Matthew19
1अईसन होल कि जखनी यीशु ई बात कह चुकलन, तऽ गलील से चल गेलन, आउर यरदन नदी के पार यहूदिया प्रान्त में अईलन।2आउर बड़का भीड़ उनकर पीछे हो गेल, आउर ऊ बेमार लोग के ऊहाँ चंगा करलन।3आउर फरीसियन उनका भीर परीक्षा करे लागी अईलन, आउर कहे लगलन, “का कोई मरद के कोई भी कारण से अपन मेहरारू के तलाक देवे ला सही हे?”4बाकि यीशु जबाब दे के कहलन, “का तूँ शास्त्र में नऽ पढ़लऽ हे, कि जे ओकरा बनईलन, ऊ शुरु से ही नर आउर नारी कर के बनईलन,5आउर कहलन, ‘एही कारण, मरद अपन बाप आउर माय से अलग होके अपन मेहरारू से मिलल रहतन, आउर ओखनी दूनो एक ही देह होतन?’ 6येहिगुने फिन, ओखनी दूगो नऽ रहलन बाकि एक्केगो देह हो गेलन। येहिगुने, जेकरा परमेश्वर जोड़लन हे, ओकरा आदमी अलग नऽ करतन।”7फरीसियन उनका से कहलन, “फिन मूसा हमनी के ई आज्ञा काहे देलन हे कि तलाक के तलाकनामा दे के, ओकरा दूर भेज देवे?”8यीशु उनका से कहलन, “तोहनी के मन के कठोरता के कारण, मूसा तोहनी के मेहरारू के छोड़ देवे के इजाजत देलन, बाकि शुरुआत से अईसन नऽ हल।9बाकि हम तोरा से कहऽ ही कि जे कोई व्यभिचार के छोड़ के आउर कोई कारण से अपन मेहरारू के तलाक दे हे, आउर दोसरा से वियाह करऽ हे, तऽ व्यभिचार करऽ हे; आउर जे ऊ तलाक देवल से वियाह कर लेलक तऽ व्यभिचार करऽ हे।”10चेलवन उनका से कहलन, “जदि मरद के औरत के साथ ई किसीम के मामला हे, तऽ वियाह नऽ करे ला ही बढ़ियाँ हे।”11बाकि ऊ ओखनी से कहलन, “सभे कोई ई वचन के अपना नऽ सकऽ हे, बाकि ओही जिनका ई देवल गेल हे।12काहेकि कुछ नपुंसक अईसन हे जौन अपन माय के पेट से ही अईसने जनमलन, आउर कुछ नपुंसक अईसन हथन जेकरा आदमी नपुंसक बनईलन हे, आउर कुछ नपुंसक अईसन हथन जौन स्वर्ग के राज लागी अपने आप के नपुंसक बनईलन हे। जौन एकरा अपना सकलन हे, तऽ ओकरा ई बात के अपनावे दऽ।”13एक दिन कुछ माता पिता छोटकन लईकवन के यीशु भीर लईलन गेल, जेकरा से ऊ ओकरा पर हाथ रखतन आउर प्रार्थना करतन, बाकि चेलवन ओकरा डाँटलन।14बाकि यीशु कहलन, “छोटकन लईकवन के हमरा भीर आवे के इजाजत दऽ, आउर उनका हमरा भीर आवे से मत रोकऽ, काहेकि स्वर्ग के राज अईसने के ही हे।”15तब यीशु लईकन के आशीष देवे लागी ओकरा पर अपन हाथ रखलन, फिन ऊ ऊहाँ से चल गेलन।16आउर देखऽ, एक बार एगो जवान उनका भीर आके कहलक, “हे गुरु, हम कौन भला काम करूँ जेकरा से कि हम अनन्त जिनगी पायेम?”17बाकि यीशु उनका से कहलन, “तूँ हमरा से एकरा बारे में काहे पूछऽ हऽ कि अच्छाई का हे? भला तऽ एक ही जन हथन खाली परमेश्वर, बाकि जदि तूँ जिनगी में प्रवेश करे ला चाहऽ हऽ, तऽ आज्ञावन के मानऽ।”18ऊ आदमी यीशु से कहलन, “कौन वाला?” यीशु ओकरा जबाब देलन, “केकरो हत्या नऽ करिहऽ, व्यभिचार नऽ करिहऽ, चोरी नऽ करिहऽ, झूठा गवाही नऽ दिहऽ,19अपन बाबूजी आउर अपन माय के इज्जत करिहऽ, आउर अपन पड़ोसी के अपने समान प्रेम रखिहऽ।”20ऊ जवान आदमी यीशु से कहलन, “ई सभे के पालन तऽ हम करली हे। अखनी हमरा में कौन बात के कमी हे?”21यीशु उनका से कहलन, “जदि तूँ सिद्ध बने ला चाहऽ हऽ, तऽ जे कुछ तोरा भीर हे ओकरा जा के बेच दऽ, आउर गरीब लोग में बाँट दऽ, आउर तोरा स्वर्ग में खजाना मिलत; आउर आके हमरा पीछे होलऽ।”22बाकि जवान आदमी, ई बात सुन के, उदास होके चल गेलन, काहेकि उनका पास बड़ी संपत्ति हल।23फिन यीशु अपन चेलवन से कहलन, “हम तोरा से सच कह ही कि स्वर्ग के राज में एगो धनी आदमी मुश्किल से प्रवेश करतन।24आउर हम फिन तोरा से कहऽ ही कि परमेश्वर के राज में एगो अमीर आदमी के प्रवेश करे से ऊँट के सूई के छेद में से निकल जायला आसान हे।”25अखनी ई सुन के, चेला लोग बड़ी अचरज होके, कहे लगलन, “फिन कौन उद्धार पावे के लायक हे?”26बाकि यीशु उनका तरफ देखके, उनका से कहलन, “आदमी ला तऽ ई असंभव हे, बाकि परमेश्वर ला सबकुछ संभव हे।”27तब जबाब दे के पतरस उनका से कहलन, “देखऽ, हम तऽ सभे कुछ छोड़ देली हे आउर तोरा पीछे हो लेली हे। फिन हमरा लागी ऊहाँ का फायदा होत?”28तऽ यीशु उनका से कहलन, “हम तोरा से सच कह ही, नया युग में जब आदमी के बेटा अपन महिमा के सिंहासन पर बईठतन, तऽ तोहनी जौन हमरा पीछे हो लेलऽ हे, तोहनियो बारहो सिंहासन पर बईठ के इस्राएल के बारहो गोत्रवन के लोगवन के न्याय करवऽ।29आउर जे कोई भी घरवन, चाहे भईवन, चाहे बहिनियन, चाहे बाबूजी, चाहे माय, चाहे मेहरारू, चाहे बाल-बच्चा, चाहे खेतवन के हमर नाम लागी छोड़ देलन हे, ओखनी के सौ गुणा फईदा मिलत। आउर ऊ अनन्त जिनगी के अधिकारी होतन।”30बाकि बड़ी सा लोग जौन पहिले हे ऊ पिछला होतन, आउर जे पिछला हे, ऊ पहिला होतन।
Bridge Connectivity Solutions Pvt. Ltd.