Matthew18
1ओही घड़ी चेलवन यीशु भीर आके कहलन, “स्वर्ग के राज में बड़का कौन हे?”2यीशु एगो छोटा लईका बोला के, आउर ऊ लईका के ओखनी के बीच में खड़ा कर देलन,3आउर कहलन, “हम तोरा से सच कहऽ ही, जब ला तूँ मुड़ के छोटकन लईकन के जईसन नऽ बनवऽ, तऽ तूँ स्वर्ग के राज में प्रवेश नऽ कर पईवऽ।4येहिगुने, जौन कोई अपने आप के ई लईकवन के जईसन नम्र बनईतन, ऊ स्वर्ग के राज में बड़का हे।5आउर जे कोई हमर नाम से अईसन लईकन के अपनावऽ हे, ऊ हमरा अपनावऽ हे।6बाकि जे कोई ई छोटकन में से कोई एगो के जे हमरा पर विश्वास करऽ हे, ठोकर खिलावे, ओकरा ला बढ़ियाँ होत कि गदही के चक्की के पाट ओकर गला में लटका देवल जाय आउर ओकरा गहरा समुद्र में डूबा देवल जाय।7ई ठोकर के वजह से संसार पर हाय! काहेकि ई तऽ जरुर हे कि ठोकर तऽ लगत, बाकि हाय ऊ आदमी पर जेकर द्वारा ठोकर लगऽ हे।8अखनी जदि तोर हाथ चाहे तोर गोड़ तोरा ठोकर खिलावे तऽ ओकरा काट के अपना से दूर फेंक दऽ! तोरा लागी लूल्ह चाहे लाँगड़ होके जिनगी में प्रवेश करे ला एकरा से बढ़ियाँ हे, कि तूँ दूनो हाथ आउर दूनो गोड़ के रहते भर में अनन्त आग में डालल जईवऽ।9आउर तोर आँख तोरा ठोकर खिलावे, तऽ ओकरा निकास के अपना से दूर फेंक दऽ। तोरा ला एगो आँख रहते भर में जिनगी में प्रवेश करिहऽ, एकरा से बढ़ियाँ हे कि दूनो आँख रहते भर में नरक में डालल जाय।10देखऽ कि ई छोटकन में से कोई के नीचा नऽ समझिहऽ। काहेकि हम तोरा से कहऽ ही कि स्वर्ग में उनकर स्वर्गदूत अपन पिता के मुँह हमेशा देखऽ हे।11काहेकि आदमी के बेटा ओकरे बचावे ला अईलन हे, जे भूला गेलन हे।12तूँ का समझ हऽ? कोई आदमी भीर जदि एक सौ भेड़वन हे, आउर ओकरा में से एगो भटक जाय, तऽ का ऊ निन्यानवे भेड़वन के पहाड़ पर छोड़ के आउर जा के, ऊ आदमी ऊ भटकल के नऽ खोजतन?13आउर अईसन होवे कि जदि ऊ ओकरा मिल जाय, तऽ हम तोरा से सच कहऽ ही, कि तूँ खूब खुश हो जईवऽ। तोरा ई बात से खुशी होत कि ऊ निन्यानवे भेड़वन के तुलना में जे भटकल नऽ हल, ई भेड़ ला जादे खुशी मनईतन।14येही रीति से, तोर पिता के जे स्वर्ग में हथन, ई इच्छा नऽ हे कि ई छोटकन में से एगो भी नाश होवे।15बाकि जदि तोर भाई तोर खिलाफ पाप करऽ हे, तऽ जा, अकेले में बातचीत कर के उनका समझावऽ। जदि ऊ तोर बात सुनऽ हथन, तऽ तूँ अपन भाई के पा लेलऽ। 16बाकि जदि ऊ नऽ सुनऽ हे, तऽ एक चाहे दूगो साथी विश्वासियन के लेके जा, ताकि दू चाहे तीन गो गवाह के मुँह से सभे बात के साबित करल जाय। 17बाकि जदि ऊ ओखनी के भी सुने से इंकार कर देवे, तऽ कलीसिया से बात करऽ। आउर जदि कलीसिया के भी सुने से इंकार कर देवे, तऽ तोरा लागी ऊ अन्यजाति आउर भ्रष्ट चुंगी लेवे वाला के जईसन हो गेल हे।