ອ່ານ EXODO 1

EXODO1

¹Re' taqe rak'uun xiooj chi riij i Jacob pan tinamit Egipto, chi kiju'junaal xkik'am reje chikiij i kehk'een kak'uun kixq'uun. Re' taqe re' rak'uun wo' taqe i Jacob je' wili kib'ihnaal:²Rubén, Simeón, Leví, Judá,³Isacar, Zabulón, Benjamín.⁴Dan, Neftalí, Gad, Aser.⁵Eh chu'nchel i awach reh i Jacob xiooj chi riij lajeeb' ru kajwinaq chi kiib'. Re' José reh chupaam taqe i q'iij re' re', ar chik wilik ponoq Egipto.

⁶Eh koq'uun chik re' José je' wo' chu'nchel i ras je' wo' chu'nchel i kiristianu' re' re', xkuxik kikimiik.⁷Ruum chi re' taqe i aj Israel yohb'aal wach xik'ihaaxb'ik i kak'uun kixq'uun xi ponik xiik' naah kik'ihaal eh q'e' chik wilik rukowiil kik'ux korehtaal xkinujisaj paam i tinamit Egipto.

⁸Eh koq'uun chik tokoom chik i reey xokik chinaah i tinamit Egipto ma' xunab'eej ta wach i José, je' wili i xuq'or keh i rutinamiit:⁹Chakoj taq rehtaal, re' taqe i aj Israel wilkeeb' ayu' panqatinamiit, ma' k'isiin chik kik'ihaal q'e' chikxiik'naah kikowiil chi qawach i hoj.¹⁰Ruum aj re' inchol qasik'im qana'ojb'al reh chi ma' nee ta chik kik'ihaaxb'iik, ruum nee oq inchalik i q'aq'inik chinaah i qatinamiit. Eh mankikoj inche kiib' chi kixilak i aj ixowaal, eh mo'-oq chik neenqakuy pan kiq'ab', ma'kielik inche reje panqatinamiit, inki.

¹¹Je' re' noq re' taqe i aj Egipto xkimin pankowlaj kamanik taqe i aj Israel. Eh kikoj cha'jen keh re' ruuk' taqe i kow kitaaq'anik. Eh xkikoj taqe chi ruyejeb'jiik i kiib' chi tinamit, Pitón, eh Ramasés, re' i rumol wii' taqe i chib'ih reh i kireey.¹²Noq k'ahchi' kik'sam chi ti' k'axik taqe i aj Israel, ma' k'isiin chik i k'ihaaxb'ik inki a'n Eh noq xkilow chi je' re' taqe i aj Egipto ma' k'isiin ta chalik kiyo'jiik kuum.

¹³Re' taqe i aj Egipto ma' k'isiin ta ti'kiil i kamanik xkiyeew wii' taqe i aj Israel.¹⁴Eh xkiyeew ruti'kiil kik'ux xkimin taqe pankowlaj kamanik, xkikoj taqe chi ye'q'ej paam ch'uwa' yejemb'al i xaan. Xikojarik wo' pankowlaj kamanik pantaq ab'iix, ma' k'isiin ti'kiil xiye'arik wii' taqe i aj Israel.¹⁵Eh re' i reey ar Egipto xutaq'aaj kik'amariik taqe i ki'ib' chi ixoq re' Sifra, re' i Fúa, re' taqe inilwik keh ixoq aj hebreo noq ink'ulik kik'ux je' wili i xuq'or keh:

¹⁶Noq naa taq awilom taqe ixoq aj hebreo noq naa rasjiik kiha'lak'uun naa taq awilom chib'ih kianam, wila' k'isa k'un, noq taq cha kansaj, eh wila' k'isa xq'un chak'achaa' taq, inki.

¹⁷Re' taqe i ki'ib' chi ixoq aj ilool xkiyohleej wach i Dios, ma' xkian taj i xq'orarik keh ruum i kireey i aj Egipto. Xkik'achaa' la' wo' taqe i kok' ak'un xi-aasjik.¹⁸Eh noq xrib'iraj chi je' re' i reey xutaq'aaj kik'amariik taqe i ki'ib' chi ixoq re' re' je' wili i xuq'or keh:
¿Chib'ih reet noq ma' k'ahchi' ta taq akansam taqe i kok' ak'un aj Israel k'ahchi' kaasjiik? inki keh.

¹⁹Re' keh je' wili i xkiq'or:
Re' hoj ma' inqakansaj ta taqe ruum re' taqe ixoq aj hebreo kow taqe ma' je' ta kikab' ixoq ayu' Egipto. Re' keh k'ulinaq chik kik'ux chi kutkeel noq qoh ponik i hoj, inki taqe.

²⁰Re' QaJaaw Dios xutoob'eej taqe ixoq aj ilool chi ma' xkikansaj ta taqe i kok' ak'un. Eh xi k'ihaaxb'ik i aj Israel, eh xkowjik kik'ux.²¹Eh ruum chi xkiyohleej wach i Dios taqe i ki'ib' chi ixoq aj ilool k'ih wo' hoq i kak'uun kixq'uun xwihik i keh.

²²Xrilow i reey chi je' re', je' wili i xuq'or keh chu'nchel i rutinamiit: Re' taqe i kok' ak'un kore' naa kaasjiik chakut taq chi nim ha' reh chi nee kikimiik, eh re' taqe kok' xq'un chak'achaa' taq, inki. Re' noq x-aasjik i Moisés

¹Jinaj i winaq re' ruuk' i aj Levíta, eh xub'an kaxáro ruuk' i jinaj ixoq re' wo' ruuk' i aj Levíta.²Re' rehk'een xponik i q'iij noq xkahnik wach k'acharik, eh x-aasjik jinaj k'isa rak'uun. Xrilow chi q'e' holohik ixib' poh xukeb'aa'.³Eh xrilow chi ma' xuyeew ta chik riib' chi xukeb'aa', xuk'am chaloq jinaj i k'isa kalaab' chakach, xuyulej i q'ool chi riij inkan panak'al, eh xuyok'aa' i k'isa rak'uun chupaam. Eh xponik ruyeew chupaam taqe i kaxlan aaj wilkeeb' chi chii' i nim ha' Nilo.⁴Eh re' ranaab' i k'isa k'un najt xupab'aa' reje riib' ruuk' reh chi naa rilom chib'ih i naa ruk'ulum i k'isa k'un koq'uun.

⁵Re' rixq'uun i kireey i aj Egipto xooj chi itinik chi chii' i nim ha' re' re', ruch'ihil taqe i raj pooh, noq b'ehik inki a'n chi chii' i ha'. Re' rixq'uun i reey xrilow reje wach i k'isa chakach wilik xilak taq kaxlan aaj, eh xutaq'aaj reje i jinaj keh i raj pooh chuk'amariik i chakach.⁶Eh noq xuteh naah i chakach i rixq'uun i reey i rilow jinaj i k'isa k'un oq'ik i rub'an chupaam. Eh xuketelaaj wach, je' wili i xuq'or:
Re' k'isa k'un wili re' ruuk' taqe i aj hebreo, inki.

⁷Chalik i ranaab' i k'isa k'un je' wili i xuq'or reh i rixq'uun i reey:
¿Inawaaj oon chi neenooj nuyuq'eej jino'q aweh ixoq re' ruuk' taqe i aj hebreo reh chi nee ruyeew ruch'uuch' i k'isa k'un re' re'? inki.

⁸Neerub'an chi neenayuq'eej cho weh, inki noq chaq'wik i rixq'uun i reey, re' ranaab' i k'isa k'un xooj wo' ruyuq'eej ixoq, eh re' wo' hoq i kituut xponik ruyuq'eej.⁹Re' rixq'uun i reey je' wili xuq'or reh ixoq re' re': Chak'am reje i k'isa k'un wili chach'uch'isaj weh, re' hin neetinutoj, inki.
Eh re' i rutuut i k'isa k'un xuk'am wo' reje, eh xuch'uch'isaj wo' hoq.¹⁰Noq rukanaam chik i ch'uuch' i k'isa k'un xuk'am wo' chik reje reh i rixq'uun i reey, re' reh xukoj chi manlik rak'uun i k'isa k'un re' re'. Moisés i rub'ihnaal xukoj. Je' re' i rub'ihnaal xnukoj, ruum panha' xwesaj chaloq, inki. Re' i Moisés xelik cho Egipto ruum ruyo'jiik

¹¹Eh noq winaq chik i Moisés, pan jinaj q'iij xooj taqe chi kilariik i aj hebreo re' taqe i rutinamiit xrilow chi q'e' kow i kamanik k'ahchi' keeb'. Eh tz'eht xub'an reh chi jinaj i aj Egipto k'ahchi' ruq'ojwiik reh i rutinamiit i aj hebreo.¹²Re' i Moisés k'ul xrilow mi ma' awach k'ahchi' rilwiik reh, noq xrilow chi ma' awach ta k'ahchi' rilwiik reh xukansaj i aj Egipto. Eh xumuq'aa' pan saniib'.¹³Chi junwaar xelik wo' chik reje Moisés chi kilariik i aj hebreo, eh tz'eht xub'an reh chi ki'ib' i k'ahchi' kiq'ojom kiib' pankamanik. Eh wili i xuq'or reh:
¿Chib'ih reet noq i naq'oj i re' ruuk' aatinamiit? inki.

¹⁴Re' i aj hebreo je' wili xuq'or reh i Moisés:
¿Awach xpaab'anik aweh chi hat k'amal b'eeh, chi hat q'atal q'orik chi qanaah?
¿Mi kinawaaj wo' kiin akansam re' hin je' rukab' noq xakansaj i aj Egipto eew? inki. Eh re' i Moisés je' wili xuq'or paruk'ux:
Xti korik wo' hoq chi re' xnub'an re' re' xkireq chik chi riij, inki.

¹⁵Noq xrib'iraj i reey chi re' i Moisés xukansaj jinaj i aj Egipto xraaj naq rukansam. Eh re' reh xumol chi elik chuwach i reey ar chik xooj chi patinik chupaam i ruyuq'ul i Madián.

¹⁶Eh re' i Jetro Reuel i rukab' b'ih k'amal b'eeh aj tiij ar i Madián. Wuquub' i rixq'uun wilik xiooj k'oloq chi k'amaj ha' reh chi naa kinujisam i molb'al ha' inki a'n wii' kihaa' taqe i rutentzuun i kajaaw.¹⁷Eh wilik taqe i cha'jen tokoom tentzun xiooj k'oloq ar, xkesaj cho chii' jul ha' taqe i rixq'uun i k'amal b'eeh aj tiij. Re' i Moisés xuko'leej taqe i xq'un, re' chik i reh xye' wik kihaa' taqe i rutentzuun i kajaaw i xq'un re' re'.¹⁸Noq xi ponik taqe i xq'un i wilik wii' i kajaaw, xpahqaljik keh ruum i kajaaw chi je' wili:
¿Chib'ih reet noq ma' najt ta xponik taq a'an yu'naak? ki uchjik.

¹⁹Re' keh je' wili i xkiq'or: Jinaj i winaq aj Egipto xko'linik qeh pan kiq'ab' i cha'jen tokoom tentzun wilkeeb' ar. Eh re' chik reh esanik i ha' eh xuyeew kihaa' taqe i qatentzuun, inki taqe.

²⁰Re' Jetro i k'amal b'eeh aj tiij je' wili i xuq'or keh i rixq'uun:
¿Aha' wilik chib'ih reet noq xakanaa' taq chaloq chi rutkeel i winaq re' re'? Hiy taq chayuq'eej reh chi neen k'ulik rub'aan ruwa', inki.

²¹Eh re' i Moisés xuk'ulaa' chi xkahnik parupaat i Jetro. Chi riij i re', re' i Jetro xuyeew chi rehk'een i Moisés jinaj keh i rixq'uun Séfora rub'ihnaal.

²²Re' i xq'un x-aasjik jinaj i rak'uun i Moisés ruuk', eh Gersón i rub'ihnaal xukoj ruum je' wili xuq'or paruk'ux: Re' hin je' re' i b'ih xnukoj ruum xa hin ik'al b'eeh pan tokoom tinamit, inki.

²³Noq xooj kuxoq xkimik reje i kireey aj Egipto. Eh re' taqe i aj Israel xa xi kahnik wo' chi ti' kik'ux oq'ik inki a'n ruum minooj taqe pankowlaj kamanik, re' Dios rib'iraj chaloq oq'ik inki a'n²⁴Re' QaJaaw Dios xrilow chaloq chi ti' kik'ux, eh xk'ulik cho paruk'ux aha' wilik i xuyejaa' cho wach ruuk' i Abraham, ruuk' i Isaac, eh ruuk' i Jacob.²⁵Re' Dios xrilow xukoj rehtaal chi ma' k'isiin ti'kiil wilkeeb' taqe i aj Israel ar Egipto. Re' i Moisés xsik'arik wach ruum i Dios

¹Re' i Moisés cha'jinik rutentzuun i Jetro i rub'an, re' i rajaaw i rehk'een, re' i k'amal b'eeh i aj tiij ar Madián. Eh xuk'am taqe reje i tentzun chupaam i ye'aab' chiq yuuq' xponik taqe ruum waraa' i yuuq' Horeb ruye'aab' i Dios.²Eh ar xuk'uhtaaj riib' reh i Moisés jinaj i ruánjel i QaJaaw Dios pan q'aaq' chupaam i juniwal chi k'iix. Eh noq tz'ehtanik reje i Moisés i rilow chi xanchaqchotik chik ruq'aq'al i k'iix xa re' la' xama' k'achlik ta wo' hoq.³Xrilow chi je' re' i Moisés je' wili i xukapaaj: Re' hin narojiik wilom ma' najta ruuk' i ma' ilooj taj k'ahchi' wilom. Chib'ih reet noq ma' ink'ahtik taj i k'iix ruum i xaq q'aaq', inki.

⁴Eh rilow i QaJaaw Dios chi xooj i Moisés chi rilariik i xaq q'aaq', xuq'oreej chaloq yejal k'iix qoplik ruq'aq'al je' wili i xuq'or reh:
Moisés, Moisés, inki reh.
Jaaw ayu' wilkiin inki noq chaq'wik i Moisés.

⁵Eh je' wili i xuq'or cho reh ruum i QaJaaw Dios:
Maajil chawiib' ayu', chawisaj peet axijab' cha wooq ruum re' i ye'aab' pa'alkaat wii' santo laj ye'aab'.

⁶Re' hat inchol anab'eem chi re' hin, i ki Dios chaloq aamaam awati't, hin ruDios Abraham, i Isaac, i Jacob, inki.
Noq xrib'iraj i Moisés chi je' re' xyo'jik xub'ur i wach reh chi ma' xutz'ehtaaj taj i Dios.

⁷Re' i QaJaaw Dios je' wili i xuq'or:
Re' hin weht'al chi re' i nutinamiit wilkeeb' ponoq ar Egipto panti' k'axik wilkeeb', k'ahchi' kik'oqiniik pan kiq'ab' i josq'laj winaq intaaq'anik keh pankowlaj kamanik q'e' ti' kik'ux.⁸Ruum aj re', re' hin xin chalik chi kiko'ljiik i nutinamiit pan kiq'ab' i aj Egipto, eh naa taqe wesam cho ar. Eh naa taqe nuk'amam reje chupaam i runimaal ye'aab' xiik' naah chihojal, re' kielik wii' i suq atoob'. Ar taqe naa nuk'amam reje chupaam i kiye'aab' i aj cananeo, aj heteo, aj amorreo, aj ferezeo, i aj heveo, i aj jebuseo.⁹Re' kik'ooq i nutinamiit aj Israel xb'iraj chik, re' ti' k'axik imb'aan keh kuum i aj Egipto k'ahchi' wo' wilom.¹⁰Je' re' noq re' hat cha yejaa' awiib' ruum re' hat naa kaat nutaq'aam reje ruuk' i kireey i aj Egipto reh chi naawisam taqe chaloq i nutinamiit aj Israel ar Egipto, inki Dios.

¹¹Re' i Moisés je' wili i ruchaq'weesjiik i Dios xub'an:
Re' hin ma' xta k'isinoq wajaawriik chi nee kinooj ruuk' i kireey i aj Egipto, eh chi neenwesaj taqe chaloq aatinamiit ar, inki.

¹²Re' Dios je' wili i ruchaq'weesjiik i xub'an:
Hiy la' ruum re' hin naa nutoob'iniik aweh, re' wili i rehtalil naa ruk'uhtaniik reh chi re' hin xin taaq'anik reje aweh, re' noq awisam chik chaloq taqe i nutinamiit Israel ar Egipto naa taq kinaloq'em chinaah i yuuq' wili, inki.

¹³Re' i Moisés je' wili ruchaq'weesjiik i Dios xub'an:
Noq nee kinooj k'oloq kuuk' neenuq'or keh chi je' wili: Re' ki Dios chaloq aamaam awati't, eh re' qaDios i hoj xtaaq'anik cho weh, kinko'q keh, Eh ¿chi rub'ihnaal i Dios re' re', inko'q taqe weh? ¿Chib'ih i neenuq'or keh?

¹⁴Re' Dios je' wili i ruchaq'weesjiik i Moisés xub'an:
Re' hat neenaq'or keh i aj Israel chi re' HIN I DIOS Nim Wajaawriik i nub'ihnaal xa wilkiin wo' chi juneliik, eh chi re' hin xin taaq'anik reje aweh kuuk', inki.

¹⁵Re' Dios je' wilik i xuq'or reh i Moisés:
Re' hat i naa aq'orom keh i aj Israel, chi re' hin i Dios xin taaq'anik reje aweh kuuk'. Re' hin i ki Dios taq aamaam awati't, ruDios i Abraham, i Isaac, i Jacob, DIOS Nim Wajaawriik i nub'ihnaal najtir q'iij, je' chi juneliik.¹⁶Eh hiy ar Egipto chamol kiwach i aj Israel nimaq wach kina'ojb'al cha q'or keh chi re' hin i ki Dios taq aamaam awati't. Re' ruDios i Abraham, i Isaac, i Jacob xnuk'uhtaaj wiib' chawach, eh cha q'or keh chi k'ahchi' taqe wilom, k'ahchi' wilom i ti' k'axik k'ahchi' kik'ulum, kiminariik pankowlaj kamanik.¹⁷Eh cha q'or keh chi re' hin naa wesam taqe chaloq Egipto re' k'ahchi' rub'aan wii' keh i ti' k'axik. Eh naa nuk'amam taqe reje pan kitinamiit i aj cananeo, i aj heteo, i aj amorreo, i aj ferezeo, i aj heveo, i aj jebuseo. Ar chupaam i ye'aab' wilik wii' chu'nchel i suq atoob'.¹⁸Eh re' i nimaq wach kina'ojb'al chi kixilak taqe i aj Israel neenkinimaj aweh, eh nee kiooj chawiij chuq'orob'jiik i kireey i aj Egipto je' wili i neenaq'or reh: Re' QaJaaw, i ki Dios i aj hebreo xk'ulik chi qilariik, xuq'or qeh chi ixib' q'iij naaqab'ehiik reje panchiq yuuq' eh chi ar naa qak'atam i qamayiij chuwach ruum aj re' cha a'n otob'il qeh i hat chayeew q'ab' chi nee qoh ooj tiko'q reh.¹⁹Re' i reey ar Egipto ma' naa ta ruye'em q'ab' chi nee kielik chaloq i aj Israel xa chi je' re' koruman la' chi naa nuk'uhtaam i wajaawriik chinaah.²⁰Ruum aj re', re' hin naa nuk'uhtaam i wajaawriik chinaah i ma' k'isiin taqe i aj Egipto naa nukansam, ruuk' taqe i sachb'al k'uxliis naa nub'anam chinaah i kitinamiit. Kora'j naa ruye'em q'ab' re' i reey chi naa keliik chaloq i aj Israel.²¹Eh re' hin naa nuye'em q'ab' keh i aj Israel chi naa kik'amam kiib' panotob'il kuuk' i aj Egipto. Reh chi noq nee kielik cho ar i aj Israel wilik i chib'ih jariik keh naa kik'amam chaloq.²²Re' taqe ixoq chi kiju'junaal naa kipahqaam, reh i kika'jaah, oon reh jino'q ixoq wilik kuuk', reh chi neenye'arik keh i xa chib'ih jariik, plata, oro korjinaq wii', oon itz'ihy reh chi nee taq inakoj chikiij taq aawak'uun awixq'uun i hat. Eh chi je' re' nee taq inaq'uch i chib'ih keh i aj Egipto, inki i Dios reh i Moisés.

¹Eh re' i Moisés je' wili i xuq'or:
Re' taqe re' ma' nee ta inkinimaj, ma' nee ta inkib'iraj i neenuq'or, je' wili i neenkiq'or: Re' hat ma' ruk'uhtaam ta riib' chawach i QaJaaw Dios, inko'q taqe.

²Eh re' QaJaaw Dios je' wili i xuq'or reh i Moisés ¿Chib'ih jariik ayohq'eem panaq'ab'? inki reh.
Re' nuyohq'eem jinaj karote, inki.

³Re' Dios je' wili i xuq'or: Yu'naak chakut wach ak'al inki.
Re' i Moisés xukut wo' wach ak'al, eh re' karote xsutinik chi aaq'. Eh re' i Moisés rajimam riib' xelik ruum xyo'jik.⁴Eh je' wo' chik wili i xq'orarik reh ruum i QaJaaw Dios:
Chachop chi rujeeh i aaq', inki reh.
Re' i Moisés xuchop wo' chi rujeeh i aaq', eh jumehq'iil wo' chik xsutinik chi karote.

⁵Je' re' naa a'nam chikiwach reh chi nee nkinimaj chi xnuk'uhtaaj wiib' chawach i hin, hin Dios, re' hin taq aaDios, ki Dios chaloq taq aamaam awati't, hin ruDios i Abraham, i Isaac, i Jacob.

⁶Re' Dios je' wili i xuq'or reh i Moisés:
Chamin qohoq aq'ab' pan asikan, inki.
Re' i Moisés xumin wo' qohoq i q'ab' pan sikan, eh noq xresaj chaloq i rilow nujinaq chik chi yab'ilaal i q'ab' re' ruuk' i rax q'aah xasaq req'ik chik xa je' chik saq laj suutz'.

⁷Eh je' wo' chik wili i xq'orarik reh ruum i Dios:
Chamin wo' chik qohoq aq'ab' pan asikan inki. Re' i Moisés xumin wo' chik qohoq i q'ab' chi' rik'ux.
Eh noq xresaj chaloq i q'ab' k'aachjinaq chik ma' xta chik reet, xkahnik wo' chik, chi je' rukab' chu'nchel i ruti'jolal.

⁸Re' QaJaaw Dios je' wili i xuq'or reh i Moisés: Wila' ma' xat kinimaj ma' xat kib'iraj ruuk' i ma' ilooj taj naa a'nam chi peet ruuk' aakarote, nee oon ti kinimaj ruuk' i ma' ilooj taj neenak'uhtaaj keh paruka'peech i nee ruk'ul aaq'ab'.⁹Eh raaj wila' ma' xat kinimaj, wila' ma' xat kib'iraj ruuk' taqe i kiib' chi ma' ilooj taj re' re' naa ak'uhtaam chikiwach. Neenawesaj k'isinoq i ha' pan nim ha'. Eh noq neenachihkaaj wach ak'al i ha' re' re' neensutinik chi kik', inki.

¹⁰Re' Moisés je' wili i xuq'or:
QaJaaw Dios, re' hin xa weh chi ma' kinchol ta q'orik, ma' jank'al ta xata chik holohik i q'orik i nelik chi nuwach. Xa panuk'isinal chaloq chi kinqab'qotik chi q'orik. Xa ko je' wo' yu'naak noq k'ahchi' kiin aq'oreem hin amoso, inki.

¹¹Eh re' QaJaaw Dios je' wili xuq'or:
¿Mi ma' aweht'al re' hat, chi re' hin kinye'wik i chii' i winaq inq'orik wii'? ¿Awach xkananik reh i meem i tz'aplik xikin, i ma' nilwik taj, inilwik? ¿Mi ma' re' wo' re' hin?¹²Eh re' hat hiy cha a'n i nuq'or aweh, re' hin naa nuwihiik awuuk' cha toob'jiik. Eh re' hin naa nuk'uhtaniik aweh chib'ih i naa aq'orom, inki.

¹³Re' Moisés toq' toq' xub'an je' wili xuq'or:
QaJaaw Dios cha a'n tii otob'il tokoom tii cha taq'aaj, inki.

¹⁴Eh re' i QaJaaw Dios xkaqrik je' wili i xuq'or reh i Moisés:
Re' hat wilik jinaj aawas Aarón rub'ihnaal, re' reh aj Levíta, inchol q'orik neetirutob'eej. Eh noq naa awojiik k'oloq ar Egipto naa ruchaliik chak'ulariik, eh naa rusuuqb'iik ruk'ux noq naa rilom awach.¹⁵Chach'ob' rub'ehel reh i xnuq'or aweh chi naa a'nam. Eh re' hin xanaa wo' nuwihiik ruuk' i reh chi rutoob'jiik, je' wo' awuuk' i hat, noq naa taq aq'oriik, re' hin naa nuk'uhtaniik taq aweh chib'ih taq i naa a'nam.¹⁶Re' hat naa aq'oreem aawas Aarón chi je' kinq'orob'jik i hin. Eh re' chik reh naa ruq'oriik keh i tinamit i naa aq'orom reh i hat.¹⁷Eh re' hat chak'am reje aakarote wili, ruuk' i re' naa a'nam taqe i ma' ilooj taj, sachb'al k'uxliis, inki reh. Re' i Moisés xsutinik wo' chik reje pan tinamit Egipto

¹⁸Re' i Moisés xooj wo' chik ruuk' i rajaaw i rehk'een, je' wili i xuq'or reh:
Re' hin naa wo' chik wojiik ar Egipto naa rojiik taqe wilom mi kok'achalkeeb' taqe i was nuchaaq' wilkeeb' ar, inki.
Re' Jetro je' wili xuq'or: ma' xta reet neerub'an chi nee ti'ooj chi suq ak'ux, inki.

¹⁹Eh noq ko wilik i Moisés ar Madián je' wili i xq'orarik reh ruum i QaJaaw Dios:
Yu'naak neerub'an chi nee ti sutinik reje Egipto ruum xikimik chik taqe i naa naq kikansanik aweh najtir, i nuchjik.

²⁰Eh re' i Moisés xuyeew reje chi riij i b'uurux i rehk'een je' wo' hoq i rak'uun xooj wo' chik ar Egipto. Eh xuyohq'eej wo' reje i rukarote xq'orarik reh ruum i Dios chi naa ruk'amam reje.²¹Eh je' wili i xq'orarik reh i Moisés ruum i QaJaaw Dios:
Eh noq naa aponiik ar Egipto, cha chop ak'ux chuwach i reey chub'aan taqe i ma' ilooj taj xnuq'or aweh. Xa re' la' re' hin naa nukowb'isam i ránima reh chi ma' nee ta ruyeew q'ab' chi nee kielik cho ar i nutinamiit Israel.²²Eh je' wili i neenaq'or reh i reey: Re' QaJaaw Dios je' wili xuq'or: Re' taqe i aj Israel peet wak'uun wixq'uun taqe chaloq.²³Eh xuq'or wo' chaaweh chi je' wili: Chayeew q'ab' chi nee kiooj i nutinamiit reh chi nee kinooj kiloq'ej, re' hat ma' nayeew ta q'ab' chi kiooj, ruum i re' naa nukansam i peet aawak'uun, inki i Dios tiko'q reh, inki.

²⁴Eh noq ojik i rub'an i Moisés ar Egipto pan jinaj okal q'iij, xi okik chi wirik chupaam jinaj ye'aab'. Re' QaJaaw Dios xchalik chi rilariik i Moisés, eh xraaj naq rukansam ar.²⁵Eh re' i Séfora ruuk' i jinaj q'aslaj ab'aj xupoch' i rutz'uhmal naah i ruk'achab' i rak'uun. Eh re' i rutz'uhmal naah i ruk'achab' i rak'uun xuyeew i koq ruuk' i ruk'achab' i rub'ahiil, je' wili i xuq'or:
Ruum chi xelik rukik'eel aawak'uun re' hat, hat ko'limaj, inki reh i rub'ahiil.

²⁶Re' QaJaaw Dios xuyeew q'ab' chi xooj i Moisés. Eh re' i Séfora je' wili i xuq'or reh i Moisés: Re' hat, hat nub'ahiil kik', ruum xuchihkaaj i rukik'eel aawak'uun noq poch'arik naah i ruk'achab', inki reh.

²⁷Eh re' QaJaaw Dios ruq'orom chik reh i Aarón chi je' wili:
Hiy panchiq yuuq' chuk'ulariik Moisés, inki.
Re' Aarón xooj wo' chi k'ulariik i Moisés chinaah i yuuq' xq'orob'jik wii' ruum i Dios i Moisés xutz'ub' i koq i wach.²⁸Eh re' i Moisés xuk'utjaaj reh i Aarón chu'nchel i xq'orarik reh ruum i Dios. Xuq'or wo' reh chu'nchel i nimaq kiwach ma' ilooj taj naa rub'anam ar.²⁹Eh kikab'cheel xiooj ar Egipto xkimol wach taqe i nimaq wach kikamaj chi kixilak i aj Israel reh chi xkiq'o'reej.³⁰Eh re' i Aarón xk'utjanik keh chu'nchel i xq'orarik reh i Moisés ruum i QaJaaw Dios. Eh xub'an wo' hoq i nimaq wach ma' ilooj taj chikiwach i tinamit, re' i xq'orarik reh i Moisés ruum i QaJaaw Dios.

³¹Re' taqe i aj Israel wilkeeb' Egipto ch'iklojik kik'ux noq xkib'iraj chi re' Dios xrilow chaloq i ti' k'axik k'ahchi' kik'ulum, eh chi xketeljik kiwach. Ruum i re' xkixuk'aa' kiib' chulooq'jiik i Dios. Re' noq xponik kiq'o'reej i kireey i aj Egipto i Moisés ruch'ihil i Aarón

¹Eh re' i Moisés ruch'ihil i Aarón, xiooj ruuk' i kireey i aj Egipto, je' wili i xkiq'or reh:
Re' QaJaaw i ki Dios i aj Israel je' wili xuq'or chaaweh: Chutaq'aaj reje i nutinamiit chupaam i ye'aab' chiq yuuq' reh chi neenkian ninq'iij ar ye'b'al nuloq'il inki, inki taqe.

²Re' i reey je' wili i xuq'or:
¿Awach i Dios taq inaq'or re' re' reh chi neenunimaj, eh chi neenutaq'aaj taqe reje i aj Israel? Re' hin ma' weht'al ta wach i Dios re' re', eh ni xata neenutaq'aaj taqe reje i aj Israel, inki.

³Eh re' keh je' wili i xkiq'or:
Re' i qaDios i hoj, i hoj aj hebreo xuk'uhtaaj riib' chi qawach xuq'or qeh chi naa rojiik qaloq'em. Qoh ataq'aaj reje reh chi nee qoh b'ehik reje ixib'-oq q'iij chupaam i chiq yuuq' chuk'atariik i qamayiij chuwach i QaJaaw Dios. Reh chi ma' nee ta qoh kimik ruum i yab'ilaal ruum q'aslaj ch'ihch', inki taqe.

⁴Eh re' i kireey i aj Egipto je' wili i xuq'or reh i Moisés, reh i Aarón:
¿Chib'ih reet noq k'ahchi' taq achamam i tinamit ruuk' i kikamaj? Re' taq i hat hiy taq cha a'n akamaj, inki.

⁵Re' taq i hat inawil taq chi yohb'aal chik wach kik'ihaal i aj Israel wilkeeb' pan tinamit ayu', inawaaj taq chi neenkikanaa' i kikamaj, inki.

⁶Eh re' reey chupaam q'iij re' re' je' wili i xuq'or keh i k'amal b'eeh pankamanik ruch'ihil taqe ilil keh i ju'jun ch'uq chi kamanoom:

⁷Yu'naak naa taq akanaam ruye'ariik kik'iim taqe i aj Israel re' inkikoj xilak xaan noq inkiyejaa', re' chik i keh naa kojiik sik' woq i k'im re' re'.⁸Eh kow taq naa aq'orom keh chi ma' jino'q naa rutoqiik rooq xaan naa kiyejaam xa je' wo' k'ihaal inkiyejaa' chaloq. Ruum re' keh xa je' cho ma' chih kikamaj ruum aj re' kow inkik'er kichii' chuq'orariik chi je' wili: Narojiik qak'atam i qamayiij chuwach i QaJaaw Dios, inki taqe.⁹Chayeew taqe pankowlaj kamanik. Eh eliik-oq wilik kikamaj taq awuum reh chi ma' nee tan teh kiwach chi rib'irjiik i xachukuj q'orik, inki.

¹⁰Re' taqe i aj k'amal b'eeh pankamanik, taqe i ilil keh i kamanoom kiq'or reh taqe i kamanoom chi je' wili:
Yu'naak xuq'or i reey, chi ma' naa ta chik qaye'em taq aweh i k'im.¹¹Yu'naak johtoq chi qawach re' taq chik i hat naa asik'wiik reh i k'im re' re'. Xa re' la' ma' ruum tee re' naa ruqajiik rooq taq xaan naa ayejaam, inki taqe.

¹²Eh noq xkib'iraj i aj Israel chi je' re' jumehq'iil xkipuhkaaj kiib' paruyuq'ul i Egipto xiooj pantaq ab'iix chusik'ariik i kik'iim reh i xilak i xaan.¹³Re' taqe ilil kamanoom pan josq'iil inkiq'or reh taqe i kamanoom chi je' wili:
Nik' i ora inaq'asaj taq i xaan noq konqayeew taq ak'iim je' wo' re' i ora taq naa aq'asam yu'naak, inki taqe.

¹⁴Eh re' taqe i k'amal b'eeh pankamanik rukojom i reey inkiq'oj taqe i aj Israel ilil taqe kamanoom je' wili inq'orarik keh:
¿Chib'ih reet noq ma' xkiq'asaj taj i xaan taqe i moso ni xata eew, ni xata yu'naak xkian nik' k'ihaal naq i naa kianam? inki taqe.

¹⁵Eh re' taqe i aj Israel wilkeeb' chi ilil kamanik xi ponik chi jalooj ruuk' i reey je' wili kiq'or reh:
¿Chib'ih reet noq xti yohb'aal wo' chik wach kowiil i kamanik i nayeew wach qanaah i hoj amoso?¹⁶Ma' inye'arik ta chik qak'iim, eh kow inkiq'or qeh chi naaqa'nam nik' k'ihaal i xaan inqa'an noq xub'an. Xanaah re' qoh kiq'oj, re' wilik kimahk re' taqe aatinamiit i hat, inki taqe reh.

¹⁷Re' i reey je' wili i chaq'wik xub'an:
Re' taq i hat je' cho ma' chih taq akamaj, ruum tehlik taq awach chuq'orariik chi nataq rojiik ak'atam mayiij chuwach taq aaDios.¹⁸Hiy taq cha a'n akamaj atoob' ta ma' inye'arik taq chik aweh i k'im inakoj taq xilak xaan xanaa wo' taq a'nam nik' k'ihaal taq i na a'n noq inye'arik taq aweh i k'im, inki.

¹⁹Eh re' taqe i aj Israel kojooj taqe chi ilil keh i kamanoom xama' inkireq ta chik chi riij chib'ih i naa kianam noq xq'orarik keh chi ma' naa ta rutoqiik rooq i nik' k'ihaal xaan naa kiyejaam rajlaal q'iij.²⁰Noq xkikohlaaj chaloq i k'utaaj ruuk' i reey xk'ulik kireq i Moisés ruch'ihil i Aarón re' i k'ahchi' kuyub'jiik wii'.²¹Je' wili i xuq'or reh i Moisés reh i Aarón:
Re' i Dios ilwoq reh taq i k'ahchi' kaat, eh nee ta naq i ruq'at i q'orik taq cha naah. Ruum amahk taq i hat ma' suq ta chik qilariik i rub'an i reey je' wo' taqe i kikamanik ruuk'. Re' taq i hat je' naa xayeew taq i q'aslaj ch'ihch' pan kiq'ab' reh qakanteesjiik, inki taqe. Re' i Moisés xub'an rutiij

²²Eh re' i Moisés je' wili i xuq'or reh i Dios parutiij:
QaJaaw Dios ¿Chib'ih reet noq k'ahchi' a'nam ti' k'axik keh aatinamiit wili? eh wila' je' re', ¿chib'ih kamaj noq xinataq'aaj cha yu'?²³Xa re' wo' noq xk'ulik nuq'oreej i reey panab'ihnaal chikiij aatinamiit xtohq'ik rub'an ti' k'axik keh. Eh re' hat xakomajaa' wo' nakapaaj kiko'ljiik, inki.

¹Eh re' QaJaaw Dios je' wili ruchaq'weesjiik i Moisés xub'an:
Yu'naak naa awilom, chi naa nuye'em i nujosq'iil chinaah i reey. Eh noq rilom chik i nujosq'iil xa paruk'ux naa ruchaliik chi naa taq kaat resam chaloq parutinamiit, inki. Re' Dios xuq'oreej wo' chik i Moisés

²Re' Dios je' wo' chik wili i xuq'or reh i Moisés:
Re' hin i Dios.³Re' hin i xnuk'uhtaaj wiib' chuwach i Abraham, i Isaac, i Jacob, re' hin Dios nim rajaawriik i nub'ihnaal. Xa re' la' ma' q'e' ta xnuk'uhtaaj i wajaawriik chikiwach.⁴Eh re' taqe re' xnuyejaa' wo' cho wach kuuk' chi naa nuye'em keh i ye'aab' Canaán. Re' ye'aab' xi wihik cho wii' chi xa ik'al b'eeh taqe.⁵Re' hin weht'al chi re' taqe i aj Israel ti' k'ahchi' kik'iik wii'. Eh chi re' taqe i aj Egipto minwik keh pankowlaj kamanik, ruum aj re' xk'ulik panuk'ux i nuyejaam cho wach kuuk'.⁶Yu'naak cha q'or keh i aj Israel chi re' hin i Dios nim wajaawriik naa wesaniik cho keh chupaam i kowlaj kamanik minooj taqe wii' kuum i aj Egipto. Eh naa nuko'leem taqe chupaam i ti' k'axik wilkeeb' wii' ruuk' i wajaawriik ruuk' rikorkiil wach nuk'ux.⁷Eh re' taq i hat naa taq kaat nukojom chi nutinamiit, re' hin naa nukahniik taq chi aaDios. Reh chi naa taq anab'eem chi re' hin taq aaWaJaaw aaDios naa wesaniik taq chaaweh chupaam i kowlaj kamanik ar Egipto.⁸Eh ar taq naa kaat nuk'amam reje chupaam i ye'aab' nuq'orom cho b'ih reh i Abraham, i Isaac, i Jacob. Re' ye'aab' re' re' naa taq nuye'em aweh i hat chi akooch, re' hin i Dios naa nuko'liniik taq aweh, inki.

⁹Re' Moisés xuq'or wo' keh i aj Israel i xq'orarik reh ruum i Dios. Xa re' la' re' keh xama' jaruuj wo' xkinimaj, ruum re' keh xyoj kik'ux ruum i kowlaj kamanik ye'ooj taqe wii'.¹⁰Eh re' QaJaaw Dios je' wili i xuq'or reh i Moisés:

¹¹Yu'naak hiy wo' chik cha q'or reh i kireey i aj Egipto chi chuyeew q'ab' keh i aj Israel chi nee kielik chaloq pan tinamit Egipto, inki.

¹²Eh re' i Moisés je' wili i ruchaq'weesjiik i Dios xub'an:
Ni xata naq re' taqe i aj Israel inkinimaj i nuq'or. ¿Ra'j naa chik re' i reey neerunimaj i neenuq'or ruum kinqab'qotik chi q'orik? inki.

¹³Eh re' QaJaaw Dios xuq'or reh i Moisés, reh i Aarón chi naa kiq'orom keh taqe i aj Israel je' wo' reh i reey chi kow xuq'or i Dios chi naa keliik cho pan tinamit Egipto i aj Israel.

¹⁴Re' i kik'amwik b'eeh chi kixilak i aj Israel je' wili kib'ihnaal:
Re' peet rak'uun i Israel re' Rubén, re' taqe rak'uun i Rubén je' wili kib'ihnaal: Hanoc, Falú, Hezrón, Carmi.

¹⁵Eh re' taqe i rak'uun i Simeón je' wili i kib'ihnaal: Re' Jemuel, Jamín, Ohad, Jaquín, Zohar, Saúl, re' i rak'uun xwihik ruuk' i jinaj ixoq aj cananeo.

¹⁶Re' Leví reh jinaj siento ruuk' wuqlaj ru ka'winaq haab' xk'acharik, eh je' wili kib'ihnaal taqe i rak'uun xi wihik ar xtohq'ik reje ruuk' i peet ak'un, eh xponik ruuk' i tz'apaab' wach ak'un: Gersón, Coat, Merari.¹⁷Eh re' Gersón je' wili i kib'ihnaal taqe i rak'uun xi wihik: Libni, Simei.¹⁸Re' Coat jinaj siento ruuk' oxlaj ru ka'winaq haab' xk'acharik, eh je' wili i kib'ihnaal taqe i rak'uun: Amram, Izhar, Hebrón, Uziel.¹⁹Re' Merari je' wili taqe i kib'ihnaal i rak'uun xi wihik: Mahli, Musi. Re' taqe re' i rak'uun taqe i Leví xtihk'ik cho ruuk' i peet ak'un xponik ruuk' i tzapaab' wach ak'un.

²⁰Eh re' Amram xub'an kaxáro ruuk' i Jocabed i ranaab' i rajaaw, eh kiib' i rak'uun xwihik, jinaj i Aarón, eh jinaj i Moisés. Re' Amram re' re' jinaj siento ruuk' wuqlaj ru ka'winaq haab' xk'acharik.

²¹Re' Izhar je' wili kib'ihnaal taqe i rak'uun xi wihik: Coré, i Nefeg, Zicri.

²²Re' Uziel je' wili i kib'ihnaal taqe i rak'uun xi wihik: Misael, Elzafán, Sitri.

²³Re' i Aarón xub'an kaxáro ruuk' i Elisabet rixq'uun i Aminadab, ruchaaq' i Naasón, eh je' wili i kib'ihnaal taqe i rak'uun xi wihik: Nadab, Abiú, Eleazar, Itamar.

²⁴Re' Coré je' wili kib'ihnaal taqe i rak'uun xi wihik: Asir, i Elcana, Abiasaf. Re' taqe i re' kak'uun kixq'uun kiih kimaam taqe i aj koreítas.

²⁵Re' Eleazar rak'uun i Aarón, xub'an kaxáro ruuk' jinaj i keh i rixq'uun i Futiel, eh x-aasjik jinaj i rak'uun ruuk' Finees i b'ih. Re' taqe i re' xk'amwik cho kib'eeh i aj Levíta, eh re' taqe i re' rak'uun rixq'uun kiih kimaam cho kiib'.

²⁶Re' wo' hoq i Aarón, i Moisés wili xiq'orob'jik cho ruum i Dios chi naakesam taqe chaloq i aj Israel pan rutinamitaal i Egipto. Kiyejaam chik kiib' chi je' taqe juntuhb' chi soldado.²⁷Eh re' wo' Aarón, i Moisés wili xi ponik q'orinoq reh i kireey i aj Egipto chi nanaq ruye'em q'ab' chi naa keliik chaloq ar i aj Israel.

²⁸Eh chupaam i q'iij re' re', re' Dios xuq'oreej wo' chik i Moisés ar Egipto,²⁹Je' wili i xuq'or reh:
Re' hin i Dios nim wajaawriik cha q'or reh i kireey i aj Egipto chu'nchel i naa nuq'orom aweh.

³⁰Eh re' i Moisés je' wili i ruchaq'weesjiik i QaJaaw Dios xub'an:
Jaaw re' hin kinqab'qotik chi q'orik, ¿Eh nik' wach noq neerunimaj weh i reey i neenuq'or? inki.

