John4
1बाद में, फरीसी नाम के धार्मिक समाज सुनलन कि यूहन्ना बपतिस्मा देवेवाला के बराबरी में यीशु तऽ चेला में जादे बढ़ोतरी कर रहलन हे आउर ई कि जेतना लोगवन के यूहन्ना बपतिस्मा दे रहलन हल ओकर बराबरी में ऊ ढेर लोगवन के बपतिस्मा दे रहलन हे। यीशु के पता चलल कि फरीसियन ई सुनलन हे।2सचमुच में यीशु केकरो भी बपतिस्मा नऽ देलन, बाकि उनकर चेलवन लोगवन के बपतिस्मा दे रहलन हल।3जखनी उनका पता चलल कि फरीसी उनका बारे में जानऽ गेलन हल, तऽ यीशु यहूदिया राज के छोड़ के एक बेरा फिन से गलील राज में लौट गेलन।4अखनी गलील राज जाय ला उनका सामरिया प्रान्त से होके गुजरेला हल।5तऽ आगे, ऊ सामरिया के सुखार नाम के एगो नगर में पहुँचलन। सुखार धरती के ऊ कोना में हल जेकरा याकूब बड़ी समय पहिले अपन बेटा यूसुफ के देलन हल।6याकूब के कुईयाँ भी ओही जगह पर हल। सुखार पहुँचे के बाद, अपन लम्बा यात्रा के चलते यीशु बड़ी थक गेलन हल, येहिगुने आराम करे ला ऊ याकूब के कुईयाँ बगल में बईठ गेलन। ई करीब दूपहर के 12 बजे के समय हल।7एगो सामरी औरत कुईयाँ पर निकस के अईलन कि ऊबहन में बाल्टी नाके कुछ पानी भर लेतन। यीशु ओकरा से कहलन, “दया कर के हमरा पिये लागी तनिसा पानी दऽ।”8ऊ अईसन ई लागी कहलन काहेकि उनकर चेलवन उनका अकेले छोड़ देलन हल आउर भोजन कीने लागी नगर में चल गेलन हल।9आउर ऊ सामरी औरत यीशु से कहलन, “हम हैरान ही कि तूँ, एगो यहूदी, हम, सामरिया के औरत से पानी पिलावे लागी कह रहलऽ हे।” ऊ अईसन येहिगुने कहलन काहेकि यहूदी लोग आमतौर पर सामरियन से लेन-देन नऽ रखऽ हलन। 10यीशु उनका जवाब देलन, जदि तूँ ऊ वरदान के जानतऽ हल जे परमेश्वर तोरा देवे ला चाहऽ हथन, आउर जदि तूँ जानतऽ हल कि हम कौन ही जे तोरा से पानी पिलावे ला विनती कर रहली हे, तऽ तूँ हमरा से पिलावे ला विनती करतऽ हल, आउर हम तोरा जिनगी के जल देती हल।11ऊ औरत जवाब देलन, “हे महोदय, तोरा बिजुन तऽ बाल्टी भी नऽ हे, जेकरा से कुईयाँ से पानी भर के बाहरे निकासल जा हे, आउर ई कुईयाँ गबड़ा हे। जबकि तूँ ई कुईयाँ से पानी बाहरे नऽ निकास सकल हे तऽ तोरा ई जिनगी के जल जिनगी के पानी कहाँ से मिलत?12जरुर तूँ हमर पिता याकूब से बढ़ के नऽ हऽ। ऊ ई कुईयाँ खोदलन आउर एकरा हमनी के दे देलन। ऊ, आउर उनकर बेटवन, आउर ओखनी के जानवरवन भी एकरा में से पानी पियलक।”13यीशु ओकरा जवाब देलन, “सभे अादमी जे ई कुईयाँ के पानी पियऽ हे ऊ फिनो से पियासल होत।