai lai hawra mük paw uowi kown nadowi bowt.25Tawngplawng kowchow panow ang dow CHAKRAMANG chekhai. Ang che tek now nami iawng naphaw ngengche kown. Naiawng rakowi aw kingküa mih chenchapuüa, ang tekah mih iawng enni chownglawng kowi nauang tachi ngengche kown; kra dowi bowt tham. Ang CHAKRAMANG Thurai mami laiklow ang tek khowk,” pakhai.26Nami kung kowi CHAKRAMANG laiklow dow ang tut-e uang ting khai. Aia tek ang mih,27“Aw maru chapa, Israeluüa tek mih, ‘En khi-ah mih mukmang dow kawmat kowh uang phaw kown mih nadowi, auai khe akrama kung kowi kowh uang phaw kown mih laiklow chowtaih,’ pakhai.28Naiawng rakowi amatni kowi dow kowtek pe diah, CHAKRAMANG Thurai tek mih, ‘Ang kowh laiklow nauang tachi kown mih dow kra dowi bowt chekhai; Ang tek iawng dow nauang tachi kown. Ang CHAKRAMANG Thurai mami laiklow ang tek khowk,’ pakhai,” pape khai.
The Seed Company