ອ່ານ Koreeg nà moog‑e 18

Koreeg nà moog‑e18

¹É gara tel bəgsǐ əndəg‑i Məi Tel e ŋol iiŋ Ibrəimən é guldug é Mamara nà maŋg‑e, e an kumur muu dë maade.²É gara Ibrəim əwrsǐ wag‑e e tur jaga ozo e tall teerma. E mərí dumuun diiŋg. É gara ləzzǐ kumur‑iilg dë maad‑e, e gurum tad dë kusumiig alda‑ool.³E bee: “Seen, a gəmsî cuwəd gar uun‑i, ar u kuyjí dhəm uun tuu wa.⁴Bii ẽ wardán ũgun fega biig faraj ug cəgdú ü luugu tu, fundú é yaag guldu‑bəl.⁵Bu'aan ã warân ũgun jeem ũ nəəmdə ẽ bagda ö bonaaga taw, gar ũ bəgdə teed uyun. U lizzú teyag maa dhəm uyu.” Eg pəd kor: “Weedan, jisə ar ná u kursiní‑i.”

⁶Enna Ibrəim mərsǐ é raw anaa dum kumur‑iilg é Sara iiŋ‑i. E bee: “É raw war gaalg nà wiəg bar biig bay‑eelga ozo. Û kumsu iiŋgə û kuŷniigə.”⁷Ibrəim e gal é raw anaa dum é moragg é tog iiŋg e ceraga mooz ná boy, e gəfi dhəmən ẽ liwdi.⁸Aneenda een e wərə̌nĩgən iig nà bəəg èg nà ciig è oɲ é ton ná liwsə́ní e təlĩgən dë muug. É gara àda nəəmíigǐ‑i e rag guldu‑bəl e kəəmĩgən, ega e naam.⁹Eg tisiníigi: “Od uun Saran da?” E pəd ĩgən kor: “Een kumur‑iilg.”¹⁰Man taman e bee: “Â mərə̂n ũnu og ane é duud ná leeŋ‑e. Sara od uunu ẽ belda jaa.” Sara fiŋənə̌n kor, e tall é kumur é muun ná əɲəg‑i.¹¹Ibrəim èg Sarane yoossé əndəg, Sara duug inəgi é kongo koyjé.¹²Saran e gaɲ ë ŋalga e bee: “A yoossé ä jidə məissǐn‑i, Tel ê cundu ä bon taan a?”¹³Aneenda Məi Tel e bee Ibrəimən: “Ɲii Sara gaɲsé, e bee: ‘Â bel jaa é see a, bare a yoossa?’¹⁴Jeem man tu ná raa é Məi Tel muu‑in a? Â mərə̂n og ane jo é duud ná leeŋ‑e Saran ẽ belda jaa ná fuui.”¹⁵Sara namǎnê kojone, enna jissí pirəns‑i e bee: “A gaɲsa wa.” Gəl een e bii'ĩnə: “Wa, de u gəɲsə.”

¹⁶É gara jag fuuigə duussǐigə taw ẽ wayd‑e, eg wii wag dumuun tad é Sədum, Ibrəim e wəjjǐ èg dege ẽ dhəwiigə.¹⁷Aneenda Məi Tel e kor deelg e bee: “Bəl ã dərdə Ibrəimən jin ná a bee â jisə̂n a?¹⁸É see Ibrəim ê bel kaŋ ná mada segar əndəg, kaŋeega kay nà addeeg‑ool‑e iiŋgə ê əil diiŋ.¹⁹Aan a talden, anaanda gar een ẽ kurdu jaalgeen inəgin èg nà teyag dë maade een ê koyjé ã bagda teed é Məi Tel ẽ jiddə jin ná taa jerad‑e èg ná taa tetees‑e, anaanda gar Məi Tel ẽ cində meed ná tiwsǐ èg Ibrəim‑i.”

²⁰Məi Tel e bee Ibrəimən: “A fiŋəssə jisig nà əng é Sədum èg Əmuuri é əniid iyənin koyjo tuu.²¹Anaanda â pall tad â tur jisig iyəgin nà jissíigǐ‑i e tàa ar ná ung iyəgin bəzzíigǐ dəəŋii‑ni. Â tur e taa é see. E taa é see wa‑e â tur.”

²²Jag fuuigə e wàj dumuun é Sədum, gəl Ibrəim e far e tall é Məi Tel muu.²³Aneenda Ibrəim e jur dumuun é Məi Tel iiŋ e bee: “Û cində jag nà tall jerad‑e èg nà jisə əniidii‑ni a?²⁴U gəmsî jag biig nà tall jerad‑e é gaam naadinə 50, û cind a? War û bii é kor é jag nà tall jerad taa 50 deelg ta‑e?²⁵Ar u jisí kora wa joo. Û cində jag nà tall jerad‑e èg nà əngii‑ni wa, jag nà tall jerad‑e ê àa ar jag nà əng‑i. U jisə jis na wa! Jen ná limə koreega addeeg‑ool‑e limə'í tetees wa wa?”

²⁶Məi Tel e bee: “A gəmsî jag nà tall jerad‑e 50 é gaam Sədum‑i, â bii wag kay é kor iyəni.”

²⁷Ibrəim e pəd kor e bee: “Ma a tawson é kor‑e ũnu, Məi Tel, aan jeeman wa a taa ar dufurd ar dugu biig‑i.²⁸Taa isi u gəmsî jag nà tall jerad‑e e taa 45? Û cində gaam é kor é jaga nà ceeg asaman‑e a?”
E bee: “A gəmsî 45 é garadi‑ni, â cində wa.”

²⁹Taan Ibrəim e bee: “U gəmsî jaga 40 jo‑e?”
E bee: “Â cində wa é kor é jaga nà taa 40.”

³⁰Aneenda Ibrəim e bee: “Məi Tel ar ö bon e əní wa. Bii aan ã korasa. Taa isi u gəmsî jag nà tall jerad‑e e taa 30?”
Məi Tel e pəd kor: “Â cində wa a gəmsî nà taa 30.”

³¹Ibrəim e bee: “Gəl korso é kaadele Məi Tel. Taa isi u gəmsî jag nà tall jerad‑e e taa jaa dui əəŋ jo‑e?”
E bee: “Â cində wa é kor é jaga nà tall jerad taa jaa dui əəŋ‑i.”

³²Aneenda Ibrəim e bee: “Məi Tel ar ö bon e əní dumuun dəəŋə wa, bii aan ã korso kora əɲəg nii jo. U gəmsî jaga əsəgdi jo‑e?”
E pəd kor: “Â cində wa é kor é jaga nà taa əsəgdi‑i.”³³É gara Məi Tel cinsǐ kor èg Ibrəim‑i, e waj. Ibrəim e mər teyag.

Pioneer Bible Translators

https://app.library.bible/content/a230cccfbf4362be