14बाकि जे कोई ऊ पानी के पियतन जे हम ओकरा देम फिनो कहियो पियासल नऽ रहतन। बजाय एकर, जे पानी हम ओकरा देम ऊ ओकरा भीतरे पानी के सोता बन जईतक जे ओकरा में उमड़ते रहत आउर ओकरा स्वर्ग में हमेशा जिन्दा रखत।”15ऊ औरत यीशु से कहलन, “हे महोदय, दया कर के ई पानी में से जरीसुन हमरो भी दऽ जेकरा से हम कहियो पियासल नऽ रहम चाहे फिनो से ई कुईयाँ पर ओकरा पानी भरे लागी आवे नऽ पड़े।”16यीशु ओकरा से बोललन, “जा अपन मरद बिजुन जा आउर ओकरा ईहाँ ले आउर।”17ऊ औरत उनका जवाब देलक, “हमर कोई मरद नऽ हे।” यीशु ओकरा से बोललन, “तूँ ठीके कह रहलऽ हे कि हमर कोई मरद नऽ हे,18काहेकि तोर एगो नऽ बाकि पाँचगो मरद हे, आउर अखनी तूँ जेकरा साथ रह रहलऽ हे ओहू तोर मरद नऽ हे। जे तूँ मरद नऽ होवे के बारे में कहलऽ हे ऊ सच हे।”19ऊ औरत यीशु से कहलन, “हे महोदय, हमरा लगऽ हे कि तूँ कोई भविष्यद्वक्ता हऽ।20हमनी के पुरखावन एज्जे एही पहाड़ पर परमेश्वर के दण्डवत करलन हल, बाकि तूँ यहूदी कहऽ हऽ कि हम यरूशलेम में तोहनी के मन्दिर में परमेश्वर के आराधना करे के चाही।” 21यीशु ओकरा से बोललन, “हे बेटी, जखनी हम कहऽ ही कि अईसन समय आ रहल हे जखनी नऽ तऽ ईहाँ ई पहाड़ पर अाउर नऽ यरूशलेम में तूँ पिता के दण्डवत कर पईवऽ तऽ हमर विश्वास करवऽ।22ईहाँ सामरिया में तोहनी ऊ परमेश्वर के आराधना करऽ हऽ जिनका तोहनी नऽ जानऽ हऽ। हमनी यहूदी ऊ परमेश्वर के आराधना कर ही जेकरा हम जानऽ ही। ई येहिगुने सच हे काहेकि तोहनी के पापवन से उद्धार पावे के राह यहूदियन में से ही आवऽ हे। 23फिनो भी, अईसन समय आ रहल हे आउर आ गेल हे जखनी जे लोग परमेश्वर के सच्चा आराधना आत्मा से अाउर सच्चाई से करतन। अईसन येहिगुने हे काहेकि अपन आराधना लागी पिता सच में अईसने लोगवन के खोज में हथन।24परमेश्वर एगो आत्मिक अस्तित्व हथन, अाउर जे उनकर आराधना करऽ हथन उनका उनकर आराधना आत्मा आउर सच्चाई से करे के चाही।”25ऊ औरत यीशु से कहलन, “हम जानऽ ही कि मसीह आवे वाला हथन। ओही जेकरा यूनानी में ख्रीस्त कहल जा हे। जखनी ऊ अईतन, तऽ ऊ हमनी के सभे बात बता देतन जेकरा जाने ला जरुरी हे।”26यीशु ओकरा से कहलन, “हम, जे तोरा से अखनी बात कर रहली हे हमहीं मसीह ही!”27ओही घड़ी, उनकर चेलवन नगर से वापस आ गेलन। ओखनी के अचरज हल काहेकि यीशु अकेलहीं कोई औरत से बात रहलन हल जेकरा ऊ जानऽ नऽ हलन। जबकि, कोई भी उनका से पूछे के हिम्मत नऽ करलन कि तूँ ओकरा से कौची चाहऽ हऽ? चाहे “तूँ ओकरा से अईसहीं बात काहे कर रहलऽ हल?”28ओही घड़ी ऊ औरत अपन पानी के घईला के ओज्जे छोड़ देलक आउर नगर में लौट गेलक। ऊ नगर के लोगवन से कहलन,29“आवऽ आउर ई आदमी से मिलऽ जे बड़ी मनी अईसन बात बतईलन हे जेकरा हम करली हल! ई मसीह तऽ नऽ हो सकलन हे, का ई परमेश्वर हो सकलन हे?”30ऊ लोगवन नगर के छोड़ देलन आउर यीशु भीर अईलन।