¹Eh re' QaJaaw Dios je' wili i xuq'or reh i Moisés:
Re' hin naa nuye'em q'ab' aweh chi naa a'nam nujilow chuwach i kireey i aj Egipto, eh re' i Aarón i aawas naa ruq'oriik ruuk' i reey chi ajilow i hat.²Re' hat neenaq'or reh chu'nchel i Aarón i xnuq'or aweh. Eh re' chik i reh nee nq'orik reh i reey chi chuyeew q'ab' chi nee kielik cho ar i aj Israel chupaam i rutinamiit.³Xa re' la' re' hin naa nukowb'isam i ránima i reey reh chi ma' nee ta rutaq'aaj taqe chaloq i aj Israel, eh ma' k'isiin ma' ilooj taj, ma' k'isiin taqe i sachb'al k'uxliis naa nub'anam chikiwach i aj Egipto.⁴Re' i reey ma' naa ta rib'iram i naa taq aq'orom, xa re' la' re' hin naa nuk'uhtaam i wajaawriik chikinaah i aj Egipto eh naa taqe nuye'em chutojariik i kimahk kora'j naawisam cho re' taqe i ruk'ihaal nutinamiit aj Israel.⁵Eh noq nuk'uhtaam chik i wajaawriik chikinaah taqe i aj Egipto, eh noq wisam chik taqe chaloq i nutinamiit Israel ar. Re' taqe i aj Egipto naa kinab'eem chi re' hin i Dios wilik wajaawriik, inki.

⁶Re' i Moisés ruch'ihil i Aarón xkian wo' chu'nchel i xq'orarik keh ruum i QaJaaw Dios.⁷Re' Moisés noq xponik kiq'o'reej i reey kajwinaq haab' wilik reh, eh re' i Aarón kajwinaq ruuk' ixib' haab' i wilik reh. Re' i ma' ilooj taj xub'an ruuk' i rukarote i Aarón

⁸Re' i QaJaaw Dios je' wili i xuq'or reh i Moisés reh i Aarón:

⁹Wila' xupahqaaj taq aweh i kireey i aj Egipto chi naa taq a'nam i ma' ilooj taj, neenaq'or reh i Aarón chi nee rukut wach ak'al i rukarote chuwach i reey, reh chi neensutinik chi aaq', inki.

¹⁰Eh re' i Moisés ruch'ihil i Aarón xponik wo' kiq'o'reej i reey, xkian wo' chu'nchel i xq'orarik keh ruum i QaJaaw Dios. Re' i Aarón xukut wach ak'al i rukarote chuwach i reey, ruch'ihil taqe i kikamanik ruuk'. Eh re' i rukarote xsutinik wo' chi aaq'.¹¹Xrilow chi je' re' i reey xutaq'aaj taqe ruk'amariik i aj q'iij wilik kina'ojb'al wilkeeb' ar Egipto. Re' keh xkian wo' ruuk' i kiyiib' wach na'ojb'al je' rukab' i ma' ilooj taj xub'an i Moisés ruch'ihil i Aarón.¹²Re' keh i xkikut wo' wach ak'al i kikarote chi kiju'junaal, eh re' ju'jun chi kikarote xsutinik wo' chi aaq'. Eh re' i rukarote i Aarón kuxik ruk'uxum i kikarote taqe i aj q'iij re' re'.¹³Re' i reey atoob' ta xrilow wo' naq taqe i ma' ilooj taj re' re', xama' xunimaj ta wo' taqe. Xukowb'isaj i ránima, je' wo' rukab' i xuq'or i QaJaaw Dios. Re' i ti' k'axik xkik'ul taqe i aj Egipto noq xsutinik chik'ik' i ha'

¹⁴Chi riij i re', re' QaJaaw Dios je' wili i xuq'or reh i Moisés:
Re' reey q'e' xukowb'isaj i ránima ma' jaruuj i ruyeew q'ab' chi ki elik chaloq i aj Israel.¹⁵Xa re' la' wahq'eq i iqal nee tiooj chi rilariik ar naa awuy-eem chi chii' i nim ha' i reey. Eh chak'am reje aakarote re' i xsutinik chi aaq'.¹⁶Eh je' wili i neenaq'or reh: Re' i QaJaaw Dios, i ki Dios i aj hebreo xirutaq'aaj cha wuuk', je' wili i xuq'or: Re' i reey inwaaj chi nee rutaq'aaj chaloq i nutinamiit Israel reh chi nee kiooj chi nulooq'jiik panchiq yuuq', eh yu'naak xa majaa' wo' rutaq'aaj taqe chaloq, inki cho chawiij.¹⁷Eh je' wo' chik wili i xuq'or cho chawiij i Dios ruuk' i wili naa runab'eem i reey chi re' i hin i Dios nim wajaawriik, inki, eh xuq'or wo' weeh hin chi noq nenuq'oj paam i nim ha' ruuk' i nukarote re' i nim ha' naa rusutiniik chik'ik'.¹⁸Eh re' taqe i kar wilkeeb' pan nim ha' naa kikimiik chu'nchel, re' i ha' naa rukahniik chi xaxuhik chik, ma' naa ta chik kuk'em i aj Egipto naakixab'iik ruum, inki Dios.

¹⁹Re' i QaJaaw Dios je' wili i xuq'or reh i Moisés:
Chaq'or reh i Aarón chi chuyub' reje i q'ab', chuyeew reje i rukarote chinaah i nim ha' je' wo' chikinaah taqe i q'ab' ha', je' wo' chikinaah chu'nchel i rumol wii' riib' ha' wilkeeb' paruyuq'ul i Egipto. Reh chi nee kisutinik chik'ik' i ha' wilkeeb' chupaam chu'nchel i molb'al ha', je' chi chee' korjinaq wii', je' wo' chi ab'aj korjinaq wii'.

²⁰Eh re' i Moisés ruch'ihil i Aarón xkian chu'nchel i xq'orarik keh ruum i QaJaaw Dios. Re' i Aarón xujosaj johtoq i rukarote xuq'oj paam i nim ha' chuwach i reey ruch'ihil taqe chu'nchel i kikamanik ruuk'. Eh chu'nchel i ha' xi sutinik chik'ik'.²¹Re' taqe i kar wilkeeb' panim ha' xkuxik kikimiik, eh chuhrik i ha' ruum taqe re' xama' nkian ta chik kihaa' chu'nchel i aj Egipto. Ruum xsutinik chik'ik' chu'nchel i ha' wilkeeb' paruyuq'ul i Egipto.

²²Re' taqe i aj q'iij ar Egipto xkian wo' hoq i keh ruuk' i kiyiib' wach na'ojb'al je' rukab' i xub'an ruuk' i rukarote i Aarón. Eh re' i reey xukowb'isaj wo' chik i ránima xama' xutaq'aaj ta wo' taqe i aj Israel, je' rukab' i xuq'or i QaJaaw Dios. Xa ma' xunimaj ta wo' hoq i xuq'or i Moisés i Aarón.²³Eh re' i reey xsutinik wo' chik reje chupaam i paat i rub'an wii' i taaq'anik xama' xrib'iraj ta wo' hoq i xq'orarik reh.²⁴Eh chu'nchel i aj Egipto korehtaal xkik'ot i koq kijul haa' chi chii' i nim ha' re' xkesaj wii' kihaa' ruum re' i nim ha' ma' xub'an ta chik chi xkuk'ej ruum xsutinik chik'ik'.²⁵Eh wuquub'-oq chik q'iij rusutem chik'ik' i nim ha' i QaJaaw Dios. Re' ti' k'axik xkik'ul i aj Egipto noq xi wuktik chaloq i ma' k'isa tuhtz'

¹Je' wili i xuq'or reh i Moisés:
Yu'naak hiy wo' chik ruuk' i reey cha q'or reh chi je' wili: Chi chuyeew q'ab' chi nee kiooj i nutinamiit Israel reh chi nee kiooj chi nulooq'jiik.²Eh wila' ma' xuyeew q'ab' chi nee kiooj i nutinamiit re' hin naa nuye'em ma' k'isa tuhtz' chi naa kianam ti' k'axik reh i rutinamiit Egipto.³Re' i nim ha' Nilo naa runujiik chi tuhtz' ar naakeliik chaloq, naa runujiik parupaat, paruwarb'al, chinaah ruch'aht, pankipaat i kikamanik ruuk'. Eh naa wo' runujiik kuuk' i rutinamiit, je' wo' paruhorna, inkorb'eesjik wii' i kaxlanwi'k.⁴Re' taqe i tuhtz' naakipisk'aniik johtoq chi riij, chikiij i kikamanik ruuk', chikiij taqe i rutinamiit, inki cho chawiij i Dios tiko'q reh.

⁵Re' QaJaaw Dios je' wili i xuq'or reh i Moisés:
Chaq'or reh i Aarón chi chuq'ebaa' reje i rukarote chikinaah i nim ha', chikinaah i q'ab' ha', chikinaah i rumol wii' riib' i ha'. Reh chi ar nee kiwuktik chaloq i ma' k'isa tuhtz' neenkinujisaj paam i tinamit Egipto.

⁶Eh re' i Aarón xuq'eb'aa' wo' reje rukarote chikinaah i chu'nchel i ha' wilkeeb' paruyuq'ul i Egipto. Xi elik wo' cho ar taqe i ma' k'isa tuhtz', eh xinujik chupaam i tinamit Egipto.⁷Eh re' taqe i aj q'iijineel wilkeeb' ar Egipto, je' wo' chik re' i xkian i keh, ruuk' i kiyiib' wach na'ojb'al xkuksaj wo' chaloq i ma' k'isa tuhtz' chupaam i tinamit Egipto.⁸Eh re' i reey, xuyuq'eej ruuk' i Moisés, i Aarón, je' wili i xuq'or keh:
Chapahqaaj taq reh aaDios chi chesaj i ma' k'isa tuhtz' wuuk' i hin, je' wo' chupaam i nutinamiit, chi je' re' neenuyeew q'ab' chi nee kiooj aatinamiit chuk'atariik i mayiij chuwach taq aaDios, inki.

⁹Eh re' i Moisés je' wili i xuq'or reh i reey:
Chaq'or weh jaruuj inawaaj chi neenupahqaaj reh Dios chawiij i hat, chikiij i kikamanik awuuk', chikiij aatinamiit, reh chi nee kielik i tuhtz' chupaam aapaat titaaq'anik wii', xa panim ha' chik nee kikahnik, inki.

¹⁰Eh re' reey je' wili xuq'or: Xa i iqal inwaaj chi nee kielik reje, inki.
Re' i Moisés je' wili i xuq'or:
Ma' xta reet neerub'an inaq'or, reh chi neenanab'eej chi re' i QaJaaw Dios ma' awach ta chik jino'q chi je' rukab' i reh.¹¹Eh re' i ma' k'isa tuhtz' naakeliik reje chupaam aapaat i hat, kuuk' i kikamanik awuuk' kuuk' aatinamiit, xa pantaq nim ha' chik naa kiwihiik, inki.

¹²Chi riij i re' xelik chaloq i Moisés ruch'ihil i Aarón chupaam i paat intaaq'anik wii' i reey. Re' i Moisés xupahqaaj wo' ree Dios chi naa resam taqe i ma' k'isa tuhtz' xuyeew cho chinaah i reey.¹³Eh re' QaJaaw Dios xub'an wo' hoq i xupahqaaj i Moisés xkuxik wo' kikimiik i tuhtz' wilkeeb' naq pantaq paat, i wilkeeb' i koq rij taq paat, i wilkeeb' panab'iix.¹⁴Re' i tinamit xkimol i kamnaq tuhtz' xa aha' ta chik ma' xkimulaa' wach, eh xupuhkaaj riib' i ruchuhiil.¹⁵Re' i reey noq xrilow chi ma' xta chik ruk'axkiil xukowb'isaj wo' chik i ránima xama' xutaq'aaj ta wo' taqe i aj Israel. Xa ma' xunimaj ta wo' hoq i xuq'or QaJaaw Dios. Re' i ti' k'axik xkik'ul i aj Egipto noq xi wuktik chaloq ma' k'isa uk'

¹⁶Re' QaJaaw Dios je' wili i xuq'or reh i Moisés:
Chaq'or reh i Aarón chi nee ruq'oj paam i pooq ruuk' i rukarote, reh chi re' pooq neensutinik chi uk', eh neenkipuhkaaj kiib' chupaam i tinamit Egipto, inki.

¹⁷Eh je' wo' re' i xkian, re' Aarón xuyub' wo' reje i q'ab' xuq'oj paam i pooq ruuk' i rukarote, re' pooq wilik paruyuq'ul i Egipto xsutinik wo' chi uk', eh xtohq'ik kiti'im i tinamit, je' wo' taqe i chikop.¹⁸Re' taqe i aj q'iij wilkeeb' ar i Egipto xkisutej wo' naq chi uk' i pooq i keh ruuk' i kiyiib' wach na'ojb'al. Xa re' la' xama' xkian ta wo' rub'aan, eh re' taqe i uk' keh chayeew i ruti'ariik i tinamit, i chikop inki a'n¹⁹Eh re' taqe i aj q'iij re' re', je' wili i xkiq'or reh i reey:
Re' wili rutaaq'aniik taqe chaloq i Dios, inki taqe. Eh re' reey reh xukowb'isaj i ránima xama' xutaq'aaj ta wo' reje taqe i aj Israel, xama' xunimaj ta wo' hoq i xkiq'or je' naq rukab' i xuq'or i Dios. Re' ti' k'axik xkik'ul taqe i aj Egipto noq xi wuktik chaloq i utz' kitiwik

²⁰Re' QaJaaw Dios je' wili i xuq'or reh i Moisés:
Re' reey eqal inooj chi chii' i nim ha', eh re' hat kowahq'eq wukteen reje neenawuy-eej ar, eh je' wili i neenaq'or reh: Re' QaJaaw Dios je' wili i xuq'or cho chawiij chuyeew q'ab' chi nee kinooj kiloq'ej i nutinamiit Israel.²¹Ruum wila' re' reh ma' xuyeew q'ab' chi nee kinooj kiloq'ej i aj Israel re' hin naa nutaq'aam chaloq i ma' k'isa utz' chinaah i reh, je' wo' chikinaah i kikamanik ruuk', je' wo' chinaah i rutinamiit eh naa runujiik i kipaat chu'nchel i aj Egipto chi utz', eh naa wo' runujiik i wach ak'al.²²Eh noq naa nub'anam i re' kuuk' i aj Egipto, ma' naa ta nuye'em i utz' chupaam i ye'aab' Gosén, ruum ar wilkeeb' i nutinamiit Israel. Chi je' re' naa runab'eem i reey chi re' hin i Dios wilkiin chupaam i ye'aab' re' re'.²³Eh xa re' wo' chinaah i rutinamiit i reh naa nuye'em chee utz', eh chikinaah i nutinamiit i hin ma' naa ta nuye'em re' wili xa i iqal i nub'an, tiko'q reh i reey inki Dios.

²⁴Eh re' i QaJaaw Dios xutaq'aaj wo' chaloq i ma' k'isa utz' xinujik parupaat i reey intaaq'anik wii', pankipaat i kikamanik ruuk', xinujik chupaam i rutinamitaal i Egipto. Eh re' taqe i utz' re' re' yohb'aal wach i piix xkian chupaam i tinamit.

²⁵Eh re' i reey xutaq'aaj ruk'amariik i Moisés, i Aarón je' wili xuq'or keh:
Neerub'an chi nee taq i nak'at amayiij chuwach taq aaDios xa re' la' mat elik taq reje ayu', inki.

²⁶Re' i Moisés je' wili i xuq'or:
Ma' ruk'ul taj chi ayu' neenqa'an ruum re' taqe i chikop inqak'at chi mayiij i hoj chuwach i QaJaaw Dios q'e' looq' chi keh taqe aatinamiit ayu' Egipto. Eh noq neenkilow i keh chi neenqak'at chi qamayiij i chikop looq' keh, noq i nuq'or i hin chi nee qoh kikansaj, chi ab'aj.²⁷Re' hoj koruman chi naa qab'ehiik reje ixib' q'iij chupaam i chiq yuuq'. Eh ar nenooj qak'at i qamayiij chuwach i QaJaaw i qaDios, je' rukab' i xuq'or qeh chi naa qa'nam, inki.

²⁸Re' reey je' wili i xuq'or:
Re' hin neenuyeew q'ab' chi nee taq tiooj chupaam i ye'aab' chiq yuuq', xa re' la' ma' q'e' ta najt ayu' taq nee tiooj chuk'atariik aamayiij chuwach taq aaDios. Eh cha pahqaaj wo' taq i rotob'il chi wiij i hin, inki.

²⁹Re' i Moisés je' wili i xuq'or:
Xa re' wo' noq nee kinelik reje ayu' neenupahqaaj reh i QaJaaw Dios chi xa i iqal neeresaj i utz' awuuk' i hat, kuuk' i kikamanik awuuk', kuuk' aatinamiit. Xa re' la' wila' re' hat ma' xoj ajot' chik, eh wila' ma' xaq'il chik taqe i aj Israel chi neenooj kik'at i kimayiij chuwach i QaJaaw Dios, inki.

³⁰Eh re' Moisés xa re' wach xelik cho ruuk' i reey xub'an rutiij chuwach i QaJaaw Dios.³¹Re' QaJaaw Dios xub'an wo' hoq i xupahqaaj parutiij i Moisés. Xresaj wo' chu'nchel i utz' ruuk' i reey, kuuk' kikamanik ruuk', kuuk' i rutinamiit.³²Xa re' la' re' reey xukowb'isaj wo' chik i ránima xama' xutaq'aaj ta wo' reje taqe i aj Israel. Re' noq xikimik i kichikoop taqe i aj Egipto ruum i yiib' wach yab'ilaal

¹Eh re' i QaJaaw Dios je' wili i xuq'or reh i Moisés:
Hiy wo' chik ruuk' i reey, je' wili i cha q'or reh: Re' QaJaaw Dios ki Dios i aj hebreo je' wili i xuq'or chawiij: Chuyeew q'ab' keh i nutinamiit Israel chi nee kinooj kiloq'ej.²Eh wila' ma' xuyeew wo' chik q'ab' chi nee kiooj i nutinamiit.³Re' hin naa nuk'uhtaam i wajaawriik chikinaah i ruchikoop wilkeeb' panab'iix. Jinaj i yiib' wach yab'ilaal naa nuye'em, naa kikimiik i kikawayu, i kib'uruux, kicameyo, i kitentzuun, i kiwakax.⁴Eh xa re' wo' kichikoop i aj Egipto naa nukansam ruuk' i yab'ilaal re' re'. Eh re' i kichikoop i nutinamiit Israel ma' jino'q i naa nukansam, inki QaJaaw Dios, tiko'q reh.

⁵Re' QaJaaw Dios xama' najt ta chik i xuq'at: je' wili i xuq'or:
Re' wili xa i iqal i nub'an, inki.

⁶Eh re' QaJaaw Dios xub'an wo' chi junwaar, chu'nchel i kichikoop i aj Egipto xkuxik wo' kikimiik. Eh re' i kichikoop i aj Israel ma' jino'q wo' hoq i xikimik.⁷Re' reey xutaq'aaj rilariik i kichikoop i aj Israel mix kimik, eh xk'ulik q'oraroq reh chi ma' jino'q i xkimik. Atoob' ta chi xrib'iraj chi je' re' i reey xukowb'isaj wo' chik i ránima xama' xutaq'aaj ta wo' taqe i aj Israel. Re' ti' k'axik xkik'ul i aj Egipto ruum i q'aah xpoq' cho chikiij

⁸Re' QaJaaw Dios je' wili i xuq'or reh i Moisés, ruch'ihil i Aarón:
Chamohq'eej taq cho jumohq'-oq i chaaj wilik chupaam jino'q i horna, neerukut taxaaj i Moisés chuwach i reey.⁹Eh re' chaaj naa rupuk'iniik chikinaah chu'nchel i tinamit Egipto eh ruum i re' naa rupoq'iik chaloq i jinaj ye'b'eewach q'aah chikiij chu'nchel i tinamit, je' wo' chikiij i chikop wilkeeb' paruyuq'ul i Egipto, inki.

¹⁰Re' i Moisés, i Aarón xponik wo' kimohq'eej i chaaj chupaam i jinaj i horna xiooj wo' chik ruuk' i reey, ar xupukej johtoq i chaaj pan taxaaj i Moisés. Eh ruum i re' xa chi jumehq'iil xpoq' chaloq i yiib' wach q'aah chikiij i tinamit, chikiij i chikop.¹¹Eh re' taqe i aj q'iijineel wilkeeb' ar Egipto ma' xkian ta chik rub'aan i keh i xub'an i Moisés. Ruum xnujik chi q'aah i kiij i keh, je' rukab' i xpoq' chikiij chi kunchelaal i aj Egipto.¹²Re' QaJaaw Dios xukowb'isaj wo' chik ránima i reey, reh chi ma' xunimaj taj i xuq'or i Moisés, i Aarón je' rukab' i xuq'or i Dios reh i Moisés. Re' ti' k'axik xkik'ul i aj Egipto noq xub'an i ma' k'isa saqb'och

¹³Chi riij i re' je' wili i xuq'or i QaJaaw Dios reh i Moisés:
Iqal kowahq'eq naa awuktiik, naa wo' chik awojiik ruuk' i reey neenaq'or reh chi re' hin i kiDios i aj hebreo kinq'orik reh chi chuyeew q'ab' keh i nutinamiit Israel chi nee kinooj kiloq'ej.¹⁴Ruum wi ma' xutaq'aaj taqe, re' hin naa nuye'em i ti' k'axik chinaah i reh, chikinaah i kikamanik ruuk', chikinaah i rutinamiit. Chi je' re' naa runab'eem chi re' hin i Dios, eh chi ma' awach ta chik jino'q chi je' nukab' i hin chinaah i wach ak'al.¹⁵Re' hin xa xub'an wo' naq chi xnuyeew i ti' k'axik chinaah i reh, chikinaah i rutinamiit, eh kuxik naq chik kikimiik yu'naak ma' nilarik ta naq chik kiwach chinaah i wach ak'al.¹⁶Eh re' hin ma' xat nukansaj taj reh naq chi naa akojom rehtaal i wajaawriik. Re' naq inwaaj i hin chi naa ruq'orariik wib'iral chi junsuut i wach ak'al.¹⁷Atoob' ta inuketelaaj wach, re' reh xama' ruyeew ta wo' q'ab' chi kiooj i nutinamiit chi nulooq'jiik.¹⁸Re' hin i iqal je' yu' ora naa nuye'em i runimaal saqb'och xiik' naah kininqaal ma' jank'al ta inqajik i kitoq'aam cho k'acharik i aj Egipto.¹⁹Yu'naak hiy chamol taqe i aachikoop, chu'nchel i chib'ih aweh wilkeeb' panab'iix. Ruum re' saqb'och noq naa ruqajiik chaloq naa rukansam taqe nik' nimaal i ma' naa ta rumolariik pampaat, chi tinamit, chi chikop, inki i Dios, inki Moisés.

²⁰Eh wilik wo' taqe i kikamanik ruuk' i reey xchalik kiyo'jiik ruum i xuq'or i QaJaaw Dios. Ruum i re' xkimol pampaat taqe i kimoso, taqe i kichikoop.²¹Wilik wo' taqe i ma' xkinimaj taj i xuq'or i QaJaaw, ma' xkimol taj pampaat i kimoso, je' wo' taqe i kichikoop.²²Re' i QaJaaw Dios je' wili i xuq'or reh i Moisés:
Chajosaj aq'ab' pan taxaaj reh chi neenqajik chee ma' k'isa saqb'och chinaah i tinamit Egipto, je' chikinaah i tinamit, chikinaah i kichikoop, chikinaah i kitik wilik paruyuq'ul i Egipto.

²³Eh re' i Moisés xujosaj wo' johtoq i q'ab' pan taxaaj, eh re' QaJaaw Dios xuyeew chaloq i ruch'aab' kahoq, xan teleninik chik, xuyeew wo' chaloq i ma' k'isa saqb'och chinaah i wach ak'al, eh xa saqrajik chik chupaam chu'nchel i tinamit Egipto.²⁴Re' i ma' k'isa saqb'och xantilik chik chaloq, eh xan teleninik chik i kahoq, eh yohb'aal wach i ruch'aab'. Eh ma' jank'al tanqajik i runimaal saqb'och je' rukab' i re' i kitoq'aam cho k'acharik i aj Egipto.²⁵Re' i runimaal saqb'och, xusachib'eej kiwach chu'nchel i xa chib'ih jariik wilkeeb' paruyuq'ul i Egipto. Wilik taqe i tinamit, wilik taqe i chikop xusach kiwach, xusach wo' kiwach i tik, xutoqib'eej taqe i q'ab' i chee' wilkeeb' paruyuq'ul i Egipto.²⁶Eh chupaam i ye'aab' Gosén, re' patim taqe wii' i aj Israel, chupaam i q'iij re' re' ma' jino'q chi naq'wach i saqb'och xqajik ar.

²⁷Eh re' i reey xutaq'aaj ruk'amariik i Moisés, i Aarón, je' wili xuq'or keh:
Re' hin wilik numahk ruch'ihil i nutinamiit, ma' re' tee Dios wilik ru mahk chi k'ahchi' qak'ulum i wili.²⁸Xti ma' k'isiin wo' chik i kahoq, i saqb'och k'ahchi' ruqajiik. Chapahqaaj taq reh i Dios chi nee rumay. Re' hin naa nuye'em q'ab' chi nee taq tiooj i hat, hat taq aj Israel, inki.

²⁹Eh re' i Moisés je' wili i xuq'or reh i reey:
Xa re' wach noq nee kinelik reje chupaam aatinamiit wili nee nujosaj johtoq i nuq'ab' chub'anariik i nutiij chuwach i QaJaaw Dios, neerumay i saqb'och, i kahoq, reh chi nee nawil chi re' chu'nchel i wilik wach ak'al re' QaJaaw Dios inehchanik reh.³⁰Re' hin weht'al atoob' ta k'ahchi' taq ak'ulum taqe re', xama' nayohleej ta wo' i Dios i hat, je' wo' taqe i kikamanik awuuk'.

³¹Re' taqe i lino atikim taq k'ahchi' naq chik rixmak'iniik, eh re' i sebada k'ahchi' naq chik ruq'anb'iik, xsacharik kiwach ruum i saqb'och.³²Eh re' trigo, i centeno ma' xsahchik ta kiwach nee wo' chik kitoxliniik chaloq ruum kokok' taq taqe, inki.

³³Eh re' i Moisés xelik chaloq ruuk' i reey, noq xelik cho chupaam i tinamit re' re' xujosaj johtoq i q'ab' chuwach i QaJaaw Dios chub'aan i rutiij. Xa chi jumehq'iil xumay i saqb'och, xumay i jab', je' wo' hoq i ma' k'isa kahoq.³⁴Noq xrilow i reey chi xumay i saqb'och i jab', je' wo' ma' k'isa kahoq, xub'an wo' chik i mahk. Xukowb'isaj wo' chik i ránima i reh, eh je' wo' taqe i kikamanik ruuk'.³⁵Eh re' i reey xukowb'isaj wo' chik i ránima, xama' xutaq'aaj ta wo' chaloq taqe i aj Israel, je' rukab' i xuq'or i QaJaaw Dios pampeet reh i Moisés. Re' ti' k'axik xkik'ul i aj Egipto ruum i ma' k'isa nimaq chili'l

¹Re' QaJaaw Dios je' wili i xuq'or reh i Moisés:
Yu'naak hiy wo' chik ruuk' i reey, re' i hin xnukowb'isaj i ránima i reh, je' wo' taqe i kikamanik ruuk', reh chi konaa nuk'uhtaam i nimaq wach i ma' ilooj taj chikiwach.²Reh chi re' hat naa ak'utjaam keh aawak'uun awixq'uun, aawiih aamaam chib'ih i xnub'an kuuk' i aj Egipto. Je' wo' hoq i ma' ilooj taj xnub'an kuuk', reh chi nee taq i nanaab'eej i hat chi re' hin i Dios, inki.

³Eh re' Moisés, i Aarón, xiooj wo' chik ruuk' i reey je' wili i xkiq'or reh:
Re' QaJaaw Dios, re' i ki Dios i aj hebreo je' wili i xuq'or chawiij: ¿Eh xti kojaruuj i ruloch' riib' chi nuwach reh chi nee ruyeew q'ab' keh i nutinamiit aj Israel chi nee kinooj kiloq'ej? inki.⁴Eh wila' ma' xuyeew q'ab' chi nee kiooj i nutinamiit, re' hin xa i iqal i nuyeew chaloq i nimaq taq chili'l chinaah i rutinamiit.⁵Korehtaal inkitz'ap wach chu'nchel aak'al, xama' naa ta chik ruk'utiniik k'isinoq i kuum. Eh naa rukuxiik kik'uxum i chib'ih taqe jariik xi kahnik noq xub'an i saqb'och, naa wo' rukuxiik kik'uxum chu'nchel i xaq i chee'.⁶Naa runujiik chupaam i rupaat i reh, chupaam i kipaat taqe i kikamanik ruuk', je' wo' chupaam i kipaat chu'nchel i aj Egipto. Re' re' ma' jank'al ta inkilow i rumaam rati't eh ma' jank'al ta wo' nilarik yu'naak, inki Dios, inki i Moisés.
Eh noq xukohlaaj cho ruq'orob'jiik i reey i Moisés, xelik cho chupaam i paat i rub'an wii' taaq'anik i reey.⁷Re' i kikamanik ruuk' i reey je' wili i xkiq'or reh:
Re' winaq wili ma' jaruuj naa rukanaam qajot'ariik. ¿Chib'ih reet noq ma' xataq'aaj taqe i tinamit re' re' chi neenooj kiloq'ej i ki Dios? ¿Mi ma' nakoj rehtaal re' i qatinamiit Egipto chi k'ahchi' chik rusahchiik wach? inki taqe reh.

⁸Eh re' i reey xutaq'aaj ruk'amariik i Moisés, i Aarón je' wili i xuq'or keh: Yu'naak neerub'an chi nee taq tiooj chi looq'jiik taq aaDios.
Xa re' la' peet taq naa aq'orom weh awach taqe i naa kojiik.

⁹Re' i Moisés je' wili i xuq'or:
Naaqojiik chi qunchelaal naa qak'amam taqe reje i qak'uun qixq'uun, taqe i mama' winaq taqe ati't ixoq. Naa wo' qak'amam taqe reje i qawakax, qatentzuun, ruum jinaj i runimaal ninq'iij loq'oomb'al reh i Dios naa rojiik qa'nam, inki.

¹⁰Re' i reey je' wili i xuq'or:
Ar ink'utinik chi xajot'b'al weh taq i na a'n. ¿Mi nakapaaj taq re' hat chi naa taq kaat rutob'eem aaDios wach b'eeh? Re' hin ma' nee ta nuyeew q'ab' chi nee taq i nak'am reje aha'lak'uun chawiij.¹¹Re' taqe i kok' ha'lak'un ma' naa ta taq ak'amam reje chawiij, xa re' taq i hat nimaq winaq naa taq awojiik chulooq'jiik aaDios ruum je' re' taq inawaaj, inki.
Eh re' reey xuq'or chi xikajik chaloq i Moisés ruch'ihil i Aarón chuwach.¹²Re' QaJaaw Dios je' wili i xuq'or reh i Moisés:
Chaq'eeb'aa' reje i aakarote chinaah i tinamit Egipto reh chi nee kiwuktik chaloq i ma' k'isa nimaq chili'l, reh chi neenkuxik kik'uxib'eem chu'nchel i xa chib'ih jariik koxikahnik noq xub'an i saqb'och.

¹³Eh re' i Moisés xuq'eb'aa' reje i rukarote chinaah i tinamit Egipto, re' QaJaaw Dios xuyeew chaloq i kowlaj teew parelb'aal q'iij xhupinik chinaah chu'nchel i tinamit Egipto. Xik'ik q'iij, xik'ik aq'ab', eh noq saq'ik chi junwaar, re' i kowlaj teew re' re' xuk'am chaloq i ma' k'isa nimaq chili'l.¹⁴Xinujik chupaam chu'nchel i tinamit Egipto, eh xti ma' k'isiin wo' chik kik'ihaal i nimaq chili'l re' re' ma' jank'al ta nilarik chi je' re', eh ma' naa ta wo' chik rilariik chi jumpech.¹⁵Re' taqe i nimaq taq chili'l re' re' xinujik chupaam i tinamit, xama' ink'utinik ta chik i wach ak'al kuum. Eh xkuxik kik'uxib'eem chu'nchel i xaq i ch'ahn i koxikahnik noq xub'an i saqb'och. Ma' xta chik i ch'ahn kahnik chi rax wach panab'iix, eh ma' jino'q i chee' xkahnik chi rax i xaq ar Egipto.

¹⁶Eh re' i reey xutaq'aaj ruk'amariik chi jumehq'iil i Moisés, i Aarón, je' wili i xuq'or keh:
Re' hin xinmahkunik chuwach taq aaDios, chawach taq i hat.¹⁷Xa re' la' i nupahqaaj taq otob'il aweh chi ach ta naq re' yu'naak taq neenakuy numahk, cha pahqaaj taq reh aaDios chi chesaj chi nunaah i ma' k'isa nimaq chili'l wili k'ahchi' rik'sanik weh chi ti', inki.

¹⁸Eh re' i Moisés xa re' wach xelik cho chuwach i reey xub'an rutiij chuwach i QaJaaw Dios.¹⁹Chalik i QaJaaw Dios xusutej i kowlaj teew ar chik xuk'am reje parookb'aal q'iij, eh re' re' xk'amwik reje keh i nimaq chili'l xukutib'eej chupaam i kaq palaw, ma' jino'q chik i xi kahnik chupaam i ruyuq'ul i Egipto.²⁰Re' QaJaaw Dios xukowb'isaj wo' chik i ránima i reey reh chi ma' xutaq'aaj ta taqe i aj Israel. Re' ti' k'axik xkik'ul i aj Egipto noq xub'an i runimaal q'equm

²¹Re' QaJaaw Dios je' wili i xuq'or reh i Moisés:
Chajosaj johtoq aq'ab' pan taxaaj reh chi neenchalik i runimaal q'equm chinaah chu'nchel i rutinamitaal i Egipto, naakilom chixiik'naah q'equmaal, inki.

²²Eh re' i Moisés xujosaj wo' johtoq i q'ab' pan taxaaj xchalik wo' runimaal q'equm chinaah chu'nchel i rutinamitaal i Egipto.²³Re' re' ixib' q'iij xub'an chinaah i wach ak'al, eh xama' nkilow ta chik i kika'jaah, xama' kik'uyu'jik ta chik pan kiye'aab'. Eh chupaam i ye'aab' wilkeeb' wii' taqe i aj Israel ma' xq'equmrik taj.

²⁴Xrilow chi je' re' i reey xutaq'aaj ruk'amariik i Moisés je' wili i xuq'or reh:
Neerub'an chi nee taq tiooj chulooq'jiik aaDios chak'am taq reje chawiij aawak'uun, awixq'uun. Eh re' taq atentzuun, taq awakaax naa taq akanaam ayu', inki.

²⁵Re' i Moisés je' wili i xuq'or:
Ra'j xti ma' nee ta rub'an re'. Re' la' hat naa aye'wiik q'ab' chi naa qak'amam taqe i qachikoop reh chi neenooj qak'at i qamayiij chi loq'oomb'al reh i QaJaaw i qaDios.²⁶Ajwaal la' wach chi naa qak'amam reje i qachikoop, ma' jino'q i naa qakanaam ayu'. Ruum konaa qasik'im wach chi kixilak inaaqak'atam chi qamayiij chuwach i QaJaaw Dios. Ruum komajaa' qoh ponik ar majaa' ta qeht'al chib'ih i naa qajwaam wach chi loq'oomb'al reh i QaJaaw.

²⁷Re' QaJaaw Dios xukowb'isaj wo' chik i ránima i reey xama' xutaq'aaj ta wo' taqe chaloq i aj Israel.²⁸Eh re' i reey je' wili i xuq'or reh i Moisés:
Eleen chi nuwach, manchalik chik ak'uhtaaj awiib' weh. Ruum wi xatchalik wo' chik naa akimiik, inki reh.

²⁹Re' i Moisés je' wili i xuq'or:
Ma' xta reet i xaq'or ma' naa ta chik ruk'uliik nuk'uhtaam wiib' aweh chi jumpech, inki. Re' ruq'orariik rib'iral i kikimiik taqe i peet kak'uun aj Egipto

¹Re' QaJaaw Dios je' wili i xuq'or reh i Moisés:
Re' hin ko jinaj chik i ti' k'axik naa nuk'amam cho chinaah i reey, chinaah i tinamit Egipto. Eh noq ruk'ulum chik i re' i reey xa paruk'ux chik i reh naa ruchaliik chi naa taq kaat rukaham reje ayu' chi jumpech.²Yu'naak taq i hat cha q'or taq keh i aj Israel chi ki-ohoq kuuk' i aj Egipto patim chi kika'jaah, eh chi winaq chi ixoq nenooj kipahqaaj i xa chib'ih jariik re' ruuk' i oro i plata, inki.

³Eh re' QaJaaw Dios xuch'ub'isaj cho wach i kik'ux i aj Egipto, reh chi xkik'am kiib' pansuqkiil kuuk' i aj Israel. Re' i kikamanik ruuk' i reey xkiyeew runimaal wach i Moisés, eh xye'arik wo' runimaal wach kuum taqe i aj Egipto.

⁴Re' i Moisés je' wili i xuq'or reh i reey:
Re' QaJaaw Dios je' wili i xuq'or chaloq: Re' hin yejal aq'ab' naawik'iik chinaah chu'nchel i tinamit Egipto.⁵Eh naa kikimiik i peet kak'uun pankipaat i aj Egipto, ruuk' i peet rak'uun i reey naa rutohq'iik reje re' i wilik rajaawriik chi taaq'anik, naa wo' kikimiik i peet kak'uun chu'nchel taqe i ixoq aj poh kikamanik pan keeb'al. Naa wo' kikimiik i peet kak'uun taqe chikop.⁶Chu'nchel i aj Egipto naa koq'iim, ma' jank'al q'iij imb'aan, chi je' re', eh ma' naa ta wo' chik rub'aan chi jumpech.⁷Reh chi nee taq i nanaab'eej i hat chi re' hin i Dios q'e' nuk'ax i tinamit Israel chikiwach i aj Egipto, re' taqe i aj Israel ma' xta naakik'ulum, ni xata naq tz'i' i naa rutiwiik kekeh, eh je' wo' chu'nchel i kichikoop, inki Dios, inki.⁸Eh je' wili i xuq'or: Re' taqe i kikamanik awuuk' naa ruchaliik kixuk'aam kiib' chi nuwach, je' wili i naa kiq'orom weh: Yu'naak hiy i hat chak'am taqe reje chu'nchel i aj Israel i nak'am kib'eeh inko'q taqe. Chi riij i re' kora'j naa wojiik re'.
Eh ma' k'isiin i ruk'aah i Moisés noq xelik cho chuwach i reey.⁹Eh re' QaJaaw Dios je' wili i xuq'or reh i Moisés:
Re' i reey xama' naa ta wo' runimam taq aweh i naa aq'orom. Chi je' re' ko ma' k'isiin taqe i ma' ilooj taj naa nub'anam chikiwach chu'nchel i aj Egipto, inki.

¹⁰Eh re' i Moisés, i Aarón xkian chu'nchel i nimaq wach nawaal re' re' chuwach i reey. Re' i QaJaaw Dios xukowb'isaj wo' chik i ránima i reey xama' xutaq'aaj ta wo' taqe chaloq i aj Israel, wilkeeb' ar Egipto. Re' noq xtohq'ik chaloq i runinq'ijiik i elik chaloq Egipto

¹Re' QaJaaw Dios xuq'oreej i Moisés, i Aarón noq wilkeeb' ar Egipto, je' wili i xuq'or keh:

²Re' poh wili taq chaaweh i hat q'e' nim wach re' i peet poh reh i haab'.³Eh cha q'or taq keh i aj Israel chi chupaam i lajeeb' rub'eeh i poh wili cha ju'junaal taq i hat naa taq ak'amam chaloq ju'jun-oq atentzuun oon ju'jun-oq aakapraax reh i ju'jun chi paat.⁴Eh wila' xama' k'ih taqe i wilkeeb' pampaat, wila' xkikoj rehtaal chi ma' nee tankitzap wach i rutib'kaal i chikop neerub'an chi neenkiyuq'eej i ki ka'jaah kuuk', reh chi pankomonil neenkitz'ap wach i rutib'kaal i chikop. Neenkipuhkaaj chikiwach re' q'oreel nik' k'ihaal i neeruk'ux i ju'jun chi kiristianu'.⁵Eh re' taqe i chikop naa taq aye'em chi amayiij imas eh manlik ju'jun haab' i wilik keh, manlik wach i ruti'jolal, eh neerub'an chi tentzun oon kaprax.⁶Eh naa taq awuy-eem kopan kajlaj rub'eeh poh wili naa taq akansam chi amayiij. Xti manlik k'ahchi' rokiik i moyik, chawunchelaal taq i hat aj Israel, naa taq akansam taqe i chikop re' re'.⁷Re' i kikik'eel i chikop naa taq ach'ulem chi junsuut i choplik wii' ru puertahiil i paat naa taq ak'uxum wii' i kitib'kaal i chikop re' re'.⁸Eh chupaam aq'ab' re' re', naa taq ak'uxum i tiwik re' re', chi b'ahooj taq naa a'nam, junk'uxariik taq naa a'nam ruuk' k'ah laj i chaaj, je' wo' hoq i kaxlanwi'k ma' kojooj ta ch'amb'esb'al reh.⁹Ma' naa ta taq ak'uxum chi rax, ni xata naa ruchaq'iik ruuk' ha', manlik kiwach noq naa taq ab'aham, ma' naa ta taq awesam i kinaah, i kooq, i kiq'ab', i keq'saa' noq naa taq ab'aham.¹⁰Eh ma' naa ta taq akanaam i ruqox reh chi junwaar, eh wila' xqohxanik k'isinoq nee taq inak'at.¹¹Noq akojom taq chik aso' axijab' cha wooq, eh wilik chik taq aakarote panaq'ab', nee taq inak'ux chi jumehq'iil i kitib'kaal taqe i chikop re' re'. Ruum re' re' ru ninq'iij i QaJaaw Dios.¹²Eh chupaam i yejal aq'ab' re' re', naawik'iik i hin chinaah chu'nchel i tinamit Egipto naa rik'iik nukansam chu'nchel i peet kak'uun i aj Egipto, je' wo' chu'nchel i peet rak'uun i kichikoop. Naa nuye'em taqe chi tojariik i kimahk chu'nchel inkikoj chi ki dios i aj Egipto. Re' hin i Dios, hin xinq'orik.

¹³Re' i kik' naa rukamaniik taq aweh chi k'uhtb'al reh i paat wilkaat taq wii', chi je' re' noq naa rik'iik nukansam taqe i peet kak'uun i aj Egipto, ma' jino'q taq aweh i hat naa rukimiik. Ruum noq naawilom i kik' taq wach aapuerta xa q'e' naawik'iik.¹⁴Re' q'iij re' re' ma' naa ta rusahchiik taq panak'ux i hat, rajlaal rub'eeh i peet poh reh i ju'jun chi haab' nee taq i na a'n jino'q i nimlaj ninq'iij chi loq'oomb'al weh i hin. Re' wili naa rukahniik chi jinaj k'uhb'aal cha naah taq i hat, chikinaah taqe aawiih aamaam.¹⁵Eh wuquub' q'iij taq naa ak'uxum i kaxlanwi'k ma' kojooj ta ch'amb'esb'al reh, chupaam i peet q'iij re' re' ma' naa ta taq chik atz'a'am panapaat, i ch'amb'esb'al kaxlanwi'k. Eh xa awach pa' i neeruk'ux i kaxlanwi'k kojooj ch'amb'esb'al reh, chuwach i wuquub' q'iij i ruk'ul chi neenehteesjik taq reje chaxilak taq i hat, aj Israel.¹⁶Je' re' noq re' peet q'iij ruch'ihil i ruwuuq q'iij naa taq amolom awiib' reh i santo laj nulooq'jiik i hin, hin Dios, eh chupaam i ki'ib' chi q'iij re' re', ma' awach taj i naa rukamaniik. Xa re' la' i ye'janik kiwa', naa kianam i tinamit.¹⁷Re' ninq'iij noq naa taq ak'uxum wii' i kaxlanwi'k ma' kojooj ta ch'amb'esb'al reh, xa jinaj wo' q'iij naa taq aninq'ijeem, ruum chupaam i q'iij re' re' xat wesaj taq chaloq parutinamiit i Egipto. Eh naa taq rukahniik chi jinaj k'uhb'aal taq cha naah, naa taq aninq'ijeem i hat, je' wo' taqe awiih aamaam.¹⁸Eh naa taq rutohq'iik ak'uxum i kaxlanwi'k ma' kojooj ta ch'amb'esb'al reh, chupaam i ruxq'eqiil reh i kajlaj rub'eeh i peet poh reh i haab', eh kore' chik i pan ruxq'eqiil reh i jinaj ru ka'winaq rub'eeh i poh taq i namay ruk'uxariik.¹⁹Re' taq i hat chuwach i wuquub' q'iij re' re' ma' naa ta taq ruwihiik panapaat i ch'amb'eesb'al kaxlanwi'k. Ruum xa awach pa' i neeruk'ux i kaxlanwi'k kojooj ch'amb'eesb'al reh chupaam i q'iij re' re', naa rehtesjiik chaxilak taq i hat aj Israel atoob' ta aatinamiit taq, atoob' ta tokoom tinamit.²⁰Ma' awach ta naa ruk'uxwiik reh i kaxlanwi'k kojooj ch'amb'esb'al reh. Eh panapaat taq xa re' i kaxlanwi'k ma' kojooj ta ch'amb'esb'al reh naa taq ak'uxum, ki uchjik ruum i QaJaaw Dios.