18हम तोरा से सच कह ही कि जे कुछ तूँ धरती पर बाँधवऽ ऊ स्वर्ग में बंधायेत; आउर जे कुछ तूँ धरती पर खोलवऽ ऊ स्वर्ग में खुलत।19हम तोरा से सच सच कहऽ ही कि तोहनी में से कोई दू लोग धरती पर कोई मुद्दा पर एक बात पर सहमत हऽ, जेकरा ओखनी माँग हे, तऽ ऊ स्वर्ग में हमर पिता के द्वारा ओकरा लागी पूरा कर देवल जायेत।20काहेकि जहाँ दू चाहे तीन जन हमर नाम से एक साथ जमा होवऽ हथन, ऊहाँ हम उनकर बीच में मौजूद रहऽ ही।”21तऽ पास में आके, पतरस यीशु से कहलन, “हे प्रभु, केतना बार हमर भाई हमर खिलाफ पाप करतन, तऽ हम ओकरा मांफ करम? का सात बार तक?”22यीशु उनका से कहलन, “हम तोरा से ई नऽ कहऽ ही, कि सात बार तक, बलुक सात के सत्तर गुणा तक।23येही वजह से स्वर्ग के राज के बराबरी ऊ आदमी से करल गेल हे, जे एगो राजा हे, आउर जे अपन दास से लेखा-जोखा लेवे ला चाहलन।24अखनी जब ऊ लेखा-जोखा लेवे लगलन, तऽ दस हजार तोड़ा के एगो कर्जदार ओकरा भीर लावल गेल।25बाकि, ऊ कर्जदार कर्जा चुकावे के काबिल नऽ रहल, तऽ मालिक आज्ञा देलन कि ओकर मेहरारू आउर बाल बच्चा, आउर सभे कुछ, जेतना उनकर पास हल, ओकर समेत ओकरा बेच देवल जाय आउर कर्जा चुका देवल जाय।26येहिगुने, ओकर दास उनकर आगे गिर के उनका से दण्डवत कर के कहलन, ‘हे मालिक, हमरा ला दम धरऽ, हम तोरा सभे कुछ चुका देम।’27अखनी तरस खा के, ऊ दास के मालिक ओकरा छोड़ देलन आउर ओकर कर्जा मांफ कर देलन।28बाकि बाहर जा के, ऊ दास के एगो अपन साथी दास मिलल, जे ओकर सौ दीनार के कर्जदार हल, ऊ ओकरा पकड़ के, गला दबाके कहलक, ‘जे कुछ तोरा पर कर्जा हे ओकरा चुका दऽ।’ 29तऽ गिड़गिड़ा के, उनकर साथी दास ओकरा से विनती कर के कहे लगल, ‘हमरा ला थोड़ा सा धीरज धरऽ, आउर हम तोर कर्जा चुका देम।’30बाकि ऊ नऽ मानलक। एकर बदले, ऊ जा के ओकरा ऊ समय तक ला जेल में डाल देलक, जब तक कि ऊ ओकर कर्जा चुका नऽ देवे।31येहिगुने, उनकर साथी दास, जे घटना होल हल, ओकरा देख के, बड़ी उदास होल। आउर आके ऊ अपन मालिक के सभे हाल बता देलन जे घटित होल हल।32तब ओकरा बोल के, ओकर मालिक ओकरा से कहलन, ‘हे दुष्ट दास, हम तऽ तोर ऊ पूरा कर्जा मांफ कर देलन, काहेकि तूँ हमरा से विनती करल हल।33तऽ जईसे हम तोरा पर दया करली, ओईसहीं का तोरा भी अपन साथी दास पर दया नऽ करे ला चाहऽ हल?’34आउर गोस्सा में आके, उनकर मालिक ऊ समय तक ला ओकरा दण्ड देवे वालन के हाथ में सौंप देलन कि जब तक ऊ पूरा कर्जा नऽ चुका देतन।35ओईसहीं कर के जदि तोहनी में से सभे जन अपन भाई के हृदय से मांफ नऽ करतन, तऽ हमर स्वर्गीय पिता जे स्वर्ग में हथन, तोरा साथे ओईसहीं वर्ताव करतन।”
Bridge Connectivity Solutions Pvt. Ltd.