31जौन घड़ी ऊ औरत गेल हल, यीशु के चेलवन, जे अखनिये तुरन्त भोजन लेके लौटलन हल, उनका से खायला विनती करलन। ओखनी कहलन, “हे गुरु, दया कर के कुछो खा लऽ!”32यीशु ओखनी से कहलन, “हमरा भीर अईसन भोजन हे जेकरा बारे में तोहनी के कुछो नऽ पता हो!”33तब चेलवन अपने में एक दोसर से कहे लगल, “जरुर कोई दोसर अादमी उनका खाय लागी कुछ नऽ लईलन हे, का ऊ लईलन हे?”34यीशु ओखनी से कहलन, “जे हमरा जिन्दा रखऽ हे ऊ ई हे: ई ओही करे ला हे जे हमर परमेश्वर के इच्छा जे हमरा भेजलन हे चाहऽ हथन आउर ई हमर पिता के काम पूरा करे ला हे।35साल के ई समय में साधारण तौर पर तोहनी कह हऽ कि अखनी तऽ चार महीना बचल हे, आउर फिनो हमनी फसल के कटनी करम। जे हम तोरा से कह रहली हे ओकरा सुनऽ। आउर देखऽ आउर धियान दऽ कि ई लोग अईसन खेतवन नियर हथन जे अखनी कटनी लागी तईयार हे!36जे ई फसलवन काटऽ हे ऊ मजदूरी पावऽ हे आउर फल जमा करऽ हे, ई अईसन अादमी हे जे स्वर्ग में अनन्त जिनगी पावऽ हथन। ओखनी सभे जे बिच्चा बुनऽ हे आउर ओखनी जे कटनी करऽ हे ओखनी ला एकर फल ई होत कि ओखनी मिल के खुशी मनईतन।37जे हम कहे जा रहली हे ऊ सच हे: एक अादमी बिच्चा रोप हथन, आउर दोसर अादमी फसल के कटनी करऽ हे। 38हम तोहनी के जे हमर चेला हऽ एगो अईसन अनाज फसल के जमा करे ला भेजली हे जेकरा तोहनी नऽ रोपलऽ हल। दोसर कोई फसल लगावे में कड़ा मेहनत करलक, बाकि अखनी तोहनी सभे ओखनी के साथ ओखनी के काम में जूट गेलऽ हे।”39अखनी बड़ी सा सामरियन जे सुखार नगर में रहऽ हलन जे ऊ औरत ओखनी के बतईलक हल ओकर वजह से यीशु पर विश्वास करलन। ऊ गवाही देलन हलन, “ऊ हमरा अईसन बड़ी मनी बात बतईलन जे हम करली हल।”40जखनी सामरिया के लोग यीशु भीर अईलन, तऽ ओखनी उनका साथ रुके लागी विनती करलन। येहिगुने ऊ ऊहाँ ओखनी साथ दू दिन लागी आउर रुक गेलन।41ओखनी में से ढेरमनी यीशु पर ऊ बात के चलते विश्वास करलन जेकरा ऊ ओखनी ला ऐलान करलन हल।42ऊ नगर के बसिन्दा ऊ औरत से कहलन, “अब हमनियो यीशु पर विश्वास करऽ ही, बाकि ऊ बात के वजह से नऽ जे तूँ हमनी के उनका बारे में बतईलऽ हे। हमनी विश्वास एहिगुने कर ही काहेकि हमनी खुद ही उनकर परवचन के सुन लेली हे। अखनी हम जानऽ ही कि सचमुच में ई ऊहें अादमी हथन जे ई दुनियाँ के विश्वासियन के ओकर पापवन से उद्धार करऽ हथन।”