John5
1ई बात के घटला के बाद, यहूदियन के एगो आउर परव के समय अईलक, आउर यीशु परव मनावे ला ऊपरे यरूशलेम नगर चल गेलन।2यरूशलेम में ऊहाँ एगो जगह हे जे भेड़ फाटक कहलावऽ हल जे नगर के भीतर जाय वालन के फटकवन में से एगो हल। ऊ फाटक के बगल में एगो कुण्ड हे जेकरा लोग यहूदी लोग के बोलल जाय वाला भाषा में बैतहसदा कह हलन। ऊ कुण्ड के आगे छतवाला पाँचगो ओसारा हल।3ई ओसरवन में बड़ी सा लोग पड़ल रह हलन। ओखनी अईसन लोग हलन जे बेमार, देखे में कमजोर, चले में कमजोर, चाहे हिले डोले में कमजोर हलन।4ओखनी ऊहाँ येहिगुने पड़ल हलन काहेकि परमेश्वर के तरफ से एगो स्वर्गदूत कखनियो-कखनियो आवऽ हल आउर पानी में हिलकोर दे हल। स्वर्गदूत के हिलकोरला के बाद पानी में हेले वाला जे कोई भी होवऽ हल, तऽ चाहे ओकरा जे कोई बेमारी चाहे कमजोरी सता रहऽ हल ऊ निमन हो जा हल।5बैतहसदा नाम के कुण्ड बिजुन एगो अादमी पड़ल हल जे 38 साल से बेमार हल।6यीशु ऊ आदमी के कुण्ड भीर पड़ल देखलन, आउर ऊ जानऽ हलन कि ऊ ऊहाँ बड़ी समय से पड़ल हलन। ऊ ऊ आदमी से पूछलन, “का तूँ चाहऽ हऽ कि तोर सेहत निमन हो जाय?”7ऊ बेमार अादमी उनका जबाब देलन, “हे महोदय, हमर बिजुन अईसन कोई अादमी नऽ हे कि जखनी स्वर्गदूत पानी के हिलावे तऽ ऊ हमरा कुण्ड में हेल सकऽ हे। जखनी ला हम कुण्ड में हेल पायेम, कोई दोसर पहिलहीं कुण्ड में हेल जा हे अाउर हमरा से पहिले निमन हो जा हे, येहिगुने हम निमन नऽ हो पावऽ ही।”8यीशु ओकरा से बोललन, “खड़ा होवऽ! अपन चटईं उठावऽ जेकरा पर तूँ पड़ल हऽ आउर चलऽ फिरऽ!”9तऽ यीशु ऊ अादमी के तुरन्त निमन करलन, आउर ऊ अादमी चटईं के समेट लेलक जेकरा पर ऊ सुतल हल आउर चले फिरे लगलक। अखनी ई यहूदियन के विश्रामदिन में घटल हल जेकरा सब्त के दिन रूप में भी जानल जा हल।10काहेकि ई यहूदियन के विश्रामदिन हल, येहिगुने यहूदी अगुवन ऊ आदमी से जेकरा यीशु चंगा करलन हल कहलन, “आज सब्त दिन हे। तोरा आज के दिन अपन चटईं समेटे ला सही नऽ हे काहेकि ई तऽ काम हे।”11ऊ अादमी जेकरा यीशु चंगा करलन हल ओखनी के जबाब देलन, “जे अादमी हमरा चंगा करलन हल ओही हमरा से कहलन कि ई चटईं उठावऽ जेकरा पर हम सुतल हली आउर चलऽ फिरऽ।”12यहूदी सरदार उनका से पूछलन, “कौन तोरा से कहलन कि अपन चटईं उठावऽ आउर चलऽ फिरऽ?”13जबकि ऊ अादमी जेकरा यीशु चंगा करलन हल ई नऽ जानऽ हलन कि ओकरा कौन चंगा करलन, काहेकि यीशु बेगर केकरो नजर पड़ले ऊ अादमी के छोड़ देलन हल, काहेकि ऊ इलाका भीड़-भड़क्का वाला हल।14बाद में, यीशु के ऊ अादमी मन्दिर में मिललन जेकरा ऊ निमन करलन हल आउर ओकरा से कहलन “देखऽ अखनी तूँ निमन हो गेलऽ हे! एकर बाद पाप मत करिहऽ, ताकि तोरा साथ तोर पिछलका बेमारी से बढ़ के ओकरा से जादे खराब नऽ होवे।”15ऊ अादमी चल गेलन आउर यहूदी अगुवन के बता देलन कि जे आदमी ओकरा निमन करलन हल ऊ यीशु हलन।16येहिगुने यहूदी अगुवन यीशु के सतावे ला शुरु कर देलन काहेकि ऊ यहूदियन के सब्त दिन में लोगवन के चमत्कार कर के निमन कर रहलन हल।17यीशु उनका ई जबाब देलन, “परमेश्वर, हमर पिता आजो काम कर रहलन हे, येहिगुने हमहूँ काम कर रहली हे।”