Hobu24
1Ka san uagu mariñagun lubalin Suntigabafu kaba lan dan laguseragüda, lun gayara lan harihini lumadagu?2Sánsigua hamuti wuribatiña láfadaragun áraabu, íweruhatiña mudún hánwounme halügüniña,3gidá hamutiña habiñanigu méteñuhaña hawéi, gidá hamaña habiñanigu würiña ha hilaguaaña úmarigu hawéi!4Díreigüda hamutiña gudemetiña luéi üma, aramudaguatiña gürigia ǘnabugubutiña hawéi.5Furitiña gürigia gudemetiña, kei animaalugu lílana fulasu mageirawati áluaha heigin, ani lídangiñe fulasu mageirawati hasagara éigini houn harahüñü.6Ñǘdüntiña abudaha lílewe türigu hacharirugu gürigia, ñǘdüntiña giñe áluagua houngua lidan habeibein-agei wuribatiña.7Sügǘ hamuti áriebu úouga ni kata hama lun hadouragun haugua luéi lidiliga.8Dǘdügüda lumutiña huya wǘbüwagu, aba hóuburuni burí dübü wéinamuti áluaha haramudagun.9Gidá hamutiña harahüñü würiña hilaguaaña úmari ha figigiña hawéi, gidá hagía umegeni hawéi gudemetiña darí hafayeiruni hadúeihan.10Surusu haña gudemetiña anaagua türigu ani añaha lau ilamaü.11Hingí hamuti dübü le amuligülei lun hasagarun garaba; dügügua hamuti beibei lun hasagarun diwéin, ani añaha óunwegua hamagürabu.12Dise luéi uburugu ayahuahatiña, agúaraha hagía ha hilamémeeñabaña, gama lumoun maganbun lumuti Bungiu hafurieidun.13Añahein iyereehabútiña lun larugounga, diñutiña luéi lidan sun hémeri.14Ha gáfarahadibaña saragiatiña lun háfaruniña ha gudemebaña hilagubei, laguñeedun aba hasaliragun híwerutiñame.15Ha agabarahatiña hámari, agurabahatiña laburigadun, daruguatiña lau hagibu buidu, hariñaga hóunguarügü: «Ítara úabei arihitina».16Ha híwerubaña, áriebu hebelura hábiñoun gürigia. Sun hagía aramudaguñu haña wéyuagu, lágani larugounga híwerutiña!17Ítara liña larugounga le wéyuaguti houn kei lueirin luburiga; himei hamuti lanarimeniga le áriebuti.18Aduruuha lumutiña lere duna gürigia wuribatiña, rédeiti hamúan lábugiñe íñarawaguni, ani úati ni aban lunya luadigimari hacharirugu.19Ítara kei larürüdagun niewe lau lárouga lidan lubachouga ítara liña giñe hagumuchagun ha gafigounbaña lidan hamúaha.20Íbini háguchu guánarügü tabulieidubaña; héigibaña héweraü, úaalime ni aban aritaguti hawagun. Hábürühaba gürigia ha wuribabaña kei aban tídibu wewe le achugúti.21Súnwandan buga wuriba lan hóuseruniña würiña marahüñütiña hama hilaaña úmari. Míderagun hamutiña ni aban wéiyaasu.22Gama lumoun Bungiu lau lere, huchú lumutiña gabafutiña; dan ladügüni laritagun, úati ni aban achoururuti libagari.23Ígira lumutiña Bungiu lun habagaridun hemenigiñu, gama lumoun aríagu liña lun kada aban lídangiñe hémeri.24Murusunrügüñein dan hiñuragun ha wuribabaña houngua, málüti ánhaña hilá. Sáütiña kei híduru le hulawaali, kei ílewei le achugúti.25Anhein mama lubéi liña, kábagia ariñaga luagu niyeeni lan, arufudaléime au lan abulieidagubei?
Bible Society of Honduras