43उनका सामरियन के साथ दू दिन ला रुकला के बाद, यीशु सुखार नगर छोड़ देलन आउर गलील प्रान्त में प्रवेश करलन।44यीशु गलील में येहिगुने जाय ला चाहऽ हलन कि काहेकि ऊ खुद ही गवाही देलन हल कि भविष्यद्वक्ता ऊ जगह में इज्जत नऽ पावऽ हथन जहाँ पर ऊ पलईलन-पोसईलन हे आउर ऊ नाम कमाय के इच्छा नऽ करलन हे।45जबकि ई सच हे, जखनी ऊ गलील प्रान्त में पहुँचलन तऽ ऊहाँ के ढेरमनी लोग साधारण रूप से उनकर स्वागत करलन काहेकि ऊ ऊ सभे अचरज कामवन के देखलन हल जेकरा ऊ हाल ही में फसह के परव में यरूशलेम में करलन हल, जेकरा में ओखनियो गेलन हल।46आगे, गलील प्रान्त के काना नगर में यीशु फिनो से वापस चल गेलन। ईहें ऊ नगर हल जहाँ पानी के ऊ दाखरस में बदल देलन हल। ऊहाँ राजा के एगो अधिकारी हलन जे कफरनहूम नगर के नजदीक रहऽ हलन आउर ओकर एगो बेटा हल जे बड़ी बेमार हल।47जखनी ऊ अधिकारी सुनलन कि यीशु यहूदिया से गलील में वापस आ गेलन हे, तऽ ऊ काना में यीशु भीर गेलन आउर उनका से नीचे कफरनहूम आवे आउर अपन बेटा के निमन करे ला विनती करलन, काहेकि तुरन्त ओकर बेटा मरे वाला हथन।48तऽ यीशु ओकरा से कहलन, “तोहनी मसीह के रूप में हमरा पर खाली तबहिये विश्वास करवऽ जदि तोहनी अचरज चिन्ह करते हमरा देखवऽ!”49ऊ राजा के अधिकारी ओकरा से कहलन, “हे महोदय, दया कर के हमर बेटा के मरे से पहिले नीचे कफरनहूम हमर घरे चलऽ!”50यीशु ओकरा बोललन, “घर जा। तोर बेटा जिन्दा रहतन।” ऊ आदमी उनकर बात पर विश्वास करलन जे यीशु ओकरा से कहलन हल, आउर ऊ वापस घर जायला चल देलन।51जखनी ऊ अधिकारी कफरनहूम से होके अपन घर दने यात्रा कर रहलन हल, तऽ सड़क पर उनकर दास उनका से आ मिलल। ओखनी ओकरा बतईलन, “तोर बेटा जिन्दा होवे वाला हथन।”52ऊ अपन सेवकवन से पूछलन, “कौन घड़ी हमर बेटा निमन होवे ला शुरु करलक हल?” ओखनी उनका जवाब देलन, “कल एक बजे दूपहर के बाद ओकर बुखार उतर गेल हल।”53आउर ऊ लईका के बाबूजी जानऽ गेलन कि ओकर बेटा में ओही बखत सुधार होल हल जखनी यीशु ओकरा से कहलन हल कि ओकर बेटा जिन्दा रहतन। येहिगुने एही आदमी, जेतना ओकर घर में रहऽ हलन ऊ सभे मिल के यीशु पर विश्वास करलन।54ऊ दोसर बड़का चिन्ह हल जे यीशु मसीह करलन हल। एकरा ऊ ऊ बखत में करलन जहिया ऊ यहूदिया राज के छोड़ला के बाद गलील राज में अईलन हल।
Bridge Connectivity Solutions Pvt. Ltd.