18उनकर अईसन कहला के फलस्वरूप, यहूदी अगुवन यीशु के जानऽ मारे ला जेतना कोशिश ओखनी पहिले करलन हल ओकर बराबरी में अाउर भी जादे कोशिश करे लगलन हल। ओखनी उनका जानऽ येहिगुने मारे ला चाहऽ हलन काहेकि ऊ नऽ खाली उनकर सब्त दिन के नियम के तोड़ रहलन हल बाकि एहिगुने भी काहेकि ऊ ई कह के, कि ऊ परमेश्वर के बराबर हथन दावा ठोक रहलन हल कि परमेश्वर उनकर पिता भी हथन।19ई बदनामी के वजह से यीशु यहूदी अगुवन के जवाब देलन, “हम तोहनी सभे से सच कह रहली हे: हम, बेटा, अपन अधिकार से कुछो नऽ कर सकली हे हम खाली ओही कर सकली हे जे हम देखऽ ही कि परमेश्वर, पिता, कर रहलन हे। जे कुछ पिता कर हथन, ओही हम, माने कि बेटा, भी करऽ ही।20ई येहिगुने सच हे काहेकि पिता हमरा, माने कि बेटा, से प्रेम करऽ हथन, आउर जे कर रहलन हे ऊ हमरा सभे कुछ बता दे हथन। पिता हमरा ऊ चमत्कार वाला काम के बारे में भी बतईतन जे ऊ चमत्कार से भी बढ़ के होत जे हम पहिले करली हे जेकरा से तोहनी ओकरा से हैरान हो सकऽ।21अईसन येहिगुने होत काहेकि हम, माने कि बेटा, जे कोई के चाहऽ ही अनन्त जिनगी प्रदान करऽ ही ओईसहीं जईसे पिता ओखनी के फिनो से जिन्दा करऽ हथन जे मर गेलन हे आउर ओकरा फिनो से जिनगी प्रदान करऽ हथन।22ई येहिगुने सच हे काहेकि पिता केकरो भी न्याय नऽ करऽ हथन। बजाय एकर कि, ऊ लोगवन के न्याय करे पूरा अधिकार हमरा, माने कि बेटा के दे देलन हे।23पिता अईसन येहिगुने करलन जेकरा से सभे अादमी हमर, माने कि बेटा के, ओईसहीं इज्जत करतन जईसे ओखनी पिता के इज्जत करऽ हथन। जे कोई हमर इज्जत नऽ करऽ हथन ओखनी हमर पिता के भी इज्जत नऽ करऽ सकलन हे जे, हमरा भेजलन हे।24हम तोहनी सभे से सच कह रहली हे: जे कोई भी हमर शिक्षा के मानऽ आउर अपनावऽ हथन आउर परमेश्वर पर जे हमरा भेजलन हे विश्वास करऽ हथन ऊ हमरा साथ स्वर्ग में हमेशा जिन्दा रहतन, आउर परमेश्वर ओकर न्याय दोषी जईसन नऽ करतन। बजाय एकर, ऊ अादमी आत्मिक रूप से मर गेल पर भी आत्मिक रूप से जिन्दा हो गेलन हे।25हम तोहनी सभे से सच कह रहली: एगो अईसन समय आ रहल हे आउर, बलुक ईहाँ पहिलहीं से हे कि ई घड़ी जे मर गेलन हे ऊ हमर वाणी सुनतन, माने कि परमेश्वर के बेटा के वाणी, आउर जे हमर सुनऽ हथन ऊ जी जईतन।26ई येहिगुने सच हे काहेकि जईसे पिता लोगवन के जिन्दा करे जोग हथन, ओईसहीं तऽ ऊ हमरा, माने कि बेटा के भी जिन्दा करे के योगता देलन हे।27पिता हमरा पूरा मानव जाति के न्याय करे के अधिकार येहिगुने देलन हे, काहेकि हम आदमी के बेटा ही।28चौकऽ नऽ कि परमेश्वर अईसन करलन हे काहेकि अईसन समय अईतन जहिया सभे आदमी जे कब्रवन में हे ओखनी हमर वाणी सुनतन।29तऽ ओखनी अपन कब्रवन से बाहरे निकस अईतन। जौन भलाई करलन हे परमेश्वर ओखनी के पुनरुत्थान ला अनन्त जिनगी देतन। बाकि जौन बुराई करलन हे परमेश्वर ओखनी के ई ला जीयईतन कि ओखनी के दोषी ठहरईतन आउर ओखनी के हमेशा लागी सजा देतन।30हम अपने से कुछो नऽ कर सकली हे। जे हम अपन पिता से सुनऽ ही ओकरे मुताबिक न्याय हम करऽ ही, आउर हम धर्मी तरीका से न्याय करऽ ही। हम न्याय के तरीका से न्याय येहिगुने करऽ ही काहेकि हम ओकरा करे लागी कोशिश नऽ करऽ ही जेकरा हम चाहऽ ही बजाय एकर, हम ओही करऽ ही जे हमर पिता, जे हमरा भेजलन हे, चाहऽ हथन।