²¹Eh re' i Moisés xuyuq'eej taqe ruuk' i k'amal kib'eeh i aj Israel, je' wili i xuq'or keh: Chasik' taq chaloq i tentzun, i kaprax nee taq inakansaj chi amayiij. Eh nee taq inak'ux kuuk' aawak'uun awixq'uun reh i runinq'ijiik taq aweliik cho Egipto.²²Re' i kikik'eel i chikop re' re' nee taq inak'ul pan johm. Eh nee taq inasik' jumb'ohr oq i xaq hisopo, nee taq i namuhaa' pankik' nee taq i nach'ulej chi junsuut inchopinik reh ru puertahiil taq aapaat. Eh naa taq atz'apam awiib' panapaat ma' jino'q i nareliik rij paat ne'eel chaq'ab' noq komajaa' insaq'ik.²³Eh noq nenik'ik i QaJaaw Dios chi kikanteesjiik i peet kak'uun i aj Egipto, noq neerilow i kik' chuwach i rujunsuut i chopb'al reh taq aapuerta xa q'e' nenik'ik chinaah taq aapaat. Eh ma' nee ta ruyeew q'ab' chi neenokik i aj kaansoom taq panapaat.²⁴Eh re' wili inchol taq animam i hat naa taq rukahniik cha naah chi jinaj k'uhb'aal, je' wo' chikinaah taq awiih aamaam, eh reh chi juneliik.²⁵Eh noq hat taq chik okinaq chupaam i ye'aab' ruq'orom taq aweh i QaJaaw Dios chi naa taq ruye'em aweh naa wo' taq a'nam ar ninq'iij wili.²⁶Eh noq kipahqaaj taq aweh aawiih aamaam, chi je' wili: ¿chib'ih kamaj i loq'inik taq i na a'n? inko'q taqe.²⁷Eh je' wili i kichaq'weesjiik taq naa a'nam: Re' taqe i chikop wili inqayeew chi mayiij chi loq'oomb'al reh i QaJaaw Dios reh i runinq'ijiik i elik chaloq Egipto, noq xa q'e' xik'ik i aj kaansoom chinaah i qapaat i hoj xuko'leej taqe i peet qak'uun. Re' noq xikanteesjik i peet kak'uun i aj Egipto, tiko'q taq keh, inki.
Eh re' taqe i aj Israel xkixuk'aa' kiib' chi looq'jiik i QaJaaw Dios.²⁸Re' taqe i aj Israel jumehq'iil xooj kian i xuq'or i QaJaaw Dios reh i Moisés, reh i Aarón. Re' noq xikimik i peet kak'uun i aj Egipto

²⁹Eh chupaam i yejal aq'ab' re' re' xik'ik i QaJaaw Dios chi kikantesjiik i peet kak'uun pankipaat chu'nchel i aj Egipto, xkimik wo' hoq i peet rak'uun i reey, re' wilik rajaawriik chi taaq'anik, xikimik wo' hoq i peet kak'uun i wilkeeb' pantz'ilom, je' wo' chu'nchel i peet kak'uun taqe i chikop.³⁰Eh chupaam aq'ab' re' re' xwuktik i reey, je' wo' taqe i kikamanik ruuk', eh xi wuktik wo' chu'nchel i aj Egipto. Eh xkik'ereb'eej kichii' chi oq'ik chi kunchelaal, ruum ma' jino'q chik i paat xkahnik chi ma' xta kamnaq chupaam.³¹Re' reey xa chupaam wo' aq'ab' re' re' xutaq'aaj ruk'amariik i Moisés i Aarón, je' wili i xuq'or keh:
Yu'naak hiy taq eleen taq reje chi kixilak i nutinamiit, i hat taq, aj Israel, hiy taq chulooq'jiik aaDios je' rukab' i xaq'or taq weh.³²Chak'am taq reje atentzuun, taqe awakaax hiy taq, je' wo' rukab' i xawaaj taq cho pampeet, eh cha pahqaaj taq i rotob'il i Dios chi wiij i hin, inki.

³³Eh re' taqe i aj Egipto xkiq'or keh i aj Israel chi naa kinik'eem kiq'iij chi elik cho pan kitinamiit. Ruum xkikapaaj chi naa kikimiik chi kunchelaal.³⁴Eh re' taqe i aj Israel xkesaj chaloq i ruq'oril i kaxlanwi'k ma' kojooj ta ch'amb'esb'al reh. Eh jumehq'iil xkib'ot cho pan itz'ihy xkikut cho nah kitileb' noq xi chalik.³⁵Eh xkian wo' hoq i xq'orarik keh ruum i Moisés xkipahqaaj wo' keh i aj Egipto xa chib'ih jariik oro, plata korjinaq wii' je' wo' taqe i holohaq itz'ihy inkojarik.³⁶Re' QaJaaw Dios xuch'ub'isaj i kánima i aj Egipto chi xkiyeew chib'ih jariik i xkipahqaaj i aj Israel. Je' re' noq xq'ucharik i chib'ih keh i aj Egipto. Re' noq xi elik chaloq i aj Israel ar Egipto

³⁷Eh re' taqe i aj Israel xi elik cho chupaam i ye'aab' Ramesés. Xiooj chi kooq chupaam i ye'aab' Sucot, wilkeeb' naa waqiib'-oq siento miil chi winaq, eh ma' ajlamaj ta taqe haa' ixoq, ni xata re' taqe i ha'lak'un.³⁸Eh ma' k'isiin kik'ihaal i tinamit xchalik chikiij, wilik i xa reh reh wach kitinamitaal. Ma' k'isiin i tentzun, ma' k'isiin i wakax xkik'am cho chikiij.³⁹Re' taqe i aj Israel ma' xuyeew ta chik riib' chi xkiyejaa' kik'uxb'aal, ruum chi xa chi jumehq'iil xi ehteesjik cho kuum i aj Egipto. Xa ruuk' chik ruq'oril kaxlanwi'k ma' kojooj ta ch'amb'esb'al reh xkesaj cho Egipto xkiyejaa' kikaxlanwi'k xkik'ux.

⁴⁰Eh re' taqe i aj Israel kijib' siento ruuk' lajeeb' ru ka'winaq haab' xi k'acharik chaloq paruyuq'ul i Egipto.⁴¹Eh noq xkikohlaaj i kijib' siento ruuk' lajeeb' ru ka'winaq haab' i kiwihiik ar Egipto Israel re' rutinamiit i QaJaaw Dios xi elik wo' chik chaloq chupaam i tinamit re' re'.⁴²Eh chupaam aq'ab' re' re', re' i QaJaaw Dios xusik' chi riij nik' wach noq xresaj taqe chaloq i aj Israel ar Egipto. Re' aq'ab' re' re', xusik' wach i QaJaaw Dios, ajwaal wach chi naa kiye'em ruloq'il aq'ab' re' re' chu'nchel i k'achareel jar ch'iht i naakik'iik.

⁴³Re' QaJaaw Dios je' wili i xuq'or reh i Moisés, i Aarón:
Re' i wili i k'uhb'aal xkahnik reh i runinq'ijiik i elik chaloq Egipto, re' i chikop naa ruye'ariik chi mayiij ma' jino'q i tokoom tinamit naa ruk'uxwiik reh.⁴⁴Eh re' i kamanoom xaloq'ooj neerub'an chi neeruk'ux reh i rutib'kaal i chikop re' re', xa re' la' mipoch'ooj i naah i ruk'achab' pampeet.⁴⁵Eh ma' jino'q tokoom tinamit, ma' jino'q xa sik'ij rutumiin i rub'an ar, naa ruk'uxwiik reh i chikop xye'arik chi mayiij.⁴⁶Eh xa chupaam i jinaj chi paat naa ruk'uxariik, eh ma' naa ta reliik chaloq i tiwik chi riij i paat. Eh ma' naa ta rupaxjiik i rub'aqil i chikop re' re'.⁴⁷Re' wili chu'nchel i aj Israel naa kib'aniik reh.⁴⁸Eh wila' wilik taq chaxilak jino'q i tokoom tinamit iraaj okik haa' chub'aan i ninq'iij re' re', koruman chi peet naa rupoch'ariik naah i ruk'achab', eh nee wo' inkahnik chi je' taq aatinamiit i hat taq aj Israel, ruum ma' jino'q i ma' poch'ooj ta naah i ruk'achab' neenk'uxwik reh i chikop inye'arik chi mayiij.⁴⁹Re' wili i k'uhb'aal wilik chikinaah i aasjinaq taqe ar Israel, je' wo' chikinaah taqe i tokoom tinamit wilkeeb' taq chaxilak, inki Dios.

⁵⁰Eh chu'nchel i xuq'or i QaJaaw Dios reh i Moisés reh i Aarón, i xkian wo' chi kunchelaal taqe i aj Israel.⁵¹Eh re' QaJaaw Dios xa chupaam wo' q'iij re' re' xresaj taqe chaloq chu'nchel i aj Israel parutinamitaal i Egipto.

¹Eh re' QaJaaw Dios je' wili i xuq'or reh i Moisés:²Re' hat naa aq'asam panuq'ab' chu'nchel i peet kak'uun i aj Israel, je' wo' chu'nchel i peet kak'uun chikop. Ruum re' taqe re' weh hin taqe, inki.

³Re' i Moisés je' wili i xuq'or keh i tinamit: Re' q'iij wili rajlaal haab' taq naa aninq'ijeem, ruum chupaam i q'iij wili xat resaj taq reje i QaJaaw Dios ruuk' i rajaawriik ar i Egipto, i hat naq taq minooj wii' pankowlaj kamanik. Eh chupaam i q'iij re' re' ma' naa ta taq ak'uxum i kaxlanwi'k kojooj ch'amb'esb'al reh.⁴Re' taq i hat ixib' poh ruk'amam rub'eeh i haab', noq xat elik taq reje Egipto.⁵Eh chupaam i poh wili naa taq a'nam aninq'iij rajlaal haab' chi loq'oomb'al reh i QaJaaw Dios noq hat-oq chik ruk'amam reje chupaam i ye'aab' wilkeeb' wii' i suq atoob'. Ar chupaam i kiye'aab' i aj cananeo, i aj heteo, i aj amorreo, i aj heveo, i aj jebuseo, re' i ye'aab' q'orooj cho rib'iral keh taq aamaam awati't chi naa taq ruye'em aweh i hat.⁶Eh wuquub' q'iij taq naa ak'uxum i kaxlanwi'k ma' kojooj ta ch'amb'esb'al reh, eh paruwuuq q'iij naa taq a'nam i nimlaj ninq'iij chi loq'oomb'al reh i QaJaaw Dios.⁷Eh i wuquub' q'iij naa ruk'uxariik i kaxlanwi'k ma' kojooj ta ch'amb'esb'al reh ma' awach ta naa rutz'a'iniik reh taq panatinamiit i ch'amb'esb'al kaxlanwi'k. Eh ma' awach ta naa ruk'uxwiik reh i kaxlanwi'k kojooj ch'amb'esb'al reh.⁸Eh chupaam i q'iij re' re', je' taq wili i naa aq'orom keh aawak'uun awixq'uun: Re' i ninq'iij wili inqa'an ruum je' yu' q'iij xoj resaj chaloq i QaJaaw Dios ar Egipto.⁹Eh ruuk' i ninq'iij taq naa a'nam naa rukahniik chi je' taq rehtalil yejal awach, oon chi aq'ab'. Ruuk' i re' naa taq ruk'uliik panak'ux chi naa taq aq'orom i ruk'uhb'aal i QaJaaw Dios, ruum re' reh x-esanik taq chaaweh ruuk' i rajaawriik ar i Egipto.¹⁰Ruum aj re' koruman chi naa taq a'nam i loq'inik wili rajlaal haab' chupaam i q'iij ruq'orom chaloq i QaJaaw Dios.

¹¹Eh noq hat taq chik ruk'amam reje chupaam i tinamit re' re' i QaJaaw Dios re' i kitinamitaal i aj cananeo. Re' na' chuq'asaj taq aweh i tinamit i QaJaaw Dios je' wo' rukab' i ruq'orom chaaweh taq i hat.¹²Re' taq i hat naa taq aq'asam pan q'ab' i QaJaaw Dios chu'nchel taq i peet aawak'uun, chu'nchel i peet kak'uun taq aachikoop, re' imas taq naa aye'em reh. Ruum chu'nchel i re' reh i QaJaaw Dios.¹³Eh re' i peet rak'uun i ati't b'uurux, rak'uun tentzun i naa aye'em taq chi jilow. Raaj wila' ma' xayeew i rak'uun tentzun chi jilow, nee taq inak'er i paralaq noq nee nakansaj i rak'uun b'uurux re' re', eh re' taq i hat xanaa wo' aye'em amayiij chikiij taq i peet aawak'uun.¹⁴Wixkipahqaaj taq aweh awiih aamaam koq'uun chi je' wili: ¿Chib'ih reet noq i nayeew taq i chikop chi amayiij? inko'q taqe, je' wili taq i neenaq'or keh: Re' hoj je' wili inqa'an ruum je' yu' q'iij xoj resaj chaloq ar Egipto i QaJaaw Dios ruuk' i rajaawriik, re' naq hoj minooj wii' pankowlaj kamanik.¹⁵Re' noq re' i reey xukowb'isaj i ránima ma' raaj taj chi xoj elik chaloq Egipto, eh re' i QaJaaw Dios xukansaj i peet kak'uun taqe i aj Egipto, i peet rak'uun i kichikoop. Eh ruum chi ma' xukansaj taj i peet qak'uun i QaJaaw Dios i hoj aj Israel, re' peet kak'uun taqe i qachikoop, re' imas inqayeew reh chi qamayiij. Eh inqayeew jinaj i mayiij chi jilow i peet qak'uun.¹⁶Re' loq'inik wili je' na naa rukahniik taq rehtalil yejal awach oon chi aq'ab', reh chi naa taq ruk'uliik panak'ux chi re' i QaJaaw Dios ruuk' i rajaawriik xat resaj taq chaloq Egipto, inki i Moisés. Re' noq xib'ehteesjik chaloq i aj Israel ruuk' suutz', eh ruuk' q'aaq'

¹⁷Eh noq xuyeew q'ab' i reey chi xi elik chaloq i aj Israel ar Egipto, re' b'eeh i nik'ik pan kitinamiit i aj filisteo ma' najta naq paam. Re' i QaJaaw Dios ma' xuk'am ta taqe reje ar ruum je' wili i xukapaaj, nee oq inkitoq'aa' peleto i aj filisteo kuuk' i aj Israel, nee-oq inyoj kik'ux maa kisutinik wo' chik reje Egipto, inki.¹⁸Ruum aj re', re' QaJaaw Dios xukotej riij i b'eeh re' re', kopan chiq yuuq' chik xuk'am taqe reje, re' b'eeh inooj k'oloq chi chii' i kaq palaw.
Eh re' taqe i aj Israel noq xi elik chaloq Egipto xakilok'ik chik xiik' nah kik'ihaal.¹⁹Eh noq xi elik chaloq, re' i Moisés xuk'am cho chi riij i rub'aqil i José. Ruum re' i José je' wili i ruq'orom cho keh taqe i rak'uun rixq'uun: Xti korik noq re' Dios naa taq kaat ruk'uliik resam ayu', eh na' chureq i q'iij re' re' naa taq ak'amam reje chawiij i nub'aqil, inki.

²⁰Re' taqe i aj Israel noq xi elik chaloq Sucot, ar chik xiooj Etam, re' wilik panookb'al reh i ye'aab' chiq yuuq'.²¹Re' taqe i aj Israel xib'ehik chaloq chi q'iij chi aq'ab', noq xib'ehik cho pan q'iij re' QaJaaw Dios jun mama' rahp chi suutz' pan taxaaj i ruk'am wii' kib'eeh. Eh noq xib'ehik chaloq chaq'ab' q'aaq' insihq'inik cho reh i kib'eeh.²²Eh re' i jun mama' rahp chi suutz' wilik pan taxaaj, eliik peet chikiwach noq xib'ehik cho pan q'iij, eh re' i jun mama' rahp chi q'aaq' eliik peet chikiwach noq xib'ehik chaloq chaq'ab'. Re' noq xi-ik'ik i aj Israel chupaam kaq palaw

¹Re' QaJaaw Dios je' wili i xuq'or reh i Moisés:

²Chaq'or keh i aj Israel chi tokoom chik i kib'eeh kik'am reje kochi juntar i ye'aab' Pi-hahirot panyejaal i ye'aab' Migdol ruuk' i palaw. Eh panyejaal i ye'aab' Baal-zefón neenkiyejaa' i ki-itz'ihy naah paat ar ma' najt ta i koq chi chii' i kaq palaw.³Eh re' reey je' wili i nee ruq'or: Re' taqe aj Israel ma' inkireq ta chik chi riij aha' naa kojiik xisahchik chupaam i ye'aab' chiq yuuq' inko'q.⁴Re' hin naa nukowb'isam i ránima i reey reh chi nee taq inooj cha suutjiik chi je' re' neenuk'uhtaaj reh chi wilik wajaawriik. Eh chu'nchel i ru soldado je' wo' taqe chu'nchel i aj Egipto neenkinab'eej chi re' hin i Dios nim wajaawriik, inki.
Eh re' i xq'orarik keh i aj Israel xkian wo' hoq.

⁵Eh re' i reey ar Egipto noq xrib'iraj chi xi elik i aj Israel. Re' reey ruch'ihil taqe i kikamanik ruuk' xchalik rutib'iik kik'ux chikiij i aj Israel, je' wili i xkiq'or chikiwach: ¿Chib'ih reet noq qayeew q'ab' keh i aj Israel chi xiooj, eh kikanaa' nche kahnoq i qakamaj? inki taqe.

⁶Chi riij i re', re' i reey xutaq'aaj ruq'orariik chi naa kiyejaam taqe i kikareta reh q'aq'inik eh xuk'am taqe chaloq i ru soldado.⁷Eh waqiib' siento i rukareta xuk'am chaloq, re' xti q'e' holohaq, eh xuk'am wo' taqe chaloq chu'nchel i kareta wilkeeb' pan tinamit Egipto, ar xijohtik chaloq i kajaaw soldado.⁸Eh re' QaJaaw Dios xukowb'isaj chaloq i ránima i reey, reh chi xooj naq rusutej taqe i aj Israel wach b'eeh, atoob' ta wo' elenaq naq chik taqe chaloq ar Egipto ruuk' i rajaawriik i Dios.

⁹Re' taqe i aj Egipto xchalik naq kisutej i aj Israel, xkik'am chaloq i ki soldado, i kikareta reh q'aq'inik, ma' k'isiin i xi chalik rij kawáyu. Manlik xk'ulik kireq chi chii' i palaw ma' najt ta ruuk' i ye'aab' Pi-hahirot chuwach reje i ye'aab' Baal-zefón, re' i wilkeeb' wii' chi hi'lik i aj Israel.¹⁰Eh noq xkilow i aj Israel chi xk'uloq i reey ruch'ihil taqe i aj Egipto, ma' k'isiin ta xchalik kiyo'jiik, xkipahqaaj ree i Dios chi naakitoob'jiik.¹¹Re' taqe i aj Israel je' wili i xkiq'or reh i Moisés:
¿Mi ma' xub'an wo' naq re' chi ar xoj muhqik Egipto? ¿Chib'ih reet noq xoj awesaj cho ar, eh xoj ak'am cha yu' chupaam i ye'aab' chiq yuuq' xa reh chi naaqakimiik? ¿Chib'ih reet ixa a'n qeh chi je' wili?¹²Ar Egipto je' wili i xqaq'or aweh: Qoh akanaa' ayu' qa'an wo' peet i kikamaj i aj Egipto, qohki. Ruum ma' xta reet chi xqa'an naq kowlaj kikamaj i keh chuwach chi naaqakimiik chupaam i chiq yuuq' ayu', inki taqe.

¹³Eh re' i Moisés je' wili i xuq'or keh i aj Israel:
Matyo'jik taq maa rub'an taq kiib' ak'ux, chawilow taq chib'ih jariik i naa rub'anam i Dios taq chako'ljiik. Re' taqe i aj Egipto k'ahchi' taq awilom kiwach yu'naak, ma' naa ta taq chik awilom kiwach chi jumpech¹⁴Re' taq i hat matqajik taq kapeew chi riij i re', ruum re' i QaJaaw Dios naa rub'aniik peleto taq chawiij kuuk' i aj ixowaal re' re', inki.

¹⁵Re' QaJaaw Dios je' wili i xuq'or reh i Moisés:
¿Chib'ih reet noq kok'ahchi' apahqaam chi naa kaat nutoob'eem? Chaq'or keh i tinamit chi nee kiooj chikiwach.¹⁶Eh neenaq'eb'aa' reje aakarote chinaah i kaq palaw, reh chi nee ruch'aq riib', eh panchiqiij nee ki-ik'ik chu'nchel i aj Israel.¹⁷Re' hin naa nukowb'isam i kánima chu'nchel i aj Egipto reh chi naa ruchaliik kianam taq aweh chi je' re' neenuk'uhtaaj i wajaawriik chinaah i reey. Je' wo' chikinaah chu'nchel i ru soldado, chi je' wilkeeb' pan kareta, chi je' wilkeeb' taqe rij kawáyu, naakilom i wajaawriik.¹⁸Eh noq nuk'uhtaam-oq chik i wajaawriik chinaah i reey, chinaah taqe i ru soldado wilkeeb' pan kareta, i wilkeeb' rij kawáyu. Ruuk' i re', re' taqe i aj Egipto naa kinab'eem chi re' hin i Dios nim wajaawriik.

¹⁹Chupaam i jumehq' re' re', re' ruánjel i QaJaaw Dios peet chikiwach i aj Israel, xujal ruye'aab' chikiij chik xooj, je' wo' hoq i suutz' peet naq chikiwach chikiij chik xooj.²⁰Re' suutz' re' re', xkahnik panyejaal kuuk' i ki soldado i aj Egipto kuuk' aj Israel. Re' taqe i aj Egipto q'equm paam suutz' i xuyeew cho riib' chikinaah, re' taqe i aj Israel keh xsihq'iljik chaloq i kib'eeh ruum q'aaq', je' aj re' noq ma' jaruuj chik xikan wach b'eeh kuum i aj Egipto, chupaam aq'ab' re' re'.

²¹Eh re' i Moisés xuq'eb'aa' reje i rukarote chinaah i kaq palaw. Eh re' QaJaaw Dios xutaq'aaj chaloq jinaj i kowlaj teew parelb'aal q'iij, xik'ik aq'ab', ruuk' i re', re' QaJaaw Dios kiib' xresaj i kaq palaw, xuchiqsaj i panyejaal xa je' chik chiq ak'al xukanaa'.²²Je' re' noq re' taqe i aj Israel xti chiqiij i b'eeh ki-ik'ik wii' yejal i palaw, eh panyejaal i rub'ohl i palaw xi-ik'ik reje, k'ul xkahnik pankicheel.

²³Eh chu'nchel i wilkeeb' chi riij i kawáyu i rukoj chi reh q'aq'inik, je' wo' taqe i rukareta i reey, xi okik i koq chikiij taqe i aj Israel chub'anariik keh ko chi yejaal i palaw xi ponik.²⁴Noq xsaq'ik xrilow chaloq i QaJaaw Dios taqe i ki soldado i aj Egipto chupaam i q'aaq', eh chupaam suutz', eh xuyeew chaloq i ti' k'axik chikinaah, xama' xkireq ta chik chi riij chib'ih inki a'n²⁵Re' i QaJaaw Dios xuq'ilisaj taqe i kotokaq inb'ehik wii' i kikareta. Eh re' taqe i aj Egipto, je' wili i xkiq'or:
Yu'naak qoh eloq chikiwach i aj Israel ruum re' keh re' QaJaaw Dios k'ahchi' chi peleto quuk' chikiij i keh, inki taqe.

²⁶Eh re' QaJaaw Dios je' wili i xuq'or reh i Moisés:
Chaq'eeb'aa' reje aakarote chinaah i palaw reh chi neensutinik cho chikinaah i ru soldado i aj Egipto, chikinaah taqe i kikareta, chikinaah taqe i kikawayu, inki.

²⁷Re' Moisés xuq'eb'aa' wo' reje i rukarote chinaah i kaq palaw, eh noq xsaq'ik xuk'ul wo' chik riib' i palaw, xutoq'aa' wo' chik b'ehik. Eh noq xkimol chi elik i aj Egipto manlik xponik kik'ul i rub'ohl i palaw ar tz'aparik kinaah chi yejaal i palaw chi kunchelaal, ruum i QaJaaw Dios.²⁸Eh noq xuk'ul wo' chik riib' i palaw, xutz'ap kinaah i wilkeeb' pan kareta, i wilkeeb' chi riij i kawáyu, chu'nchel i soldado xi okik pan kaq palaw chub'anariik naq keh i aj Israel. Eh ma' jino'q i ru soldado i kireey aj Egipto xi kahnik chi k'achalkeeb'.²⁹Eh re' taqe i aj Israel keh chiqiij xib'ehik wii' chi yejaal i palaw, eh panyejaal i rub'ohl i ha' ki-ik'ik, k'ul xuyeew riib' pankicheel.

³⁰Chupaam i q'iij re' re', xuko'leej taqe i aj Israel i QaJaaw Dios pan kiq'ab' i aj Egipto. Re' taqe i aj Israel xkilow i kiti'jolal i aj Egipto chi kutulkeeb' chi chii' i palaw.³¹Eh noq xkilow i aj Israel chi re' i QaJaaw Dios ruuk' i rajaawriik, xukansaj taqe i aj Egipto, xkiloq'ej i Dios, eh xkiyeew kik'ux ruuk'. Xkinimaj wo' hoq i Moisés ruum re' reh raj kamanoom i Dios. Re' rutz'uuyjiik wach i Dios xub'an i Moisés, ruch'ihil i María

¹Chi riij i re', re' i Moisés, re' taqe i aj Israel xkitz'uyej i tz'uuy wili chi loq'oomb'al ree Dios, je' wili i xkiq'or:
Re' hoj naa qatz'uyem wach i Dios, ruum xti xelik korik ruuk' i xub'an, ruum xumuq'aa' kinaah pan palaw taqe i kawáyu, taqe wilkeeb' chikiij.²Re' hoj, re' QaJaaw Dios inqatz'uyej wach, re' inye'wik qajaawriik, re' ko'linik qeh. Re' re' reh i qaDios naa qaloq'em, eh re' wo' reh i ruDios chee qajaaw ruum aj re' naaqaye'em runimaal wach.³Re' QaJaaw Dios xti wilik rajaawriik chub'aan keh i aj ixowaal. Eh QaJaaw Dios rub'ihnaal.⁴Re' QaJaaw Dios xutz'ap kinaah pan kaq palaw i rukareta, i ru soldado i reey. Xumuq'aa' wo' kinaah ar i kow kiib' k'amal kib'eeh soldado.⁵Eh xti xiooj qohoq paruchamiil i kaq palaw, xa je' chik kiooj qohoq ab'aj, eh xtz'aparik kinaah ruum i ruchamiil i kaq palaw.⁶QaJaaw Dios, re' hat ruuk' i runimaal awajaawriik xasach kiwach i ki-ixowanik qawach.⁷Ruuk' awajaawriik xawesaj i runimaal kiwach i ki-ixowanik awach. Eh ruum aajosq'iil, xa re' yu' xasach kiwach je' rukab' noq ink'ahtik i chiq k'im.⁸Re' hat ruuk' aajosq'iil xa hupej i teew chinaah i kaq palaw, eh ki'ib' xelik, re' i rub'ohl i chaamlaj palaw k'ul xumol riib' chi ju'juntar i b'eeh xakorb'isaj chupaam.

⁹Eh re' taqe i aj ixowaal, je' naq wili i xkiq'or: Re' hoj naa rojiik taqe qareqem wach b'eeh eh korehtaal inqasach kiwach ruuk' i qaq'as laj ch'ihch'. Eh korehtaal inch'iklojik qak'ux, naa qach'aqam i naa qaq'uchum cho keh, inki taqe.¹⁰Eh noq xa hupej i teew chinaah i palaw xib'iq'arik ruum, eh xa je' chik rukab' noq inooj qohoq plomo, noq xiooj qohoq paruchamiil i palaw.¹¹QaJaaw Dios, re' hat ma' jino'q i dios chi je' rukab' i hat. Eh ma' awach ta chik i wilik ruSantohiil, i wilik rajaawriik chawach i hat. Xa re' wo' hat tib'anik taqe i chib'ih jariik xiik' naah holwochiil i sahchb'al k'uxliis.¹²Re' hat xak'uhtaaj awajaawriik chikinaah taqe i aj ixowaal ruum i re' xib'iq'arik ruum i ak'al.¹³Eh ruuk' aak'axb'al xak'am kib'eeh aatinamiit, xak'am taqe chupaam i santo laj ye'aab' aq'orom chi naa aye'em keh.¹⁴Re' taqe i tokoom tinamit naakib'arb'otiik ruum kiyo'jiik noq naa kib'iram rib'iral taqe i xa a'n Eh re' taqe i aj filisteo naa rutib'iik kik'ux i keh.¹⁵Eh re' taqe i k'amal kib'eeh i aj Edom, xasaq uxlaab' chik nee kikahnik. Re' taqe i ajaab'ees chikinaah i aj Moab naakib'arb'otiik ruum kiyo'jiik, eh naa rusahchiik kik'ux taqe i aj Canaán.¹⁶QaJaaw Dios chaloq ta naq kiyo'jiik chu'nchel i tinamit re' re', noq neenkib'iraj awajaawriik, nee ta kikahnik chi xama' kik'uyu'jik ta chik, xa je' chik taqe ab'aj ruum awajaawriik. Eh naawisam taqe aatinamiit chi kixilak, re' taqe i xako'leej chaloq.¹⁷QaJaaw Dios qoh ak'am chupaam asantolaj ye'aab' nah yuuq', re' ye'aab' asik'im wach qeh aha' naa qak'achariik wii', eh chi ar naa kaat qaloq'em.¹⁸QaJaaw Dios, re' i hat naa awihiik chi taaq'anik chi juneliik, inki taqe pankitz'uuy.

¹⁹Eh noq xi okik pan kaq palaw taqe i rukareta, taqe i rukawayu i rukoj chi q'aq'inik i reey, re' QaJaaw Dios xutz'ap kinaah pan palaw. Eh re' taqe i aj Israel chiqiij i b'eeh xi-ik'ik wii' panyejaal i palaw.

²⁰Eh re' jinaj ixoq María, ranaab' i Aarón xq'orik cho ruq'oral i Dios, xuchop chaloq i jinaj kotokik laj q'ooj chu'nchel ixoq xi tahqinik reje reh chi q'oojiik kikotokik q'ooj, eh xakipisk'anik chik pankooq ruum rusuqkiil kik'ux.²¹Eh noq re' reh k'ahchi' chi tz'uuy je' wili i xuq'or keh i ruk'uliil:
Chatz'uyej taq wach i QaJaaw Dios reh chi neenqayeew runimaal wach, re' i xelik korik noq xumuq'aa' kinaah pan palaw taqe i kawáyu, taqe i iqilkeeb' chikiij taqe i kawáyu, inki. Re' noq xkireq i k'ah laj ha' i aj Israel

²²Re' i Moisés xresaj taqe reje i aj Israel ruuk' i kaq palaw, najt chik xiooj, re' keh xiooj chupaam i ye'aab' chiq yuuq' Shur. Eh ixib' chik q'iij xib'ehik chupaam i ye'aab' chiq yuuq' ma' xkireq ta kihaa'.²³Eh noq xi ponik chupaam i ye'aab' Mara, jinaj i ha' xkireq ar xa re' la' ma' xkuk'ej ta wo' hoq ruum k'ah i ha' re' re'. Ruum aj re' Mara inkiq'or reh i ye'aab' re' re'.

²⁴Xkilow chi je' re' i aj Israel xkitoq'aa' i ma' holohik ta laj q'orik chi riij i Moisés, eh k'ul kipahqaaj chikiwach chi je' wili: ¿Aha' naa ruchaliik i ha' naa quk'em? inki taqe.²⁵Eh re' i Moisés xupahqaaj parutiij chi naa rutoob'jiik ruum i Dios, eh xk'uhtjik reh jinaj i chee' re' ruuk' i ki', xukut panha', eh re' ha' xkiib'ik. Ar xipajarik i aj Israel, eh wilik jinaj i k'uhb'aal xq'orarik keh reh chi naa kianam i holohik laj na'ojb'al.²⁶Eh je' wili i xuq'or i Moisés: Wila' xab'iraj, wila' xanimaj taq i nuq'or aweh. Re' QaJaaw Dios je' wili i ruq'or taq aweh: Wila'xa a'n taq imponik chi nuwach, wila'xa a'n taq chu'nchel i nuk'uhb'aal, wila'xa a'n taq i tinutaq'aaj wii'. Re' hin ma' nee ta i nuyeew taq cha naah jino'q keh i ti' k'axik re' ruuk' xnuyeew chikinaah i aj Egipto. Re' hin i Dios kin k'achrisanik taq aweh i hat, inki.

²⁷Eh xi ponik taqe i aj Israel chupaam i ye'aab' Elim, ar wilik i kab'laj chi raasb'al ha', eh lajeeb' ru kajwinaq iwal i kalaab' wilik ar. Ar xkiyejaa' i ki-itz'ihy naah paat ma' najt ta chi chii' taqe ha' re' re'. Re' Dios xuyeew chaloq i jinaj i k'uxumb'al maná rub'ihnaal

¹Eh chu'nchel i aj Israel, xi elik cho ar Elim ar chik xiooj k'oloq panye'aab' chiq yuuq' Sin. Re' i ye'aab' wilik panyejaal i Elim ruuk' i Sinaí. Noq xi ponik ar ho'lajuuj chik rub'eeh i rukab' poh reh i keliik cho Egipto.²Eh noq wilkeeb' chik pan chiq yuuq' i aj Israel, chi kunchelaal xkitoq'aa' ma' holohik ta laj q'orik chi riij i Moisés, i Aarón.³Je' wili i xq'orarik keh kuum i aj Israel:
Ma' xta naq reet chi xuyeew q'ab' i QaJaaw Dios chi xoj kimik cho ar Egipto. Ar suq wo' naq wilkooj xan qatzunaa' chik qiib' chinaah i ruxuniil tiwik, eh noq inqa'an qawa' korehtaal qoh nuujik. Eh re' taq i hat xoj ak'am taq chaloq chupaam i ye'aab' chik yuuq' xa reh chi naaqakimiik chi qunchelaal ruum qawa', inki taqe.

⁴Eh re' i QaJaaw Dios je' wili i xuq'or reh i Moisés:
Re' hin naa nuye'em taq cho k'uxumb'al aweh pan taxaaj re' ruuk' i maná, xa je' chik jab' na'qajoq chaloq. Re' i tinamit rajlaal q'iij naakeliik chaloq chi molariik, i naa kik'uxum chuwach i ju'jun chi q'iij. Eh re' hin naawilom awach naakinimaniik reh i xnuq'or wili, eh awach ma' naa ta kinimaniik reh.⁵Eh paruwaaq q'iij re' noq inkojarik pampaat chib'ih i naa ruk'uxariik paruwuuq q'iij, reh kiib' q'iij i k'uxumb'al keh naakimolom, ma' je' ta k'ihaal inakimolom rajlaal i q'iij, inki.

⁶Eh je' wili i xuq'or i Moisés, i Aarón keh chu'nchel i aj Israel:
Re' taq i hat parokiik i q'iij yu'naak, naa taq anab'eem chi re' QaJaaw Dios x-esanik taq chaaweh ar Egipto.⁷Eh re' taq i hat i iqal wahq'eq inawil taq i ruloq'il i Dios. Re' reh xrib'iraj chaloq chi ma' holohik ta taq ti q'orik chi riij. ¿Eh chib'ih jariik taq qa'nam i hoj noq inakapaaj taq i hat ruum ma' holohik ta taq ti q'orik chiqiij? inki taqe.

⁸Re' Moisés je' wili i xuq'or:
Re' i QaJaaw Dios rajlaal xq'eq naa taq ruye'em chatiib'. Eh rajlaal wahq'eq naa ruye'em taq cho a maná korehtaal taq ti nujik ruum. Re' QaJaaw Dios xrib'iraj chik chi ma' holohik ta taq ti q'orik chi riij. ¿Chib'ih qa'nam i hoj noq ma' holohik ta taq ti q'orik chiqiij? re' taq i hat ma' chiqiij tee hoj ma' holohik ta taq ti q'orik, chi riij la' Dios, inki.

⁹Chi riij i re', re' i Moisés je' wili i xuq'or reh i Aarón:
Je' wili i cha q'or keh chu'nchel i aj Israel: yu'naak chamol taq awiib' chuwach i Dios ruum re' reh xrib'iraj chik chi ma' holohik ta ti q'orik taq chi riij, tiko'q keh.

¹⁰Eh noq manlik k'ahchi' ruq'orariik keh i aj Israel taqe q'orik wili ruum i Aarón, xitz'ehtanik reje chupaam i ye'aab' chiq yuuq' manlik xkilow chi k'ulik i rub'an iloq nah taq suutz' i ruloq'il i QaJaaw Dios.¹¹Eh re' QaJaaw Dios je' wili i xuq'or reh i Moisés:

¹²Re' hin xb'iraj chik taqe i aj Israel chi ma' holohik ta kiq'orik chi wiij. Chaq'or keh chi je' wili i xnuq'or: Chi rajlaal okal q'iij tiwik i naa nuye'em keh chi k'uxarik, eh rajlaal wahq'eq maná i naa nuye'em keh chi k'uxarik. Chi je' re' naakinab'eem chi re' hin i kaJaaw i kiDios, inki.

¹³Eh xa chupaam wo' xq'eq re' re', xirupinik chaloq taqe i tz'ikin k'oot kib'ihnaal xi k'ulik qajoq chi junsuut i ki-itz'ihy naah paat wilkeeb' wii'. Eh wahq'eq chi junwaar xqajik chaloq i je' suutz' xa saqrajik chik chi junsuut i kipaat.¹⁴Noq xhaab'ik i je' suutz' xkahnik chinaah i wach ak'al tolotaq naq'wach, eh xnujik chinaah i ye'aab' chiq yuuq' xa je' chik rukab' i chaaj inqajik cho pan taxaaj.¹⁵Ruum chi ma' keht'al ta wach i re' taqe i aj Israel, k'ul xkipahqaaj chikiwach chi je' wili: ¿Chib'ih rub'anam i wili? inki taqe.
Chalik i Moisés je' wili i xuq'or keh: Re' aj i wili i maná k'uxumb'al taq aweh i ruyeew chaloq i QaJaaw Dios.¹⁶Re' i wili i xuq'or chaloq i QaJaaw Dios: Re' taq i hat chamol taq aweh nik' pa' k'ihaal i nee taq inak'ux chuwach i ju'jun chi q'iij, eh re' q'oreel, hat pa' taq jarub' panapaat, ju'jun kok'pajb'al taq naa amolom chi neeruk'ux i ju'jun chi tinamit, inki.

¹⁷Re' taqe i aj Israel xkimol wo' hoq i k'uxumb'al keh xqajik cho pan taxaaj, wilik i ma' q'e' ta k'ih xkimol, eh wilik i k'ih i xkimol.¹⁸Xkimol wo' hoq nik' k'ihaal i xq'orarik keh, xa re' wo' manlik inkik'ux reh i ju'jun q'iij, eh re' i k'ih xkimol ma' qohxanik ta wo' chikiwach, eh re' i xama' q'e' ta k'ih i xkimol xmanlojik wo' keh.

¹⁹Eh je' wili i xq'orarik keh ruum i Moisés:
Re' taq i naa amolom, naa taq ak'uxum chu'nchel ma' naa ta taq akanaam reh chi junwaar.

²⁰Xa re' la' wilik i ma' xkinimaj taj, i xuq'or i Moisés, xkikanaa', reh chi junwaar. Eh re' i xkimol xnujik chi haah xchuuhrik chikiwach. Xrilow chi je' re' i Moisés xchalik ruk'aah kuuk'.

²¹Rajlaal wahq'eq k'ih i kiwa' inkimol, ma' inkik'ux ta chu'nchel, eh ruum i rutz'ahiil i q'iij inchuuhb'ik.²²Eh paruwaaq q'iij kiib' chi kok'pajb'al i xkimol chi kiju'junaal manlik kiib' q'iij inkik'ux. Eh re' taqe i k'amal b'eeh chi kixilak i aj Israel xponik kiq'or reh i Moisés i xkib'iraj.²³Eh je' wili i xq'orarik keh ruum i Moisés:
Re' QaJaaw Dios je' wili i xuq'or: Re' i iqal hi'limb'al q'iij loq'oomb'al weh i hin, hin taq aaDios. Eh cha chaq'saj taq yu'naak i naa taq ak'uxum iqal charoqroteej taq wach yu'naak naa aroqroteem wach iqal re' i maná nee taq i naaqohxaaj yu'naak chakeb'aa' taq reh iqal inki.

²⁴Re' taqe aj Israel xkian wo' hoq, i xuq'or i Moisés, xkimol wo' reh i chi junwaar i maná xqohxanik chikiwach, eh ma' xchuuhrik ta wo' chik chikiwach, ma' xnujik ta chi haah.²⁵Eh chi junwaar je' wili i xuq'or i Moisés:
Yu'naak chak'ux taq i maná xamol eew, ruum yu'naak hi'limb'al q'iij, loq'oomb'al reh i QaJaaw Dios, ma' nee ta taq i ruyeew chaaweh i maná ma' nee ta taq inooj amol aweh.²⁶Re' taq i hat waqiib' q'iij naa taq amolom i maná chupaam i xamano, eh paruwuuq q'iij ma' nee ta rub'an chi nee taq inamol ruum ma' neetaruyeew chaloq i QaJaaw Dios ruum hi'limb'al q'iij.

²⁷Eh paruwuuq q'iij wilik wo' naq i xi elik reje chumolariik i maná, xa re' la', xama' xta wo' xkireq.²⁸Chi riij i re', re' QaJaaw Dios je' wili i xuq'or reh i Moisés:
¿Raaj taq i hat kojaruuj taq inakanaa' ruja'wachjiik taqe i nuk'uhb'aal, eh je' wo' taq i ti nutijej wii'?²⁹Re' taq i hat aweht'al taq chi re' hin i Dios jinaj i hi'limb'al q'iij nuye'em taq aweh, ruum aj re' paruwaaq q'iij i nuyeew taq aweh i maná reh chi naa taq ak'uxum chuwach i kiib' q'iij. Eh re' ruwuuq q'iij ma' awach taj i nareliik cho parupaat.

³⁰Je' re' noq re' taqe i aj Israel, xi hi'lik paruwuuq q'iij.

³¹Re' taqe aj Israel maná i rub'ihnaal i k'uxumb'al keh imponik kimol, saq tolotaq naq'wach je' naq'wach kulanto, xa je' chik suq kiil kaxlanwi'k riis kaab' ruuk'.

³²Eh re' i Moisés je' wili i xuq'or:
Re' QaJaaw Dios je' wili i xuq'or chi naa taq a'nam: Chamol taq jino'q k'isa pajb'al i maná k'uxumb'al taq aweh. Eh chamol taq keh awiih aamaam, reh chi neenkinab'eej nik' wach i k'uxumb'al taq aweh xnuyeew chupaam i ye'aab' chiq yuuq', re' noq xat wesaj taq cho Egipto.

