Matthew20
1“काहेकि स्वर्ग के राज ऊ आदमी के समान हे, जे किसान हे, आउर अपन दाख के बारी लागी मजदूर लोग के काम पर रखे ला सवेरे बाहर निकललन।2फिन मजदूरवन के एक दीनार पर राजी कर के, ऊ ओखनी के अपन दाख के बारी में भेजलन। 3आउर लगभग सवेरे नौ बजे बाहर गेला के बाद, दोसर लोग के भी बाजार में बेकार खड़ा देखलन।4ऊ ओखनी से कहलन, ‘तोहूँ दाख के बारी में जा, आउर जे कुछ सही मजदूरी हे हम तोरा देम।’5येहिगुने ओखनी चल गेलन। फिन ऊ दूपहर में बारह बजे आउर तीन बजे के लगभग, ऊ जा के ओईसहीं करलन।6अखनी पाँच बजे के लगभग, बाहर निकल के, ऊ दोसर लोग के भी खड़ा पईलन, आउर ऊ ओखनी से कहलन, ‘तूँ काहेला ईहाँ दिन भर बेकार में खड़ा हऽ?’7ओखनी उनका से कहलन, ‘काहेकि कोई हमनी के काम पर नऽ रखलन।’ ऊ ओखनी से कहलन, ‘तोहूँ दाख के बारी में जा।’8आउर साँझ होला पर दाख के बारी के मालिक अपन भण्डारी से कहलन, ‘मजदूरवन के बोलावऽ, आउर अंतिम से लेके पहिलका तक के ओकर मजदूरी दऽ।’9आउर जे साँझ पाँच बजे के लगभग अईलन हल, ओखनी सभे के एक एक दीनार मिलल।10बाकि आके पहिले वाला सोचलक कि ओकरा जादे मिलत, बाकि ओखनियो के एक एक दीनार ही मिलल।11बाकि ऊ ओकरा लेके, किसान के खिलाफ कुड़कुड़ाय लगलन।12आउर कहे लगलन, ‘ई पिछलकन एक ही घंटा काम करलन, बाकि तूँ ओखनी के हमर बराबर कर देलऽ हे, जिनकनी दिन भर के भार उठईलन आउर रौदा सहलन?’!13बाकि ऊ ओखनी में से एगो के जबाब दे के कहलन, ‘हे दोस्त, हम तोरा साथे कुछ अन्याय नऽ करली हे। का तूँ हमरा से एक दीनार में राजी नऽ हलऽ?14तोरा जे हे, ऊ हमरा से लेलऽ आउर चल जा। बाकि हमर ई इच्छा हे कि जेतना तोरा देली हे, ओतना ही हम ई पिछलकनो के भी देऊँ।15चाहे का ई हमरा लागी अच्छा नऽ हे, कि हम अपन चीज के साथे, जे हम चाहऽ ही, ऊ करम? चाहे हमरा दयालु होवे के वजह से तोरा जलन भरल नजर हे?’”16“येही रीति से, जे पिछला हे, ऊ अगला करल जईतन, आउर जे पहिला हे, ऊ पिछला करल जईतन।”17आउर यीशु, यरूशलेम जाय घड़ी, अपना साथे बारहो चेलवन के एकांत में ले गेलन, आउर राह में ऊ ओखनी से कहलन,18“देखऽ, हम यरूशलेम जा रहली हे, आउर आदमी के बेटा महायाजक आउर शास्त्रियन के हाथे पकड़वावल जईतन, आउर ओखनी उनका मौत के सजा देतन,19आउर उनका अन्यजातियन के हाथ में सौंप देतन, कि ओखनी उनका ठट्ठा उड़ईतन आउर कोड़ा मारतन आउर क्रूस पर चढ़ा देतन। बाकि ऊ तिसरका दिन जी उठतन।”20तब जब्दी के बेटवन के माय अपन दूनो बेटवन याकूब आउर यूहन्ना के साथ लेके यीशु के दण्डवत करलन, आउर उनका से कुछ माँगे लगलन।21बाकि यीशु ओकरा से पूछलन, “तूँ का चाहऽ हऽ?” ऊ यीशु से कहलन, “ई कहऽ दऽ कि तोहर राज में, हमर ई दूनो बेटा एगो अपन दहिना तरफ आउर एगो अपन बामा तरफ बईठतन।”22बाकि जबाब दे के यीशु उनका से कहलन, “तूँ नऽ जानऽ हऽ कि तूँ का माँग रहलऽ हे। जौन कटोरा हम पिये वाला ही, का तूँ ओकरा पी सकलऽ हे?” याकूब आउर यूहन्ना उनका जबाब देलन, “हाँ, हम पी सकली हे।”23तब यीशु उनका से कहलन, “हमर कटोरा तूँ पी लेवऽ। बाकि हमर दहिना हाथ बामा हाथ बईठावे ला हमर काम नऽ, बाकि उनका, जिनका लागी हमर पिता के तरफ से तईयार करल गेल हे।”24आउर ई सुन के, दोसर दसो चेलवन ओखनी दूनो भईवन याकूब आउर यूहन्ना पर गोस्सा गेलन।25बाकि यीशु, ओखनी के अपना भीर बोला के कहलन, “तूँ जानऽ हऽ कि अन्यजातियन के अधिकारी उनका पर शासन करऽ हे, आउर जे बड़ा हे, ऊ ओखनी पर अधिकार जतावऽ हे।26तोहनी में अईसन नऽ हे। एकर बदले, जे कोई तोहनी में बड़ा होवे ला चाहऽ, ऊ तोहनी के सेवक बनतन,27आउर जे कोई तोहनी में जे प्रधान होवे ला चाहऽ हे, ऊ तोहनी के सेवक बनतन,28जबकि आदमी के बेटा सेवा करवावे नऽ, बाकि सभे के सेवा करे आउर बड़ी लोग के छुड़ौती लागी अपन प्राण देवे अईलन हे।”29आउर जखनी ऊ यरीहो से निकल रहलन हल, तऽ एगो बड़का भीड़ उनका पीछे हो गेल।30आउर देखऽ, सड़क के किनारे दूगो आंधर बईठल हल। ओखनी ई सुन के कि यीशु जा रहलन हे, ओखनी चिल्ला-चिल्ला के कहे लगलन, “हे प्रभु, राजा दाऊद के संतान! हमरा पर दया करऽ।”31आउर भीड़ ओकरा डाँटलक, ताकि ओखनी चुप हो जाय, बाकि ऊ अंधार आदमी आउर भी जोर से चिल्लाय लगलन, आउर कहे लगलन, “हे प्रभु, दाऊद के संतान, हमरा पर दया करऽ।”32आउर रुक के, यीशु ओखनी के बोलईलन आउर कहलन, “तूँ का चाहऽ हऽ कि हम तोरा लागी करूँ?”33ओखनी उनका से कहलन, “हे प्रभु, येही कि हमनी के आँख खुल जाय।”34अखनी तरस खा के, यीशु ओखनी के आँख के छूलन। आउर तुरन्त ओखनी देखे लगलन, आउर यीशु के पीछे हो लेलक।
Bridge Connectivity Solutions Pvt. Ltd.