31जदि खुद के बारे में गवाही देवेलागी हम अकेले आदमी रहती हल, तऽ मूसा कि व्यवस्था के मुताबिक हमर गोवाही विश्वासयोग्य नऽ होत हल।32तईयो कोई दोसर अादमी भी हथन जे हमरा बारे में गवाही दे हथन, आउर हम जानऽ ही कि जौन गवाही ऊ हमरा बारे में दे हथन ऊ विश्वासयोग्य हे33तोहनी यहूदी अगुवन यूहन्ना बपतिस्मा देवेवाला भीर संदेशवाहक के भेजलन हल, आउर ऊ हमरा बारे में तोहनी के सच गवाही बतईलन।34जबकि, हमरा ला गवाह बने लागी हमरा कोई अादमी के जरुरत नऽ हे। तईयो हम यूहन्ना बपतिस्मा देवेवाला के बारे में ई येहिगुने कह रहली हे ताकि परमेश्वर तोहनी के उद्धार कर सकतन।35यूहन्ना बपतिस्मा देवेवाला बरते आउर चमकते दीया जईसन तोहनी पर परमेश्वर के सच्चाई के ऐलान करलन। कुछ समय ला तोहनी ऊ ज्योति में खुशी मनावे के चाहे वाला हल जे ऊ सच हल जेकर ऊ ऐलान करलन हल।36जबकि जे गोवाही हम अपना बारे में दे ही ऊ ऊ गवाही से भी बढ़ के हे जे यूहन्ना हमरा बारे में दे हथन। अईसन ई से हे काहेकि ई गोवाही ऊ चमत्कारी काम हे जेकर करे ला परमेश्वर पिता हमरा इजाजत देलन हे। ई काम जेकरा हम कर रहली हे सबूत हे कि पिता ही हमरा भेजलन हे।37एकर अलावे, हमर पिता जे हमरा भेजलन हे ओही ऊ अादमी हथन जे हमर बारे में गवाही देलन हे। तोहनी में से कोई भी कहियो उनका नऽ तऽ बोलते सुनली हे चाहे देखली हे कि ऊ केकरा नियर जना हथन।38तोहूँ पिता के शिक्षक के पालन नऽ करऽ हऽ। हम जानऽ ही कि ई येहिगुने सच हे काहेकि तूँ हमरा पर विश्वास नऽ करऽ हऽ माने कि ऊ अादमी पर जेकरा परमेश्वर भेजलन हे!39तोहनी गौर से पवित्रशास्त्र येहिगुने पढ़ऽ हऽ काहेकि तूँ विश्वास करऽ हऽ कि उनका पढ़े से तूँ स्वर्ग में हमेशा जिन्दा रहे जुकुर रहवऽ। आउर ईहें ऊ पवित्रशास्त्र हे जे गवाही दे हे कि हम कौन ही।40तईयो तूँ हमर चेला बने से अखनियो मान कर हऽ जेकरा से तूँ स्वर्ग में हमेशा ला जिन्दा रहवऽ।41हम केकरो तरफ से सम्मान गरहन नऽ करऽ ही।42जबकि हम जानऽ ही कि तूँ परमेश्वर से एकदम से प्रेम नऽ करऽ हऽ।43हम अपन पिता के नाम से अईली हे, बाकि तईयो तूँ हमरा अपनावऽ नऽ हऽ। जदि कोई दोसर अादमी अपन खुद के नाम से तोरा भीर अईतन, तऽ तोहनी ओकरा अपना लेवऽ।44तूँ हो सकऽ हे ऊ घड़ी हमरा पर विश्वास नऽ सकऽ हऽ जखनी तूँ एगो मात्र परमेश्वर से अपन इज्जत पावे के चाहत के बजाय तोहनी सभे एक दोसर के इज्जत ही कर रहल हे!45ई मत समझऽ कि हम ओही ही जे अपन पिता के सामने तोहनी पर दोष लगायेम। मूसा, एगो अईसन आदमी जिनका पर तोरा उम्मीद हे कि ऊ तोहनी के बचाव करतन, सचमुच में ओही ऊ आदमी हे जे तोरा पर दोष लगईतन।46ऊ तोरा पर येहिगुने से दोष लगईतन काहेकि जदि तूँ मूसा पर विश्वास करतऽ हल बाकि तूँ नऽ करलऽ, तऽ तूँ हमरा पर विश्वास येहिगुने करवऽ, काहेकि मूसा शास्त्र में हमरा बारे में बखान करलन हे। 47जबकि जे मूसा लिखलन तूँ ओकरो पर भी विश्वास नऽ करऽ हऽ, तऽ हो सकऽ हे तूँ ओकरो पर विश्वास नऽ कर सकवऽ जे हम तोरा से कहली हे!”
Bridge Connectivity Solutions Pvt. Ltd.