³³Re' i Moisés je' wili i xuq'or reh i Aarón:
Re' hat cha sik' jino'q k'isa chakach chayeew ar i jinaj chi k'isa pajb'al i maná nee nayeew chupaam i ye'aab' inqaloq'ej wii' i Dios reh chi nee taq inamol keh taq awiih aamaam i hat.

³⁴Eh nik' wach i xq'orarik reh i Moisés ruum i QaJaaw Dios, je' wo' re' i xub'an i Aarón, xumol wo' i koq i k'isa chakach wilik wii' i maná, chuwach i kaxoon molooj wii' i k'uhb'aal.

³⁵Eh re' taqe i aj Israel ka'winaq haab' xkik'ux i maná noq xib'ehik cho pan chiq yuuq', korehtaal xi ponik chupaam i ye'aab' wilkeeb' wii' patineel. Eh maná i xkik'ux wach b'eeh, korehtaal xi ponik pank'ula't reh okik Canaán.

³⁶Re' i k'isa pajb'al re' re' lajeeb' chi je' re' k'ihaal i maná i ruk'am i nimlaj pajb'al efa rub'ihnaal. Re' noq xelik chaloq i ha' pan saqrehp ab'aj

¹Chu'nchel i aj Israel xi elik wo' chik chaloq chupaam i ye'aab' chiq yuuq' Sin. Xi chalik chiq'uun q'uun, je' rukab' i xuq'or i QaJaaw Dios. Chi riij i re' ar chik xi okik chi wihik chupaam i ye'aab' Refidim, xa re' la' ma' xkireq ta kihaa' ar.²Eh re' taqe i aj Israel tohq'ik kiwech'um i Moisés chi riij chi ma' xta ha', je' wili i xkiq'or reh:
Chayeew qahaa' reh chi neenquk'ej, inki taqe.
¿Chib'ih reet noq kinawech'uj taq ruuk' ahaa', eh chib'ih reet noq inapaj taq i QaJaaw Dios? inki i Moisés.

³Eh re' taqe i aj Israel, xama' nkikuy ta chik i kichiqchi'iil, eh ma' holohik ta xiq'orik chi riij i Moisés, je' wili i xkiq'or reh:
¿Chib'ih reet noq xoj awesaj chaloq Egipto xoj ak'am cha yu', xa reh chi naa qakimiik ruum qahaa' i hoj, taqe qak'uun qixq'uun, taqe i qachikoop? inki taqe.

⁴Eh re' Moisés xuq'oreej parutiij i QaJaaw Dios, je' wili i xuq'or:
Jaaw, ¿chib'ih i naa nub'anam kuuk' i tinamit wili? Ach kok' taq ma' kinkikansaj chi ab'aj, inki.

⁵Re' i QaJaaw Dios je' wili i xuq'or:
Re' hat ik'een chi peet b'eeh chikiwach i tinamit re' re'. Chak'am taqe reje chawiij i k'amal kib'eeh i aj Israel. Chak'am reje aakarote, re' xa q'e' b'aa' reje chinaah i nim ha' Nilo.⁶Eh ar neetiwuy-eej chinaah i yuuq' Horeb, re' wilik wii' i saqrehp ab'aj. Noq neenaq'oj i koq i saqrehp ab'aj ruuk' aakarote neenk'er chaloq i ha' ar, eh neenkian kihaa' chu'nchel i aj Israel.
Re' Moisés xub'an wo' chikiwach taqe i k'amal kib'eeh i aj Israel, i xq'orarik reh.⁷Re' Moisés, Meriba i rub'ihnaal xukoj i ye'aab' re' re', ruum re' taqe i aj Israel, ar xkiwech'uj i Moisés, eh Masah wo' chik i b'ih xukoj, ruum ar kipaj i QaJaaw Dios re' noq xkiq'or chi je' wili: ¿Mi wilik i Dios quuk', oon ma' xtaj? inki taqe. Re' taqe aj Israel xkian i q'aq'inik kuuk' taqe aj Amalec

⁸Re' taqe i aj Israel noq wilkeeb' chupaam i ye'aab' Refidim xi chalik chi q'aq'inik i aj Amalec kuuk'.⁹Eh re' i Moisés je' wili i xuq'or reh i Josué:
Chasik' jarub'-oq i winaq nee i nak'am taqe reje chi q'aq'inik kuuk' i aj Amalec. Eh re' hin ar naa nuwihiik i iqal chinaah inajt naah yuuq', eh naa ruwihiik i nukarote panuq'ab', re' ink'uhtanik reh i rajaawriik i QaJaaw Dios, inki.

¹⁰Eh re' Josué xub'an wo' hoq i xuq'or i Moisés. Xooj wo' hoq chi q'aq'inik, kuuk' i aj Amalec, re' Moisés, re' i Aarón ruch'ihil i Hur, xijohtik chinaah i yuuq' najt naah.¹¹Eh noq i rujosaj taxaaj i rukarote i Moisés, re' taqe i aj Israel inki a'n reh taqe i aj Amalec. Eh noq i ruqasaj i rukarote i Moisés re' aj Israel imb'aan keh kuum i aj Amalec.¹²Re' i Moisés inq'uhtik i q'ab' chi rujohteesjiik i rukarote, re' i Aarón, i Hur jinaj ab'aj xkiyeew i koq chi ruch'ikaab' i Moisés. Eh re' i Aarón, i Hur xkichop i q'ab' k'ultar chel jinaj i chopwik reh i rusak'aaj, jinaj xchopwik reh i rutz'eet. Chi je' re' ma' xq'uhtik ta chik i tileb' i Moisés xukuy, korehtaal chik xokik i q'iij.¹³Ruum aj re', re' Josué xub'an keh panq'aq'inik i aj Amalec ruuk' i ruch'ihch' k'ul q'as.

¹⁴Eh re' QaJaaw Dios je' wili i xuq'or reh i Moisés:
Re' hat cha tz'ihb'aaj pan jino'q huuj xk'ularik wili reh chi ma' nee ta insahchik pank'uxliis. Eh cha q'or reh i Josué chi re' hin naa nusacham kiwach i aj Amalec wilkeeb' junsuut i wach ak'al.

¹⁵Re' Moisés xuyejaa' jinaj artaal tusuj ab'aj, je' wili i rub'ihnaal xukoj: Re' QaJaaw Dios inko'linik weh ruuk' i rehtalil i rajaawriik, inki.¹⁶Re' i Moisés je' wili i xuq'or: Re' i aj Amalec xkitoq'aa' q'aq'inik kuuk' i rutinamiit i QaJaaw Dios, re' reh ruuk' i rajaawriik naa rub'anam i q'aq'inik kuuk' i aj Amalec jar ch'iht pa' i kik'achariik naa ruwihiik, inki. Re' Jetro xponik chi rula'jiik i Moisés

¹Re' Jetro i k'amal b'eeh aj tiij Madián, re' rajaaw i rehk'een i Moisés. Xunab'eej chu'nchel chib'ih jariik i xub'an chee Dios ruuk' i Moisés, ruuk' i rutinamiit Israel. Eh xunab'eej chi re' i QaJaaw Dios x-esanik cho keh ar Egipto.²Ruum pampeet, re' Moisés xutaq'aaj reje i rehk'een Séfora rub'ihnaal, xooj wo' chik ruuk' i rajaaw Jetro, eh xuk'ul wo' chaloq i rixq'uun.³Eh re' Moisés xutaq'aaj reje haa' i ki'ib' chi rak'uun, re' i jinaj Gersón i b'ih, ruum je' wili xuq'or: Re' hin xa hin ik'al b'eeh chupaam i tinamit wili, inki.⁴Eh re' Jinaj Eliezer i b'ih, i ruum je' wili i xuq'or: Re' Dios xunimaj chaloq i wajaaw xk'ulik chi nutoob'jiik, eh xi ruko'leej pan q'ab' i kireey i aj Egipto noq naa naq kiin rukansam, inki.

⁵Eh re' Moisés noq hi'lik i rub'an chupaam i ye'aab' chiq yuuq', re' i wilik wii' najt naah yuuq' re' ixq'orob'jik wii' ruum i Dios, ar xooj k'oloq i Jetro re' rajaaw i rehk'een, ruch'ihil i rehk'een i Moisés, ruch'ihil taqe i ki'ib' chi rak'uun i Moisés.⁶Eh je' wili i xkiq'or reh i Moisés:
Re' rajaaw awehk'een xchalik cha wilariik ayu' ruch'ihil awehk'een, ruch'ihil taqe i ki'ib' chi awak'uun, inki.

⁷Eh re' Moisés xelik chaloq chuk'ulariik i rajaaw i rehk'een, xuxuk'aa' riib' chuwach xutz'ub' i koq i wach. Noq kiye'em chik rusuqkiil kik'ux chikiwach xi okik i koq chupaam itz'ihy naah paat.⁸Re' Moisés ar xuk'utjaaj reh i rajaaw i rehk'een chu'nchel i xub'an i Dios keh i aj Egipto, eh reh i kireey chi ko'lb'al keh i aj Israel. Xuk'utjaaj wo' hoq nik' nimaal i ti' k'axik xkik'ul cho wach b'eeh, eh nik' wach noq xiko'ljik cho chupaam i ti' k'axik, ruum i QaJaaw Dios.

⁹Eh re' Jetro ma' k'isiin ta xsuuqb'ik ruk'ux, ruum yohb'aal wach i rotob'il i Dios xuyeew cho chikinaah i aj Israel. Ruum xuko'leej taqe pan kiq'ab' i aj Egipto.¹⁰Je' wili i xuq'or:
Loq'imaj ta naq i QaJaaw Dios xko'linik taq chaaweh i hat taq aj Israel. Ruum xat ruko'leej taq pan q'ab' i reey, pan kiq'ab' i aj Egipto, re' wo' reh xko'linik taq aweh pan q'ab' i xib'anik ti' k'axik aweh.¹¹Xat ruko'leej wo' taq chuwach i yiib' wach na'ojb'al xkian taq aweh. Yu'naak xti nunimaj chi xa re' wo' QaJaaw Dios xti nim rajaawriik chikiwach i xatz'aqoj tiyoox, inki.

¹²Re' Jetro jinaj i ruchikoop xuk'at chi rumayiij ye'b'al ruloq'il i QaJaaw Dios, eh xuyeew wo' taqe i xatokoom chik mayiij. Eh re' Aarón ruch'ihil taqe i k'amal kib'eeh i aj Israel, xponik kian kiwa' ruuk' i rajaaw i rehk'een i Moisés, noq k'ahchi' keeb' chulooq'jiik i Dios. Re' i Moisés xupab'aa' taqe i q'atal q'orik

¹³Eh chi junwaar chik, re' Moisés xutzunaa' riib' chi q'ataj q'orik chikinaah i aj Israel re' q'oreel i kik'axkiil. Chu'nchel i tinamit re' re' pa'alkeeb' i koq chuwach i Moisés xik'ik q'iij.¹⁴Eh noq xrilow i rajaaw i rehk'een i Moisés chi je' re' i k'ahchi' rub'anam xupech'uj reh i rujii' chi je' wili:
¿Chib'ih jariik i na a'n kuuk' i tinamit wili? ¿Chib'ih reet noq xa awutkeel chi q'ataj q'orik, eh chi kunchelaal i keh ki-ik'ik q'iij chi pa'alkeeb'? inki.

¹⁵Re' Moisés je' wili i chaq'wik xub'an:
Re' taqe i tinamit je' re' inki a'n ruum inchalik kipahqaaj weh chib'ih jariik i ruq'or i Dios.¹⁶Eh noq wilik kik'axkiil kichalik wuuk' reh chi re' hin neekinq'orik reh awach i rub'ehel i rub'an, eh awach i ma' rub'ehel ta i rub'an. Eh re' hin i nuch'ob' rub'ehel keh i ruk'uhb'aal i tijinik i rub'an i Dios, inki.

¹⁷Re' Jetro i rajaaw i rehk'een je' wili i xuq'or reh i rujii':
Re' hat ma' rub'ehel taj i na a'n chi je' re'.¹⁸Q'e' naq'uhtisaj awiib' je' wo' i tinamit kichalik awuuk' kiq'uhtik wo' chi pahik. Re' kamanik re' re' q'e' wo' chik nim wach, cha wutkeel i hat ma' nee ta nakuy rub'aan.¹⁹Eh chab'iraj chi korik ana'ojb'al naa nukojom, re' ta naq i Dios neentoob'inik aweh chub'aan. Re' hat nee ti q'orik ree Dios i kik'axkiil i tinamit re' hat neetijalwik kiq'oral chuwach i Dios.²⁰Re' hat naa ak'uhtaam keh i ruk'uhb'aal i QaJaaw Dios neenaq'or keh nik' wach i tijinik i rub'an, eh chak'uhb'alej taqe ruuk' i nik' wach i k'acharik naa kianam.²¹Eh re' hat naa aasik'wiik kiwach i winaq korik wach kik'ux chi kixilak i tinamit, inkiyohleej i Dios. Eh re' taqe i ma' inkik'ul taj i tumiin chi riij i ma' korik taj. Wilik taqe i nee nakoj chi q'ataj q'orik chikinaah i jinaj miil chi tinamit, wilik nee nakoj chikinaah i jinaj siento, wilik i nee nakoj chikinaah i lajeeb' roxk'ahl, wilik i nee nakoj chikinaah i lajeeb'.²²Eh re' keh neekiq'atwik q'orik chikinaah i tinamit chu'nchel i q'iij, neenkiyejaa' i k'axkiil ma' q'e' ta nimaq kiwach. Re' i k'axkiil nimaq wach neenkik'am cho chawach re' hat neetiyej-anik reh. Eh neenkesaj cha naah i kowlaj kamanik re' re', re' keh neekitoob'inik aweh chub'aan.²³Wila'xa a'n i nuq'or, wixuyeew q'ab' aweh i Dios chi nee na a'n, neenakuy rub'aan i kowlaj kamanik re' re'. Eh re' taqe i tinamit suq chik kik'ux noq nee kiooj pankipaat, inki Jetro.

²⁴Eh re' Moisés xunimaj i xq'orarik reh ruum i rajaaw i rehk'een, xub'an wo' chu'nchel i xq'orarik reh.²⁵Eh xusik' wo' kiwach taqe i aj Israel, korik wach kik'ux. Wilik i xukoj taqe chi q'ataj q'orik chikinaah i jinaj miil chi tinamit, wilik i xukoj chikinaah i jinaj siento, wilik i xukoj chikinaah i lajeeb' roxk'ahl, wilik i xukoj chikinaah i lajeeb'.²⁶Eh re' chik i keh kiq'atwik q'orik chikinaah i tinamit chu'nchel q'iij. Re' i k'axkiil ma' q'e' ta nimaq wach re' keh kiyej-anik reh, re' i k'axkiil nimaq wach inkik'am chaloq chuwach i Moisés kore' reh inye'janik reh.²⁷Eh chi riij i re', re' Moisés xkich'aq kiib' ruuk' i rajaaw i rehk'een. Re' i rajaaw i rehk'een xsutinik wo' chik reje parutinamiit. Re' taqe i aj Israel xi ponik i wilik wii' i yuuq' Sinaí

¹Re' taqe i aj Israel xi ponik chupaam i chiq yuuq' Sinaí. Eh manlik ixib' poh keliik chaloq Egipto noq xi ponik ar.²Eh noq xi elik chaloq chupaam i ye'aab' Refidim, xi ponik chupaam i ye'aab' chiq yuuq' Sinaí. Ar xkiyejaa' i ki-itz'ihy naah paat chi k'ulwaach i yuuq' re' re'.³Re' Moisés xq'orob'jik ruum i Dios chinaah i yuuq' Sinaí xjohtik johtoq chuk'ulariik i QaJaaw Dios, eh je' wili i xq'orarik cho reh:
Re' hat cha q'or keh i q'orik wili taqe i rak'uun rixq'uun i Jacob re' taqe aj Israel.⁴Re' keh xkilow chik chib'ih jariik i xnub'an keh i aj Egipto, eh xkilow wo' hoq nik' wach noq xnuk'am taqe cho wuuk' i keh je' naa chinaah jino'q i ruxiik' i xihk xnuk'am taqe chaloq.⁵Je' re' noq wila' re' keh xinkinimaj ruuk' chu'nchel i nuq'or, eh wila' xkian aha' wilik i ruq'or i nuk'uhb'aal. Re' keh naa nusik'im kiwach chi kixilak i tinamit chi naa kikahniik chi nutinamiit taqe, re' hin weh wo' chu'nchel i wach ak'al.⁶Re' keh naa kikahniik chi k'amal b'eeh aj tiij taqe, naa kikahniik chi nuSantolaj tinamiit taqe sik'ooj kiwach. Re' taqe i q'orik wili cha q'or keh i aj Israel, i nuchjik i Moisés ruum i Dios.

⁷Chi riij i re', re' Moisés xqajik chaloq xuyuq'eej kuuk' taqe i k'amal kib'eeh i aj Israel. Xuq'or keh chu'nchel i xq'orarik cho reh ruum i QaJaaw Dios.⁸Eh noq xkib'iraj i aj Israel aha' wilik i xq'orarik keh, je' wili i xkiq'or chi kunchelaal:
Naaqa'nam aha' wilik i xuq'or chee QaJaaw Dios, inki taqe.
Noq rib'iraj chi je' re' i Moisés xuq'or wo' chik reh i Dios aha' wilik i xkiq'or i tinamit.⁹Re' QaJaaw Dios je' wili i xuq'or reh i Moisés:
Re' hin naa nuk'uhtaam wiib' chawach pan q'equm paam suutz', reh chi neenkib'iraj i tinamit chi k'ahchi' kiin chi q'orik awuuk'. Reh chi nee nkinimaj aweh i aj Israel chi juneliik i neenaq'or, inki.
Eh re' i Moisés xuq'or wo' chik reh i Dios i xkiq'or i aj Israel.¹⁰Re' QaJaaw Dios je' wili i xuq'or reh i Moisés:
Yu'naak narojiik aq'orom keh i tinamit chi naakiyejaam kiib' yu'naak, eh eqal reh chi nee kinkiloq'ej. Eh chi nee inkisaqb'isaj wach i kiso'.¹¹Chi kichop kik'ux chi ruyejeb'jiik kiib', reh kab'iij, ruum re' hin i Dios kab'iij kinqajik qohoq chinaah i yuuq' Sinaí chikiwach chu'nchel i tinamit.¹²Eh naa akojom rehtalil chi junsuut i yuuq' Sinaí reh chi ma' nee ta ki-ik'ik cho ar i tinamit. Chaq'or keh chi ponoq panaq'kiwach i yuuq' re' re', makijohtik cho chuwach, eh mankijil cho kiib' chi junsuut. Ruum awach nerujil cho riib' i ruk'ul chi neenkanteesjik.¹³Eh awach i xumin cho riib' ar atoob' ta winaq oon chikop, inchol taq akansam chi ab'aj oon chi flecha, ma' re' ta taq ruuk' aq'ab' naa akansam. Re' taqe i aj Israel neerub'an chi neenkijil cho kiib' chi junsuut i yuuq' re' re', xa re' la' kore' noq neenkib'iraj noq neenxuuljik chaloq i tuun, tiko'q keh, inki Dios.

¹⁴Eh re' Moisés xqajik cho chinaah yuuq', xchalik ruq'or keh i tinamit chi naakiyejaam kiib' reh i rulooq'jiik i Dios. Re' i tinamit xkisaqb'isaj wo' wach i kiso'.¹⁵Re' i Moisés je' wili i xuq'or keh:
Re' taq i hat cha chop taq ak'ux chuyejeb'jiik awiib' reh kab'iij. Re' taqe i winaq, ma' naa ta pechik kiwiriik ruuk' i kehk'een.

¹⁶Eh noq saq'ik paroox q'iij yohb'aal wach i ruch'aab' kahoq, yohb'aal wach i kahoq xub'an jinaj i q'equm paam suutz' xuyeew cho riib' chinaah i yuuq' Sinaí. Eh xakow chik xixuuljik taqe chaloq tuun, eh chu'nchel i aj Israel kimolom kiib' pan kiye'aab', xakib'arb'otik chik ruum kiyo'jiik.¹⁷Eh re' i Moisés xresaj taqe chaloq chupaam i kiye'aab' kimolom wii' kiib' i aj Israel xuk'am reje kib'eeh chuk'ulariik i QaJaaw Dios, ar xi kahnik waraa' i yuuq' Sinaí.¹⁸Eh chu'nchel i yuuq' Sinaí, yohb'aal wach i sib' i nelik johtoq chinaah, xa je' chik rusib'eel horna ruum re' QaJaaw Dios xqajik cho chinaah chupaam jinaj i q'aaq'. Eh chu'nchel i yuuq' Sinaí xayohb'aal chik wach i k'uyu'jik i rub'an.¹⁹Eh re' noq xixuuljik taqe chaloq i tuun xanajt chik naah inki a'n chaloq. Re' i Moisés xuq'oreej i QaJaaw Dios, eh ruuk' kowlaj q'orik inchaq'weesjik chaloq, xa je' chik kahoq.

²⁰Re' QaJaaw Dios xti ko chi ju' i yuuq' Sinaí xqajik chaloq, eh xuq'or cho reh i Moisés chi xjohtik johtoq chupaam i ye'aab' re' re', chalik i Moisés johtik wo' johtoq ar.²¹Re' i QaJaaw Dios je' wili xuq'or reh i Moisés:
Qajeen qohoq kuuk' i aj Israel, cha q'or keh chi mankixahq'aaj chaloq i rehtalil akojom. Maankijil cho kiib' reh i rilariik nuwach, ruum wixkilow nuwach wilik i nee kikimiik chi kixilak.²²Eh nee wo' naq'or keh i k'amal kib'eeh aj tiij inkaaj cho kijilim kiib' wuuk', chi peet naakisaqb'isam wach i kánima, ruum yohb'aal maa chii inwuchej taqe, inki.

²³Re' reh je' wili i xuq'or reh QaJaaw Dios:
Re' tinamit, maankichop cho kik'ux chi johtik chinaah i yuuq' Sinaí, ruum re' hat xaq'or qeh chi naa qakojom rehtalil aha' naakiponiik, eh chi re' wili santo laj ye'aab', inki Moisés.

²⁴Eh je' wili i xq'orarik reh ruum i QaJaaw Dios:
Hiy la' qajeen qohoq, eh nee wo' chik ti chalik, nee nak'am cho chawiij i Aarón. Re' taqe i k'amal b'eeh aj tiij taqe i tinamit ma' nee ta inkixahq'aaj chaloq i naakiponiik wii'. Reh chi ma' nee ta kijohtik cho wuuk' ayu', ruum ma' chih inwuchej taqe reje, inki.

²⁵Re' i Moisés qajik wo' chik chaloq, xuq'or wo' keh chu'nchel i aj Israel i xuq'or i QaJaaw Dios. Re' ru lajeeb' k'uhb'aal i Dios (Deut 5.1-21)

¹Re' QaJaaw Dios xuq'or chaloq chu'nchel i q'orik wili:

²Re' hin taq aaWaJaaw aaDios, re' hin xineesanik taq chaaweh parutinamitaal i Egipto re' naq i hat taq minooj wii' pankowlaj kamanik.

³Ma' naa ta ruwihiik taq jino'q atokoom dios chi nuwach i hin.

⁴Ma' naa ta taq atz'aqam jino'q aatiyoox, ni xata naa atz'aqam taq rujal wach i wilik pan taxaaj, ni xata re' i wilik wach ak'al, eh ni xata re' wilik pan palaw chi ri'sil aak'al.⁵Eh ma' naa ta wo' axuk'aam taq awiib' chikiwach i xatz'aqoj tiyoox, eh ni xata naa taq aloq'em. Ruum xa re' wo' hin, hin taq aaDios, eh inwaaj chi xa re' wo' hin naa nulooq'jiik, awach ki-ixowanik nuwach i nuyeew taqe chi tojariik i kimahk i keh, je' wo' hoq i kiih kimaam.⁶Re' taqe i kik'axwik weh, eh inkinimaj i nuk'uhb'aal i nuyeew i nuk'axb'al chikinaah i keh, je' wo' hoq i kiih kimaam.

⁷Ma' q'or taq lom i nub'ihnaal i hin, chi xama' xta rub'ehel i hin taq aaWaJaaw aaDios. Ruum awach inq'orik i nub'ihnaal chi xama' xta rub'ehel, korehtaal i nuyeew chi tojariik i ru mahk.

⁸Eh mansahchik taq panak'ux i hi'limb'al q'iij, chupaam i q'iij re' re' naa taq kiin aloq'em i hin, hin taq aaDios.⁹Waqiib' q'iij taq naa akamaniik, eh chupaam i waqiib' q'iij re' re' naa taq a'nam chu'nchel akamaj.¹⁰Eh re' ruwuuq q'iij hi'limb'al q'iij, loq'oomb'al weh i hin, hin taq aaWaJaaw aaDios. Ma' xta jino'q i kamanik naa taq a'nam i hat chupaam i q'iij re' re', ni xata re' taq aawak'uun, awixq'uun, ni xata re' taq amoso winaq, ni xata re' taq awajpooh ixoq, ni xata re' taqe aachikoop, ni xata re' taqe i tokoom tinamit wilkeeb' taq panatinamiit.¹¹Ruum re' hin taq aaWaJaaw aaDios, waqiib' q'iij xnuyejaa' wii' i taxaaj, i wach ak'al, i palaw, ruch'ihil taqe i wilkeeb' chupaam taqe re'. Eh chupaam i ruwuuq q'iij xinhi'lik, ruum aj re', re' hin taq aaWaJaaw aaDios xnukuxisaj i ruwuuq q'iij, eh xnukanaa' chi loq'laj q'iij.

¹²Chak'ax taq atuut awajaaw reh chi nee najtb'ik rooq aak'achariik ayu' wach ak'al, re' i nuye'em aweh i hin, hin taq aaWaJaaw aaDios.

¹³Ma' naa ta taq akaansaniik.

¹⁴Ma' naa ta taq ach'uwa'risam wach aakaxáro.

¹⁵Ma' naa ta taq awelq'aniik.

¹⁶Ma' naa ta taq atz'aqam wach i k'utaaj chi riij aawas achaaq'.

¹⁷Ma' naa ta taq ak'axam wach i rupaat aawas achaaq', ni xata re' i rehk'een aawas achaaq', ni xata re' rumoso winaq, ni xata re' i rajpooh ixoq, ni xata re' rub'oyaax, ni xata re' i rub'uuruux, ma' jino'q i chib'ih reh taq aawas achaaq' naa taq ak'axam wach. Re' taqe i aj Israel xakib'arb'otik chik ruum kiyo'jiik (Deut 5.22-33)

¹⁸Eh chu'nchel i aj Israel tixkilow i ruch'aab' i kahoq, eh xkilow chi nujinaq chi sib' i naah i yuuq', eh xkib'iraj noq xub'an chaloq i kahoq, xkib'iraj noq xixuuljik taqe chaloq i tuun. Xa re' la' re' keh xachinajt inkilow reje, xakib'arb'otik chik ruum kiyo'jiik.¹⁹Eh je' wili i xkiq'or reh i Moisés:
Re' hat neerub'an chi nee qoh aq'oreej, eh neenqanimaj i neenaq'or, ma' nqaaj ta chi nee qoh ruq'oreej i Dios, ruum nee-oq qoh kimik inki taqe.

²⁰Eh re' i Moisés je' wili i kichaq'weesjiik xub'an:
Matyo'jik taq re' QaJaaw Dios chalik taq chanik'ib'jiik, reh chi naa taq ayohleem wach chi juneliik. Reh chi ma' nee ta chik taq ti mahkunik chuwach.

²¹Re' taqe aj Israel najt wilkeeb' reje ruuk' i yuuq' re' re', re' Moisés xjohtik johtoq chinaah i yuuq' chupaam i q'equm paam suutz' wilik cho wii' i Dios.

²²Re' Dios xuq'or reh i Moisés chi je' wili i naa ruq'orom keh i aj Israel:
Re' taq i hat xab'iraj taq chik noq xat nuq'oreej taq cho pan taxaaj.²³Eh xnuq'or taq aweh chi ma' naa ta taq ayejaam aatiyoox, re' ruuk' taqe oro, i plata, eh ni xata naa taq aloq'em je' rukab' taq nulooq'jiik i na a'n i hin.²⁴Eh chi naa taq ayejaam jino'q i artaal, re' ruuk' i aak'al korjinaq wii', ar taq neenak'at chi amayiij taq aachikoop, taqe aatentzuun, taqe wakax, reh pahqb'al, kuyb'al taq amahk, reh chi nee taq ti nuk'am wuuk' panotob'il, chi re' hin naa taq kaat nukuxisam chupaam i ye'aab', xa aha' yuuq', eh inwaaj chi neen k'ulik taq panak'ux i nub'ihnaal.²⁵Chi je' re' netaq i nayejaa' nu artaal chi tusuj ab'aj, xa re' la' maasehkaaj taq wach ab'aj nee nakoj reh, ruum wixasehkaaj taq wach ab'aj ruuk' ch'ihch' netaq inawesaj i rajaawriik i artaal.²⁶Eh nuq'or wo' taq aweh chi ma' nee ta taq inayejaa' i ixkaleria reh i artaal reh chi ma' nee ta taq ti johtik chinaah, eh ma' nee ta nak'uhtaaj taq i panawaa' chi t'uslik, inki Dios. Re' kik'uhb'aljiik xb'aan i aj Israel chi riij i kimoso xakiloq'om (Deut 15.12-18)

¹Re' hat je' wili i k'uhb'aal naa aq'orom keh i tinamit:

²Wila' xaloq' taq jino'q amoso re' ruuk' i aj hebreo, xa waqiib' haab' taq naa rukamaniik awuuk'. Eh paruwuuq haab' naa taq awoq'taam reje chi ma' jino'q centavo i neerutoj i reliik reje.³Eh wila' rutkeel xokik taq awuuk', rutkeel naa reliik reje. Wila' ruch'ihil rehk'een noq xokik taq awuuk', ruch'ihil rehk'een noq nee nelik reje.⁴Wila' re' loq' moso re' re' xye'arik rehk'een ruum i rupatroon, eh wihik rak'uun rixq'uun, re' i rehk'een re' taqe i rak'uun rixq'uun, naa rukahniik reh i rupatroon, xa rutkeel i reh neenooj reje.⁵Wila' re' loq' moso re' re' ma' raaj ta chi neentaq'ab'jik reje ruum q'e' ruk'ax i rehk'een i ruk'ax wo' taqe rak'uun rixq'uun, eh i ruk'ax i rupatroon.⁶Re' i rupatroon naa ruk'amwiik reje reh chuwach i Dios, naa rujilim i koq chuwach i puerta, eh ruuk' jinaj i q'as ju' ch'ihch', naa ruhopom i xikin, chi je' re' naa rukahniik chi rumoso chi jumpech.

⁷Eh awach xuk'ayej i rixq'uun pankowlaj kamanik ruuk' i tokoom, re' xq'un re' re' ma' naa ta reliik reje ruuk' i rupatroon je' rukab' noq kielik reje i winaq k'ayimaj taqe pankowlaj kamanik.⁸Wila' re' patroon ma' xraaj ruchopom naah chi rehk'een i xq'un re' re', ruum chi ma' xuk'ax ta wach, neerub'an chi nee ruyeew q'ab' chi nee rutoj i reliik i xq'un re' re'. Xa re' la' ma' nee ta rub'an chi nee ruk'ayej reje ruuk' jino'q tokoom rutinamiit.⁹Eh wila' xuyeew chi rehk'een i rak'uun ma' nee ta chik i ruyeew pankowlaj kamanik, xa je' chik ink'axarik jino'q rixq'uun neerub'an reh.¹⁰Wila' re' i winaq xuk'am jino'q tokoom ixoq, ma' naa ta ruqasam rooq i k'uxumb'al reh i peet rehk'een, je' wo' hoq i ruso', eh ma' naa ta rukanaam i wirik ruuk'.¹¹Eh wila' ma' ruk'uxlaaj chik, wi ma' rukoj chik ruso', wi ma' inwirik chik ruuk', neerub'an chi nee rutaq'aaj reje i rehk'een re' re' chi ma' jino'q centavo i neerutoj i reliik. Re' i k'uhb'aal xkahnik chikinaah i xkian ti' k'axik reh i kas kichaaq'

¹²Eh wila' awach i xuyok' jino'q i ras ruchaaq', eh wila' xkimik ruum, neenq'atarik i q'orik chinaah, reh i rukanteesjiik.¹³Eh wila' ma' xa paruk'ux chalik noq xukansaj, xaxponik-oq wo' q'iij chi nuwach i hin, hin Dios, re' re' konaa chik nuq'orom aweh aha' naa rukeb'aam riib'.¹⁴Eh awach inchalik ruk'aah chinaah i ras ruchaaq', eh xukansaj-oq, mo'-oq xuketelaaj wach, re' re' atoob' ta neenooj rukeb'aa' riib' chuwach i nu artaal korehtaal i neenawesaj cho ar, neenaq'at q'orik chinaah, reh i runkanteesjiik.

¹⁵Eh awach i ruyok' i rutuut i rajaaw, naa wo' ruq'atariik i q'orik chinaah reh rukanteesjiik.

¹⁶Awach i relq'aaj jino'q ruch kiristianu' ro'q ta ruk'ayem chik, oon ko wilik ruuk', eh wila' xkan ruuk' i ruk'ul chi naa rukanteesjiik.

¹⁷Eh awach i rub'aj i rutuut rajaaw i ruk'ul wo' chi naa rukanteesjiik.

¹⁸Eh wila' awach i xutoq'aa' peleto, wi xuhop ruuk' ab'aj awach i k'ahchi' ruk'ulb'ilem, oon xuhop ruuk' q'ab'iis. Eh xukanaa'-oq jarub'-oq q'iij wach yokaab', mo'-oq xkimik ruum i xub'an reh,¹⁹wila' xuktik wo' chik reje ixq'ojarik, b'ehik-oq wo' chik i rub'an atoob' ta ruuk' karote, re' xb'anik i q'ojooj, neenkahnik chi ma' xta ru mahk, xa re' la' koruman chi naa rutojom i iq'oom b'al reh, eh naa rutojom i ru q'iij jarub' q'iij ma' naa ta rukamaniik.

²⁰Eh awach i xuq'oj ruuk' chee' i rumoso winaq, oon ixoq xaruloq'om, eh wixkimik chi jumehq'iil inchol chi neenye'arik chutojariik i ru mahk.²¹Wila' re' moso kox k'aach kiib' ixib'-oq q'iij, oon ma' xkimik taj, re' i patroon ma' nee ta inye'arik chutojariik i ru mahk, ruum ehchan wo' reh i moso re' re'.

²²Eh wila' xkichop kiib' chi peleto ki'ib'-oq i winaq, eh kiq'oj-oq jino'q ixoq wach k'acharik wilik, xik'ik-oq i ruha'lak'uun kuum. Eh wila' ma' xkimik re' keh, inchol kitojom riij jarub' i neerupahqaaj i rub'ahiil ixoq, eh re' q'oreel nik' wach i nee ruq'or i q'atal q'orik.²³Eh wila' re' ixoq ma' xata re' i ruha'lak'uun xik'ik, xkimik-oq haa' i reh, re' taqe xiq'ojwik reh, naa wo' rehtesjiik i kik'achariik i keh.²⁴Awach i xupuch' inaq'wach i tokoom, naa wo' rupuch'ariik inaq'wach i reh. Awach xresaj wareeh i tokoom, naa wo' rehtesjiik i wareeh i reh. Awach i xuyok' i q'ab' i tokoom, naa wo' ruyok'ariik i q'ab' i reh, awach i naa ruyok'om i rooq i tokoom, naa wo' ruyok'ariik i rooq i reh.²⁵Eh awach i xuk'at i tokoom, naa wo' ruk'atariik i reh, awach i xuyok' i tokoom, naa wo' ruyok'ariik i reh, awach i xuq'oj i tokoom naa wo' ruq'ojariik i reh. Re' k'uhb'aal inqajik chikinaah i wilik kimoso xakiloq'om

²⁶Eh wila' re' jino'q i patroon xusak' inaq'wach i rumoso winaq, oon ixoq, eh xukanaa'-oq chi ma' nilwik taj, neerub'an chi neeresaj reje pankowlaj kamanik, ruum xukanaa' chi ma' nilwik ta chik.²⁷Eh wila' xresaj i wareeh chi q'ab'iis, naa wo' rutaq'aam reje ruum xukanaa' chi ma' xta wareeh.

²⁸Eh wila' wilik jino'q i b'ooyax xutoq' jino'q winaq, oon ixoq, re' b'ooyax re' re' naa rukanteesjiik chi ab'aj, eh re' rutib'kaal ma' naa ta ruk'uxariik. Re' ehchan reh i b'ooyax ma' nee ta inye'arik chutojariik i ru mahk.²⁹Raaj wila' re' b'ooyax re' re' xa okrinaq wo' chi ntoq'wik, eh nee rukansaj jino'q i winaq, re' b'ooyax neenkanteesjik chi ab'aj, je' wo' ehchan reh naa wo' rukanteesjiik, ruum reht'al wo' naq chi josq', eh ma' xub'ak' taj.³⁰Eh wila' xa tumiin i xpahqaljik reh pan q'atb'al q'orik chi neenko'ljik riij i ruk'achariik korehtaal i rutoj jarub' pa' naa rupahqaljiik reh.³¹Re' wo' hoq i k'uhb'aal re' re' inqajik wach naah i b'ooyax ruch'ihil i ehchan reh wila' re' i b'ooyax xutoq' jino'q ak'un oon jino'q i xq'un.³²Eh wila' re' b'ooyax neerutoq' jino'q i moso winaq oon ixoq, eh wila' xukansaj, naa wo' rukanteesjiik chi ab'aj i b'ooyax. Re' i ehchan reh i b'ooyax naa rutojom i lajeeb' ru ka'winaq chi tumiin re' ruuk' i saq wach.

³³Wila' awach i xuk'ot jino'q i chaamlaj jul, eh ma' xutz'ap ta naah, eh wixq'ehb'ik qohoq jino'q i b'ooyax ar oon jino'q b'uurux.³⁴Re' xk'otwik reh i jul re' re', naa rutojom reh i ruchikoop i ehchan reh, eh neenkahnik reh i chikop wila' xkimik.

³⁵Wila' wilik ki'ib'-oq i b'ooyax reh reh ehchan reh, wila' xkimik jino'q i b'ooyax, pan kab'chel neenkich'aq i rutib'kaal, eh re' i b'ooyax kahnik chi k'achlik pan kiib'al wo' naakik'ayem, eh yejaal keh i tz'aaq.³⁶Raaj wila' re' ehchan reh i b'ooyax xb'anik kaansanik, xa reht'al wo' naq chi josq' i rub'ooyax, k'achlik wach i b'ooyax naa ruye'em chi jilow i xkimik, eh re' kamnaq b'ooyax naa rukahniik ree reh. Re' k'uhb'aal xkahnik chikinaah i xib'anik ree i leq'

¹Eh awach i relq'aaj jino'q i b'ooyax oon jino'q i tentzun, eh wi xukansaj, ho'oob' chik chi wakax i naa ruye'em i reh chi jilow i b'ooyax. Eh re' i tentzun kijib' chik chi tentzun i naa ruye'em chi jilow.

²Wila' re' i ajileq' xkan chi k'ahchi' chi i leq', eh wixq'ojarik korehtaal-oq xkanteesjik, re' i neenkansanik reh ma' nee ta inye'arik chutojariik i ru mahk chi je' jino'q kaansoom.³Eh wila' pan q'iij chik xkanteesjik re' i aj kaansoom neenq'atarik i q'orik chinaah chi aj kaansoom.
Eh awach xb'anik i leq' korehtaal i rutoj jarub' tz'aaq i xrelq'aaj, wila' ma' neerub'an rutojariik, re' reh naa ruk'aayjiik pankowlaj kamanik reh chi naa rutojom riij i xrelq'aaj.

⁴Eh wila' kox kan ruuk' i b'ooyax chi kok'achlik wach oon tentzun, oon b'uurux, re' re' ra'j ki'ib' chik re' i jilow i ju'jun chi chikop naa ruye'em.

⁵Eh awach i roq'taaj reje i ruchikoop chusik'ariik ruwa' pan tokoom ye'aab', oon re' i tikooj wii' uuva. Re' reh naa ruye'em jilow xiik' chik naah holwochiil i ruye'aab' naa ruye'em chi jilow, naa wo' ruye'em jilow i-uuva naa rojiik k'uxaroq.

⁶Eh wila' awach i xuqop i q'aaq' xik'ik-oq reje pan tokoom ye'aab' xk'ahtik-oq i wach i rutik i ehchan reh i ye'aab', rumolom wach, oon ach naq okik reh chi rujachariik. Re' i neenkojwik reh i q'aaq', korehtaal i rutoj chu'nchel i piix naa rub'anam i q'aaq'.

⁷Eh awach i xuyeew chi molarik i rutumiin reh i tokoom, oon jino'q xa chib'ih jariik k'ih tz'aaq, eh x-eljik-oq parupaat i tumiin ixmolwik reh. Wila' xkan i ajileq' ki'ib' chik chi je' re' i jilow naa ruye'em.⁸Raaj wila' ma' xkan chik i ajileq' re' i ehchan paat naa ruk'amariik reje chikiwach i q'atal q'orik, reh chi ar naa ruq'orom i korik wi ma' re' reh xk'amwik taqe i xye'arik reh chi molarik.

⁹Eh awach xraaj relq'aam jino'q i b'ooyax, jino'q b'uurux, jino'q i tentzun, jino'q itz'ihy, jino'q chik xa chib'ih jariik, eh wila' awach i xutoq'aa' q'orik chi riij nee ruq'or chi reh taqe i re'. Re' taqe i ki'ib' re' re' naa kojiik pa'lojoq chikiwach i q'atal q'orik awach pa' keh i re' xkan chi riij chi wilik ru mahk ki'ib' chik chi je' re' i jilow naa ruye'em reh i jinaj.

¹⁰Eh wila' awach xroqxa'neej ruuk' jino'q tokoom, jino'q rub'uuruux, jino'q i b'ooyax, jino'q i tentzun, xa chib'ih chik chopkaal. Wila' xikimik taqe i chikop re' re', oon xkiq'oj kiib', oon, xi eljik chi ma' awach ta x-ilwik reh.¹¹Re' i oqxanjik wii' taqe i chikop re' re', korehtaal i ruq'or i korik parub'ihnaal i QaJaaw Dios reh i ehchan reh, chi ma' re' tee reh xk'amwik reh taqe i chikop. Re' ehchan, reh neerunimaj i nee ruq'or, eh ma' xtaj i nee ruyeew chi jilow.¹²Eh wila' xrilow noq xeljik reje taqe i chikop ra'j naa ruye'em jilow reh re' i ehchan reh.¹³Raaj wila' xerarik i ruti'jolal i chikop, ruum i josq'laj chikop, inchol ruk'amam chaloq i ruqox i ruti'jolal, reh chi ma' xta neerutoj.

¹⁴Eh wila' awach xooj rukemelej jino'q ruchikoop ruuk' i tokoom, eh wila' xkimik i chikop re' re', oon xuq'oj riib' chuwach chi ma' xta ar i ehchan reh, korehtaal i rutoj reh i ehchan reh.¹⁵Raaj wila' chuwach i ehchan reh xuk'ul ma' xtaj i neerutoj k'isinoq, xa re' wo' hoq jarub' i tojb'al riij i chikop inkahnik chinaah rutojariik. Re' k'uhb'aal xkahnik chikinaah i xib'anik reh i yiib' wach na'ojb'al

¹⁶Eh awach winaq xujot' jino'q i xq'un ma' reht'al ta q'o'rinik winaq, eh xwirik-oq ruuk' noq komajaa' i ruyeew wach reh i q'orik, naa rutojom reh i rajaaw i xq'un, je' rukab' imb'aan, korehtaal i rub'an kaxáro ruuk'.¹⁷Eh wila' re' rajaaw i xq'un ma' xraaj ta ruye'em i rixq'uun, re' xb'anik reh i jot'ooj re' re', korehtaal i ruyeew i tumiin, je' k'ihaal inye'arik chi riij jino'q q'ahxoq ma' reht'al ta q'o'rinik winaq.

¹⁸Eh chu'nchel i ixoq aj war naa kikantesjiik.

¹⁹Awach i rixoqb'eej taqe ixoq chikop, naa ruq'atariik i q'orik chinaah reh i rukanteesjiik.

²⁰Awach i ruyeew i rumayiij chikiwach i tiyoox, naa rukanteesjiik, ruum ma' re' ta chi nuwach i hin, hin k'achlik Dios i ruyeew i rumayiij.

