Hobu23
1Gífiyabei nadimurehan uguñe, ladüga ru laali Bungiu lihürü lúhabu nuagun.3Nasubudirei hamuga halíaba lan nadarirei, luma ida luba lan nadüga lun nachülürün le ñein lubéi laganóua!4Níchuguñein hamuga nikesin ligibugiñe, ladüga ígiraguati dimurei nun.5Subudi naali hamuga kaba lan nóunabagüle!6Gama lumoun mageindagunbei hamuga numa lau erei, aganbarügü lubadina hamuga,7larihiñein hamuga luagu richá nan, aba hamuga líchugunina keisi madurunti, lígiruñadina hamuga séfuñu lun sun dan.8Gama lumoun áluaha numuti Bungiu luéigiñe oubaü le ñéingiñe lubéi laboucha weyu, úati ñein, áluahanei luéigiñe oubaü le ñeinhin lubéi lálüda weyu, ani madari numuti.9Ñǘdüntina luagun nórute, ani marihin numuti; Giributina luagun suru, ani marihin numuti giñe.10Subudi lumuti kada aban lídangiñe némeri, ánhana lóuchagua harumañu luba náfuridun kei golu.11Súnwandan nafalaruni üma le larufudubei nun madireirunga luéi.12Súnwandan nagunfuliruni lilurudun luma lugumadin, mama le nabusenrun nadügübei.13Dan le laritagun ladügün aban katei, adüga lumuti; úati ni kata lun lasansiraguagüdüni laritagun.14Le haritagua láalibei ladügün nau, ligíaba ladüga, lúmaya amu burí katei le eledegua láalibei.15Ligía nanufudebei luéi; láurügü nasaminarun luagun, buíntina lau anufudei.16Hanufudeguagüda láadina Bungiu Suntigabafu.17Lagumuchaguagüdana hamugagubei áriebu, ladouragua hamugagubei luburiga nau.
Bible Society of Honduras