Read Koreeg nà moog‑e 17

Koreeg nà moog‑e17

¹É gara Abram cəggsǐ duug 99, Məi Tel e 'turd iiŋə Abraman e bee: “Aana Tel ná Segar‑e. Fiŋənə kor əənə, aa jaa ber‑e.²Â tur meed əənə ná a tiwsǐ èg doone, â ədə ü məyədə eg talg əndəg.”

³Abram e doos e gurum tad. Tel e bii'ĩnə,⁴“Meed əənə niin èg doone, û əə baaw é kaŋeeg‑e eg talg.⁵Ö saaga â bel Abram wa, â mər Ibrəim é kora â jisǐ oon baaw é kaŋeeg eg talg‑e.⁶Â bii'uun ũ bil məyəd eg talg, û bil kaŋeeg eg talg, məliig é jaga ê làdân duuŋ ta.⁷Â tur meed əənə ná a tiwsǐ èg doone ləŋ pad èg məyəd unugi nà â làdaga dö aaɲj‑e, â aa Tel uun è jaalge nà ê ada dö aaɲj‑e.⁸Â gəfũn alda é Kanaan ná u ənǐ wəndi‑i kay, ũnu èg dö məyədə nà leeŋ dö aaɲjee‑ne. Â gəfũguni ã adda uyui ləŋ pad, â aa ĩgən Tele.”

⁹Aneenda Tel e bee Ibrəimən: “Oon, baa meed nii a tiwsə èg doone ciləŋ, oon èg məyəd unug nà ê àdage‑ne.¹⁰Meed ná a tiwsə èg doone nii oon èg dö məyəd nà ê àdaga‑e, meed ná u bəgǐ: Jag fuuigə kay duŋgə ê wirə́níigə.¹¹Ê wirə̂nə́ purfən, de jin niin ê aa parad ná a tiwsí meed èg doge.¹²Jaalgeen nà e adag‑e nà fuuig‑in kay ná caggsa naag idig ozo‑e ê wirə́níigə, èg nà kossón teyag dö maad‑e èg ná u məərí é jirsəg gar é wəng‑i nà lee é jaalgeeg unug iiŋg wa‑e.¹³Ma e been nà kossón teyag dö maad‑e èg nà u məərsə é jirsəg unug‑i, ê wirə́níigə. Aneenda ɲee é meed é wirəngə əən niin ê ada duuŋg ləŋ pad.¹⁴Jen fuui man ná wirsə́nə wa‑e, ê gonó tui é jag inəgin. Een ragsa é meed əən ná a tiwsǐ‑i wa.”¹⁵Tel e bee Ibrəimən: “O od uun Sara'en, ar u tərbin Sara'e taan wa, ë saaga e bel Sara.¹⁶Â əild iiŋ ẽ kuddũn jaa ná fuui jo di. Â əild iiŋ ê aa yaaz é kaŋeeg‑e. Məliig é jaga ê làdân diiŋ.”¹⁷Ibrəim e tal ë muun tad. E gaɲ e kor deelg: “Jaan ê koônó jen e bel duugu 100 a? Saran ê koôn jaa e bel duugu 90 a?”¹⁸Ibrəim e bee Telan: “Ä bon ê cuun ũ əildə Isməil jaa əən iiŋ‑i!”¹⁹Gəl Tel e bee: “Aw, gəl od uun Saran e bilũn jaa ná fuui, û nəgi Esaag. Â jisə meed əən ná a tiwsǐ‑i èg deene. Meed ná a tiwsə nii ê aa ləŋ pad ləŋ è məyəd nà e adaga dë aaɲjee‑ne.²⁰É kor é Isməilə, a fiŋəssu. Â əild iiŋ é see. Â bii'in ẽ koddo jaalgeen e talg, â ədə jaalgeen inəgin e talg əndəg. Ê aa baaw é seenaag nà əsəgdi èg nà dhaag‑e, kaŋ iinin ê aa é mada.²¹Gəl meed əən ná a tiwsí‑i â jisə èg Esaag, ná Sara ê kuuǐ ũnu bare é duud ná leeŋ‑e.”²²É gara Tel cinsǐ kor inin è Ibrəim‑i, e wəjjǐ tui dë muu.

²³É naanda na jo Ibrəim e war jaa iini Isməilə è jaalge nà kossóno teyag dë maad‑e èg nà məərsǐ é jirsəg inəgi, jag fuuigə kay‑e nà teyag dë maad‑e e wiriigə, ar ná Tel kursĩniní‑i.²⁴Ibrəim duug inəgin taǎn 99 é gara wirsə́nə een‑e,²⁵Isməil jaa iinin duug inəgi taǎn əsəgdi èg nà ozo.²⁶Ibrəim è jaa iinin Isməili wirsə́níigə é naand taman.²⁷Jag fuuigə kay nà teyag maa Ibrəim‑i, èg nà kossána teyag dë maad‑e èg nà marsána gar é wəng‑i, wirsə́níigə èg deen‑e.

Pioneer Bible Translators

https://app.library.bible/content/a230cccfbf4362be