²¹Maa jot' taq, ma'an taq ti' k'axik keh i aj tokoom tinamit wilkeeb' taq chaxilak. K'oloq taq panak'ux noq re' taq i hat, hat wo' taq aj pan tokoom tinamit, noq xat wihik taq chaloq ar Egipto.

²²Ma'an taq i ti' k'axik keh ixoq kamnaq kib'ahiil, je' wo' taqe i ma' xta kituut kajaaw.²³Ruum wila'xa a'n taq i ti' k'axik keh i re', wila' xkipahqaaj weh i hin, hin Dios chi neenuyeew ti' k'axik taq cha naah, nee wo' nuyeew taq cha naah.²⁴Re' hin naa nuye'em i nujosq'iil taq cha naah, ruuk' q'aslaj ch'ihch' taq naa akanteesjiik. Eh re' taq awehk'een naa kikahniik chi kahneel ixoq taqe, eh re' taq awak'uun awixq'uun naa kikahniik chi ma' xta kituut kajaaw.

²⁵Eh wila' xukemelej rutumiin taq awuuk' jino'q i neb'aa' re' wo' ruuk' taqe i nutinamiit i hin, mapahqaaj reh i tojb'al riij atumiin, eh maakoj chi je' jino'q aj kemeel.²⁶Eh wila' xukanaa' awuuk' i ruso' chi riij i rukemeel xub'an awuuk', noq neenokik i q'iij nee wo' chik inaq'asaj reh.²⁷Ruum xa re'-oq wo' tii ruso' re' re' wilik reh, eh wi ma' xaq'asaj chik reh. ¿Chib'ih chik neerub'ur wii' riib' chuwach i k'uxik? wila' re' reh xupahqaaj weh i hin, hin Dios chi naa nuye'em i ti' k'axik taq cha naah, nee wo' nuketelaaj wach ruum wilik ketelinik wachiis wuuk'.

²⁸Re' taq i hat ma' ruyeew ta riib' chi nee taq kinab'aj i hin, hin Dios, eh ma' ruyeew ta riib' chi ma' holohik ta taq nee ti q'orik chi riij i q'atal q'orik wilik chinaah taq aatinamiit.

²⁹Chak'am wo' taq chaloq chi jumehq'iil amayiij chi nuwach. Re' i peet wach taq atik ruch'ihil i wach taq aa-uuva.
Re' i peet taq awak'uun, naa wo' taq ak'amam cho chi nuwach.³⁰Je' wo' taqe i peet kak'uun awakaax, i peet kak'uun taq aatentzuun. Xa wuquub' q'iij naa kiwihiik ruuk' i kituut, eh waxiqiib'-oq chik q'iij kaasjiik naa taq ak'amam cho chi nuwach.

³¹Re' taq i hat, naa taq ruwihiik asantohiil chi nuwach.
Eh ma' naa ta taq ak'uxum i kitib'kaal i chikop wila' josq'laj chikop i xerwik reh i kiti'jolal, chakut la' taq reh i tz'i' i kitib'kaal.

¹Re' taq i hat ma' naa ta taq aq'orom i xachukuj q'orik, maa a'n jinaj wach ak'ux ruuk' i yiib' wach kina'ojb'al, noq neenooj chukul q'orik pan q'atb'al q'orik.

²Maa nimaj taq i kitaqchi' i ruk'ihaal ruuk' i ma' holohik taj. Noq naa taq rojiik aq'orom i korik pan q'atb'al q'orik, maa nimaj taq i kitaqchi', ruum nee-oq tikimin chuq'orariik i ma' korik taj.³Eh maa min taq awiib' chi ruko'ljiik i neb'aa', wila' ma' rub'ehel i rub'an.

⁴Wila' xsahchik jino'q rub'ooyax inixowanik awach, oon jino'q rub'uuruux, eh wila' xponik areq i hat, hiy chaq'asaj reh.⁵Eh wila' xq'ehb'ik pamb'eeh ruum i rahliil i rihq i rub'uuruux awach inixowanik taq awach, chawuksaj taq i rub'uuruux chawesaj i rihq chi riij maakanaa' rutoob'jiik.

⁶Re' i neb'aa' nee wo' rub'an chi neenatoob'eej taq ruuk' i ruyejaam wach, wila' rub'ehel i rub'an.

⁷Maakoj taq ru mahk i tokoom, ruum ma' ruk'ul taj chi awuum taq i hat neenq'atarik i q'orik chinaah reh i rukanteesjiik. Ruum wi xa a'n taq i je' re' korehtaal taq tinuyeew chutojariik aamahk.

⁸Ma' naa ta wo' taq ak'ulum i tumiin, chi riij i chukuj q'orik, ruum re' k'uluuj tumiin je' naa rutz'ap inaq'wach kiristianu', eh ruuk' i re' inkahnik chi wilik kimahk i ma' xta wo' naq kimahk.

⁹Ma'an taq i ti' k'axik keh i tokoom tinamit wilkeeb' taq panaxilak, ruum re' taq i hat ti' wo' taq xak'ul noq xat wihik cho pan tokoom tinamit ar Egipto.

¹⁰Re' taq i hat xa waqiib' haab' naa taq atikim paam aye'aab', eh naa taq amolom i wach atik amu'uun.¹¹Eh paruwuuq haab', ma' naa ta chik taq atikim paam, re' i neenkahnik k'isinoq ar, re' chik taqe neb'aa' wilkeeb' taq panatinamiit neekik'uxwik reh, eh re' taqe chikop neekik'uxwik reh. Je' wo' re' taq i naa a'nam ruuk' i wach aa-uuva, i wach taq aa-olivo.

¹²Eh chuwach i waqiib' q'iij naa a'nam taq chu'nchel akamaj, eh paruwuuq q'iij naa taq ahi'liik, naa wo' ruhi'liik taq aab'oyaax, aab'uuruux, reh chi nee wo' chik ink'ulik i kaansil taqe amoso ruch'ihil taqe i tokoom tinamit wilkeeb' taq chaxilak.

¹³Re' hin inwaaj chi naa taq a'nam chu'nchel i xnuq'or taq aweh, eh ma' awach ta naa ruq'oriik taq chaxilak i kib'ihnaal taqe i tiyoox. Re' taqe ixib' chi nimaq wach ninq'iij xb'aan (Ex 34.18-26; Deut 16.1-17)

¹⁴Re' taq i hat oxpech i ninq'iij taq naa a'nam chuwach i haab' chi loq'oomb'al weh i hin, hin Dios.¹⁵Naa taq a'nam i peet ninq'iij, re' noq ink'uxarik i kaxlanwi'k ma' kojooj ta ch'amb'esb'al reh. Eh wuquub' q'iij taq naa ak'uxum i kaxlanwi'k je' rukab' i re', je' rukab' i nuq'orom taq aweh. Eh ixib' poh ruk'amam rub'eeh i haab' noq naa taq a'nam i ninq'iij re' re', ruum chupaam i poh re' re' xat elik taq chaloq Egipto. Eh ma' awach taj i naa ruchaliik wuuk' chi ma' xta rumayiij naa ruk'amam chaloq.

¹⁶Eh re' rukab' ninq'iij taq naa a'nam re' i runinq'ijiik na' eloq taq i peet wach atik. Eh re' i roox ninq'iij taq naa a'nam, pantz'apaab' wach reh i haab', re' noq naa taq akohlaam rumolariik i wach taq atik panaye'aab'.

¹⁷Je' re' noq re' taqe i winaq, oxpech naa kichaliik chuwach i haab' chi nulooq'jiik ruuk' i ninq'ijinik naa kianam.

¹⁸Eh noq naa taq ak'atam taqe i chikop chi amayiij chi nuwach, ma' ruch'ihil ta rukik'eel, eh re' i q'ina' ma' naa ta taq amolom reh chi junwaar. Eh ma' naa ta taq aye'em chi amayiij i kaxlanwi'k kojooj ch'amb'esb'al reh.

¹⁹Re' taqe i peet taq wach atik, xti q'e' holohik naa taq ak'amam cho chi nuwach panupaat i hin, hin Dios.
Ma' naa ta taq achaq'sam i k'isa rak'uun kaprax chupaam i riis ruch'uuch' i rutuut. Re' QaJaaw Dios xuq'or chi naa rutaq'aam chee ruánjel, chi k'amal kib'eeh i aj Israel

²⁰Re' hin naa nutaq'aam taq chaaweh i nuánjel reh chi nee taq tirucha'jeej panab'eeh. Eh nee wo' taq ti ruk'am reje chupaam i ye'aab' nuyejaam taq cha weh.²¹Maacanaa' taq awiib' chi riij, cha nimaj ruq'or taq aweh maa q'etwachej taq awiib' chuwach, ruum re' reh chu'nchel i naa rub'anam panub'ihnaal i hin naa rub'anam. Eh wi xat mahkunik taq chuwach ma' nee ta taq i rukuy amahk.²²Eh wila' korik chi xanimaj taq, wila'xa a'n chu'nchel i naa ruq'orom, re' hin naa taq kaat nuko'leem pan kiq'ab' i ki-ixowanik taq awach, eh ma' naa ta wajwaam kiwach i aj ixowaal re' re'.²³Eh re' i nuánjel, naa rojiik chi peet b'eeh taq chawach, naa taq kaat ruk'amam reje chupaam i kitinamiit i aj amorreo, i aj heteo i aj ferezeo, i aj cananeo, i aj heveo i aj jebuseo, re' chik taq i hat naa apatiniik ar, re' taqe re', re' hin naa nusachwiik kiwach.²⁴Re' taq i hat maa tijej taq aweh i yiib' wach inki a'n i tinamit re' re'. Eh maa xuk'aa' taq awiib' chikiwach i kitiyoox i keh. Ma' naa ta wo' taq aloq'em, chasach la' kiwach taqe i kitiyoox, je' wo' taqe ab'aj q'e' looq' chi kekeh.²⁵Xa re' hin naa taq kiin aloq'em, hin taq aaWaJaaw aaDios.
Eh re' hin kinkuxisanik reh taq awa' ahaa', naa wo' wesam taq cha naah i yab'ilaal.²⁶Eh ma' naa ta taq akimiik noq komajaa' i rureq i ruq'ijil. Ni xata naa taq ruwihiik panatinamiit jino'q ixoq chi ma' naa ta ruwihiik ruha'lak'uun, ni xata naa rik'sam i ruha'lak'uun.

²⁷Re' hin naa nuye'em q'ab' chi naa kiyo'jiik taq chawach, ruum ruti'kiil kik'ux taqe i tinamit naa taq awik'iik wii'. Eh naakimolom chi elik chawach, taqe i ki-ixowanik taq awach.²⁸Eh naa wo' nuye'em q'ab' chi naa kiyo'jiik i tinamit naa taq awik'iik wii', chi je' re' neenkimol chi elik taq chawach, taqe i aj heveo, i aj heteo, i aj cananeo.²⁹Xa re' la' re' hin, ma' naa ta wesam chu'nchel chuwach i jinaj haab', ruum wixwesaj taqe reje chi jumehq'iil nee kik'ihaaxb'iik taqe i josq'laj chikop chupaam taqe i ye'aab' re' re'. Eh nee taq ti kijot' i hat.³⁰Kok'lomiil la' taqe naa wesam reje chawach, konaa taq kik'ihaaxb'iik awak'uun awixq'uun taq i hat, eh korehtaal i nawehchaaj taq chi korik taqe i ye'aab' re' re'.³¹Eh re' taq aye'aab' nukojom chik rehtaal aha' naa ruponiik. Ar naa reliik reje chi chii' i kaq palaw, eh naa ruponiik chi chii' i palaw wilik pan kiye'aab' i aj filisteo. Eh ar naa reliik reje chupaam i ye'aab' chiq yuuq', naa ruponiik chi chii' i nim ha' Éufrates. Eh naa taq nukanaam pan aq'ab' i k'achareel wilkeeb' ar, eh re' chik taq i hat naa aaweesaniik cho keh ar.

³²Ma' xta taq i naa ak'ulaam keh chi nee taq i na a'n i hat. Eh maa loq'ej taq aweh i hat kitiyoox i keh.³³Eh maayeew taq q'ab' chi nee kipatinik taq panatinamiit, reh chi ma' nee ta taq ti mahkunik chi nuwach. Ruum wi xa a'n taq jinaj awach kuuk', nee wo' taq inaloq'ej i kitiyoox i keh, ruum i re' nee wo' taq i naq'eb' awiib' i hat, inki Dios. Re' noq xyuq'ub'jik chaloq i Moisés chinaah i yuuq' Sinaí ruum i Dios

¹Re' QaJaaw Dios je' wili i xuq'or reh i Moisés:
Johteen cho wuuk' ayu', chak'am taqe cho chawiij i Aarón, i Nadab, i Abiú, lajeeb' ru kajwinaq i k'amal kib'eeh i aj Israel. Xa re' la' re' keh konajt neenkixuk'aa' cho kiib'.²Xa re' wo' hat neenajil chawiib' wuuk', re' taqe awuch'ihil ma' nee ta nkijil cho kiib' wuuk', eh ma' nee ta kijohtik cho chawiij taqe i tinamit, inki.

³Eh re' i Moisés, xchalik wo' chik kuuk' i tinamit, xuq'or keh chu'nchel i xuq'or i QaJaaw Dios chi naa rub'anam. Re' i tinamit junq'oriik taqe, je' wili xkiq'or:
Ma' xta reet naa qa'nam chu'nchel i xuq'or i QaJaaw Dios, inki taqe.

⁴Eh re' i Moisés xutz'ihb'aaj chu'nchel i xuq'or i QaJaaw Dios. Eh chi junwaar kowahq'eq xwuktik xuyejaa' jinaj i artaal tusuj ab'aj, wa raa' yuuq'. Eh chi junsuut i artaal, xutus i kab'laj chi ab'aj, re' ju'jun chi ab'aj rehtalil i ju'jun ch'uq chi aj Israel.⁵Re' i Moisés wilik k'ijolaq re' ruuk' taqe i aj Israel xutaq'aaj taqe chukanteesjiik taqe imas wakax, reh chi xkik'at chi kimayiij pahqb'al kuyb'al kimahk k'amb'al, kiib' panotob'il ruuk' i QaJaaw Dios.⁶Eh re' i Moisés yejaal i kikik'eel i imas wakax xumol panimaq kulk. Eh re' i yejaal chik i kik', xukihraaj chinaah i artaal.⁷Eh xuchop chaloq i huuj tz'ihb'amaj wii' xuyejaa' wach i Dios chi naa kianam, xrilow wach chi kixikin taqe i aj Israel. Eh noq xkib'iraj je' wili i xkiq'or:
Re' hoj naa qa'nam chu'nchel qak'ux i ruq'or i QaJaaw Dios, inki taqe.

⁸Re' Moisés xuk'am chaloq i kulk rumolom wii' i kik' xukihraaj chikinaah i tinamit, je' wili i xuq'or keh:
Re' i kik' wili rehtalil chi korik i xuyejaa' taq wach awuuk' i Dios, reh chi naa rojiik eloq wach i korjinaq cho wach ruuk' taqe i q'orik wili.

⁹Eh re' i Moisés xjohtik wo' chik johtoq chinaah i yuuq' ruch'ihil i Aarón, i Nadab, i Abiú, i lajeeb' ru kajwinaq chi winaq re' ruuk' i k'amal kib'eeh i aj Israel.¹⁰Re' taqe i aj Israel xkilow reje wach i ki Dios, chi ri'sil i rooq wilik i xan reprotik chik xasaqum chik wach xa je' chik rukab' i ab'aj zafiro, xasaqum chik wach, xa je' chik rukab' paam i taxaaj.¹¹Re' QaJaaw Dios ma' xta ruchej taqe i winaq, re' ruuk' taqe k'amal kib'eeh i aj Israel. Atoob' ta xkilow wach i QaJaaw Dios xama' xkimay ta wo' kiwa' kihaa'.

¹²Eh re' QaJaaw Dios je' wili i xuq'or reh i Moisés:
Johteen cho chinaah i yuuq' wilkiin wii' ar nee kinawuy-eej neenuyeew aweh taqe i tz'ilom ab'aj re' i nutz'ihb'aam wii' taqe i k'uhb'aal, re' taqe i naa atijem wii' i aj Israel, inki.

¹³Eh re' Moisés ruch'ihil i Josué re' intowik reh i xjohtik wo' chinaah i yuuq' Sinaí, re' ixq'orob'jik cho wii' ruum i Dios.¹⁴Eh re' Moisés je' wili i xuq'or keh k'amal kib'eeh i aj Israel:
Ayu' taq naakooj awuy-eem korehtaal qoh sutinik chaloq. Eh naa rukahniik taq awuuk' Aarón, i Hur, wila' awach taq aweh i wilik ruk'axkiil, keh taq neenaq'or, inki.

¹⁵Noq ruq'orom chik i Moisés taqe re', xjohtik johtoq chinaah i yuuq', re' i yuuq' re' re' xnujik chi suutz'.¹⁶Eh xqajik chaloq i ruloq'il i QaJaaw Dios chinaah i yuuq' Sinaí, waqiib' q'iij xb'uhrik naah ruum i suutz'. Eh paruwuuq q'iij xyuq'ub'jik chaloq i Moisés ruum i QaJaaw Dios pan suutz'.¹⁷Chu'nchel i aj Israel xkilow johtoq wach i ruloq'il i Dios, xuk'uhtaaj cho riib' xti ko chi ju' i yuuq', xa je' chik rukab' i q'aaq' yohb'aal wach i ruk'at noq xkilow.¹⁸Eh re' i Moisés xjohtik chinaah i yuuq', eh xokik i koq chupaam i suutz' re' re', ka'winaq q'iij ka'winaq aq'ab' xub'an cho ar. Re' QaJaaw Dios xuq'or chi naa ruk'amariik chee mayiij korb'eesb'al reh i rusantolaj itz'ihy naah paat (Ex 35.4-9)

¹Re' QaJaaw Dios je' wili i xuq'or reh i Moisés:

²Chaq'or keh i aj Israel chi kimol cho wach i mayiij, reh chi neenkik'am cho weh, neenkimol cho wach chi kixilak i neenkian ruye'ariik, eh chu'nchel kik'ux neen kiyeew.³Eh re' mayiij naakimolom cho wach re' taqe i wili: oro, plata, tumiin re' ruuk' i q'an ch'ihch' korjinaq wii'.⁴Itz'ihy q'eqjutik ru kaqiil, itz'ihy, kaq laj itz'ihy, itz'ihy lino, itz'ihy rismaal riij kaprax korjinaq wii'.⁵Rutz'uhmal riij kaprax iq'omamaj wach chi kaqiq'oom tz'uhuum re' ruuk' i q'e' k'ih taq tz'aaq, chee' acacia holohaq ruyejeb'jiik.⁶Eh aseite re' ruuk' inokik reh i saqumb'al, eh ink'ohnik laj iq'oom re' ruuk' inokik chi kuxesb'al inokik ruuk' i insensia q'e' i k'ohnik.⁷Ab'aj kornalina, ab'aj i q'e' k'ih tz'aaq, re' ruuk' inkojarik wach kiso' i kajaaw aj tiij, eh re' ruuk' inkikoj chuwach itz'ihy inkikoj chi' kik'ux.⁸Reh chi neenkiyejaa' jino'q i nu itz'ihy naah paat, reh chi neekinwihik kuuk' ar.⁹Xa re' la' re' i nuSantolaj itz'ihy naah paat naa nuwihiik wii', inwaaj i hin chi je' rukab' rub'aan naa nuk'uhtaam aweh, je' wo' taqe chu'nchel i xa chib'ih jariik naakikamaniik ar, inki. Re' loq'laj kaxa molb'al reh i tz'ihb'amaj wii' taqe i k'uhb'aal (Ex 37.1-9)

¹⁰Re' hat cha yejaa' jino'q loq'laj kaxa acacia ruche'el nee nakoj. Eh kiib' b'ara ruuk' ka'k'itub' i rooq naa a'nam, eh oxk'itub' i wach naa a'nam, eh oxk'itub' wo' chik i runajtiil naah naa a'nam.¹¹Naa aab'urum chu'nchel i paam chi re' ruuk' manlik oro, eh je' wo' chu'nchel i riij. Nee wo' nakoj junrahp oq i oro chi junsuut.¹²Eh neenayejaa' kijib' oq chi kok' kotokaq ch'ihch' re' ruuk' i oro, ar neenach'ilaa' wataq rooq i loq'laj kaxa, ki'ib' i nee nakoj chi juntar, ki'ib' wo' chik i nee nakoj chi juntar.¹³Naa wo' ayejaam ki'ib' oq i b'olob'aq chee' acacia ruche'el naa akojom, eh naa aab'urum riij chi oro.¹⁴Naa taqe ajutum chupaam i kok' kotokaq ch'ihch' wilkeeb' pantaq rucheel i loq'laj kaxa, reh chi ruuk' taqe chee' re' re' neench'ihljik reje.¹⁵Re' i ki'ib' chi chee' re' re', naa akanaam ar chi jumpech ma' naa ta chik awesam chupaam i kok' kotokaq ch'ihch'.¹⁶Eh chupaam i loq'laj kaxa re' re', naa aye'em i tz'ihb'amaj wii' i taqe i k'uhb'aal, naa nuye'em aweh i hin.

¹⁷Naa wo' ayejaam jino'q i tz'apb'al naah re' ruuk' i manlik oro naa ayejaam wii', oxk'itub' rooq naa a'nam, eh oxk'itub' wo' i wach naa a'nam.¹⁸Naa wo' ayejaam ki'ib'-oq je' kiwii' ánjel oro naa ayejaam wii' naa ach'eyem kiwach chi korik ruuk' i tuhyb'al kalawux, k'ul naa kiwihiik i je' kiwii' ánjel re' re'.¹⁹Eh chinaah i tz'apb'al naah i loq'laj kaxa naa kiwihiik qohoq i je' kiwii' ánjel, re' re' xa jinaj kiwii' naa a'nam. Re' i jinaj panju' i tz'apb'al naah i loq'laj kaxa naa ruwihiik, eh re' i jinaj panju' chi juntar naa ruwihiik.²⁰Re' jinaj k'ul wach ruuk' i jinaj naa akanaam, eh re' tz'apb'al naah i loq'laj kaxa naakilom qohoq, re' i kixiik' he'lik neenkahnik chinaah i tz'apb'al naah i loq'laj kaxa chi muujb'al naah.²¹Eh noq akojom chik chupaam i loq'laj kaxa i tz'ilom ab'aj i nuye'em aweh i nutz'ihb'aam wii' taqe i k'uhb'aal, kora'j nee nakoj re' i tz'apb'al naah i loq'laj kaxa.²²Eh panyejaal i tz'apb'al naah i loq'laj kaxa i molb'al reh i k'uhb'aal pankiyejaal taqe i ki'ib' chi je' ruwii' ánjel, naa kaat nuq'o'reem ar naa nuq'orom aweh i k'uhb'aal naa taqe atijem wii' i tinamit Israel, inki Dios reh i Moisés. Re' mexa ye'aab' kaxlanwi'k xye'arik chi mayiij (Ex 37.10-16)

²³Re' hat naa ayejaam jinaj i Mexa re' ruuk' i chee' acacia i nee nakoj reh, jinaj b'ara i rooq, ka'k'itub' i wach, eh oxk'itub' i runajtiil naah naa a'nam.²⁴Eh nee nab'ur wach chi re' ruuk' i manlik oro, nee nakoj junrahp-oq i oro chi junsuut i chii' i Mexa.²⁵Naa akojom junrahp ruk'o'nalil wach, je' oq kajq'ab' wach, eh nee wo' nakoj i koq i xti manlik oro chuwach.²⁶Eh naa wo' ayejaam kijib'-oq i kok' kotokaq ch'ihch' re' ruuk' i oro, nee nakoj qohoq wataq rooq, pantaq rutz'u'kaal i Mexa re' re'.²⁷Re' taqe i kok' kotokaq ch'ihch' re' re', ma' najt ta qohoq ruuk' i ruk'o'nalil wach nee nakoj, reh chi nee ki-ik'ik ar i b'olob'aq chee' neen kamanik chi k'amb'al reje reh i Mexa.²⁸Re' taqe i ki'ib' chib'olob'aq chee' re' re', k'amb'al reje reh i mexa naayej-aam, re' ruuk' i chee' acacia naa akojom reh, naa wo' akojom oro chi riij.²⁹Eh chu'nchel i naa rukamaniik chinaah i mexa, re' taqe i pulato, taqe i nimaq cucharo, taqe i xaro, taqe i kulk k'amb'al cho reh taqe i mayiij chi ha'.³⁰Eh re' hat eliik naa aye'em chinaah i mexa re' re' i kaxlanwi'k inye'arik chi mayiij chi nuwach, inki. Re' ye'aab' kantela reh saqumb'al, oro i korjinaq wii' (Ex 37.17-24)

³¹Re' hat naa ayejaam jinaj i ye'aab' kantela, re' ruuk' manlik oro, eh naa ach'eyem wach chi korik ruuk' tuhyb'al kalawux. Eh re' rooq, re' i wach, re' i chi ralaq johtoq, taqe i ye'aab' kantela, i ruhtz'ub'aal wach, xa jinaj reliik naa a'nam.³²Eh jinaj i ye'aab' kantela naa aye'em panyejaal, waqiib' i q'ab' naa a'nam ox ox chi ju'juntar re' naa rukamaniik chi ye'aab' kantela.³³Eh chi kiju'junaal i waqiib' chi q'ab' re' re', nareliik cho chuwach i runimaal i ye'aab' kantela. Re' ju'jun chi q'ab' oxtiq chi je' ruwii' kulk i naa ayejaam, je' ruwii' i ruhtz'ub'aal i almendro haa' taqe i ruk'o'nalil wach.³⁴Re' i runimaal kajtiq i je' ruwii' kulk naa ayejaam chuwach, je' wo' ruwii' ruhtz'ub'aal i almendro, je' wo' taqe i ruk'o'nalil wach.³⁵Eh re' oxk'uhl chi q'ab' i nelik reje chuwach i runimaal, ju'jun i je' ruwii' kulk naa ayejaam chi ri'sil.³⁶Re' taqe i je' ruwii' kulk, re' taqe i q'ab' i ye'aab' kantela, xa jinaj ruwii' naa a'nam, eh xti manlik oro i naa ayejaam wii', naa ach'eyem wach chi korik ruuk' tuhyb'al kalawux.³⁷Naa wo' ayejaam i wuquub' chi saqum, nee nayeew chupaam i ye'aab' kantela re' re', neena t'uyaa' reh chi neerusihq'eej reje i chuwach.³⁸Re' taqe i ch'ihch' chopb'al naah wach q'aaq', taqe i pulato naa rukamaniik ar manlik oro naa ayejaam wii'.³⁹Re' i ye'aab' kantela, eh chu'nchel i re' jinaj kintaal ruuk' ho'oob' ru ka'winaq libra rahliil manlik oro naa akojom.⁴⁰Eh nik' wach taqe rehtalil xnuk'uhtaaj aweh chinaah i yuuq' wili Sinaí, xti je' wo' re' ruyejeb'jiik cha a'n taqe, inki Dios. Re' noq xkorjik i rusantolaj itz'ihy naah paat i Dios (Ex 36.8-38)

¹Eh naa ayejaam i nuSantolaj itz'ihy naah paat, naa ayejaam lajeeb'-oq itz'ihy, re' ruuk' i lino, raxmuqik, q'eqlumik ru kaqiil, kaq laj itz'ihy naa akojom reh. Eh naa ayejaam i je' kiwii' ánjel chuwach taqe itz'ihy re' re'.²Eh re' taqe itz'ihy re' re', eliik kiwach naa a'nam kajlaj b'ara runimaal kooq, eh kiib' b'ara i runimaal kiwach naa a'nam.³Eh re' ho'oob' chi itz'ihy re' re' naa atiqim kiwach, eh je' wo' chik re' i naa a'nam reh i ho'oob', eh nee nakoj chinaah i paat.⁴Nee wo' nakoj i kok' hoop chi chii' itz'ihy, reh chi neenawik'saj chupaam i b'ak'b'al raxmuqik inka'yik. Chi chii' i peet tah reh i ho'tah chi itz'ihy nee nakoj, eh je' wo' chi chii' i tz'apaab' wach tah reh i ho'oob' chi itz'ihy.⁵Nik' wach rub'aan naa a'nam i nimlaj itz'ihy chi juntar, je' wo' chik re' rub'aan naa a'nam i juntar. Eh nee nakoj lajeeb'-oq roxk'ahl chi kok' hoop chi kichii' k'ultar chel.⁶Eh nee wo' nayejaa' lajeeb'-oq roxk'ahl chi loklok laj ch'ihch' re' ruuk' i oro reh chi nee nach'ilaa' taqe i chi chii' i nimlaj itz'ihy, je' wo' chi chii' i nimlaj itz'ihy chi juntar, reh chi k'ul nee ruk'ul riib' i chii', reh chi xa jinaj chik chuwii' noq neenk'utinik i nuSantolaj itz'ihy naah paat.

⁷Eh naa wo' ayejaam i junlaj chi itz'ihy, rismaal riij ixoq kaprax naa ayejaam wii', xa je' jinaj ruwii' neena a'n, reh chi manlik neerub'ur naah chu'nchel i nuSantolaj itz'ihy naah paat naa nulooq'jiik wii'.⁸Re' taqe i junlaj chi itz'ihy re' re' eliik kiwach naa a'nam ho'lajuuj b'ara runimaal i kooq naa a'nam, eh ki'ib' b'ara runimaal kiwach naa a'nam.⁹Ho'oob' i neenatiq wach chi juntar, eh chi juntar waqiib' i neenatiq wach chi juntar eh re' i chii' i ruwaaq inqohxanik neenab'us johtoq chi chii' i ookb'al reh i nuSantolaj itz'ihy naah paat.¹⁰Nee wo' nayejaa' lajeeb'-oq roxk'ahl kok' hoop chi chii' i peet ho'tah chi kiwii' re' i nee ruk'ul wii' riib'. Eh nee wo' chik inakoj lajeeb'-oq roxk'ahl chi kok' hoop chi chii' i waqtah wach noq wilik, re' wo' nee ruk'ul wii' riib'.¹¹Eh nee wo' inayejaa' lajeeb'-oq roxk'ahl i loklok laj ch'ihch' re' ruuk' q'an ch'ihch', nee taqe inakoj chupaam i kok' hoop reh chi neeruk'ul riib' taqe i chii' itz'ihy, eh neenkahnik chi xa jinaj chik chuwii' i paat naa nulooq'jiik wii'.¹²Ruum chi re' taqe itz'ihy naa akojom chi xam q'e' nimaq kooq i nee ruk'ul wii' riib' panyejaal k'ul naa rukahniik b'uslik qohoq i chii' itz'ihy k'isiin i chi riij, eh k'isiin i chuwach i santo laj itz'ihy naah paat.¹³Eh re' i nuSantolaj itz'ihy naah paat naa aab'urum naah chi nimaq itz'ihy. Eh ko wilik itz'ihy naa ruqohxaniik kiib' k'itub' ruuk' kajq'ab' naa rukahniik b'uus chi juntar, eh je' wo' chik re' nimaal i naa rukahniik b'uus chi juntar.

¹⁴Eh kochinaah taqe itz'ihy re' re', naa akojom i rutz'uhmal i riij i imas tentzun, eh naa aawiq'omaam wach chi kaq laj iq'oom eh naa wo' akojom chinaah i q'e' holohik laj tz'uhuum.

¹⁵Naa wo' ayejaam taqe i tz'ilom re' ruuk' i chee' acacia, reh chi naa kikamanik chupaam i nuSantolaj itz'ihy naah paat, eh jiik wach rub'aan naa a'nam taqe.¹⁶Re' taqe i tz'ilom re' re' kajkaj b'ara ruuk' ka'k'itub' i kooq naa a'nam, eh kijib' k'itub' ruuk' kajq'ab' i runinqaal kiwach naa a'nam.¹⁷Eh naa akojom i kok' hoop pantaq kicheel i tz'ilom, kojb'al reh taqe i kok' chee' naakik'ulum wii' kiib'. Je' re' rub'aan naa a'nam chu'nchel i tz'ilom naa rukamaniik chupaam i nuSantolaj itz'ihy naah paat.¹⁸Noq naa ayejaam taqe i tz'ilom re' re', juninaq i naa ayejaam reh pansak'aaj reje reh i rookb'aal q'iij.¹⁹Eh ka'winaq i ch'ikaab' reh naa akojom taqe i tz'ilom re' re', eh re' ruuk' i plata naa akojom re' ju'jun chi tz'ilom ka'kab' i ch'ikaab' reh naa akojom reh chi ar neenkojarik i ki'ib' chi chopb'al reh i ju'jun.

²⁰Je' wo' hoq i chi juntar i paam i santo laj itz'ihy naah paat, re' i pantz'eet reh ireelb'aalq'iij juninaq wo' tz'ilom naa ayejaam reh ar.²¹Eh ka'winaq wo' ch'ikaab' reh re' ruuk' i plata naa akojom taqe i tz'ilom re' re', chi je' re', re' ka'kab' i chi ch'ikaab' reh i ju'jun chi tz'ilom naa akojom.²²Waqiib' i tz'ilom naa ayejaam re' naa akojom parookb'aal q'iij reh paam i santo laj itz'ihy naah paat.²³Eh ki'ib' chik i tz'ilom naa ayejaam reh pantaq tz'u'k parookb'aal reje i q'iij.²⁴Re' taqe i tz'ilom wili naa kichopom kiib' naa ak'ulaam kiwach panyuuq', je' wo' chi' taq chii' ruuk' taqe i chopaab' reh. Eh je' wo' chik re' rub'aan naa a'nam i ki'ib' chi tz'ilom naa akojom pantaq tz'u'k.²⁵Je' re' noq naa rumanlojiik waxiqiib' i tz'ilom, eh waqlaj i ch'ikaab' reh naa akojom re' ruuk' i plata, iraaj ruq'orom chi ka'kab' i ch'ikaab' reh i ju'jun chi tz'ilom.

²⁶Ho'oob' wo' hoq i b'olob'aq chee re' ruuk' i acacia naa ayejaam. Re' taqe re' naa akojom chi ruq'e'liik taqe i tz'ilom naa akojom reje chi juntar i paam i paat naa nulooq'jiik wii'.²⁷Eh ho'oob' wo' i b'olob'aq chee' naa ayejaam, re' naa akojom chi ruq'e'liik taqe i tz'ilom naa akojom chi juntar, ho'oob' wo' hoq i ruq'e'liik taqe tz'ilom naa akojom reje parookb'aal q'iij chupaam i santo laj itz'ihy naah paat.²⁸Eh re' ruq'e'liik naa akojom panyejaal, konee nik'ik chi juntar panyejaal taqe i tz'ilom naa rik'iik.²⁹Eh nee nakoj i oro chikiwach taqe i tz'ilom re' re', neenayejaa' taqe kok' kotokaq ch'ihch' re' ruuk' i oro. Reh chi re' taqe i b'olob'aq chee' re' re', noq kojooj chik i oro chikiij, neenajut chupaam taqe i kotokaq ch'ihch' re' re'.³⁰Re' hin inwaaj chi nee nayejaa' i santo laj itz'ihy naah paat, xa re' la' xti je' rukab' rub'aan xnuk'uhtaaj cha weh chinaah i yuuq' Sinaí.

³¹Nee wo' nayejaa' jinaj itz'ihy re' ruuk' raxmuqik inka'yik, kaq muqik, kaq laj itz'ihy lino, neenayejaa' i je' kiwii' ánjel chuwach.³²Re' itz'ihy re' re', nee nakoj ju'jun-oq i kok' loklok laj ch'ihch' pantaq rutz'u'kaal, neenalokaa' chuwach taqe i kijib' chi ch'iit i acacia naa akojom oro chikiij, eh plata i ch'ikaab' keh naa akojom.³³Eh nee nach'ilaa' itz'ihy re' re', ruuk' taqe i ch'ihch'. Eh chi riij itz'ihy re' re', nee nayeew i loq'laj kaxa molb'al reh i tz'ihb'amaj wii' taqe i k'uhb'aal. Re' itz'ihy re' re', nee nkamanik chi tasb'al paam i loq'laj ye'aab' ruuk' i xti santo laj ye'aab'.³⁴Eh noq aye'em chik ar i tz'ihb'amaj wii' taqe i k'uhb'aal kora'j neenatz'ap naah re' i loq'laj kaxa, ar nee nayeew chupaam i ye'aab' xti wilik ruSantohiil.³⁵Re' i mexa i ye'aab' kaxlanwi'k chi juntar itz'ihy tasb'al paam i paat nee nayeew chaloq pantz'eet reje, eh re' i ye'aab' kantela reh pansak'aaj reh i paam i santo laj itz'ihy naah paat naa aye'em reje chuwach i mexa.

³⁶Eh nee wo' nayejaa' jino'q itz'ihy reh chii' puerta reh i santo laj itz'ihy naah paat, raxmuqik, eh kaq muqik re' ruuk' itz'ihy lino naa ayejaam wii'. Eh wilik taqe i xa chib'ih jariik naa akojom rehtalil chuwach.³⁷Naa akojom ho'oob'-oq i chee' re' ruuk' i acacia b'ak'b'al reh itz'ihy naa akojom chi chii' i puerta. Re' chee' re' re' naa akojom oro chikiij naa akojom i loklok laj ch'ihch' chuwach, re' taqe i chee' re' re', ju'jun i ch'ikaab' reh naa akojom re' ruuk' i q'an ch'ihch'. Re' artaal q'an ch'ihch' korjinaq wii' (Ex 38.1-7)

¹Re' hat naa ayejaam jino'q i artaal re' ruuk' i chee' acacia naa akojom reh, kajtz'u'k naa a'nam, ki'ib' b'ara ruuk' ka'k'itub' i rooq, je' wo' re' nimaal i wach. Eh re' runajtiil naah jinaj b'ara ruuk' ka'k'itub' naa a'nam.²Naa ayejaam kijib'-oq ruk'aa' i artaal ju'jun pantaq rutz'u'kaal, xa jinaj ruwii' ruuk' i artaal naa a'nam. Eh naa akojom q'an ch'ihch' chi riij i artaal.³Eh re' taqe i naa rukamaniik wach artaal, q'an ch'ihch' taqe naa ayejaam wii'. Re' taqe i wili: Re' taqe i molb'al chaaj, re' taqe i likb'al, re' taqe i nimaq kulk, re' taqe i lak' lak' reeh, re' taqe i molb'al naah wach q'aaq'.⁴Eh re' artaal naa akojom k'isa koraal chi chii' re' ruuk' i q'an ch'ihch', naa ayejaam kijib'-oq i kotokaq re' ruuk' i q'an ch'ihch' ju'jun i nee nakoj pantaq rutz'u'kaal i k'isa koraal re' re'.⁵Wachak'al, waraa' i artaal neenach'ik'aa' johtoq i koraal re' re', eh neemponik kopanyejaal.⁶Eh naa ayejaam taqe i b'olob'aq chee' re' ruuk' i chee' acacia reh ruq'e'liik i artaal nee nakoj q'an ch'ihch' chikiij.⁷Re' taqe i chee' re' re', neenaxit' chupaam i kok' kotokaq ch'ihch' re' wilkeeb' pantaq rucheel i artaal. Re' taqe i chee' re' re', neen kamanik chi k'amb'al reje reh i artaal.⁸Re' i artaal xa je' ruwii' i kaxoon naa a'nam i tz'ilom i naa akojom reh je' wo' rukab' i xnuk'uhtaaj aweh chinaah i yuuq' Sinaí. Re' tehlik chi junsuut i rupaat i Dios (Ex 38.9-20)

⁹Re' hat naa akanaam reje i nim-oq i tehlik chi junsuut i nuSantolaj paat, eh pansak'aaj reje reh i rookb'aal q'iij nee nakoj taqe reje pan q'e'lik i re' ruuk' itz'ihy lino, lajeeb' roxk'ahl b'ara i naa aab'urum ruuk' taqe re'.¹⁰Eh juninaq i rooq naa akojom taqe itz'ihy re' re', eh juninaq wo' ch'ikaab' keh taqe i rooq re' re', re' ruuk' i q'an ch'ihch'. Re' taqe i lokolaq, i kok' kotokaq ch'ihch' naa akojom reh, re' ruuk' i plata.¹¹Je' wo' hoq i pantz'eet reh i rookb'aal q'iij naa wo' akojom taqe reje itz'ihy ar. Naa aq'eb'aam taqe reje ar lajeeb' roxk'ahl b'ara i naakib'urum reje. Juninaq i rooq, juninaq ch'ikaab' keh i rooq nee nakoj re' ruuk' i q'an ch'ihch'. Re' taqe i lokolaq, i kok' kotokaq ch'ihch' naa akojom, re' ruuk' plata.¹²Eh parookb'aal q'iij reje hoob' ru ka'winaq lajeeb' i rooq, lajeeb' i ch'ikaab' keh i naa akojom.¹³Eh pareelb'aal reje i q'iij hoob' ru ka'winaq b'ara rooq taqe itz'ihy naa ahe'em reje wach re' wo' runimaal wach i tehlik.¹⁴Eh parucheel i ookb'al xawuquub' b'ara ruuk' ka'k'itub' taqe itz'ihy naa akojom reje ar, ixib' i rooq, eh ixib' i ch'ikaab' reh i rooq naa akojom.¹⁵Eh chi juntar reje i ookb'al, xawuquub' wo' b'ara ruuk' ka'k'itub' taqe itz'ihy naa akojom reje ar, eh xa ixib' i rooq, ixib' ch'ikaab' keh i rooq naa akojom.¹⁶Panookb'al i koq reh i tehlik re' re', lajeeb' b'ara rooq taqe itz'ihy naa akojom, re' ruuk' i raxjutik inka'yik, eh kaq muqik, kaq laj itz'ihy, re' ruuk' itz'ihy lino, kojooj taqe ruk'o'nalil wach. Eh kijib' i rooq, kijib' i ch'ikaab' keh i rooq naa akojom.¹⁷Eh re' taqe i rooq naa akojom itz'ihy chi junsuut i tehlik, eh re' ch'ikaab' keh i rooq re' ruuk' taqe q'an ch'ihch' naa akojom i kotokaq, i lokolaq ch'ihch' chikiwach i rooq re' ruuk' i plata.¹⁸Re' tehlik re' re', lajeeb' roxk'ahl b'ara i rooq naa aye'em, eh re' wach hoob' ru ka'winaq b'ara k'ultar chel naa aye'em reh, eh re' i runajtiil naah kiib' b'ara ruuk' ka'k'itub'. Re' taqe itz'ihy naa akojom reh, re' ruuk' lino. Re' taqe ch'ikaab' reh re' ruuk' i q'an ch'ihch'.¹⁹Eh re' taqe i naa rukamaniik ar noq naa nulooq'jiik i hin, hin Dios, re' ruuk' i q'an ch'ihch' i naa rutz'a'jiik. Chu'nchel i naakib'ahk'iik wii' taqe i nuSantolaj itz'ihy naah paat, re' ruuk' q'an ch'ihch'. Re' aseite xye'arik chupaam i saqumb'al (Lev 24.1-4)

²⁰Re' hat naa aq'orom keh i tinamit aj Israel chi kik'am cha weh i manlik aseite re' ruuk' i reh olivo, reh chi nee nakoj chupaam i saqumb'al reh chi neenqop chi juneliik.²¹Eh re' i Aarón re' taqe i rak'uun nee nakanaa' chi ye'jan reh, reh chi chu'nchel aq'ab' neenqop chupaam i nuSantolaj itz'ihy naah paat molb'al iib', ar naakiye'em reje i chi juntar itz'ihy tasb'al, chuwach reje i loq'laj kaxa molooj wii' i k'uhb'aal. Re' wili jinaj k'uhb'aal ma' naa ta chik kikanaam rub'aan i aj Israel jar ch'iht pa' chi k'achareel i naakik'iik. Re' i ruwii' i kiso' xkikoj taqe i aj k'amal b'eeh aj tiij (Ex 39.11-31)

¹Re' hat chawesaj cho chi kixilak i aj Israel aawas Aarón chak'am awuuk' chi kamanik, ruch'ihil taqe rak'uun, je' wili kib'ihnaal: Nadab, Abiú, Eleazar, Itamar. Reh chi nee kiokik chi k'amal kib'eeh aj tiij panukamaj.²Eh cha yejaa' i ruso' i Aarón re' aawas, re' i ruso' naa rukamaniik reh re' ruuk' i xan rob'rotik chik wach, reh chi q'e' holohik neenk'utinik.³Re' hat naa aq'oriik kuuk' chu'nchel i wilik kina'ojb'al, re' wo' taqe i nuye'em kina'ojb'al i hin, reh chi neenkiyejaa' ruholohaq so' aawas Aarón, Chi je' re' neenakuxisaj reh chi neenkahnik chi k'amal b'eeh aj tiij chub'aan i nukamaj.⁴Re' i ruso' naa ayejaam, re' taqe i wili: Re' i reh chi' rik'ux, re' ruso' ma' nimaq ta rooq, re' i runim rooq so', re' ruso' xa rutak'aa' chi riij, re' i b'ak'b'al paam, re' ruuk' itz'ihy lino. Eh naa wo' ayejaam kiso' taqe i rak'uun, reh chi nee kikahnik chi k'amal b'eeh aj tiij panukamaj.⁵Eh re' i kiso', ruuk' i oro wach itz'ihy, ruuk' i raxmuqik, ruuk' i kaq muqik, ruuk' i kaq itz'ihy, ruuk' itz'ihy lino naakiyejaam.

⁶Re' i ru k'isiin rooq so', ruuk' i oro wach itz'ihy, ruuk' i raxmuqik, ruuk' i kaq muqik, ruuk' i kaq itz'ihy, ruuk' i itz'ihy lino, naa kiyejaam.⁷Eh ka'pehr itz'ihy jehlb'al reh nah kitileb', ar naa ruk'ulum riib' chi kijurub'.⁸Re' i b'ak'b'al paam chinaah ru k'isiin rooq so' xa jinaj ruwii' ruuk' i ruso' naa rub'anam. Eh ruuk' i oro wach itz'ihy raxmuqik laj itz'ihy, ruuk' i kaq muqik, eh kaq itz'ihy, ruuk' i holohaq itz'ihy lino, naa kiyejaam.

⁹Eh naa wo' asik'im ki'ib'-oq ab'aj ónice, neenatz'ihb'aaj chuwach i kib'ihnaal i kab'laj chi rak'uun i Israel.¹⁰Waqiib' i kib'ihnaal naa atz'ihb'aam chuwach ab'aj jinaj. Eh waqiib' i kib'ihnaal naa atz'ihb'aam chuwach ab'aj jinaj, chi tuslik wach naa atz'ihb'aam re' q'oreel nik' wach noqxi-aasjik chaloq.¹¹Re' naa rutz'ihb'aniik reh taqe i b'ihnaal, chuwach i ki'ib' chi ab'aj re' ruuk' ixtinchol rub'aan, naa ruk'otom paam taqe i ab'aj. Je' rukab' i rub'aan i ehtalil inkahnik chi jumpech, eh nee rukoj i oro chi chii' i jehlb'al reh nah tileb'.¹²Eh naa wo' akojom chuwach i b'ak'b'al reh i kikok' taq rooq ruso' i k'amal kib'eeh aj tiij, je' oq wach ab'aj i tz'ihb'amaj reh chi ma' naa ta kisahchiik pank'uxliis i kab'laj ch'uq chi aj Israel. Chi je' re' nee ruk'am nah tileb' i Aarón i kib'ihnaal aj Israel, noq naa rub'aan i nukamaj i hin, hin Dios.¹³Eh naa akojom i koq i xti manlik oro chi chii' i jehlb'al reh nah tileb'.¹⁴Eh naa wo' ayejaam jino'q i karena nee nakoj ruuk' i ki'ib' chi b'arkimaj wach re' ruuk' i oro, nee nakoj chi chii' i jehlb'al reh taqe ab'aj re' re'.

¹⁵Re' itz'ihy reh chi' rik'ux i k'amal kib'eeh aj tiij, k'uhtb'al reh i rukorkiil wach k'uxliis, re' wo' ruuk' i naayej-aam wii' i ru k'isiin rooq so' naa akojom reh. Wilik ruk'o'nalil wach, ruuk' i oro, ruuk' plata, raxmuqik laj itz'ihy kaq muqik, kaq laj itz'ihy, itz'ihy lino naa ayejaam wii'.¹⁶Eh re' re' kajtz'u'k naa a'nam, eh piim, jinaj mama' k'itub' i rooq, jinaj mama' k'itub' i wach naa a'nam.¹⁷Nee naxoyej chi holohaq ab'aj kajlok' ruwii' neena a'n, re' peet lok' nee nakoj chuwach holohaq ab'aj je' wili kib'ihnaal: sardio, crisolito, esmeralda.¹⁸Eh re' ruka'look', nee naxoyej taqe chi holohaq ab'aj je' wili kib'ihnaal: granate, zafiro, jade.¹⁹Re' roox lok' naa aaxoyem wach ruuk' i holohaq ab'aj je' wili kib'ihnaal: jacinto, ágata, amatista.²⁰Re' rukajlook', naa aaxoyem wach chi holohaq ab'aj je' wili kib'ihnaal: topacio, ónice, jaspe. Re' taqe ab'aj re' re' oro i naa akojom chi jehlb'al reh.²¹Kab'laj chi ab'aj i naa akojom, ruum re' taqe rak'uun i Israel kab'laj ch'uq taqe chi tinamit. Eh chuwach taqe i ju'jun chi ab'aj re' re', naa rutz'ihb'jiik i kib'ihnaal i ju'jun ch'uq chi aj Israel, reh chi naa rukahniik rehtalil ar chi jumpech.

²²Re' itz'ihy reh chi' kik'ux i k'amal kib'eeh aj tiij, naa ayejaam je' ruwii' karena re' ruuk' i oro b'arkimaj wach je' b'ak'b'al.²³Eh nee wo' nayejaa' ki'ib'-oq kok' kotokaq ch'ihch' re' ruuk' i oro, ar neenach'ilaa' chi chii' itz'ihy i reh chi' kik'ux i k'amal kib'eeh aj tiij.²⁴Nee wo' nakoj i ki'ib' chi karena re' ruuk' i oro, chupaam i kok' kotokaq ch'ihch' wilkeeb' chi chii' itz'ihy reh chi' kik'ux i k'amal kib'eeh aj tiij.²⁵Eh re' i ki'ib' chi ju' karena neenach'ilaa' chinaah i ki'ib' chijehlb'al reh, neenach'ilaa' reje chi korik ruuk' i b'ak'b'al reh i ru k'isiin rooq so' i k'amal kib'eeh aj tiij.²⁶Nee wo' chik inayejaa' ki'ib' oq chi kok' kotokaq ch'ihch' re' ruuk' i oro, nee nakoj chi chii' panyuuq' itz'ihy reh chi' rik'ux i k'amal kib'eeh aj tiij, re' inkahnik chi chii' i ruso' k'isiin rooq.²⁷Eh nee wo' chik inayejaa' ki'ib'-oq chik chi kok' kotokaq ch'ihch' re' ruuk' i oro, nee nakoj chuwach i b'ak'b'al reh i ru k'isiin rooq so'. Xa re' la' chi ri'sil naa akojom ar re' i b'ojooj wii' taqe itz'ihy re' re'. Eh ar nee nakoj chinaah johtoq i k'isiin i b'ak'b'al reh i ru k'isiin rooq' so'.²⁸Chi je' re' neen kik'ul ki'ib' kok' kotokaq ch'ihch' wilik reh, i reh chi' ruk'ux neen kik'ul kiib' ruuk' i kok' kotokaq ch'ihch' wilik reh i ru k'isiin rooq' so'. Eh chinaah johtoq i b'ak'b'al reh i ru k'isiin rooq so', naa aye'em, reh chi ma' nee ta roq'taaj riib'.²⁹Chi je' re', re' Aarón noq neenokik chupaam i itz'ihy naah paat loq'oomb'al weh, rukojom itz'ihy reh chi' rik'ux, k'uhtb'al reh i rukorkiil wach k'uxliis, eh naa wo' ruk'amam chi' rik'ux i kib'ihnaal i kab'laj chi rak'uun i Israel chi nuwach i hin, hin Dios reh chi juneliik neekik'ulik panuk'ux.³⁰Eh nee nakoj chuwach itz'ihy reh chi' rik'ux i k'amal b'eeh aj tiij i Urim, ruch'ihil i Tumim, re' taqe re' k'uhtb'al reh i rukorkiil wach k'uxliis. Reh chi re' i Aarón noq neenchalik chi nuwach i hin, hin Dios. Eh chi je' re' nee ruk'am chi' rik'ux k'uhtb'al reh i korik, chi nuwach i hin, hin Dios.

³¹Re' ruso', xa naa rutak'aam chi riij i ru k'isiin rooq so' rax muqik laj itz'ihy naa ayejaam wii'.³²Eh jinaj i hoop naa akanaam panyejaal, reh chi neenokik ar i naah, eh chi chii' i hoop, naa aab'olom je' rukab' i rub'olariik imb'aan taqe i kok' chaketa ma' xta kiq'ab' re' ruuk' i tz'uhuum, reh chi ma' nee ta nxih.³³Re' ruso' xa naa rutak'aam chi riij, naa akojom ruk'onalil i chii' ruuk' i je' wach granado ruuk' i itz'ihy raxmuqik, kaq muqik, kaq itz'ihy. Xilakim kok' kampano re' ruuk' i oro neena a'n, i rujunsuut i chii' i ruso'.³⁴Iraaj ruq'orom chi naa atusum reje i kok' kampano re' ruuk' i oro, eh ju'jun i je' wach granado naa akojom reje chi xilak i chi junsuut i rooq' i ruso'.³⁵Eh re' i Aarón neerutak'aa' chi riij i ruso' re' re', noq neerub'an i nukamaj. Eh noq neenokik i koq chupaam itz'ihy naah paat naa nulooq'jiik wii' i hin, hin Dios neenib'irjik i kok' kampano, eh neenib'irjik noq nee nelik chaloq, reh chi ma' nee ta nkimik.

³⁶Nee wo' nayejaa' jinaj i k'isa perepik ch'ihch' manlik oro, neenatz'ihb'aaj chuwach chi korik je' rukab' noq inkahnik jino'q i ehtalil i q'orik wili: Santohiil chuwach i QaJaaw Dios, inko'q.³⁷Ar nee nakoj i k'isa perepik ch'ihch' chuwach i rutak'aa' wach naah i k'amal kib'eeh aj tiij, neenab'ak' chi b'arkimaj wach nooq' raxmuqik inka'yik, reh chi ar neenkahnik chi jumpech.³⁸Eh eliik neen wihik yejal wach i Aarón, nee ruk'am i koq i Aarón i kimahk i aj Israel noq inkich'uwareej wach i wilik kisantohiil, noq naa kiq'asam i kisantolaj mayiij. Eh ruum i k'isa perepik ch'ihch' re' re', naa nuk'ulum i hin i kimayiij naakiye'em i aj Israel.

³⁹Re' i nim rooq itz'ihy, naa rukojom i Aarón, eh re' i naa rutak'aam wach naah wilik ruch'ikojal wach naa a'nam, eh ruuk' i itz'ihy lino i naa ayejaam, je' wo' hoq i b'ak'b'al paam naa akojom ch'ikb'al wach.⁴⁰Re' taqe i rak'uun i Aarón, naa wo' ayejaam kinimaq rooq so' i keh, je' wo' hoq b'ak'b'al kipaam, naa wo' ayejaam i naakitak'aam wach kinaah, reh chi neenye'arik kiloq'il, eh holohik nee kik'utinik.

⁴¹Ruuk' taqe re' naa atiq'aam i Aarón i aawas, je' wo' taqe i rak'uun. Eh neenachihkaaj aseite wach kinaah, reh i kikuxesjiik, eh nee kikahnik chi k'amal kib'eeh aj tiij taqe chub'anariik i nukamaj.⁴²Naa wo' ayejaam kich'ut weex, ruuk' itz'ihy lino nee nelik nah kituuq nah kich'ehk neemponik, reh chi neenkikoj chupaam i kinimaq rooq so'.⁴³Reh chi re' Aarón, re' taqe i rak'uun naa kikojom i kiso' re' re', noq neekiokik chupaam i nuSantolaj itz'ihy naah paat molb'al iib', oon re' noq neekiokik i koq wach artaal noq naa kianam i nukamaj, chupaam i ye'aab' xti wilik rusantohiil. Reh chi ma' xta nee kimahkunik wii', reh chi ma' nee ta kikimik. Re' wili jinaj k'uhb'aal ma' naa ta chik rumahyiik rub'aan, naa rukamaniik ree reeh je' wo' keh i riih rumaam. Re' kikuxesjiik taqe i k'amal b'eeh aj tiij (Lev 8.1-36)

¹Re' hat je' wili i naa a'nam, naa akuxisam taqe reh chi nee kikahnik chi k'amal kib'eeh aj tiij chub'aan i nukamaj. Nee nak'am cho jino'q i k'isa k'ijol wakax, ki'ib'-oq imas tentzun, i manlik wach ruti'jolal.²Eh nee nak'am taqe chaloq i kaxlanwi'k ma' kojooj ta ch'amb'esb'al reh, taqe i kaxlanwi'k q'e' suq ma' kojooj ta ch'amb'esb'al reh. Neenak'am chaloq i kotokaq kaxlanwi'k i chihooj laj trigo korjinaq wii', eh naakik'teesjiik pan aseite.³Re' taqe re' nee nayeew pan jino'q k'isa chakach junq'ahteesjiik naa a'nam chi amayiij ruuk' i k'isa imas wakax, i ki'ib' chi imas tentzun.⁴Eh nee nak'am chaloq i Aarón ruch'ihil taqe rak'uun chi chii' i ru puertahiil i nuSantolaj itz'ihy naah paat molb'al iib', cha q'or keh chi ki a'n kitiin.⁵Eh nee nakoj i ruso' re' ruuk' inkikoj i k'amal b'eeh aj tiij, chakoj chi riij i Aarón i runim rooq so', i ru k'isiin rooq so', i ruso' xa naa rutak'aam chi riij i ru k'isiin rooq so', ruch'ihil i reh chi' rik'ux kow chab'ak' ruuk' i b'ak'b'al reh i ru k'isiin rooq so'.⁶Nee nakoj i rutak'aa' wach naah, eh chuwach i re', nee nakoj i k'isa perepik ch'ihch' re' ruuk' i manlik oro, re' i neenk'uhtanik reh chi wilik rusantohiil.⁷Eh nee nak'am chaloq i aseite kuxesb'al, neenachihkaaj wach naah i Aarón reh chi neenakuxisaj, reh chi neenkahnik chi k'amal b'eeh aj tiij.⁸Nee wo' naq'or keh i rak'uun chi kijil i koq kiib', eh nee nakoj i kinimaq rooq so' i keh.⁹Re' Aarón, re' taqe i rak'uun, neenab'ak' i kipaam chi kow, eh naa akojom chi korik i naa rutahkiik wach kinaah. Chi je' re' nee nayeew kajaawriik chi k'amal b'eeh aj tiij taqe chi juneliik, re' wili jinaj k'uhb'aal, ma' naa ta chik rusahchiik wach.

¹⁰Eh nee nak'am i koq i k'isa imas wakax ko chupaam i koq i nuSantolaj itz'ihy naah paat molb'al iib'. Reh chi re' Aarón, re' taqe i rak'uun, ar neen kiyeew i kiq'ab' chinaah i chikop re' re'.¹¹Re' hat ar naa akansam i k'isa imas wakax chi nuwach i hin, hin Dios chi chii' i ru puertahiil i nuSantolaj itz'ihy naah paat molb'al iib'.¹²Re' hat nee nak'am cho ruuk' i ju' aq'ab' i rukik'eel i k'isa imas wakax, nee nach'ulej chuwach taqe ruk'aa' i artaal. Eh re' i kik' neenqohxanik neenachihkaaj i koq waraa' artaal.¹³Eh naa awesam i q'ina' chuwach i req'saa' i chikop re' re', je' wo' hoq i q'ina' wilik chuwach i rutamaat, i q'ina' wilik chikiwach i kab'chel i rukinaq'iil i paam. Re' taqe i re' neenak'at chuwach i artaal.¹⁴Eh re' rutib'kal, eh re' rusaa', eh re' i riij i k'isa imas wakax, chi riij i itz'ihy naah paat naa ak'atam reje. Ruum re' taqe re' chi riij i mahk ink'atarik chi mayiij.

¹⁵Neenak'am chaloq jinaj keh i ki'ib' chi imas tentzun, reh chi re' Aarón, re' taqe i rak'uun neen kiyeew i kiq'ab' wach naah i chikop re' re'.¹⁶Chi riij i re' nee nakansaj, eh re' rukik'eel neenachihkaaj chinaah i artaal, eh nee wo' i naa chihkaaj chi junsuut i artaal.¹⁷Chi riij i re' neenawetz' i ruti'jolal, je' wo' taqe i rooq, nee wo' natz'aj kiwach taqe i req'saa' eh jinaj nee nayeew wii' ruuk' i naah.¹⁸Eh nee wo' nak'at i imas tentzun re' re' chi mayiij chuwach i artaal, ye'b'al nuloq'il i hin, hin Dios, re' mayiij q'e' ink'ohnik.

¹⁹Chi riij i re', nee wo' chik i nak'am chaloq i imas tentzun jinaj, re' Aarón re' taqe i rak'uun neen kiyeew i kiq'ab' wach naah.²⁰Neenakansaj i imas tentzun re' re', eh nee nakoj k'isinoq i rukik'eel chi raa' i rusak'aaj xikin i Aarón, je' wo' taqe i raa' i rusak'aaj i kixikin i rak'uun. Eh nee wo' nakoj chusak'aaj i rumaam kiq'ab', je' wo' chusak'aaj i rumaam kooq, re' i ruqox i kik' neenachihkaaj chinaah i artaal, eh chi junsuut i artaal.²¹Re' kik' nee nayeew chuwach i artaal ruch'ihil aseite, kuxesb'al, neenakihraaj wach naah i Aarón, je' wo' chinaah i ruso'. Eh nee wo' nakihraaj chikinaah taqe i rak'uun, je' wo' chinaah i kiso' i keh. Chi je' re', neenakuxisaj i Aarón, je' wo' taqe i rak'uun, nee wo' inakuxisaj i kiso' reh chi nee kikahnik chi kuxisamaj taqe.

²²Eh neenawesaj i ruq'ina'iil wilik raa' rujeeh imas tentzun, i q'ina' wilik chuwach taqe i req'saa', i q'ina' wilik chuwach i rutamaat, i wilik chikiwach i kab'chel i rukinaq'iil paam. Eh nee wo' nawesaj i q'ina' wilik chuwach i rusak'aaj rutuuq, ruum re' imas tentzun re' re', naa rukamaniik chi kuxesb'al keh i k'amal kib'eeh aj tiij.²³Eh re' taqe i kaxlanwi'k ma' kojooj ta ch'amb'esb'al reh naa aye'em pank'isa chakach chi nuwach i hin, hin Dios, nee nak'am chaloq jino'q i kaxlanwi'k re' ruuk' i kotokik, je' wo' hoq i kaxlanwi'k xilakimaj aseite ruuk', eh jinaj i kaxlanwi'k ma' piim taj.²⁴Chu'nchel i re' nee naq'asaj pan q'ab' aawas Aarón, nee wo' naaq'asaj pan kiq'ab' i rak'uun, re' keh neenkiq'asaj chi mayiij chi nuwach i hin, hin Dios.²⁵Eh nee wo' chik i nak'am keh i mayiij nee taqe nak'at chuwach i artaal ruch'ihil taqe i mayiij junch'uq, eh re' taqe re' q'e' ink'ohnik laj mayiij inwik'raaj i hin, hin Dios. Re' taqe i mayiij re' re' naa ak'atam chi ye'b'al nuloq'il i hin.

²⁶Re' neenakuxisaj wii' i Aarón, nee nak'am chaloq i chi' rik'ux i rak'uun imas tentzun, eh nee naq'asaj chi mayiij chi nuwach i hin, hin Dios, re' tiwik re' re' hat naa ak'uxwiik reh.²⁷Eh pareh naa aye'em i chi' ruk'ux imas tentzun, pareh naa aye'em i rutuuq, je' wo' hoq i ruti'jolal re' i naa ruye'ariik chi q'e' chihooj laj mayiij. Re' taqe tiwik re' re', re' Aarón, re' taqe rak'uun naakik'uxwiik reh.²⁸Re' taqe i wili naa rub'aan ruuk' i Aarón, kuuk' taqe i rak'uun, eh naa rukahniik chi jinaj k'uhb'aal chikinaah i aj Israel. Re' taqe i mayiij re' re' xa pankik'ux i aj Israel naa ruchaliik chi naakiye'em chi kitoob'aal. Re' i mayiij re' re', re' naa ruk'amwiik taq aweh panotob'il wuuk' i hin.

²⁹Re' taqe i ruso' i Aarón wilik ruloq'il, naa rukahniik keh taqe i riih rumaam. Re' noq naa rukuxeesjiik i kiso', naa wo' kik'ulum i kajaawriik chi naa kikahniik chi k'amal b'eeh aj tiij taqe chub'anariik i nukamaj.³⁰Re' taqe i riih rumaam i Aarón naa kikahniik chi k'amal b'eeh aj tiij, koq'uun chi jilow. Eh noq naakokiik chupaam i nuSantolaj itz'ihy naah paat molb'al iib', chuq'ahteesjiik i mayiij wuquub' q'iij, naa kikojom i kiso' re' re'.

³¹Chi riij i re', nee nak'am chaloq imas tentzun re' i naa akojom chi mayiij neenachaq'saj i rutib'kal chupaam jino'q i ye'aab' q'e' looq'.³²Re' Aarón ruch'ihil taqe rak'uun, naakik'uxwiik reh i rutib'kal i imas tentzun re' re', je' wo' hoq i kaxlanwi'k naa ruwihiik pank'isa chakach naa ruwihiik panelb'aal reh i nuSantolaj itz'ihy naah paat molb'al iib'.³³Re' keh naakik'uxwiik reh taqe re', ruum naa ruq'ahteesjiik chi mayiij chi riij i kimahk. Eh noq kikuxeesjik ruuk' taqe re' naakik'ulum i kajaawriik, chi k'amal b'eeh aj tiij taqe. Eh ma' jino'q i tokoom naa ruk'uxwiik reh taqe re' ruum wilik kisantohiil.³⁴Eh wila' ko wilik i kaxlanwi'k, oon tiwik naa ruqohxaniik reh chi junwaar, i naakikuuxesjiik wii', inchol chi naa ak'atam chu'nchel. Ma' awach ta chik naa ruk'uxwiik reh, ruum re' taqe re' wilik kisantohiil.

³⁵Eh re' hat, je' re' naa a'nam ruuk' i Aarón, je' wo' kuuk' taqe i rak'uun, re' q'oreel nik' wach taqe i xnuq'or aweh. Eh chuwach i wuquub' q'iij, naa akuxisam taqe noq naakik'ulum i kajaawriik.³⁶Eh chuwach i wuquub' q'iij re' re', ju'jun i kok' imas wakax naa akansam chi mayiij, reh chi neenkuyarik taqe i kimahk. Naa asaqb'isam wach i artaal, ruuk' i ruye'ariik i mayiij chi riij i mahk, naa ajalk'iim i aseite chinaah i artaal reh i rukuxeesjiik.³⁷Chuwach i wuquub' q'iij naa akansam i chikop naa aq'asam chuwach i artaal, chi riij i mahk. Eh naa akuxisam taqe reh i nukamaj, eh neenkahnik chi jinaj artaal wilik rusantohiil, chib'ih jariik i nenooj k'oloq chuwach i artaal, xanoq wo' naa rukahniik chi wilik rusantohiil. Re' mayiij inq'ahtesjik rajlaal i q'iij (Num 28.1-8)

³⁸Re' hat rajlaal q'iij naa aq'asam wach artaal ki'ib' chi rak'uun tentzun, re' ruuk' i jinaj haab' wilik keh.³⁹Jinaj i naa aq'asam chi mayiij parujohtiik i q'iij, eh jinaj i naa aq'asam paruqajiik i q'iij.⁴⁰Eh noq nee naq'asaj chi mayiij i peet rak'uun tentzun nee nak'am chaloq jino'q k'isa chakach xti chihooj laj arina, eh nee naxilakeej ruuk' jino'q i nimlaj lemeta i aseite olivo, nee wo' inajalk'iij jino'q nimlaj lemeta i riis uuva.⁴¹Je' wo' chik re' i neena a'n ruuk' i rak'uun tentzun nee naq'asaj chi mayiij paruqajiik i q'iij, nee wo' chik i naxilakeej aseite ruuk' i arina nee wo' naxilakeej i riis uuva ruuk' neenak'at chi mayiij chi nuwach i hin, hin Dios ruum re' re' imponik chi nuwach i hin.⁴²Re' k'atoj mayiij wili, naa aye'em chi ye'b'al nuloq'il panookb'al reh i nuSantolaj itz'ihy naah paat molb'al iib', re' naa kaat nuq'o'reem wii'. Ma' naa ta chik rumahyiik ruye'ariik naakiye'em ajaab'ees je' wo' taqe i kiih kimaam.⁴³Ar wo' naa nuwihiik kuuk' taqe i aj Israel, re' ye'aab' re' re' naa nukuxisam ruuk' i nuloq'il.⁴⁴Eh re' i nuSantolaj itz'ihy naah paat molb'al iib', naa nukuxisam, je' wo' hoq i artaal naa wo' nukuxisam. Eh naa wo' nukuxisam i Aarón ruch'ihil taqe i rak'uun reh chi nee kikahnik chi k'amal b'eeh aj tiij taqe chub'aan i nukamaj.⁴⁵Re' hin naa nuwihiik kuuk' i aj Israel, re' hin naa nukahniik chi ki Dios.⁴⁶Chi je' re', naa kinab'eem chi re' hin i kaJaaw i ki Dios, xineesanik cho keh ar Egipto, reh wo' chi naa nuwihiik kuuk' i hin, hin ki Dios. Re' artaal xk'atarik cho wii' i insensia (Ex 37.25-28)

¹Re' hat naa ayejaam jino'q i artaal, k'atb'al insensia, re' ruuk' i chee' acacia naa akojom reh.²Kajtz'u'k neena a'n, ka'k'itub' i rooq neena a'n, je' wo' re' nimaal i wach neena a'n. Eh re' runajtiil naah jinaj b'ara neena a'n, re' taqe i ruk'aa' i artaal re' re' xa jinaj reliik ruuk' i runimaal neena a'n.³Eh nee nakoj i manlik oro chuwach i tz'apb'al naah, je' wo' taqe i panjojol kajchel, je' wo' chi riij taqe i ruk'aa', eh nee nakoj junrahp-oq i oro chi chii'.⁴Eh naa wo' akojom taqe i kotokaq ch'ihch' chi ri'sil qohoq i ruk'o'nalil. Ju'jun i nee nakoj pantaq rutz'u'kaal k'ul tar chel. Reh chi chupaam taqe i kotokaq ch'ihch' re' re' neenik'ik i ki'ib' chi chee' k'amb'al reje reh i artaal.⁵Re' i ruq'e'liik, re' ruuk' i chee' acacia naa akojom reh, naa wo' akojom oro chi riij kab'chel.⁶Eh ar nee nayeew i artaal re' re', chuwach i tasb'al paam i paat chucheel i wilik wii' i loq'laj kaxa molik wii' i tz'ihb'amaj wii' i lajeeb' k'uhb'aal, panyejaal i tz'apb'al naah re' i naa kaat nuq'o'reem wii'.⁷Re' Aarón noq naa ruyejaam taqe i saqumb'al, pantaq wahq'eq naa ruk'atam ink'ohnik laj insensia chinaah i artaal re' re'.⁸Eh naa wo' ruk'atam i insensia chinaah i artaal pantaq xq'eq noq naa ruqopom taqe i saqumb'al. Re' wili naa rub'aan chi nuwach i hin, hin Dios, xajarch'iht pa' chi k'achareel i naakik'iik.⁹Re' hat ma' xta chik jino'q tokoom insensia naa ak'atam chinaah i artaal re' re', ma' xta wo' jino'q i k'atoj mayiij naa aye'em chinaah, ni xata re' mayiij re' ruuk' i xa chi naq'wach. Ma' naa ta wo' achihkaam i riis uuva chinaah i mayiij.¹⁰Re' artaal wili naa rukuxesjiik chi weeh i hin, hin Dios. Re' Aarón junriim chupaam i haab' naa ruch'ulem i rukik'eel i chikop chuwach taqe i ruk'aa' i artaal. Reh chi nee nukuy i kimahk i tinamit. Ju'juriim chupaam i ju'jun chi haab' naa ruye'ariik i mayiij chinaah i artaal, eh naa ruwihiik rusantohiil, inki Dios. Re' altaar ink'atarik wi' imayij. Re' ixkitoj chi riij i kik'achariik i aj Israel

¹¹Re' QaJaaw Dios je' wo' chik wili i xuq'or reh i Moisés:

¹²Eh noq naa awik'sam jino'q i tz'ihb' chikinaah i aj Israel ajlaamb'al keh. Re' keh chi kiju'junaal naakiye'em i k'isa kitz'aaq weh i hin, hin Dios, re' naa rukamaniik chi tojb'al riij i kik'achariik. Reh chi ma' nee ta nchalik jino'q i yab'ilaal inkansanik noq neena a'n i ik'sanik tz'ihb'.¹³Eh chu'nchel i naa awajlaam, na' chawik'saj i tz'ihb', naakiye'em chi kimayiij i k'isiin ma' yejaal i onse rahliil chi plata. Je' re' k'ihaal i mayiij naakiye'em chi nuwach i hin, hin Dios ruum je' wo' re' k'ihaal i pajb'al naa ruwihiik chupaam i nupaat.¹⁴Chu'nchel i ik'inaq chi juninaq haab' i kihab'ul naa rutz'ihb'jiik i kib'ihnaal, naakiye'em weh i hin, hin Dios i tumiin je' re' k'ihaal.¹⁵Eh re' ju'jun naakiye'em i tumiin k'isiin ma' yejaal i onse chi tojb'al riij i kik'achariik. Eliik wach naakiye'em, ni xata re' i b'ehoom neenik'ik naah i naa ruye'em, eh ni xata re' i neb'aa' neensuhb'ik rooq i naa ruye'em.¹⁶Re' hat, naa amolom i tumiin re' re' naakiye'em i aj Israel chi tojb'al riij i kik'achariik. Eh naa aq'asam, reh chi neen kamanik chi loq'oomb'al weh chupaam i nuSantolaj itz'ihy naah paat molb'al iib'. Ruuk' i re' naa ruk'uliik taqe panuk'ux i aj Israel chi xkitoj chik riij i kik'achariik, inki.

¹⁷Re' QaJaaw Dios je' wo' chik wili i xuq'or reh i Moisés:

¹⁸Re' hat naa ayejaam jino'q i tuq'aab' i ha' re' ruuk' i q'an ch'ihch' naa akojom reh, re' wo' re' naa ayejaam wii' i ch'ikaab' reh. Reh chi naa rukamaniik chi ye'aab' ha' tz'ajb'al iib', ar nee nayeew panyejaal i wilik wii' i artaal ruuk' nuSantolaj itz'ihy naah paat molb'al iib'.¹⁹Eh ar neeresaj i ha' Aarón ruch'ihil taqe i rak'uun, tz'ajb'al reh i kiq'ab', i kooq.²⁰Re' keh naakitz'ajam i kooq, i kiq'ab', noq naa kokiik chupaam i nuSantolaj itz'ihy naah paat molb'al iib', je' wo' noq naa kokiik i koq wach artaal, reh chi naa kiq'asam chi nuwach i k'atoj mayiij i hin, hin Dios, chi je' re' ma' nee ta kikimik.²¹Reh chi ma' nee ta kikimik, koruman chi naa kitz'ajam i kiq'ab', i kooq. Eh re' wili naa rukahniik chikinaah chi jinaj k'uhb'aal reh chi naa rub'anam i Aarón, eh ma' naa ta wo' chik kikanaam rub'aan taqe i riih rumaam, inki. Re' aseite xkamanik chi kuxesb'al

²²Re' QaJaaw Dios je' wili i xuq'or reh i Moisés:

²³Re' hat cha sik' i holohik ch'ahn, re' ruuk' inokik chi nk'ohnik laj iq'oom eh nee wo' nasik' kab'laj-oq libra xti chihooj laj mirra, nee wo' nasik' waqiib'-oq libra i canela, eh nee wo' nasik' waqiib' oq libra i ruche'el rooq cálamo q'e' ink'ohnik.²⁴Eh nee wo' nasik' kab'laj-oq libra re' ruuk' i casia, ruum je' re' k'ihaal i pajooj naa rub'aan ar chupaam i nupaat, nee wo' nasik' ixib'-oq nimaq lemeta ruuk' juntoq i aseite olivo.²⁵Ruuk' chu'nchel i re' naa ayejaam i ha' laj iq'oom je' rukab' i rub'an inye'janik cho reh ink'ohnik laj iq'oom re' re' naa rukahniik chi santo laj aseite re' i naa ruye'ariik wach kinaah i naakikamaniik panukamaj.²⁶Eh nee wo' najalk'iij chinaah i santo laj itz'ihy naah paat molb'al iib', je' wo' chinaah i loq'laj kaxa naa rumolariik wii' i k'uhb'aal.²⁷Eh nenajalk'iij chinaah i k'isa mexa, chikinaah i xa chib'ih jariik naakikamaniik ar, chinaah i ye'aab' kantela, chinaah i xa chib'ih jariik i wilik ar, je' wo' chinaah i artaal naa ruk'atariik wii' i insensia.²⁸Eh nee wo' najalk'iij chinaah i artaal naa ruk'atariik wii' i mayijimaj chikop, chikinaah chu'nchel i xa chib'ih jariik naakikamaniik ar, chinaah i tuq'aab' ha', chinaah i ch'ikaab' reh.²⁹Je' re' kikuxesjiik naa a'nam taqe re', reh chi naa kikahniik chi wilik kisantohiil. Xa chib'ih pa' jariik i neekitz'a'jiik ruuk' taqe wili, naa kikahniik chi santohimaj taqe.

³⁰Eh re' aseite re' re', nee wo' najalk'iij chinaah i Aarón reh rukuxeesjiik, je' wo' chikinaah taqe i rak'uun, reh chi nee kikahnik chi k'amal b'eeh aj tiij taqe chi nuwach.³¹Eh je' wili i naa aq'orom keh i aj Israel: Re' aseite wili i wilik rusantohiil, eh naa rukamaniik chi kuxesb'al keh i naa kokiik chub'aan i rukamaj i QaJaaw Dios nik' nimaal taqe i kiih kimaam.³²Eh re' aseite wili, ma' naa ta jalk'iim chinaah jino'q i winaq xa awach, ni xata neenayejaa' chik jino'q aseite je' rukab' i wili. Ruum re' aseite wili xti wilik rusantohiil. Je' re' noq naa wo' rutz'a'jiik chi wilik rusantohiil.³³Eh wila' awach ixye'janik reh, je' rukab' i aseite wili, wila' xujalk'iij wach naah jino'q i xama' eht'alimaj ta wach winaq, oon xa chib'ih jariik, naa rehtesjiik reje chi xilak i rutinamiit tiko'q keh, inki.

³⁴Re' QaJaaw Dios je' wili i xuq'or reh i Moisés:
Re' hat eliik wach k'ihaal naa a'nam, naa ak'amam chaloq re' ruuk' taqe i xa chib'ih jariik q'e' ink'ohnik: Re' i ruq'olol i chee' q'e' ink'ohnik, re' i ruq'olol xti manlik insensia, re' i gálbano q'e' ink'ohnik.³⁵Ruuk' taqe i re' neenayejaa' jinaj i manlik insensia, wilik rusantohiil. Eh nee naxilakeej chi korik chu'nchel, je' rukab' i rub'an inye'janik reh ink'ohnik laj iq'oom³⁶Re' hat neenake'j wach chi korik yejaal oq taqe iq'oom re' re', nee nayeew chuwach i loq'laj kaxa, re' i naa ruwihiik chupaam i nuSantolaj itz'ihy naah paat molb'al iib', oon re' i naa qak'ulum wii' qiib' awuuk'. Re' insensia wili naa ruwihiik rusantohiil.³⁷Re' hat ma' nee ta chik neenayejaa' jino'q i tokoom insensia je' rukab' i wili, reh chi nee ta wo' chik inkamanik chi kuxesb'al. Ruum re' insensia wili q'asamaj chi nuwach i hin, eh q'e' looq' taq chaaweh i hat.³⁸Eh wila' awach i xuyejaa' insensia je' rukab' i re', eh xa re' raaj chi neerub'an rusuqkiil i ruk'ohnkiil, naa rehtesjiik reje chi kixilak i rutinamiit, inki. Re' noq sik'arik wach i Bezaleel ruch'ihil Aholiab (Ex 35.30—36.1)

¹Re' QaJaaw Dios je' wili i xuq'or reh i Moisés:

²Chab'iraj i naa nuq'orom aweh, re' hin chi kixilak i junch'uq chi riih rumaam Judá, xnusik' cho wach i Bezaleel rak'uun i Uri, riih i Hur.³Eh xnuyeew reh i Santolaj Wuxlab'al, xnuyeew runa'ojb'al, xnuyeew reh i holohik laj kapeew, xnuk'uhtaaj reh chib'ih taqe i naa rub'anam, eh chi wilik taqe i kamanik naa rucholiik rub'aan.⁴Re' Bezaleel, naa rub'anam ruyejeb'jiik i xa chib'ih jariik ruuk' oro, ruuk' plata, ruuk' q'an ch'ihch'.⁵Eh neerub'an ruyejeb'jiik i xa chib'ih jariik ruuk' ab'aj, ruuk' chee' neerusehkaaj wach. Nee wo' nchol rub'aan chu'nchel i kamanik.⁶Re' hin xnukoj chi to'ool reh i Aholiab, rak'uun i Ahisamac inchalik paruyuq'ul i Dan. Chu'nchel i wilik kina'ojb'al xnuyeew ruman i kina'ojb'al, reh chi neenkian rub'aan taqe i kamanik xnuq'or aweh.⁷Re' taqe i wili naa kiyejaam: Re' i nuSantolaj itz'ihy naah paat molb'al iib', re' loq'laj kaxa naa rumoliik wii' i k'uhb'aal, re' tz'apb'al naah. Re' chu'nchel i xa chib'ih jariik i naakikamaniik ar.⁸Re' i k'isa mexa ye'aab' kaxlanwi'k, re' taqe i xa chib'ih jariik i naakikamaniik chinaah, re' i ye'aab' kantela re' ruuk' i manlik oro, re' taqe i xa chib'ih jariik i naa rukamaniik reh i re', re' i artaal naa ruk'atariik wii' insensia.⁹Re' i artaal naa ruk'atariik wii' taqe i mayiij, re' taqe i xa chib'ih jariik naa rukamaniik ar, re' tuq'aab' ha' re' ruuk' q'an ch'ihch', eh re' ch'ikaab' reh.¹⁰Re' taqe i kemooj itz'ihy, re' i rusik'ooj wach so' i k'amal b'eeh aj tiij Aarón, re' kiso' i rak'uun, re' naa kikojom noq naa kianam i kikamaj chi k'amal b'eeh aj tiij taqe.¹¹Re' i aseite naa rukamaniik chi kuxesb'al, re' insensia xiik' naah k'ohnkiil noq naa ruk'ahtiik chupaam i nupaat. Eh re' taqe i wilik kina'ojb'al re' re', naakiye'janiik reh chu'nchel i re', eh nik' wach i xnuq'or aweh je' wo' re' rub'aan naa kianam, inki. Re' i hi'limb'al q'iij

¹²Re' QaJaaw Dios je' wili i xuq'or reh i Moisés:

¹³Re' hat je' wili i naa aq'orom keh i aj Israel: Re' QaJaaw Dios je' wili i xuq'or: Re' keh koruman chi naa kimolom i hi'limb'al q'iij. Ruum re' i re' naa rukahniik chi rehtalil chikiwach i keh, chi nuwach i hin, chikiwach i kiih kimaam chi re' hin i Dios kinye'wik kisantohiil.¹⁴Re' i hi'limb'al q'iij q'e' looq' chi kekeh, inchol kimolom. Eh awach i ma' xumol i q'iij re' re', naa ruq'atariik i q'orik chinaah, reh i rukanteesjiik. Awach i xkamanik chupaam i q'iij re' re', naa rehtesjiik chi kixilak i rutinamiit.¹⁵Manlik waqiib' q'iij naakikamaniik, eh re' i ruwuuq q'iij naakihi'lisam, re' i kanamaj chi hi'limb'al q'iij. Eh wii awach i xkamanik pan hi'limb'al q'iij naa ruq'atariik i q'orik chinaah reh i rukanteesjiik.¹⁶Je' re' noq re' taqe i aj Israel inchol kimolom i hi'limb'al q'iij reh chi naa rukahniik chikinaah chi jinaj k'uhb'aal ma' naa ta chik rumahyiik rub'aan chi jumpech.¹⁷Re' re' jinaj rehtalil chi juneliik chikiwach i aj Israel wuuk' i hin, ruum re' hin Ajaab'ees Dios waqiib' q'iij xnuyejaa' i taxaaj ruch'ihil i wach ak'al. Eh paruwuuq q'iij ma' xinkamanik ta chik, hi'lik chik i xnub'an, inki. Re' noq xkorjik i tiyoox je' ruwii' imas wakax (Deut 9.6-29)

¹⁸Eh noq re' QaJaaw Dios xukohlaaj i q'orik ruuk' i Moisés chinaah i yuuq' Sinaí, xuq'asaj i ki'ib' chi tz'ilom ab'aj reh i Moisés, re' i xutz'ihb'aaj wii' taqe i k'uhb'aal i Dios ruuk' i ju' q'ab'.

¹Noq xkilow i aj Israel chi ma' inqajik ta chik cho chinaah yuuq' Sinaí i Moisés, xkimol kiib' chi junsuut i Aarón, je' wili i xkiq'or reh:
Re' hoj inqaaj chi nee nayejaa' jino'q qa dios reh chi neenooj chi peet b'eeh chi qawach. Ruum re' i Moisés i x-esanik cho qeh Egipto, ma' qeht'al taj chib'ih i xuk'ul chaloq ruum ma' xqajik ta chik chaloq, inki taqe.

²Re' Aarón je' wili kichaqweesjiik xub'an:
Chawesaj taq i kika'xikin awehk'een, re' ruuk' i oro, je' wo' kika'xikin taqe awak'uun awixq'uun. Eh nee taq i nak'am cho weh ayu', inki.

³Re' taqe i aj Israel xkesaj wo' chaloq chu'nchel i kika'xikin re' ruuk' i oro xkik'am cho reh i Aarón.⁴Re' reh xuk'ul, eh xuhab'isaj ruuk' q'aaq' i oro. Eh ruuk' jinaj q'aslaj ch'ihch', xusehkaaj wach, korehtaal xkorjik chi je' ruwii' i k'isa imas wakax. Xkilow chi je' re' i aj Israel chi kunchelaal xkiq'or chi je' wili:
Re' wili i qadios x-esanik cho qeh Egipto, inki taqe.

⁵Eh noq xrib'iraj chi je' re' i Aarón, xuyejaa' jinaj i artaal chuwach i tiyoox, je' ruwii' i k'isa imas wakax, kow xuq'or chi je' wili:
Iqal inqa'an jino'q i ninq'iij chi loq'oomb'al reh i QaJaaw Dios.

⁶Eh noq saq'ik chi junwaar xkimol kiib' xkiyeew i mayiij, eh xkik'at i chikop chi kimayiij chuwach i tiyoox re' re', reh pahqb'al suq kiil k'uxliis. Chi riij i re', re' taqe i aj Israel xkitzunaa' kiib' chi wi'k, chi uk'ik eh xkitoq'aa' k'oyomal.⁷Eh noq xunab'eej chi je' re' i QaJaaw Dios, je' wili i xuq'or reh i Moisés:
Re' hat qajeen qohoq, ruum re' aatinamiit xawesaj taqe chaloq Egipto xkiq'eb' chik kiib'.⁸Xa chi jumehq'iil xkikanaa' runimjiik i nuk'uhb'aal xnuq'or keh chi naa kinimam. Re' keh xkiyejaa' jinaj i kitiyoox oro je' ruwii' k'isa imas wakax, yu'naak k'ahchi' kiloq'em, k'ahchi' kiye'em i kimayiij chuwach. Je' wili inkiq'or chi kunchelaal i aj Israel: Re' wili i qadios x-esanik cho qeh Egipto, inki taqe, inki.

⁹Re' QaJaaw Dios je' wili i xuq'or cho reh i Moisés:
Re' hin xnukoj chik rehtaal chi re' taqe i tinamit re' re', q'e' kow i kinaah.¹⁰Re' hat kinakanaa' chi naa nusacham kiwach ruum re' hin yohb'aal wach i nujosq'iil chalik chikinaah. Eh re' chik taqe awak'uun awixq'uun i hat naa nuk'ihaaxb'isam, korehtaal kiponik chi nimlaj tinamit, inki.

¹¹Eh re' i Moisés xub'an rutiij je' wili xuq'or: QaJaaw Dios.
¿Chib'ih reet noq yohb'aal wach aajosq'iil xchalik chikinaah aatinamiit re' re'? xanaah re', re' wo' hat xat esanik cho keh Egipto ruuk' animaal awajaawriik.¹²Chib'ih reet noq naa aye'em q'ab' chi neenkiq'or aweh i aj Egipto chi je' wili: ¿Re' Dios re' re', xk'ulik resaj taqe i aj Israel ayu', xa re' i kikanteesjiik xraaj chupaam taqe i raxchee', re' xraaj i reh chi xusach kiwach chi jumpech? inko'q taqe. Re' hin i nuq'or aweh chi i k'oq aajosq'iil, chajal wach akapeew, maa a'n ti' k'axik keh aatinamiit.¹³K'oloq panak'ux i Abraham, i Isaac, i Jacob, Israel i rukab' b'ih re' i xi wihik cho chi awaj kamanoom, re' hat xaq'or cho keh i xti korik, je' wili i xaq'or keh: Re' hin naa nuk'ihaaxb'isam taq awiih aamaam, korehtaal kiponik chi je' k'ihaal i ch'umiil wilkeeb' pan taxaaj. Eh chu'nchel i ye'aab' nuq'orom taq rib'iral aweh, naa nuye'em taq chi akooch chi juneliik ti kikeh, inki.

¹⁴Re' QaJaaw Dios xujal wo' wach i rukapeb'aal, ma' xusach ta wo' kiwach i rutinamiit.¹⁵Chi riij i re' xqajik chaloq i Moisés nah yuuq' Sinaí, xuk'am chaloq i ki'ib' chi tz'ilom ab'aj, k'ultar xutz'ihb'aaj chee Dios i ruk'uhb'aal chuwach taqe i ab'aj re' re'.¹⁶Re' wo' hoq i Dios xye'janik reh i ki'ib' chi tz'ilom ab'aj, eh re' wo' reh xtz'ihb'anik i ruk'uhb'aal chuwach taqe ab'aj re' re'.

¹⁷Eh noq xrib'iraj i Josué chi k'erik kichii' taqe i aj Israel, je' wili i xuq'or reh i Moisés:
Re' i tinamit k'erlik kichii', peleto ta b'ila' inki a'n aha' kimolom wii' kiib', inki.

¹⁸Re' Moisés je' wili i chaq'wik xub'an:
Re' choqik k'ahchi' keeb' ma' re' ta reh peleto, ni xata reh chi xi elik korik, tokoom tz'uuy i k'ahchi' keeb' noq imb'iraj i hin, inki.

¹⁹Eh noq xooj k'oloq i Moisés aha' kimolom kiib', xrilow chi wilik ar i tz'aqoj tiyoox oro je' ruwii' k'isa imas wakax, eh soon inki a'n i koq chuwach. Ma' k'isiin ta xchalik ruk'aah xukut panak'al kab'chel i tz'ilom ab'aj tz'ihb'amaj wii' taqe i k'uhb'aal, xuxereb'eej ar waraa' i yuuq' Sinaí.²⁰Eh xuchop chaloq i tz'aqoj tiyoox je' ruwii' k'isa imas wakax, xukut i koq pan q'aaq', eh xuke'j wach, xa je' chik pooq xkahnik xupukej chinaah i ha', eh xuyeew keh i aj Israel chi uuk'jik i ha' re' re'.²¹Re' i Moisés je' wili i xuq'or reh i Aarón:
¿Chib'ih jariik i xkian aweh i tinamit wili noq xamin taqe chi rub'anariik i runimaal mahk xkian? inki.

²²Re' Aarón je' wili i chaq'wik xub'an:
Qajaaw Moisés manchalik ak'aah wuuk'. Re' hat aweht'al chi re' i tinamit wili q'e' imponik chikiwach rub'aan i yiib' wach na'ojb'al.²³Re' keh je' wili i xkiq'or weh: Chayejaa' jino'q qadios reh chi nee ruk'am reje qab'eeh, ruum re' i Moisés i x-esanik cho qeh Egipto ma' inqajik ta chik chaloq, ma' qeht'al taj chib'ih i xuk'ul, inki taqe.²⁴Eh re' hin je' wili i xnuq'or keh: Awach i wilik oro kuuk' kik'am cho weh, kinki keh. Re' keh xkik'am wo' cho weh, eh re' hin xnuhaab'isaj pan q'aaq' korehtaal xkorjik i tiyoox wili je' ruwii' k'isa imas wakax inki.

²⁵Eh re' Moisés xrilow chi re' tinamit Israel xama' nkaaj ta chik nimanik. Eh chi re' Aarón xuyeew q'ab' chi xkiq'eb' runimjiik i Dios reh chi xkik'uhtaaj kik'ixb'ilaal chikiwach i nixowanik kiwach.²⁶Eh re' i Moisés xupab'aa' riib' panookb'al reh i itz'ihy naah paat kimolom wii' kiib', eh je' wili i xuq'or keh:
Awach taqe i k'ahchi' kinimam i k'achlik Dios chaloq kimol kiib' wuuk', inki, eh chu'nchel i aj Levíta xooj kimol kiib' ruuk' i Moisés.

²⁷Eh je' wili i xq'orarik keh:
Re' QaJaaw Dios je' wili i xuq'or: Chak'am taq reje aq'as laj ch'ihch' ti sutinoq taq reje chupaam i paat wilkeeb' wii' i tinamit nee taq i naa tus reje awiib' chi chii' taqe i puerta, eh nee taq inakansaj i ma' kinimanik ta weh, atoob' ta aawas atoob' ta achaaq', atoob' ta awamigo, atoob' ta aka'jaah taq, inki.

²⁸Re' taqe i aj Levíta xkian wo' hoq i xq'orarik keh ruum i Moisés, eh je' naa ixib' miil chi winaq i xkikansaj chupaam i q'iij re' re'.²⁹Eh je' wo' chik wili i xq'orarik keh ruum i Moisés:
Re' taq i hat naa taq ruye'em cha wajaawriik i QaJaaw Dios chi hat taq raj kamanoom ruum xakansaj taqe i ma' kinimanik ta reh i k'achlik Dios, atoob' ta awak'uun taq, atoob' ta aawas taq, atoob' ta achaaq' taq, xa a'n la' taq keh, inki.

³⁰Eh chi junwaar re' i Moisés je' wili i xuq'or keh i aj Israel:
Re' taq i hat jinaj i runimaal mahk taq xa a'n Je' re' noq re' i hin naa wo' chik nujohtiik ju' yuuq' re' i xiruq'o'reej wii' i QaJaaw Dios naa rojiik nupahqaam nukuyb'al reh konee oon inche rukuy taq amahk xa a'n inki.

³¹Re' i Moisés xjohtik wo' chik chinaah i yuuq' ixq'orob'jik wii' ruum i QaJaaw Dios. Je' wili i xuq'or reh i QaJaaw Dios:
Jaaw re' i tinamit, jinaj i runimaal mahk xkian chawach, ruum xkiyejaa' jinaj ki dios re' ruuk' i oro, inki.³²Re' i hin i nupahqaaj otob'il aweh chi nee ta tii nakuy kimahk i tinamit re' re'. Eh wila' ma' naa akuyum kimahk i keh, neerub'an chi neenajux i nub'ihnaal i hin chupaam i huuj atz'ihb'aam wii', inki.

³³Re' QaJaaw Dios je' wili i chaq'wik xub'an:
Re' hin xa re' wo' naa nujuxum i rub'ihnaal panu huuj awach i xmahkunik chi nuwach.³⁴Re' hat qajeen qohoq chak'am taqe reje i aj Israel chupaam i ye'aab' nuq'orom aweh. Re' i nuánjel naa ruk'amwiik ab'eeh, eh na' ponoq ruq'ijil i q'ataj q'orik, ar naa nuye'em taqe chi tojariik i kimahk i xkian, inki.

³⁵Re' QaJaaw Dios xuyeew taqe panti' k'axik i aj Israel, ruum xkiloq'ej i tiyoox re' ruuk' i oro je' ruwii' k'isa imas wakax, i xuyejaa' i Aarón. Re' QaJaaw Dios xuq'or chi naa kojiik chikiwach i aj Israel

¹Re' i QaJaaw Dios je' wili i xuq'or reh i Moisés:
Eleen reje ayu' chak'am reje i aj Israel xawesaj taqe chaloq Egipto. Eh ar naa ak'amam taqe reje chupaam i ye'aab' nuq'orom cho rib'iral reh i Abraham, i Isaac, i Jacob, chi naa nuye'em keh i kiih kimaam.²Re' hin naa nutaq'aam reje i nuánjel chi re' reh neenk'amwik reje ab'eeh. Eh naa wesam chupaam i ye'aab' re' re' taqe i aj cananeo, i aj amorreo, i aj heteo, i aj ferezeo, i aj heveo, aj jebuseo.³Re' taq chik i hat naa awojiik chupaam i raxpaam ak'al re' i nelik wii' i ma' k'isa suq atoob'. Eh re' hin ma' naa ta wojiik haa' taq chaxilak. Ruum manusach inche taq awach pamb'eeh, ruum re' hin weht'al chi q'e' taq kow anaah, inki.

⁴Eh noq xkib'iraj i q'orik re' re', re' tinamit ma' k'isiin ta xchalik rutz'irkiil kiwach. Kisaj i kiholohaq so' chikiij, je' wo' i xooyb'al kiib'.⁵Re' QaJaaw Dios ruq'orom wo' reh i Moisés chi je' wili: Re' hat cha q'or keh i aj Israel chi q'e' kow i kinaah, nee ta kinwihik chi kixilak nee naq i nusach kiwach. Eh yu'naak kesaj chikiij i kiholohaq so', je' wo' hoq i xooyb'al kiib', eh neenwilow chi neenub'an kuuk', inki.

⁶Je' re' noq re' taqe i aj Israel ar waraa' i yuuq' Horeb xkimay reje rukojariik i kiholohaq so', je' wo' hoq i xooyb'al kiib'.

⁷Eh re' i Moisés xuk'am reje i santo laj itz'ihy naah paat, najt xuyeew reje ruuk' i ye'aab' kimolom wii' kiib' i aj Israel. Re' i santo laj itz'ihy naah paat re' re', re' naa rub'anam wii' i ula'inik i Dios i rub'ihnaal xukoj. Eh noq awach wilik iraaj rupahqaam ree Dios, ar inooj chupaam santo laj itz'ihy naah paat wilik najt reje ruuk' i kimolom wii' kiib' i aj Israel.⁸Eh noq inooj i Moisés chupaam i santo laj i itz'ihy naah paat aha' i ruq'o'reej wii' i Dios, chu'nchel i tinamit inkipab'aa' kiib' chi chii' i ru puertahiil i ki-itz'ihy naah paat. Ar inki tah reje i Moisés korehtaal inokik chupaam i santo laj itz'ihy naah paat.⁹Eh noq inokik i Moisés chupaam i santo laj itz'ihy naah paat, jun mama' rahp i suutz' ink'ulik ruyeew riib' chi chii' i puerta reh i santo laj itz'ihy naah paat, noq re' i Moisés k'utaaj i rub'an ruuk' i QaJaaw Dios.¹⁰Noq inkilow i tinamit chi re' i jun mama' rahp chi suutz' ink'ulik ruyeew riib' chi chii' i santo laj itz'ihy naah paat. Chi kiju'junaal inki xuk'aa' kiib' chuye'ariik ruloq'il i Dios chi chii' i ki-itz'ihy naah paat.

¹¹Eh re' i Dios xub'an ruk'utaaj ruuk' i Moisés, chi je' k'ul wach taqe, je' rukab' noq inki a'n kik'utaaj ki'ib' chi winaq kamigo kiib'. Re' i Moisés inchalik wo' chik aha' wilkeeb' wii' taqe i aj Israel. Eh re' i to'ool reh k'isa k'ijool Josué rak'uun i Nun, ma' nelik ta cho chupaam i santo laj itz'ihy naah paat.

¹²Re' i Moisés je' wili i xuq'or reh i QaJaaw Dios:
Jaaw, re' hat inaq'or weh chi naa nuk'amam reje kib'eeh i tinamit wili, xa re' la' ma' naq'or ta weh awach i naa ataq'aam chi wiij. Eh inaq'or wo' weh chi korik wach nuk'ux, eh chimponik chawach i nuna'ojb'al.¹³Wila' korik inaq'or chi wiij, chayeew weh chi naab'jik chib'ih i naa a'nam wuuk'. Eh re' hin nee wo' nuch'ikaa' nuk'ux awuuk', eh nee wo' nayeew weh awotob'il, k'oloq panak'ux noq re' taqe i tinamit Israel aweh wo' taqe, inki.

¹⁴Re' QaJaaw Dios je' wili i ruchaq'weesjiik i Moisés xub'an:
Re' wo' hin naa wojiik chawiij, eh naa nuye'em ahi'liik, inki.

¹⁵Eh re' i Moisés je' wili i chaq'wik xub'an:
Wila' je' re' ma' xta reet, raaj wila' ma' naa awojiik chiqiij maa qoh awesaj reje chupaam i ye'aab' wili.¹⁶Ruum wila' re' hat ma' naa awojiik chiqiij, ¿Nik' chik wach noq neenqareq chi riij chi k'ahchi' kiin atoob'eem i hin je' wo' hoq aatinamiit? Eh wila' xat'ooj chiqiij neenkikoj rehtaal chu'nchel i tinamit wach ak'al chi re' hat xat sik'wik cho qawach.

¹⁷Re' QaJaaw Dios je' wili i ruchaq'weesjiik i Moisés xub'an: Re' i xaq'or re' re', naa nub'anam ruum korik wach ak'ux, ruum i re' naa areqem i wotob'il, inki.

¹⁸Wila' je' re', cha k'uhtaaj weh aaloq'il cha kuy, inki noq chaq'wik i Moisés.

¹⁹Re' QaJaaw Dios je' wili ruchaq'weesjiik xub'an:
Re' hin naa nuk'uhtaam chawach i nuloq'il, eh naa nuk'uhtaam aweh i runimaal wach i nub'ihnaal i hin, hin Dios. Re' hin naa nuketelaam wach, awach inwaaj nuketelaam awach i hin, eh neenuyeew ruloq'il awach, inwaaj nuye'em reh i hin.²⁰Re' hin korik i nuq'or aweh, chi ma' nee ta rub'an chi nee nawil i nuwach ruum awach i winaq neenilwik reh i nuwach kimik neerub'an, inki.

²¹Eh je' wili i xuq'or i QaJaaw Dios reh i Moisés:
Ayu' ma' najt ta wuuk' wilik jinaj i nimlaj ab'aj, chapab'aa' reje awiib' chinaah.²²Eh noq neenik'ik i rusaqumaal i nuloq'il nee naxit' awiib' chupaam i ruhopil ab'aj re' re', ar neenutz'ap awach chi nuq'ab' korehtaal i nik'ik i rusaqumaal i nuloq'il.²³Eh noq hin chik ik'inaq, neenwesaj i nuq'ab' chawach, xa re' chik i wiij nee nawil eh re' i nuwach ma' naa ta awilom wach, inki. Re' noq xye'arik wo' chik reh i lajeeb' k'uhb'aal i Moisés (Deut 10.1-5)

¹Re' QaJaaw Dios je' wili i xuq'or reh i Moisés:
Re' hat cha yejaa' ki'ib'-oq i tz'ilom ab'aj, je' ruwii' i xnuyeew aweh pampeet. Reh chi neenutz'ihb'aaj chuwach i lajeeb' k'uhb'aal, je' rukab' i xnutz'ihb'aaj pampeet chikiwach i ki'ib' chi tz'ilom ab'aj xaxer wach ak'al.²Eh cha yejaa' wo' awiib', ruum wahq'eq i iqal naa ajohtiik chinaah i yuuq' Sinaí. Eh ar naa kiin rojiik areqem ko chi ju' i yuuq'.³Xa re' la' ma' jino'q i tinamit naa rujohtiik chawiij, eh ma' awach taj i naa rilariik wach chuwach i yuuq' re' re'. Eh ma' xta jino'q i tentzun, ma' xta jino'q i wakax naa rilariik chi k'uxuuj k'im inki a'n chuwach i yuuq', inki.

⁴Re' i Moisés xuyejaa' wo' hoq i ki'ib' chi tz'ilom ab'aj, je' wo' kiwii' xye'arik reh pampeet. Eh kowahq'eq chi junwaar, xuk'am reje i ki'ib' chi tz'ilom ab'aj, eh xjohtik chinaah i yuuq' Sinaí. Je' rukab' i xq'orarik reh ruum i QaJaaw Dios.⁵Re' i QaJaaw Dios xqajik cho pan taxaaj pan jinaj suutz'. Ar xwihik ruuk' i Moisés chinaah i yuuq' Sinaí, xuq'or i runimaal wach i rub'ihnaal.⁶Eh noq xik'ik chuwach i Moisés i QaJaaw Dios je' wili i xuq'or i koq chi kow:
Re' hin i Dios nim waJaawriik, re' hin i Dios q'e' hin atoob', q'e' hin aj keteloom wachiis, ma' jumehq'iil tan chalik nujosq'iil, xti wilik i korik wuuk'.⁷Re' hin korik wach nuk'ux ruuk' i k'axooj, xa jar ch'iht pa' chi k'achareel i neeki-ik'ik, eh i nukuy i kimahk i yiib' wach kib'anik, je' wo' hoq i ma' kinimanik taj i nukuy wo' kimahk. Eh nuyeew wo' taqe chutojariik i kimahk i wilik kimahk, i nuyeew taqe chutojariik i kimahk i kiih kimaam, inki.

⁸Noq xrib'iraj chi je' re' i Moisés, xuxuk'aa' riib', korehtaal xponik rutz'aj wach ak'al ruuk' i yejal wach chulooq'jiik i Dios.⁹Je' wili i xuq'or:
QaJaaw Dios, wila' korik chi naa kiin ak'amam awuuk' panotob'il, taq chiqiij qoh awuuhch'ihleej tii reje. Ruum re' taqe i tinamit wili q'e' kow i kinaah. Xa re' la' i nupahqaaj otob'il aweh, cha kuy i qamahk, je' wo' taqe i yiib' wach inqa a'n, qoh akoj ti chi hoj aatinamiit, inki.

¹⁰Eh re' QaJaaw Dios je' wili i xuq'or:
Re' hin wilik i naa taq nub'anam awuuk', naakilom chu'nchel i tinamit. Wilik taqe ixiik'naah loq'il naa nub'anam ma' jank'al ta imb'aan pan jino'q nimlaj tinamit wilik chinaah i wach ak'al. Eh chawunchelaal taq i hat aj Israel, naa taq awilom chib'ih i naa nub'anam i hin, hin Dios, ruum re' hin xiik'naah loq'il i naa nub'anam taq awuuk'. Re' i aj Israel xq'orarik keh chi ma' naa ta kiloq'em i tiyoox (Deut 7.1-5)

¹¹Re' taq i hat cha a'n taq yu'naak chu'nchel i nuq'orom taq aweh. Eh re' hin naa nukaham taqe reje chawach i aj amorreo, i aj cananeo, i aj heteo, i aj ferezeo, i aj heveo, i aj jebuseo.

¹²Chawik'raaj taq awiib' re' hat i naa taq awokiik ar, maa chih taq ak'ulaa' keh i tinamit chi nee taq i na a'n, re' i wilkeeb' chupaam i ye'aab' re' re', ruum wi chib'ih taq i xak'ulaa' keh, nee taq ti kiyeew panti' k'axik.¹³Chasach la' taq wach i kiartaal, chayojib'eej taqe i kitiyoox ab'aj, oon chee' i korjinaq wii'. Nee wo' taq inasach wach i ki ixoq tiyoox Asera.

¹⁴Je' re' noq maa loq'ej taq i tiyoox, ruum xa re' wo' hin, hin Dios ma' nee ta imponik chi nuwach chi re' taq chik i tiyoox neenaloq'ej.

¹⁵Ma' xta ta taq i naa ak'ulaam keh i wilkeeb' chupaam i ye'aab' re' re'. Ruum wi chib'ih taq i xak'ulaa' keh, nee taq ti kiyuq'eej haa' i hat chi loq'inik, eh chi wi'k nee taq inak'ux aweh inkiyeew chi kimayiij chuwach i kitiyoox noq neenkian i ninq'iij.¹⁶Eh nee-oq inkimin pan kaxáro i kixq'uun kuuk' taq awak'uun i hat, eh nee-oq inkik'am kib'eeh taq awak'uun awixq'uun i hat chi neenkiloq'ej i tiyoox. Ruum re' keh inkiyeew ruloq'il i tiyoox.

¹⁷Re' taq i hat ma' ruk'ul ta taq cha weh chi nee taq inayejaa' jino'q aatiyoox, re' ruuk' i xa haab'isamaj. Re' taqe i ninq'iij inkik'saj chuwach i haab' i aj Israel (Ex 23.14-19; Deut 16.1-17)

¹⁸Eh naa taq awik'sam i ninq'iij re' noq ink'uxarik i kaxlanwi'k ma' kojooj ta ch'amb'eesb'al reh, eh wuquub' q'iij taq naa ak'uxum i kaxlanwi'k re' re'. Eh ixib' poh ruk'amam rub'eeh i haab' noq naa taq a'nam, ruum re' wo' q'iij re' re' nuq'orom i hin. Eh chupaam wo' q'iij re' re', xat elik taq chaloq Egipto.

¹⁹Chu'nchel taq i peet awak'uun, weh taqe, je' wo' i peet kak'uun imaas taqe chikop, re' kak'uun awaakaax, i kak'uun aatentzuun, i kak'uun aakapraax, weh wo' taqe.²⁰Eh re' i peet rak'uun i ati't b'uurux, rak'uun tentzun oon rak'uun kaprax taq i naa aye'em chi jilow, reh chi ma' nee ta taq inakansaj. Raaj wila' ma' xayeew taq i jilow nee taq inak'er i paralaq noq nee taq inakansaj i k'isa b'uurux, eh xanaa wo' taq aye'em i mayiij chikiij taq i peet awak'uun. Ma' awach taj i naa ruchaliik chi ma' xta rumayiij.

²¹Eh waqiib' q'iij taq naa akamaniik, paruwuuq q'iij naa taq ahi'liik atoob' ta paruq'ijil iiwik, oon paruq'ijil jach.

²²Naa wo' taq awik'sam ixib' xamano chi ninq'iij chupaam i ju'jun chi haab'. Re' i runinq'ijiik i peet wach taq atrigo, re' i runinq'ijiik na' cha a'n taq i jach pantaq tz'apaab' ponoq wach reh i haab'.

²³Eh re' taqe i winaq, oxpech naa kojiik chupaam i itz'ihy naah paat chi nulooq'jiik i hin, hin taq aaDios i hat taq aj Israel.²⁴Re' hin naa nukaham taqe reje chawach i tokoom tinamit, re' hin naa nuye'em ruman taq aye'aab' i naa taq nuye'em aweh. Chi je' re' ma' awach ta neenq'uchwik reh taq aye'aab' noq nee taq kinooj aloq'ej oxpech chupaam i haab'.

²⁵Re' taqe i chikop naa taq aye'em chi mayiij, ma' xta chik rukik'eel. Eh ma' naa ta taq aye'em i kaxlanwi'k kojooj ch'amb'esb'al reh. Re' i chikop naa taq aye'em chi amayiij reh i runinq'ijiik i elik chaloq Egipto, ma' naa ta taq amolom i ruqox.

²⁶Eh re' i q'e' holohaq peet wach taq atik naa ak'amam taq reje chi nuwach chupaam i nu itz'ihy naah paat, i hin, hin taq aaWaJaaw aaDios.
Ma' naa ta taq achaq'sam i kok' rak'uun kaprax chupaam i riis ruch'uuch' i kituut, inki Dios. Re' noq xutz'ihb'aaj i Moisés i ruk'uhb'aal i Dios

²⁷Re' QaJaaw Dios je' wili i xuq'or reh i Moisés: Chatz'ihb'aaj taqe i q'orik wili, ruum re' re' taqe i raa' ri'sil i nuk'uhb'aal. Re' i nuyejaa' wach awuuk' i hat, je' wo' hoq i xnuyejaa' kuuk' awuch aj Israel, inki.

²⁸Eh re' i Moisés ka'winaq q'iij, ka'winaq aq'ab' xwihik cho ruuk' i QaJaaw Dios chi ma' rub'anam ta ruwa' ruhaa'. Chupaam i ye'aab' re' re' xutz'ihb'aaj chuwach i ki'ib' chi tz'ilom ab'aj i xuyejaa' wach i Dios ruuk', re' taqe i lajeeb' k'uhb'aal.

²⁹Chi riij i re' xqajik chaloq i Moisés chinaah i yuuq' Sinaí, xuk'am chaloq i ki'ib' chi tz'ilom ab'aj xutz'ihb'aaj taqe wii' i lajeeb' k'uhb'aal. Re' i Moisés xan saqumanik chik i wach noq qajik cho chinaah i yuuq'. Eh re' reh ma' xukoj ta rehtaal chi je' re'.³⁰Eh noq xrilow i Aarón ruch'ihil taqe i ruch aj Israel chi xan saqumanik chik i wach i Moisés, ma' k'isiin taxiyo'jik, ma' xkijil ta i koq kiib' ruuk'.³¹Xa re' la' re' i Moisés xuyuq'eej ruuk' i Aarón je' wo' chu'nchel i k'amal kib'eeh i aj Israel, xiooj ruuk' i Moisés eh xub'an ruk'utaaj kuuk'.³²Eh junk'aam-oq chik kijilim i koq kiib' i keh ruuk' i Moisés, xkijil i koq kiib' chu'nchel i aj Israel. Eh re' Moisés xuq'or keh chu'nchel i xq'orarik cho reh ruum i QaJaaw Dios nah yuuq' Sinaí.³³Noq xukohlaaj q'orik i Moisés kuuk', xub'ur i wach ruuk' jinaj itz'ihy.

³⁴Eh jarpech inooj Moisés chuq'orob'jiik i QaJaaw Dios, i resaj i itz'ihy i rub'ur wii' i wach korehtaal i nelik cho ar. Chi riij i re' i ruq'or wo' chik keh i aj Israel taqe i xq'orarik reh ruum i QaJaaw Dios.³⁵Noq inkilow i aj Israel chi xan saqumanik chik i wach i Moisés, inyojarik paam inaq' kiwach. Re' i Moisés i rub'ur wo' chik i wach ruuk' itz'ihy inkahnik chi b'urlik wach, kore' chik i resaj noq inokik i koq chuq'orob'jiik i QaJaaw Dios. Re' ruq'orariik nik' wach noq wilik i hi'limb'al q'iij

¹Re' i Moisés xumol kiwach chu'nchel i aj Israel, je' wili i xuq'or keh: Re' QaJaaw Dios xuq'or weh chi naa rub'aan chi je' wili:²Waqiib' q'iij taq naa akamaniik, eh re' i ruwuuq q'iij wilik rusantohiil. Eh naa taq ahi'liik chupaam ye'b'al nuloq'il i hin, hin taq aaWaJaaw aaDios, eh wila' awach i xkamanik naa rukanteesjiik.³Re' taq i hat xa aha' pa' taq hat patim, ni xata q'aaq' taq naa aluk'um chupaam i hi'limb'al q'iij, inki. Re' i mayiij xmolarik xkamanik chupaam i santo laj itz'ihy naah paat i Dios (Ex 25.1-9)

⁴Re' i Moisés je' wili i xuq'or keh chu'nchel i tinamit Israel: Re' QaJaaw Dios re' taqe i wili xuq'or weh chi naa rub'aan:⁵Chamol taq chaloq i mayiij chaxilak chi weh i hin, hin taq aaWaJaaw aaDios. Eh xa awach pa' inchalik paránima chi nee ruyeew i rumayiij chuk'am chaloq i oro, i plata, tumiin re' ruuk' i q'an ch'ihch'.⁶Eh itz'ihy q'eqjutik ru kaqiil, raxlumik laj itz'ihy, itz'ihy lino, kaq laj itz'ihy, eh itz'ihy re' ruuk' i rismaal kaprax ruyej-aal.⁷Rutz'uhmal riij imas tentzun iq'omamaj wach ruuk' kaqiq'oom tz'uhuum re' ruuk' i q'e' k'ih tz'aaq. Eh chee' re' ruuk' i acacia holohaq ruyejeb'jiik.⁸Eh aseite re' ruuk' inokik chupaam i saqumb'al, ink'ohnik laj iq'oom re' ruuk' inokik chi aseite reh i kuxesb'al, re' wo' hoq inokik ruuk' i insensia q'e' ink'ohnik.⁹Ab'aj taqe i ónice, ab'aj taqe i k'ih tz'aaq, inkojarik wach kiso' i k'amal kib'eeh aj tiij, re' ruuk' inkojarik chuwach i itz'ihy inkikoj chi' kik'ux i k'amal b'eeh aj tiij. Re' taqe i xa chib'ih jariik xkamanik chupaam i santo laj itz'ihy naah paat i Dios (Ex 39.32-43)

¹⁰Chu'nchel i kichol ruyejeb'jiik i xa chib'ih jariik, inchol ruchaliik kiyejaam taqe i xnuq'or chi naa rukorjiik i hin, hin taq aaWaJaaw aaDios.¹¹Naakiyejaam taqe i wili: Re' i santo laj itz'ihy naah paat, i itz'ihy naah paat, i neenokik chinaah, i lokolaq ch'ihch', i tz'ilom, i b'olob'aq chee' k'amb'al reje reh, taqe i ruch'itil, taqe i naa ruch'ihkiik wii'.¹²Nee wo' inkiyejaa' i loq'laj kaxa, i tz'apb'al naah, i b'olob'aq chee' k'amb'al reje reh, i itz'ihy i chi tasb'al.¹³Nee wo' inkiyejaa' i k'isa mexa, i b'olob'aq chee' k'amb'al reje reh, chu'nchel i naa rukamaniik nah mexa, i kaxlanwi'k naa ruye'ariik chi mayiij chi nuwach i hin, hin Dios.¹⁴Nee wo' inkiyejaa' i ye'aab' kantela reh saqumb'al, taqe i naakikamaniik chi sihq'b'al, taqe i naa rukamaniik ree re', je' wo' aseite naa ruhamariik chupaam taqe i saqumb'al.¹⁵Eh naa wo' kiyejaam i artaal naa ruk'ahtiik wii' i insensia, i b'olob'aq chee' k'amb'al reje reh, i aseite reh kuxesb'al, i insensia q'e' ink'ohnik, i itz'ihy tz'apb'al i koq i chii' i nuSantolaj itz'ihy naah paat.¹⁶Naa wo' kiyejaam i artaal naa ruk'atariik wii' i mayiij, taqe i ch'ihch' hoplaq kiwach re' ruuk' i q'an ch'ihch', b'olob'aq chee' reh i ruq'e'liik k'amb'al reje reh, chu'nchel i naa rukamaniik ar, i tz'aq tuq'aab' ha', i ch'ikaab' reh.¹⁷Naa wo' kiyejaam taqe itz'ihy tasb'al naa rokiik chi chii' i paat, taqe i rupilalixiil, taqe i ch'ikaab' reh, i itz'ihy naa rokiik chi tasb'al panookb'al reh i chii' paat.¹⁸Naa wo' kiyejaam i k'ahaam, taqe i ch'ihch' naa ruchopwiik reh panak'al i rooq i nuSantolaj itz'ihy naah paat i hin, i rooq, ruk'ahamal naa ruchopwiik reh chucheel reje i paat.¹⁹Eh nee wo' inkiyejaa' i kiso' taqe i k'amal b'eeh aj tiij, naa rukamaniik keh noq naa kianam i nukamaj panupaat i hin. Eh naa wo' kiyejaam i ruloq'laj so' i Aarón, je' wo' i kiso' rak'uun re' i naa rukamaniik keh noq naa kianam i nukamaj, inki Dios. Re' i tinamit Israel i xkik'am wo' chaloq i kimayiij

²⁰Chi riij i re' chu'nchel i tinamit Israel xi elik reje ruuk' i Moisés.²¹Eh nik' nimaal i xtz'a'jik i kánima xkiyeew i kimayiij, chu'nchel kik'ux, xkik'am chaloq reh i QaJaaw Dios. Reh chi naa rukorjiik i rusantolaj itz'ihy naah paat molb'al iib', je' wo' hoq i chu'nchel i ajwaal wach. Reh wo' chi naa rukorjiik i kiloq' laj so' taqe i k'amal kib'eeh aj tiij.²²Eh chi winaq chi ixoq, xi chalik chuye'ariik i kimayiij chu'nchel kik'ux. Wilik ixkiyeew chopb'al taqe itz'ihy, lopq'aaq', kotokaq ch'ihch' reh ralaq q'ab'iis, wilik i xkiyeew i karena, ka'xikin. Eh xa chib'ih chik jariik re' ruuk' i oro xkiyeew chi kimayiij chuwach i QaJaaw Dios.²³Wilik i xkiyeew itz'ihy raxmuqik, holohaq itz'ihy, i kaq itz'ihy, i itz'ihy lino, i rismaal riij kaprax, i rutz'uhmal riij tentzun iq'omamaj wach chi kaqiq'oom i tz'uhuum q'e' k'ih tz'aaq.²⁴Eh awach taqe i xkiyeew kimayiij re' ruuk' i plata, re' ruuk' i q'an ch'ihch', chuwach i QaJaaw Dios i xkiyeew. Eh re' taqe i xiye'wik reh i chee' acacia xkiyeew, reh chi naa rukorjiik chu'nchel i ajwaal wach chi naa rukamaniik ar.²⁵Eh re' taqe ixoq kichol ch'ikooj wach itz'ihy, i xkiyeew kitz'ihy re' ruuk' raxmuqik, i itz'ihy q'eqjutik ru kaqiil, i kaq itz'ihy, i itz'ihy lino, reh chi kikem wach.²⁶Re' taqe ixoq kichol b'ark, awach taqe xchalik pankik'ux rub'aan wilik taqe i riij kaprax xkib'arkiij wach.²⁷Eh re' taqe i k'amal kib'eeh i aj Israel, xkiyeew taqe i ab'aj ónice, i ab'aj k'ih tz'aaq, re' ruuk' inkojarik wach kiso' i k'amal kib'eeh aj tiij, re' ruuk' inkojarik chuwach i itz'ihy inkikoj chi' kik'ux.²⁸Wilik i xkiyeew re' ruuk' iq'oom q'e' ink'ohnik, i aseite inokik chupaam i saqumb'al, re' wo' ruuk' i aseite inokik chi kuxesb'al, eh re' wo' ruuk' inokik ruuk' insensia q'e' ink'ohnik.

²⁹Je' re' noq chu'nchel i aj Israel chi winaq chi ixoq, eh re' taqe i xkaaj to'ooj xkiyeew i kimayiij chu'nchel kik'ux reh chi naa rub'aan chu'nchel i xuq'or i QaJaaw Dios reh i Moisés. Re' chi naa rukorjiik taqe i naa rukamaniik chupaam i paat i naa rulooqjik wii' i QaJaaw Dios (Ex 31.1-11)

³⁰Re' i Moisés je' wili i xuq'or keh i aj Israel: Chab'iraj taq i naa nuq'orom aweh, re' i QaJaaw Dios xusik' cho wach jinaj i winaq Bezaleel rub'ihnaal re' ruuk' taqe i riih rumaam i Judá. Re' Bezaleel re' re' rak'uun i Uri, eh riih i Hur.³¹Re' i Dios ruye'em i ruSantolaj Uxlab'al chinaah i winaq re' re', xye'arik runa'ojb'al, ye'arik reh i holohik laj kapeew, xuk'uhtaaj reh chib'ih taqe i naa rub'anam, eh chi wilik taqe i kamanik naa rucholiik rub'aan.³²Nee wo' rub'an ruyejeb'jiik taqe i xa chib'ih jariik ruuk' oro, ruuk' plata, eh je' wo' ruuk' i q'an ch'ihch'.³³Neerub'an rusehkjiik, rukojariik taqe i ab'aj q'e' holohaq, neerub'an rusehkjiik wach i chee', eh xa chib'ih chik jariik taqe i holohaq kamanik neerub'an re' ruuk' taqe i och'imaj kiwach.³⁴Re' Dios xuyeew runa'ojb'al i Bezaleel reh chi naa ruk'uhtaam i kamanik. Eh chi naa ruk'uhtaam i kamanik reh i winaq Aholiab rub'ihnaal, rak'uun i Ahisamac, re' ruuk' i junch'uq chi riih rumaam i Dan.³⁵Ruye'em kina'ojb'al, reh chi xa chib'ih kamanikaal i naa kianam holohaq rub'aan. Re' ruuk' taqe i ch'ikooj kiwach itz'ihy raxmuqik, taqe itz'ihy q'eqjutik ru kaqiil, taqe i kaq itz'ihy, je' wo' taqe i itz'ihy lino, reh chi naa kikemem chuwach i xa chib'ih ch'ikojal.

¹Re' i Bezaleel, i Aholiab, chu'nchel wilik kina'ojb'al chukorb'eesjiik i xa chib'ih jariik. Re' i ye'ooj kina'ojb'al, ye'ooj kikapeb'aal ruum i QaJaaw Dios, chi naa kiyejaam chu'nchel i xa chib'ih jariik i naa rukamaniik chi loq'oomb'al reh Dios chupaam i ru-itz'ihy naah paat. Reh chi naa rub'aan chu'nchel i xuq'or i QaJaaw, inki. Re' Moisés xuq'or chi ma' naa ta chik ruk'amariik chaloq i mayiij

²Re' i Moisés xutaq'aaj ruk'amariik i Bezaleel, i Aholiab, je' wo' chu'nchel i ye'ooj kina'ojb'al ruum i QaJaaw Dios chi naa kianam rukorb'eesjiik taqe i xa chib'ih jariik. Eh wilik taqe i xa pankik'ux chalik i to'ooj chub'aan i kamanik re' re'.³Eh re' i Moisés xuq'asaj keh i kamanoom nik' nimaal i mayiij xkik'am chaloq i aj Israel. Reh chi xkiyejaa' i ajwaal wach chi naa rukorjiik chi loq'oomb'al reh i QaJaaw Dios chupaam i ru-itz'ihy naah paat. Eh re' taqe i aj Israel ma' xkikanaa' ta ruye'ariik i kimayiij, eqal eqal la' inkik'am chaloq, eh xa pankik'ux inchalik.⁴Eh re' taqe i kamanoom xiyej-anik reh taqe i ajwaal wach reh i itz'ihy naah paat re' inlooq'jik wii' i Dios. Re' keh xkikanaa' peet i kamanik k'ahchi' keeb' re' re'.⁵Xooj kiq'or reh i Moisés chi re' taqe i tinamit ma' k'isiin chik k'ihaal i mayiij xkik'am chaloq xik'ik chik chi je' k'ihaal i ajwaal wach, chi reh i kamanik xuq'or i QaJaaw Dios chi naa rub'aan.

⁶Noq xrib'iraj i Moisés chi je' re', xutaq'aaj reje ruq'orariik chi kixilak i aj Israel chi kikanaa' ruk'amariik chaloq i kimayiij chupaam i paat inlooq'jik wii' i Dios chi winaq chi ixoq.
Xa je' chik re' noq ma' i xkik'am ta chik chaloq i kimayiij i tinamit.⁷Je' re' xkian ruum xkilow chi xmoljik chik wach i tz'a'amb'al naa rokiik reh i kamanik, ma' xata re' re' ko wilik la' i xqohxanik. Re' noq xkorjik i rusantolaj itz'ihy naah paat i Dios (Ex 26.1-37)

⁸Re' taqe i q'e' kichol kamanik chi kixilak taqe i kamanoom, re' keh xiyej-anik reh i rusantolaj itz'ihy naah paat i Dios. Eh lajeeb' chi nimaq itz'ihy i xkikoj reh, re' ruuk' i itz'ihy q'eqjutik ru kaqiil itz'ihy lino, re' ruuk' itz'ihy raxmuqik, re' ruuk' kaq itz'ihy, eh i xkiyejaa' wo' hoq ki'ib' chi je' kiwii' ánjel chuwach.⁹Eh re' taqe i ju'jun chi itz'ihy kajlaj b'ara kooq, eh kiib' b'ara kiwach, eliik wach kininqaal chu'nchel.¹⁰Re' ho'oob' chi itz'ihy re' re' xkitiq wach, eh je' wo' chik re' i xkian reh i ho'oob'.¹¹Eh xkikoj wo' hoq i kok' hoop chi chii' i nimlaj itz'ihy xkikoj chi juntar, eh je' wo' re' i xkian reh i xkikoj chi juntar chupaam i kok' hoop re' re' xk'ik'saj i b'arkimaj wach nooq' raxmuqik.¹²Eh lajeeb' roxk'ahl i kok' hoop xkikoj chi chii' i nimlaj itz'ihy xkikoj chi juntar, lajeeb' roxk'ahl wo' chik i xkikoj chi chii' i nimlaj itz'ihy xkikoj chi juntar, b'ak'b'al reh i chii' k'ultar chel.¹³Eh xkiyejaa' i lajeeb' roxk'ahl chik i kok' lokolaq ch'ihch' re' ruuk' i oro. Reh chi xkilo'kiij chaloq i chii' chi juntar, je' wo' chii' wilik chi juntar. Reh chi xuk'ul riib', xa je' chik jinaj chi itz'ihy noq xkorjik i rusantolaj itz'ihy naah paat i Dios.

¹⁴Re' Bezaleel xuyejaa' wo' hoq junlaj chi nimaq itz'ihy re' ruuk' i rismaal riij kaprax, b'urb'al naah i rusantolaj itz'ihy naah paat i Dios.¹⁵Eh re' taqe i ju'jun chi itz'ihy ho'lajuuj b'ara kooq, eh ka'kab' b'ara runinqaal kiwach, eliik wach i kininqaal junlaj chel.¹⁶Re' ho'oob' chi itz'ihy xutiq wach chi juntar, eh waqiib' i xutiq wach i chi juntar.¹⁷Eh xuyejaa' i lajeeb' roxk'ahl chi kok' hoop chi chii' i nimlaj itz'ihy wilik chi juntar, lajeeb' roxk'ahl wo' chik i xkikoj chi chii' i nimlaj itz'ihy xkikoj chi juntar b'ak'b'al reh i chii' k'ultar chel.¹⁸Eh xuyejaa' wo' hoq i lajeeb' roxk'ahl chi kok' loklok laj ch'ihch' re' ruuk' i q'an ch'ihch', reh chi ruuk' i re' xuk'ul riib' i chii' taqe i itz'ihy chinaah i paat, xa je' chik jinaj noq xkahnik.

¹⁹Re' i Bezaleel xuyejaa' i rutz'uhmal riij imas tentzun iq'omamaj wach chi kaqiq'oom xukoj chinaah taqe i itz'ihy b'urb'al naah paat, eh jinaj wo' chik i tz'uhuum re' ruuk' i q'e' holohik xuyejaa' xukoj chi tz'apaab' wach kochinaah taqe itz'ihy.²⁰Eh xuyejaa' wo' taqe i tz'ilom re' ruuk' i chee' acacia xa korik chik kiwach xukanaa' taqe, reh chi xukoj chupaam i santo laj itz'ihy naah paat.²¹Re' taqe i tz'ilom re' re', ho'oob' b'ara kooq, eh oxk'itub' kiwach xub'an.²²Eh xukoj i kiib' chi kok' hoop pantaq kicheel i tz'ilom kojb'al reh i kok' chee' xuk'ul wii' riib' taqe i chii'. Je' re' xub'an reh chu'nchel i tz'ilom xukoj chupaam i rusantolaj itz'ihy naah paat i Dios.²³Juninaq i tz'ilom xuyejaa' re' xukoj chupaam i santo laj itz'ihy naah paat pansak'aaj reje reh i rookb'aal i q'iij.²⁴Eh ka'winaq i ch'ikaab' reh xukoj taqe i tz'ilom re' re', eh re' ruuk' i plata xukoj. Re' ju'jun chi tz'ilom ka'kab' i ch'ikaab' reh xukoj, ar xukoj i ka'kab' chi chopb'al reh i ju'jun.²⁵Juninaq chi tz'ilom xuyejaa' re' xukoj chupaam i santo laj itz'ihy naah paat pantz'eet reje reh i rookb'aal i q'iij.²⁶Eh ka'winaq wo' i ch'ikaab' reh xukoj re' ruuk' i plata, ka'kab' i ch'ikaab' reh i ju'jun chi tz'ilom xukoj.²⁷Eh waqiib' wo' tz'ilom xuyejaa' re' xukoj parookb'aal i q'iij reje reh i santo laj itz'ihy naah paat.²⁸Ki'ib' wo' tz'ilom xuyejaa' reh pantaq tz'u'k reje reh i rookb'aal i q'iij.²⁹Re' taqe i tz'ilom re' re' xkichop kiib' xuk'ulaa' kiwach panyuuq', je' wo' chii' taq chii' ruuk' taqe i chopb'al reh. Je' re' xub'an reh i ki'ib' chi tz'ilom reh pantaq tz'u'k kab'chel.³⁰Je' re' noq xmanlojik i waxiqiib' chi tz'ilom i xokik chupaam kab'chel i rutz'u'kaal paat. Eh waqlaj i ch'ikaab' keh xukoj re' ruuk' i plata, ka'kab' chi ch'ikaab' reh i ju'jun chi tz'ilom xukoj.

³¹Eh ho'oob' wo' hoq i b'olob'aq chee' xuyejaa' re' ruuk' i acacia, reh ruq'e'liik taqe i tz'ilom xukoj pampaat pareelb'aal q'iij reje.³²Eh ho'oob' wo' hoq i b'olob'aq chee' xuyejaa' re' i xukoj chi ruq'e'liik taqe i tz'ilom xukoj reje chi juntar. Ho'oob' wo' chik i b'olob'aq chee' xuyejaa' re' xukoj chi ruq'e'liik taqe i tz'ilom xukoj parookb'aal q'iij chupaam i rusantolaj itz'ihy naah paat i Dios.³³Eh re' ruq'e'liik xukoj panyejaal xik'ik chi juntar, eh panyejaal taqe i tz'ilom xik'ik.³⁴Eh xukoj oro chikiwach taqe i tz'ilom, eh xukoj wo' taqe i kok' kotokaq ch'ihch' re' ruuk' i oro. Eh noq rukojom chik oro chikiij i b'olob'aq chee' re' re' reh ruq'e'liik, xujut chupaam taqe i kotokaq ch'ihch'.

³⁵Xuyejaa' i nimlaj i itz'ihy tasb'al paam i itz'ihy naah paat xlooq'jik wii' Dios. Xuyejaa' ruuk' i itz'ihy lino, raxmuqik, q'eqlumik ru kaqiil, kaq laj itz'ihy, eh xuyejaa' wo' hoq i ki'ib' chi je' kiwii' ánjel chuwach i itz'ihy re' re'.³⁶Chi riij i re' xupab'aa' kijib' i chee' re' ruuk' i acacia, eh kijib' wo' hoq i lokolaq ch'ihch' xuyejaa' re' ruuk' i oro. Ruuk' i re' xulokaa' taqe i rutz'u'kaal i itz'ihy chuwach taqe i chee' re' re', xukoj oro chi riij, eh kijib' wo' ch'ikaab' reh taqe chee' re' re' xukoj, re' ruuk' i plata.

³⁷Eh xuyejaa' i nimlaj itz'ihy, re' ruuk' i holohaq itz'ihy lino, raxmuqik, kaq muqik, kaq laj itz'ihy, eh xukoj i holohaq laj ch'ikooj chuwach. Re' i nimlaj itz'ihy re' re' xukoj panookb'al reh i rusantolaj itz'ihy naah paat i Dios.³⁸Eh xupab'aa' i ho'oob' chi chee' ju'jun i ch'ikaab' reh xukoj re' ruuk' i q'an ch'ihch', eh ju'jun wo' kok' kotokaq ch'ihch' xukoj chuwach i ch'ilaab' reh i nimlaj itz'ihy. Re' taqe i ho'oob' chi chee' xukoj taqe oro chikiij, je' wo' chikiij i ho'oob' chi kotokaq ch'ihch'. Re' noq xkorjik i loq'laj kaxa molb'al reh i tz'ihb'amaj taqe wii' i k'uhb'aal (Ex 25.10-40; 27.1-8; 30.1-10)

¹Re' Bezaleel xuyejaa' wo' hoq i loq'laj kaxa re' ruuk' i chee' acacia xukoj. Eh jinaj b'ara ruuk' junk'itub' i rooq, oxk'itub' i wach, eh oxk'itub' runajtiil naah xub'an.²Eh xub'ur chu'nchel i paam ruuk' i manlik oro, je' wo' chu'nchel i riij, xukoj junrahp i oro chi junsuut.³Xuyejaa' i kijib' chi kok' kotokaq ch'ihch' re' ruuk' i oro, ar xuch'ilaa' pantaq rutz'u'kaal wataq rooq i loq'laj kaxa, ki'ib' i xukoj chi juntar, eh ki'ib' i xukoj chi juntar.⁴Eh xuyejaa' i ki'ib' chib'olob'aq chee' reh ruq'e'liik re' ruuk' i chee' acacia xukoj reh, xukoj oro chi riij.⁵Xuxit' chupaam i kok' kotokaq ch'ihch' wilkeeb' pantaq rucheel i loq'laj kaxa, reh chi ruuk' taqe chee' re' re' inkik'am reje.

⁶Eh xuyejaa' wo' hoq jinaj i tz'apb'al naah i loq'laj kaxa re' ruuk' i manlik oro, jinaj b'ara ruuk' junk'itub' runimaal rooq, eh ox k'itub' i wach xub'an.⁷Eh xuyejaa' i ki'ib' chi je' kiwii' ánjel re' ruuk' i oro, xuch'ey wach chi korik ruuk' tuhyb'al kalawux, k'ul xuyeew taqe pantaq ju' i tz'apb'al naah i loq'laj kaxa.⁸K'ul xuyeew taqe pantaq ju' i tz'apb'al naah kaxa, eh xa jinaj kiwii' xub'an. Jinaj i xutzunaa' panju' chi juntar, eh jinaj i xutzunaa' panju' chi juntar.⁹Re' jinaj k'ul wach ruuk' i jinaj xkahnik, xa re' la' re' tz'apb'al naah i loq'laj kaxa inkilow qohoq. Eh re' i kixiik' he'lik xi kahnik chinaah i loq'laj kaxa, xi kahnik chi rumuuj i ko'lb'al reh.

¹⁰Re' Bezaleel xuyejaa' wo' hoq jinaj i mexa, re' ruuk' i chee' acacia xukoj reh, jinaj b'ara i rooq, ka'k'itub' i wach, eh oxk'itub' i runajtiil naah xub'an.¹¹Eh xub'ur wach i mexa re' re', ruuk' manlik oro, xukoj junrahp chi oro chi junsuut i chii'.¹²Junrahp i ruk'o'nalil wach xukoj i mexa re' re', re' ruuk' och'imaj wach, kajq'ab' i runimaal wach. Eh xukoj wo' chik i koq i xti manlik oro chuwach.¹³Eh xuyejaa' wo' hoq i kijib' chi kok' kotokaq ch'ihch' re' ruuk' i oro, ar xukoj i koq wataq rooq i mexa pantaq rutz'u'kaal.¹⁴Re' taqe i kok' kotokaq ch'ihch', ma' najt ta qohoq chi ri'sil i ruk'o'nalil wach i mexa xukoj. Ar xujut taqe i b'olob'aq chee' inkamanik chi k'amb'al reje reh i mexa.

¹⁵Eh re' ki'ib' chib'olob'aq chee' re' ruuk' i acacia xuyejaa', xukoj oro chi riij, k'amb'al reje reh i mexa.¹⁶Eh re' taqe i xa chib'ih jariik inkamanik nah mexa re' ruuk' manlik oro xuyejaa' taqe wii', re' taqe wili: Re' taqe i pulato, re' taqe i nimaq cucharo, re' taqe i xaro, re' taqe i kulk inkamanik chi k'ulb'al reh i mayiij inkik'am chaloq chi ha'.

¹⁷Re' Bezaleel xuyejaa' i ye'aab' kantela re' ruuk' i manlik oro xukoj reh. Eh xuch'ey wach ruuk' i tuhyb'al kalawux. Eh re' rooq, re' wach'ehk, re' i chi ralaq, eh je' wo' hoq naa ruwihiik wii' i saqum, je' wo' chu'nchel i ruhtz'ub'aal wach, xa jinaj reliik xub'an.¹⁸Eh wuquub' i naah i ye'aab' kantela xuyejaa' jinaj i wilik panyejaal, eh ox ox i q'ab' xuyejaa' chi ju'juntar.¹⁹Eh chi kiju'junaal i waqiib' chi q'ab' xuyejaa' chuwach i runimaal i ye'aab' kantela, re' ju'jun chi q'ab' oxtiq i je' ruwii' kulk xuyejaa' chuwach, je' ruwii' ruhtz'ub'aal almendro, je' wo' taqe i ruk'o'nalil wach.²⁰Eh wach'ehk i runimaal kijib' i je' ruwii' kulk xuyejaa', je' ruwii' ruhtz'ub'aal almendro xuyejaa', je' wo' taqe ruk'o'nalil wach.²¹Eh waqchel q'ab' i nelik cho chuwach i runimaal i ye'aab' kantela, ju'jun i je' ruwii' kulk wilik chi ri'sil.²²Re' taqe i je' ruwii' kulk, je' wo' hoq i runimaal i ye'aab' kantela, re' ruuk' i manlik oro, eh xa jinaj reliik chu'nchel, ch'eyooj wach chi korik ruuk' tuhyb'al kalawux.²³Eh manlik wo' oro xuyejaa' wii' i wuquub' chi ye'aab' kantela, je' wo' taqe i kok' lach' reeh ch'ihch' yok'b'al reh i runoq'il, je' wo' taqe i kok' pulato inkamanik reh.²⁴Re' i xukoj chi yejemb'al reh i ye'aab' kantela, ruch'ihil taqe inkamanik reh ar, ho'oob' aroba rahliil chi manlik oro.

²⁵Re' Bezaleel xuyejaa' wo' hoq i artaal xk'atarik wii' insensia, re' ruuk' i chee' acacia xukoj reh. Kajtz'u'k xub'an reh, ka'k'itub' i runimaal rooq, je' wo' re' i runimaal wach, eh re' i runajtiil naah jinaj b'ara xub'an, re' taqe i ruk'aa' i artaal re' re' xa jinaj reliik ruuk' i runimaal i artaal xub'an.²⁶Eh noq ruyejaam chik, xukoj xti manlik oro chuwach i tz'apb'al naah, je' wo' taqe panjojol kajchel, je' wo' taqe i ruk'aa' xukoj wo' xti manlik oro chi riij, eh xukoj wo' junrahp xti manlik oro chi junsuut i chii'.²⁷Eh xukoj wo' i kok' kotokaq ch'ihch', re' ruuk' taqe i manlik oro, chi ri'sil qohoq i ruk'o'nalil chii' artaal. Ju'jun i xukoj pantaq rutz'u'kaal chi ju'juntar, eh ju'jun wo' xukoj pantaq rutz'u'kaal chi juntar. Reh chi chupaam i kotokaq ch'ihch' re' re' xuxit' i ki'ib' chi chee' k'amb'al reje reh i artaal.²⁸Re' taqe i ruq'e'liik re' ruuk' i chee' acacia xukoj reh, eh xukoj oro chi riij kab'chel.

²⁹Re' Bezaleel xuyejaa' i aseite xti looq', re' inokik chi reh kuxesb'al. Eh xuyejaa' i insensia nkorjik chi re' ruuk' ink'ohnik laj iq'oom je' rukab' inkiyejaa' cho reh ink'ohnik laj iq'oom.

¹Re' Bezaleel xuyejaa' jinaj i artaal, chee' acacia xukoj reh, k'atb'al keh i chikop inye'arik chi mayiij. Eh kajtz'u'k xub'an, ki'ib' b'ara ruuk' junk'itub' i runimaal rooq, je' wo' re' i runimaal wach xub'an. Jinaj b'ara ruuk' jun k'itub' i runajtiil naah.²Eh pantaq rutz'u'kaal i artaal, xukoj ju'jun ruk'aa', eh xa jinaj ruwii' xub'an ruuk' i artaal, xukoj re' ruuk' i q'an ch'ihch' chi riij.³Chu'nchel inkamanik wach artaal q'an ch'ihch' xuyejaa' wii', re' taqe wili: Re' taqe i molb'al chaaj, taqe i likb'al, taqe i nimaq kulk, taqe i lak' lak' reeh ch'ihch', taqe i molb'al nah wach q'aaq'.⁴Re' artaal re' re' xukoj k'isa koraal chi chii', re' ruuk' i q'an ch'ihch' chuwach, waraa' i xuch'ikaa' johtoq koxponik kopanyejaal i artaal.⁵Eh kijib' kotokaq q'an ch'ihch' xukoj pantaq rutz'u'kaal i k'isa koraal re' re', reh chi ar xuxit' taqe i b'olob'aq chee' k'amb'al reje reh.⁶Xuyejaa' wo' hoq i ki'ib' chib'olob'aq chee', re' ruuk' i acacia i xukoj reh, eh xukoj q'an ch'ihch' chi riij.⁷Re' taqe i ki'ib' chi chee' re' re', xuxit' chupaam i kijib' chi kok' kotokaq ch'ihch' wilkeeb' pantaq rucheel i artaal, re' chee' re' re', kikamanik chi k'amb'al reje reh. Re' artaal xa je' ruwii' kaxoon xub'an tz'ilom xukoj reh.

⁸Eh re' Bezaleel ruuk' q'an ch'ihch' ruuk' i kilemoow ixoq kikamanik panookb'al reh i santo laj itz'ihy naah paat molb'al iib', xuyejaa' jinaj i molb'al ha' reh tz'ajb'al iib'. Eh re' i ch'ikaab' reh q'an ch'ihch' xukoj reh. Re' rukorb'eesjiik i tehlik chi junsuut i santo laj itz'ihy naah paat (Ex 27.9-19)

⁹Eh re' Bezaleel xuyejaa' reje i tehlik chi junsuut i itz'ihy naah paat, lajeeb' roxk'ahl b'ara i itz'ihy xukoj reje chib'urb'al pansak'aaj reh i rookb'aal i q'iij, re' ruuk' i itz'ihy lino xukoj.¹⁰Eh juninaq i rooq xukoj, juninaq i ch'ikaab' reh taqe rooq xukoj, re' ruuk' i q'an ch'ihch' xukoj reh. Eh re' taqe i lokolaq ch'ihch', taqe i kok' kotokaq ch'ihch' xukoj reh re' ruuk' i plata.¹¹Eh pansak'aaj reh i rookb'aal q'iij xukoj wo' reje i itz'ihy pan q'e'lik lajeeb' roxk'ahl i b'ara rooq. Juninaq i rooq xukoj, juninaq ch'ikaab' reh taqe i rooq xukoj, re' ruuk' i q'an ch'ihch' xuyejaa' wii'. Eh re' taqe i lokolaq ch'ihch' taqe i kotokaq ch'ihch', re' ruuk' i plata.¹²Eh parookb'aal reje reh i q'iij ho'oob' ru ka'winaq b'ara rooq itz'ihy xukoj, lajeeb' i rooq xukoj, eh lajeeb' ch'ikaab' reh taqe i rooq xukoj. Eh re' taqe i lokolaq ch'ihch' ruch'ihil i kotokaq ch'ihch' xukoj chuwach taqe rooq re' ruuk' i plata.¹³Eh pareelb'aal q'iij reje ho'oob' ru ka'winaq b'ara i itz'ihy xukoj.¹⁴Eh parucheel reje i ookb'al wuquub' b'ara ruuk' ka'k'itub' itz'ihy xukoj, ixib' taqe i rooq xukoj, ixib' ch'ikaab' keh i rooq xukoj.¹⁵Eh parucheel chi juntar i ookb'al, wuquub' wo' b'ara ruuk' ka' k'itub' itz'ihy xukoj, eh ixib' i rooq xukoj, ixib' taqe i ch'ikaab' reh i rooq xukoj.¹⁶Eh chu'nchel i itz'ihy xukoj chi junsuut i tehlik chi junsuut i itz'ihy naah paat inlooq'jik wii' Dios re' ruuk' i itz'ihy lino.¹⁷Chu'nchel i ch'ikaab' reh i rooq i itz'ihy, re' ruuk' i q'an ch'ihch' xuyejaa' wii'. Eh re' taqe i lokolaq ch'ihch', taqe i kotokaq ch'ihch' xukoj chuwach taqe i rooq re' ruuk' i plata. Eh chu'nchel i chee' xukoj chi rooq taqe i itz'ihy kojooj plata chi kiju', eh xukoj wo' chuwach taqe i chee' re' re' kotokaq ch'ihch' re' ruuk' i plata.

¹⁸Re' i itz'ihy xukoj panookb'al reh i tehlik chi junsuut i itz'ihy naah paat, xa holohik chik ruch'ikojal wach re' ruuk' i itz'ihy raxmuqik, eh q'eqjutik ru kaqiil, kaq laj itz'ihy, taqe i holohaq itz'ihy lino. Eh lajeeb' b'ara rooq, eh ki'ib' b'ara ruuk' ka'k'itub' runajtiil naah, eliik wach ruuk' i itz'ihy xukoj chi chii' tehlik chi junsuut i itz'ihy naah paat.¹⁹Kijib' i rooq xukoj, kijib' i ch'ikaab' reh taqe rooq xukoj, re' ruuk' i q'an ch'ihch'. Eh re' taqe i lokolaq ch'ihch' ruch'ihil taqe i kotokaq ch'ihch' reh wataq rooq, re' ruuk' i plata. Re' taqe i rooq itz'ihy re' re' xukoj plata chi ju'.²⁰Eh chu'nchel i ch'ihch' b'ak'alkeeb' wii' i ruk'ahamal i santo laj itz'ihy naah paat, je' wo' hoq i ch'ihch' wilkeeb' chi junsuut i tehlik re' ruuk' q'an ch'ihch'. Re' taqe i xi k'amwik rub'eeh i kamanik

²¹Re' i Moisés xuq'or keh i xiyej-anik reh i santo laj itz'ihy naah paat, chi kitz'ihb'aaj rehtalil nik' k'ihaal i tz'a'amb'al xuk'am i itz'ihy naah paat. Re' i xitz'ihb'anik rehtalil re' taqe i aj Levíta, eh re' Itamar xk'amwik kib'eeh re' rak'uun i Aarón.

²²Re' Bezaleel rak'uun i Uri, riih i Hur, chupaam i junch'uq chi tinamit Judá inchalik. Xuyejaa' chu'nchel i chib'ih jariik xuq'or i QaJaaw Dios reh i Moisés.²³Eh ixto'arik ruum i Aholiab rak'uun i Ahisamac re' ruuk' i riih rumaam Dan. Re' reh aj ch'eyel ch'ihch', aj kemool, aj ch'ikool. Chuwach taqe i itz'ihy raxmuqik, q'eqjutik ru kaqiil, kaq laj itz'ihy, i itz'ihy lino. Re' taqe ch'ihch' xkojarik chi yejemb'al reh i itz'ihy naah paat

²⁴Eh chu'nchel i oro xkamanik reh i ru itz'ihy naah paat i Dios ruch'ihil xkamanik ar, re' taqe i oro xkik'am cho chi kimayiij taqe i aj Israel. Eh re' k'ihaal i oro xkiyeew ach ho'oob' libra ma' kiib' ru ka'winaq kintaal rahliil, re' ruuk' i pajb'al inkikoj parupaat i Dios.

²⁵Eh chu'nchel i plata xkik'am chaloq chi kimayiij ho'lajuuj ru kajwinaq kintaal ruuk' lajeeb' roxk'ahl libra rahliil, re' ruuk' i pajb'al inkikoj parupaat i Dios.²⁶Eh chu'nchel i aj Israel wilik juninaq haab' keh waqiib' siento miil ruuk' ixib' miil ruuk' ho'oob' siento ruuk' lajeeb' roxk'ahl chi kiib'. Re' taqe i ju'jun ho'oob' roxk'ahl libra chi plata xkik'am chaloq chi kimayiij, re' ruuk' i pajb'al inkikoj parupaat i Dios.²⁷Eh re' i plata ho'lajuuj ru kajwinaq kintaal rahliil, re' i xkamanik chi ch'ikaab' reh i jinaj siento chi chee' i xkipab'aa' reh i rooq i rupaat i Dios, ruch'ihil i rooq itz'ihy. Eh ho'lajuuj rukajwinaq libra chi plata i xokik reh i ju'jun chi ch'ikaab' reh i rooq.²⁸Eh ko lajeeb' roxk'ahl libra chik i plata qohxanik, ruuk' chik i re' korjik i kotokaq ch'ihch' taqe i lokolaq ch'ihch' eh re' wo' re' xkikoj chi ju' taqe i rooq.

²⁹Re' i q'an ch'ihch' xkiyeew chi kimayiij i aj Israel, oxlaj roxk'ahl kintaal ruuk' lajeeb' libra rahliil.³⁰Eh ruuk' i q'an ch'ihch' re' re', xkiyejaa' i ch'ikaab' reh i chee' xkipab'aa' panookb'al reh i rusantolaj itz'ihy naah paat molb'al iib'. Ruuk' wo' re' xkiyejaa' i artaal, taqe i koraal ch'ihch' chi chii', je' wo' chu'nchel inkamanik wach artaal.³¹Eh ruuk' wo' q'an ch'ihch' xkiyejaa' i ch'ikaab' reh taqe i chee' xkipab'aa' chi chii' i rusantolaj itz'ihy naah paat i Dios, je' wo' taqe i ch'ihch' kichopwik reh panak'al, je' wo' taqe i ch'ikaab' reh i puerta wilik chi chii' i tehlik wilik chi junsuut i rusantolaj itz'ihy naah paat i Dios. Re' noq xkorjik i kiso' i k'amal kib'eeh aj tiij (Ex 28.1-43)

¹Eh xyejeb'jik wo' i kiso' taqe i k'amal kib'eeh aj tiij, re' inkamanik keh parupaat i Dios. Re' re' xkiyejaa' ruuk' itz'ihy raxmuqik, ruuk' itz'ihy kaq muqik, kaq laj itz'ihy. Je' wo' re' ruyejeb'jiik i ruso' i Aarón i xkian, re' k'amal kib'eeh aj tiij, re' i rukoj noq i rub'an i rukamaj i Dios, xkiyejaa' wo' hoq je' rukab' xq'orarik reh i Moisés ruum i QaJaaw Dios.

²Re' i ruso' ma' nim ta rooq, ma' xta q'ab' xokik oro chuwach, re' ruuk' i itz'ihy raxmuqik, kaq muqik, kaq laj itz'ihy re' ruuk' taqe i itz'ihy lino xkiyejaa' wii'.³Eh xkich'ey wach i oro chi tuhyb'al kalawux xa je' chik nooq' xkikanaa', xkiyok' rooq xa je' chik nooq' noq xkikoj chuwach itz'ihy raxmuqik, kaq muqik, kaq laj itz'ihy, je' wo' chuwach i itz'ihy lino.⁴Eh xkikoj ka'pehr itz'ihy jehlb'al reh nah kitileb', ar i ruk'ul riib' chi kijurub'.⁵Re' i b'ak'b'al paam inchalik chinaah ru k'isiin rooq so', xa jinaj ruwii' ruuk', je' wo' re' ruyejeb'jiik xkian, xkikoj wo' oro chuwach. Eh re' ruuk' i itz'ihy raxmuqik, kaq muqik, kaq laj itz'ihy, eh re' ruuk' i itz'ihy lino xkiyejaa' wii'. Je' wo' rukab' i xq'orarik reh i Moisés ruum i QaJaaw Dios.

⁶Eh xkisehkaaj wach i ki'ib' chi ab'aj ónice, xkikoj ruk'o'nalil wach chi oro, eh xkitz'ihb'aaj i rub'ihnaal i kab'laj chi rak'uun i Israel chuwach, xkik'ot paam taqe i ab'aj i kikoj wii' taqe i b'ihnaal.⁷Eh re' Bezaleel xukoj taqe i b'ihnaal re' re' chuwach i b'ak'b'al reh i kikok' taq rooq so' i rajaaw k'amal b'eeh aj tiij, reh chi ma' naa ta kisahchiik pank'uxliis i kab'laj chi rak'uun i Israel, je' wo' rukab' i xq'orarik cho reh i Moisés ruum i QaJaaw Dios.

⁸Re' i reh chi' kik'ux i k'amal b'eeh aj tiij holohik wo' rub'aan xkian, wo' hoq i kiso' ma' nimaq ta rooq. Re' reh chi' kik'ux xkikoj oro chuwach, eh re' ruuk' raxmuqik, laj itz'ihy, kaq muqik laj itz'ihy, kaq laj itz'ihy, eh re' ruuk' i itz'ihy lino xkiyejaa' wii'.⁹Eh piim xkian kajtz'u'k xkikanaa', eh jinaj mama' k'itub' xkiyeew reh i rooq, je' wo' hoq i wach.¹⁰Kajlok' i holohaq ab'aj i xkikoj chuwach, re' peet lok' xkikoj sardio, crisolito, esmeralda.¹¹Eh re' rukab' lok' xkikoj granate, zafiro, jade.¹²Re' roox lok' xkikoj jacinto, ágata, amatista.¹³Re' i rukajlook' xkikoj topacio, ónice, eh jaspe. Chu'nchel i holohaq ab'aj re' re' oro xkikoj chijehlb'al reh.¹⁴Kab'laj i holohaq ab'aj i xkikoj chuwach i reh chi' kik'ux i k'amal b'eeh aj tiij, ruum chuwach i ju'jun chi ab'aj re' re', tz'ihb'jik i kib'ihnaal i ju'jun ch'uq chi aj Israel. Eh xk'otarik paam ab'aj noq xkojarik ar i kib'ihnaal reh chi xkahnik ar chi jumpech.

¹⁵Eh taxaaj johtoq chi chii' i itz'ihy reh chi' kik'ux i k'amal kib'eeh aj tiij kich'ilaa' i ki'ib' chi karena b'arkimaj wach je' b'ak'b'al, re' ruuk' i xti manlik oro.¹⁶Eh ki'ib' wo' hoq i reh nah kitileb' xyejeb'jik re' ruuk' i oro, eh ki'ib' wo' kotokaq ch'ihch' xyejeb'jik re' ruuk' i oro, xkikoj taxaaj chi chii' i itz'ihy reh chi' kik'ux i k'amal kib'eeh aj tiij.¹⁷Eh re' ki'ib' chi karena oro, xkixit' chupaam taqe i ki'ib' chi kotokaq ch'ihch' wilkeeb' chi chii' i itz'ihy reh chi' kik'ux i k'amal b'eeh aj tiij.¹⁸Eh re' i ki'ib' chi ju' taqe i karena oro, xkixit' chupaam taqe i reh nah kitileb', xkib'ak' chi korik ruuk' i b'ak'b'al reh i ru k'isiin rooq so' i k'amal kib'eeh aj tiij.¹⁹Eh ki'ib' wo' chik i kotokaq re' ruuk' i oro, xkikoj panyuuq' chi chii' i reh chi' kik'ux i k'amal kib'eeh aj tiij ar inkahnik qohoq chuwach i kiso' ma' nimaq ta rooq.²⁰Eh xkiyejaa' wo' chik i kiib' chi kotokaq re' ruuk' i oro, xkikoj chi chii' panyuuq' i itz'ihy reh chi' kik'ux i k'amal kib'eeh aj tiij, re' inkahnik chi chii' i kiso' k'isiin rooq'.²¹Eh kik'ulaa' wach i kotokaq ch'ihch' wili reh i itz'ihy reh chi' kik'ux i k'amal b'eeh aj tiij, ruuk' i kotokaq ch'ihch' wilik chuwach i ru k'isiin rooq so' i k'amal kib'eeh aj tiij xkib'ak' ruuk' i b'arkimaj wach raxmuqik nooq' reh chi re' i reh chi' kik'ux, kochinaah i b'ak'b'al paam xkahnik johtoq, je' rukab' i xq'orarik reh i Moisés ruum i QaJaaw Dios.

²²Re' i kiso' xankitak'aa' chikiij i k'amal kib'eeh aj tiij, raxmuqik laj itz'ihy i xkikoj reh chu'nchel.²³Eh chi chii' i hoop wilik panyejaal inokik wii' i kinaah xkib'ol chii', reh chi ma' nee ta inxih je' rukab' rub'olariik imb'aan i chii' i kok' chaketa ma' xta q'ab' re' ruuk' i tz'uhuum.²⁴Xkikoj wo' ruk'o'nalil chii' i kiso' xankitak'aa' chikiij i k'amal kib'eeh aj tiij, xkikoj re' ruuk' i je' wach granado ruuk' raxmuqik laj itz'ihy, kaq muqik, kaq laj itz'ihy, i itz'ihy lino.²⁵Eh xkiyejaa' i kok' kampano re' ruuk' i manlik oro, kixilakeej ruuk' i je' wach granado i xkikoj reje chi junsuut i chii' i rooq i kiso' xankitak'aa' chikiij.²⁶Iraaj ruq'orom chi xkitus reje i kok' kampano re' ruuk' i oro, eh ju'jun i je' wach granado xkikoj reje chi xilak chi junsuut i rooq' i ruso', je' rukab' i xq'orarik reh i Moisés ruum i QaJaaw Dios.

²⁷Eh re' runim rooq so' i Aarón ruch'ihil taqe i ruso' i rak'uun re' ruuk' i itz'ihy lino xkiyejaa' wii', eh jinaj ixtinchol keem xye'janik reh.²⁸Eh xkiyejaa' wo' hoq inkitak'aa' wach kinaah ruch'ihil i xooyb'al wach, je' wo' hoq i kich'ut weex i itz'ihy lino xkiyejaa' wii'.²⁹Eh re' b'ak'b'al kipaam i k'amal kib'eeh aj tiij re' ruuk' i itz'ihy lino, raxmuqik laj itz'ihy, q'eqjutik ru kaqiil laj itz'ihy, eh kaq laj itz'ihy kiyejaa' wii'. Eh xkikoj taqe i ch'ikooj chuwach, je' rukab' i xq'orarik reh i Moisés ruum i QaJaaw Dios.

³⁰Eh kiyejaa' i k'isa perepik ch'ihch' re' ruuk' i manlik oro, re' re' ink'uhtanik reh chi wilik rusantohiil chuwach i Dios. Eh xkitz'ihb'aaj chuwach chi korik i q'orik wili: xti wilik ruSantohiil i QaJaaw Dios inki.³¹Re' k'isa perepik ch'ihch' re' re', xkib'ak' chi b'arkimaj wach nooq' raxmuqik inka'yik chuwach i rutak'aa' wach naah i k'amal kib'eeh aj tiij. Je' rukab' i xq'orarik reh i Moisés ruum i QaJaaw Dios. Re' noq xkuxik wach rukorb'eesjiik i rusanto laj itz'ihy naah paat i Dios (Ex 35.10-19)

³²Je' wili noq xkuxik wach rukorb'eesjiik i rusanto laj itz'ihy naah paat i Dios, je' wo' hoq i santo laj itz'ihy naah paat molb'al iib'. Re' taqe i aj Israel xkiyejaa' wo' chi korik, je' rukab' i xq'orarik reh i Moisés ruum i QaJaaw Dios.³³Eh kiq'asaj wo' reh i Moisés i rusanto laj itz'ihy naah paat, je' wo' hoq i itz'ihy naah paat inkimol wii' kiib'. Je' wo' taqe i xa chib'ih jariik i kikamanik ar, taqe i lokolaq ch'ihch', taqe i tz'ilom chee', taqe i b'olob'aq chee' reh i ruq'e'liik, taqe i pilalix, taqe i ch'ikaab' reh.³⁴Xkiq'asaj wo' hoq i rutz'uhmal riij imas tentzun iq'omamaj wach chi kaq laj iq'oom b'urb'al naah i paat, je' wo' hoq i tz'uhuum q'e' holohik b'urb'al naah i paat, ruch'ihil i itz'ihy b'urb'al wach i loq'laj kaxa.³⁵Xkiq'asaj wo' hoq i loq'laj kaxa, molb'al reh taqe i k'uhb'aal, ruch'ihil i tz'apb'al naah, je' wo' hoq i b'olob'aq chee' k'amb'al reje reh.³⁶Eh kiq'asaj wo' i mexa, i kaxlanwi'k inq'ahteesjik chuwach i QaJaaw Dios, chu'nchel i xa chib'ih jariik inkamanik nah mexa.³⁷Xkiq'asaj wo' hoq i ye'aab' kantela, re' ruuk' i manlik oro, ruch'ihil taqe i saqum inye'arik chinaah chi tuslik kiwach, je' wo' chu'nchel inkamanik reh ar, ruch'ihil taqe i aseite inokik chupaam taqe i saqumb'al.³⁸Eh kiq'asaj wo' hoq i artaal oro, je' wo' i aseite reh kuxesb'al. Je' wo' i insensia q'e' ink'ohnik, ruch'ihil i itz'ihy inkamanik chi tasb'al chi chii' i ookb'al reh i santo laj i itz'ihy naah paat.³⁹Eh kiq'asaj wo' i artaal re' ruuk' i q'an ch'ihch', i b'olob'aq chee' k'amb'al reje reh, i chah chah wach ch'ihch' re' ruuk' i q'an ch'ihch', je' wo' chu'nchel i xa chib'ih jariik inkamanik ar, je' wo' i tuq'aab' ha', i ch'ikaab' reh.⁴⁰Xkiq'asaj wo' taqe itz'ihy reh chi chii' i paat, taqe i pilalix, taqe i ch'ikaab' reh. Je' wo' hoq i itz'ihy panookb'al reh i paat, je' wo' hoq i itz'ihy xkikoj chii' paat, taqe i k'ahaam, taqe ch'ihch' inchopwik reh panak'al i paat, chu'nchel i xa chib'ih jariik inkamanik chupaam i rusanto laj itz'ihy naah paat i Dios, ruch'ihil i santo laj itz'ihy naah paat molb'al iib'.⁴¹Eh kiq'asaj wo' hoq i kiso' i k'amal kib'eeh aj tiij. Xkiq'asaj wo' ruloq'laj so' i Aarón re' kajaaw i k'amal kib'eeh aj tiij, re' rukoj noq i rub'an i rukamaj i Dios, je' wo' hoq kiso' taqe i rak'uun, xkamanik keh noq xi okik chi k'amal b'eeh aj tiij.

⁴²Re' taqe i aj Israel xkiyejaa' wo' chu'nchel i re', je' rukab' i xq'orarik reh i Moisés ruum i QaJaaw Dios.⁴³Eh noq xrilow i Moisés chi xkiyejaa' i aj Israel chu'nchel je' rukab' i xuq'or i QaJaaw Dios, xukuxisaj chu'nchel i xkiyejaa'. Re' i Moisés xuyeew paruye'aab' i rusanto laj itz'ihy naah paat i Dios

¹Eh re' QaJaaw Dios je' wili i xuq'or reh i Moisés:

²Chupaam i peet q'iij ree poh, naa aye'em paruye'aab' i rusanto laj itz'ihy naah paat Dios, je' wo' hoq i santo laj itz'ihy naah paat molb'al iib'.³Eh ar nee nayeew i loq'laj kaxa molik wii' i ki'ib' chi tz'ilom ab'aj tz'ihb'amaj wii' i nulajeeb' k'uhb'aal, eh nee nab'ur wach ruuk' i itz'ihy.⁴Nee wo' nayeew ar i k'isa mexa, ruch'ihil i ye'aab' kantela, neenayejaa' chi korik paruye'aab'. Neenayeew ar i ye'aab' kantela, eh nee naqop taqe i saqumb'al.⁵Eh nee wo' nayeew ar i artaal oro, k'atb'al reh i insensia, chuwach reje i loq'laj kaxa molik wii' taqe i nuk'uhb'aal nee nayeew. Eh nee wo' nahe' reje wach i nimlaj itz'ihy panookb'al reh i santo laj itz'ihy naah paat naa nulooq'jiik wii' i hin.⁶Eh re' i artaal i naakik'atariik wii' i chikop naakiye'ariik chi mayiij ar nee nayeew reje chuwach i ookb'al reh i santo laj itz'ihy naah paat molb'al iib'.⁷Eh re' i tuq'aab' ha' naa aye'em ha' chupaam, ar naa aye'em panookb'al chi xilak i artaal ruuk' i santo laj itz'ihy naah paat molb'al iib'.⁸Chi riij i re' nee wo' inasutej riij chi itz'ihy i tehlik chi junsuut i paat i naa nulooq'jiik wii'. Eh nee wo' nahe' reje i nimlaj itz'ihy panookb'al reh i tehlik.

⁹Eh neenachop chaloq i aseite reh kuxesb'al, neenajalk'iij chinaah i santo laj itz'ihy naah paat, chikinaah chu'nchel i aye'em chupaam. Je' re' rukuxeesjiik naa a'nam ruch'ihil taqe i xa chib'ih jariik naa rukamaniik chupaam, reh chi neenkahnik chi wilik kisantohiil.¹⁰Eh nee wo' naajalk'iij i aseite chinaah i artaal i naakik'atariik wii' i chikop chi mayiij. Je' wo' chikinaah chu'nchel i xa chib'ih jariik inkamanik ar, je' re' i kikuxesjiik naa a'nam, chi je' re' neenkahnik chi wilik ruSantohiil i artaal.¹¹Eh nee wo' naajalk'iij aseite chinaah i tuq'aab' ha', je' wo' i ch'ikaab' reh, je' re' i rukuxeesjiik naa a'nam.

¹²Chi riij i re' nee nak'am reje i Aarón, ruch'ihil taqe i rak'uun chi chii' i ookb'al reh i santo laj itz'ihy naah paat molb'al iib', neenaq'or keh chi neenkian kitiin.¹³Eh nee nakoj chi riij i ruloq'laj so' i Aarón. Eh neenajalk'iij aseite wach naah reh rukuxeesjiik, chi je' re' neenkahnik chi k'amal b'eeh aj tiij panukamaj.¹⁴Eh nee wo' nayuq'eej taqe awuuk' i rak'uun, reh chi nee nakoj keh i kinimaq rooq so'.¹⁵Eh nee wo' najalk'iij i aseite chikinaah i keh kuxesb'al keh, je' wo' rukab' i naa a'nam reh i kajaaw, reh chi nee wo' kikahnik chi k'amal kib'eeh aj tiij i keh, rehtalil chi naa kikahniik chi k'amal kib'eeh aj tiij kiih kimaam, inki Dios.

¹⁶Eh re' i Moisés xub'an wo' chu'nchel i xti je' rukab' i xq'orarik reh ruum i QaJaaw Dios.¹⁷Eh noq xuk'am rub'eeh i peet poh reh i rukab' haab' keliik cho Egipto, xkich'ikaa' wo' paruye'aab' i santo laj itz'ihy naah paat.¹⁸Re' i Moisés xuch'ikaa' paruye'aab' i santo laj itz'ihy naah paat, xuyejaa' taqe i ch'ikaab' reh, xutus kiwach i tz'ilom paruye'aab', xukoj i chee' reh ruq'e'liik, eh xupab'aa' wo' taqe i pilalix, xkihe' wii' wach i itz'ihy.¹⁹Xuhe' wach i nimlaj itz'ihy chinaah i santo laj itz'ihy naah paat, eh xub'ur wo' naah, chi holohik laj tz'uhuum, je' rukab' i xq'orarik reh i Moisés ruum i QaJaaw Dios.

²⁰Eh xuyeew chupaam i loq'laj kaxa i ki'ib' chi tz'ilom ab'aj i tz'ihb'amaj wii' i lajeeb' k'uhb'aal. Eh xukoj i tz'apb'al naah i loq'laj kaxa, eh kikoj i ki'ib' chib'olob'aq chee' k'amb'al reje reh.²¹Eh xuk'am reje i loq'laj kaxa chupaam i santo laj itz'ihy naah paat. Eh xukoj wo' i nimlaj itz'ihy chib'urb'al wach i loq'laj kaxa, je' rukab' i xq'orarik reh i Moisés ruum i QaJaaw Dios.²²Eh xukoj i koq i k'isa mexa chupaam i santo laj itz'ihy naah paat molb'al iib', pantz'eet reje reh i rookb'aal i q'iij chuwach reje i nimlaj itz'ihy tasb'al.²³Eh kochuwach i koq inkiloq'ej wii' Dios ar kitus wach i kaxlanwi'k chinaah i k'isa mexa. Xub'an wo' hoq i Moisés je' rukab' i xq'orarik reh ruum i QaJaaw Dios.

²⁴Chucheel i k'isa mexa xuyeew i koq i ye'aab' kantela, pansak'aaj reh i rookb'aal i q'iij, pansak'aaj reh itz'ihy tasb'al paam i santo laj itz'ihy naah paat molb'al iib'.²⁵Chi riij i re' xuqop taqe i saqumb'al kochuwach i koq inlooq'jik wii' i QaJaaw Dios.

²⁶Eh re' i artaal oro, xuyeew wo' i koq chupaam i santo laj itz'ihy naah paat molb'al iib', chuwach reje itz'ihy tasb'al.²⁷Xuk'at insensia q'e' ink'ohnik chinaah i artaal, xub'an wo' hoq i Moisés je' rukab' i xq'orarik reh ruum i QaJaaw Dios.

²⁸Eh re' i Moisés xuhe' reje wach i nimlaj itz'ihy panookb'al reh i santo laj itz'ihy naah paat.²⁹Eh panookb'al reh i rusanto laj itz'ihy naah paat i Dios je' wo' hoq i santo laj itz'ihy naah paat molb'al iib' xuyeew i artaal i kik'atarik wii' i chikop chi mayiij. Ar xuk'at taqe i chikop chi mayiij, je' wo' taqe i mayiij xa chi naq'wach, je' rukab' i xq'orarik reh i Moisés ruum QaJaaw Dios.

³⁰Eh re' tuq'aab' ha' ar xuyeew panyejaal i artaal ruuk' i santo laj itz'ihy naah paat molb'al iib', eh xunujisaj chi ha' reh tz'ajb'al iib'.³¹Chupaam i tuq'aab' ha', xuk'am ruhaa' i Moisés, je' wo' hoq i Aarón ruch'ihil taqe i rak'uun reh tz'ajb'al kiq'ab', eh tz'ajb'al kooq.³²Re' keh inkitz'aj kiib' noq kiokik i koq chupaam i santo laj itz'ihy naah paat molb'al iib'. Je' wo' hoq noq kiokik i koq chuwach i artaal, xkian wo' hoq je' rukab' i xq'orarik reh i Moisés ruum i QaJaaw Dios.

³³Eh pantz'apaab' wach, re' i Moisés xukoj reje i itz'ihy chinaah i tehlik wilik chi junsuut i santo laj itz'ihy naah paat, eh chi junsuut i artaal xukoj reje itz'ihy panookb'al reh i tehlik re' re'. Re' itz'ihy naah paat inlooq'jik wii' Dios xuyeew cho riib' i suutz' chinaah (Num 9.15-23)
Je' re' noq xukohlaaj taqe i kamanik re' re' i Moisés.

³⁴Chi riij i re' xqajik chaloq i suutz' chinaah i santo laj itz'ihy naah paat molb'al iib', eh xnujik i ruloq'il i QaJaaw Dios chupaam.³⁵Eh re' i Moisés ma' rub'an ta i koq ookik chupaam i santo laj itz'ihy naah paat re' re', ruum xmuhqik naah chi suutz', eh xnujik wo' hoq chi ruloq'il i Dios.

³⁶Noq i nelik i suutz' chinaah i santo laj itz'ihy naah paat, re' taqe i aj Israel inkuksaj chaloq i ki-itz'ihy naah paat inkichop wo' chik cho kib'eeh.³⁷Eh noq ma' nelik taj i suutz' chinaah i itz'ihy naah paat, re' keh ma' nkuksaj ta chaloq i ki-itz'ihy naah paat, Konkuy-eej chi nelik i suutz'.³⁸Eh pan q'iij re' QaJaaw Dios suutz' i rutaq'aaj cho chikinaah i aj Israel, eh chaq'ab' q'aaq' i rutaq'aaj cho chikinaah. Re' taqe i re' xk'amwik cho kib'eeh nik' najtiil xib'ehik chaloq chupaam i ye'aab' chiq yuuq' korehtaal xi k'ulik.

Bible Society in Guatemala

https://app.library.bible/content/695aa4b9f902778f